Kanë kaluar mbi 8 muaj nga fotoja e 25 Shtatorit 2025 në OKB, New York ku presidentja e Kosovës do të ishte pjestare e një takimi, me praninë e Richard Grenell, asaj kohe drejtor i Qendrës Kulturore John F. Kennedy Washington DC, Presidentit të Shqipërisë Bajram Begaj, Ministres së Jashtme Elisa Spiropali, Ministrit të Jashtëm të Serbisë Marko Gjuriq dhe Ministrit të Jashtëm të Maqedonisë së Veriut Timco Mucunski.

Ky takim do të shënonte një pikëkthese në performancën e Presidentes Vjosa Osmani e do të shoqërohej me veprime të tjera të saj që do të shkaktonin habi e pyetjen e përsëritur “përse” e do të kulmonin me zhgënjimin e 6 Marsit 2026.

Vjosa Osmani nga modeli shembullor i Zyrtares më të lartë Publike, sot është modeli shembullor i rënies rrufeshëm.

Nuk mund të shmanget dyshimi se kundër Vjosa Osmanit ishte organizuar një kurth. Por eksperienca e gjatë e saj në politikë duhej ta bënte vigjilente.

Një gjë s’ka dyshim se fotoja famëkeqe do ta fundoste karierën brilante deri atëherë të Vjosa Osmanit. Asaj kohe nëpër televizionet e Kosovës u shfaq Baton Haxhiu që i doli për zot si organizator takimit të fokusuar në objektiv. Por është e pamundur, që Vjosa Osmani me mbi 25 vjet angazhim në politikë të binte si cironkë në rrjetën e batonëve dhe të hënte sapunin për djathë.

Fakti që Vjosa Osmani e mbajti të fshehtë këtë takim dhe nuk e publikoi në rrjetet sociale do të thotë se e dinte që kishte shkelur në dërrasë të kalbur.

Atëherë përse e ndërmori këtë veprim duke qenë koshiente për pasojat që do t’i shkaktonin metamorfozën duke e transformuar nga një yll i politikës në ngjitje në një yll tashmë të perënduar.

Çfarë kishte ndodhur.

Vjosa Osmani tashmë kishte rrëzuar themelin që e ngriti, kishte prerë në besë e humbur kredibilitetin e atyre që e besuan, përfshi edhe autoren e këtyre rradhëve.

***

Për kronologji, fotoja u botua në mediat e Prishtinës më 26 shtator. Në fillim e përgjysmuar nga Nacionale dhe pastaj e plotë, por e mbuluar nga mjegulla, sepse mediat nuk i dhanë qëllimshëm vemendje për transparencë.

Ndërsa Vjosa Osmani, si presidente nuk dha asnjë shpjegim. Dhe të gjitha shpjegimet gjysmake të mëpastajme nëpër studiot televizive janë një kakofoni arrogance prej kaosi fjalësh.

E keni parasysh logorinë e saj të pandalshme, duke bërë viktimën, që ta lodh veshin nga klishetë propagandistike me mjete tashmë aq të konsumuara duke shpërdorur fotot dhe emrin e liderit indipendentist, që të vrasin sytë e veshët, sepse bien erë myk hipokrizie e shtirje.

***

Kallxo.com më 26 Shtator 2026 do të botonte prononcimin e Bekim Kupinës, këshilltari për media i presidentes i cili për foton në fjalë do të sqaronte se “Ftesa ka qenë për “US- Western Balkans Roundtable”, nga tre përfaqësues të administratës Amerikane Richard Grenell, i dërguar presidencial për misione speciale, Scott Bessent, Sekretari i Shtetit për Thesarin” si dhe serbo-amerikani John Jovanovich.

Në prononcimin e tij Kupina shton se në “këtë takim kanë qenë të ftuara gjashtë shtete të Ballkanit Perëndimor, si dhe Kroacia dhe se të gjitha shtetet e ftuara kanë marrë pjesë”.

Këtu po ndalemi.

Kanë qenë të ftuara gjashtë shtetet e Ballkanit Perëndimor ok. Po në çfarë niveli janë përfaqësuar?

As Kroacia dhe as Mali i Zi nuk e pati Presidentin.

Presidentin nuk e pati as Maqedonia e Veriut, as Serbia.

Veç Kosova u paraqit me Presidenten dhe Shqipëria me Presidentin e Ministren e Jashtme.

Dhe pikërisht këtu ngarërrohet nyja.

Nuk po e diskutoj fare organizatorin, veç rrangun e përfaqësimit aspak të barabartë por disproporcional. Normalisht kemi takime homologësh. Në kontekstin konkret jo.

Serbia u paraqit me Ministrin e Jashtëm ndërsa Kosova me Presidenten, në një konfiguracion alla Kosovo i Metohija. Skandaloze.

Aspak në mënyrë adeguate, as si vend anëtar i NATO-s por në kontekstin e Open Ballkan ishte e pëfshirë edhe Shqipëria.

As në nivel ministrash të jashtëm nuk ka info se ishte përfaqësuar Mali i Zi dhe Kroacia.

Po Presidentja Vjosa Osmani çfarë deshi aty. Është e qartë Begaj dhe Spiropali janë paraqitur me urdhër të Edi Ramës. Hipotezë, dmth edhe Vjosa Osmani ka shkuar aty me urdhër të Edi Ramës.

Në takim nuk ishte Ministrja e Jashtme e Kosovës.

Supozohet se Vjosa Osmani nuk ka pyetur as Albin Kurtin dhe as Donika Gërvallën. Po sipas arsyetimeve hipotetike, Vjosa Osmani i është bashkuar me kokën e saj tryezës, duke iu bindur Edi Ramës.

Mund të themi se takimi me foton e 25 Shtatorit 2025 është pasoja, por shkaku nuk dihet. Pas shtatorit 2025, ne do të shqyenim sytë kur Edi Rama do ta merrte në mbrojtje Vjosa Osmanin nga prokurorët e Gjykatës Speciale, ish kryeprokurorin e së cilës Gjykatë Edi Rama në praninë e Presidentit Trump dhe zonjës në fjalë do ta quante “sikar”.

A nuk ngjan si narracion për triller. Opinioni publik pa edhe të tjera shfaqje jo të zakonshme të presidentes Vjosa Osmani që kulmin e dukjes e arritën më 6 Mars 2026 si epilog i prologut që nisi me foton në fjalë. Flasim gjithmonë për ato që kemi parë e dëgjuar.

Gjithësesi ajo foto e mban në këmbë hipotezën se Vjosa Osmani iu bind Edi Ramës dhe shkoi në takimin e organizuar në OKB, New York, çka e argumenton edhe Berat Buzhala, kur në një opinion të tij shkruan se “Vjosa Osmani kërkoi mbështetjen e Edi Ramës dhe Hashim Thaqit për mandatin e dytë”.

Por duke treguar bindje ndaj Edi Ramës e bënë të tejkalonte cakun, sepse Vjosa Osmani mori pjesë në një takim me format jo të barabartë përfaqësimi, duke e cënuar integritetin e institucionit të Presidentes së Republikës së Kosovës e duke shkelur vijën e kuqe.