Në të njëjtën ditë, të Dielën më 13 Prill, kur dy partitë kryesore u zhvendosën në Italinë fqinje për takime me zgjedhësit për votën e diasporës, disa Komisariate të Drejtorisë Vendore të Policisë Tiranës nisën monitorimet dhe matjet e nivelit të zhurmave në mjediset që prodhojnë muzikë të lartë. Duket si e rastësishme që ndotja akustike të merret tani si një masë që garanton qetësi për qytetarët në një kohë kur sheshet dhe çdo rrugicë e qytetit dhe jo vetëm lokalet që janë pushtuar nga ekranet e politikës ndodhen në muajin elektoral që padyshim edhe tejkalon interesin e kampionateve të FIFA-s edhe UEFA-s bashkë. Prodhuesit e muzikës ose sipas njoftimit:-“… zbatimin e një plani të posaçëm për monitorimin dhe matjen e nivelit të zhurmës në lokale apo ambiente që gjenerojnë muzikë të lartë”, është një masë e pjesshme dhe e orientuar kryesisht mbi njerëzit, në një kohë kur arteriet kryesore me trafik të rënduar të Tiranës, boritë dhe sirenat, industria e ndërtimit dhe betonizimi që punon edhe në orët pasmesnate, punishtet e kateve përdhese në çdo pallat përbëjnë ndoshta një spektër më të gjerë që monitorues mjedisor të kenë më tepër përparësi se uniformat e policisë në një qytet. Prania e shtuar e uniformave të policisë ose monitorimi vetëm prej tyre në një muaj zgjedhor dhe kur kjo kërkesë siç jepet nga njoftimi nuk ka dalë si bashkërendim me Ministrinë e Turizmit dhe Mjedisit dhe Bashkinë të cilat janë institucione që kanë inspektorët e tyre, por hedhja direkt si një plan  masash i ndërmarrë me iniciativë nga Policia e Tiranës dhe i ndjekur i vetëm sipas njoftimit, tregon se kemi me një njëanshmëri.

Interesante është se inspektorët mjedisorë lihen jashtë monitorimit dhe uniforma e policisë bëhet më e pranishme në jetën publike. Por megjithëse këto gjysmë masash shtohen si për të treguar rregullin, jepen edhe në njoftimet zyrtare të ATSH-s e cila së fundmi ndodhet në gjendje të vështirë për hapësirat dhe vendin në pasqyrimin e subjekteve politike gjatë fushatës.

Partitë e vogla zënë fare pak vend ose mjaftohen me një titull apo një foto plus, ndërsa ndonjë tek tuk zgjatet si pa interes dhe nuk e gjen përputhjen dhe interesanten tek publiku.

Të tilla u renditen për të Dielën 13 Prill, partitë e vogla që çelën zyrtarisht fushatën dhe tabela e “klasifikimit” sipas ATSH-s, ju dha atyre si “lajmi sportiv” me nga një gol të shënuar. Një kronikë lajmi nga kryetarët si p.sh Qorri në Fier me Lëvizjen “Bashkë”, Lapaj në Vlorë me “Nisma Bëhet” një ditë më parë, Shehaj me Partinë “Mundësia” në Tiranë në Pallatin e Kongreseve, ndërsa Basha me Koalicionin Euroatlantik në Selanik.

Standardi i monitorimit të lajmit zgjedhor, sikur të ishim vërtetë në një rezultat me shumë gola në futboll shkon edhe për opozitën ku PD zhvilloi takime në Breshia të Italisë ku u evidentuan në katër lajme  Berisha dhe Mediu, ndërsa për PS standardi ndërrohet, ndërrohet fusha edhe loja kur bie fjala për mbulim mediatik. Mbulimi me lajmeve bëhet sikur shënohet në basketboll me dy dhe tre shifra. Një propagandë e papërsëritshme në llojin e vet megjithëse pa mesazh dhe pa program politik nga një qeverisje dhe personazh që e mbajnë pushtetin prej 12 vitesh. Për të shtuar jo thjeshtë kuriozitetin, por për ta treguar se sa e pamëshirshme është propaganda zyrtare e ATSH ndaj opozitës, monitoruesit vendas dhe të huaj mund të shikojnë faqen në gjuhën angleze. Rezultati do të jetë jo vetëm befasues në shikim, por tërësisht i fshirë për opozitën pasi në rubrikat “General Election” dhe “Latest News” jeton, mesazhon dhe flirton me imazhin vetëm kreu i elitës së Rilindjes Socialiste Rama.

AMMA, KQZ dhe OSBE-ODIHR janë në terren dhe shpresojmë që shkeljet të evidentohen.

Në betejën e imazhit të së Dielës ku padyshim vërehen mbështetësit emigrantë të Italisë që tashmë kanë dy rrugë postën ose udhëtimin drejt Shqipërisë për të votuar me prani fizike dhe dokumentacion identifikues, janë rreth 150 mijë votues të regjistruar në KQZ, vetëm në Itali ata ndikojnë kryesisht në rezultatin e qarqeve  Tiranë, Durrës, Shkodër, Fier, Vlorë. Dhe pavarësisht sa strategjike dhe e mprehtë po zhvillohet beteja përtej Adriatikut nga dy partitë kryesore vihet re se drejtimet janë tërësisht të kundërta në çështjen e demografisë. Pra kur flitet për ndalimin e hemorragjisë së shpopullimit prej emigracionit.

Në qoftë se nga Breshia, demokratët ofrojnë, prodhimin, punësimin, zbutjen e taksave për kthimin emigrantëve në vendin e tyre për ta ndërtuar mirëqenien dhe sigurinë e Shqipërisë, Partia Socialiste nga Milano mbetet tërësisht në një format demagogjie dhe propagande. Ajo tregon se është subjekti politik që mendon vetëm për vjeljen e votave nën premtimin e pasaportës së BE-së që është dyfishuar në numrin e mesazheve që  përcjell Drejtuesi Politik i PS për Diasporën Taulant Balla. Duke tundur dy njëherësh atë shqiptaren e lëvizjes së lirë tani dhe atë italianen që i takonin një qytetari shqiptaro-italian, Balla në dëshirën për ta thjeshtëzuar rastin se vota për mandatin e  katërt të PS i fut shqiptarët në BE, të lë pamend në arsyetim. Siç pohonte ai, se ka një jetë që merret me numrat në parlament, ish Ministri i Brendshëm Balla e kërkon votën duke ironizuar sa opozitën po aq edhe partitë e vogla pasi objektivi i qartë i PS në Kuvendin e Shqipërisë është sundimi njëpartiak, kapja e të gjitha pushteteve, ndryshimi i kushtetutës, pasja e një pluralizmi si fasadë dhe përjetësimi i pushtetit. E gjithë kjo qendron jo thjeshtë në fjalët “zgjidhni vetëm Ramën”, por në një pjesë të fjalimit të tij ku u shpreh:-“… por ka ende ndonjë që mendon: -‘Po e çoj votën këtu, po e çoj votën atje’. As atje, as aty, as tek ata që gjoja shiten për të rinj, por janë më të vjetër se vetë bufi në qasje. Do të kuptoni se atyre nuk u bëni dot asgjë. Maksimumi, njërin prej tyre do t’i jepni një vend pune në parlament. Maksimumi, njëri prej tyre do të zgjidhet deputet tani. Më keni mua këtu që jam marrë gjithë jetën me numrat e parlamentit, dhe një numër në parlament nuk bën dot asgjë. Duhen 84 vota në parlament, jo 71 për të bërë punë. Dhe 84 vota do të ketë vetëm PS falë votës së diasporës”.

Megjithatë pasi dëgjon argumentin e Ballës se: –“Me pasaportën Evropiane vajzat dhe djemtë e Shqipërisë do të mund të studiojnë në çdo universitet të Evropës pa u dashur që të konsiderohen më si studentë ndërkombëtarë, por studentë evropianë. Me pasaportën evropiane çdo shqiptar dhe shqiptare do të mund të ketë leje pune pa u dashur më histori e pafund 30 e ca vjeçare me radhë nëpër questura duke pritur për të marrë permesso di soggiorno, apo si quhen ato lejet e tjera të punës”.