Presidenti amerikan, Donald Trump, nën presion që të zhvillojë hetim të gjerë dhe të pavarur për vrasjen e dytë në Minneapolis nga agjentë federalë brenda pak javësh dhe që t’i tërheqë agjentët e ICE-së nga zona e Minneapolisit, ka folur për gazetën “Wall Street Journal” në një intervistë telefonike pesë-minutëshe të dielën, ka raportuar të hënën (26.01.2026) gazeta britanike, “The Guardian”.

Thuhet se presidenti u pyet dy herë nëse agjenti federal që vrau Alex Prettin kishte vepruar në mënyrë të përshtatshme. Ai u përgjigj: “Po kërkojmë, po shqyrtojmë gjithçka dhe do të dalim me një vendim”.

Ai gjithashtu i ka deklaruar gazetës së kryeqytetit amerikan: “Nuk më pëlqen asnjë e shtënë. Nuk më pëlqen”. Ai ka shtuar: “Por nuk më pëlqen kur dikush shkon në një protestë dhe ka një armë shumë të fuqishme, të mbushur plotësisht me dy karikatorë me plumba gjithashtu. As kjo nuk është mirë”.

Videoja e regjistruar nga dëshmitarët e vrasjes së Prettit tregon se infermieri 37-vjeçar po mbante një telefon, jo një armë, kur u sulmua dhe u qëllua, duke kontestuar drejtpërdrejt pretendimet e zyrtarëve të lartë të administratës Trump se ai kishte kërcënuar “t’i masakronte” oficerët.

Trump gjithashtu ka sinjalizuar në intervistë se përfundimisht do t’i tërheqë agjentët nga Minneapolisi, megjithëse nuk dha ndonjë afat kohor. Ai i ka thënë WSJ-së: “Në një moment ne do të largohemi. Ne e kemi bërë, ata kanë bërë një punë fenomenale”.

“Ne do të lëmë një grup tjetër njerëzish atje për mashtrimin financiar”, ka deklaruar Trump.

Administrata Trump ka shënjestruar Minnesotën gjatë vitit të kaluar për akuza për mashtrim, konkretisht duke ndjekur popullsinë somaleze të këtij shteti amerikan.

Rreth 84 mijë persona me prejardhje somaleze jetojnë në Minnesota, dhe shumica e tyre janë qytetarë amerikanë ose banorë të ligjshëm. Trump ka përdorur një skandal mashtrimi rreth vjedhjes së fondeve federale për programet e mirëqenies sociale në Minesota për të justifikuar dërgimin e agjentëve në shtet.

Përgatiti: Rexhep Maloku – Kallxo.com