Kriza demografike po shndërrohet në një nga rreziqet më të mëdha afatgjata për Ballkanin Perëndimor. Rajoni jo vetëm po humbet popullsi, por kryesisht të rinj, të arsimuar dhe persona në moshë pune, pikërisht grupet mbi të cilat mbështeten rritja ekonomike, tregu i punës dhe financimi i pensioneve.

Analiza “Vrasësi i heshtur i Ballkanit Perëndimor: Rënia demografike dhe humbja e kapitalit njerëzor”, e publikuar nga Instituti Hungarez i Çështjeve Ndërkombëtare (HIIA), argumenton se kjo situatë është krijuar nga dobësia e institucioneve, korrupsioni, mungesa e besimit publik dhe perspektivat e kufizuara ekonomike e profesionale.

Rënia e lindjeve, plakja dhe emigracioni po veprojnë njëkohësisht. Më pak të rinj nënkupton më pak prindër në të ardhmen, ndërsa largimi i popullsisë në moshë pune zvogëlon më tej lindjet, fuqinë punëtore dhe numrin e kontribuuesve në sistemet sociale.

Serbia humbi 437 mijë banorë në një dekadë

Serbia përfaqëson një nga rastet ku rënia natyrore e popullsisë po thellohet. Në vitin 2024, vendi regjistroi 60,845 lindje dhe 98,230 vdekje, duke humbur 37,385 banorë vetëm nga diferenca mes lindjeve dhe vdekjeve. Norma e fertilitetit ishte 1.63 fëmijë për grua, shumë më poshtë nivelit prej 2.1 që nevojitet për zëvendësimin e popullsisë.

Gjatë periudhës 2015-2024, Serbia humbi 437,205 banorë nga rënia natyrore, pa përfshirë këtu pasojat e emigracionit. Kjo është e barabartë me zhdukjen e dy qyteteve të mesme brenda një dekade. Sipas vlerësimeve të tjera të cituara në analizë, Serbia ka humbur afro një milion banorë që nga viti 1991. Humbja e vazhdueshme e popullsisë së kualifikuar po zvogëlon bazën e punonjësve, profesionistëve dhe kontribuuesve të ardhshëm.

Bosnjë-Hercegovina, fertiliteti në nivelin më të ulët

Në Bosnjë-Hercegovinë u regjistruan 26,037 lindje dhe 36,423 vdekje në vitin 2024, duke sjellë një rënie natyrore prej 10,386 banorësh.

Norma zyrtare e fertilitetit zbriti në 1.17 fëmijë për grua, niveli më i ulët i regjistruar në vend. Megjithatë, raporti evidenton se vlerësimet ndryshojnë sipas burimeve dhe se Banka Botërore e llogarit treguesin rreth nivelit 1.5.

Matja e përmasave reale të krizës vështirësohet nga fragmentimi institucional, metodologjitë e ndryshme statistikore dhe mungesa e të dhënave të plota mbi migracionin. Për këtë arsye, rënia e popullsisë mund të jetë edhe më e thellë se ajo që tregojnë statistikat zyrtare.

Bosnjë-Hercegovina renditet gjithashtu ndër vendet me diasporën më të madhe në raport me numrin e popullsisë.

Shqipëria humbi 1.2% të popullsisë brenda një viti

Në Shqipëri, rënia natyrore dhe emigracioni po përforcojnë njëra-tjetrën. Sipas të dhënave të cituara në raport, popullsia e vendit arriti në rreth 2.36 milionë banorë në vitin 2024, duke u tkurrur me 1.2% krahasuar me vitin e mëparshëm.

Rritja natyrore është shumë e kufizuar, ndërsa emigracioni mbetet i lartë. Mosha mediane është rritur në rreth 44.3 vjeç, duke dëshmuar plakjen e shpejtë dhe pakësimin e popullsisë në moshë pune.

Shqipëria renditet ndër vendet me diasporën më të madhe në raport me popullsinë. Përmasat e emigracionit po reduktojnë njëkohësisht fuqinë punëtore aktuale dhe kapacitetin për ripërtëritjen e popullsisë në të ardhmen.

Kosova humbet popullsi pavarësisht shtesës natyrore

Kosova ka popullsinë më të re të rajonit, me moshë mesatare rreth 32 vjeç, por as kjo strukturë demografike nuk po mjafton për të shmangur tkurrjen e popullsisë.

Sipas regjistrimit të vitit 2024, popullsia rezidente ishte rreth 1.59 milionë banorë. Gjatë vitit, shtesa natyrore ishte pozitive me 10,888 persona.

Megjithatë, nga vendi u larguan 37,451 persona, ndërsa hynë 9,038. Bilanci negativ migrator prej 28,413 personash e përmbysi plotësisht shtesën natyrore. Si rezultat, popullsia rezidente u tkurr me 17,525 banorë brenda një viti.

Rasti i Kosovës tregon se emigracioni mund të neutralizojë edhe një raport ende pozitiv ndërmjet lindjeve dhe vdekjeve.

Maqedonia e Veriut, popullsia u tkurr me 5%

Popullsia e Maqedonisë së Veriut vlerësohej në rreth 1.82 milionë banorë në fund të vitit 2024, duke shënuar një rënie prej 5% krahasuar me vitin 2014.

Në vitin 2024 u regjistruan 16,061 lindje dhe 20,201 vdekje, ndërsa norma e fertilitetit ishte rreth 1.48 fëmijë për grua.

Vendi shënoi një bilanc të lehtë pozitiv migrator prej 799 personash, por kjo nuk mjaftoi për të neutralizuar rënien natyrore. Rreth 18% e popullsisë është mbi 65 vjeç dhe mosha mediane ka kaluar 40 vjeç.

Mali i Zi ruan popullsinë falë emigrantëve

Mali i Zi është i vetmi vend i Ballkanit Perëndimor ku popullsia mbetet pak a shumë e qëndrueshme. Kjo nuk lidhet vetëm me treguesit natyrorë, por kryesisht me bilancin pozitiv migrator, të mbështetur nga ardhja e shtetasve rusë dhe turq.

Në vitin 2024, numri i lindjeve ishte vetëm pak më i lartë se ai i vdekjeve, ndërsa norma e fertilitetit ishte 1.8 fëmijë për grua, më e larta në rajon, por përsëri nën nivelin e zëvendësimit.

Mosha mesatare e popullsisë është pak nën 40 vjeç. Megjithatë, personat mbi 65 vjeç përbëjnë 17% të popullsisë, ose rreth 105,700 banorë. Kjo nënkupton se edhe Mali i Zi do të përballet me presion mbi pensionet, shëndetësinë dhe tregun e punës, ndërsa numri i grave në moshë riprodhuese pritet të vazhdojë të bjerë.

Emigracioni po u kushton ekonomive deri në 3% të PBB-së

Pasojat ekonomike shkojnë përtej mungesës së fuqisë punëtore. Vendet e rajonit financojnë arsimin e të rinjve nga buxheti publik, por shumë prej tyre largohen pas përfundimit të studimeve dhe paguajnë taksa në ekonomitë e vendeve pritëse. Në këtë mënyrë, Ballkani Perëndimor financon formimin e kapitalit njerëzor që më pas përdoret nga ekonomitë më të zhvilluara.

Sipas vlerësimeve të cituara nga HIIA, emigracioni mund t’u kushtojë Shqipërisë, Malit të Zi dhe Maqedonisë së Veriut deri në 3% të PBB-së. Për Shqipërinë, kostoja e çdo personi që emigron vlerësohet në rreth 15 mijë euro, me një humbje të përgjithshme vjetore prej afërsisht 559 milionë eurosh. Në Malin e Zi, kostoja tejkalon 21 mijë euro për emigrant dhe rreth 70 milionë euro në vit. Për Maqedoninë e Veriut, humbja llogaritet në rreth 16 mijë euro për person dhe 333 milionë euro në vit.

Për vendet e tjera nuk janë bërë vlerësime të ngjashme, por analiza sugjeron se kostot mund të jenë edhe më të larta, duke pasur parasysh madhësinë e ekonomive dhe popullsive të tyre. Remitancat mbështesin konsumin dhe të ardhurat e familjeve, por nuk e kompensojnë humbjen e kapitalit njerëzor. Pjesa më e madhe e tyre shpenzohet për konsum dhe vetëm një pjesë e kufizuar përdoret për investime prodhuese.

Nuk largohen vetëm për paga më të larta

Diferencat në të ardhura dhe standarde jetese mbeten shtysa të rëndësishme të emigracionit, por nuk janë arsyet e vetme.

Sipas analizës, të rinjtë largohen edhe për shkak të korrupsionit, nepotizmit, dobësisë së shtetit ligjor dhe mungesës së besimit tek institucionet publike. Pasiguria për zhvillimin profesional dhe bindja se lidhjet personale kanë më shumë peshë se aftësitë i shtyjnë shumë të rinj të kërkojnë një të ardhme jashtë vendit.

Mosbesimi shtrihet edhe te sistemet publike të arsimit dhe shëndetësisë. Kur qytetarët paguajnë taksa, por detyrohen t’u drejtohen shërbimeve private, pakënaqësia dhe mungesa e besimit tek shteti thellohen.

Integrimi në BE mund ta përshpejtojë fillimisht largimin

Një nga paradokset e integrimit europian është se heqja e pengesave për punësim dhe lëvizje mund ta përshpejtojë emigracionin nga Ballkani Perëndimor.

Kjo do t’i ndihmonte vendet e BE-së, të cilat po përballen vetë me plakjen dhe mungesën e fuqisë punëtore. Por për rajonin, një valë e re largimesh do të thellonte mungesën e punonjësve dhe profesionistëve. Sipas studimit Kroacia tregon se si mund të zhvillohet ky proces. Nga anëtarësimi në BE në vitin 2013 deri në vitin 2023, nga vendi emigruan rreth 389 mijë persona, një humbje e konsiderueshme për një popullsi prej rreth 3.8 milionë banorësh.

Që nga viti 2022, Kroacia ka shënuar bilanc pozitiv migrator, kryesisht falë punonjësve nga Nepali, India, Filipinet dhe Bangladeshi. Njëkohësisht, rreth 10 mijë kroatë vlerësohet se kthehen çdo vit, të nxitur nga rritja e standardit të jetesës dhe përmirësimi i perspektivës ekonomike.

Rasti kroat tregon se integrimi mund ta thellojë emigracionin në afat të shkurtër, por në një periudhë më të gjatë mund të krijojë kushtet për rikthimin e një pjese të diasporës, nëpërmjet përmirësimit të pagave, infrastrukturës dhe institucioneve.

Bonuset për lindjet nuk mjaftojnë

Qeveritë e rajonit janë përpjekur t’i përgjigjen rënies së lindjeve kryesisht me pagesa dhe bonuse financiare. Sipas analizës, transfertat e drejtpërdrejta kanë ndikim të kufizuar, sepse janë afatshkurtra dhe nuk ndryshojnë kushtet ekonomike dhe institucionale që ndikojnë në vendimin për të krijuar familje.

Mbështetja financiare duhet të shoqërohet me punësim të qëndrueshëm, strehim të përballueshëm, më shumë çerdhe, arsim cilësor dhe mundësi për harmonizimin e punës me jetën familjare. Por edhe këto politika nuk do të mjaftojnë nëse nuk rritet besimi tek institucionet dhe nuk krijohen mundësi të drejta për zhvillim profesional.

Nëse prirjet aktuale vazhdojnë, Ballkani Perëndimor do të ketë më pak punonjës dhe taksapagues, më shumë pensionistë dhe shpenzime sociale, si dhe kapacitete më të dobëta për të tërhequr investime. Në këtë mënyrë, rënia demografike rrezikon të shndërrohet në një proces që ushqen vetveten: ekonomitë më të dobëta nxisin emigracion të ri, ndërsa emigracioni i dobëson më tej ekonomitë e rajonit./ Monitor

Protesta qytetare kundër qeverisë dhe klasës politike hyn sot në ditën e 102-të.

Qytetarët pritet të rikthehen sërish sot në protestë, ndërsa ajo që ndodhi të martën dha sinjale për një ndryshim të mënyrës së reagimit. Përveç marshimeve, protestuesit kaluan në bllokimin për disa minuta të kryqëzimeve dhe akseve të rëndësishme të Tiranës, duke shkaktuar probleme në qarkullimin rrugor.

Dita e 101-të nisi me grumbullimin pranë
Kuvendit, ku po zhvillohej seanca e parë plenare e sesionit të ri parlamentar. Për më shumë se dy orë pati tensione dhe përplasje, ndërsa protestuesit hodhën vezë dhe domate në drejtim të disa automjeteve të deputetëve dhe efektivëve të Policisë.

Pas ndërhyrjes së Policisë për lirimin e zonës pranë Parlamentit, protesta nuk u mbyll. Qytetarët nisën marshimin nëpër Tiranë, duke ndryshuar disa herë destinacionin dhe duke u ndalur në kryqëzime, ku bllokuan përkohësisht trafikun.

Protesta u zhvendos më pas drejt Drejtorisë së Policisë së Tiranës dhe Komisariatit nr. 6, ku qytetarët kërkuan lirimin e personave të shoqëruar gjatë incidenteve të ditës.

“Nuk jeni vetëm” dhe “Lironi shqipet”, ishin disa prej thirrjeve të protestuesve jashtë komisariatit. Gjatë mbrëmjes u lirua edhe gazetari Shpend Gashi, ndërsa gjatë ditës u raportua për rreth 20 persona të shoqëruar.

Kështu, dita e 102-të nis pas një proteste që të martën tregoi një dinamikë të re. Skenat e tensionit pranë Kuvendit janë parë
edhe më herët, por bllokimi i kryqëzimeve dhe qëndrimi për minuta të tëra në rrugë përbënë elementin e ri të reagimit.

Mbetet për t’u parë nëse kjo strategji do të vijojë edhe sot dhe nëse dita e 102-të do të konfirmojë përshkallëzimin e protestës që u pa një ditë më parë. bw

Shënohet sot dita e 101 e protestës qytetare ku kërkesë kryesore mbetet lagrimi i qeverisë dhe dorëheqja e kryeministrit Edi Rama.

Protesta e mbajtur dje kishte një rëndësi të veçantë, për shkak se shënonte plot 100 ditë që shqiptarët kanë mbushur sheshin para Kryeministrisë si reagim ndaj situatës ku ndodhet vendi, aferave të qeverisë, ndërsa pjesë e kërkesave mbetet edhe anulimi i një sërë ligjeve.

Simbolikë e fuqishme e përdorur dje nga qytetarët ka qenë rrethimi i Kryeministrisë me një zinxhir njerëzor.

Ndërkohë thirrjet që ushtonin ishin “Arrestoni Ballukun!” “ Arrestoni Ramën”. gsh

Vijon edhe sot protesta e qytetarëve kundër qeverisë, duke shënuar ditën e 101-të të rezistencës, pas tubimit të 100-të të zhvilluar mbrëmjen e kaluar në kryeqytet.

Prej më shumë se tre muajsh, qytetarët janë mbledhur në mënyrë të vazhdueshme në Tiranë, duke kërkuar dorëheqjen e kryeministrit Edi Rama dhe ndryshime politike. Protestat janë shoqëruar me marshime në rrugët e kryeqytetit, pankarta dhe thirrje kundër qeverisë.

Mbrëmjen e kaluar, protesta e 100-të u zhvillua me pjesëmarrje të qytetarëve në sheshin “Skënderbej” dhe më pas në zonën përpara Kryeministrisë. Protestuesit përsëritën kërkesën për dorëheqjen e Ramës, ndërsa gjatë tubimit u dëgjuan thirrje si “Rama jep dorëheqjen” dhe “Ju erdhi fundi”.

Sot, protesta e 101-të pritet të vijojë me të njëjtën kërkesë kryesore: largimin e kryeministrit Edi Rama. Organizatorët dhe aktivistët kanë bërë thirrje për pjesëmarrje masive të qytetarëve, ndërsa pritet që pas grumbullimit në shesh të zhvillohet edhe marshimi në rrugët e Tiranës. bw

Ishte interesant fakti sot që kur Dita e Protestës shkoi me tre shifra dhe u bë plot 100, në propagandën zyrtare që me siguri për çështje forme zë vend një koment dhe një shkrim rrëke i mbushur me plot etiketime dhe përbuzje (përshkrim i figurshëm ) sigurisht të dala nga një realitet i jetuar për autorin  Brooks Williams*. E ndërsa Rama e udhëzon ose e paralajmëron lexuesin se si duhet “ta përtypë lëndën”, menduam se temperaturat e larta të zgjatura deri në vjeshtë e kanë dëmtuar shumë skemën e luftës mediatike të pushtetit kundër qytetarëve protestues. 

Kryeministri ka nevojë për një ndryshim cilësor. Kur kjo nuk i realizohet ai shpërthen dhe gjen një valvul-shkarkimi pasi vetëm situata e zjarreve ja ka rritur atij presionin për ta treguar se është një administrator i paaftë dhe mbledh të ngjashmit sepse popullsia përcjell situata të përsëritura.

Nga leximi i fundjavës ose sugjerimi i këshilltarëve Rama ka ngecur diku dhe është shprehur:-“Rreshtat më poshtë nuk i kam shkruar unë, po është një nga ato raste kur njeriu thotë: Ah, sikur t’i kisha shkruar vetë…” dhe i lë vendin shkrimit nga autori Brooks Williams i cili tërhiqte vëmendjen me kopertinën e librit “Performative Outrage: How Manufactured Fury Undermines Local Government and Public Service”.

Rama ka plotësisht të drejtë kur ja hedh topin autorit Williams që sigurisht ka një datë botimi në librin e tij një vit më parë. Një rastësi  interesante në ngjasimin e termave të përdorura të cilat nuk po i shtrojmë si shembull pasi kanë autenticitetin dhe autorësinë, kohën çka nuk i bën të dyshosh për plagjarizëm dhe më kryesoren që nuk i bashkon, por i ndan ajo që quhet performancë…realizim.

Këtë nuk ta jep dhe nuk ta thotë dot kryeministri sigurisht kur ndodhet në ditë të vështira dhe ndoshta pa këshillime, pasi i pëlqen mendja e vet dhe i ka marrë tashmë vendimet. Rama i përplas opinionit një shkrim që të justifikojë performancën me zë dhe figurë që nga fushatat zgjedhore e deri tek formatet e komunikimit në mediat sociale. Ai është i njëjti, vetvetja, që është lejuar të tërhiqet nga fijet si një marionetë, një përmushës i nevojave të veta me shfaqjen në art dhe në sport që shkurt i thonë rezultat. 

Në art mediokër.

Në basketboll i bie hekurit.

Nga kjo shfaqje e Ramës në Ditën e 100 të protestës qytetare, autori LD-NY26 sjell skicën “Dinamoviti që Ëndërroi Treshifrat”.

Si njeriun që e përgatit shfaqjen në interes të vet. Shpenzon nga buxheti i shtetit sa të mundet vetëm që të shitet ideja dhe nuk ka asnjë përgjegjësi për rezultatin. Jo vetëm rezultatin, por humbjet e njëpasnjëshme. 

Në rastin e administratorit Brooks Williams, pavarësisht nga mos përcaktimi politik që ai ka, dallon se performanca në punët e bashkisë deri në 94% e kanë bërë atë veç të tjerave të besueshëm për të drejtuar dhe përmirësuar,  qytetin Ferris, në Teksas. Pra me gjithë problemet që është ndeshur, shkrimi i një eseje nga ana e tij për ta shfryrë përbuzjen mbase i është dukur me vend dhe e ka lidhur në një libër. Nuk i është imponuar në fytyrë kundërshtarëve, por ka bërë punën dhe ka marrë votat mbi bazë të performancës.

Ka edhe një qëndrim tjetër Zoti Brooks gjatë muajit Maj 2026 në lidhje me shqetësimet e performancës së pushtetit vendor kur thekson një ide se “ne përmbushim ato çka janë kërkuar dje”. Pra është një mungesë largpamësie që e karakterizon administratën dhe qeverinë shqiptare të politizuar. Ju mund të kujtoni gjuhën ndaj kundërshtarit dhe programin pa mesazh ose me mashtrime që Rilindja Socialiste krijoi për të arritur sot tek kjo krizë. 

Ndaj edhe pse një esse, pjesë e një libri me qëndrime të goditura kjo sillet vonë në tryezë nga Rama. Mbase mund të jetë edhe ndonjë shenjë indirekte përveç valvulës së shkarkimit mbi gjyqësorin. 

Disa pyetje të shpejta mund të ishin se:1- Si u soll me Bashkitë kryeministri pas Zgjedhjeve të 11 Majit? 2-Sa ndërhyri në pavarësinë e pushtetit vendor?, 3- Sa e deformoi deri sot ai Reformën Territoriale dhe e la Kryeqytetin pa Zgjedhje?, 4- Sa po e përdor Veliaj që pas njoftimit nga anonimi Nesti Angoni?, 5- Sa po i vjen në ndihmë situatave të zjarrit në mbarë vendin sikurse rezultatin ja paqmë me përmbytjet e stinës së dimrit brenda këtij viti.

Edhe në formë ka raste që nuk del e keqja ose shfryn përbuzja.

Përse gjen Rama mbështetje në një libër që ka të tilla shpërthime mbi qeverisjen vendore në veçanti?

Ai vetë i ka zgjedhur dhe i ka shoqëruar në burg.

Kujtojmë daljen e Veliajt para Gjykatës që mbante mes duarve Senekën, Librin “mbi Durimin e të Urtit”.

Pra “udhëheqës” që janë shtirur në jetë. 

Shtiren para ligjit. 

Mashtrojnë për performancë në lojë duke premtuar dhe në ndeshje i bien hekurit.

Zero rezultat!

Zero përgjegjësi!

Zero reagim!

Unioni i Gazetarëve Shqiptarë Profesionistë të Diasporës (UGSHPD)

Verband Albanischer Berufsjournalisten der Diaspora (VABD)

Union of Professional Albanian Journalists of Diaspora (UPAJD)

L’Union des journalistes professionnels albanais de la diaspora (UJPAD)

Unione dei Giornalisti Professionisti Albanesi della Diaspora (UGPAD)

_________

*ATSH-Rama ndan shkrimin e Williams: Jeta e përditshme para pasqyrave teknologjike

*Brooks Williams- autor, administrator i qytetit Ferris, në Teksas (SHBA)

*Shfaqja e Përbuzjes: Si e zemërimi i nxitur gërryen shërbimin publik dhe qeverisjen vendore

*ATSH-Rama: 100 mijë të moshuar pensione mbi 300 euro si pasojë e reformës

Sot shënohet dita e 100-të e protestave kundër qeverisë, ndërsa në Tiranë pritet të zhvillohet një tubim i madh qytetar. Pas 100 ditësh protestash dhe marshimesh, aktivistët kanë bërë thirrje për pjesëmarrje masive në protestën e sotme, duke e cilësuar këtë ditë si një moment të rëndësishëm për vijimin e aksionit qytetar.

Protesta e sotme vjen pas tubimit të zhvilluar një ditë më parë, kur qytetarët vijuan marshimin në kryeqytet dhe përsëritën kërkesat e tyre për ndryshim politik. Në qendër të thirrjeve të protestuesve janë dorëheqja e kryeministrit Edi Rama dhe krijimi i një qeverie teknike.

Për protestën e ditës së 100-të, aktivistët kanë bërë thirrje që qytetarët të bashkohen jo vetëm nga Tirana, por edhe nga qytete të tjera të vendit. Aktivisti Ilir Xhemalaj ka kërkuar pjesëmarrje masive dhe ka deklaruar se aksioni duhet të vijojë përmes mosbindjes civile.

Në deklaratat e bëra gjatë ditëve të fundit, aktivistët kanë paralajmëruar edhe përshkallëzim të protestave. Ata kanë folur për vijimin e mosbindjes civile dhe kanë përmendur bllokimin e institucioneve dhe rrugëve si forma të mundshme të aksionit.

Protesta e sotme pritet të jetë një nga tubimet më të rëndësishme të kësaj periudhe, ndërsa mbetet për t’u parë nëse thirrjet për pjesëmarrje masive do të shoqërohen me një mobilizim të gjerë qytetar dhe nëse lëvizja do të kalojë në një fazë të re të mosbindjes civile. bw

Protesta kundër qeverisë hyn sot në ditën e 99-të, ndërsa qytetarët pritet të rikthehen para godinës së Kryeministrisë për të vijuar tubimet e tyre.

Pas afro 100 ditësh protestë, kërkesa e qytetarëve mbetet e pandryshuar: largimi i Edi Ramës nga posti i kryeministrit, dorëheqja e qeverisë dhe ngritja e një kabineti tranzitor.

Një tjetër pikë e rëndësishme e qëndrimit të protestuesve lidhet me disa prej ligjeve të miratuara nga qeveria. Ata kërkojnë të tërhiqen ligji për investimet strategjike dhe ai për zonat e mbrojtura, të cilat prej kohësh janë kundërshtuar nga qytetarë dhe grupe opozitare.

Në prag të nisjes së sesionit të ri parlamentar, protesta pritet të marrë një tjetër formë. Për 8 shtatorin është paralajmëruar përshkallëzim i aksionit, ndërsa protestuesit kanë bërë të ditur se do të presin deputetët me vezë, në shenjë revolte ndaj mazhorancës.

Organizatorët dhe pjesëmarrësit deklarojnë se nuk kanë ndërmend ta ndërpresin protestën. Sipas tyre, qëndrimi në shesh do të vijojë derisa të realizohet kërkesa për ndryshimin e qeverisjes dhe largimin e kabinetit aktual. bw

Pamje të rënda janë regjistruar pas zjarrit masiv që përfshiu zonën e Himarës, duke lënë pas dëme të konsiderueshme në banesa dhe në sipërfaqe me ullinj.

Flakët përfshinë një sipërfaqe të gjerë, ndërsa banorët u përballën me një situatë të vështirë për shkak të përhapjes së shpejtë të zjarrit.

Në pamjet e siguruara pas shuarjes së flakëve, shihen banesa të dëmtuara dhe pemë ulliri të djegura, ndërsa në disa zona ka mbetur vetëm hiri.

Zjarri ka shkaktuar dëme të konsiderueshme në pronat dhe tokat bujqësore të banorëve, ndërsa vijon evidentimi i pasojave dhe i sipërfaqeve të prekura.

Zjarri vijon të jetë masiv, por nuk kërcënon më banesat. bw

Sot shënohen 10 vite nga shenjtërimi i Nënë Terezës, Anjezë Gonxhe Bojaxhiut, si dhe 29 vite nga vdekja e saj.

Ajo u shpall shenjtore nga Papa Françesku, duke marrë emrin Shën Tereza e Kalkutës. Ceremonia e shenjtërimit u zhvillua në Sheshin e Shën Pjetrit në Vatikan dhe u drejtua nga Papa, në kuadër të Jubileut të Mëshirës. Në ceremoni morën pjesë më shumë se 120 mijë besimtarë, mes tyre edhe shumë shqiptarë.

Nënë Tereza, fituese e Çmimit Nobel për Paqen, u shpall shenjtore pas njohjes nga Kisha Katolike të dy mrekullive të lidhura me shërimin e personave të sëmurë pas vdekjes së saj.

Papa Françesku vendosi gjithashtu emrin e Shën Terezës së Kalkutës në Kalendarin e Përgjithshëm Romak, ndërsa 5 shtatori, dita e vdekjes së saj në vitin 1997, u përcaktua si dita e përkujtimit liturgjik të shenjtores.

Procesi i lumturimit të Nënë Terezës kishte nisur më herët. Në tetor 2003, Papa Gjon Pali II e shpalli të lumturuar, pasi Vatikani njohu mrekullinë e parë të lidhur me ndërmjetësimin e saj. Bëhej fjalë për shërimin e një gruaje 30-vjeçare në Kalkutë, e cila vuante nga një tumor në stomak. Një komitet i Vatikanit vlerësoi se shërimi nuk mund të shpjegohej nga pikëpamja shkencore.

Në Shqipëri, 5 shtatori është përcaktuar si ditë përkujtimore për Nënë Terezën, duke zëvendësuar datën 19 shtator, e cila më parë shënonte Ditën e Lumturimit të saj.

Po më 5 shtator shënohet edhe Dita Ndërkombëtare e Bamirësisë, e shpallur nga Asambleja e Përgjithshme e Kombeve të Bashkuara në nder të Nënë Terezës.

Anjezë Gonxhe Bojaxhiu lindi më 26 gusht 1910 në Shkup. Në vitin 1929 ajo nisi misionin e saj në Kalkutë dhe në vitin 1950 themeloi Kongregatën e Misionareve të Dashurisë. Përmes këtij misioni, ajo iu përkushtua përkujdesjes ndaj njerëzve të varfër, të sëmurë dhe në nevojë në vende të ndryshme të botës.

Në vitin 1979, Nënë Tereza u nderua me Çmimin Nobel për Paqen për punën e saj humanitare. Ajo kërkoi që fondet e çmimit të përdoreshin për të ndihmuar të varfrit.

Nënë Tereza e vizitoi Shqipërinë pas rënies së regjimit komunist, ndërsa kishte ardhur në vend edhe më herët, në vitin 1989. Gjatë vizitave të saj ajo takoi familje me të cilat kishte lidhje farefisnore, fëmijë, besimtarë dhe autoritete të larta të vendit.

Në Shqipëri ajo kontribuoi gjithashtu në hapjen e shtëpive të Misionareve të Dashurisë, të cilat vijojnë të ofrojnë shërbime për njerëzit në nevojë.

Nënë Tereza u nda nga jeta më 5 shtator 1997, në moshën 87-vjeçare. Sot, 29 vite pas vdekjes së saj dhe 10 vite pas shenjtërimit, ajo vijon të konsiderohet një prej figurave më të njohura të humanizmit dhe bamirësisë në botë. gsh