Një nga drejtuesit më të lartë të ushtrisë amerikane për operacionet në Lindjen e Mesme i ka bërë thirrje Hamasit të ndalojë dhunën dhe të heqë dorë nga armët, duke reaguar pas raportimeve për përplasje të armatosura dhe ekzekutime publike në Gaza.

Admirali Brad Cooper, komandant i Komandës Qendrore të SHBA (CENTCOM), i ka kërkuar Hamasit që të “pezullojë dhunën dhe të ndalojë sulmet ndaj civilëve palestinezë të pafajshëm në Gaza”.

Në deklaratën e tij, Cooper u bën thirrje drejtuesve të Hamasit të shfrytëzojnë atë që e cilëson si “një mundësi historike për paqe”, duke respektuar plotësisht planin 20-pikësh të paqes të ish-presidentit Donald Trump dhe duke u çarmatosur pa vonesë.

Deklarata e Cooper vjen pas raportimeve për ekzekutime publike të kryera nga pjesëtarë të maskuar të Hamasit në ditët e fundit. Ai shtoi se SHBA ka “shprehur shqetësimet tona” ndaj vendeve ndërmjetësuese për armëpushimin e fundit dhe theksoi: “Ne mbetemi shumë optimistë për të ardhmen e paqes në rajon.”

Ndërkohë, edhe shefi i ndihmës humanitare i OKB-së, Tom Fletcher, ka reaguar, duke thënë se është “thellësisht i shqetësuar për provat e dhunës ndaj civilëve në Gaza”.