Në emisionin e mëngjezit Koha për t’u zgjuar e Bashkim Hoxhës menjëherë pas ceremonisë zyrtare të Ilir Metës si President i Republikës pati një lumë telefonatash të qytetarëve të Shqipërisë që shpreheshin kundër.

Megjithëse Bashkim Hoxha u tha se tanimë ky është një fakt i kryer, bashkëbiseduesit shpreheshin të irrituar dhe mosaprovues, duke bërë thirrje që presidenti duhet të zgjidhet nga populli.

Mosaprovues ndaj zgjedhjes të Ilir Metës ishte edhe gjithë rrjeti social që shpërtheu me statuse antiMeta, në antitezë të plotë me mediumet dhe televizionet qendrimi i të cilave ishte krejtësisht puthador dhe kapitullues ndaj rolit që ka shtypi i lirë.

Por prej 24 korrikut në mbrëmje e në vijim krejt ndryshe nga rebelimi i rrjeteve sociale, shtypi i Tiranës po ashtu ka përcjelle shumë telegrame urimi nga kryetarë shtetesh të Perëndimit dhe BE që ia urojnë detyrën Ilir Metës. Deri tani mungon urimi i Angela Merkelit.

Kjo e rrit indinjatën e opinionit publik sepse Ilir Meta komentohet si njëri prej zyrtarëve të lartë më të korruptuar.

Ndërkohë ai ka dalë me “duar të pastra” sipas verdiktit të drejtësisë shqiptare të cilën e pret Vettingu.

Pas zgjedhjes si president, Ilir Meta po ashtu i është kthyer rolit “me qetësi dhe dashuri”, por kjo nuk e ka larguar shijen e hidhur që la fushata e tij shumë e egër dhe agresive gjatë zgjedhjeve sa bëri që Gramoz Ruçi ta paralajmëronte me shkarkim.

Kemi një situatë shumë absurde sepse Ilir Meta është zgjedhur president i Republikës me votat e shumicës, ndërkohë që LSI tani e drejtuar nga bashkëshortja Monika Kryemadhi bën thirrje për opozitë të fortë, kur për 8 vjet LSI ka qenë pjesë e qeverisjes një herë me PD e pastaj me PS.

Manipulues shihet edhe heqja dorë prej saj nga roli i Zonjës të Parë që konsiderohet antikushtetues, sikur edhe pozita e saj politike bie ndesh dhe krijon konflikt interesi me rolin e presidentit si institucion unifikues mbi palët.

Fakti që Ilir Meta mban funksionin institucional të kryetarit të shtetit dhe bashkëshortja e tij kryeson një nga tre partitë parlamentare shpreh një vullnet të qartë të çiftit për të uzurpuar sa më shumë pushtet politik, çka përbën një precedent të pa hasur më parë të politikës shqiptare.

Ky pozicionim i binomit Meta-Kryemadhi, që mbulohet nga mediat e shitura me heshtje, nuk e qetëson apo fashit reaksionin negativ të opinionit publik ndaj precedentit.