Një ligjvënës i një shteti amerikan, mbështetës i zotit Trump, i cili filmoi veten duke sulmuar Kapitolin e Shteteve të Bashkuara dhe një burrë nga Arkansasi i cili u fotografua i ulur në zyrën e Kryetares së Dhomës së Përfaqësueve Nancy Pelosi, janë mes dhjetëra protestuesish të akuzuar deri tani nga prokurorët federalë si pjesë e një hetimi të gjerë lidhur me sulmin e së mërkurës në Kapitol, njoftuan të premten zyrtarët federalë.

Derrick Evans, anëtar republikan i Dhomës së Delegatëve në Virxhinian Perëndimore, u akuzua për hyrjen në një zonë të ndaluar në Kapitol. Zoti Evans transmetoi video drejtpërdrejt në Facebook të vetes së tij duke hyrë me dhunë në Kapitol së bashku me një turmë protestuesish, ndërsa në një moment thotë, “Jemi futur brenda, jemi brenda”. Në një video të mëparshme të postuar në Facebook, tani të fshirë, zoti Evans paralajmëroi se protestuesit do të sulmonin ndërtesën.

Pjesëmarrja e ligjvënësit të Virxhinias Perëndimore në protesta ka nxitur thirrje për dorëheqjen e tij dhe është kritikuar nga guvernatori i atij shteti.

Zoti Evans nuk mund të kontaktohej menjëherë nga shtypi. Por avokati i tij, John Bryan, tha në një deklaratë për rrjetin CNN se, “nuk ishte e qartë për zotin Evans se atij nuk i lejohej të ndiqte turmën në zonat publike në Kapitol, brenda së cilës tashmë gjendeshin shumë pjestarë të publikut”.

Fotografia e banorit të shtetit Arkansas, Richard Barnett, e tregon atë duke buzëqeshur i ulur brenda zyrës së zonjës Pelosi me këmbë të vënë sipër tavolinës. Kjo foto u bë imazhi që portretizoi trazirat, sulmi i parë masiv ndaj ndërtesës së Kongresit amerikan në më shumë se dy shekuj.

60-vjeçari Barnett u arrestua të premten në qytetin Little Rock të Arkansasit nën akuzën për hyrje në zyrën e zonjës Pelosi, ku ai mori një zarf zyrtar drejtuar një kongresmeni dhe la një “shkrim ofendues”, thanë zyrtarët federalë. Ai përballet me tre akuza: hyrja me dijeni dhe qëndrimi në vende të ndaluara; hyrja me dhunë dhe veprime të parregullta në mjedisin e Kapitolit; dhe vjedhje e parave publike, pronës ose regjistrave publikë, thuhet në dokumentet e gjykatës të publikuara të premten. Zoti Barnett, i cili përballet me deri në një vit burg, ndodhet i ndaluar në Arkansas në pritje të ekstradimit në Uashington.

Zoti Barnett i tha një kanali televiziv lokal në Arkansas të enjten se ai po kërkonte një banjo, kur përfundoi në zyrën e zonjës Pelosi. Ai pretendoi se e përgjaku një zarf në tavolinën e zonjës Pelosi dhe e mori me vete, ndërsa la 25 centë si kompensim.

Dy individët e mësipërm janë mes 13 njerëzve të akuzuar deri tani në gjykatën federale të Uashingtonit në lidhje me trazirat. Akuzat u zyrtarizuan të enjten dhe u publikuan të premten. Po ashtu ndaj 40 individë të tjerë janë ngritur akuza në Gjykatën e Lartë të kryeqytetit amerikan, me shumicën prej tyre për hyrje të paligjshme dhe shkelje të orës policore.

Të premten vonë, Adam Johnson, një banor i Floridës i parë në një fotografi që u përhap gjerësisht, duke mbajtur foltoren e zonjës Pelosi nëpër korridoret e Kapitolit, u arrestua në kontenë Pinella të Floridës. Ai ndodhet i ndaluar në bazë të fletëarrestit nga marshallët amerikanë, sipas të dhënave të burgut. Akuzat ndaj tij ende nuk dihen.

Mes të akuzuarve në gjykatën federale, 70-vjeçari Lonnie Coffman nga Alabama, akuzohet për posedim arme zjarri të parregjistruar dhe mbajtjen e një pistolete pa leje. Brenda kamionit të tij të parkuar pas ndërtesës së Kongresit, policia gjeti të mërkurën 11 bomba Molotov, për të cilat një zyrtar tha se “ në thelb përbënin napalm të bërë në rrugë artizane”.

Drejtori i FBI-së Christopher Wray tha se akuzat e ngritura deri tani “janë vetëm fillimi i përpjekjeve të vazhdueshme të FBI-së për t’i mbajtur ata përgjegjës” për trazirat e së mërkurës.

“Ne do të vazhdojmë të hetojmë në mënyrë agresive çdo individ që vendosi të mos marrë parasysh ligjin dhe në vend të saj të nxisë dhunë, të shkatërrojë pronën dhe të dëmtojë të tjerët,” tha zoti Wray përmes një deklarate.

Ken Kohl, ndihmësi i parë i Prokurorit të Përgjithshëm për kryeqytetin amerikan tha se Departamenti i Drejtësisë ka caktuar qindra prokurorë dhe agjentë në atë që ai e cilësoi si hetim i vazhdueshëm me orar të pandërprerë.

Duke punuar nga tre qendra komande, hetuesit po studiojnë të gjitha videot e sigurisë dhe imazhet nga media sociale për të identifikuar dhe gjurmuar protestuesit.

“Departamenti nuk do të kursejë asnjë burim në përpjekjet për të mabjtur përgjegjës të gjithë këta njerëz, dhe do të jetë diçka për të cilën po punohet çdo orë, ditë dhe javë ndërsa zhvillojmë hetimet,” tha Kohl gjatë një konference telefonike me gazetarët.

Trazirat dhe plaçkitjet shpërthyen mbasditen e së mërkurës, kur qindra mbështetës të Presidentit Trump, të zemëruar për humbjen e tij ndaj zotit Joe Biden në zgjedhjet e 3 nëntorit, u futën me forcë në ndërtesën e Kongresit amerikan ku gjendet Senati dhe Dhoma e Përfaqësuesve ndërsa ligjvënësit ishin mbledhur në një seancë të përbashkët për të çertifikuar fitoren e demokratit Biden.

Në një video të publikuar të enjten vonë, Presidenti Trump dënoi dhunën dhe bëri thirrje për shërim. Por para kësaj, për javë të tëra ai pretendoi në mënyrë të rreme se ai i fitoi zgjedhjet në masë të madhe por se i ishte grabitur fitorja, një pretendim që besohet nga shumë mbështetës të tij. Gjatë një tubimi pranë Shtëpisë së Bardhë të mërkurën, Presidenti Trump u kërkoi mijëra mbështetësve të tij që të marshonin drejt Kapitolit dhe të protestonin për rezultatin e zgjedhjeve.

Dhuna që pasoi, e cila la pesë të vdekur, përfshi një polic të Kapitolit, ndaloi përkohësisht punimet për çertifikimin e zotit Biden. Ligjvënësit u mblodhën në mbrëmje vonë për të çertifikuar zotin Biden si presidentin e ardhshëm të Shteteve të Bashkuara dhe Kamala Harris si nënpresidenten e ardhshme.

Zyrtarët e zbatimit të ligjit thanë se po hetonin rrethanat që çuan në humjen e jetës së policit por nuk thanë se po bënin hetime për një rast vrasjeje.

Presidenti Trump u dënua gjerësisht për nxitje dhune duke inkurajuar mbështetësit e tij që të marshonin në Kapitol dhe të kërkonin që anëtarët e Kongresit ta deklaronin atë fitues të zgjedhjeve. Në një qortim të rrallë, ish-Prokurori i Përgjithshëm William Barr, një aleat i vendosur i zotit Trump ndërsa ishte në detyrë, tha përmes një deklarate të enjten se sjella e presidentit “ishte tradhëti ndaj zyrës dhe mbështetësve të tij.”

I pyetur nëse prokurorët po shqyrtonin rolin e zotit Trump në nxitjen e sulmit të dhunshëm në Kapitol, Michael Sherwin, prokurori i përgjithshëm në detyrë për Uashingtonin tha për gazetarët të enjten se, “ne po shqyrtojmë të gjithë aktorët në këtë mes, dhe kushdo që ka luajtur një rol dhe për të cilët provat përshtaten me elementet e krimit, ndaj tyre do të ngrihen akuza”.

Por mbetet e paqartë se sa njerëz do të përballen përfundimisht me akuza. Forca e policisë së Kapitolit ka thënë se mijëra njerëz ishin përfshirë në vepra trazirash, me disa qindra prej tyre që u futën në ndërtesë. Por ndërsa policia e Kapitolit i la gati të gjithë që të dilnin lirshëm nga ndërtesa, hetuesit federalë po përballen me një detyrë të vështirë për gjurmimin e tyre në mbarë vendin.

Zoti Kohl tha se hetuesit ende nuk kanë përcaktuar se sa njerëz udhëtuan drejt Uashingtonit për të marrë pjesë në sulmin ndaj Kapitolit dhe se në çfarë shkalle kishte koordinime për këtë veprim. “Ne nuk do ta dimë këtë deri sa të arrijmë në fund të hetimit,” tha ai.

Pushteti që gëzon Presidenti amerikan për të dhënë falje, që është përdorur në një numër të madh rastesh nga Presidenti Donald Trump në javët e fundit, ka shqetësuar kritikët e tij.

Por historia tregon se faljet presidenciale kanë nxitur polemika që në krye të herës.

Etërit Themelues të kombit u dhanë presidentëve fuqi faljeje pothuajse absolute si një mënyrë për të zbutur ligjet penale, thotë Brian Kalt, profesor i drejtësisë në Kolegjin e Drejtësisë të Universitetit Shtetëror të Miçiganit.

“Ata kanë debatuar mbi këtë çështje dhe e menduan se edhe mund të abuzohej me pushtetin, por se ishte e rëndësishme që të ekzistonte mundësia për falje, madje edhe për tradhëti ndaj kombit, sepse siç argumentoi Alexander Hamilton, mund të kishte një rebelim dhe kjo mund të ishte një mënyrë e mirë për t’i dhënë fund“.

Ky ishte rasti me faljen e parë presidenciale të lëshuar nga George Washington më 2 nëntor 1795. Presidenti i parë i Amerikës fali dy persona të dënuar me vdekje në lidhje me një kryengritje që u bë e njohur si Rebelimi i Uiskit. Ata ishin pjesë e një kryengritje të kompanive që prodhonin pije alkoolike, e që protestonin kundër një takse të lartë.

“Dhe kështu në atë rast funksionoi ashtu siç ata kishin shpresuar”, thotë zoti Kalt.

Falja e turmës

Sot ndërsa amerikanët po analizojnë pasojat politike të sulmit të trazuar të së mërkurës në epiqendrën e pushtetit kushtetues, disa ekspertë ngrejnë pikëpyetje rreth asaj nëse zoti Trump, në ditët e tij të fundit në pushtet, mund të lëshojë një falje në grup për të gjithë ata që janë përfshirë në trazira. Mundësia e më shumë faljeve po i jep tashmë shtysë Dhomës së Përfaqësuesve për të përshpejtuar përpjekjet për shkarkimin e zotit Trump nga pushteti përpara se mandati i tij të përfundojë më 20 janar.

Ndërsa detajet e reja në lidhje me vdekjen e një oficeri të policisë së Kapitolit, i cili thuhet se u masakrua për vdekje nga turma, e bëjnë një falje të tillë edhe më provokuese, ekspertët thonë se nuk ka asnjë pengesë ligjore që zoti Trump ta ndërmarrë një hap të tillë.

“Ai mund të falë çdo shkelje kundër Shteteve të Bashkuara, ku përfshihen krimet federale, të cilat me siguri janë kryer nga ana e tyre“, thotë zoti Kalt. “Mendoj se arsyeja e Presidentit Uashington për ta bërë këtë ishte se ai donte të shuante tensionet dhe se përpjekja dhe ekzekutimi i nxitësve të Rebelimit të Uiskit, do t’i kishte bërë gjërat më keq dhe jo më mirë. Por në këtë rast, mendoj se nuk mund ta thuash një gjë të tillë. Mendoj se falja e atyre njerëzve që sulmuan Kapitolin do t’i bënte gjërat më keq dhe jo më mirë. Do të kishte efekt të kundërt”, shton ai.

Presidentët gëzojnë kompetenca të gjera faljeje kur bëhet fjalë për krime federale, por ata nuk mund ta përdorin këtë pushtet që kanë për të ndalur Kongresin që të nisë procedurën për shkarkim ndaj vetë presidentit ose të tjerëve. Ata gjithashtu nuk kanë fuqinë të falin krimet shtetërore.

Zoti Trump mund të fshijë çdo akuzë në lidhje me incidentin e 6 janarit që mund të ngrihen nga autoritetet në Uashington.

“Ajo që gjetkë do të ishte krim shtetëror, në kryeqytetin e vendit, meqënëse është në varësi të qeverisë federale, ato përbëjnë shkelje federale dhe ai gjithashtu mund t’i falë ato“, thotë zoti Kalt.

“Dhe fuqia e faljes është e gjerë dhe nuk lë asgjë jashtë. Nëse është një krim dhe nëse është federal, ai mund ta falë atë“.

Falja në grup

Kjo përfshin faljen e atyre personave ndaj të cilëve nuk janë ngritur ende akuza.

“Ai mund ta bëjë këtë menjëherë, nuk ka nevojë të presë derisa të ketë filluar zyrtarisht ndonjë proces ligjor“, i tha Zërit të Amerikës Jeffrey Crouch, një asistent profesor për politikën në Universitetin Amerikan dhe autor i një libri mbi pushtetin e faljes presidenciale.

Nëse zoti Trump ofron mëshirë për protestuesit, ai nuk do të ishte presidenti i parë që lëshonte një falje të tillë në grup.

Ditën e Krishtlindjes në 1868, Andrew Johnson fali të gjithë ish- mbështetësit e Konfederatës që luftuan kundër Shteteve të Bashkuara në Luftën Civile. Disa nga ata që zoti Johnson fali u bënë arkitektët e të ashtuquajturve “ligjet e Jim Crow”, që legalizuan ndarjen racore.

Në vitin 1977, Presidenti Jimmy Carter fali shumicën e njerëzve që iu shmangën shërbimit ushtarak gjatë Luftës së Vietnamit. Zoti Carter shpresonte që falja masive të shëronte ndarjet e thella kombëtare të shkaktuara nga lufta, por kjo u shoqërua me protesta nga ana e grupeve të veteranëve të cilët e dënuan këtë veprim.

Një koncept me fillimet përpara revolucionit amerikan

Koncepti i faljes nuk ishte i ri. Monarkët anglezë gëzonin fuqinë e faljes. Kjo praktikë u transferua tek kolonitë britanike, ku guvernatorët mund të jepnin mëshirë. Gjatë mbledhjes së Konventës Kushtetuese në 1787, zoti Hamilton propozoi t’i jepej presidentit fuqia për të falur njerëz që kishin kryer krime ose për t’i ulur dënimet e tyre.

Hartuesit e Kushtetutës debatuan nëse duhet të vendosnin kufizime për faljet dhe vlerësuan mundësinë e përfshirjes së Senatit në vendimet mbi to.

“Por në fund ata vendosën ta bënin pushtetin e faljes të presidentit, të pakufizuar“, thotë zoti Crouch. “Ata besuan se ai do ta përdorte atë me përgjegjësi ose do të rrezikonte zemërimin e votuesve dhe potencialisht nisjen e një procesi për shkarkimin e tij“.

Falja e piratëve, rebelëve dhe luftëtarëve të lirisë

Lista e njerëzve të falur nga presidentët është e gjatë dhe e larmishme. Në vitin 1800, Thomas Jefferson fali të gjithë të dënuarit nën një masë që shpallte të jashtëligjshme shpifjen ndaj qeverisë. James Madison dhe James Monroe kanë falur piratë. John Quincy Adams ka falur dy persona që i përkasin grupeve indigjene amerikane të dënuar për një sulm ndaj civilëve të bardhë. Millard Fillmore fali dy persona të dënuar se transportonin skllevërit drejt lirisë. Franklin Pierce fali një afro-amerikan që ishte i lirë, i cili kishte ndihmuar skllevërit t’u shpëtonin skllavërisë.

Presidenti Ford krijoi një trazirë në 1974 kur i dha paraardhësit të tij Richard Nixon një falje të plotë e të pakushtëzuar përpara se zoti Nixon të akuzohej në lidhje me skandalin e Watergate-t.

“Presidenti Ford mund ta kishte trajtuar më mirë faljen e Nixon-it, por në fund të fundit ajo u dha për arsyen e duhur, në mënyrë që vendi të hidhte pas krahëve Watergate-n“, thotë zoti Crouch. “Vendimi pati kosto politike, ai kontribuoi në humbjen masive të republikanëve në garën për Kongresin në 1974 dhe ka të ngjarë të ketë dëmtuar garën për president të zotit Ford në 1976“.

Zoti Ford humbi ndaj Jimmy Carter-it në garën për president të vitit 1976.

Presidentët e periudhës moderne kanë marrë përsipër falje më të diskutueshme ose aspak popullore sidomos kur nuk do të duhej të jepnin llogari përpara votuesve të tyre. Kjo ka ndodhur kryesisht në fund të mandatit, mes datës së zgjedhjeve që mbahen në nëntor dhe Ditës së Inaugurimit të presidentit të ri më 20 janar.

“Kjo ka qenë problem që prej hartimit”, thotë zoti Kalt “që presidenti ka pushtet (për falje) sepse ai jep llogari, por e ka atë edhe kur nuk jep më llogari përpara votuesve“.

Një ditë para se të largohej nga detyra, paraardhësi i zotit Trump, Barack Obama, zbuti dënimet e 330 të burgosurve për krime jo të dhunshme lidhur me lëndët narkotike.

Bill Clinton fali gjysmë vëllain e tij i dënuar për një akuzë për droge. Ai gjithashtu fali miliarderin Marc Rich dënuar për evazion fiskal. Kritikët u ankuan se vendimi erdhi pasi ish-gruaja e zotit Rich, i bëri një dhuratë bujare Komitetin Kombëtar Demokrat, Bibliotekës Clinton dhe fushatës në Nju Jork të Hillary Clinton-it për një vend në Senat.

Në prag të Krishtlindjes në 1992, Presidenti George H.W. Bush fali ish-Sekretarin e Mbrojtjes Caspar Weinberger dhe pesë persona të tjerë për veprimet e tyre të paligjshme gjatë administratës Reagan, mbi skandalin të shitjeve të armëve Iranit ndërsa ishte subjek i një embargoje armësh.

Që nga zgjedhjet e nëntorit 2020, zoti Trump ka falur një numër bashkëpunëtorësh të tij, përfshirë ish-menaxherin e fushatës Paul Manafort-i (i dënuar për mashtrim bankar e me taksat), Roger Stone (dënuar për shtatë krime, përfshirë ndërhyrjen për të ndikuar tek dëshmitarët, pengimin dhe bërjen e deklaratave të rreme) si dhe ish-Këshilltarin e Sigurisë Kombëtare Michael Flynn (i cili u vetëdeklarua fajtor se kishte gënjyer FBI-në).

“Aktualisht media dhe publiku po përqendrohen dhe me të drejtë, tek faljet që Trump i bëri Paul Manafort-it, Roger Stone-t e të tjerë personave të rrethit të tij“, thotë zoti Crouch. “Por aktualisht ka mijëra aplikime në harresë tek Zyra e Avokatit të Faljeve, nga ata që nuk kanë mjete financiare ose miq të fuqishëm për të përfituar. Nëse presidenca e tij përfundon pa treguar mëshirë për më shumë prej tyre, do të ishte një mundësi vërtet e humbur”, thotë ai.

Demokratët në Kongres po ndërmarrin veprime për nisjen sa më parë të procedurave për shkarkimin e Presidentit Donald Trump, duke kërkuar veprime të vendosura, të menjëhershme për të siguruar siç thonë ata që zoti Trump të mos shkaktojë të tjera dëme.

Kur kanë mbetur edhe 11 ditë nga përfundimi i mandatit të tij, demokratët po kërkojnë largimin e menjëhershëm të zotit Trump. Nga ana tjetër presidenti ka pak mbështetje nga vetë partia e tij.

“Ne duhet të veprojmë“, deklaroi Kryetarja e Dhomës Nancy Pelosi të premten gjatë një telekonferencë private me ligjvënësit demokratë.

Një nga republikanet kryesore, senatorja Lisa Murkowski, i tha gazetës Anchorage Daily News se zoti Trump thjesht “duhet të largohet”.

Ditët e fundit të presidencës së zotit Trump po shkojnë drejt një fundi kaotik ndërsa shumë nga ndihmësit e tij, republikanë të lartë dhe anëtarët e kabinetit e kanë braktisur. Ndërsa refuzon të pranojë humbjen në zgjedhjet e nëntorit, zoti Trump ka premtuar tashmë një transferim të qetë të pushtetit më 20 janar kur pritet të betohet Presidenti i zgjedhur demokrat Joe Biden. Por zoti Trump ka thënë se ai nuk do të marrë pjesë në ceremoninë e inaugurimit, çka do të shënonte herën e parë të mospjesëmarrjes së një presidenti në largim që pas Luftës Civile.

Ndërkohë presidenti i zgjedhur Joe Biden ka thënë se ai është përqendruar tashmë në punën e tij ndërsa përgatitet të marrë detyrën. I pyetur rreth nisjes së procedurave për shkarkimin e zotit Trump ai tha, se “ky vendim i takon Kongresit”.

Demokratët po shqyrtojnë veprime të shpejta në këtë drejtim. Sipas një personi që ka informacion mbi këtë çështje, në një version paraprak të dokumentit mbi të cilin do të bazohet kërkesa për shkarkimin e zotit Trump, ai akuzohet për abuzim me pushtetit, duke thënë se ai “bëri me vetëdije deklarata që inkurajuan e për pasojë çuan në veprime të paligjshme e të pashmangshme në Kapitol”.

Kërkesa për shkarkim pritet të prezantohet të hënën dhe të mërkurën pritet një votim nga ana e Dhomës së Përfaqësuesve.

Nëse Dhoma e Përfaqësuesve do të zyrtarizonte akuzat për shkarkimin e presidentit e nëse Senati do të merrte vendim për shkarkimin e tij, zotit Trump gjithashtu mund t’i ndalohej të kandidonte sërish për postin e presidentit në vitin 2024 ose për çdo post tjetër publik. Një nga personat që mori pjesë gjatë telekonferencës me zonjën Pelosi tha se kjo e fundit diskutoi gjithashtu dhe mbi mënyra të tjera që mund ta detyronin zotin Trump të japë dorëheqjen.

Mes shqetësimeve në rritje për veprimet që mund të ndërmarrë Presidenti Donald Trump gjatë ditëve të tij të fundit në detyrë, Kryetarja e Dhomës së Përfaqësuesve, Nancy Pelosi, tha të premten se ajo kishte pyetur një gjeneral të lartë të Pentagonit se çfarë masash ekzistojnë për t’i paraprirë një urdhëri nga presidenti për sulm me armë bërthamore.

Mundësia, megjithëse në dukje e shumë e vogël, mund të jetë një nga aspektet nën shqyrtim në kuadrin e një përpjekjeje nga zonja Pelosi dhe disa udhëheqës të tjerë në nivel kombëtar për ta hequr Presidentin Trump nga detyra edhe para se të mbarojë mandati i tij në detyrë më 20 janar.

“Këtë mëngjes, unë fola me Shefin e Shtabit të Përgjithshëm, Mark Milley, për të diskutuar masat paraprake në dispozicion për t’ia parandaluar një presidenti të paqëndrueshëm mundësinë e fillimit të përplasjeve ushtarake ose qasjen në kodet e nisjes dhe urdhërimin e një sulmi bërthamor”, shkruajti zonja Pelosi në një letër për kolegët e saj të Partisë Demokrate në Dhomën e Përfaqësuesve.

“Situata e këtij presidenti të dalë jashtë kontrolli nuk mund të jetë më e rrezikshme (se ç’është), dhe ne duhet të bëjmë gjithçka që mundemi për të mbrojtur popullin amerikan nga sulmi i tij trazues ndaj vendit tonë dhe demokracisë sonë”.

I pyetur për të konfirmuar bisedën telefonike, një zëdhënës i Gjeneralit Milley i tha Zërit të Amerikës se, “ai iu përgjigj pyetjeve të saj në lidhje me procesin e autoritetit të kodeve bërthamore”.

Zëdhënësi nuk dha hollësi për atë që u tha gjatë telefonatës.

Urdhri i paligjshëm

Presidenti ka autoritetin e vetëm për të urdhëruar lëshimin e një arme bërthamore dhe nuk kërkon miratimin e Kongresit ose këshilltarëve të tij ushtarakë. Por nëse një komandant ushtarak do të vendoste, sipas këshillës së juristëve të tij, se një urdhër i tillë ishte i paligjshëm, atëherë urdhri mund të refuzohej.

Udhëheqësit e kaluar dhe të tanishëm të Pentagonit gjithashtu kanë thënë se ata nuk do t’i binden një urdhri të paligjshëm nga presidenti.

Zonja Pelosi dhe kolegët e saj dëshirojnë gjithashtu ta shohin presidentin përpara përgjegjësisë për rolin e tij në nxitjen e turmës që sulmoi Kapitolin e Shteteve të Bashkuara këtë javë, duke vonuar çertifikimin e fitores së Presidentit të zgjedhur Joe Biden dhe duke çuar në vdekjen e pesë personave, ndër ta edhe një oficer i Policisë së Kapitolit.

Një lëvizje për të ngritur akuza për shkarkimin e Presidentit Trump për herë të dytë – nëse ai do të dënohej në Senatin e udhëhequr nga republikanët – do të kishte gjithashtu efektin që do t’i ndalojë mbajtjen në të ardhmen të posteve federale.

Udhëheqësit demokratë të kongresit i kanë bërë thirrje gjithashtu Nënpresidentit Mike Pence të aktivizojë mekanizmin e parashikuar në amendamentin e 25-të, i cili ofron një mënyrë alternative dhe ndoshta më të shpejtë për të hequr presidentin nga detyra. Nënpresidenti Pence nuk është përgjigjur, por thuhet se u ka thënë kolegëve se ai nuk e favorizon një veprim të tillë.

I miratuar në vitet 1960, Amendamenti i 25-të i Kushtetutës së Shteteve të Bashkuara lejon transferimin e përkohshëm të pushtetit nga presidenti te nënpresidenti, nëse presidenti është paaftësuar, me miratimin e shumicës së Kabinetit. Por analistët thonë se ky opsion mund të jetë i vështirë për t’u ushtruar me vetëm disa ditë të mbetura nga presidenca Trump.

Fuqia mund të rikuperohet

“Është gjithashtu shumë e vështirë të vihet në përdorim amendamenti i 25-të, në një situatë në të cilën presidenti nuk është në gjendje kome ose nuk është përndryshe fizikisht i paaftë duke mos patur mundësinë të funksionojë ose të veprojë, pasi presidenti thjesht mund të njoftojë Kongresin se ai është në gjendje të rimarrë sërish kompetencat e postit dhe të rimarrë kështu pushtetin”, tha John Hudak, një ekspert për studimet e qeverisjes në Institutin Brookings.

Udhëheqësi i pakicës në Senat Chuck Schumer dhe zonja Pelosi paralajmëruan se nëse Nënpresidenti Pence nuk vepron, atëherë ligjvënësit demokratë do të hedhin në votim akuzat për shkarkimin.

“Veprimet e rrezikshme dhe nxitëse të presidentit kërkojnë largimin e tij të menjëhershëm nga detyra”, thanë të enjten zoti Schumer dhe zonja Pelosi.

Një numër i madh i ligjvënësve demokratë – dhe disa republikanë – kanë shprehur mbështetje për largimin e Presidentit Trump nga pushteti ose për censurimin e veprimeve të tij. Por pas komenteve të zonjës Pelosi, udhëheqësi i republikanëve në Dhomën e Përfaqësuesve, Kevin McCarthy, sinjalizoi se ai nuk e mbështeste shkarkimin nga Kongresi.

“Shkarkimi i presidentit me vetëm 12 ditë të mbetura në mandatin e tij do të ndajë vendin tonë më tej”, tha ai.

Zoti McCarthy tha se ai kishte kontaktuar Presidentin e zgjedhur Biden për të planifikuar të bisedonin se si të punojnë së bashku për të ulur tensionet dhe për të bashkuar vendin.

Pesë persona vdiqën si rezultat i trazirave të mërkurën në Kapitolin e Shteteve të Bashkuara. Mbështetësit e presidentit çanë barrierat mbrojtëse të Policisë së Kapitolit në përpjekje për të ndaluar një seancë të përbashkët të Kongresit për numërimin e votave elektorale dhe çertifikimin e fitores së zotit Biden.

Më herët gjatë ditës, Presidenti Trump mbajti një tubim në Shëtitoren Kombëtare dhe inkurajoi mbështetësit e tij për të protestuar ndaj rezultateve. Shkelja masive e sigurisë nga protestuesit pro-Trump shënoi herën e parë që Kapitoli i Shteteve të Bashkuara ishte sulmuar që kur britanikët hynë në të gjatë Luftës së 1812-tës.

Presidenti Trump u akuza për abuzim të pushtetit dhe pengim të Kongresit në dhjetor 2019, por u shpall i pafajshëm në një gjyq në Senat në shkurt 2020. Asnjë president amerikan nuk është përballur me dy votime për shkarkim.

Dy arsyet e paraqitura

“Ka dy arsye për ta realizuar shkarkimin”, tha Paul Berman, një profesor në Shkollën e Drejtësisë të Universitetit George Washington. “Njëra është thjesht për ta bërë të qartë se një president në detyrë që nxit një kryengritje kundër qeverisë së Shteteve të Bashkuara është ndoshta gjëja më e keqe që një president mund të bëjë ndonjëherë. Dhe kjo deklaratë duhet të bëhet. Së dyti, dhe ndoshta më pragmatike, nëse ai shpallej fajtor dhe dënohej, kjo do t’ia hiqte mundësinë e rikandidimit në të ardhmen”.

Ndërsa nuk ka gjasa që ligjvënësit amerikanë të kenë kohë të kthehen në punë për të miratuar procedurat e komplikuara për një shkarkim para fundit të mandatit të Presidentit Trump, analistët thonë se një gjyq në Senat mund të mbahet pasi presidenti të largohet nga detyra.

“Nuk ka asgjë nga ç’shoh unë në Kushtetutë që do të ndalonte që një gjyq për hetimin dhe dënimin të zhvillohej në ditët pasi ai të linte detyrën”, tha zoti Berman. “Ne duhet të ngremë procesin e llogaridhënies që bën të qartë se një president nuk mund të bëjë atë që bëri ai dhe gjithashtu sepse duam t’i paraprijmë mundësisë që ai të mbajë poste sërish”.

Presidenti i zgjedhur i Shteteve të Bashkuara, Joe Biden tha se ai kishte besuar për një kohë të gjatë se Presidenti Donald Trump nuk ishte i aftë për detyrën, por se i takon Kongresit të vendosë nëse do të ngrejë për së dyti akuza për shkarkimin e presidentit.

Zoti Biden u tha gazetarëve në një konferencë shtypi se ai ishte i përqendruar te frenimi i pandemisë COVID-19, te vaksinimi i shpejtë dhe te forcimi i ekonomisë.

“Ajo që Kongresi do të vendosë të bëjë, kjo u takon atyre por … ne do të na duhet të jemi gati të fillojmë menjëherë punën”, tha ai, kur u pyet në lidhje me legjislacionin që po përgatitet nga demokratët e Dhomës së Përfaqësuesve për të ngritur akuza kundër Presidentit Trump për rolin e tij në nxitjen e dhunës ditën e mërkurë në Kapitol.

Demokratët në Dhomën e Përfaqësuesve planifikojnë të paraqesin të hënën akuzat që mund të çojnë për herë të dytë në një proces për shkarkimin e Presidentit Donald Trump, thanë dy burime që kishin dijeni për këtë çështje.

Një kopje e dokumentit që po qarkullon midis anëtarëve të Kongresit akuzon zotin Trump për “nxitje të dhunës kundër qeverisë së Shteteve të Bashkuara” në përpjekje për të përmbysur humbjen ndaj Presidentit të zgjedhur Joe Biden në zgjedhjet presidenciale të vitit 2020.

Në akuzat që përmban dokumenti përmendet gjithashtu biseda telefonike që zoti Trump pati gjatë javës së kaluar me Sekretarin e Shtetit të Xhorxhias Brad Raffensperger, në të cilën i kërkoi atij të “gjente” vota të mjaftueshme për të përmbysur fitoren e zotit Biden në atë shtet.

Kryetarja e Dhomës së Përfaqësuesve Nancy Pelosi e quajti të premten Presidentin Trump “të çekuilibruar” dhe tha se Kongresi duhet të bëjë gjithçka që është e mundur për të mbrojtur amerikanët, edhe pse mandati i zotit Trump përfundon më 20 janar kur presidenti i zgjedhur Biden të bëjë betimin.

Ajo gjithashtu tha se kishte folur me gjeneralin më të lartë të vendit, kreun e Shtatmadhorisë Mark Milley, në lidhje me çështjen që zoti Trump të mos lejohet të fillojë ndonjë konflikt ose të ndërmarrë ndonjë sulm me armë bërthamore, siç u shpreh ajo.

Deri sot, nuk ka patur asnjë rast që ndaj një presidenti amerikan të ndërmerren dy herë procedura shkarkimi.

Por është e paqartë nëse ligjvënësit do të jenë në gjendje ta heqin zotin Trump nga posti, pasi akuzat që mund të ngrihen në Dhomën e Përfaqësuesve do të përfundonin në një gjyq në Senat, ku republikanët e tij kanë mjaft kontroll.

Një numër i madh i ligjvënësve demokratë dhe disa republikanë kanë shprehur mbështetje për largimin e zotit Trump nga pushteti ose për ndëshkimin e veprimeve të tij.

Por pas komenteve të zonjës Pelosi, udhëheqësi republikan i Dhomës së Përfaqësuesve Kevin McCarthy la të kuptohet se ai nuk e mbështet ngritjen e akuzave për shkarkimin e Presidentit. Ai tha se kjo do ta përçante më shumë vendin.

Zoti Biden tha se fakti që Presidenti Trump nuk do të marrë pjesë në inaugurimin e tij më 20 janar “është një gjë e mirë.”

Të premten Presidenti Trump shkroi në Twitter: “Për të gjithë ata që kanë kërkuar të dinë, unë nuk do të marr pjesë në inaugurim më 20 Janar.” Ai nuk e ka njohur humbjen dhe nuk e ka uruar zotin Biden për fitoren.

Vendimi i Presidentit Trump shënon një shkëputje nga tradita amerikane, sipas të cilës presidenti që largohet merr pjesë në inaugurimin e presidentit të ri.

Ndërkaq, duke iu përgjigjur pyetjes nëse nënpresidenti Mike Pence do të merrte pjesë në inaugurim, presidenti i zgjedhur Biden tha se zoti Pence “është i mirëseardhur,” por shtoi se nuk ka biseduar me të.

Presidenti i SHBA Donald Trump tha të premten se nuk do të marrë pjesë në inaugurimin e pasardhësit të tij, Presidentit të zgjedhur demokrat Joe Biden, më 20 janar.

Ai i bëri komentet disa orë pasi premtoi për një tranzicion paqësor të pushtetit. Një burim që kishte dijeni për zhvillimet tha se në Shtëpinë e Bardhë ka patur diskutime për çështjen që zoti Trump të largohet nga Uashingtoni më 19 janar, një ditë përpara inaugurimit. Ai pritet të shkojë në vendpushimin e tij në Florida, tha një burim.

Presidenti Trump shkroi në Twitter: “Për të gjithë ata që kanë kërkuar të dinë, unë nuk do të marr pjesë në inaugurim më 20 Janar.”

Vendimi i Presidentit Trump shënon një shkëputje nga tradita amerikane, sipas të cilës presidenti që largohet merr pjesë në inaugurimin e presidentit të ri.

Zyrtarët e lartë demokratë pritet të diskutojnë lidhur me një gjykim të mundshëm ndaj presidentit Donald Trump, duke argumentuar se ai nxiti qindra mbështetës të tij të cilët sulmuan ndërtesën e Kongresit amerikan, ngjarje në të cilat u vranë pesë persona.

Demokratja Katherine Clark gjatë një interviste për CNN tha se zyrtarët e lartë demokratë do të takohen të premten për të shqyrtuar mundësitë që ua lejojnë ligjvënësve që të shtyjnë përpara procesin gjyqësor për largimin e Trumpit, proces i njohur me termin “impeachment” më shpejt sesa vitin e kaluar.

“Donald Trump duhet të largohet nga zyra dhe ne do të përdorim të gjitha mjetet që kemi në mënyrë që kjo të ndodhë, për të mbrojtur demokracinë tonë”, tha Clark.
Nëse nënpresidenti Mike Pence nuk e aktivizon amendamentin 25 të Kushtetutës, për t’ia marrë kompetencat e presidentit, “ne do të vazhdojmë me impeachment”, tha ajo.

Pas thirrjeve për largim nga zyra, Trump dënoi dhunën që la të vdekur pesë persona, pasi protestuesit e dhunshëm, mbështetës të Trumpit, sulmuan Kongresin.

Në një video të publikuar, Trump bëri thirrje për pajtim dhe premtoi për tranzicion paqësor të pushtetit te presidenti i zgjedhur, Joe Biden.

Shumë demokratë, por edhe republikanë e kanë akuzuar Trumpin se ka nxitur dhunën në Kongres.

Senatori republikan, Ben Sassen tha se ai do të mbështeste procesin gjyqësor për largimin e Trumpit nga pushteti.

“Presidenti nuk e ka respektuar betimin që ka bërë”, tha Sasse për CNS, duke shtuar se veprimet e Trumpit, duke nxitur protestuesit “ishin të ligja”.

Teksa mandati i Trumpit është drejt fundit, nuk është e qartë nëse do të ketë kohë që të përfundonte një proces ndaj tij për largimin nga zyra. rel

Autoritetet amerikane të zbatimit të ligjit kanë hapur një hetim penal për sulmin e së mërkurës ndaj Kapitolit nga protestuesit pro-Trump, duke rekrutuar qindra hetues për të identifikuar dhe arrestuar autorët, njoftuan zyrtarët të enjten.

Prokurori në detyrë i Distriktit të Kolumbias tha se ndaj 15 personave janë ngritur akuza në gjykatën federale në Uashington në lidhje me trazirat, ndërsa ndaj 40 të tjerëve në gjykatën e lartë të Uashingtonit për përfshirjen në trazirat e së mërkurës në Kapitol. Shumica e tyre akuzohen për hyrje të paligjshme në kompleksin e Kongresit, tha prokurori Sherwin.

Akuzat federale përfshijnë vjedhje të pronës së qeverisë dhe shkelje të ligjit të armëmbajtjes. Një burrë u arrestua pranë Kapitolit nën akuzat për mbajtje të një arme gjysmë-automatike dhe 11 bombave molotov që ishin “të gatshme për përdorim”, tha prokurori Sherwin.

Gjatë sulmit në Kapitol katër persona humbën jetën dhe dhjetra të tjerë u plagosën.

Prokurori Michael Sherwin tha se arrestimet shënojnë fillimin e një përpjekje disa mujore për të sjellë autorët e krimeve para drejtësisë.

“Kjo ishte padyshim një situatë shumë e rrezikshme“, tha prokurori Sherwin. “Ne jemi duke u përpjekur në mënyrë agresive t’i trajtojmë këto raste sa më shpejt që të jetë e mundur, dhe të mos bëjmë asnjë gabim në lidhje me të, edhe pse deri më tani kemi përgatitur vetëm 15 raste, mendoj se ky është një fillim i mirë, por nuk është fundi i përpjekjeve tona.”

Numri i madh i akuzave brenda 36 orëve, që pritet të rritet më tej në ditët në vijim, nënvizon agresivitetin me të cilin prokurorët po e trajtojnë hetimin.

Zoti Sherwin paralajmëroi se duke marrë parasysh se Policia e Kapitolit lejoi shumicën e njerëzve të largoheshin nga kompleksi i Kongresit, përpjekja për të identifikuar dhe arrestuar autorët mund të zgjasë me muaj, ndoshta gjatë gjithë vitit.

Ai tha se qindra hetues po analizojnë pamjet filmike të kamerave të sigurisë dhe ato të publikuara në mediat sociale për të identifikuar autorët.

“Ne do të ngrejmë akuza në mënyrë agresive për këto raste“, tha zoti Sherwin.

Prokurori i Përgjithshëm në detyrë, Jeffrey Rosen tha se Departamenti i Drejtësisë “është i përkushtuar të sigurohet që ata që janë përgjegjës për këtë sulm ndaj qeverisë sonë dhe sundimit të ligjit të përballen me pasojat e plota ligjore për veprimet e tyre”.

“Prokurorët tanë kanë punuar gjatë gjithë natës me agjentë specialë dhe hetues nga Policia e Kapitolit, FBI, ATF, Departamenti i Policisë Metropolitane dhe publiku për të mbledhur provat, për të identifikuar autorët dhe për të ngritur akuza për krimet federale në raste kur kjo do të jetë e nevojshme“, tha prokurori Rosen në një deklaratë të lëshuar të enjten.

Drejtori i FBI-së Christopher Wray tha se FBI-ja ka “dislokuar burimet tona të plota hetimore” për të ngritura akuza ndaj atyre që janë përfshirë në sulmin ndaj Kapitolit.

“Me ndihmën e partnerëve tanë, ne do t’i mbajmë përgjegjës ata që morën pjesë në sulmin e djeshëm (të së mërkurës) në Kapitol“, thuhet në deklaratën e zotit Wray.

Sulmi, i cilësuar nga Prokurori i Përgjithshëm Rosen si “një sulm i patolerueshëm ndaj një institucioni themelor të demokracisë”, filloi me qindra mbështetës të Presidentit Donald Trump që vërshuan drejt Kapitolit, ndërsa anëtarët e Kongresit po mblidheshin në një seancë të përbashkët për të certifikuar fitoren e Presidentit të zgjedhur Joe Biden.

Në një video-mesazh të publikuar të enjten mbrëma në Twitter, Presidenti Trump foli për “sulmin e rëndë ndaj Kapitolit të Shteteve të Bashkuara”, duke thënë se ai ishte “i zemëruar nga dhuna dhe shkelja e ligjit dhe rendit”.

Presidenti Trump është dënuar gjerësisht për nxitjen e dhunës, pasu u kërkoi mbështetësve të zemëruar nga humbja e tij në zgjedhjet e 3 nëntorit, që të marshonin drejt Kapitolit. Në një kritikë të rrallë, ish-Prokurori i Përgjithshëm William Barr, një aleat i vendosur i Presidentit Trump kur ishte në detyrë, tha në një deklaratë për agjencinë e lajmeve Associated Press se sjellja e Presidentit “ishte një tradhti ndaj zyrës (së Presidentit) dhe mbështetësve të tij”.

I pyetur nëse prokurorët federalë po hetonin edhe rolin e Presidentit Trump në veprimet e dhunshme të së mërkurës në Uashington, prokurori Sherwin tha, “Ne po shikojmë të gjithë aktorët dhe këdo që ka patur rol (në trazirat në Uashington) dhe provat që përshtaten me elementët e një krimi, ata do të akuzohen”.

Roli i policisë

Trazirat përfunduan ndërsa oficerë nga më shumë se 18 agjenci të zbatimit të ligjit dhe Garda Kombëtare u dislokuan në qytet. Por një pyetje kryesore në lidhje me incidentin mbeti kryesisht pa përgjigje: Pse forcat e policisë që mbronin Kapitolin nuk ishin në gjendje të pengonin hyrjen e protestuesve në ndërtesë? Zyrtarët e zbatimit të ligjit thanë se ndërsa ishin të përgatitur për një protestë masive, ata u zunë në befasi nga ajo që ndodhi.

“(Policia e Kapitolit) kishte një plan të fortë për të trajtuar aktivitetet e mbrojtura nga Amandamenti i Parë (i kushtetutës). Por, këto trazira masive nuk ishin aktivitete të Amendamentit të Parë; ato ishin sjellje kriminale“, tha Shefi i Policisë së Kapitolit, Steven Sund në një deklaratë të lëshuar të enjten.

Zoti Sund mbrojti oficerët e tij, duke thënë se “mijëra individë” ishin të përfshirë “në veprime të dhunshme të trazirave”, duke sulmuar oficerët e zbatimit të ligjit me shufra hekuri, substanca kimike dhe armë të tjera. Më shumë se 50 policë të Kapitolit dhe të qytetit të Uashingtonit u plagosën, dhe disa prej tyre u dërguan për trajtime mjekësore në spital.

Policia e Kapitolit gjithashtu është përballur me pyetje në lidhje me dështimin e tyre për të ndaluar njerëzit madje edhe kur ata po thyenin dritaret dhe hynin nëpër zyra, duke vjedhur dokumente dhe materiale qeveritare.

Një zëdhënës më vonë tha se Shefi i Policisë së Kapitolit, Steven Sund dha dorëheqjen.

Prokurori Michael Sherwin tha se dështimi i Policisë së Kapitolit e ka bërë më të vështirë punën e hetuesve federalë për të gjetur dhe arrestuar autorët e sulmit në Kapitol.

Shumë prej tyre lanë pas prova inkriminuese në formën e videove dhe fotografive të postuara në mediat sociale. Një mbështetës i grupit QAnon u fotografua në sallën e Senatit. Një tjetër mbështetës i Presidentit Trump u fotografua në zyrën e Kryetares së Dhomës së Përfaqësuesve, Nancy Pelosi.

Zyrtarët e zbatimit të ligjit thanë se ata po analizojnë videot e regjistruara nga kamerat e sigurisë dhe imazhet e postuara në mediat sociale për të identifikuar autorët. FBI-ja i ka bërë thirrje publikut që të ndajë “informacione dhe të dhëna nga media sociale që përshkruajnë trazirat ose dhunën”.

Jordan Strauss, një ish-prokuror federal që tani është drejtor menaxhues në firmën e sigurisë Kroll, tha se videot dhe fotografitë ofrojnë “prova me bollëk” që prokurorët mund të përdorin për të ngritur akuza.

“Shumë njerëz i transmetuan drejtpërdrejt krimet e tyre ndërsa ishin duke i kryer ato”, tha zoti Strauss.

Akuza të mundshme

Pjesëmarrësit në trazirat e së mërkurës në Kapitol mund të përballen me disa akuza federale, si shkatërrimi i pronës, kërcënimi i anëtarëve të Kongresit dhe kryengritje, tha zoti Strauss. Prokurori Michael Sherwin tha se asnjë akuzë, përfshirë edhe atë për kryengritje, nuk do të përjashtohet nga ky hetim.

Kryengritja është akti i kundërshtimit të autoritetit qeveritar me forcë. Në një memorandum për prokurorët federal verën e kaluar, ish Prokurori i Përgjithshëm William Barr ka përmendur mundësinë e ngritjes së akuzave për kryengritje ndaj atyre që protestonin kundër policisë gjatë atyre muajve.

Eksperti i sigurisë Jordan Strauss tha se prokurorët me gjasë do të zgjedhin akuza “më të pastra” që nuk “rrezikojnë shkeljen e të drejtave të mbrojtura nga Amandamenti i Parë (i Kushtetutës) ose lejimin e një individi që të pretendojë se ekziston një lloj ndjekjeje politike”.

Joel Hirschhorn, një avokat mbrojtjes, tha se arrestimi dhe ngritja e akuzave ndaj çdo protestuesi do të jetë praktikisht i pamundur.

“Unë mendoj se kushdo që ishte brenda ndërtesës së Kapitolit është në rrezik sepse kjo ishte një hyrje e paligjshme në pronën qeveritare“, tha zoti Hirschhorn. “A do të jenë ata në gjendje të ndjekin penalisht të gjithë? Jo, kjo është e pamundur”, tha ai.

Prokurorët amerikanë pritet të hapin hetim federal për vrasje lidhur me vdekjen e një oficeri policie i cili humbi jetën nga plagët e marra kur mbështetësit e Presidentit Donald Trump sulmuan Kapitolin, sipas njoftimeve të medias.

Policia e Kapitolit tha në një deklaratë se oficeri Brian D. Sicknick u plagos “kur po përleshej me protestuesit” gjatë trazirave të së mërkurës. Ai është personi i pestë që humb jetën për shkak të trazirave.

Sulmi mbi Kapitol që ka tronditur botën dhe e ka lënë vendin të shokuar, detyroi dorëheqjet e tre zyrtarëve të lartë të sigurisë së Kapitolit për shkak të dështimit për të ndalur sulmin. Kjo bëri që ligjvënësit të kërkojnë një rishikim të operacioneve dhe një informacion të hollësishëm nga FBI-ja mbi atë që ata e quajtën një “sulm terrorist”.

Protestuesit u nxitën nga Presidenti Trump gjatë një tubimi pranë Shtëpisë së Bardhë të mërkurën që të marshonin drejt Kapitolit, ku ligjvënësit duhej të konfirmonin fitoren e Joe Biden-it në zgjedhje. Turma depërtoi me shpejtësi nëpër barrikadat e policisë, theu dritaret dhe hyri nëpër salla, duke bërë që ligjvënësit të largoheshin.

Një protestuese e bardhë, u qëllua për vdekje nga Policia e Kapitolit ndërkohë që janë bënë dhjetëra arrestime. Tre persona të tjerë gjetën vdekjen gjatë protestave.

Ligjvënësit nga të dy palët u zotuan të bëjnë hetime për të parë nëse mungesa e gatishmërisë e lejoi turmën të hynte dhe të vandalizonte ndërtesën. Departamenti i Mbrojtjes dhe ai i Drejtësisë kishin ofruar ndihmë por ajo u refuzua.

Ligjvënësit me ngjyrë, në veçanti, vunë në dukje mënyrën e trajtimit nga policia të mbështetësve kryesisht të bardhë të zotit Trump.

Ligjvënësja e sapozgjedhur Cori Bush, demokrate nga shteti i Mizurit, tha se nëse “ne, njerëzit me ngjyrë do të bënim të njëjtat veprime… reagimi do të kishte qenë ndryshe… do të ishim vrarë”.

Protestuesit plaçkitën ndërtesën, duke marrë në kontroll zonën e Dhomës së Përfaqësuesve dhe Senatit dhe duke valvitur flamuj të Trump-it, atë amerikan dhe të Konfederatës.

Për një moment, bota e harroi pandeminë e koronavirusit.

Kanalet e lajmeve në të gjithë botën u zhvendosën nga njoftimet për spitalet e mbingarkuara ose përhapja e vaksinave dhe vendosja e bllokimeve për t’u përqendruar në Shtetet e Bashkuara dhe sulmet ndaj Kongresit nga qindra protestues.

Kundërshtarët dhe aleatët e Amerikës nxorrën mësime të ndryshme nga trazirat, që ndodhën menjëherë pasi Presidenti Donald Trump u bëri thirrje mbështetësve të tij në një tubim aty pranë për “të rimarrim vendin në dorë “. Përpjekja dështoi dhe Joe Biden u konfirmua si presidenti i zgjedhur nga Kongresi të enjten herët në mëngjes.

Aleatët ishin të shtangur nga imazhet që transmetoheshin nga Uashingtoni. Armiqtë reaguan me entusiazëm.

Disa qeveri e panë kaosin si një përpjekje serioze në minutën e fundit nga mbështetësit e zotit Trump për të përmbysur zgjedhjet. Të tjerët, ndërsa e konsideruan dhunën si të rëndë dhe zhgënjyese, shprehën besim të vazhdueshëm në qëndrueshmërinë e demokracisë amerikane.

Kryeministri Australian Scott Morrison dënoi ato që ai i përshkroi si “skena shumë shqetësuese” por tha se ai priste me padurim transferimin e pushtetit tek presidenti i sapozgjedhur i Shteteve të Bashkuara, duke e quajtur atë në Twitter një “traditë të madhe demokratike amerikane”.

Në një video të postuar në Twitter, Presidenti francez Emmanuel Macron, i cili ka përballuar një situatë me protesta në rrugë vitin e kaluar, përshkroi sulmin ndaj Kongresit si “jo Amerikë”, duke shtuar se ai kishte “besim në forcën e demokracisë në Shtetet e Bashkuara. ”

Kjo pikëpamje u nda nga Ministrja e Jashtme e Zelandës së Re Nanaia Mahuta, e cila tha se ngjarjet në Uashington ishin një burim keqardhjeje, por se Zelanda e Re priste tranzicionin paqësor të pushtetit.

“Dhuna nuk ka vend në sabotimin e demokracisë,” shkroi ajo në Twitter. “Ne shpresojmë për një tranzicion paqësor të administratës politike, e cila është shenja dalluese e demokracisë.”

Udhëheqësit e Bashkimit Evropian gjithashtu theksuan se nuk kanë dyshime për përparimin e mëtejshëm të demokracisë amerikane.

Charles Michel, presidenti i Këshillit Evropian, tha ndërsa ishte i tronditur nga ngjarjet në Uashington, ai e përshkroi Kongresin e Sh.B.A si një “tempull të demokracisë”.

Presidentja e Komisionit Evropian Ursula von der Leyen theksoi “forcën e institucioneve të Shteteve të Bashkuara dhe demokracisë”, duke thënë se ajo mezi priste të punonte me presidentin e ardhshëm, Joe Biden.

Kryeministri kanadez Justin Trudeau tha se ai ishte “thellësisht i shqetësuar dhe i trishtuar” nga ajo që ishte shpalosur në Uashington, por tha se “demokracia në SHBA duhet të ruhet – dhe ashtu do të ndodhë.”

Armiqtë e përdorën ngjarjen për të fituar pikë gjeopolitike. Venezuela, e cila është sanksionuar nga SHBA dhe vendet Evropiane për abuzime të të drejtave të njeriut, tha se Shtetet e Bashkuara “po vuajnë atë që kanë shkaktuar në vendet e tjera me politikën e tyre të agresionit.”

Ministria e Jashtme e Kinës megjëherë i etiketoi pro-Trump si “banditë, ekstremistë dhe kriminelë”, por i krahasoi ata me aktivistët pro-demokracisë në Hong Kong, të cilët kanë protestuar për shtypjen e fjalës së lirë dhe mospajtimit dhe minimin të demokracisë.

“Disa njerëz në Shtetet e Bashkuara reaguan dhe përdorën fjalë shumë të ndryshme ndaj asaj që ndodhi në Hong Kong në 2019 dhe asaj që po ndodh në SHBA sot. Ky kontrast i mprehtë dhe arsyet prapa tij janë provokuese,” tha të enjten zëdhënësja e Ministrisë së Jashtme Hua Chunying.

Presidenti i Iranit përmendi sulmet ndaj Kapitolit të SHBA-së si një shembull i dobësisë së demokracisë perëndimore. Duke folur të enjten, Presidenti Hassan Rouhani tha, “Ajo që pamë në Shtetet e Bashkuara tregon mbi të gjitha se sa e brishtë dhe e ekspozuar është demokracia perëndimore.”

Sekretari i Përgjithshëm i Kombeve të Bashkuara, Antonio Guterres tha se ishte “trishtuar” nga hyrja e dhunshme në Kapitol, sipas zëdhënësit Stephane Dujarric.

“Në rrethana të tilla, është e rëndësishme që udhëheqësit politikë të theksojnë tek ndjekësit e tyre nevojën për të hequr dorë nga dhuna, si dhe për të respektuar proceset demokratike dhe sundimin e ligjit,” tha zoti Dujarric në një deklaratë.

Ministrja e Brendshme britanike Priti Patel tha se komentet e zotit Trump çuan drejtpërdrejt në dhunën që ndodhi në Uashington, duke shtuar se ai “bëri shumë pak për të zbutur” situatën.

Duke folur në Sky News, zonja Patel i përshkroi Shtetet e Bashkuara si një fener i demokracisë por dënoi trazirat e së mërkurës.

“Dikush u qëllua. Njerëzit kanë vdekur. Kjo është e tmerrshme – e tmerrshme përtej fjalëve, sinqerisht, dhe nuk ka asnjë justifikim për një gjë të tillë.”

Kryeministri britanik Boris Johnson shkroi në Twitter, “Skena të turpshme në Kongresin e SHBA. Shtetet e Bashkuara mbrojnë demokracinë në të gjithë botën dhe tani është thelbësore që të ketë një transferim të qetë dhe të rregullt të pushtetit.”

Kancelarja gjermane Angela Merkel tha se ndihej “e indinjuar dhe gjithashtu e trishtuar” nga ngjarjet. Ajo tha në një takim të konservatorëve gjermanë: “Më vjen shumë keq që Presidenti Trump ende nuk e ka pranuar humbjen, por ka ngritur dyshime në lidhje me zgjedhjet.”

Politikanët dhe analistët e tjerë diskutuan mbi ndikimin afatgjatë të trazirave. Disa sugjeruan që ngjarjet e së mërkurës, dhe ato që i paraprinë atyre, treguan rrënjosjen e thellë të demokracisë në Shtetet e Bashkuara.

“Baballarët e Kombit ndërtuan themele të forta”, argumentoi Tom Tugendhat, një ligjvënës i lartë Konservator Britanik dhe kryetar i komisionit të punëve të jashtme të Parlamentit. “Kjo është e qartë nga rezistenca e gjykatësve ndaj presionit politik në më shumë se 60 çështje gjyqësore të cilat Presidenti Trump i ka humbur duke u përpjekur të përmbysë rezultatin e zgjedhjeve presidenciale. Edhe ata gjyqtarë të emëruar nga republikanët, disa nga vetë Trump, e kanë bërë të qartë se dështimi i tij për të paraqitur prova të mashtrimit elektoral i bën pretendimet e tij të pabazuara dhe i kanë hedhur poshtë ato.”

Zoti Tugendhat gjithashtu vuri në dukje se si zyrtarët shtetërorë nga Partia Republikane e zotit Trump refuzuan në mënyrë të ngjashme t’i nënshtroheshit presionit për të përmbysur rezultatet.

“Kjo nuk është një demokraci që po shembet,” tha ai.

Duke folur për Zërin e Amerikës, ligjvënësja britanike Lisa Nandy, zëdhënëse ndërkombëtare e partisë kryesore të opozitës, asaj Laburistetha: “Në të gjithë Britaninë shumica e njerëzve thjesht shikonin me një ndjenjë të vërtetë shoku dhe tmerri. Amerika shihet në Britani si një nga demokracitë e mëdha të botës. Unë mendoj se emocioni dërrmues që shumica e britanikëve po ndjenin ishte solidariteti.”

Ajo tha se ishte i pashmangshëm dëmtimi i reputacionit të Amerikës nga një turmë që sulmon Kongresin dhe se kjo mund të “inkurajojë disa nga ata udhëheqës në të gjithë botën që aktualisht po përpiqen të sulmojnë demokracinë në vendin e tyre”. Por shtoi ajo: “Megjithatë, dita e djeshme solli edhe optimizëm. Tingëllon si një gjë e çuditshme ta thuash, por mënyra se si Joe Biden doli dhe bëri thirrje për qetësi dhe foli për sulmin ndaj demokracisë, ishte tregues i udhëheqjes që nuk kemi parë në Shtetet e Bashkuara për disa vjet. ”

Tre ditë para protestës së dhunshme të mbështetësve të Presidentit Donald Trump në Kapitol, Pentagoni pyeti Policinë e kompleksit të Kongresit amerikan nëse kishte nevojë për trupa shtesë të Gardës Kombëtare. Ndërsa turma filloi të shkonte drejt Kapitolit të mërkurën, udhëheqësit e Departamentit të Drejtësisë i ofruan policisë në ndërtesën e Kongresin ndihmë me agjentë të FBI-së. Policia e Kapitolit i hodhi poshtë të dyja kërkesat, sipas një zyrtari të mbrojtjes dhe dy personave me njohuri për këtë çështje.

Pavarësisht paralajmërimeve të shumta për një kryengritje të mundshme dhe burimeve të mjaftueshme dhe kohës për t’u përgatitur, Policia e Kapitolit bëri plane vetëm për një protestë të lirisë së shprehjes.

Duke marrë parasysh reagimin e dhunshëm të forcave të rendit ndaj protestave të qershorit të kaluar pranë Shtëpisë së Bardhë, zyrtarët gjithashtu kishin si qëllim të shmangnin krijimin e përshtypjes se qeveria federale po dislokonte ushtarë ose trupa të Gardës Kombëtare për t’u përdorur kundër amerikanëve.

Kjo rezultoi në vërshimin e protestuesve në Kapitol dhe në mbingarkesën e oficerëve të një agjencie të zbatimit të ligjit me një buxhet të madh operativ dhe përvojë në ngjarje të sigurisë së lartë që mbrojnë ligjvënësit, të mërkurën. Katër protestues vdiqën, duke përfshirë një grua, e cila u qëllua me armë brenda ndërtesës.

Trazirat dhe humbja e kontrollit nga policia kanë ngritur pikëpyetje serioze mbi sigurinë në Kapitol për ngjarjet e ardhshme. Veprimet e ditës së mërkurë gjithashtu ngrenë shqetësime në lidhje me trajtimin e mbështetësve kryesisht të bardhë të Preisdentit Trump që u lejuan të endeshin nëpër ndërtesë për orë të tëra, ndërsa protestuesit afrikano-amerikanë dhe ata me ngjyrë që protestuan vitin e kaluar kundër brutalitetit të policisë u përballën me një polici më të fuqishme dhe më agresive.

“Ky ishte një dështim i imagjinatës, një dështim i udhëheqjes”, tha Shefi i Policisë së Hjustonit, Art Acevedo, departamenti i të cilit iu përgjigj ndaj disa protestave të mëdha vitin e kaluar pas vdekjes në duart e policisë të afrikano-amerikanit George Floyd. “Policia e Kapitolit duhet të jetë më e përgatitur dhe nuk shoh se si mund ta trajtojmë këtë ndryshe.”

Zoti Acevedo tha se ai ka marrë pjesë në ngjarje në Kapitol për të nderuar oficerët e vrarë të policisë që kishin gardhe më të larta dhe një prani më të fortë të sigurisë sesa ajo që ai pa në videot e ngjarjeve të së mërkurës.

Sekretari i Ushtrisë Ryan McCarthy tha se ndërsa trazirat ishin duke u zhvilluar, u bë e qartë se Policia e Kapitolit ishte zbrapsur. Nuk ishin bërë plane paraprakisht për mënyrën se si duhet të vepronin forcat e sigurisë në rast të një problemi në Kapitol. “Ata duhet të na pyesin, kërkesa duhet të na vijë”, tha zoti McCarthy.

Një ditë pas protestës së dhunshme, shefi i Sigurisë në Dhomën e Përfaqësuesve dha dorëheqjen dhe Kryetarja e Dhomës së Përfaqësuescve, Nancy Pelosi kërkuan dorëheqjen e shefit të Policisë së Kapitolit.

“Kishte një dështim të udhëheqjes së lartë”, tha ligjvënësja demokrate nga Kalifornia, Nancy Pelosi.

Shefi i Policisë së Kapitolit, Steven Sund tha të enjten se do të jepte dorëheqjen duke filluar nga 16 janari sipas një letre të cituar nga mediat, një ditë pasi mbështetësit e Presidentit Donald Trump sulmuan ndërtesën dhe detyruan ligjvënësit të fshiheshin.

Senatori demokrat nga Nju Jorku, Chuck Schumer, udhëheqës i shumicës së re në senat, tha se ai do të pushojë nga detyra Shefin e Sigurisë së Senatit.

Më vonë të ejten, udhëheqësi i shumicës republikane në Senat, Mitch McConnell tha se kishte pranuar dorëheqjen e Shefit të Sigurisë së Senatit, Michael Stenger. Senatori nga Kentaki me herët kishte kërkuar dorëheqjen e zotit Stenger.

Kapitoli amerikan ishte mbyllur për publikun që nga marsi për shkak të pandemisë së Covid-19, e cila ka shkaktuar vdekjen e më shumë se 350,000 amerikanëve. Por normalisht, ndërtesa është e hapur për publikun dhe ligjvënësit krenohen me disponueshmërinë e tyre për qytetarët që i përfaqësojnë.

Nuk është e qartë se sa oficerë ishin në detyrë të mërkurën, por kompleksi 16 hektarësh mbrohet nga një total prej 2,300 oficerësh, të cilët kujdesen për sigurinë e 435 anëtarëve të Dhomës së Përfaqësuesve, 100 senatorëve amerikanë dhe stafin e tyre. Në krahasim me Kapitolin, qyteti i Mineapolisit ka rreth 840 policë që kujdesen për sigurinë e 425,000 banorëve në një zonë prej 6,000 hektarësh.

Në javët para së mërkurës kishte shenja se mund të kishte veprime të dhunshme më 6 janar, ditën kur Kongresi do të mblidhej për të certifikuar rezultatin e zgjedhjeve presidenciale që nxorrën fitues demokratin Joe Biden.

Në platforma të ndryshme të grupeve të ekstremit të djathtë dhe në qarqet grupeve pro-Trump, po bëheshin plane për një gjë të tillë.

Udhëheqësi i grupit ekstremist të djathtë Proud Boys u arrestua kur po vinte në kryeqytetin e vendit këtë javë me akuzën për armëmbajtje, për bartjen e dy karikatorëve me kapacitet të lartë. Ai pranoi në polici se kishte bërë deklarata në lidhje me trazirat në Uashington, thanë zyrtarët lokalë.

Si zoti Acevedo edhe Ed Davis, ish-komisioner i Policisë së Bostonit i cili drejtoi departamentin gjatë bombardimeve në Maratonën e Bostonit në vitin 2013, thanë se ata nuk fajësojnë reagimin e oficerëve të vijës së parë të frontit, por masat e planifikimit dhe udhëheqjen e treguar para trazirave.

“A mund të ketë pasur ndonjë mendim të brendshëm se ata ishin thjesht një grup konservatorësh, dhe nuk do të bënin një gjë të tillë? Ka shumë mundësi,” tha zoti Davis. “Pikërisht këtu mendoj se mund të ketë luajtur rol elementi racor. A kishte një mungesë urgjence ose një ndjenjë që kjo nuk mund të ndodhte kurrë me këtë turmë? A është e mundur një gjë e tillë? Absolutisht.”

Zoti Trump dhe aleatët e tij ishin ndoshta megafonët më të mëdhenj, duke inkurajuar protestuesit të dilnin në rrugë në masë dhe të mbështesnin pretendimin e tij të rremë se fitorja në zgjedhje ishte grabitur prej tij. Ai i nxiti gjatë një tubimi pak para se të marshonin për në Kapitol dhe të bënin trazira. Avokati i tij personal Rudy Giuliani, ish-kryetar i Bashkisë së Nju Jorkut i njohur për qëndrimin e tij të ashpër ndaj krimit bëri thirrje për “gjykim përmes luftës”.

Por Policia e Kapitolit nuk kishte vendosur asnjë perimetër të fortë rreth Kapitolit. Oficerët ishin përqendruar në njërën anë, ku ligjvënësit po hynin për të votuar për të vërtetuar fitoren e zotit Biden.

Barrikadat në sheshin e ndërtesës u vendosën, por policia u tërhoq dhe një turmë njerëzish depërtoi me forcë. Ligjvënësit në fillim të pavetëdijshëm për shkeljen e sigurisë, vazhduan debatin. Shpejt ata po fshiheshin poshtë karrigeve. Përfundimisht ata u nxorrën nga Dhoma e Përfaqësuesve dhe Senati. Gazetarët mbetën vetëm brenda sallave për orë të tëra, ndërsa turma u përpoq të depërtonte në zyrat me dyer të bllokuara.

“Sulmi i dhunshëm ndaj Kapitolit të Shteteve të Bashkuara ishte ndryshe nga çdo gjë që kam përjetuar ndonjëherë në 30 vitet e shërbimit për zbatimin e ligjit këtu në Uashington,” tha Shefi i Policisë së Kapitolit, Steven Sund, duke shpjeguar se kishte pasur një plan të fortëpër ato që ai priste të ishin aktivitete në frymën e Amendamentit të Parë, që parashikon lirinë e shprehjes.“Por nuk ka diskutim qëkëto trazira masive nuk ishin aktivitete të Amendamentit të Parë; ato ishin një manifestim trazirash kriminale.”

Gus Papathanasiou, kreu i sindikatës së Policisë së Kapitolit, bëri thirrje që zoti Sund të zëvendësohet, duke thënë që dështimet në planifikim i lanë oficerët të ekspozuar pa mbështetje ose pajisje për t’u mbrojtur ndaj turmave të mëdha.

“Nuk mund t’i lëmë oficerët tanë dhe komunitetin e zonës përreth Kongresit që ata mbrojnë në mëshirën e sulmeve të mëtejshme mes një mungese të udhëheqjes,” tha ai.

Zyrtarë të drejtësisë, FBI-ja dhe agjenci të tjera filluan të monitorojnë hotelet, fluturimet dhe mediat sociale për javë të tëra dhe prisnin turma masive. Kryebashkiakja Muriel Bowser kishte paralajmëruar për dhunë për javë të tëra dhe për këtë shkak bizneset ishin mbyllur. Ajo i kërkoi ndihmë Gardës Kombëtare nga Pentagoni më 31 Dhjetor, por Policia e Kapitolit hodhi poshtë ofertën e 3 janarit nga Departamenti i Mbrojtjes, sipas Kenneth Rapuanos, ndihmës sekretar i mbrojtjes për sigurinë e kombëtare.

Oferta e Departamentit të Drejtësisë për mbështetje nga ana e FBI-së ndërsa protestuesit u bënë gjithnjë e më tëdhunshëm u refuzua nga Policia e Kapitolit, sipas dy personave në dijeni të kësaj çështjeje. Ata nuk ishin të autorizuar të diskutonin publikisht çështjen dhe folën në kushte anonimiteti.

Por atëherë ishte tepër vonë.

Zyrtarët e Departamentit të Policisë Metropolitane arritën. U thirrën agjentë nga pothuajse çdo agjenci e Departamentit të Drejtësisë, përfshirë FBI-në. Po ashtu edhe Shërbimi Sekret dhe Shërbimi i Mbrojtjes Federale. Byroja e Alkoolit, Duhanit, Armëve të Zjarrit dhe Eksplozivëve dërgoi dy ekipe taktike. Policia nga Nju Xhërsi mbërriti për të ndihmuar.

U deshën katër orë për të shpërndarë protestuesit nga kompleksi i Kapitolit. Deri në atë kohë, ata kishin qarkulluar lirisht nëpër sallat e Kongresit, kishin pozuar për foto brenda sallave të shenjta të institucionit amerikan, kishin hyrë në zyra, duke shtyrë me forcë dyert, kishin shkaktuar dëme materiale dhe kishin fotografuar veten duke i bërë këto veprime. Vetëm 13 vetë u arrestuan në vend, dhjetra u arrestuan më vonë.

Si pasojë, një gardh prej 7 metrash do të ngrihet përreth territorit tëKapitolit për të paktën 30 ditë. Policia e Kapitolit do të kryejë një rishikim të ngjarjes, si dhe planifikimin dhe politikat e tyre. Ligjvënësit planifikojnë të hetojnë se si autoritetet i trajtuan trazirat.

Prokurori i Përgjithshëm në detyrë i Uashingtonit, Michael Sherwin, tha se fakti që nuk u arrestuan më shumë njerëz, po e bën punën e tyre më të vështirë.

“Tani do të na duhen urdhra për informacionet e kullave të celularëve, të mbledhim pamje videosh që të përpiqemi të identifikojmë njerëzit dhe më pas t’i akuzojmë, dhe pastaj të përpiqemi të realizojmë arrestimin e tyre. Kështu që kjo i ka bërë gjërat të vështira, por nuk mund të përgjigjem pse ata njerëz nuk u ndaluan ndërsa po largoheshin nga ndërtesa nga Policia e Kapitolit.” VOA

ATLANTA – Demokratët fituan në Xhorxhia të dyja vendet e Senatit dhe së bashku me to edhe shumicën e Senatit amerikan. Votat përfundimtare u numëruan të mërkurën, duke i dhënë Presidentit Donald Trump një humbje tronditëse në ditët e tij të fundit në detyrë dhe duke përmirësuar në mënyrë dramatike fatin e axhendës progresive të Presidentit të zgjedhur Joe Biden.

Jon Ossoff dhe Raphael Warnock, sfidantët demokratë, që përfaqësuan larminë e koalicionit në zhvillim të partisë së tyre, mundën republikanët David Perdue dhe Kelly Loeffler, dy muaj pasi zoti Biden u bë presidenti i parë demokrat që nga viti 1992 që fiton në këtë shtet.

Zoti Warnock, i cili shërbeu si pastor për të njëjtën kishë të Atlantës, ku predikoi lideri i të drejtave civile Martin Luther King Jr., bëhet i pari afrikano-amerikan nga Xhorxhia që zgjidhet në Senat. Gjithashtu, zoti Ossoff bëhet senatori i parë hebre i këtij shteti dhe, në moshën 33 vjeçare, anëtari më i ri i Senatit.

Suksesi i tyre është simbol i një zhvendosje të mprehtë të përbërjes shoqërore të Xhorxhias.

Zgjedhjet e kësaj jave shënojnë fundin e sezonit të trazuar të zgjedhjeve 2020. Nga barra e pazakontë e vendimmarrjes, Xhorxhia, dikur një shtet solid republikan, u shndërrua në një nga fushat kryesore të betejës politike gjatë ditëve të fundit të presidencës Trump – dhe ndoshta edhe më gjerë.

Në një fjalim emocional të mërkurën herët, zoti Warnock u zotua të punojë për të gjithë banorët e Xhorxhias, për ata që votuan për të apo jo, duke përmendur përvojën e tij personale me ëndrrën amerikane. Nëna e tij, tha ai, mblidhte “pambukun e dikujt tjetër” kur ishte adoleshente.

“Ditën tjetër, sepse kjo është Amerika, duart 82-vjeçare që mblidhnin pambukun e dikujt tjetër, zgjodhën djalin e saj më të ri për të qenë një senator i Shteteve të Bashkuara”, tha ai. “Sonte, ne dëshmuam se me shpresë, punë të palodhur dhe njerëzit përkrah nesh, gjithçka është e mundur”.

Në një intervistë me emisionin “Good Morning America” të kanalit ABC, ai e përshkroi fitoren e tij si një “përmbysje të strategjisë së vjetër të Jugut që kërkonte të ndante njerëzit”.

Zonja Loeffler, e cila vazhdon të jetë senatore e Xhorxhias derisa të finalizohen rezultatet e zgjedhjeve të së martës, u kthye në Uashington të mërkurën në mëngjes për t’iu bashkuar një grupi të vogël senatorësh që planifikonin të sfidonin votimin në Kongres për të çertifikuar fitoren e zotit Biden.

Tashmë që demokratët fituan të dyja vendet, Nënpresidentja e zgjedhur Kamala Harris do të jetë në gjendje të hedhë votën përcaktuese të çdo legjislacioni që Presidenti i zgjedhur Joe Biden dëshiron të miratohet në dy vitet e tij të para në detyrë. Por disa votues në Xhorxhia thonë se me Dhomën e Përfaqësuesve të kontrolluar nga demokratët, do të ishte më mirë të kishte një qeveri ku pushteti politik të mbetet i ndarë.

“Unë nuk besoj se nëse një parti kontrollon të gjithë Kongresin dhe presidencën, do të shohim që të gjithë ne të përfaqësohemi plotësisht”, thotë Lon Sperry votues në Xhorxhia.

Presidenti në largim bëri fushatë për të dy republikanët, duke kritikuar zyrtarët e zgjedhjeve në atë shtet dhe duke pretenduar pa prova se zgjedhjet e nëntorit u manipuluan. Disa republikanë janë të shqetësuar se pretendimet e presidentit mund të kenë dekurajuar mbështetësit e tij të votojnë.

Kongresi amerikan konfirmoi mëngjesin e së enjtes fitoren e presidentit të zgjedhur Joe Biden, në një proces ceremonial që u ndërpre për disa orë të mërkurën pas dhunës së pashembullt në Kapitol.

Katër veta humbën jetën ndërsa mbështetësit e presidentit Donald Trump iu përgjigjën thirrjes së tij për të kundërshtuar humbjen e tij në zgjedhjet presidenciale të nëntorit. Presidenti Trump ka pretenduar në mënyrë të përsëritur dhe të pambështetur se zgjedhjet ishin manipuluar.

Më shumë se gjashtë orë pas shpërthimit të dhunës, ligjvënësit rifilluan punën dhe të dyja dhomat e Kongresit hodhën poshtë një lëvizje nga aleatët e presidentit Donald Trump për të kundërshtuar certifikimin e rezultateve të zgjedhjeve presidenciale.

Joe Biden është fitues u zgjedhjeve me 306 vota elektorale kundrejt presidentit Donald Trump që mori 232 sosh.

Zoti Biden do të inaugurohet më 20 janar.

Presidenti Donald Trump, tha se “do të ketë një kalim të rregullt pushteti më 20 janar”. Në një deklaratë të shpërndarë nga Dan Scavino, drejtor për mediet sociale, presidenti Trump the se kjo do të ndodhë “ndonëse nuk pajtohet me rezultatin”.

“Unë gjithmonë kam thënë se do të vazhdojmë luftën tonë për të siguruar që vetëm votat e ligjshme të numëroheshin. Ndërsa ky përfaqëson fundin e mandatit të parë më të madh në historinë presidenciale, është vetëm fillimi i luftës sonë për ta bërë Amerikën përsëri të madhe”, thuhet në deklaratë.

Llogaria e presidentit Trump është bllokuar nga rrjeti twitter.

Si demokratët edhe republikanët dënuan dhunën në Kongres por ndërsa demokratët fajësuan presidentin Trump për nxitjen e saj, shumica e republikanëve nuk e përmendën atë.

“Ne dënojmë në mënyrën më të ashpër dhunën që ndodhi këtu. Pikëllohemi për humbjen e jetës në këto salla të shenjta, si dhe dëmtimet e pësuara nga ata që mbrojtën Kapitolin tonë sot”, tha nënpresidenti Mike Pence.

Ai tha se ata që sulmuan, nuk fituan.

“Dhuna nuk fiton kurrë. Liria fiton, dhe kjo është ende shtëpia e popullit. Ndërsa rimblidhemi në këtë dhomë, bota do të jetë përsëri dëshmitare e rezistencës dhe forcës së demokracisë sonë”, tha zoti Pence.

Kreu i Republikanëve në Senat Mitch McConnell tha se “ne do të kryejmë detyrën tonë sipas Kushtetutës për kombin tonë.”

Kreu i demokratëve në Senat, Chuck Schumer e vuri përgjegjësinë mbi presidentin Trump.

“Kjo do të jetë një njollë në vendin tone, jo aq lehtë për t’u zhdukur. Trashëgimia e fundit, e tmerrshme, e pashlyeshme, e pashlyeshme e presidentit të 45-të të Shteteve të Bashkuara”, tha ai.

Policia tha se katër veta humben jetën gjatë protestave të së mërkurës para dhe brenda ndërtesës së Kongresit amerikan, përfshirë një grua që u plagos brenda ndërtesës.

Shefi i policisë metropolitane Robert J. Contee, tha se 52 veta janë arrestuar pasi që mbështetësit e presidentit Donald Trump sulmuan Kongresin në një përpjekje për të penguar certifikimin e fitores së presidentit të zgjedhur, Joe Biden.

Në një konferencë me gazetarë, shefi Contee tha se 47 nga 52 arrestimet e deritashme kishin të bënin me shkelje të vendimit të kryebashkiakes Muriel Bowser për masën e shtetrrethimit. Disa të tjerë u arrestuan me akuza për armëmbajtje pa leje.

Zoti Contee refuzoi të identifikojë gruan që u qëllua dhe u vra nga një polic në Kapitol.

Tre të tjerë humbën jetën të mërkurën për shkak të “emergjencave mjekësore”, tha ai, duke shtuar se 14 pjesëtarë të policisë janë plagosur, dy nga të cilët janë duke u trajtuar në spitale.

Sulmi i së mërkurës mbi ndërtesën e Kapitolit, ishte më i dëmshmi që kur ushtria britanike e dogji atë në vitin 1814, thanë përfaqësues të Shoqatës Historike të Kapitolit.

Nënpresidenti i SHBA Mike Pence hapi një sesion të përbashkët të Kongresit për të çertifikuar zyrtarisht fitoren e Presidentit të zgjedhur Joe Biden, duke mos pranuar kërkesën e Presidentit Donald Trump që ai të refuzojë në mënyrë të njëanshme votat elektorale.

Aleatët e zotit Trump në Kongres ndërmorën një përpjekje të fundit për të zhbërë humbjen e tij në zgjedhje, në një seancë që mund të zgjasë përtej mesnatës.

“Ne nuk do të dorëzohemi kurrë”, u tha Presidenti Trump mijëra mbështetësve të mbledhur pranë Shtëpisë së Bardhë në lëndinën e quajtur Elipsi.

“Ne kurrë nuk do të pranojmë. Kjo nuk mund të ndodhë. Nuk mund të pranosh humbjen kur është fjala për vjedhje,” tha ai.

Presidenti Trump ushtroi përsëri presion ndaj nënpresidentit Pence që të përpiqej të përmbyste rezultatin.

Ndërkohë, në një deklaratë të mërkurën, zoti Pence tha se ai ndan shqetësimet në lidhje me “integritetin” e zgjedhjeve, por ai nuk mund të pranojë ose refuzojë votat elektorale në mënyrë të njëanshme.

Kushtetuta nuk i jep nënpresidentit Pence kompetencën për të përmbysur në mënyrë të njëanshme rezultatet e zgjedhjeve, por ai është nën presionin e zotit Trump për ta bërë këtë.

“Është gjykimi im i peshuar se betimi që kam bërë për të mbështetur dhe mbrojtur Kushtetutën nuk më lejon të pretendoj autoritet të njëanshëm për të përcaktuar se cilat vota elektorale duhet të numërohen dhe cilat jo”, tha ai në deklaratë.

Ai tha se do të bënte detyrën e tij për të garantuar se shqetësimet në lidhje me zgjedhjet do të dëgjohen në mënyrë “të drejtë dhe të hapur”.

“Kur lindin mosmarrëveshje në lidhje me zgjedhjet presidenciale, sipas Ligjit Federal, janë përfaqësuesit e popullit që shqyrtojnë provat dhe zgjidhin mosmarrëveshjet përmes një procesi demokratik,” tha zoti Pence, i cili po kryeson një sesion të përbashkët të Kongresit për çertifikimin e rezultatit të zgjedhjeve.

Hapi rutinë dhe përgjithësisht ceremonial që normalisht do të zyrtarizonte fitoren e demokratit Joe Biden, këtë radhë është kthyer në një provë të besnikërisë së republikanëve ndaj Presidentit Trump. Mbi 100 ligjvënës besnikë të presidentit po e sfidojnë procesin e çertifikimit.

Procesin e sfiduan të parët ligjvënësit e Arizonës, të cilët bënë që ndalej numërimi i votës.

Refuzimi i tyre u prit me brohoritje nga republikanët e tjerë dhe me një shprehje pakënaqësie nga ligjvënësit demokratë në sallë.

Sipas rregullores, çdo kundërshti mund të debatohet deri në dy orë; po ashtu duhet kohë që të numërohen votat në secilën Dhomë. Si rezultat, kjo ceremoni zakonisht e shkurtër, pritet të kthehet në një seancë të tejzgjatur.

Gjatë seancës së nisur në Senat për votat e Arizonës, udhëheqësi i shumicës së Senatit, Mitch McOnnell tha se “Votuesit, gjykatat dhe shtetet e thanë fjalën e tyre. Të gjithë folën. Nëse ne e vëmë veten mbi to, kjo do ta dëmtonte republikën tonë përgjithmonë.”

Ndërtesa e Kongresit amerikan u vu nën izolim për shkak se një numër protestuesish që mbështesin presidentin Donald Trump hynë në kompleksin e Kapitolit, ku ligjvënësit janë mbledhur në seancë për çertifikimin e votës elektorale të zgjedhjeve të 3 nëntorit.

Gjendja në Kapitol dhe rreth tij është ende e tensionuar, ndërkohë që protestuesit u përplasën me policinë që ruajnë ndërtesën.

Sipas agjencisë së lajmeve Reuters, disa njerëz goditnin me grushta dyert e sallës kryesore ku zhvillohen seancat e Kongresit në përpjekje për të hyrë brenda.

Ligjvënësit ndërprenë seancat që hapën pasdite për çertifikimin e votave elektorale dhe që po zgjaten për shkak të kundërshtimeve të disa ligjvënësve republikanë.

Njoftohet se protestuesit janë përhapur kudo në ndërtesën e Kapitolit. Policia po i shoqëron anëtarët e Kongresit jashtë ndërtesës për arsye sigurie.

Njoftohet gjithashtu se Nënpresidenti Mike Pence është shoqëruar për në një vend të sigurtë brenda Kapitolit.

Sipas disa njoftimeve, brenda Kapitolit ka patur edhe të shtëna me armë.

Presidenti Trump, në një koment në Twitter, u bëri thirrje protestuesve të ruajnë qetësinë.

Më parë, gjatë një tubimi, ai u bëri thirrje atyre të marshonin drejt Kapitolit.

Senatorët republikanë Tom Cotton dhe Ron Johnson, mbështetës të Presidentit Trump, e quajtën dhunën në Kapitol të papranueshme dhe u bënë thirrje protestuesve të shpërndahen.

Kryetarja e Bashkisë së Uashingtonit ka shpallur gjendjen e ndalim-qarkullimit duke filluar nga ora 18:00 e së mërkurës deri në orën 6 të mëngjesit.

Më herët të mërkurën, mijëra mbështetës të Presidentit Trump, duke përfshirë disa anëtarë të grupeve të dhunshme të ekstremit të djathtë, organizuan në kryeqytet demonstrata, ndërsa mbështesnin pretendimin e pabazë të presidentit se zgjedhjet u ishin vjedhur me anë të një komploti të sofistikuar.

Shumë prej tyre mbanin kapele dhe flamuj me parrullën e zotit Trump “Ta bëjmë Amerikës përsëri të Madhe”.

Presidenti foli para mijëra mbështetësve të mbledhur pranë Shtëpisë së Bardhë në lëndinën e quajtur Elipsi.

“Ne nuk do të dorëzohemi kurrë”. “Ne kurrë nuk do të pranojmë. Kjo nuk mund të ndodhë. Nuk mund të pranosh humbjen kur është fjala për vjedhje,” tha ai.

Duke iu referuar nënpresidentit Mike Pence që kryeson seancën në Kongres, Presidenti Trump tha:

“Shpresoj që Mike të bëjë gjënë e duhur. Kështu shpresoj. Kështu shpresoj, sepse nëse Mike Pence bën gjënë e duhur, ne do të fitojmë zgjedhjet. Kjo është gjithçka që ai duhet të bëjë… Ne duhet të mbrojmë vendin tonë, të mbështesim vendin tonë, të mbështesim kushtetutën tonë dhe ta mbrojmë kushtetutën tonë. Shtetet duan të përsëritet votimi, shtetet u vodhën. Iu dha informacion fals. Ata votuan bazuar mbi këtë dhe tani duan të përsëritet çertifikimi”.

Një nga djemtë e presidentit, Donald Trump Jr., dhe avokati i tij personal, Rudy Giuliani, gjithashtu folën në tubim.

Një natë më parë disa protestues u përplasën me policinë. Policia arrestoi këtë javë drejtuesin e organizatës Djemtë Krenarë, një grup që ka mbështetur presidentin Trump. Arrestimi u bë nën akuzat për shkatërrim pasurie në lidhje me një protestë të mëparshme dhe për posedim municioni.

Demokratët fituan një garë të Senatit Amerikan në Xhorxhia dhe kanë epërsi të ngushtë në garën tjetër të balotazhit, duke qënë më pranë marrjes së kontrollit të Senatit dhe për të çuar përpara synimet e politikës së Presidentit të zgjedhur Joe Biden. Demokrati Raphael Warnock fitoi garën e balotazhit në Xhorxhia duke mposhtur kundërshtaren republikane Kelly Loffler. Pastori Warnock do të jetë afrikano-amerikani i parë i zgjedhur për të përfaqësuar shtetin e Xhorxhias në Senatin amerikan.

Demokratët janë një hap më pranë marrjes së kontrollit të Senatit.

Kandidati demokrat Raphael Warnock ka mposhtur republikanen Kelly Loeffler në një nga garat e balotazhit në Xhorxhia. Demokrati tjetër Jon Ossoff është përpara kandidatit republikan David Perdue në garën tjetër ndërsa vazhdon numërimi i votave.

“Unë do të luftoj për ju, çdo ditë që do të jem në Senatin amerikan”, tha kandidati demokrat.

Warnock është një pastor i shquar afrikano-amerikan në kishën baptiste Ebenzer në Atlanta që dikur i përkiste doktor Martin Luther King Junior.

Në fjalimin e fitores ai tha se është i vetëdijshëm për rolin historik si afrikano-amerikani i parë i Xhorxhias që zgjidhet senator.

“Jam para jush sonte, duke e ditur mirë se udhëtimi i pabesueshëm që më solli fitoren në këtë moment historik në Amerikë mund të ndodhte vetëm këtu”, tha Warnock.

Por sfiduesja e tij republikane Kelly Loeffler, aleate e zjarrtë e presidentit Trump nuk e ka pranuar ende humbjen.

“Ne kemi një rrugë drejt fitores dhe do të qëndrojmë në garë”, tha zonja Loeffler.

Kandidati tjetër demokrat John Ossoff shpalli fitoren ndaj republikanit David Perdue megjithëse gara mbetet e ngushtë.

Nëse demokratët fitojnë të dyja vendet, atëherë nënpresidentja e zgjedhur Kamala Harris do të jetë në gjendje të hedhë votën përcaktuese të çdo legjislacioni që Presidenti i zgjedhur Joe Biden dëshiron të miratohet në dy vitet e tij të para në detyrë. Por disa votues në Xhorxhia thonë se me Dhomën e Përfaqësuesve të kontrolluar nga demokratët, do të ishte më mirë të kishte një qeveri ku pushteti politik të mbetet i ndarë.

“Unë nuk besoj se nëse një parti kontrollon të gjithë Kongresin dhe presidencën, do të shohim që të gjithë ne të përfaqësohemi plotësisht”, thotë Lon Sperry votues në Xhorxhia.

Presidenti në largim bëri fushatë për të dy republikanët, duke kritikuar zyrtarët e zgjedhjeve në atë shtet dhe duke pretenduar pa prova se zgjedhjet e nëntorit u manipuluan. Disa republikanë janë të shqetësuar se pretendimet e presidentit mund të kenë dekurajuar mbështetësit e tij të votojnë.

Demokratët fituan njërën nga garat e balotazhit në Xhorxhia për dy vende në Senatin amerikan, ndërsa kryesojnë edhe për vendin e dytë, që do t’i siguronte përparësi presidentit të zgjedhur Joe Biden, kur të marrë detyrën më vonë gjatë këtij muaji.

Sipas medieve amerikane dhe grupit “Edison Research”, sfiduesi demokrat Raphael Warnock fitoi përballë republikanes Kelly Loeffler, ndërsa demokrati Jon Ossoff ka një epërsi të ngushtë kundruall republikanit David Perdue, ndonëse rezultati përfundimtar pritet më vonë të mërkurën.

Me 98 për qind të votave të numëruara, sipas grupit Edison Research, zoti Warnock kryeson kundrejt zonjës Loeffler me 1,2 përqin, afërsisht 50 mijë vota, ndërsa zoti Ossoff është në epërsi me rreth 4 mijë vota ndaj zotit Perdue.

Nëse të dy demokratët Warnock dhe Ossoff do të fitonin, në Senat do të kishte një ndarje 50-50, duke i dhënë nënpresidentes së zgjedhur Kamala Harris mundësinë për të hedhur votën përcaktuese pasi ajo dhe zoti Biden të marrin detyrën më 20 janar. Demokratët kanë tashmë një shumicë të ngushtë në Dhomën e Përfaqësuesve.

Një Senat i kontrolluar nga republikanët do të ndërlikonte miratimin e reformave legjislative të zotit Biden gjatë dy viteve të ardhshme, duke detyruar ndoshta negociata gjithëpërfshirëse për çështje të tilla si shkalla e përfitimeve të kujdesit shëndetësor, vendosja e kontrolleve të imigracionit dhe vendosja e rregulloreve për ndryshimet klimatike.

Shumica e votave që mbetën për t’u numëruar janë nga zonat ku Joe Biden fitoi në nëntor, me rreth 13 mijë vota që ende duhet të numërohen në Qarkun DeKalb afër Atlantës, duke nxitur optimizmin e demokratëve. Asnjë demokrat nuk ka fituar një garë për Senatin amerikan në Xhorxhia për 20 vjet.

“Na thanë që nuk mund t’i fitonim këto zgjedhje. Por sonte, ne vërtetuam se me shpresë, punë të palodhur dhe njerëzit përkrah nesh, gjithçka është e mundur,” tha zoti Warnock, një predikues Baptist, në një mesazh përpara se të projektohej si fitues.

“Unë do të shkoj në Senat për të punuar për të gjithë Xhorxhian, pa marrë parasysh për kë keni votuar në këto zgjedhje”, tha ai.

Zoti Warnock do të bëhet senatori i parë me ngjyrë nga Xhorxhia, ndërsa zoti Ossoff, 33 vjeç, do të ishte anëtari më i ri i Senatit nëse fiton.

Pjesëmarrja në votime ishte shumë e lartë të martën, me radhë të gjata votuesish që prisnin para vendvotimeve, ndërsa gati 3.1 milion veta hodhën votat para ditës së zgjedhjeve. Pesë milionë vota u hodhën në Xhorxhia në zgjedhjet e nëntorit që përfshinin garën presidenciale.

Rreth 100 mijë veta që nuk votuan në nëntor në Xhorxhia, hodhën votën e tyre në garën e balotazhit për Senatin para ditës zyrtare të zgjedhjeve.

Në nëntor, zoti Biden u bë kandidati i parë demokrat që fitoi në Xhorxhia që nga viti 1992.

Presidenti ka pretenduar në mënyrë të përsëritur pa prova se zgjedhjet ishin “manipuluar” dhe të shtuan në një telefonatë ai i kërkoi zyrtarit më të lartë të zgjedhjeve të këtij shteti, Sekretarit të Shtetit Brad Raffensperger, një republikan, të gjente 11 mijë e 780 vota të tjera për të përmbysur rezultatin. Por zoti Raffensperger hodhi poshtë kërkesën e Trump-it dhe të hënën i tha kanalit ABC News se presidenti “thjesht e ka gabim” kur flet për parregullsi zgjedhore në Xhorxhia.

Presidenti i zgjedhur Biden dhe presidenti në largim Donald Trump mbajtën tubime të hënën në Xhorxhia në një përpjekje të fundit për të bindur votuesit.

“Forca është në duart tuaja”, tha zoti Biden. “Si asnjëherë tjetër në karrierën time, një shtet mund të përcaktojë kursin, jo vetëm për katër vitet e ardhshme, por për gjeneratën e ardhshme.”

Ai tha se banorët e Xhorxhias kishin votuar në numër rekord në zgjedhjet presidenciale në nëntor, duke i dhënë atij një fitore të ngushtë në atë shtet. “Tani, kemi nevojë që ju të votoni përsëri në numër rekord,” tha ai.

Presidenti Trump bëri fushatë më vonë të hënën në një qark republikan në Dalton, në pjesën veriore të shtetit, duke u thënë mbështetësve se zgjedhjet mund të ishin “shansi i tyre i fundit për të shpëtuar Amerikën që duam”.

“E majta ekstreme dëshiron të shkatërrojë vendin tonë, të shkatërrojë historinë tonë dhe të fshijë gjithçka që ne duam”, tha presidenti Trump. “Kjo mund të jetë vota më e rëndësishme, që do të hidhni ndonjëherë në jetën tuaj.”

Anëtarët e Senatit dhe Dhomës së Përfaqësuesve do të mblidhen të mërkurën në një seancë të përbashkët të Kongresit për të numëruar dhe certifikuar votat elektorale që rezultuan nga zgjedhjet presidenciale të 3 nëntorit.

Ky veprim rutinë dhe përgjithësisht ceremonial që normalisht do të zyrtarizonte fitoren e demokratit Joe Biden në zgjedhje pasi Kolegji Elektoral më 14 dhjetor e zgjodhi zyrtarisht kandidatin demokrat si fitues në këtë cikël zgjedhor, këtë radhë është kthyer në një provë të besnikërisë së republikanëve ndaj Presidentit Trump. Mbi 100 ligjvënës besnikë të presidentit pritet ta sfidojnë procesin e certifikimit. Ja çfarë pritet gjatë seancës.

Si Zhvillohet Zakonisht Seanca?

Në bazë të Amendamentit të 12-të, të dyja Dhomat e Kongresit mblidhen për të numëruar dhe certifikuar rezultatin e Kolegjit Elektoral bazuar në votat e 50 shteteve dhe të kryeqytetit, Uashington.

Përfaqësues republikanë e demokratë në Senat dhe Dhomën e Përfaqësuesve caktohen si “zëdhënës” të secilës Dhomë. Nënpresidenti Mike Pence, në kapacitetin e presidentit të Senatit, drejton seancën. Në mungesë të tij, senatori më me vjetërsi në partinë që ka shumicën, në këtë rast Senatori republikan Chuck Grassley nga Ajova, udhëheq seancën.

Ndihmës në Senat – nxënës nga shkolla të mesme nga të gjithë SHBA – sjellin kuti druri të mbushura me votat elektorale të certifikuara nga të 50 shtetet. Zyrtari që drejton seancën hap punimet dhe prezanton certifikatat e vulosura sipas radhës alfabetike. “Zëdhënësi” i secilës Dhomë lexon certifikatën me zë të lartë për të regjistruar zyrtarisht numrin e votave.

Procesi vazhdon deri kur të gjitha votat të jenë prezantuar dhe numëruar. Më pas, drejtuesi i ceremonisë njofton kush ka siguruar shumicën për president dhe nënpresident.

Si pritet të zhvillohet seanca këtë radhë?

Në një përpjekje të fundit për të mbajtur Presidentin Trump në Shtëpinë e Bardhë, më shumë se 100 republikanë në Dhomën e Përfaqësuesve dhe mbi 10 në Senat kanë thënë se do të kundërshtojnë numrimin e votave elektorale nga gjashtë shtete të lëkundura që i fitoi zoti Biden (Arizona, Xhorxhia, Miçigani, Nevada, Pensilvania dhe Uiskonsini ) dhe do të kërkojnë ngritjen e një komisioni për një auditim të rezultateve zgjedhore.

Pjesa më e madhe e senatorëve që kanë në plan të kundërshtojnë përfaqësojnë shtete ku Presidenti Trump mbetet shumë popullor.

Kjo sfidë pritet të dështojë pasi demokratët kontrollojnë Dhomën e Përfaqësuesve dhe janë të bashkuar në mbështetje të zotit Biden. Senati, megjithëse kontrollohet me një shumicë të vogël nga republikanët, nuk ka gjasa të votojë në favor të këtyre manovrave, pasi një numër senatorësh republikanë kanë thënë se janë kundër tentativave për të mos përfshirë votat elektorale të ndonjë shteti.

Sipas rregullores, çdo kundërshti mund të debatohet deri në dy orë; po ashtu duhet kohë që të numërohen votat në secilën Dhomë. Si rezultat, kjo ceremoni zakonisht e shkurtër, do të kthehet në një seancë të tejzgjatur.

Jason Grumet, president i Qendrës për Politika Dypartiake e quan këtë manovër të republikanëve “shumë shqetësuese”.

“Nuk është konservatore, nuk është partiake, nuk është patriotike,” tha zoti Grumet. “Kjo është një përpjekje egoiste nga disa politikanë ambiciozë që po sfidojnë rezultatin e zgjedhjeve, të cilat sipas shumë burimesh janë zhvillur shumë në rregull”.

Ekipi zgjedhor i presidentit dhe aleatët e tij kanë ngritur 61 padi për të sfiduar rezultatin e zgjedhjeve në një numër shtetesh. Ata kanë humbur 60 prej padive, pasi nuk kanë ofruar prova që mbështesin pretendimet për manipulime apo parregullsi.

Çfarë roli ka luajtur presidenti në këtë situatë?

Presidenti, i cili ka siguruar 232 vota elektorale krahasuar me 306 që fitoi zoti Biden, nuk e ka pranuar humbjen. Ai u ka bërë presion republikanëve në Kongres dhe zyrtarëve të përmbysin rezultatin, shpesh duke përdorur forcën e popullaritetit të tij në elektorat, duke kërcënuar republikanët se mund t’u dëmtojë shanset e rizgjedhjes në të ardhmen.

Presioni i presidentit dëgjohet qartë në telefonatën e së shtunës ku i kërkon republikanit Brad Raffensperger, sekretar i shtetit në Xhorxhia të “gjej” vota të mjaftueshme për të përmbysur rezultatin.

Në një konferencë për shtyp të hënën, Gabriel Sterling, menaxher i aplikimit të procesit zgjedhor në Xhorxhia, tha se sekretari i shtetit e publikoi regjistrimin e bisedës “i nxitur nga synimi për të qenë sa më i kujdesshëm” duke pasur parasysh klimën politike dhe veprimet e presidentit në të kaluarën.

“Nganjëherë ai (Presidenti Trump) nuk i interpreton gjërat ashtu siç ndodhën,” tha zoti Sterling.

Zoti Trump, i cili i quan republikanët që refuzojnë ta mbështesin atë “Grupi i të Dorëzuarve”, gjithashtu i bëri thirrje zotit Pence të ndërmarrë veprime për të përmbysur zgjedhjet, pavarësisht se kushtetuta amerikane e përcakton rolin e Nënpresidentit në numërimin e votave elektorale të shteteve kryesisht si ceremonial.

((https://twitter.com/realDonaldTrump/status/1346488314157797389))

“Shpresoj që nënpresideti ynë i madh do të na mbështesë. Ai është një burrë i shkëlqyeshëm”, tha Trump në një tubim në Xhorxhia të hënën në mbrëmje. “Sigurisht, nëse ai nuk na mbështet, kjo nuk do të më pëlqente shumë.”

Presioni nga Presidenti e ka vendosur në një pozitë të vështirë Nënpresidentin Pence, i cili deri më tani ka demonstruar besnikëri të palëkundur ndaj zotit Trump.

David C. Barker, drejtori i Qendrës për Studime mbi Kongresin dhe Presidencën në Universitetin Amerikan, tha se nëse zotin Pence dëshiron të jetë një kandidat me peshë për president në 2024, ai mund të duhet të bashkohet me korin e ligjvënësve republikanë që vazhdojnë të mbështesin Presidentin Trump.

“Ai mund të arrijë në përfundimin se për të ka më rëndësi ndërgjegja sesa karrierën e tij”, tha zoti Barker. “Do ta shohim”, shtoi ai.

Presidenti gjithashtu u ka bërë thirrje mbështetësve të tij që të mblidhen në Uashington të mërkurën, duke bërë që kryetarja e bashkisë së qytetit t’u bëjë thirrje banorëve që “të mos të përballen me protestuesit që vijnë në qytetin tonë duke kërkuar konfrontim”.

Të martën në mbrëmje, Trump tha se ai planifikon të mbajë një fjalim para protestuesve jashtë Shtëpisë së Bardhë të mërkurën.

A ka ndodhur kjo më parë?

Demokratët filluan kundërshtime në shkallë të vogël dhe jetëshkurtër ndaj numërimit të votave elektorale në 2001, 2005 dhe 2017.

Në vitin 2001, dhjetra anëtarë të Dhomës së Përfaqësuesve u përpoqën të kundërshtonin votat elektorale të Floridës, shteti ku Nënpresidenti Al Gore humbi garën ndaj republikanit George W. Bush me një diferencë të vogël, pas një beteje të rinumërimit të votave që u vendos nga Gjykata e Lartë e Shteteve të Bashkuara. Në cilësinë e tij si president i Senatit, Gore hodhi poshtë kundërshtimet dhe e shpalli zotin Bush fitues të zgjedhjeve.

Në 2005, senatorja demokrate nga Kalifornia, Barbara Boxer së bashku me ligjvënësen demokrate nga Ohajo, Stephanie Tubbs Jones kundërshtuan votat elektorale të shtetit të Ohajos. Kjo përpjekje dështoi me një diferencë të madhe në të dyja dhomat e kongresit dhe nuk u mbështet madje as nga kandidati demokrat për president, John Kerry.

Disa demokratë të Dhomës së Përfaqësuesve kundërshtuan votat për zotin Trump në disa shtete në vitin 2017, por u kundërshtuan nga Nënpresidenti i atëhershëm Joe Biden.

Kundërshtimi nuk ka gjasa të ketë sukses, por çfarë ndodh nëse ka sukses?

Presidenti Trump dhe aleatët e tij shpresojnë që sfida të rezultojë në heqjen e disa prej votave elektorale të zotit Biden, duke i ulur ato nën pragun prej 270 votash elektorale të nevojshëm për të fituar presidencën.

Sipas amandamentit të 12-të të Kushtetutës, nëse asnjë kandidat nuk merr shumicën absolute të votave elektorale, Dhoma e Përfaqësuesve kërkohet që të filloi një seancë menjëherë për të zgjedhur presidentin.

“Nuk ka absolutisht asnjë shans që kjo përpjekje, e cila në thelb është teatër politik, të parandalojë Joe Biden-in të bëhet president i Shteteve të Bashkuara”, thotë zoti Grumet nga Qendra e Politikave Dypartiake.

Por zoti Grumet tha se kjo përpjekje është e dëmshme për demokracinë amerikane.

“Precedentët e vegjël të këqij shpesh bëhen precedentë të mëdhenj të këqij”, tha zoti Grumet. “Shpresojë se ne nuk kemi krijuar një traditë qënë thelb ia mundëson palës humbëse të vërë në dyshim legjitimitetin e dhjetëra miliona votuesve amerikanë.”

Kundërshtimi ka thelluar gjithashtu përçarjen midis republikanëve tradicionalë dhe atyre populistë që po përpiqen të marrin drejtimin e partisë.

“6 janari do të jetë hapi i parë në një përpjekje afatgjatë për të përcaktuar shpirtin e Partisë Republikane”, thotë anketuesi republikan Whit Ayers.

Ajo që pason do të varet nga ajo që bën Presidenti Trump pasi të largohet nga detyra, tha zoti Ayers. “Sa aktiv do të mbetet dhe sa ndikim politik do të ketë në kohën kur nuk do të ketë fuqinë e presidencës në dispozicion të tij”, shtoi ai.

Kur do të përfundojë kjo sfidë?

Pavarësisht votimit të certifikimit që mund të zvarritet për ditë me radhë dhe disa sfidave ligjore të presidentit ende në pritje të vendimeve nga gjykata, më 20 janar, Shtëpia e Bardhë me siguri thuajse të plotë do të ketë një banor të ri pasi zoti Biden do të bëjë betimin si presidenti i 46-të i Shteteve të Bashkuara.

Zyrtarët e qytetit në Uashington i paralajmëruan të hënën mbështetësit e Presidentit Donald Trump që të mos sjellin armë në protestat e kësaj jave kundër çertifikimit nga Kongresi të humbjes së tij, ndërsa janë thirrur për ndihmë edhe trupat e Gardës Kombëtare për të ruajtur rendin.

“Kemi marrë disa informacione se ka individë që synojnë të sjellin armë në qytetin tonë dhe kjo nuk do të tolerohet,” tha për median Shefi i Policisë Metropolitane Robert Contee, ndërsa shtoi se ata që do të bënin një gjë të tillë, ose që të provokonin dhunë, do të arrestohen.

Më shumë se 300 trupa do të mbështesin qeverinë e qytetit, duke siguruar kontrollin e turmës dhe ndihmuar shërbimet e shpëtimit dhe zjarrfikësve, thuhet në një deklaratë të Gardës Kombëtare të Uashingtonit. Në përpjekje do të marrin pjesë edhe forcat e rendit nga disa agjenci federale dhe shtetërore, tha zoti Contee.

Kryeqyteti amerikan ka disa nga ligjet më të rrepta për armët dhe ndalon mbajtjen hapur të armëve ose mbajtjen pa leje të pistoletës.

Mijëra mbështetës të zotit Trump, përfshi disa nacionalistë të ekstremit të djathtë, që kanë mbajtur hapur armët në protesta në vende të tjera, pritet të bashkohen në kryeqytetin amerikan duke filluar nga e marta për të kundërshtuar çertifikimin nga Kongresi të mërkurën të fitores së zgjedhjeve presidenciale nga demokrati Joe Biden.

Zoti Contee tha se protestat mund të jenë më të mëdha se ato të nëntorit dhe dhjetorit, gjatë të cilave pati përleshje me thika dhe përplasje të tjera, ndërsa qindra pjestarë të grupit “Proud Boys” që e cilësojnë veten “shovinistë perëndimorë” dhe besnikë të tjerë të zotit Trump, u përleshën me kundër-protestuesit dhe kërkoni të përlesheshin me aktivistë të “antifës”(anti-fashistët) dhe aktivistë të lëvizjes “Black Lives Matter”.

Të hënën, policia metropolitane arrestoi udhëheqësin e grupit “Proud Boys”, Henry “Enrique” Tarrio dhe ngriti akuza ndaj tij për shkatërrim prone në lidhje me një protestë të mëparshme. Tarrio kishte në zotërim dy karrikatore me kapacitet të lartë në kohën e arrestimit, tha policia ndërsa ngirit akuza edhe për këtë rast.

TRUMP DO TË FLASË NË TUBIM

Presidenti Trump u bëri thirrje mbështetësve të tij që të marrin pjesë në tubimet e kësaj jave, duke shkruar në Twitter të dielën se, “Do të jem aty” dhe të premten shkroi “Do të jetë e madhe”. Disa tubime janë planifikuar për të mërkurën, përfshi një pranë Kongresit amerikan.

Shtëpia e Bardhë nuk ka ofruar ndonjë agjendë zyrtare, por një individ i informuar mbi planet tha se Presidenti Trump do të flasë para mbështetësve me 6 janar në parkun që ndodhet pranë Shtëpisë së Bardhë.

Presidenti pretendon në mënyrë të gabuar se zoti Biden i fitoi zgjedhjet përmes manipulimit masiv të votave, edhe pse dhjetëra vendime gjykatash federale dhe shtetërore, zyrtarë shtetërorë të zgjedhjeve nga të dy partitë dhe Departamenti i Drejtësisë nuk kanë gjetur ndonjë mashtrim të madh.

Në bazë të kushtetutës Kongresi duhet të çertifikojë rezultatin e zgjedhjeve presidenciale të mërkurën, në atë që normalisht do të ishte një formalitet i mbikëqyrur nga Zëvendës Presidenti Mike Pence.

Por të paktën 12 senatorë republikanë dhe rreth 140 ligjvënës republikanë nga Dhoma e Përfaqësuesve janë zotuar të votojnë kundër çertifikimit të fitores së zotit Biden, duke cituar pretendimet e Presidentit Trump për mashtrime zgjedhore.

Përpjekja e tyre nuk do të ndryshojë rezultatin, tha në një konferencë shtypi Kryebashkiakja demokrate e Uashingtonit Muriel Bowser.

“Kushtetuta jonë do të qëndrojë. Joe Biden dhe Kamala Harris do të jenë presidenti dhe nënpresidentja e Shteteve të Bashkuara kur të inaugurohen me 20 janar”. Zonja Bowser u bëri thirrje banorëve të qëndrojnë larg qendrës së qytetit, ku dritaret e zyrave, restoranteve dhe hoteleve janë ende të mbuluara me dërrasa që nga protestat e verës kundër dhunës racore.

Para arrestimit të tij, Tarrio i grupit “Proud Boys” tha në median sociale se një numër rekod anëtarësh do të marrin pjesë, duke sugjeruar se ata mund të vishen me të zeza sikurse aktivistët e antifës. “Ne do të jemi të panjohur dhe do të shpërndahemi në qendër të Uashingtonit në grupe të vogla,” tha ai.

Hoteli Harrington dhe restoranti Harrys përkarshi, të frekuentura nga pjestarë të grupit “Proud Boys” gjatë protestave të mëparshme, do të mbyllen të martën dhe të mërkurën. “Ndërsa ne nuk mund të kontrollojmë se çfarë ndodh jashtë hotelit, ne po ndërmarrim hapa shtesë për të mbrojtur sigurinë e vizitorëve, mysafirëve dhe punonjësve tanë,” thuhet në faqen e hotelit në internet. VOA

UASHINGTON – Sot në Xhorxhia po zhvillohen garat e balotazhit për dy vende në Senatin amerikan, që do të përcaktojnë nëse republikanët, apo demokratët do të jenë në kontroll.

Senatori republikan David Perdue po përballet me demokratin Jon Ossoff, një producent dokumentarësh televizivë, ndërsa senatorja republikane Kelly Loeffler, një nga ligjvënëset më të pasura në vend, është në garë kundër kandidatit demokrat, pastorit Raphael Warnock.

Sondazhet përpara ditës së zgjedhjeve tregojnë se dy demokratët kanë avantazhe të ngushta në garë. Të dy balotazhet u bënë të nevojshme pasi asnjë nga katër kandidatët nuk fitoi shumicën e duhur në raundin e parë të zgjedhjeve në nëntor.

Pjesëmarrja në votime pritet të jetë jashtëzakonisht e lartë, me më shumë se 3 milionë vota të hedhura në votimet e hershme. Pesë milionë vota u hodhën në Xhorxhia në zgjedhjet e nëntorit, por rreth 100,000 njerëz që nuk votuan atëherë e kanë hedhur votën e tyre tashmë në balotazh. Senatit.

Kur do të numërohen votat?

Asnjë nga fletët e hedhura gjatë votimit të hershëm nuk do të numërohet deri të martën dhe fituesit zyrtarë, ka të ngjarë të mos mësohen natën e zgjedhjeve.

Zyrtarët thonë se votimi i hershëm ishte veçanërisht i lartë në zonat ku Presidenti i zgjedhur demokrat Joe Biden fitoi në nëntor, por republikanët thonë se presin të kenë më shumë vota të hedhura fizikisht të martën.

Ky ishte skenari në nëntor në Xhorxhia dhe në të gjithë vendin, kur shumë më shumë demokratë votuan herët, ndërsa më shumë republikanë votuan fizikisht në ditën e zgjedhjeve. Për shkak se votat e hershme marrin më shumë kohë për t’u numëruar, Presidenti Donald Trump u duk se ishte përpara në Xhorxhia natën e zgjedhjeve, por përfundimisht humbi në këtë shtet.

Kush e kontrollon Senatin Amerikan tani?

Republikanët aktualisht kanë një avantazh 50-48 në Senat. Një fitore e republikanëve në një, ose të dyja garat në zgjedhjet e së martës, do t’i jepte partisë një shumicë të qartë dhe të drejtën për të vendosur axhendën e Senatit dhe për të mbajtur shumicën në të gjitha komisionet legjislative të Senatit.

Nëse të dy demokratët Warnock dhe Ossoff do të fitonin, në Senat do të kishte një ndarje 50-50, duke i dhënë nënresidentes së zgjedhur Kamala Harris mundësinë për të hedhur votën përcaktuese në rast të një votimi të barabartë, në favor të demokratëve për organizimin e komisioneve dhe kontrollin e kalendarit legjislativ.

Një Senat i kontrolluar nga republikanët do të komplikonte miratimin e reformave legjislative të zotit Biden gjatë dy viteve të ardhshme, duke detyruar ndoshta negociata gjithpërfshirëse për çështje të tilla si shkalla e përfitimeve të kujdesit shëndetësor, vendosja e kontrolleve të imigracionit dhe vendosja e rregulloreve për ndryshimet klimatike.

Tubimet e së hënës

Si Presidenti i zgjedhur Bidene dhe Presidenti në largim Donald Trump mbajtën tubime të hënën në Xhorxhia në një përpjekje të fundit për të bindur votuesit.

“Forca është në duart tuaja”, tha zoti Biden. “Si asnjëherë tjetër në karrierën time, një shtet mund të përcaktojë kursin, jo vetëm për katër vitet e ardhshme, por për gjeneratën e ardhshme.”

Ai tha se banorët e Xhorxhias kishin votuar në numër rekord në zgjedhjet presidenciale në nëntor, duke i dhënë atij një fitore të ngushtë në atë shtet. “Tani, kemi nevojë që ju të votoni përsëri në numër rekord,” tha ai.

Trump bëri fushatë më vonë të hënën në një qark republikan në Dalton, në pjesën veriore të shtetit, duke u thënë mbështetësve se zgjedhjet mund të ishin “shansi i tyre i fundit për të shpëtuar Amerikën që duam”.

“E majta ekstreme dëshiron të shkatërrojë vendin tonë, të shkatërrojë historinë tonë dhe të fshijë gjithçka që ne duam”, tha presidenti Trump. “Kjo mund të jetë vota më e rëndësishme, që do të hidhni ndonjëherë në jetën tuaj.”

Ai gjithashtu vazhdoi kritikat e tij ndaj zyrtarëve të zgjedhjeve në Xhorxhia, që refuzuan të përmbysnin humbjen e tij të ngushtë ndaj Bidenit në shtet, duke pretenduar në mënyrë të rreme se ai fitoi dhe se vota ishte “e manipuluar”.

Zyrtarët e Xhorxhias hedhin poshtë pretendimet e Trumpit për mashtrime

Numërimi fillestar i votave në zgjedhjet presidenciale të nëntorit dhe dy rinumërime më pas, treguan se zoti Biden fitoi.

Në një telefonatë të shtunën, Trump i kërkoi zyrtarit më të lartë të zgjedhjeve të këtij shteti, Sekretarit të Shtetit Brad Raffensperger, një republikan, të gjente 11,780 vota të tjera për të përmbysur rezultatin.

Por zoti Raffensperger hodhi poshtë kërkesën e Trump-it dhe të hënën i tha kanalit ABC News se presidenti “thjesht e ka gabim” kur flet për parregullsi zgjedhore në Xhorxhia.

Dhjetë ish-sekretarë amerikanë të Mbrojtjes kërkuan nga Pentagoni që të angazhohet në një tranzicion paqësor të pushtetit në SHBA dhe paralajmëruan për rreziqet e përfshirjes së ushtrisë amerikane në tranzicion.

Ish-shefat e Pentagonit, përfshirë dy të emëruar nga presidenti në largim, Donald Trump, i bënë komentet në një artikull të botuar në gazetën Washington Post.

Zgjedhjet në SHBA dhe transferimi paqësor i pushtetit “janë shenja dalluese të demokracisë sonë”, thanë ata dhe i bënë thirrje shefit aktual të Pentagonit, Christopher Miller, që të përmbahet nga luajtja e ndonjë roli në përpjekjet e Trumpit për të mbetur president.

“Përpjekjet për të përfshirë forcat e armatosura të SHBA-së në zgjidhjen e mosmarrëveshjeve zgjedhore, do të na çonin në një territor të rrezikshëm, të paligjshëm dhe antikushtetues”, shkruan ata, duke shtuar se zyrtarët që kanë kërkuar ta bëjnë këtë, mund të përballen me pasoja të rënda profesionale dhe kriminale.

Shkrimi iu atribuohet dhjetë ish-sekretarëve amerikanë të Mbrojtjes: Ashton Carter, Leon Panetta, William Perry, Dick Cheney, Donald Rumsfeld, William Cohen, Robert Gates, Chuck Hagel, James Mattis dhe Mark Esper. Mattis dhe Esper janë emëruar nga Trump.

Ata thanë se tranzicionet e pushtetit shpesh mund të jenë një moment kur kombi është i cenueshëm ndaj “veprimeve të kundërshtarëve, që përpiqen të përfitojnë” nga pasiguritë në lidhje me sigurinë kombëtare të SHBA-së.

“Duke i pasur parasysh këta faktorë, sidomos në kohën kur forcat amerikane janë të angazhuara në operacione aktive në të gjithë botën, është më se e domosdoshme që tranzicioni në Departamentin e Mbrojtjes të kryhet plotësisht, në mënyrë bashkëpunuese dhe transparente”, thanë ish-sekretarët.

Ata shtuan se koha për të vënë në dyshim rezultatet e zgjedhjeve të 3 nëntorit ka kaluar dhe kujtuan se së shpejti do të bëhet numërimi zyrtar i votave të Kolegjit Zgjedhor nga Kongresi i ri.

“Zgjedhjet janë zhvilluar. Numërimet dhe auditimet janë kryer. Sfidat e duhura janë adresuar nga gjykatat. Guvernatorët kanë vërtetuar rezultatet. Dhe, Kolegji Zgjedhor ka votuar”, thanë ish-shefat e Pentagonit.

Sipas sistemit amerikan, votuesit në fakt votojnë për “zgjedhësit”, të cilët pastaj votojnë për të ratifikuar rezultatin. Kolegji Zgjedhor e ka ratifikuar fitoren e demokratit Joe Biden më 14 dhjetor.

Kongresi pritet t’i verifikojë votat e Kolegjit Zgjedhor më 6 janar. Procedura normalisht është formale, por ajo ka rëndësi të shtuar këtë vit, pasi disa kongresistë republikanë – aleatë më Trumpin – kanë thënë se do ta sfidojnë numërimin e votave, në përpjekje për të zhbërë fitoren e Bidenit.

Duke i cituar akuzat e pabaza të Trumpit për mashtrime në zgjedhje, republikanët kanë thënë se do të kërkojnë krijimin e një komisioni të posaçëm për të bërë “një kontroll të jashtëzakonshëm 10-ditor” të rezultateve të zgjedhjeve në disa shtete. Plani, megjithatë, pritet të dështojë.

Trump ka refuzuar të pranojë humbjen dhe është fiksuar në rezultatet e zgjedhjeve në disa shtete, përfshirë Xhorxhian, ku ka humbur me rreth 12,000 vota përballë Bidenit.

Në fundjavë, gazeta Washington Post ka publikuar audio-incizime të një bisede telefonike, që supozohet se Trump ka zhvilluar me zyrtarin e lartë të zgjedhjeve në Xhorxhia. Trump mund të dëgjohet duke thënë se dëshiron të “gjejë” vota të mjaftueshme, që do t’ia siguronin fitoren në Xhorxhia.

Trump ka vazhduar të bëjë pretendime për mashtrime në zgjedhje, edhe pse gjykatat i kanë hedhur poshtë gati të gjitha rastet ligjore, të paraqitura nga ekipi dhe aleatët e tij.

Përgatiti: Valona Tela

Nancy Pelosi u zgjodh kryetare e Dhomës së Përfaqësuesve të dielën në mandatin e saj të katërt, me një shumicë më të ngushtë të demokratëve dhe me shumë sfida para vetes.

“Si kryetare e Dhomës së Përfaqësuesve, është nderi im i madh të kryesoj këtë ritual të shenjtë të rizgjedhjes, ndërsa mblidhemi nën kupolën e këtij tempulli të demokracisë…”, tha zonja Pelosi pas votimit.

Demokratja nga Kalifornia, e cila ka udhëhequr partinë e saj në Dhomën e Përfaqësuesve që nga viti 2003 dhe është gruaja e vetme kryetare, mori 216 vota.

Demokratët humbën 11 vende në zgjedhjet e nëntorit dhe aktualisht gëzojnë kontrollin e kësaj dhome me shumicë më të ngushtë 222 me 212.

Para betimit të zonjës Pelosi, përfaqësuesi Don Young, një republikan nga Alaska, bëri thirrje për unitet.

“Sinqerisht, , nuk më pëlqen ajo që shoh. Është koha t’i shtrijmë dorën njëri tjetrit dhe të flasim me njëri-tjetrin”, tha ai ndërsa u prit me duartrokitje.

“Ju do të jeni kryetare e Dhomës së Përfaqësuesve – jo e partisë,” shtoi ai, duke iu drejtuar zonjës Pelosi.

Zonja Pelosi mirëpriti seancën e re të Kongresit, duke theksuar rëndësinë e rolit të ligjvënësve ndërsa vendi lufton pandeminë e koronavirusit dhe krizën ekonomike të shkaktuar prej saj. Ajo tha se ligjvënësit po marrin përsipër përgjegjësi shumë kërkuese.

“Secili prej komuniteteve tona është prekur në mënyrë drastike nga kriza e pandemisë dhe kriza ekonomike: 350 mijë vdekje tragjike, secila prej tyre një trishtim që ne mbajmë në zemrat tona; mbi 20 milionë infeksione; miliona pa punë…”, tha ajo.

Zonja Pelosi gjithashtu u bëri nderime në fjalën e saj ligjvënësve Elijah Cummings dhe John Lewis, dy përfaqësues me vite të gjata shërbimi, të cilët vdiqën më 2019 dhe 2020, dhe Ruth Bader Ginsburgut, gjykatëse e Gjykatës së Lartë të Shteteve të Bashkuara, e cila gjithashtu vdiq në vitin 2020.

Para se të fliste në Dhomën e Përfaqësuesve, pas zgjedhjes së zonjës Pelosi, udhëheqësi i pakicës, Kevin McCarthy, shkroi në twitter, se “Kongresi i fundit ishte një dështim. Në fakt, ai ishte Kongresi më pak produktiv në gati 50 vjet. Populli amerikan meriton më mirë”.

“Unë do të doja të mund të thosha se shumica në Kongres është e përkushtuar për ndryshime në të mirën e përbashkët dhe për t’u përqendruar në atë që ka vërtet rëndësi, por unë jam i shqetësuar se veprimet e hershme po flasin për drejtim të gabuar”, tha ai në fjalimin e tij. Zoti McCarthy mori 209 vota në garën për kryetarin e Dhomës kundrejt zonjës Pelosi me 216.

Për herë të parë që nga muaji maj, ligjvënësit duhej të ishin të pranishëm për votim në Kongres, në vend të votimit nga distanca që ishte vendosur për shkak të pandemisë. Votimi zgjati disa orë ndërsa ligjvënësit u sollën në sallë në grupe të vogla për të shmangur mbledhjen e më shumë vetave në një vend.

Kongresi i ri përballet me shumë sfida, mes tyre pandeminë që deri më tani u ka kushtuar me jetë më shumë se 350 mijë amerikanëve dhe me ripërtëritjen e ekonomisë amerikane.

Zonja Pelosi, 80 vjeçare, la të kuptohet se pas kësaj periudhe dyvjeçare nuk do të kërkojë një mandat tjetër si kryetare e Dhomës, në përputhje me një marrëveshje të bërë me demokratët në vitin 2018 të cilët dëshironin që ajo të largohej si kryetare që atëherë.

Presidenti Donald Trump i bëri presion një zyrtari të lartë të zgjedhjeve të shtetit të Xhorxhias për të “gjetur” vota të mjaftueshme për të përmbysur rezultatin e zgjedhjeve në këtë shtet, ku ai ka humbur. Kjo është një nga përpjekjet më të fundit të zotit Trump në kuadër të pretendimeve të tij mbi manipulimin e zgjedhjeve, sipas njoftimit të gazetës “Washington Post”, e cila ka arritur të sigurojë një regjistrim audio të një bisede telefonike të zhvilluar ditën e shtunë.

Gazeta “Washington Post”, e cila të dielën publikoi fragmente të telefonatës, që zgjati një orë mes zotit Trump dhe sekretarit të Shtetit të Xhorxhias Brad Raffensperger, gjithashtu republikan, tha se zoti Trump paralelisht e mburrte, i lutej dhe e kërcënonte zotin Raffensperger me pasoja të paqarta penale, në një përpjekje për të zhbërë humbjen e tij në këtë shtet ndaj presidentit të zgjedhur Joe Biden.

Gazeta tha se gjatë gjithë telefonatës zoti Raffensperger dhe këshilltari juridik i zyrës së tij, i kishin hodhur poshtë pohimet e zotit Trump. Zoti Raffensperger i tha presidentit se ai po mbështeste teori konspirative të hedhura tashmë poshtë, ndaj atyre që ai i cilësoi si zgjedhje të lira e të drejta. Pjesë nga telefonata e regjistruar të botuara nga gazeta e konfirmonin një gjë të tillë.

“Njerëzit e Xhorxhias janë të zemëruar, amerikanët janë të zemëruar”, tha zoti Trump, sipas një fragmenti të shkëputur nga regjistrimi i telefonatës, botuar në internet nga gazeta The Washington Post. “Dhe nuk ka asgjë të keqe të thuash, e di çfarë….. i rillogaritëm rezultatet“.

“Pra ajo që dua të bëj, është thjesht të gjej 11,780 vota, që është një më shumë se sa kemi. Sepse ne e fituam shtetin“, shprehej zoti Trump gjatë telefonatës së regjistruar, duke këmbëngulur se nuk kishte asnjë mundësi që ai të kishte humbur garën në këtë shtet.

Shtëpia e Bardhë nuk pranoi të komentojë mbi këtë çështje. Zyra e zotit Raffensperger nuk iu përgjigj menjëherë kërkesave për komente. Po kështu edhe zyra e tranzicionit e zotit Biden nuk ka bërë deri tani asnjë koment mbi këtë çështje.

Xhorxhia është një nga disa shtetet kyçe, në të cilin zoti Trump humbi gjatë zgjedhjeve të 3 nëntorit ndaj zotit Biden. Por që prej asaj kohe zoti Trump ka bërë akuza të pabazuara për manipulim me zgjedhjet dhe ka kërkuar të përmbysë rezultatin.

Të dielën në Shtetet e Bashkuara u shënuan të dhëna shqetësuese lidhur me pandeminë e koronavirusit, ndërsa numri i vdekjeve tejkaloi 350 mijë rastet. Nju Jorku iu bashkua Kalifornisë, Teksasit dhe Floridës me më shumë se një milion raste të regjistruara. E njëjta gjë pritet të ndodhë edhe me Illinois.

Pandemia e koronavirusit vazhdon të sfidojë Shtetet e Bashkuara edhe në ditët e para të vitit të ri.

Sistemi shëndetësor i Kalifornisë është i mbingarkuar. Ambulancat presin me orë për të dorëzuar pacientë të rinj.

Qarku i Los Anxhelosit është pa diskutim epiqendra e pandemisë në ShBA.

Drejtoresha e Departamentit të Shëndetit Publik në këtë qark ka një kërkesë për banorët.

“Nuk po u kërkojmë njerëzve që të mos takojnë familjarët për gjithë jetën. Po u kërkojmë të mos takohen gjatë javëve të ardhshme ndërsa shpërndajmë vaksinën”, thotë Dr. Barbara Ferrer, Drejtore e Departamentit të Shëndetit Publik në Los Anxhelos.

Zyrtarët në Karolinën e Veriut po ndërtojnë spitale të inprovizuara për të rritur kapacitetet. Në Masaçusets, që nga dita e falenderimeve, numri i pacientëve të shtruar në spital është rritur me 60 për qind .

“Gjatë tre ditëve të fundit, kemi tejkaluar numrin e pacientëve që kishim në spital në pranverë“, thotë Dr. Eric Dickson.

Katër shtete ende nuk kanë vaksinuar as një përqind të popullësisë.

Në qarkun Knox të Ohajos, gjysma e departamentit të shëndetësisë dhe 60 për qind e punonjësve të urgjencës zgjodhën që për momentin të heqin dorë nga vaksina.

“Nuk do t’i detyrojmë por donim të kishim më shumë pajtueshmëri”, thotë Mike Dewine, Guvernator i shtetit të Ohajos.

Por shumë janë të etur për t’u vaksinuar. Kryetari i Bashkisë së Hjustonit vizitoi klinikën e parë publike të vaksinimit, e cila planfikonte shpërndarjen e 750 vaksinave, por nevojat janë për 250 mijë të tilla.

“Do na duhet të shkojmë në qendra të mëdha të furnizimit”, thotë Sylvester Turner.

Sipas të dhënave të fundit të Universitetit Johns Hopkins ShBA ka mbi 20 milionë e 430 mijë të infektuar me COVID-19 dhe mbi 350 mijë viktima që nga fillimi i pandemisë.