Dialogu mes Kosovës dhe Serbisë, do të jetë në rend dite në takimin e Këshillit Evropian, që zhvillohet të enjten dhe premten në Bruksel.

Po ashtu, pajtueshmëria e arritur mes kryeministrit të Kosovës, Albin Kurti dhe presidentit serb, Aleksandar Vuçiq, më 18 mars në Ohër, për zbatimin e Marrëveshjes drejt normalizimit të marrëdhënieve mes dy vendeve, do të jetë pjesë e konkluzave të këtij takimi të liderëve të BE-së.

Marrëveshja me 11 nene, e bërë publike më 27 shkurt, nuk e obligon Serbinë që ta njohë Kosovën, por kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.

Ajo kërkon, po ashtu, nga palët që t’i zbatojnë të gjitha marrëveshjet e arritura deri tash në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë, të cilin Qeveria në Prishtinë e ka refuzuar deri tash, me arsyetimin se mund të rrezikojë funksionalitetin e shtetit.

Radio Evropa e Lirë ka pasur qasje në draftin e konkluzave nga samiti i BE-së dhe në të gjendet edhe paragrafi në të cilin përshëndetet arritja e marrëveshjes në Ohër.

“Këshilli Evropian mirëpret marrëveshjen e arritur në dialogun e lehtësuar nga Bashkimi Evropian për aneksin e implementimit të Marrëveshjes drejt normalizimit të raporteve mes Kosovës dhe Serbisë, dhe u bën ftesë të dyja palëve që në mënyrë të përshtatshme dhe në mirëbesim, të implementojnë obligimet e tyre përkatëse”, përmendet në draft të raportit.

Krerëve të shteteve anëtare të BE-së, do t’iu raportojë në këtë temë edhe kryediplomati i bllokut evropian, Josep Borell.

Ai ka raportuar për këtë çështje edhe të hënën para ministrave të Jashtëm të vendeve anëtare.

Arritjen e pajtueshmërisë në Ohër, Borell e ka quajtur “status quo të re”, në dialogun mes Kosovës dhe Serbisë, e cila do të mundësojë kalimin nga një fazë e krizave në fazën e zbatimit të marrëveshjes.

Në samitin e fundit të Bashkimit Evropian, të mbajtur në muajin shkurt, liderët e BE-së e kanë mbështetur propozimin e BE-së për normalizim të marrëdhënieve dhe u kanë bërë thirrje Kosovës dhe Serbisë që ta pranojnë atë.

Përmes përfshirjes së kësaj çështjeje në Këshillin Evropian, BE-ja dëshiron të dërgojë porosi sesa lart në agjendën e saj është normalizimi i marrëdhënieve mes Kosovës dhe Serbisë.

Me ndërmjetësimin e BE-së dhe mbështetjen e SHBA-së, Kosova dhe Serbia janë në negociata për normalizimin e marrëdhënieve qysh nga viti 2011.

Ato kanë arritur dhjetëra marrëveshje, por shumica e tyre nuk janë zbatuar dhe palët kanë fajësuar njëra-tjetrën për ngecje.

Ukraina tha të martën se raketa ruse janë shkatërruar gjatë një shpërthimi në Gadishullin e Krimesë.

Ky gadishull ukrainas u aneksua paligjshëm nga Rusia më 2014.

Megjithatë, Kievi mohoi përgjegjësinë për këtë incident “misterioz”.

“Një shpërthim në qytetin Dzhankoi në veri të Krimesë së pushtuar përkohësisht shkatërroi raketat ruse Kalibr-NK, teksa ato po transportoheshin përmes trenave”, tha inteligjenca ushtarake ukrainase përmes një njoftimi të publikuar në rrjetet sociale.

Hetuesit rusë më herët kishin deklaruar se sistemet e mbrojtjes ajrore kishin zmbrapsur sulme me dronë në Dzhankoi dhe se pjesët e shkatërruara të dronëve dëmtuan një dyqan dhe një shtëpi, duke lënë të plagosur një person.

“Dronët e shkatërruar ranë në objekte civile”, tha Komiteti hetues rus përmes një deklarate.

Dzhankoi është një qendër logjistike dhe gjendet mes Krimesë së kontrolluar nga rusët dhe jugut të Ukrainës, që është pushtuar nga forcat ruse pasi Moska nisi pushtimin e Ukrainës shkurtin e vitit të kaluar.

Oleg Kryuchkov, një këshilltar i kreut të instaluar rus në Krime, tha se sulmi duket se ishte “hakmarrje” për aneksimin.

Ky shpërthim ndodhi disa ditë pasi Moska festoi 9-vjetorin e aneksimit të gadishullit.

Presidenti rus, Vladimir Putin, gjatë fundjavës që shkoi vizitoi Krimenë. Kjo ishte vizita e tij e parë në këtë gadishull, që kur ai urdhëroi dërgimin e trupave në Ukrainë më 24 shkurt 2022.

Përfaqësuesi i Politikës së Jashtme të Bashkimit Evropian, Josep Borell, ka treguar se për dialogun Kosovë-Serbi sot ka raportuar në kuadër të takimit të ministrave të jashtëm të Bashkimit Evropian.

Ai, pas takimit në një konferencë për media, ka thënë se të gjitha shtetet e BE-së e kanë shprehur përkrahjen e tyre për arritjen e fundit që është bërë në dialog, lidhur me aneksin e marrëveshjes që u arrit në Ohër, e propozuar nga Bashkimi Evropian.

“Më në fund e kam informuar Këshillin e Ministrave të Jashtëm të Bashkimit Evropian për arritjen e dakordimit për marrëveshjen e BE-së në kuadër të dialogut Kosovë-Serbi. Kjo marrëveshje krijon një status-quo të re në dialog, ne më nuk jemi duke shpresuar se do të mbetemi më gjatë në situatë krize”.

“Por në implementimin e marrëveshjeve që u arritën më 27 shkurt, këto marrëveshje që ata kanë rënë dakord do të hyjnë në funksion në momentin kur unë kam publikuar deklaratën, apo qëndrimin. Nënshkrime nuk pati për arsye ligjore, por të dyja palët kanë rënë dakord që deklarata ime ishte një përkushtim për ata që të përmbushin obligimet që vijnë nga kjo marrëveshje”, ka thënë Borrell.bw

Sllovakia miratoi të premten një plan për t’i dërguar Ukrainës avionë luftarakë MiG.

Sllovakia është vendi i dytë i NATO-s, pas Polonisë, që i përgjigjet pozitivisht kërkesave të përsëritura të Presidentit ukrainas Volodymyr Zelenskyy për avionë në betejën e vendit të tij kundër agresionit rus.

Kryeministri sllovak Eduard Heger tha se vendi i tij është “në anën e duhur të historisë” me dërgimin e flotës prej 13 avionësh MiG-29 në Ukrainë.

Ndërkohë ushtria ruse dhe forcat private të Grupit Wagner kanë fituar kohët e fundit terren në perëndim të lumit Bakhmutka në qytetin Bakhmut, sipas informacioneve nga Ministria britanike e Mbrojtjes.

Forcat ukrainase vazhdojnë të mbrojnë pjesën perëndimore të qytetit, sipas këtyre informacioneve.

Po sipas Ministrisë britanike të Mbrojtjes, intensiteti i luftimeve nga ana e forcave ruse është ndër më të ulëtit që nga janari.

“Arsyeja ka shumë të ngjarë të jetë dobësimi i fuqisë së tyre luftarake deri në atë masë sa edhe veprimet sulmuese lokale nuk janë aktualisht të qëndrueshme,” thotë Ministria.

Forcat ruse pritet ta rrisin “kapacitetin e tyre sulmues” sapo të plotësohen rezervat e personelit dhe municioneve, sipas të dhënave britanike.

Polonia do të dërgojë në Ukrainë katër avionë MIG-29 gjatë ditëve në vijim.

Lajmin e ka bërë të ditur  presidenti Andrzej Duda në një mesazh në Twitter.

“Në ditët në vijim, ne do t’i dorëzojmë Ukrainës 4 avionë MiG-29. Avionët pritet të dorëzohen së shpejti,” tha ai.

Një nga mbështetësit më të vendosur të Ukrainës, Varshava ka marrë një rol udhëheqës në bindjen e aleatëve ndonjëherë hezitues për të furnizuar Kievin me armatime të rënda. Ai ka thënë se çdo transferim i avionëve do të bëhet si pjesë e një koalicioni.

Aleatët e NATO-s në ish-lindjen komuniste si Polonia dhe Sllovakia kanë qenë veçanërisht mbështetës të zëshëm të Kievit që kur Rusia pushtoi Ukrainën më 24 shkurt 2022.

Sllovakia gjithashtu ka konsideruar nëse do të dërgojë avionë MiG-29 në Ukrainë, por ende nuk ka marrë një vendim. syri.net

Polonia ka shkatërruar një rrjet spiunazhi që vepronte në vend, konfirmoi ministri i Mbrojtjes të enjten, pasi transmetuesi privat RMF FM raportoi se një grup spiunësh që punonin për Rusinë ishin arrestuar.

RMF raportoi të mërkurën se shërbimet polake të sigurisë kishin arrestuar gjashtë persona të dyshuar për spiunazh për Rusinë.

Sipas transmetuesit, grupi kishte planifikuar aktivitete sabotuese.

“Dua të theksoj suksesin e madh të arritur nga oficerët e Agjencisë së Sigurisë së Brendshme, sepse i gjithë rrjeti i spiunazhit është çmontuar”, tha ministri Mariusz Blaszczak.

“Kjo është padyshim dëshmi se shërbimet polake punojnë për sigurinë e vendit tonë në një mënyrë shumë efikase”, shtoi ai.

Blaszczak nuk pranoi të komentojë më tej mbi rastin dhe tha se më shumë detaje do të njoftohen nga ministri i Brendshëm Mariusz Kaminski, në një konferencë për media.

Të mërkurën, presidenti polak Andrzej Duda u takua me drejtorin e CIA-s, William Burns. Zyra e presidentit tha në Twitter se ata diskutuan “situatën aktuale të sigurisë”.

Sipas raportit të RMF, gjashtë personat e arrestuar ishin nga qytete në lindje të Polonisë dhe punonin për inteligjencën ruse.

Spiunët kishin vendosur kamera të fshehura në rrugë të rëndësishme hekurudhore, kryesisht në një rajon jugor të vendit.

Sipas RMF, kamerat u gjetën pranë aeroportit Jasionka afër Rzeszov, i cili është bërë një pikë kyçe e transferimit të armëve dhe municioneve që dërgohen në Ukrainë.

Sekretari i Këshillit të Sigurisë Kombëtare dhe Mbrojtjes së Ukrainës, Oleksiy Danilov deklaroi se incidenti në Detin e Zi, ku u rrëzua një dron amerikan, tregon se presidenti rus, Vladimir Putin kërkon të zgjerojë zonën e konfliktit, përtej Ukrainës.

“Incidenti me dronin amerikan MQ-9 Reaper, i provokuar nga Rusia në Detin e Zi, është sinjali i gatishmërisë së Putinit për të zgjeruar zonën e konfliktit me përfshirjen e palëve të tjera”, shkroi ai në rrjetet sociale.

Sipas tij, Rusia kishte një taktikë për të bërë gjithçka për të mos pësuar një disfatë në Ukrainë, pas më shumë se 1 viti luftë.

Ndërkaq, sipas Kremlinit, marrëdhëniet SHBA-Rusi janë në nivelin më të ulët. Ditën e djeshme, Uashingtoni akuzoi Moskën për rrëzimin e një prej dronëve të saj mbi Detin e Zi.

Zëdhënësi i Kremlinit, Dmitry Peskov tha se nuk kishte kontaktuar me ndonjë zyrtar të nivelit të lartë të SHBA-së në lidhje me incidentin por tha se Rusia nuk do të refuzonte kurrë të angazhohej në dialog konstruktiv.bw

Presidentja e Komisionit Evropian, Ursula von der Leyen, ka theksuar të martën (më 14.03.2023) shpresën e saj se Serbia dhe Kosova do të jenë “shumë konstruktive” në bisedimet që do të rifillojnë të shtunën e ardhshme nën kujdesin e Bashkimit Evropian.

“Kjo është mundësia, tani, që të dyja palët të shfrytëzojnë momentin dhe një normalizim është parësor ose vendimtar për sigurinë, stabilitetin dhe prosperitetin e rajonit. Kështu që unë shpresoj shumë që të dyja të jenë shumë konstruktive në bisedimet e ardhshmem”, tha Von der Leyen në një takim me “Redaccion Europea de Agencias” (ENR).

Presidenti i Serbisë, Aleksandër Vuçiç dhe kryeministri i Kosovës, Albin Kurti, do të takohen me shefin e diplomacisë evropiane, Josep Borrell, më datë 18 në Ohër (Maqedoni e Veriut).

Të dy vendet po negociojnë për normalizimin e marrëdhënieve të tyre bazuar në një plan të ri, të promovuar nga BE dhe mbështetur nga SHBA, e pranuan muajin e kaluar.

“Lufta në Ukrainë nënvizon rëndësinë gjeostrategjike të procesit të zgjerimit” të BE-së dhe “ne duam t’i sjellim partnerët tanë të Ballkanit Perëndimor sa më afër dhe sa më shpejt të jetë e mundur me Bashkimin Evropian”, shtoi shefja e ekzekutivit e BE.

Nëse zbatohet, plani do të shënojë një hap të rëndësishëm përpara në procesin e vështirë të nisur në vitin 2013 nën kujdesin e BE-së për të rregulluar lidhjet e tyre.

Ai parashikon, ndër të tjera, që Beogradi dhe Prishtina të njohin dokumentet zyrtare të të dy vendeve, në mënyrë që qytetarët e tyre të mund të udhëtojnë lirshëm ndërmjet territoreve të dy kombeve. syri.net