VOAL

SHBA

Sekretari Blinken parashtron politikën e jashtme të SHBA

Sekretari i Shtetit Antony Blinken mbajti sot fjalimin e tij të parë të rëndësishëm si kryediplomat i vendit, ku parashtroi në linja të gjera politikën e jashtme të administratës Biden.

Ai riafirmoi vendosmërinë e administratës për më tepër angazhim në çështjet globale. “Bota nuk organizohet vetë,” tha zoti Blinken. Kur Amerika tërhiqet, ose dikush tjetër do të përpiqet të zerë vendin e saj, ose askush nuk del për të mbajtur barrën dhe kjo çon në kaos, tha ai.

Sekretari i Shtetit tha se për të mposhtur pandeminë, është e nevojshme që qeveritë, shkencëtarët dhe bizneset kudo në botë të punojnë së bashku. Ai tha se nga pandemia duhen nxjerrë mësimet e duhura dhe të investohet si duhet në të ardhmen për çështjet e shëndetit global.

Zoti Blinken premtoi se Amerika do të përdorë fuqinë e shembullit të saj. “Ne do të inkurajojmë të tjerët të bëjnë reforma të rëndësishme, të anulojnë ligje të këqia, të luftojnë korrupsionin dhe të ndalin praktikat e padrejta,” tha ai. Por ai shtoi se SHBA nuk do ta nxisin demokracinë përmes ndërhyrjeve të shtrenja ushtarake ose duke u përpjekur të përmbysin me forcë regjime autoritare.

“Ne i kemi provuar këto taktika në të kaluarën. Sado me qëllime të mira, ato nuk kanë funksionuar. Ato i kanë dhënë ‘nxitjes së demokracisë’ një emër të keq,” tha zoti Blinken.

Ai tha se zgjidhja e problemeve të demokracisë brenda SHBA ka rëndësi të dorës së parë për diplomacinë e saj jashtë. Përndryshe, tha ai, “ne do të bënim lojën e Rusisë dhe Kinës të cilët shfrytëzojnë çdo rast për të mbjellë dyshime rreth demokracisë sonë.”

Lidhur me imigracionin, Sekretari i Shtetit tha se një kufi i fortë është me rëndësi thelbësore për sigurinë e vendit, por shtoi se Amerika është vend imigrantësh dhe se duhet ta zgjidhë me diplomaci faktin që vit pas viti, njerëz nga vende të tjera rrezikojnë çdo gjë për të ardhur në Shtetet e Bashkuara.

Në fjalimin e tij, zoti Blinken tha se Amerika po bën një përpjekje të madhe për të rivendosur lidhjet me miqtë dhe aleatët. Por ai shtoi se partneriteti me ta nënkupton që secili do të bëjë pjesën që i takon dhe barra nuk do të mbahet vetëm nga SHBA.

Duke folur për revolucionin e sotëm teknologjik, Sekretari i Shtetit bëri thirrje për forcimin e aftësive mbrojtëse kompjuterike të vendit. Ai solli shembullin e ndërhyrjes kibernetike në kompaninë SolarWinds vitin e kaluar, për të cilën dyshohet Rusia dhe që u shoqërua me një depërtim masiv në rrjetet kompjuterike të qeverisë amerikane.

Zoti Blinken tha se Kina është i vetmi vend që ka fuqinë për të sfiduar seriozisht sistemin e qëndrueshëm dhe të hapur ndërkombëtar me të gjitha rregullat dhe vlerat e tij.

Ai i përshkroi marrëdhëniet me Kinën si komplekse, ku do të ketë edhe bashkëpunim por edhe qëndrime nga këndvështrimi i një kundërshtari. Sekretari i Shtetit tha se Amerika do të mbrojë vlerat për të cilat lufton, kur shikon se të drejtat e njeriut shkelen në Sinkiang ose kur demokracia nëpërkëmbet në Hong Kong.

SHBA, tha zoti Blinken, do ta angazhojnë Kinën nga pozitat e forcës.

Ai i përshkroi marrëdhëniet me Kinën si komplekse, ku do të ketë edhe bashkëpunim por edhe qëndrime nga këndvështrimi i një kundërshtari.

Sekretari i Shtetit tha se Amerika do të mbrojë vlerat për të cilat lufton, kur shikon se të drejtat e njeriut shkelen në Sinkiang ose kur demokracia nëpërkëmbet në Hong Kong. SHBA, tha zoti Blinken, do ta angazhojnë Kinën nga pozitat e forcës.

Teksasi heq përdorimin e maskës, rifillon jetën normale

Guvernatori i Teksasit hoqi shumicën e kufizimeve shtetërore për frenimin e pandemisë së koronavirusit, duke lejuar bizneset të rihapen me kapacitet të plotë që nga java e ardhshme dhe duke u thënë banorëve se maskat nuk janë më të detyrueshme.

Vendimi i guvernatorit Greg Abbott është masa më gjërë që një shtet amerikan ka ndërmarrë deri më tani për të hequr kufizimet e ashpra mbi bizneset dhe banorët të vendosura nga udhëheqësit politikë për t’i bërë ballë pandemisë së COVID-19.

“Tani është koha për të hapur Teksasin 100%”, tha guvernatori Abbott në një konferencë shtypi për gazetarët. Heqja e plotë e mandateve do të hyjë në fuqi më 1 mars, tha ai.

Urdhri i guvernatorit Abbott vjen ndërsa infeksionet me COVID-19 kanë rënë në javët e fundit në pjesën më të madhe të botës, përfshirë Shtetet e Bashkuara.

Sipas të dhënave të agjencisë së lajmeve Reuters, rreth 68,240 raste të reja janë raportuar mesatarisht çdo ditë këtë javë, ose sa 27% e kulmit mesatar ditor të raportuar më 7 janar. Shtetet e Bashkuara kanë regjistruar 28,681,793 infeksione dhe 513,721 vdekje të lidhura me koronavirus që nga fillimi i pandemisë. VOA

Drejtoi i FBI-së Chris Wray dëshmon në Kongres

Drejtori i Byrosë Federale të Hetimeve Chris Wray po dëshmon në Kongresin amerikan lidhur me trazirat vdekjeprurëse të 6 janarit në Kapitolin amerikan. Ndër të tjera, ai po përballet edhe me pyetjet nëse FBI-ja komunikoi në mënyrë adekuate me agjencitë e tjera të zbatimit lidhur me mundësitë për dhunë më 6 janar.

Seanca në Komisionin e Senatit për Gjyqësorin, ku po dëshmon zoti Wray, pritet të dominohet nga pyetjet lidhur me përgatitjet e Byrosë Federale të Hetimeve për trazirat dhe hetimet që pasuan. Një tjetër temë e nxehtë pritet të jetë dhe mënyra se si FBI-ja po përballet me kërcënimin e sigurisë kombëtare nga nacionalistët e bardhë dhe ekstremistët e dhunshëm të brendshëm dhe nëse agjencia e tij ka burimet e duhura për të trajtuar këtë problem.

Dhuna në Kapitol e bëri të qartë se agjencia e zbatimit të ligjit që revolucionarizoi veten pas sulmeve të 11 shtatorit 2001, për t’u marrë me terrorizmin ndërkombëtar, tani po përpiqet të adresojë dhunën në rritje nga amerikanët e bardhë.

Administrata e Presidentit Joe Biden ka ngarkuar drejtorin e zbulimit kombëtarë për të punuar me FBI-në dhe Departamentin e Sigurisë Kombëtare për të vlersëuar kërcënimin.

Drejtori Wray ka mbajtur një profil relativisht të ulët që nga dhuna në Kapitolin amerikan dy muaj më parë. Megjithëse ka informuar ligjvënësit privatisht dhe ndarë të dhëna me organet lokale të zbatimit të ligjit për seanca dëgjimore, për zotin Wray dita e sotme shënon daljen e parë publike para Kongresit që nga zgjedhjet presidenciale të nëntorit.

FBI-ja po përballet me pyetje se si i trajtoi të dhënat e zbulimit në ditët para trazirës dhe nëse paralajmërimet për dhunë të mundshme u transmetuan tek zyrtarët e duhur.

Javën e shkuar, shefi i përkohshëm i policisë së Kapitolit tha se raporti i 5 janarit nga FBI-ja ra në dorën e hetuesve brenda forcës së policisë dhe tek njesia e zbulimit, por asnjëherë nuk u dërgua tek hallkat drejtuese.

Raporti në fjalë paralajmëroi në lidhje me postimet në internet që flisinin për “luftë” në kryqytetin amerikan me 6 janar. FBI-ja ka thënë se raporti i saj i përpiluar në të dhëna të paverifikuara, u nda me të gjithë aktorët që janë pesë e forcës kundër terrorizmit.

Një tjetër çështje që mund të ngrihet në seancën e sotme dëgjimore është edhe hetimi i FBI-së lidhur me hakerimin masiv rus të korporatave amerikane dhe agjencive qeveritare, kur hakerë me njohuri të larta injekuan një kod elektronik infektues në përditësimin e programeve kompjuterike.

Trump le të hapur mundësinë e rikandidimit në 2024

Ish-Presidenti i SHBA Donald Trump u shfaq të dielën si republikani dominues i vendit, me përpjekjen që partia të fitojë përsëri kontrollin e Kongresit vitin e ardhshëm dhe ndoshta të kandidojë vetë përsëri për presidencën në vitin 2024.

Ai mbajti të dielën pasdite një fjalim në Konferencën vjetore të Veprimit Politik Konservator në Orlando të Floridës, ku ishin mbledhur qindra republikanë, ndër më të flaktët e kësaj partie. Ky ishte fjalimi i tij i parë i rëndësishëm pas humbjes së presidencës ndaj demokratit Joe Biden.

“Qëndroj sot para jush për të deklaruar se rrugëtimi i jashtëzakonshëm që nisëm së bashku katër vjet më parë është shumë larg nga të qënit i përfunduar”, tha zoti Trump.

“Jemi mbledhur këtë pasdite për të folur për të ardhmen – të ardhmen e lëvizjes sonë, të ardhmen e partisë tonë dhe të ardhmen e vendit tonë të dashur,” tha ai.

Por zoti Trump gjithashtu afirmoi synimin e tij si figura mbizotëruese e partisë, duke e lënë të hapur alternativën për të kandiduar përsëri pas tre vjetësh për një mandat tjetër katër-vjeçar në Shtëpinë e Bardhë.

“Ku i dihet. Unë mund të vendos t’i mposht demokratët për herë të tretë,” tha ish-presidenti nën brohoritjet e të pranishmëve, duke përsëritur pretendimin e pa mbështetur në fakte se i kishte fituar zgjedhjet e nëntorit 2020.

Ai argumentoi se partia është “e bashkuar”, pavarësisht disa ligjvënësve republikanë që thonë se ata duhet ta anashkalojnë ish-presidentin, mandati i vetëm i të cilit përfundoi me protesta të pafrytshme zgjedhore dhe me trazirat e 6 janarit në Kapitol.

Ish-presidenti tha se ai nuk ka në plan të krijojë një parti të re për të garuar me Partinë Republikane dhe shtoi se njoftime të tilla janë “lajme të rreme”.

BETEJA BRENDA REPUBLIKANËVE

Një betejë po zhvillohet brenda Partisë Republikane, ku disa nga figurat e njohura si udhëheqësi i pakicës së Senatit Mitch McConnell duan që ta anashkalojnë zotin Trump, ndërsa të tjerë, si aleati i ish-presidentit, Senatori Lindsey Graham, besojnë se e ardhmja e partisë varet nga energjia e bazës konservatore pro-Trump.

Rezultatet e një sondazhi të kryer me pjesëmarrësit në konferencë, i dhanë zotit Trump një mbështetje të fortë me 55 përqind, duke thënë se do të votonin për të në garën e emërimit presidencial republikan në vitin 2024. Guvernatori i Floridës, Ron DeSantis doli në vendin e dytë me 21 përqind.

Pa zotin Trump, DeSantis udhëhiqte me 43 përqind mes kandidatëve të tjerë, të cilët mëron shumë më pak vota.

Por jo të gjithë e mbështetën zotin Trump. Njëra pyetje e anketës ishte nëse Trump duhet të kandidojë përsëri në vitin 2024 dhe rezultati ishte i përzier: 68 përqind thanë se ai duhej të kandidonte ndërsa 32 përqind ishin kundër ose pa ndonjë opinion.

Deklaratat e zotit Trump në konferencë të paktën shërbejnë për të frenuar ndonjë kandidat tjetër të mundshëm republikan për 2024-ën, si senatorët Marco Rubio, Ted Cruz dhe Tom Cotton, ish-ambasadoren në Kombet e Bashkuara Nikki Haley ose të tjerë që aspirojnë presidencën.

E ardhmja e zotit Trump si figura mbizotëruese republikane e vendit mbetet një pyetje e hapur. Ai është i vetmi president në historinë e SHBA ndaj të cilit u ngritën dy herë akuza për shkarkim nga Dhoma e Përfaqësuesve dhe që u shpall i pafajshëm të dyja herët. Është gjithashtu presidenti i parë në 90 vjet që humbi kontrollin politik të Shtëpisë së Bardhë dhe të dy dhomave të Kongresit në një mandat të vetëm në detyrë.

Konservatorët në konferencën tre-ditore e kanë brohoritur përmendjen e emrit të tij. Shumë prej tyre madje kanë pozuar për foto me një statujë të madhe të artë të fytyrës së tij që ishte skalitur në Meksikë dhe që shëtiti nëpër sallën e konferencës.

Në fillim të shkurtit, Senati votoi 57-43, me shtatë republikanë që iu bashkuan të 50 demokratëve, për ta shpallur fajtor zotin Trump për nxitjen e një turme prej qindra mbështetësve që sulmuan Kapitolin, kur ligjvënësit po çertifikonin humbjen e tij në zgjedhje. Megjithatë, Senati nuk arriti shumicën e dy të tretave të nevojshme për shpalljen e tij fajtor.

Trazira la pesë të vdekur, duke përfshirë një oficer të Policisë së Kapitolit. Më shumë se 200 protestues janë arrestuar ndërsa hetimi vazhdon.

Konferenca republikane ishte një nga tubimet vjetore më të spikatura për konservatorët dhe erdhi në një kohë debatesh në rritje brenda Partisë Republikane nëse duhet apo jo që të distancohet nga ish-presidenti apo të vazhdojnë ta lidhë të ardhmen e saj me të.

Zoti Trump ka sinjalizuar se do të përpiqet të dëmtojë imazhin politik të 10 republikanëve në Dhomën e Përfaqësuesve që votuan për ta hequr atë në janar, një javë para se ai të linte detyrën dhe shtatë të tjerëve në Senat që u shprehën pro shpalljes së tij fajtor.

Senatori Mitch McConnell, udhëheqësi i pakicës republikane të Senatit, votoi për ta shfajësuar zotin Trump në gjyq, por më pas e kritikoi ashpër ish-presidentin për rolin e tij në nxitjen e sulmit në Kapitol, ku protestuesit thyen dritaret, shkatërruan zyrat e Kongresit dhe u përleshën me policinë.

Senatori McConnell tha se zoti Trump ishte “praktikisht dhe moralisht përgjegjës për provokimin e ngjarjeve” që çuan në trazirat në Kapitol.

Trump u kundërpërgjigj, duke e portretizuar senatorin si një politikan të zellshëm që nuk i qesh buza kurrë dhe tha nëse senatorët republikanë do të qëndrojnë me zotin McConnell, “ata nuk do të fitojnë dot përsëri”.

Sidoqoftë, senatori McConnell tha javën e kaluar se do të mbështeste zotin Trump për presidencën nëse votuesit republikanë e emërojnë atë përsëri në vitin 2024.

I pyetur nëse Trump ende kontrollon Partinë Republikane, senatori Rick Scott nga Florida tha në emisionin “Fox News Sunday”, se kjo është “parti e votuesve”. Por ai shtoi se beson që zoti Trump do “të jetë i dobishëm” në të ardhmen e afërt.

“Ne jemi në anën e duhur të çështjeve, ndërsa demokratët janë në anën e gabuar” tha senatori Scott.

Një ligjvënës republikan që votoi për ta shpallur fajtor zotin Trump, senatori Bill Cassidy i Luizianës, tha për CNN se nëse republikanët rimarrin Shtëpinë e Bardhë pas katër vjetësh, “kjo do të ndodhë sepse ne flasim për çështjet, jo duke vendosur një person (Trump ) në piedestal.”

“Konferenca e tanishme nuk përfaqëson të gjithë Partinë Republikane,” tha ai. “Nëse ne kthejmë në idhull një njeri të vetëm atëherë do të humbasim.” “Unë nuk mendoj se ai do të jetë i emëruari ynë,” tha senatori. “Ne kemi nevojë për një njeri që punon për të gjithë.”

SULME KUNDËR PRESIDENCËS BIDEN

Fjalimi i zotit Trump përfshinte sulme kundër Presidentit Biden, në përpjekje për t’u pozicionuar si kritiku kryesor i presidentit të ri, në çështje të tilla si imigracioni dhe siguria përgjatë kufirit të SHBA me Meksikën apo rihapja e ngadaltë e shkollave të mbyllura për shkak të pandemisë.

“Të gjithë e dinim që administrata Biden do të ishte e keqe – por askush nga ne nuk e imagjinonte se sa e keqe do të ishte dhe sa larg do të shkonte”, tha ish-Presidenti Trump. “Joe Biden ka pasur muajin e parë më katastrofik se sa çdo president në historinë moderne,” tha ai.

Shtëpia e Bardhë e ka bërë të qartë se nuk do t’i kushtojë vemendje fjalimit.

“Fokusi ynë sigurisht nuk është në atë që thotë Presidenti Trump” në konferencë, u tha zëdhënësja e Shtëpisë së Bardhë Jen Psaki javën e kaluar gazetarëve.

Sondazhet e hershme kombëtare tregojnë se votuesit i japin miratim të gjerë muajit të parë të zotit Biden si president, duke përfshirë edhe disa republikanë. Por ish-Presidenti Trump, edhe nëse refuzohet gjerësisht nga demokratët dhe një shumicë e të pavarurve, mbetet mjaft popullor mes shumë votuesve republikanë.

Aleatët e ish-Presidentit Trump tregojnë besnikërinë me një statujë të artë

Marrë nga Reuters

UASHINGTON – Konservatorët amerikanë vlerësuan Donald Trumpin në një mbledhje vjetore të premten, duke zbuluar madje një statujë të artë të ish-presidentit, për të treguar se ai mbetet një forcë politike republikane pavarësisht skenave të dhunshme në Uashington muajin e kaluar.

Konservatorë të njohur në Kongres, përfshirë Senatorët Tom Cotton dhe Josh Hawley dhe Ligjvënësit Steve Scalise dhe Matt Gaetz – ishin mes besnikëve të Presidentit Trump që flisnin në Konferencën e Veprimit Politik Konservator (CPAC) në Orlando, Florida, të cilës ish-Presidenti Trump do t’i drejtohet të dielën.

“Më lejoni t’ju them diçka: Donald Trump nuk do të shkojë askund”, tha senatori Ted Cruz.

Gjatë javëve të fundit të trazuara të ish-Presidentit Trump në detyrë, mbështetësit e tij kryen një sulm vdekjeprurës ndaj Kapitolit të Shteteve të Bashkuara në 6 janar, në përpjekje për të bllokuar çertifikimin në Kongres të fitores së demokratit Joe Biden në zgjedhjet presidenciale, një fitore që zoti Trump pretendoi në mënyrë të gabuar se ishte përshkuar nga manipulimi i gjerë.

Në rastin se do të kishte ndonjë dyshim se CPAC i këtij viti i ishte kushtuar zotit Trump, statuja e ish-presidentit, e veshur me një xhaketë blu, kravatë të kuqe dhe pantallona boksi ngjyrë të kuqe, të bardhë dhe blu, ishte shfaqur në vendin e konferencës.

Statuja tërhoqi menjëherë kritika në internet.

“Adhurimi i idhujve nuk është konservator. #RestoreOurGop”, tha në Twitter Përfaqësuesi Adam Kinzinger, një nga 10 ligjvënësit republikanë që votuan për fillimin e gjyqit ndaj ish-Presidentit Trump me akuzën e nxitjes së sulmit të 6 janarit.

Ligjvënësi Gaetz e deklaroi veten pjesë të krahut “pro-Trump, Amerika e Para” në lëvizjen konservatore. “Ne nuk jemi vërtet një krah, ne jemi i gjithë trupi”, tha ai.

Ai gjithashtu u duk se parashikoi një rol të ardhshëm për zotin Trump, i cili po mendon për një tjetër kandidim për president në vitin 2024, duke thënë: “Trump-i mund të mos e ketë tharë moçalin deri në fund – akoma”.

Ish-Presidenti Trump pritet të flasë të dielën për të ardhmen e partisë dhe të paraqesë ndryshime në politikat brenda një grupi të përçarë nga mosmarrëveshjet pas katër viteve të tij në detyrë.

“Ndasia tani është midis ‘elitave në kryeqytet’ dhe bazave konservatore përreth vendit”, tha një këshilltar i ish-Presidentit Trump që ndihmoi në përgatitjen e fjalimit.

Ish-Presidenti Trump gjithashtu do të ofrojë retorikë kritike ndaj Presidentit Biden.

Mbështetësit e ish-Presidentit Trump në konferencën e së premtes përsëritën disa nga pretendimet e tij të rreme, duke argumentuar se këto justifikonin kufizime të reja në votim.

Përveç 10 republikanëve të Dhomës së Përfaqësuesve që votuan për ta fajësuar Presidentin Trump, shtatë republikanë të Senatit votuan për ta dënuar atë për nxitje të rebelimit, megjithëse votimi 57-43 nuk arriti shumicën e dy të tretave të nevojshme për ta dënuar atë.

Disa këshilltarë thonë se ata duan që ish-Presidenti Trump të mos përdorë fjalimin e tij për t’u marrë sërish me zgjedhjet, por në vend të kësaj të ofrojë një perspektivë të qartë për republikanët që të rimarrin kontrollin e Dhomës së Përfaqësuesve dhe Senatit në zgjedhjet e kongresit në vitin 2022.

Kandidaturë në vitin 2024?

Perspektiva e ish-Presidentit Trump, 74 vjeç, për të kandiduar për president përsëri në vitin 2024, e ndërlikon jetën për republikanët e tjerë që aspirojnë për president, përfshirë ish-Sekretarin e Shtetit Mike Pompeo dhe ish-Nënpresidentin Mike Pence.

Ish-Nënpresidenti Pence, i cili ishte në Kapitol me familjen e tij kur protestuesit sulmuan duke thirrur “Vareni Mike Pence-in!”, nuk pritej të merrte pjesë në CPAC e këtij viti.

CPAC është një ngjarje e organizuar nga Unioni Konservator Amerikan, kryetari i së cilës, Matt Schlapp, është pranë ish-Presidentit Trump. Është një forum kryesor për folësit që duan të masin interesin nëse duhet të kandidojnë për president bazuar në entuziazmin që krijojnë.

Shumë republikanë mendojnë se ish-Presidenti Trump do të flirtojë me një tjetër shfaqje të shpejtë në fushën e kandidatëve për vitin 2024, por besojnë se ai në fund të fundit do të zgjedhë të mos kandidojë. Vetë ish-Presidenti Trump u ka rrëfyer privatisht këshilltarëve se ai do të donte të kandidonte. VOA

Raporti amerikan i zbulimit: Princi saudit i kurorës miratoi vrasjen e Khashoggit

Raporti i agjencive amerikane të zbulimit liston 21 persona për të cilët SHBA ka besim të madh se ishin përgjegjës për vdekjen e gazetarit në emër të princit të kurorës. Zyrtarët amerikanë besojnë se princi saudit i kurorës Mohammed bin Salman miratoi operacionin për “kapjen ose vrasjen” e gazetarit, thuhet në dokumentin e sapo lëshuar.

Ky lajm është në përditësim

Presidenti i Shteteve të Bashkuara, Joe Biden, telefonoi mbretin Salman të Arabisë Saudite, ndërsa administrata e tij pritet të publikojë një version të deklasifikuar të mandatuar nga kongresi të një raporti të zbulimit, që pritet të vërë në pah se i biri i mbretit, princi i Kurorës, Mohammed bin Salman, ka miratuar vrasjen e gazetarit saudit, Jamal Khashoggi, në vitin 2018.

Sipas Shtëpisë së Bardhë, gjatë bisedës telefonike, presidenti Biden dhe mbreti Salman “diskutuan mbi sigurinë rajonale, duke përfshirë përpjekjet e ripërtërira diplomatike të drejtuara nga Kombet e Bashkuara dhe Shtetet e Bashkuara për t’i dhënë fund luftës në Jemen dhe angazhimin amerikan për të ndihmuar Arabinë Saudite që të mbrojë territorin e saj, teksa përballet me sulme nga grupe të lidhura me Iranin”.

Njoftimi i Shtëpisë së Bardhë mbi telefonatën, vuri në dukje lirimin e fundit të disa aktivistëve amerikanë sauditë dhe veprimtares saudite për të drejtat e grave, Loujain al-Hathloul nga paraburgimi dhe pohoi rëndësinë që Shtetet e Bashkuara u kushtojnë të drejtave universale të njeriut dhe sundimit të ligjit. Njoftimi nuk përmendi raportin mbi vrasjen e Jamal Khashoggit, i planifikuar për t’u publikuar pas telefonatës.

Shtëpia e Bardhë nuk dha një shpjegim se pse njoftimi nuk përmendi Khashoggin, i cili ishte një banor i ligjshëm i Shteteve të Bashkuara dhe me fëmijë me shtetësi amerikane.

Jamal Khashoggi, kolumnist në Washington Post, u josh në konsullatën Saudite në Stamboll më 2 tetor 2018 dhe u vra nga një ekip operativësh të lidhur me princin e kurorës. Ata më pas e copëtuan trupin e tij. Eshtrat e tij nuk u gjetën kurrë.

Riadi përfundimisht pranoi se gazetari Khashoggi u vra gabimisht në një operacion që shkoi keq, por mohoi çdo përfshirje të princit të kurorës

Roli i princit të kurorës, i njohur nga nistoret e tij MBS, në vrasjen e Jamal Khashoggit, është subjekt i raporteve të medias që nga fundi i vitit 2018. Administrata e ish presidentit Donald Trump hodhi poshtë kërkesat e ligjvënësve për të publikuar një version të deklasifikuar të raportit, pasi që Shtëpia e Bardhë i dha përparësi shitjes së armëve në mbretëri dhe aleancës me Riadin, mes tensioneve në rritje të Shteteve të Bashkuara me rivalin e saj rajonal, Iranin.

Rivlerësimi i marrëdhënieve ndërmjet Shteteve të Bashkuara dhe Arabisë Saudite, dhe synimi për të vënë theksin tek të drejtat e njeriut, është një zotim fushate i presidentit Biden. Që nga marrja e detyrës, ai i ka dhënë fund shitjes së armëve që Riadi mund të përdorë në Jemen dhe emëroi diplomatin veteran Timothy Lenderking si të dërguarin e posaçëm për të udhëhequr përpjekjet e diplomacisë amerikane “për t’i dhënë fund luftës në Jemen, një luftë e cila ka krijuar katastrofë humanitare”.

“Presidenti Biden dëshiron të jetë i qartë se rruga e vjetër nuk është rrugë e e re,” tha Gerald Feierstein, nënkryetar i Institutit për Lindjen e Mesme.

Administrata po kërkon gjithashtu të distancohet nga MBS, sundimtari 35 vjeçar de facto vendit. Zëdhënësja e Shtëpisë së Bardhë, Jen Psaki, shpesh ka theksuar se presidenti Biden do të komunikojë vetëm me mbretin saudit.

Ndërsa Shtetet e Bashkuara po rishikojnë marrëdhëniet me sauditët, Shtëpia e Bardhë po përpiqet të nxisë rivalin rajonal të Riadit, Iranin, që të veprojë në përputhje me marrëveshjen bërthamore që u prish pasi ish presidenti Trump u tërhoq prej saj në vitin 2018.

Marrëveshja e njohur si Plani i Përbashkët Gjithëpërfshirës i Veprimit u arrit nga Irani dhe P5 + 1 (Kina, Franca, Gjermania, Rusia, Britania e Madhe dhe Shtetet e Bashkuara) nën administrimin e ish presidentit Barack Obama, në vitin 2015.

Dhënia fund e shitjeve të armëve sulmuese në Riad është pjesë e kalkulimeve më të mëdha gjeopolitike që përfshin drejtpeshimin e këtyre dy fuqive rajonale, tha zoti Feierstein, i cili ishte gjithashtu ambasador në Jemen në kohën e ish presidentit Obama.

“Ideja është që nëse ka një zgjidhje politike të konfliktit në Jemen, kjo mundet, në fakt, të zvogëlojë tensionin në rajon…”. tha ai.

Krahasuar me Libanin dhe Irakun, Jemeni është një përparësi më e vogël e sigurisë kombëtare për Iranin. Zbutja e tensioneve mund të jetë një masë e ndërtimit të besimit për të nxitur Teheranin përsëri në bisedimet bërthamore dhe përfundimisht të trajtojë shqetësimet tjera, duke përfshirë programin e tij të raketave balistike dhe mbështetjen për milicitë në Irak dhe Liban. Në fakt, tha zoti Feierstein, rirreshtimi i presidentit Biden me sauditët në Jemen, mund të ndihmojë më tej interesat e Shteteve të Bashkuara në rajon.

Por, analistë të tjerë thonë se rivlerësimi i marrëdhënieve me Riadin dhe riangazhimi me Teheranin mund të ketë kundërefekt. Kjo mund të bëjë që sauditët të ndjehen të braktisur nga Shtetet e Bashkuara dhe t’i shtyjë ata drejt veprimeve kundër interesave amerikane, tha Bradley Bowman, nga Fondacioni për Mbrojtjen e Demokracive, një institucion pro-izraelit i njohur për qëndrimet kundër marrëveshjes bërthamore me Iranin.

Por, Kelsey Davenport, nga Shoqata për Kontrollin e Armëve, kërkimet e së cilës përqendrohen në programet bërthamore dhe raketore në Iran, tha se mënyra më e mirë për të parandaluar një garë rajonale bërthamore është rivendosja e marrëveshjes bërthamore.

“Përballja me programin bërthamor të Iranit do të parandalojë që Arabia Saudite të ndjejë nevojën që të barazohet me mundësitë e Iranit,” tha ajo.

Zonja Davenport theksoi se gjatë disa viteve të fundit, sauditët kanë hedhur bazat për të zhvilluar një armë bërthamore, nëse do të zgjidhnin të bënin një gjë të tillë.

“Nga pikëpamja e sigurisë së Shteteve të Bashkuara dhe qëndrueshmërisë rajonale, rivendosja e një marrëveshjeje bërthamore është një hap i parë i rëndësishëm për të siguruar që nuk do të ketë krizë me Iranin që kalon në një krizë bërthamore rajonale”, tha ajo.

Ushtria e SHBA po ndërton armën më të fuqishme me lazer në botë

Ushtria e SHBA-së po ndërton armën më të fuqishme me lazer në botë, transmeton Anadolu Agency (AA).

Përgjigjja Operacionale Taktike e Fuqisë së Lartë (THOR) u ndërtua në Bazën e Forcave Ajrore Kirtland në shtetin New Mexico. Ajo do të jetë e aftë të sigurojë mbrojtje kundër shënjestrave të shumta njëkohësisht.

Lazeri pretendohet të jetë një milion herë më i fuqishëm se çdo lazer tjetër në botë. Mund të avullojë dronë, të ndalojë raketa ose të prishë sistemet elektronike.

Ndërsa prototipi i parë dhe testimi në terren është planifikuar për në vitin 2024 dhe sipas raporteve pritet të vendoset për të mbrojtur bazat ushtarake.

“Aftësitë e energjisë së drejtuar të ushtrisë do të duhet të sigurojnë një mbrojtje të shtresuar me shumë mënyra për të mposhtur kërcënimet që vijnë”, tha në një deklaratë gjenerali i ushtrisë L. Neil Thurgood.

“Lazerët me energji të lartë vrasin një objektiv në çast, kurse mikrovalët me fuqi të lartë mund të vrasin grupe ose tufa. Kjo është arsyeja pse po ndjekim një kombinim të të dy teknologjive”, shtoi ai.

Shefja e Policisë: Përkrahësit e ish-presidentit Trump duan të sulmojnë përsëri

Përkrahësit e ish-presidentit Donald Trump që ndërmorën sulmin vdekjeprurës në Kapitol më 6 janar kanë lënë të kuptohet se duan të “hedhin në erë” selinë e Kongresit dhe të vrasin anëtarë të tij, tha të enjten shefja e policisë së Kapitolit.

Kërcënimet sugjerojnë që ekstremistët mund ta vënë në shënjestër ndërtesën gjatë një fjalimi të Presidentit Joe Biden, u tha ligjvënësve shefja në detyrë e policisë Yogananda Pittman e cila shprehu nevojën e mbajtjes në fuqi të masave të sigurisë së lartë përreth ndërtesës.

“Anëtarët e grupeve të milicive që ishin të pranishëm më 6 janar janë shprehur se duan të hedhin në erë Kapitolin dhe të vrasin sa më shumë anëtarë të Kongresit jetë e mundur duke bërë një lidhje të drejtpërdrejtë me Fjalimin për Gjendjen e Vendit”, u tha shefja e policisë Pittman anëtarëve të një Komisioni të Dhomës së Përfaqësuesve.

“Ne mendojmë se do të ishte e kujdesshme që Policia e Kapitolit të mbajë në fuqi masat e forta të sigurisë derisa të zgjidhim ato dobësi,” tha ajo.

Data për mbajtjen e fjalimit për gjendjen e vendit nga ana e Presidentit Biden para Kongresit nuk është njoftuar ende, që zakonisht është në fillim të vitit.

Pas sulmit vdekjeprurës të 6 janarit ndaj Kapitolit në Uashington, u vendosën masa të pashembullta sigurie, përfshirë gardhe me tela me gjemba dhe postblloqe me forca të Gardës Kombëtare.

Rreth 5,000 trupa pritet të vazhdojnë të qëndrojnë deri në mes të marsit.

Përkrahësit e zotit Trump sulmuan Kapitolin në një përpjekje për të mos lejuar Kongresin të çertifikonte fitoren e demokratit Biden ndaj presidentit republikan, i cili këmbëngulte në mënyrë të pasaktë se kishte pasur mashtrime të përhapura në zgjedhjet e nëntorit.

Sulmi vonoi për disa orë çertifikimin e fitores së zotit Biden, pasi ligjvënësit u detyruan të fshiheshin nga turma. Pesë persona vdiqën nga dhunë, përfshirë një oficer të Policisë së Kapitolit.

Më shumë se 200 vetë janë akuzuar deri tani për rolet e tyre në sulm, përfshirë disa që kishin lidhje me grupe të ekstremit të djathtë si “Oath Keepers” dhe “Proud Boys”. VOA

Biden viziton senatorin Bob Dole pas diagnostikimit me kancer

Presidenti amerikan Joe Biden, ka vizituar të shtunën senatorin Bob Dole, ka njoftuar Shtëpia e Bardhë, pasi përfaqësuesi nga Kansas, i pensionuar tashmë, ka njoftuar se është diagnostikuar me kancer në mushkëri.

Në njoftimin e Shtëpisë së Bardhë është thënë se të dy politikanët, kanë shërbyer bashkë në Senat dhe Dole “është mik i afërt” i presidentit Biden.

Dole, i nominuar për president nga republikanët më 1996, ka qenë një prej republikanëve që kanë thënë zëshëm pas zgjedhjeve të 3 nëntorit të vitit 2020, se Biden ka fituar.

“Zgjedhjet kanë mbaruar dhe (Joe) Biden do të jetë president më 20 janar. Unë e di që presidenti nuk e ka pranuar humbjen dhe mund të mos e pranojë kurrë, mirëpo ai nuk do të jetë në Shtëpinë e Bardhë më 21 janar”, ka thënë Dole në dhjetor të vitit të kaluar, duke iu referuar ish-presidentit amerikan, Donald Trump.

Dole, 97-vjeçar ka bërë të ditur lajmin për kancer më 18 shkurt.

“Së fundmi, janë diagnostikuar me kancer në mushkëri, në fazën e katërt. Trajnimi im i parë do të nisë të hënën”, ka thënë ai përmes një postimi në rrjetin social Twitter.

“Teksa kam disa pengesa përpara, unë e di se iu bashkohem miliona amerikanëve që po përballen me sfidat e tyre shëndetësore”.

Dole ka shërbyer për 27 vjet si senator amerikan nga Kansas.

Në janar të vitit 2018, ai është shpërblyer me Medalje të Artë nga Kongresi, njëherësh çmimi më i lartë civil që ndan ky institucion.

Dole ka udhëhequr një delegacion të Shteteve të Bashkuara në Kosovë në vitin 1990.

Në muajin gusht të vitit të kaluar, busti i tij është vendosur në Prishtinë.

Përmes një video-mesazhi, senatori Dole ka shprehur mirënjohje për inaugurimin e bustit.

“Më vjen keq që nuk mund të jem me ju në inaugurimin e bustit, më kujton kohën e para 30 vjetëve. Tridhjetë vjet kemi punuar për të krijuar një shtet të fortë dhe shpresoj se do të vazhdoni të punoni për t’u bërë edhe më të fortë”, ka thënë Dole. rel

Biden: Çdo amerikan do të vaksinohet deri në korrik

Presidenti i Shteteve të Bashkuara, Joe Biden, tha se të gjithë amerikanët do të kenë qasje në vaksinat kundër koronavirusit deri në fund të korrikut.

Biden parashikoi më herët se vaksinat mund të jenë në dispozicion për të gjithë deri në pranverë, por Shtëpia e Bardhë e shtyu datën për shkak të vështirësive në disponueshmërinë e vaksinave dhe në mundësitë për t’i dhënë ato.

“Deri në fund të korrikut do të kemi 600 milionë doza, të mjaftueshme për të vaksinuar çdo amerikan”, tha Biden në takimin e parë me votues, prejse ka marrë detyrën në muajin janar.

Ai tha se do që shkollat të rihapen më shpejt dhe se mbështet vaksinimin e mësimdhënësve me prioritet.

Biden tha se SHBA-ja ka ende rrugë të gjatë përpara për të arritur imunitetin e tufës dhe për të lejuar rikthimin e jetës në normalitet.

Numri i rasteve të reja me koronavirus në SHBA është në rënie, por vazhdon të mbetet në dhjetëra mijëra në ditë.

Sipas të dhënave të Universitetit Johns Hopkins, numri i viktimave të martën ka qenë pak më pak se 1,000.

Koronavirusi ka vrarë mbi 487,000 njerëz në të gjithë SHBA-në.

Shumë pyetje, me të cilat u përball Biden nga audienca në shtetin e Uiskonsinit, kishin të bënin me pandeminë dhe ekonominë, ndërsa në politikën e jashtme ai u pyet për Kinën dhe trajtimin që u bën ky vend pakicave në rajonin Ksinjiang.

“Do të ketë pasoja për Kinën dhe ai e di këtë”, tha Biden, duke iu referuar presidentit të Kinës, Xi Jinping.

Xi është përballur me kritika globale për mbajtjen e ujgurëve – kryesisht myslimanë – dhe të grupeve të tjera të pakicave në kampe internimi.

Pekini këmbëngul se objektet janë “qendra të arsimit profesional”, që synojnë t’i ndihmojnë njerëzit të largohen nga terrorizmi dhe të riintegrohen në shoqëri.

“Kina po përpiqet shumë për t’u bërë udhëheqëse botërore… Për aq kohë sa ajo është e angazhuar në një veprimtari që është në kundërshtim me të drejtat themelore të njeriut, do të jetë e vështirë për ta arritur këtë”, tha Biden në ngjarjen që organizoi rrjeti televiziv CNN.

Në një telefonatë dyorëshe me Xinë, më 11 shkurt, Biden vuri në dukje prioritetin e tij për të ruajtur një rajon të lirë dhe të hapur të Indo-Paqësorit, si dhe shprehu shqetësimin në lidhje me praktikat “shtrënguese dhe të padrejta” tregtare të Pekinit dhe me çështjet e të drejtave të njeriut.

Media shtetërore kineze tha se Xi kërkoi kujdes nga SHBA-ja, rreth ndërhyrjes në çështjet e sovranitetit dhe integritetit territorial të Kinës, përfshirë Hong Kongun dhe Ksinjiangun.

Anëtarët e audiencës në Uiskonsin ishin të përzier: demokratë, republikanë dhe të pavarur.

Biden gjithashtu shfrytëzoi ngjarjen për të reklamuar një paketë ndihme prej 1.9 trilion dollarësh, për trajtimin e pasojave të pandemisë.

Presidenti është duke kërkuar nga ligjvënësit republikanë në Kongres, që e kundërshtojnë paketën, ta pranojnë atë si mënyrën më të mirë për të kthyer fuqinë e ekonomisë amerikane.

Biden tha se paketa masive e ndihmës tashmë ka mbështetje të gjerë publike dhe shtoi se “tani është koha për ta shpenzuar”.

Dhoma e Përfaqësuesve në SHBA pritet ta votojë atë javën e ardhshme.

Përgatiti: Valona Tela

Senati arrin marrëveshje për të mos thirrur dëshmitarë në gjyqin ndaj ish-Presidentit Trump

Të shtunën Senati arriti një marrëveshje për të mos thirrur dëshmitarë në gjyqin ndaj ish-Presidentit Trump duke i hapur rrugë paraqitjes së argumenteve përmbyllëse të palëve.

Por fillimisht Senati u përfshi nga paqartësitë mbi këtë çështje. Senatorët votuan për të vlerësuar mundësinë e thirrjes së dëshmitarëve në gjyqin ndaj ish-presidentit Donald Trump.

Përplasjet e minutës së fundit për dëshmitarët ishin pasojë e komenteve të bëra të premten në mbrëmje nga një ligjvënëse republikane e Dhomës së Përfaqësuesve në lidhje me një telefonatë të nxehtë gjatë ditës së trazirave mes zotit Trump dhe udhëheqësit të pakicës së kësaj dhome Kevin McCarthy, që demokratët thonë se është dëshmia e indiferencën së zotit Trump ndaj dhunës në Kapitol.

Fillimisht në Senat po diskutohej nëse duhej të thirrej për të dëshmuar ligjvënësja Jaime Herrera Beutler, një nga 10 republikanët që votuan për ngritjen zyrtarisht të akuzës ndaj zotit Trump në Dhomën e Përfaqësuesve. Në një deklaratë të premten vonë ajo tha se zoti Trump kishte kundërshtuar një lutje të zotit McCarthy për t’i ndalur protestuesit. Demokratët e konsiderojnë atë një provë kyçe që konfirmon se presidenti ” braktisi qëllimisht detyrën si komandant i përgjithshëm”.

Procesi gjyqësor u ndal papritmas të shtunën në mëngjes dhe madje senatorët dukeshin të hutuar për hapat e ardhshëm.

Ndërkohë, udhëheqësi republikan Mitch McConnell e ka bërë tashmë të qartë se ai do të votojë për ta liruar zotin Trump nga akuza, sipas një personi në dijeni të qëndrimit të tij. Parë nga ky këndvështrim, pikëpamja e udhëheqësit të republikanëve mund të ndikojë tek të tjerë anëtarë të partisë së tij.

Ndërsa demokratët pritet të votojnë për fajësimin e ish-presidentin, gjasat janë të mëdha që ai të shpallet i pafajshëm në dhomën prej 100 anëtarët të ndarë 50 me 50 mes palëve. Që zoti Trump të shpallej fajtor mbi akuzën e ngritur do të nevojiteshin votat e dy të tretës së anëtarëve të Senatit.

Gjyqi në Senat ka nxjerrë në pah rrezikun e jashtëzakonshëm me të cilin u përballën ligjvënësit më 6 janar, ndërsa zoti Trump u bëri thirrje ndjekësve të tij të marshonin drejt Kapitolit, në një përpjekje për të parandaluar ligjvënësit që të çertifikonin ditoren e tij ndaj demokratit Joe Biden në zgjedhjet presidenciale.Si pasojë pesë persona humbën jetën.

Pamje filmike të marra nga kamerat e sigurisë të cilat u paraqitën gjatë procesit të gjykimit tregonin se protestuesit ishin afruar shumë pranë e duke vendosur në rrezik ligjvënësit ndërsa ata po evakuoeshin nga Senati dhe Dhoma e Përfaqësuesve.

Në shënjestër të protestuesve ishte edhe Nënpresidenti Mike Pence, i cili më herët gjatë asaj dite kishte refuzuar kërkesën e zotit Trump për të ndërhyrë në procedurat për çertifikimin e rezultatit të zgjedhjeve.

Në një postim në Twitter zoti Trump kritikoi zoti Pence për mungesë “guximi” menjëherë pasi senatori republikan Tommy Tuberville kishte njoftuar zotin Trump se nënpresidenti po evakuohej për arsye sigurie.

Avokatët e zotit Trump dhanë përgjigje kontradiktore të premten kur u pyetën nëse zoti Trump e dinte se zoti Pence ishte në rrezik kur publikoi postimin e tij. Disa senatorë republikanë thanë se ata kishin ende pyetje në lidhje me rolin e zotit Trump në sulmin e dhunshëm në Kapitol.

“Çështja është se cili ishte qëllimi i presidentit? Për këtë gjë vetëm presidenti mund të përgjigjej. Dhe presidenti zgjodhi të mos e bëjë”, u tha gazetarëve senatori republikan Bill Cassidy. Ai shtoi se nuk e kishte ndarë ende mendjen se si të votonte. Ish-Presidenti Trump e hodhi poshtë kërkesën e prokurorëve të çështjes për të dëshmuar në gjyqin e tij. VOA

Rezoluta dypartiake e Kongresit Amerikan që mbështet kryengritjen iraniane, bën thirrje për mbylljen e ambasadës iraniane në Shqipëri

Një rezolutë e nënshkruar nga 113 ligjvënës të Kongresit Amerikan nga të dy partitë, dhe mbështetës të një Irani demokratik, dhe dënimin e komploteve terroriste të regjimit në të gjithë botën dhe në Shqipëri, u prezantua të enjten, 11 Shkurt 2021.

Rezoluta shpreh mbështetjen e saj për planin me 10 pika të udhëheqëses së opozitës znj. Maryam Rajavi për të ardhmen e Iranit, e cila kërkon të drejtën universale për të votuar, zgjedhje të lira, ekonomi tregu dhe mbron barazinë gjinore, fetare dhe etnike, një politikë e jashtme e bazuar në bashkëjetesë paqësore dhe një Iran jo-bërthamor.

Lajmet e TV Fox TV raportuan se në një letër drejtuar Presidentit Biden duke e njoftuar atë për rezolutën, Kongresmeni McClintock (Republikan) dhe Kongresmeni Sherman (Demokrat) thanë se Shtetet e Bashkuara “duhet të qëndrojnë të vendosura në mbajtjen e përgjegjësisë së qeverisë iraniane për destabilizimin e saj bërthamor dhe të tjera. aktivitetet në rajon; të tilla si, mbështetja e tij për terrorizmin, zhvillimi i raketave balistike dhe shkeljet e të drejtave të njeriut. “

“Me paraqitjen e kësaj rezolute, një koalicion dypartiak i anëtarëve të Kongresit inkurajon të gjitha përpjekjet për të njohur të drejtat e popullit iranian dhe luftën e tyre për të krijuar një shtet republikan e demokratik, sekular dhe jo-bërthamor të Iranit duke e quajtur regjimin në pushtet përgjegjës për sjellje shkatërruese “, shkruajnë ata.

Nënshkruesit e rezolutës kujtuan se: ”Në Dhjetor 2018, Qeveria e Shqipërisë dëboi Ambasadorin e Iranit, Gholamhossein Mohammadnia dhe shefin e stacionit të MOIS në Shqipëri, Mostafa Roudaki, për planifikimin e aktiviteteve terroriste kundër disidentëve iranianë dhe anëtarëve të Organizatës Popullore Muxhahedine të Iranit (PMOI / MEK) në15 Mar 2010.

Në një pjesë të rezolutës thuhet se:

“Ndërsa, më 15 nëntor 2019, protestat popullore kundër regjimit iranian filluan dhe u përhapën me shpejtësi në të paktën 100 qytete në të gjithë vendin, raportet tregojnë se forcat iraniane të sigurisë përdorën forcë vdekjeprurëse dhe rreth 1,500 njerëz u vranë në më pak se dy javë, dhe mijëra të tjerë u arrestuan gjatë këtyre protestave. “

Rezoluta i kërkon administratës amerikane të punojë për të mbledhur seanca urgjente të Këshillit të Sigurimit të Kombeve të Bashkuara dhe të punojë me partnerë dhe aleatë të Shteteve të Bashkuara për të dënuar shkeljet e vazhdueshme të të drejtave të njeriut të kryera nga regjimi iranian dhe të krijojë një mekanizëm me të cilin Këshilli i Sigurimit i Kombeve të Bashkuara mund të monitorojë shkelje të tilla.

Përfaqësuesit e Kongresit Amerikan që nënshkruan rezolutën i bënë thirrje qeverisë amerikane që:

(1) Të dënojë sulmet terroriste të sponsorizuara të së kaluarës dhe të tanishme të Iranit kundër qytetarëve dhe zyrtarëve të Shteteve të Bashkuara, si dhe disidentëve iranianë, përfshirë komplotin terrorist të regjimit iranian kundër tubimit ‘‘ Irani i Lirë 2018 – Alternativa ’’ në Paris.

(2) U bën thirrje agjencive përkatëse të Qeverisë së Shteteve të Bashkuara për të punuar me aleatët evropianë, duke përfshirë ato në Ballkan ku Irani ka zgjeruar praninë e tij, për ta quajturIranin përgjegjës për shkeljen e privilegjeve diplomatike dhe për t’i bërë thirrje kombeve për të parandaluar aktivitetet malinje të Iranit sic janë misionet diplomatike të regjimit duke mbyllur qendrat e tyre, përfshirë Ambasadën iraniane në Shqipëri.

(3) qëndron me popullin e Iranit i cili po vazhdon të mbajë protesta legjitime dhe paqësore kundër një regjimi shtypës dhe të korruptuar; dhe

(4) njeh të drejtat e popullit iranian dhe luftën e tij për të krijuar një Republikë demokratike, laike dhe jo-bërthamore të Iranit.

Pezullohet punonjësi i Shtëpisë së Bardhë, pasi u njoftua se kërcënoi gazetaren

UASHINGTON – Shtëpia e Bardhë tha të premten se pezulloi përkohësisht një ndihmës për shtypin pasi ai thuhet se kërcënoi një gazetare e cila po punonte për një artikull në lidhje me marrëdhënien e tij romantike me një tjetër gazetare.

Revista “Vanity Fair” njoftoi të premten se zëvendës sekretari i shtypit i Shtëpisë së Bardhë TJ Ducklo kishte kërcënuar – duke përdorur edhe fjalët “Unë do të shkatërroj ty” – një korrespondente të grupit mediatiak Politico, e cila po hartonte një artikull në lidhje me marrëdhëniet e zotit Ducklo, të zbuluara së fundmi, me një reportere të revistës Axios, Alexi McCammond.

Sekretarja e Shtypit e Shtëpisë së Bardhë, Jen Psaki, shkruajti në Twitter se zoti Ducklo ishte pezulluar për një javë pa pagesë dhe se ai nuk do të punojë më me reporterët e Politico-s.

Zonja Psaki tha se zoti Ducklo i kishte kërkuar falje gazetares Tara Palmeri, “me të cilën ai pati një bisedë të nxehtë për jetën e tij personale… Ai është i pari që pranon se ky nuk është standardi i sjelljes i përcaktuar nga Presidenti”.

Ducklo, McCammond dhe Palmeri nuk iu përgjigjën email-ve që kërkonin komente. Një zëdhënëse e Axios tha se zonja McCammond informoi për marrëdhënien redaktorët e saj në muajin nëntor dhe u transferua nga detyra ku mbulonte Shtëpinë e Bardhë.

Pezullimi vjen pasi Presidenti demokrat Joe Biden, i cili mori detyrën muajin e kaluar, u zotua të mbante një qëndrim të ashpër për çdo sjelle të padenjë në radhët e anëtarëve të administratës së tij.

“Nëse jeni duke punuar ndonjëherë me mua dhe unë dëgjoj se trajtoni pa respekt një koleg tjetër, i flisni dikujt me fodullëk, ju premtoj se do t’ju pushoj nga puna në vend … pa nëse dhe pa por”, u tha Presidenti Biden të emëruarve politikë gjatë një ceremonie betimi virtuale. “Të gjithë kanë të drejtën të trajtohen me mirësjellje dhe dinjitet”.

Zonja Psaki u tha gazetarëve gjatë një konference të premten se Presidenti Biden nuk ishte i përfshirë në vendimin për pezullimin e zotit Ducklo dhe theksoi se Shtëpia e Bardhë e mori çështjen seriozisht.

Sjellja e Ducklo-s ishte “plotësisht e papranueshme. Ai e di këtë”, tha Psaki. “Ne kemi bërë biseda me të … Kjo nuk do të ndodhë më kurrë.”

“Dënojeni Trumpin, ose dhuna mund të përsëritet”

Ish-presidenti i SHBA-së, Donald Trump, duke folur para mbështetësve të tij më 6 janar. “Nëse nuk luftoni si ferr, nuk do të keni më shtet”, ka thënë Trump. Pak kohë më vonë, mbështetësit e tij kanë sulmuar Kongresin.

Demokratët e Dhomës së Përfaqësuesve në Shtetet e Bashkuara i përfunduan argumentet kundër ish-presidentit Donald Trump, duke u bërë thirrje senatorëve ta dënojnë atë për nxitjen e sulmit të turmës në Kongres.

Senati amerikan ka nisur këtë javë gjykimin e ish-presidentit, nën akuzat për “nxitje të kryengritjes”.

Sipas menaxherëve të procedurave të fajësimit, që veprojnë si prokurorë, retorika e rreme dhe e zjarrtë e tij për zgjedhjet presidenciale të 3 nëntorit, ka bërë që mbështetësit e tij ta sulmojnë Kongresin, më 6 janar.

Sulmi ka ndodhur derisa ligjvënësit kanë qenë duke certifikuar fitoren e Joe Bidenit në zgjedhjet presidenciale.

“Nëse nuk luftoni si ferr, nuk do të keni më shtet”, u ka thënë Trump mbështetësve të tij atë ditë.

Video:

Pesë vetë, në mesin e tyre një zyrtar i policisë, kanë mbetur të vrarë në dhunë.

“Me përulje ju kërkojmë ta fajësoni presidentin Trump për krimin e kryer”, tha përfaqësuesi demokrat, Joe Neguse.

“Nëse nuk e fajësoni, nëse pretendojmë se kjo nuk ka ndodhur – ose, edhe më keq, nëse e lëmë pa përgjigje – kush thotë se nuk do të ndodhë përsëri”, pyeti ai.

“Askush nga ne nuk e ka imagjinuar se do të përballeshim me rrezik vdekjeprurës nga një turmë e nxitur nga presidenti i Shteteve të Bashkuara”, tha përfaqësuesi tjetër demokrat, David Cicillin.

Ai po ashtu tha se disa protestues të dhunshëm kanë pranuar se kanë planifikuar të vrasin ish-nënpresidentin Mike Pence dhe kryetaren e Dhomës së Përfaqësuesve, Nancy Pelosi, ndërsa të tjerët, sipas tij, kanë folur për vendosjen e ligjvënësve në bodrum dhe për “lëshimin e gazit”.

Avokatët e Trumpit do të kenë 16 orë kohë për të paraqitur mbrojtjen e tyre, nisur nga sot, megjithëse disa ndihmës kanë thënë se ata mund t’i përfundojnë argumentet e tyre brenda një dite.

Votimi në Senat, për fajësimin ose jo të Trumpit, mund të zhvillohet më 13 shkurt.

Sipas një sondazhi të kryer nga ABC News dhe Qendra e Kërkimeve Ipsos, shumica e amerikanëve – 56 për qind – duan që Senati amerikan ta dënojë Trumpin dhe, në këtë mënyrë, ta ndalojë atë të udhëheqë ndonjë zyrë publike në të ardhmen.

Dhoma e Përfaqësuesve, e kontrolluar nga demokratët, ka votuar për shkarkimin e Trumpit pak ditë para se ai të përfundonte mandatin presidencial, më 20 janar.

Për ta shpallur fajtor atë duhen dy të tretat e votave të Senatit 100-anëtarësh.

Fajësimi duket se nuk ka gjasa, pasi shumica e senatorëve republikanë i kanë qëndruar besnikë ish-presidentit.

Duke iu bërë jehonë qëndrimeve të tyre, senatori Marco Rubio tha për Fox News se sulmi në Kongres ishte “i tmerrshëm”, porse fajësimi i Trumpit nuk është i përshtatshëm, duke qenë se ai nuk është më në detyrë.

Në vitin 2019, Trump është përballur edhe me një proces tjetër të gjykimit, nën akuzat se i ka bërë presion Ukrainës për të zbuluar informacione të dëmshme për Joe Bidenin, i cili pritej të ishte rival i tij në zgjedhjet e vitit 2020. Senati nuk e ka fajësuar Trumpin në atë proces.

Përgatiti: Valona Tela

Gjyqi ndaj ish-presidentit: Pas argumenteve të demokratëve, reagojnë senatorët

Senatorët mbeten të ndarë në pikëpamjet e tyre rreth gjykimit të ish-Presidentit Donald Trump lidhur me sulmin e dhunshëm të 6 janarit në Kapitol.

Prokurorët demokratë përshkruan me fraza të forta, me përshkrime personale ngjarjet e 6 janarit, duke i shoqëruar me klipe nga komentet e presidentit drejtuar protestuesve.

Në mbyllje të seancës së të enjtes, pasi dolën nga salla, disa senatorë iu përgjigjën pyetjeve të gazetarëve të agjencisë së lajmeve Associated Press:

Senatori republikan Josh Hawley tha se nuk kishte asgjë të veçantë në argumentet e ofruara nga demokratët, të enjten në gjyqin ndaj ish-presidentit Trump në Senat.

“Mendoj se argumentet ishin përsëritëse dhe nuk pati një analizë ligjore,” tha senatori republikan.

Ndërsa, senatori demokrat Richard Blumenthal pati një vlerësim të kundërt për këtë.

“Pati argumente shumë të fuqishme. Nëse kolegët e mi dëgjojnë ndërgjegjen e tyre dhe ngrihen në këtë moment, ata do ta shpallin atë (ish-presidentin Trump) fajtor. Unë vërtetë besoj se nëse votimi do të ishte i fshehtë, ai do të rezultonte në një vendim për ta shpallur fajtor dhe unë mendoj se faktet dhe ligji u demonstruan në mënyrë të fortë”, tha senatori demokrat Richard Blumenthal.

“Ata treguan sot se kishte një mungesë totale pendese ose keqardhjeje (nga ana e ish-presidentit), në fakt, duke u kënaqur me dhunën që ishte aq flagrante dhe e qartë dhe se mungesa e pendimit tregoi vetëdashje dhe qëllim që unë mendoj se është kriminale dhe ngrihet në nivelin e fajësisë”, shtoi ai.

“Mendoj se ligjvënësit që vepruan si prokurorë bënë një punë të mrekullueshme. Ata jo vetëm prezantuan argumente bindëse para senatorëve republikanë, por edhe para popullit amerikan. Na bënë pjesë të historisë për të regjistruar atë që bëri Donald Trumpi për të përmbysur Kushtetutën,” tha senatorja demokrate Elizabeth Warren lidhur me përshtypjet e saj për seancën.

Senatorja demokrate nga Minesota Tina Smith u pyet nga një gazetar nëse po mendon për veprime të tjera që mund të ndërmarrin senatorët për të ndëshkuar ish-presidentin në qoftë se ai lirohet nga akuzat në Senat.

“Ta marrim gradualisht. Ligjvënësit kanë paraqitur fakte dhe shpjegime shumë, shumë të forta për të mbështetur argumentin që ish-Presidenti Trump duhet të shpallet fajtor. Aty jam përqëndruar për momentin”.

Zonja Smith më pas u pyet për videot e transmetuara në sallë nga ngjarjet e dhunshme të 6 janarit.

“M’u mbushën sytë me lot. Më kujtohet si e përjetova vetë. Por pashë edhe si e kishin përjetuar të tjerët, kuptova përvojën e policëve të Kapitolit. Ato që kaluan ishin tronditëse. Kur mendon që dhuna vazhdoi për orë të tëra, ndërkohë që ne ishim strehuar në një vend të sigurtë… të gjitha këto ishin pamje shumë të rëndaa, e kisha të vështirë kur i pashë,” tha senatorja.

Gazetarët e pyetën zonjën Smith nëse senatorët republikanë që ende ishin të lëkundur tani do të jenë bindur të votojnë për ta shpallur ish-presidentin fajtor.

“Nuk di ç’të them. Tani ata duhet të gjykojnë se çfarë kanë në zemër dhe të vendosin se cili është veprimi i drejtë. Shpresoj se do të ndërmarrin veprimin e duhur”.

Pasi ligjvënësit demokratë përmbyllën argumentet në mbështetje të akuzës për nxitje dhune, tani ekipi mbrojtjes i ish-Presidentit Trump përgatitet të paraqesë argumentet e tij.

Megjithëse senatorë republikanë janë shprehur të impresionuar nga puna e ligjvënësve demokratë në paraqitjen e argumenteve të tyre, nuk duket se ekziston numri i nevojshëm i votave për ta shpallur zotin Trump fajtor. VOA

Senat, demokratët përmbyllin argumentet: prova të qarta se ish-presidenti nxiti dhunë

Marrë nga Reuters dhe AP

Prokurorët në gjyqin kundër ish-Presidentit Trump në Senatin amerikan thanë të enjten se ka prova “të qarta dhe të pamohueshme” se ish-presidenti nxiti rebelimin e 6 janarit duke dërguar përkrahësit e tij drejt Kapitolit për të penguar procesin e certifikimit të rezultatit të zgjedhjeve.

Në argumentet përmbledhëse, prokurori kryesor, ligjvënësi Jamie Raskin u tha 100 senatorëve që po luajnë rolin e jurisë se duhet të përdorin “logjikën e shëndoshë për ngjarjet në Kapitol”.

“Një parim bazë është se askush nuk duhet të nxisë dhunë” në demokracinë amerikane, tha zoti Raskin.

Senati amerikan përmbylli ditën e tretë të gjyqit ndaj ish-Presidentit Donald Trump në Senat. Demokratët e Dhomës së Përfaqësuesve që luajnë rolin e prokurorëve, përmbyllën paraqitjen e argumenteve të tyre mbi rolin e ish-Presidentit Donald Trump në protestat e dhunshme të 6 janarit. Në ditën e tretë të gjyqit, ata u përqëndruan tek dëmi i shkaktuar gjatë trazirave në Kapitol dhe roli i ish-presidentit në nxitjen e protestuesve.

Në ditën e fundit të paraqitjes së argumenteve nga pala akuzuese, demokratët përshkruan me shembuj nga përvoja personale tmerrin e asaj dite, skenat nga salla ku tani po zhvillohet gjyqi.

Demokratët ngritën një numër pyetjesh të cilave, ata thonë, duhet t’u gjejnë përgjigje argumentet e ekipit ligjor të ish-presidentit.

“Përse Presidenti Trump nuk u tha përkrahësve të ndalin sulmin në Kapitol menjëherë pasi mësoi për ngjarjet? Përse Presidenti Trump nuk bëri asgjë për të ndalur sulmin për të paktën dy orë pasi filloi,” tha ligjvënësi Jamie Raskin.

Procesi do të vazhdojë në ditën e katërt të gjyqit me paraqitjen e argumenteve të ekipit mbrojtës. Pasi të mbarojë paraqitjen e argumenteve pala mbrojtëse, senatorët do të kenë mundësinë për t’i bërë pyetjet secilës palë.

Dhoma e Përfaqësuesve ka ngritur ndaj zotit Trump akuzën për nxitjen e një rebelimi, duke inkurajuar mijëra mbështetës të tij për të marshuar drejt Kapitolit, ditur kur Kongresi ishte mbledhur për të çertifikuar fitoren e demokratit Joe Biden në zgjedhjet e nëntorit.

Prokurorët e Dhomës së Përfaqësuesve, që e kanë paraqitur çështjen në Senat, e kaluan pjesën më të madhe të së mërkurës duke folur për ngjarjet që çuan në trazirat e 6 janarit dhe duke theksuar kërcënimet që iu bënë ish-nënpresidentit Mike Pence atë ditë.

Të enjten ata përshkruan “çmimin e lartë” të trazirave dhe “rolin e zotit Trump në grumbullimin, nxitjen dhe ndezjen e kryengritësve”, tha një ndihmës i Dhomës së Përfaqësuesve.

Ata sollën në vemendje “mungesën e pendesës” nga ana e zotit Trump gjatë dhe pas trazirave, “që është një tjetër element në planet e tyre për procedimin e çështjes”, tha ndihmësi.

Disa senatorë republikanë kanë thënë se demokratët e Dhomës së Përfaqësuesve po i paraqesin mirë argumentet e tyre kundër zotit Trump, por shumë prej tyre nuk janë të bindur se ish-presidenti duhet të shpallet fajtor.

Senatori republikan Marco Rubio tha për Fox News se ndonëse sulmi i 6 janarit ishte “i tmerrshëm”, shpallja fajtor e zotit Trump do të ishte e papërshtatshme, duke patur parasysh se ai nuk është më në detyrë.

Një ndihmës i lartë republikan i Senatit tha se “çështja tashmë është e vendosur”, sepse shumica e të 50 senatorëve të kësaj partie janë kundër shpalljes fajtor.

PROKURORËT SHFAQIN VIDEO TRONDITËSE

Anëtarët demokratë të Dhomës së Përfaqësuseve në rolin e prokurorëve treguan të mërkurën video të reja tronditëse të kamerave të sigurisë në gjyqin ndaj ish-Presidentit Donald Trump, ku shihej turma duke hyrë me forcë në Kapitol, duke thyer dritare dhe dyer dhe duke kërkuar në mënyrë kërcënuese Nënpresidentin Mike Pence dhe Kryetaren e Dhomës së Përfaqësuesve Nancy Pelosi, ndërsa policia që nuk përmbante dot turmën lutej në radio për ndihmë.

Në regjistrimet e papublikuara më parë, prokurorët e Dhomës së Përfaqësuesve shfaqën skena shtangëse që bënin të qartë se sa afër ishin pjesëmarrësit në rebelim me udhëheqësit e vendit, duke qarkulluar lirisht nëpër salla duke brohoritur “Të varet Mike Pence”, disa prej tyre me veshje luftarake ndërsa anëtarë të grupeve ekstremiste ishin ndër të parët që kishin hyrë brenda. Jashtë, turma kishte ngritur një trekëmbësh të improvizuar.

Në një moment dramatik, në video shihet një punonjës i rendit që hap zjarr drejt turmës përmes një dritareje të thyer, duke vrarë një grua nga San Diego, Ashli Babbitt.

Pamjet tregojnë Nënpresidentin Pence, i cili po kryesonte seancën për të çertifikuar fitoren e Joe Bidenit ndaj zotit Trump – duke ngjallur zemërimin e zotit Trump – që shoqërohet me nxitim për t’u strehuar në një zyrë me familjen e tij, vetëm 30 metra larg protestuesve.

Zonja Pelosi u evakuua nga kompleksi ndërsa stafi i saj u fsheh në zyrat e saj. Punonjësit e rendit, të mbingarkuar nga turma, në gjendje paniku thonë “e humbëm kontrollin”. Një oficer shihet duke u shtypur nga turma dhe prokurorët thanë se një tjetër pësoi një goditje në zemër. Më pas një prej tyre humbi jetën.

Megjithëse shumica e senatorëve që shërbejnë si anëtarë të jurisë e kanë marrë vendimin e tyre mbi pafajësinë ose dënimin, ata shihnin të shtangur videon që tregonte si protestuesit morën kontrollin e të njëjtës sallë ku tani po zhvillohet gjyqi.

“Ata vepruan sepse zoti Donald Trump i dërgoi në këtë mision,” tha një nga prokuroret, Stacey Plaskett, delegate demokrate që përfaqëson Ishujt Virgin.

Paraqitja tronditëse hapi ditën e parë të plotë të argumenteve në gjyq ndërsa prokurorët argumentuan se zoti Trump nuk ishte një “spektator i pafajshëm” por “nxitësi kryesor” i trazirave vdekjeprurëse të Kapitolit, një president që për muaj me radhë përhapi gënjeshtra për zgjedhjet dhe ushqeu zemërimin e një turme mbështetësish, të gatshëm të ndiqnin thirrjen e tij për të ndalur fitoren e zotit Biden.

Demokratët argumentuan se ish-Presidenti Donald Trump mbolli farën për sulmin vdekjeprurës në Kapitol shumë më përpara datës 6 janar, me pretendimet e tij të rreme se zgjedhjet ishin vjedhur.

Në ditën e dytë të gjyqit të ish-presidentit në Senat ata thanë se ligjvënësit kishin detyrimin për ta mbajtur ish-presidentin përgjegjës për ngjarjen.

“Trump e kuptoi pranverën e kaluar se ai mund t’i humbiste zgjedhjet e nëntorit dhe filloi të mbjellë farën e zemërimit midis mbështetësve të tij, duke thënë se ai mund të humbte vetëm nëse zgjedhjet vidheshin,” tha ligjvënësi demokrat Joseph Neguse.

“Nëse duam të mbrojmë republikën tonë dhe të parandalojmë që diçka e tillë të ndodhë përsëri, ai duhet të shpallet fajtor,” tha ligjvënësi.

Ai vlerësoi ish-Nënpresidentin Mike Pence, i cili më 6 janar drejtoi seancën e çertifikimit zyrtar të fitores së Presidentit Joe Biden, pavarësisht presionit nga zoti Trump për ta ndalur procesin.

Avokatët e zotit Trump argumentojnë se retorika e ish-presidentit mbrohet nga garancia e fjalës së lirë në bazë të Amendamentit të Parë dhe se individët që hynë në Kapitol dhe jo zoti Trump, ishin përgjegjës për sjelljen e tyre kriminale. Ata thonë gjithashtu se gjyqi synon thjesht t’i japë fund karrierës politike të zotit Trump.

“NXITËSI KRYESOR”

Anëtari i Kongresit, Joaquin Castro citoi ato që ai i quajti akte të qarta të frikësimit politik kundër punonjësve të zgjedhjeve në shtetet ku zoti Trump po humbte. Në Filadelfia, Atlanta dhe Miluoki, tha zoti Castro, mbështetësit e ish-Presidentit Trump u përpoqën të përdornin forcën e armatosur për të penguar numërimin e votave.

Delegatja Plaskett tha se në mënyrë të përsëritur, zoti Trump “inkurajoi qëllimisht” dhunën nga mbështetësit e tij.

“E vërteta është se Presidenti Trump për muaj të tërë u kishte bërë thirrje përkrahësve të tij që të marshonin në një ditë të caktuar, në një kohë të caktuar, në një vend të caktuar, për të ndaluar çertifikimin,” tha ajo.

Veprimet e zotit Trump kërcënuan një nga tiparet dalluese të demokracisë amerikane, transferimin paqësor të pushtetit, thanë menaxherët demokratë, duke e quajtur zotin Trump “nxitësin kryesor”.

“Kjo çështje nuk ka të bëjë me shpalljen fajtor të një spektatori të pafajshëm për dhunën e tmerrshme dhe dëmin që ndodhi më 6 janar,” tha në hapje të seancës ligjvënësi Jamie Raskin, që luan rolin e kryeprokurorit në gjyqin e Senatit. “Kjo ka të bëjë me kërkesën e llogarisë ndaj personit që ishte përgjegjës për nxitjen e sulmit.”

Që zoti Trump të shpallet fajtor, duhet që një shumicë prej dy të tretave e anëtarëve të Senatit të votojnë për një gjë të tillë, çka do të thotë se të paktën 17 republikanë duhet të bashkohen me 48 demokratët e Senatit dhe dy të pavarur për të votuar kundër zotit Trump, i cili mbetet figura më e fuqishme e partisë së tij edhe pasi nuk është më në detyrë.

Të martën, vetëm gjashtë nga 50 senatorë republikanë votuan së bashku me demokratët për të përcaktuar se gjyqi ishte në përputhje me Kushtetutën dhe mund të vazhdonte edhe pse mandati i zotit Trump përfundoi në 20 janar.

Senatori Republikan Ron Johnson, një aleat i zotit Trump, u tha gazetarëve gjatë një pushimi se procedurat do të bëheshin “mjaft të zvarritura”.

“Kjo është një lojë politike,” tha ai.

I pyetur nëse Republikanët kishin marrë udhëzime nga udhëheqësi i pakicës republikane të Senatit Mitch McConnell mbi votimin, senatori Kevin Cramer tha se senatorët do të votonin në bazë të “ndërgjegjes së tyre”.

NJË VEND I PËRÇARË

Në një sondazh të Ipsos për Reuters, rezultatet e të cilit u bënë publike të mërkurën, 47% e të anketuarve thanë se zoti Trump duhet të dënohej, ndërsa 40% u shprehen kundër, të ndarë sipas përkatësisë partiake.

Gjyqi në Senat nuk është hetimi i vetëm me të cilin përballet zoti Trump pas largimit nga Shtëpia e Bardhë. Prokurorët në distriktin më të madh të Xhorxhias kanë hapur një hetim penal mbi përpjekjet e zotit Trump për të ushtruar ndikim tek rezultatet e zgjedhjeve të atij shteti pasi doli në pah një telefonatë më 2 janar ku ai i bënte presion sekretarit të shtetit për të “gjetur” votat e mjaftueshme për të përmbysur humbjen e tij në Xhorxhia.

Gjyqi i Senatit mund të përfundojë të shtunën ose të dielën, sipas një këshilltari të lartë të Senatit.

Disa demokratë kishin shprehur shqetësimin se një gjykim i zgjatur mund të vonojë ecurinë e programit të zotit Biden, përfshirë një paketë të propozuar prej 1,9 trilionë dollarësh mbi koronavirusin. Zoti Biden nuk kishte në plan ta shikonte gjyqin, tha Shtëpia e Bardhë. I pyetur të martën në lidhje me procedurat, presidenti tha se ai ishte përqendruar në punën e tij.

Zoti Trump është i vetmi president që gjykohet nga Senati pas largimit nga detyra dhe i vetmi ndaj të cilit ngrihen dy herë akuza nga Dhoma e Përfaqësuesve. Ai është presidenti i tretë në historinë e Shteteve të Bashkuara ndaj të cilit ngrihen akuza nga Dhoma e Përfaqësuesve.

Asnjë president amerikan nuk është hequr nga detyra pas ngritjes së akuzave nga Dhoma e Përfaqësuesve. Procesit të shkarkimit i janë nënshtruar Bill Clinton në vitin 1998 dhe Andrew Johnson në 1868, por edhe ata u shpallën të pafajshëm. Richard Nixon dha dorëheqjen në 1974 në vend që të përballej me procesin e shkarkimit për skandalin Watergate. VOA

Dhjetëra ish-zyrtarë republikanë, në bisedime për formimin e një partie anti-Trump

Dhjetëra ish zyrtarë republikanë, të cilët e shohin partinë si të pavullnetshme për t’i rezistuar ish-Presidentit Donald Trump dhe përpjekjeve të tij për të minuar demokracinë amerikane, janë në bisedime për të formuar një parti të të qendrës së djathtë, thanë për agjencinë Reuters, katër persona të përfshirë në bisedime.

Diskutimet në fazën e hershme përfshijnë ish zyrtarë të zgjedhur republikanë, ish zyrtarë që kanë shërbyer në administratat republikane të Ronald Reaganit, George H.W. Bush, George W. Bush dhe Trump, ish-ambasadorë republikanë dhe strategë republikanë, thonë personat e përfshirë në bisedime.

Më shumë se 120 prej tyre zhvilluan një telekonferencë të premten për të diskutuar shkëputjen e grupit, i cili do të funksionojë mbi platformën e “konservatorizmit parimor”, duke përfshirë besnikërinë ndaj Kushtetutës dhe shtetin e së drejtës – ide që personat e përfshirë thonë se janë hedhur poshtë nga ish presidenti Trump.

Plani është futja e kandidatëve në disa gara, por edhe mbështetja e kandidatëve të qendrës së djathtë në të tjera, qofshin ata republikanë, të pavarur apo demokratë.

Evan McMullin, i cili ka qënë drejtor i politikave në Konferencën Republikane të Dhomës së Përfaqësuesve dhe kandidoi si i pavarur në zgjedhjet presidenciale të vitit 2016, i tha agjencisë Reuters se ai organizoi telekonferencën me ish zyrtarët e shqetësuar në lidhje me kontrollin e Trumpit ndaj republikanëve dhe kthesën anti-imigracionit që ka marrë partia.

Tre persona të tjerë konfirmuan për agjencinë Reuters telekonferencën dhe diskutimet për një parti të mundshme, por kërkuan të mos identifikohen.

Midis pjesëmarrësve ishin John Mitnick, këshilltar i përgjithshëm në Departamentin e Sigurisë Kombëtare në administratën Trump; ish-kongresmeni republikan Charlie Dent; Elizabeth Neumann, nëndrejtore kabinetit në Departamentin e Sigurisë Kombëtare në administratën Trump; dhe Miles Taylor, një tjetër ish-zyrtar i sigurisë kombëtare në administratën Trump.

Bisedimet nxjerrin në pah përçarjen e thellë brenda partisë mbi pretendimet e rreme të Trumpit për manipulimin e zgjedhjeve dhe sulmin vdekjeprurës të 6 janarit në Kapitolin. Shumica e republikanëve i qëndrojnë besnikë ish-presidentit, por të tjerët kërkojnë një drejtim të ri për partinë.

Pjesëmarrësit në telekonferencë thanë se ishin veçanërisht të tronditur nga fakti që më shumë se gjysma e republikanëve në Kongres – tetë senatorë dhe 139 ligjvënës të Dhomës së Përfaqësuesve- votuan për të bllokuar çertifikimin e fitores së Bidenit në zgjedhje vetëm disa orë pas rrethimit të Kapitolit.

Shumica e senatorëve republikanë gjithashtu kanë treguar se nuk do të mbështesin dënimin e Trumpit në gjyqin e Senatit nën akuza se nxiti dhunën në Kongres.

“Pjesë të mëdha të Partisë Republikane po radikalizohen dhe po kërcënojnë demokracinë amerikane”, tha zoti McMullin. “Partia duhet të përkushtohet përsëri ndaj të vërtetës, arsyes dhe idealeve themelore ose duhet të ketë dale diçka e re.”

‘Këta dështakët’

I pyetur në lidhje me diskutimet për një parti të tretë, Jason Miller, një zëdhënës i Trumpit, tha: “Këta dështakë u larguan nga Partia Republikane kur votuan për Joe Bidenin.”

Një përfaqësues për Komitetin Kombëtar Republikan iu referua një deklarate të fundit nga kryetarja Ronna McDaniel.

“Nëse vazhdojmë të sulmojmë njëri-tjetrin dhe të përqendrohemi në sulmet ndaj republikanëve, nëse kemi mosmarrëveshje brenda partisë tonë, atëherë do të humbasim vështrimin nga zgjedhjet e vitit 2022,” tha McDaniel në kanalin Fox News muajin e kaluar.

“E vetmja mënyrë për të fituar është të bashkohemi”, tha ajo.

Zoti McMullin tha se një shumicë e atyre që morën pjesë në telekonferencën e javës së kaluar mbështesnin idenë e një partie të tretë kombëtare, të shkëputur nga partia republikane. Një tjetër mundësi në diskutim është formimi i një “fraksioni” që do të funksiononte ose brenda partisë aktuale republikane ose jashtë saj.

SHBA shqyrton emërimin e një Emisari Special për Ballkanin Perëndimor

Politikanë të ndryshëm e njohës të rajonit të Ballkanit Perëndimor në vazhdimësi kanë tërhequr vërejtjen se vazhdimi i “status-quo”-s në mes të Kosovës dhe Serbisë nuk është gjë e mirë për sigurinë e rajonit. Influenca ruse drejt Serbisë shihet si një prej problematikave, meqë mund ta tërheqë Beogradin zyrtar nga rruga drejt integrimit në BE. Kjo ka shtyrë Shtetet e Bashkuara të Amerikës dhe Bashkimin Evropian që në vazhdimësi të bëjnë përpjekje për gjetjen e një zgjidhjeje finale që do të vendoste një stabilitet afatgjatë në rajon.

Por Brukseli e Uashingtoni, pavarësisht bashkëpunimit të ngushtë, kur flitet për finalen e negociatave, kanë dallime. BE-ja në vazhdimësi e thekson togfjalëshin “marrëveshje gjithëpërfshirëse e ligjërisht e obligueshme”, derisa Uashingtoni thotë hapur e prerë që pjesë e marrëveshjes finale mes Kosovës dhe Serbisë duhet të jetë edhe njohja reciproke.

Një gjë të tillë e ka theksuar në letrën e tij ish-presidenti amerikan, Donald Trump, derisa të njëjtën e ka thënë edhe Joe Biden në urimin e tij drejtuar Vuçiqit me rastin e ditës së shtetësisë së Serbisë.

Por, më në detaje, cila do të jetë qasja e administratës së re të Shteteve të Bashkuara të Amerikës karshi negociatave mes Prishtinës dhe Beogradit?

Në një përgjigje ekskluzive për Gazetën Express nga Ambasada e Shteteve të Bashkuara të Amerikës në Prishtinë thonë se Uashingtoni e mbështet plotësisht dialogun e lehtësuar nga Brukseli, teksa e citojnë presidentin Joe Biden që ka thënë se një marrëveshje gjithëpërfshirëse duhet të çojë në njohje reciproke, duke e ruajtur sovranitetin e integritetin territorial të dy shteteve.

“Shtetet e Bashkuara e mbështesin plotësisht Dialogun e lehtësuar nga BE-ja mes Kosovës dhe Serbisë që synon një marrëveshje gjithëpërfshirëse të normalizimit. Siç ka thënë Presidenti Biden, “Një zgjidhje gjithëpërfshirëse që do të çojë në njohje të ndërsjellë, të ruajë sovranitetin dhe integritetin territorial të të dy shteteve dhe të forcojë institucionet e tyre demokratike është thelbësore që Kosova dhe Serbia të ecin përpara. Kjo do të rriste sigurinë dhe prosperitetin e të dy vendeve, do t’i çonte përpara aspiratat e tyre për anëtarësim në Bashkimin Evropian dhe institucione të tjera shumëpalëshe dhe do të mbështeste qëllimin e qëndrueshëm të një Evrope të plotë, të lirë dhe në paqe”, ka thënë një zëdhënës i ambasadës për Gazetën Express.

Tutje, në përgjigje thuhet se baza e një marrëveshjeje duhet të vendoset nga vetë palët dhe se SHBA-ja është e gatshme t’i dëgjojë e t’i ndihmojë Prishtinën e Beogradin dhe BE’në për gjetjen e një zgjidhjeje për të cilën pajtohen të gjitha palët.

“Thelbi i çdo marrëveshjeje duhet të vijë nga vetë palët. Ne jemi të gatshëm të dëgjojmë dhe ndihmojmë në çdo mënyrë për t’i mbështetur të dyja palët dhe BE-në, si një ndihmës, në gjetjen e një zgjidhjeje të rënë dakord reciprokisht”, ka theksuar ky zëdhënës për Express.

E për të implementuar një qasje të tillë karshi negociatave, shefi i diplomacisë amerikane, Antony Blinken, e ka paralajmëruar shqyrtimin e mundësisë për emërimin e një Emisari Special për rajonin.

Këtë e kanë konfirmuar nga Ambasada e ShBA-së në Prishtinë.

“Në seancën dëgjimore në Senatin e Komitetit për Punë të Jashtme, Sekretari Blinken ka thënë se “nëse konfirmohem, unë me kujdes do ta shqyrtoj çështjen e emërimit të një të dërguari special për rajonin”, ka përfunduar për Express një zëdhënës i ambasadës, i pyetur nëse do të emërohet një i dërguar special për dialogun mes Kosovës dhe Serbisë.

Përgjatë periudhës së administratës së Donald Trumpit ka qenë emisari Richard Grenell ai që e ka udhëhequr përpjekjen amerikane për të çuar Kosovën dhe Serbinë drejt një marrëveshjeje për normalizim ekonomik.

Kjo marrëveshje u nënshkrua më 4 shtator në Shtëpinë e Bardhë dhe tashmë Kosova ka filluar t’i shijojë frytet e para të saj, duke filluar nga njohja e pavarësisë nga Izraeli, dërisa para pak ditësh ka hyrë në fuqi edhe marrëveshja për investime amerikane.

Pritet të shihet se me çfarë intensiteti do t’i qaset administrata e Biden punës për një marrëveshje finale. Në Kosovë ka pritje që kjo çështje të mbyllet brenda këtij viti, derisa nga Brukseli ende ka skepeticizëm se mund të arrihet diçka shpejtë./GazetaExpress/

Demokratët paraqesin video tronditëse si prova në gjyqin ndaj ish-Presidentit Donald Trump

Marrë nga Reuters dhe AP

Në një moment dramatik, në video shihet një punonjës i rendit që hap zjarr drejt turmës përmes një dritareje të thyer, duke vrarë një grua nga San Diego, Ashli Babbitt.

Zonja Pelosi u evakuua nga kompleksi ndërsa stafi i saj u fsheh në zyrat e saj. Punonjësit e rendit, të mbingarkuar nga turma, në gjendje paniku thonë “e humbëm kontrollin”. Një oficer shihet duke u shtypur nga turma dhe prokurorët thanë se një tjetër pësoi një goditje në zemër. Më pas një prej tyre humbi jetën.

“Ata vepruan sepse zoti Donald Trump i dërgoi në këtë mision,” tha një nga prokuroret, Stacey Plaskett, delegate demokrate që përfaqëson Ishujt Virgin.

Paraqitja tronditëse hapi ditën e parë të plotë të argumenteve në gjyq ndërsa prokurorët argumentuan se zoti Trump nuk ishte një “spektator i pafajshëm” por “nxitësi kryesor” i trazirave vdekjeprurëse të Kapitolit, një president që për muaj me radhë përhapi gënjeshtra për zgjedhjet dhe ushqeu zemërimin e një turme mbështetësish, të gatshëm të ndiqnin thirrjen e tij për të ndalur fitoren e zotit Biden.

Në ditën e dytë të gjyqit të ish-presidentit në Senat ata thanë se ligjvënësit kishin detyrimin për ta mbajtur ish-presidentin përgjegjës për ngjarjen.

“Nëse duam të mbrojmë republikën tonë dhe të parandalojmë që diçka e tillë të ndodhë përsëri, ai duhet të shpallet fajtor,” tha ligjvënësi.

“NXITËSI KRYESOR”

Delegatja Plaskett tha se në mënyrë të përsëritur, zoti Trump “inkurajoi qëllimisht” dhunën nga mbështetësit e tij.

“Kjo çështje nuk ka të bëjë me shpalljen fajtor të një spektatori të pafajshëm për dhunën e tmerrshme dhe dëmin që ndodhi më 6 janar,” tha në hapje të seancës ligjvënësi Jamie Raskin, që luan rolin e kryeprokurorit në gjyqin e Senatit. “Kjo ka të bëjë me kërkesën e llogarisë ndaj personit që ishte përgjegjës për nxitjen e sulmit.”

Senatori Republikan Ron Johnson, një aleat i zotit Trump, u tha gazetarëve gjatë një pushimi se procedurat do të bëheshin “mjaft të zvarritura”.

“Kjo është një lojë politike,” tha ai.

NJË VEND I PËRÇARË

Gjyqi në Senat nuk është hetimi i vetëm me të cilin përballet zoti Trump pas largimit nga Shtëpia e Bardhë. Prokurorët në distriktin më të madh të Xhorxhias kanë hapur një hetim penal mbi përpjekjet e zotit Trump për të ushtruar ndikim tek rezultatet e zgjedhjeve të atij shteti pasi doli në pah një telefonatë më 2 janar ku ai i bënte presion sekretarit të shtetit për të “gjetur” votat e mjaftueshme për të përmbysur humbjen e tij në Xhorxhia.

Gjyqi i Senatit mund të përfundojë të shtunën ose të dielën, sipas një këshilltari të lartë të Senatit.

SHBA, hetim penal ndaj ish-Presidentit Trump në shtetin Xhorxhia

Prokurorët në Qarkun Fulton të shtetit Xhorxhia kanë filluar një hetim penal lidhur me përpjekjet e ish-Presidentit Donald Trump për të përmbysur rezultatet e zgjedhjeve në këtë shtet.

Hetimi përfshin një telefonatë që ai i bëri Sekretarit të Shtetit Xhorxhia Brad Raffensperger në të cilën i bëri presion zyrtarit që të gjente vota të mjaftueshme për të përmbysur rezultatin.

Një prokurore demokrate e zgjedhur kohët e fundit në këtë qark, u dërgoi një letër zyrtarëve të shtetit, përfshirë zotit Raffensperger, ku kërkon që ata të ruajnë dokumentet lidhur me telefonatën e zotit Trump. Në letër thuhej qartë se kërkesa ishte pjesë e një hetimi penal, sipas një zyrtari, i cili kërkoi të mbetej anonim.

Hetimi vjen ndërsa zoti Trump përballet me një gjyq të dytë në Senat me akuzën e “nxitjes së rebelimit” për rolin e tij në tyrazirat në Kapitol më 6 janar. Dhuna e asaj dite erdhi pas disa javë pretendimesh të rreme të ish-presidentit se mashtrimi zgjedhor e privoi atë nga fitorja, duke përfshirë shtetin e Xhorxhias ku ai humbi me rreth 12,000 vota më pak.

Shtëpia e Bardhë distancon Presidentin Biden nga gjyqi ndaj zotit Trump në Senat

Steve Herman

Presidenti amerikan Joe Biden tha se ndërsa gjyqi kundër paraardhësit të tij është duke u zhvilluar në Senat, ai do të përqendrohet në lehtësimin e pasojave të shkaktuara nga pandemia e koronavirusit.

“Nuk po e ndjek”, u përgjigj Presidenti Biden kur u pyet nga gazetarët të martën në Zyrën Ovale nëse ai po e ndiqte gjyqin kundër ish Presidentit Trump. “Kemi humbur mbi 450,000 njerëz (nga Covid-19) dhe mund të humbasim shumë më tepër nëse nuk veprojmë me vendosmëri dhe shpejtësi. Shumë fëmijë po flenë të uritur. Shumë familje nuk kanë ushqime të mjaftueshme. Ata janë në vështirësi. Kjo është puna ime. Senati ka punën e tij, dhe ata janë gati ta fillojnë atë, dhe unë jam i sigurt se ata do të veprojnë në mënyrë të duhur.”

Presidenti shtoi se ai nuk do të thotë asgjë tjetër në lidhje me gjyqin ndaj ish-presidentit Donald Trump, ndaj të cilit zoti Biden fitoi në zgjedhjet e nëntorit të kaluar.

“Ai nuk është analist politik. Ai nuk do të shprehë mendimin në lidhje me argrumentet dhe nuk do të ndjekë gjyqin në Senat”, u përgjigj Zëdhënësja e Shtëpisë së Bardhë Jen Psaki, kur u pyet më herët gjatë ditës nga një gazetar në lidhje me zhvillimet në gjyqin historik ndaj ish-presidentit Trump që filloi të martën.

Zëdhënësja Psaki u pyet gjithashtu se si është e mundur që Presidenti aktual Biden të mos shprehte mendimin mbi atë nëse është kushtetuese që Senati të hedhë në gjyq një ish-president dhe nëse kjo do të krijonte një precedent të rrezikshëm për institucionin e presidencës.

Zëdhënësja e Shtëpisë së Bardhë nuk dha një përgjigje të drejtpërdrejtë për këtë.

“Ai do të presë derisa Senati të nxjerrë konkluzionet për këtë”, tha ajo gjatë konferencës ditore për mediat në Shtëpinë e Bardhë. “Pikëpamja e tij është se ai duhet të përqendrohet aktualisht në trajtimin e nevojave të popullit amerikan, kthimin e njerëzve në punë, luftën kundër pandemisë.”

Shtëpia e Bardhë po përpiqet të përcjellë imazhin e presidentit të përqendruar në këto çështje ndërsa zhvillohet gjyqi ndaj paraardhësit të tij.

Shtëpia e Bardhë ka planifikuar vizita për zotin Biden në Departamentin e Mbrojtjes dhe Institutet Kombëtare të Shëndetit këtë javë. Të martën që vjen, presidenti do të shkojë në Miluoki të Uiskonsinit, ku do të marrë pjesë në një bashkëbisedim me qytetarë.

Gjatë transmetimit të drejtpërdrejtë të tij më 16 shkurt, presidenti do t’u përgjigjet pyetjeve në lidhje me përpjekjet e administratës së tij “për të frenuar pandeminë e koronavirusit dhe për t’i dhënë nxitje një ekonomie të trazuar”, sipas CNN-it, që do të transmetojë ngjarjen.

Rrjeti televiziv sqaroi se do të përfshijë “një audiencë vetëm me ftesa dhe në respektim të rregullave të distancimit fizik”.

Zyrtarët e administratës thonë se nuk do të kishte asnjë avantazh politik për zotin Biden, një ish-senator dhe ish-nënpresident që të angazhohej në gjyqin ndaj ish-Presidentit Trump, çka do të shihej si një lëvizje politike në fillim të presidencës së tij dhe në një kohë kur amerikanët duan që ai të përqendrohet në lehtësimin e vuajtjeve të shkaktuara nga pandemia.

Zoti Biden “ka nxjerrë deklarata të shumta që përcjellin mesazhin se ajo që bëri (ish) presidenti, fjalët e tij dhe veprimet e tij, dhe natyrisht ngjarjet e 6 janarit, ishin një kërcënim për demokracinë tonë”, tha zonja Psaki të martën.

Vota në Senat: Gjyqi ndaj ish-presidentit Trump është kushtetues

Marrë nga Reuters

Senati amerikan votoi të martën në mbrëmje për t’i hapur rrugën gjyqit të plotë mbi akuzat ndaj ish-presidentit Donald Trump për nxitje rebelimi lidhur me sulmin ndaj Kapitolit më 6 janar, duke hedhur poshtë një pretendim se procedimi ishte antikushtetues pasi panë videon grafike të sulmit të janarit.

Në seancën e parë për këtë qëllim që do të përcaktonte nëse gjykimi i ish-presidentit ishte kushtetues, 56 anëtarë të Senatit votuan pro, dhe 44 kundër argumentit të demokratëve se procedimi është në përputhje me Kushtetutën e Shteteve të Bashkuara.

Gjashtë senatorë republikanë votuan pro, një më shumë sesa pesë që kishin votuar muajin e kaluar kundër një përpjekjeje republikane për ta bllokuar gjyqin.

Donald Trump bëhet ish-presidenti i parë amerikan që gjykohet në Senat.

Avokatët e zotit Trump argumentuan se meqenëse zoti Trump nuk është më në detyrë, Senati nuk ka autoritetin të mbajë një gjyq mbi akuzën e Dhomës së Përfaqësuesve se ai nxiti një rebelim ndërsa ishte në detyrë.

Demokratët shpresojnë ta skualifikojnë ish-presidentin Trump nga mbajtja e një posti publik në të ardhmen.

Videoja e paraqitur nga ekipi i nëntë demokratëve të Dhomës së Përfaqësuesve që luajnë rolin e Prokurorit të çështjes kombinonte pamjet e dhunës ndaj Kapitolit më 6 Janar me segmente të fjalimit ndezës të ish-presidentit Trump para mbështetësve të tij disa momente më herët, duke i nxitur ata të “luftonin fort” për të përmbysur humbjen e tij në zgjedhjet e nëntorit.

Senatorët, që shërbejnë në rolin e jurisë, panë në ekrane pamjet që tregonin përkrahësit e zotit Trump duke rrëzuar barrierat dhe duke goditur oficerët e policisë në Kapitol. Në video përfshihej gjithashtu momenti kur policia që ruante sallën e seancave të Dhomës së Përfaqësuesve, qëlloi për vdekje protestuesen Ashli Babbitt, një nga pesë personat, përfshirë një oficer policie që vdiqën atë ditë.

Turma sulmoi policinë, i detyroi ligjvënësit të fshiheshin për të ruajtur veten, dhe ndërpreu çertifikimin zyrtar nga ana e Kongresit të fitores së Presidentit Joe Biden, pasi zoti Trump kishte sfiduar për dy muaj rezultatet e zgjedhjeve, duke pretenduar në mënyrë të rreme për mashtrime të gjera në votime.

“Nëse kjo nuk është një vepër e dënueshme, atëherë asgjë tjetër nuk është”, tha anëtari demokrat i Dhomës së Përfaqësuesve Jamie Raskin, i cili shërben në rolin e kryeprokurorit të çështjes, para shfaqjes së videos.

Ai qau ndërsa tregonte se si vajzës dhe dhëndrit të tij, që ai i kishte sjellë në Kapitol atë ditë për të qenë të pranishëm në çertifikimin e zgjedhjeve, u ishte dashur të fshiheshin në një zyrë pranë sallës së Dhomës së Përfaqësuesve, duke thënë: “Ata besonin se do të vdisnin.”

Në kontrast të prezantimit emocional të demokratëve, avokatët e ish-presidentit Trump e sulmuan procesin, duke argumentuar se gjyqi ishte një përpjekje antikushtetuese, partiake për t’i mbyllur rrugën të ardhmes politike të zotit Trump, pas largimit nga Shtëpia e Bardhë.

“Ajo që ata duan të realizojnë në të vërtetë këtu në emër të Kushtetutës është që të mos lejojnë Donald Trumpin që të kandidojë më për poste politike, por kjo është një fyerje e Kushtetutës pavarësisht se kundër kujt drejtohet sot”, u tha senatorëve David Schoen, një prej avokatëve të ish-presidentit.

Ai denoncoi “dëshirën e pangopur për fajësim” midis demokratëve përpara se të transmetonte videon e tij, e cila kombinonte klipe të ligjvënësve të ndryshëm demokratë që kërkonin që shkarkimin e ish-presidentit Trump të kthehej që nga viti 2017.

PAK GJASA PËR SHPALLJE FAJTOR

Ndaj zotit Trump u ngritën akuza nga Dhoma e Përfaqësuesve e udhëhequr nga Demokratët më 13 Janar me akuzën e nxitjes së rebelimit, megjithëse nuk ka shumë gjasa që ai të shpallet fajtor.

Që ai të shpallet fajtor, duhet që një shumicë prej dy të tretave të anëtarëve të Senatit të votojnë për një gjë të tillë, çka do të thotë se të paktën 17 republikanë duhet të bashkohen me 48 demokratët e Senatit dhe dy të pavarur për të votuar kundër zotit Trump, i cili mbetet figura më e fuqishme e partisë së tij edhe pasi nuk është më në detyrë.

Zoti Trump është i vetmi president që gjykohet nga Senati pas largimit nga detyra dhe i vetmi ndaj të cilit ngrihen dy herë akuza nga Dhoma e Përfaqësuesve. Ai është vetëm presidenti i tretë në historinë e Shteteve të Bashkuara ndaj të cilit ngrihen akuza nga Dhoma e Përfaqësuesve.

Gjyqi u zhvillua nën masa të jashtëzakonshme sigurie rreth Kapitolit përfshirë forca të armatosura të sigurisë dhe një perimetër rrethimi dhe tela me gjemba.

Avokatët e zotit Trump argumentuan se ai po ushtronte të drejtën e tij për lirinë e shprehjes sipas Amendamentit të Parë të Kushtetutës kur iu drejtua mbështetësve para sulmit në Kapitol.

Bruce Castor, një nga avokatët e ish-presidentit Trump tha se sulmet ndaj Kapitolit “duhet të denoncohen fuqishëm”, por argumentuan se “një grup i vogël kriminelësh” ishin përgjegjës për dhunën, jo zoti Trump.Shumica e ekspertëve ligjorë kanë thënë se është kushtetuese të bëhet një gjyq pasi një zyrtar të ketë lënë detyrën.

“Presidentët nuk mund të ndezin një rebelim në javët e tyre të fundit në detyrë dhe pastaj të largohen sikur nuk ka ndodhur asgjë. Por ish-presidenti Trump po ju kërkon pikërisht që të miratoni një gjë të tillë”, u tha senatorëve anëtari demokrat i Dhomës së Përfaqësuesve, Joe Neguse.

Shumica e senatorëve në gjyq ishin të pranishëm në Kapitol më 6 Janar, kur shumë ligjvënës thanë se kishin frikë për sigurinë e tyre.

Senatori Republikan Bill Cassidy i quajti fjalimet e demokratëve “një hapje shumë të mirë”. Ai u bashkua me pesë kolegë të tij republikanë për të votuar pro kushtetueshmërisë së gjyqit, duke e ndryshuar votën e tij nga muaji i kaluar.

“Argumentet që ata dhanë ishin argumente të forta,” tha zoti Cassidy.

Gjyqi mund të sinjalizojë se çfarë drejtimi do të ndjekë Partia Republikane pas presidencës së trazuar katërvjeçare të zotit Trump. Ndasi të thella janë shfaqur mes besnikëve të ish-presidentit dhe atyre që shpresojnë ta orientojnë partinë në një drejtim të ri. Demokratët nga ana e tyre janë të shqetësuar se gjyqi mund të pengojë aftësinë e zotit Biden për të përparuar me shpejtësi me një program ambicioz legjislativ.

Një vit më parë, Senati i kontrolluar nga republikanët e atëhershëm i hodhi poshtë akuzat ndaj zotit Trump se kishte penguar Kongresin dhe kishte abuzuar me pushtetin, kur kishte bërë presion ndaj Ukrainës për të ndërmarrë një hetim ndaj zotit Biden dhe djalit të tij Hunter në vitin 2019. VOA

Gjyqi historik ndaj ish-Presidentit Trump

Ushtarët e Gardës Kombëtare duke ruajtur perimetrin e godinës së Kongresit

Sot nis në Senatin amerikan gjyqi i dytë historik ndaj ish-Presidentit Donald Trump. Ai akuzohet për nxitje të rebelimit një muaj më parë duke u kërkuar mbështetësve të tij të përballen me ligjvënësit në Kapitol ndërsa ata po çertifikonin fitoren e demokratit Joe Biden në zgjedhjet e nëntorit 2020.

Protesta u kthye në një përplasje të dhunshme. Rreth 800 mbështetës të zotit Trump sulmuan autoritetet e Kapitolit, thyen dyer e dritare, plaçkitën disa zyra të Kongresit dhe u përleshën me policinë. Si pasojë pesë persona mbetën të vdekur, mes tyre një oficer i policisë së Kapitolit, si dhe një protestuese e cila u qëllua nga një oficer policie.

100 senatorë, 50 për secilën palë, të cilët do të shërbejnë si anëtarë të jurisë gjatë procesit gjyqësor në Senat, ndodhen në një pozicion të pazakontë. Shumë prej tyre ishin dëshmitarë të kaosit të 6 janarit, ditë gjatë së cilës u detyruan të largohen nga kjo dhomë e Kongresit për arsye sigurie.

Që ish-presidenti të shpallet fajtor mbi akuzën e ngritur do të duheshin votat e dy të tretës së anëtarëve të Kongresit, ose demokratëve do t’u nevojiteshin votat e 17 republikanëve duke e marrë të mirëqenë që të 50 senatorët demokratë do të votojnë për shpalljen e tij fajtor. Në këto kushte, është pothuajse e garantuar që Senati do të votojë për lirimin nga akuza të ish-Presidentit Trump, ashtu sikundër një vit më parë kur ai u akuzua se i kishte bërë presion presidentit të Ukrainës që të siguronte informacione dëmtuese kundër zotit Biden, përpara zgjedhjeve të nëntorit të kaluar.

Presidenti Trump gjatë tubimit të organizuar kundër certifikimit të zgjedhjeve (Uashington, 6 janar 2021)

Por pavarësisht rezultatit zoti Trump do të jetë i vetmi president në historinë më shumë se dy shekullore amerikane ndaj të cilit janë ngritur dy herë akuza për shkarkimin nga Senati.

Një javë pas sulmit në Kapitol, Dhoma e Përfaqësuesve votoi me 232 vta pro dhe 197 kundër, për ngritjen zyrtarisht të akuzës ndaj zoti Trump. 10 republikanë iu bashkuan të 222 demokratëve, duke akuzuar zotin Trump për “nxitje rebelimi”.

Me përfundimin e mandatit të tij, më 20 janar, ditë kur u inaugurua Presidenti i ri i vendit Joe Biden, zoti Trump u nis drejt Floridës.

Ish-Presidenti ka refuzuar një kërkesë të demokratëve për të dëshmuar në gjyqin kundër tij në Senat dhe nuk pritet të marrë pjesë në të. Gjyqi mund të zgjasë një javë ose më shumë.

Prokurorët e Dhomës së Përfaqësuesve duke sjellur akuzat ndaj ish-Presidentit Trump

Nëntë ligjvënës të Dhomës së Përfaqësuesve të cilët do të shërbejnë si prokurorë të çështjes, thonë se zoti Trump, falë nxitjes së mbështetësve për për të msyrë drejt Kapitolit për të kundërshtuar humbjen e tij në zgjedhje, është “i vetmi përgjegjës” për trazirat që pasuan.

Zoti Trump u kërkoi mbështetësve të vinin në Uashington më 6 janar, duke folur rreth një zhvillimi që e përkufizoi si “të papranueshëm”. Në një tubim pranë Shtëpisë së Bardhë pak përpara se mbështetësit e tij të niseshin drejt Kapitolit, zoti Trump vazhdoi me breshërinë e pretendimeve të tij të pabazuara, të hedhura për javë të tëra për manipulim të zgjedhjeve që, sipas tij, i kushtuan atij mandatin e dytë në Shtëpinë e Bardhë.

Gjatë fjalimit të tij që zgjati më shumë se një orë, zoti Trump u tha mbështetësve “që në mënyrë paqësore e patriotike të bëjnë që zërat e tyre të dëgjohen” duke marshuar drejt Kapitolit.

Por ai gjithashtu i inkurajoi ata duke u thënë: “Vendi ynë ka duruar boll. Ne nuk do ta durojmë më dhe e gjitha kjo është për këtë qëllim. Dhe për të përdorur një term të preferuar për të gjithë ju, ne do ta ndalim vjedhjen”.

“Ne do të luftojmë”, shtoi ai. “Ne do të luftojmë me çdo kusht dhe nëse nuk luftojmë kështu, nuk do të kemi më shtet”, tha zoti Trump.

Në një argumentim ligjor të çështjes përpara gjyqit në Senat, prokurorët e çështjes thanë se: “Përgjegjësia e Presidentit Trump për ngjarjet e 6 janarit është e qartë” dhe se “sjellja e tij duhet të deklarohet e papranueshme në mënyrë të qartë e pa mëdyshje”, edhe pse ai nuk është më në detyrë.

Kushtetuta e Shteteve të Bashkuara mundëson heqjen e zyrtarëve të gjetur fajtorë për “krime dhe shkelje të rënda”. David Schoen dhe Bruce Castor, dy avokatët me eksperiencë që do të përfaqësojnë zotin Trump, argumentojnë se duke qenë se ai nuk është më president, ai nuk mund të hiqet nga detyra dhe se gjyqi ndaj tij është anti-kushtetues.

Sidoqoftë, Senati ka zhvilluar në të kaluarën gjyqe për ish-zyrtarë, duke mos u lejuar të shmangin një gjyq për shkelje të mundshme nëpërmjet dorëheqjes, siç ndodhi në një rast të vitit 1876, ose në rastin e zotit Trump, që la detyrën sepse i kishte mbaruar mandati. Për më tepër, prokurorët e Dhomës së Përfaqësuesve argumentojnë se zoti Trump nxiti trazirat dhe u akuzua nga Dhoma e Përfaqësuesve ndërsa ishte ende në detyrë.

Senatori Rand Paul i shtetit Kentaki, një mbështetës i vendosur i zotit Trump, u përpoq të bllokonte gjyqin për arsye të tilla kushtetuese, por pesë republikanë u bashkuan me të 50 senatorët demokratë në votimin 55 me 45 për ta vazhduar procesin. Por votimi gjithashtu sinjalizoi se mbështetja republikane për pafajësinë e zotit Trump mbetet e konsiderueshme, e mjaftueshme për të bllokuar shpalljen e tij fajtor.

Senatori Paul thotë se ekzistojnë “zero shanse për dënimin e tij”. Nëse zoti Trump do të shpallej fajtor, Senati, me një shumicë të thjeshtë votash, mund t’i ndalonte atij mbajtjen e funksioneve publike në të ardhmen.

Mbështetësit e ish-Presidentit Trump duke u konfrontuar me oficerët e policisë së Kapitolit brenda mjediseve të Senatit (Uashington, 6 janar 2021)

Sot, avokatët e zotit Trump dhe anëtarët e Dhomës së Përfaqësuesve që shërbejnë sërish si prokurorë, pritet të debatojnë për kushtetueshmërinë e zhvillimit të gjyqit. Nëse Senati vendos që procesi të vazhdojë, prokurorët e Dhomës së Përfaqësuesve do të fillojnë të paraqesin argumentet e tyre të mërkurën, ndoshta duke shfaqur disa nga xhirimet e marra gjatë orëve të trazirave.

Në vazhdim, avokatët e presidentit do të përgjigjen me mbrojtjen e tij. Sipas një marrëveshjeje të njoftuar të hënën nga udhëheqësit e kongresit, secila palë do të ketë 16 orë përgjatë dy ditëve për të paraqitur argumentet.

Avokatët e zotit Trump kanë ngritur një mbrojtje të fuqishme dhe pretendojnë se ish-presidenti nuk mban asnjë përgjegjësi për atë që ndodhi më 6 janar.

Në një material përmbledhës të paraqitur të hënën, ata pretenduan se çështja kundër tij është një “teatër politik” i demokratëve anti-Trump. Avokatët e zotit Trump sugjeruan se ai thjesht po ushtronte të drejtën e tij të garantuar në kushtetutë për fjalën e lirë, kur ai kundërshtoi rezultatet e zgjedhjeve dhe thanë se ai inkurajoi qartazi mbështetësit e tij për t’u angazhuar në një protestë paqësore.

“Përkundrazi, kjo ishte vetëm një përpjekje egoiste e udhëheqjes demokrate në Dhomën e Përfaqësuesve për të shfrytëzuar ndjenjat e tmerrit dhe konfuzionit që përfshinë të gjithë amerikanët nga mbarë spektri politik, kur panë shkatërrimin në Kapitol më 6 janar nga disa qindra persona”, shkruajnë avokatët. “Në vend që të veprojnë për të shëruar kombin, ose të paktën duke u përqëndruar në ndjekjen penale të shkelësve të ligjit që sulmuan Kapitolin, Kryetarja e Dhomës së Përfaqësuesve (Nancy Pelosi) dhe aleatët e saj janë përpjekur të përdorin kaosin e momentit për përfitim politik”, shkruajnë ata.

Në përgjigje, demokratët e Dhomës së Përfaqësuesve që shërbejnë si prokurorë thanë se, “Ne jetojmë në një vend të qeverisur nga shteti ligjor, dhe jo nga dhuna e turmës e nxitur nga presidentë që nuk pranojnë dot humbjen në zgjedhje”.

“Provat për sjelljen e Presidentit Trump janë të shumta”, shkruajnë ata. “Ai nuk ka asnjë justifikim ose mbrojtje të vlefshme për veprimet e tij. Dhe përpjekjet e tij për t’i shpëtuar përgjegjësisë janë krejtësisht të kota. Siç thuhet në akuzë, Presidenti Trump shkeli betimin e detyrës së tij dhe tradhtoi popullin amerikan”, shkruajnë prokurorët.

Ja çfarë tha ish-Presidenti Trump më 6 janar

Ish-Presidenti Donald Trump, ndaj të cilit është ngritur akuza se ka nxitur rebelim duke rezultuar në sulmin e dhunshëm në Kapitol më 6 janar, do të gjykohet nga Senati duke filluar nga e marta.

Më 6 janar ish-presidenti doli para përkrahësve, para se ata të niseshin drejt Kapitolit ku ligjvënësit po certifikonin rezultatin e zgjedhjeve. Ja disa pasazhe nga komentet e tij atë ditë.

— “Të gjithë ne këtu sot nuk duam që fitorja jonë në zgjedhje të vidhet nga demokratë të së majtës radikale që kanë marrë hov. Atë po bëjnë, po vjedhin së bashku me median e rreme. Atë kanë bërë dhe atë po bëjnë. Nuk do të pushojmë kurrë. Nuk do të pranojmë kurrë humbjen. Nuk pranohet humbja kur ka vjedhje votash”.

— “Vendi është ngopur. Nuk do të durojmë më. Po përdor një frazë të preferuar, të krijuar nga vetë ju: ne do të ndalim vjedhjen”.

— “Pas kësaj do të ecim drejt Kapitolit. Do të jem edhe unë me ju. Do të shkojmë. Do të brohorasim për senatorët, ligjvënësit e guximshëm. Ndoshta nuk do të na duhet të brohorasim shumë për disa prej tyre, pasi kurrë nuk mund ta marrësh nën kontroll vendin kur je i dobët. Duhet të tregosh forcë, të jesh i fortë”.

— “Kemi ardhur për t’i kërkuar Kongresit të bëjë atë që duhet dhe të numërojë vetëm elektorët nga zgjedhje të zhvilluara në mënyrë të ligjshme. E di se të gjithë ju këtu do të marshoni drejt Kapitolit në mënyrë paqësore, patriotike dhe të thoni fjalën tuaj”.

— “Do të luftojmë. Do të luftojmë si dreqi. Nuk do të keni më atdhe nëse nuk luftoni fort”.

— “Do të ecim nëpër Bulevardin Pensilvania. Sa më pëlqen Bulevardi Pensilvania! Do të shkojmë tek Kapitoli, do të përpiqemi të ndihmojmë ligjvënësit republikanë, ata të dobëtit sepse të fortët nuk kanë nevojë për ndihmën tonë. Do të përpiqemi t’u japim atë krenari dhe guxim që u duhet për të marrë përsëri vendin”.

Më 13 janar Dhoma e Përfaqësuesve ngriti akuza kundër zotit Trump. Dy javë pas trazirave, mandati Presidentit Trump përfundoi. Ai u largua drejt rezidencës së tij në brigjet e oqeanit Atlantik në Florida.

SHBA, Kongresi shqyrton masa për lirinë globale të shtypit

Ligjvënësit amerikanë propozuan këtë muaj dy projektligje mbi lirinë e shtypit dhe mbrojtjen e gazetarëve në botë.

Projektligji për Lirinë Globale të Shtypit lindi si përpjekje dypartiake nga Senatori demokrat Brian Schatz dhe republikani Todd Young për të krijuar një post në rang ambasadori për lirinë e shtypit dhe për të trajnuar zyrtarët diplomatikë amerikanë për të nxitur pavarësinë e medias dhe për të mbrojtur gazetarët e huaj.

Ndërkaq, Projektligji Jamal Khashoggi për Përgjegjësi mbi Lirinë e Shtypit i propozuar nga Senatorja Amy Klobuchar dhe ligjvënësi Adam Schiff u pagëzua në nder të gazetarit të vrarë Khashoggi, i cili punonte për të përditshmen amerikane Washington Post. Ky projektligj synon të mbajë përgjegjës ata që shënjestrojnë gazetarët.

“Projekligji ynë i ri rithekson angazhimin tonë për një media të lirë në SHBA dhe jashtë vendit, duke i dhënë autoritetin Departamentit të Shtetit të angazhohet në shkallë globale në këto çështje në mënyrë diplomatike,” tha javën e kaluar përmes një deklarate zoti Schatz, i cili kohët e fundit iu bashkua Komisionit të Senatit për Marrëdhënie me Jashtë.

Projektligji u përshëndet me entuziazëm nga aktivistët për lirinë e shtypit.

“Kur i mbyllet goja shtypit, korrupsioni, dhuna, pabarazia dhe abuzimi i autoritetit mund të shpëtojnë pa u diktuar,” tha sekretari i përgjithshëm i organizatës Gazetarët Pa Kufinj, Christophe Deloire. “Projektligji do të krijonte burime shtesë për qeverinë amerikane për të garantuar se zyrtarët qeveritarë punojnë për të krijuar një mjedis të sigurtë për gazetarët dhe për nxitjen e lirisë së shtypit në vende që ndjekin politika armiqësore ndaj gazetarëve”.

Annie Boyajian me Freedom House, tha se organizata e saj është “krenare që mbështet Ligjin për Lirinë Globale të Shtypit”.

“Me emërimin e një emisari për lirinë e shtypit do të krijohej vizibilitet për këtë çështje dhe do të krijohej një epiqendër për këtë përpjekje në Departamentin e Shtetit,” tha zonja Boyajian.

10 vjet më parë, Kongresi miratoi një ligj të ngjashëm. Ligji Daniel Pearl për Lirinë e Shtypit, i pagëzuar në kujtim të gazetarit të Wall Street Journal, i cili u rrëmbye dhe u ekzekutua nga ekstremistët në Pakistan në 2002, kërkon nga Departamenti i Shtetit të hartojë raporte me të dhëna mbi kufizimet mbi lirinë e shtypit, të cilat përfshihen në analizën vjetore të gjendjes së të drejtave të njeriut.

Në fjalimin e tij të parë mbi politikën e jashtme, Presidenti Joe Biden tha se “një shtyp i lirë është jetik për mirëqënien e një demokracie”. Në 2020, SHBA u renditën në vend të 45 nga 180 vende në Indeksin Global të Lirisë së Shtypit të përpiluar nga Gazetarët Pa Kufij.

Republikanët e shtetit Uajoming dënojnë ligjvënësen Liz Cheney

Partia Republikane e shtetit Wyoming votoi me shumicë dërrmuese të shtunën për të dënuar ligjvënësen Liz Cheney për votimin pro ngritjes zyrtarisht të akuzës ndaj ish-Presidentin Donald Trump lidhur me rolin e tij në trazirat e 6 janarit në Kapitol.

Vetëm tetë nga 74 anëtarët e komitetit republikan votuan kundër.

“Ne kemi nevojë të respektojmë Presidentin Trump. Gjithçka që bëri Presidenti Trump ishte thirrja për një grumbullim paqësore dhe protestë për një zgjedhje të drejta e që do t’i nënshtroheshin një procesi shqyrtimi“, tha Darin Smith, i cili humbi përballë zonjës Cheney në garën mes republikanëve në vitin 2016 për një vend në Dhomën e Përfaqësuesve. “Partia Republikane duhet t’i bëjë asaj një paralajmërim”.

Në një deklaratë pas votimit zonja Cheney tha se ajo mbetet e nderuar të përfaqësojë Wyoming dhe se do të luftojë gjithmonë për çështje që kanë më shumë rëndësi për shtetin.

“Më kryesorja mes tyre është mbrojtja e Kushtetutës sonë dhe lirive që ajo garanton. Vota ime për ngritjen e akuzës u detyrua nga betimi që kam bërë përpara Kushtetutës“, tha ajo.

Zonja Cheney do të vazhdojë të mbetet numri tre i republikanëve të Dhomës së Përfaqësuesve, pas një votimi 145-61 të mërkurën.

Merkel dënon dëbimin “e pajustifikuar” të diplomatëve gjermanë nga Moska

Kancelarja Angela Merkel dënoi të premten dëbimin nga Rusia të diplomatëve gjermanë si një largim i mëtejshëm i Moskës nga shteti i së drejtës.

Rusia njoftoi dëbimin e diplomatëve nga Suedia, Gjermania dhe Polonia, duke i akuzuar ata për pjesëmarrje në protesta të paligjshme muajin e kaluar kundër burgosjes së kritikut të Kremlinit Alexei Navalny.

“Ne e konsiderojmë këtë dëbim të padrejtë,” u tha kancelarja Merkel gazetarëve pas një video-konference mbi çështjet e mbrojtjes dhe sigurisë me Presidentin francez Emmanuel Macron, duke shtuar se të dy kishin marrë njoftime për dëbimet e diplomatëve gjatë takimit.

Kancelarja Merkel gjithashtu tha se Gjermania ishte gati të vazhdonte sanksionet ndaj Rusisë, përfshirë edhe kundër individëve të caktuar, por tha se ishte një “detyrë diplomatike” të mbante të hapura kanalet e komunikimit me fqinjin e madh lindor të Evropës.

Ajo u tha gazetarëve se Gjermania do të mbante “për momentin” të njëjtin pozicion të sajin në favor të gazsjellësit Nord Stream 2, që kundërshtohet nga Shtetet e Bashkuara dhe pjesa më e madhe e Evropës.

Projekti, i ndërtuar për të shtuar furnizimet e gazit rus në Evropë dhe për të anashkaluar Ukrainën, ka hasur në kundërshti nga Uashingtoni, i cili dëshiron të shesë gazin e tij në Bashkimin Evropian dhe të pakësojë mbështetjen e rajonit në furnizimet e energjisë nga Moska.

Ligjvënësit e Bashkimit Evropian miratuan një rezolutë në janar duke bërë thirrje që blloku të ndalojë përfundimin e gazësjellësit Nord Stream 2 në përgjigje të arrestimit të kritikut të Kremlinit Alexei Navalny.

Gjermania në të kaluarën ka thënë se nuk ka “asnjë lidhje të drejtpërdrejtë mes çështjes Navalny dhe projektit Nord Stream 2”.

Ndërtimi i gazsjellësit midis Vyborgut të Rusisë dhe Lubminit të Gjermanisë, i cili do të dyfishonte kapacitetin e linjës ekzistuese Nord Stream nga Rusia në Gjermani, u pezullua në dhjetor 2019 pas një kërcënimi të sanksioneve amerikane dhe tërheqjes së kompanisë ndërtuese, Allseas.

Për administratën e re amerikane të Presidentit Joe Biden, Merkel tha se “fokusi i saj i menjëhershëm” do të ishte Rusia, Kina dhe “pozicioni ndaj partneritetit transatlantik për këto sfida”.

Kancelarja gjermane gjithashtu mbrojti edhe një herë mënyrën se si evropianët bënë blerjen e vaksinave COVID-19.

“Vendimi për të porositur vaksina së bashku siç është Bashkimi Evropian ishte i drejtë,” tha ajo ndërsa pranoi se kapacitetet prodhuese të Evropës “nuk janë aq të mëdha sa e kishim menduar”. VOA

Presidenti Biden thotë se paraardhësi i tij Trump nuk duhet të marrë informacione zbulimi

Marrë nga Reuters

Presidenti i Shteteve të Bashkuara, Joe Biden nuk beson se paraardhësi i tij Donald Trump duhet të ketë qasje në informacionet e zbulimit për shkak të “sjelljes së tij të çorientuar” dhe shqetësimit se ai mund t’ua japë atë informacion të tjerëve, tha zoti Biden në një intervistë të premten.

“Mendoj se jo”, tha zoti Biden kur u pyet nga drejtuesja e emisionit CBS Evening News, Norah O’Donnell nëse ish-presidenti republikan Trump, duhet t’i merrte informimet e zbulimit.

Ish-presidentët amerikanë tradicionalisht kanë marrë disa informacione zbulimi edhe pasi kanë lënë detyrën.

Ish-presidenti Trump e denigronte shpesh komunitetin e zbulimit dhe nuk preferonte raportime të gjata për zbulimin gjatë mandatit të tij në Shtëpinë e Bardhë. Ai kishte vënë gjithashtu në pikëpyetje përfundimet e zbulimit amerikan sipas së cilave Rusia kishte ndërhyrë në zgjedhjet e vitit 2016.

Zoti Biden tha se pikëpamja e tij se Trump nuk duhet të merrte njoftimet e zbulimit nuk ishte e lidhur me trazirat e Kapitolit.

“Për shkak të sjelljes së tij të çorientuar, pa lidhje me rebelimin”, tha zoti Biden, duke shpjeguar arsyetimin e tij.

I pyetur se cili do të ishte shqetësimi i tij më i madh nëse zoti Trump do të merrte informacion të tillë të klasifikuar sekret, zoti Biden nuk pranoi të hynte në hollësi.

“Do të preferoja të mos spekuloja me zë të lartë. Thjesht mendoj se nuk ka nevojë që ai të ketë informacione të tilla. Çfarë vlere ka t’i japësh atij një përmbledhje informacioni zbulimi? Çfarë ndikimi ka ai, përveç faktit se mund t’i rrëshqasë goja dhe të thotë diçka?”, tha presidenti Biden.

Shtëpia e Bardhë kishte thënë më parë se çështja ishte nën shqyrtim.

Për muaj me radhë pas zgjedhjeve, zoti Trump sfidoi rezultatin e tyre me ankesa në gjykata dhe duke bërë akuza të pabazuara për mashtrim të përhapur me votimet. Ai nuk mori pjesë në inaugurimin e zotit Biden më 20 janar, ku ishin të pranishëm ish-presidentë të tjerë të Shteteve të Bashkuara, duke zgjedhur të udhëtojë në Florida, ku është vendosur pas presidencës. VOA

Ekipi ligjor i ish-presidentit Trump në kaos, disa ditë para gjyqit në Senat

VOA

Ndërsa ka mbetur pak më shumë se një javë para fillimit të gjyqit të dytë në Senat për ish-Presidentin e Shteteve të Bashkuara, Donald Trump, ekipi i tij ligjor duket të jetë në kaos.

Dy avokatë me emër nga Karolina e Jugut, Butch Bowers dhe Deborah Barbier, pritej të ishin avokatët kryesorë të zotit Trump. Por media njoftonte të shtunën se të dyja palët kishin rënë dakord të mos punonin bashkë.

Përveç kësaj, tre avokatë të tjerë që njoftohet se kanë punuar me ish-presidentin nuk janë më pjesë e ekipit ligjor të tij, sipas një informacioni të njoftuar fillimisht nga CNN.

Sipas njoftimeve, zoti Trump dhe avokatët kishin mosmarrëveshje lidhur me strategjinë ligjore të përshtatshme për gjyqin e 9 shkurtit.

Ish-presidenti po përballet me akuzën e “nxitjes së rebelimit” në lidhje me turmën që sulmoi Kapitolin më 6 janar. Ai ka afat deri të martën që t’u përgjigjet këtyre akuzave.

Sipas burimeve të mediave, zoti Trump, do që avokatët të përqendrohen tek ideja e provuar si e pavërtetë se ai humbi zgjedhjet presidenciale ndaj Joe Biden-it, sepse ishte viktimë e mashtrimit të gjerë në zgjedhje, në vend që të përqëndrohet tek akuzat për nxitjen e rebelimit.

Analistët thonë se gjasat janë që akuzat e Dhomës së Përfaqësuesve ndaj ish-presidentit të rrëzohen, pasi 45 senatorë republikanë votuan në një përpjekje për ta konsideruar gjykimin e ardhshëm si antikushtetues meqë ish-presidenti nuk është më në detyrë.

Trump është presidenti i parë amerikan mbi të cilin janë ngritur dy here akuza për shkarkim. Ai u shpall i pafajshëm nga Senati një vit më parë lidhur me akuzat për abuzim pushteti dhe se kishte penguar drejtësinë.

Trashëgimtarja e Supermarketeve PUBLIX dhuroi para për tubimin e 6 janarit

Një trashëgimtare e supermarketeve Publix dhuroi rreth 300,000 dollarë për të financuar një tubim që i parapriu sulmit vdekjeprurës në Kapitol më 6 janar nga mbështetësit e ish-Presidentit Donald Trump, njoftoi të shtunën gazeta Wall Street Journal.

Gazeta tha se financimi nga Julie Jenkins Fancelli, donatore e njohur e fushatës së zotit Trump në vitin 2020, u bë i mundur nga moderatori i djathtë televiziv, Alex Jones. Sipas gazetës, paratë e saj u përdorën për të paguar pjesën më të madhe të tubimit në parkun Ellipse ku zoti Trump mbajti fjalim dhe u kërkoi mbështetësve të tij “të luftonin”. Krejt tubimi kushtoi rreth 500,000 dollarë.

Më shumë se 135 njerëz janë arrestuar në lidhje me sulmin e 6 janarit, në kohën kur Kongresi ishte mbledhur për të çertifikuar fitoren e demokratit Joe Biden në zgjedhjet e nëntorit. Pesë persona, përfshirë një polic të Kapitolit, humbën jetën.

Sipas gazetës, Alex Jones personalisht premtoi më shumë se 50,000 dollarë për tubimin, në këmbim të mundësisë për të folur aty. Jones, i cili ka publikuar teori komploti tashmë të diskredituara, ka intervistuar në emisionet e tij të njohura në TV dhe radio udhëheqësit e dy grupeve ekstremiste, Proud Boys dhe Oath Keepers, të cilat luajtën rol kryesor në trazirat e asaj dite.

Në një postim në Twitter, Supermarketet Publix shkruanin se dhuna në Kapitol më 6 janar ishte një tragjedi kombëtare. “Veprimet e mjerueshme që ndodhën atë ditë nuk përfaqësojnë vlerat, punën ose mendimet e Supermarketeve Publix,” thuhej në deklaratë.

SHBA, paralajmërime për dhunë të motivuar nga politika

Departamenti i Sigurisë së Kombëtare (DHS) publikoi të mërkurën një raport mbi terrorizmin duke paralajmëruar rreth potencialit për dhunë të vazhdueshme nga njerëz të motivuar nga ndjenja anti-qeveritare pas zgjedhjes së Presidentit Joe Biden. Buletini sugjeron se trazirat e 6 janarit në Kapitol mund të inkurajojnë ekstremistët e të krijojnë kushte për sulme të reja.

Në raport nuk citohej ndonjë kërcënim specifik, por vihej në dukje “një mjedis kërcënues edhe më i madh në të gjithë Shtetet e Bashkuara” që sipas Departamentit amerikan të Sigurisë Kombëtare “do të vazhdojë” me marrjen e detyrës nga zoti Biden më 20 Janar.

“Informacioni sugjeron që disa ekstremistë të dhunshëm të motivuar ideologjikisht e që kundërshtojnë ushtrimin e autoritetit qeveritar dhe tranzicionin presidencial, apo për shkak të pakënaqësive të tjera të perceptuara, të nxitura nga histori të rreme, mund të vazhdojnë të mobilizohen për të nxitur ose kryer akte dhunë“, thuhej në raport.

Aty nuk përmendej ndonjë lidhje ideologjike ose politike, por paralajmërohej më gjerësisht për “individë të irrituar me ushtrimin e autoritetit qeveritar dhe tranzicionin presidencial, si dhe ankesa të tjera të perceptuara e shkaqe ideologjike të nxitura nga histori të rreme”.

Këta individë, thuhej në raportin e Departamentit të Sigurisë Kombëtare, “mund të vazhdojnë të mobilizojnë një gamë të gjerë aktorësh të motivuar ideologjikisht për të nxitur ose kryer dhunë”.

Nuk është e pazakontë që qeveria federale të paralajmërojë organet lokale të zbatimit të ligjit përmes publikimit të raporteve e këshillave mbi mundësinë e kryerjes së akteve të dhunës lidhur me një datë ose ngjarje të veçantë, siç është 4 korriku.

Por ky raport i veçantë, i lëshuar përmes Sistemit Kombëtar Këshillues për Terrorizmin të këtij departamenti, dallon sepse vendos efektivisht administratën e Presidentit Biden në mesin e një debati të ngarkuar politik mbi mënyrën se si përshkruhet apo karakterizohen aktet e motivuara nga ideologjia politike dhe sugjeron se e sheh dhunën që synon përmbysjen e rezultatit të zgjedhjeve të ngjashme me terrorizmin.

Dokumenti sugjeron se zyrtarët e sigurisë kombëtare shohin lidhje mes dhunës së vitit të kaluar, dhe dhunës së motivuar nga ndjenjat anti-qeveritare, qofshin këto kundër kufizimeve për pandeminë e COVID-19, rezultatet e zgjedhjeve apo përdorimin e forcës nga policia. Ai veçon akte dhune me motive racore si ato të vitit 2019 që kishin në shënjestër komunitetin hispanik në Teksas, si dhe kërcënimin e paraqitur nga ekstremistët e motivuar nga organizatat e huaja terroriste.

Alarmi vjen në një kohë të tensionuar pas protestës së dhunshme në Kapitol nga mbështetësit e ish-Presidentit Donald Trump të cilët po kërkojnë të përmbysnin rezultatin e zgjedhjeve presidenciale. Raporti i Departamentit të Sigurisë Kombëtare flet edhe për sulmet e dhunshme në “ditët e fundit”, një referencë e dukshme për ngjarjet në Portland të Oregonit, të lidhura me grupet anarkiste.

Alarmi u lëshua nga sekretari në detyrë i Departamentit të Sigurisë Kombëtare, David Pekoske. I emëruari i zotit Biden për këtë post, Alejandro Mayorkas, nuk është konfirmuar ende nga Senati.

Bill Gatesi cilëson si “marrëzi dhe ligësi” teoritë konspirative kundër tij

Bashkëthemeluesi i kompanisë Microsoft që më vonë u kthye në një filantrop, Bill Gates, thotë se është befasuar nga numri i teorive konspirative, që ai i quan“marrëzi” dhe “djallëzore”,të shpërndara në rrjete sociale gjatë pandemisë COVID-19. Në një intervistë për agjencinë e lajmeve Reuters, zoti Gates thotë se dëshiron të hulumtojë se çfarë qëndron pas tyre.

Filantropi Gates thotë se miliona postime në internet me teori të çmendura konspirative kundër tij dhe ekspertit kryesor të sëmundjeve infektive në SHBA, Anthony Fauci, vijnë si pasojë e një përzierje të një pandemie të frikshme virale dhe rritjes së rrjeteve sociale.

“Askush nuk do të parashikonte se unë dhe Dr. Fauci do të ishim figura kryesore të teorive djallëzore që thonë se ne kemi krijuar pandeminë ose se po mundohemi të përfitojmë nga ajo. Jam i befasuar dhe shpresoj të marrë fund”, thotë zoti Gates.

Bill Gates, miliarderi që u largua nga posti i drejtuesit të korporatës Microsoft më 2014, për t’u marrë mefondacionin e tij bamirës “Bill dhe Melinda Gates” ka dhuruar të paktën 1.75 miliardë dollarë në përgjigjen globale kundër COVID-19, për të mbështetur prodhuesit e vaksinave, diagnostikimin dhe trajtime të mundshme të koronavirusit.

Që para një viti kur filloi pandemia, miliona teori konspirative janë shpërndarë në internet, duke ushqyer keqinformimin rreth koronavirusit, origjinën e tij dhe motivin e atyre që punojnë për ta luftuar atë.

“Për këtë gjë duhet të kuptojmë se si ndikojnë këto teori në sjellet e njerëzve dhe si mund të zvogëlojmë këtë ndikim”, shton zoti Gates.

Ekzistojnë teori që thonë se Dr. Fauci dhe zoti Gates krijuan pandeminë për të kontrolluar njerëzit, se ata duan të përfitojnë nga përhapja e virusit dhe se përmes vaksinimit do të injektojnë mikroprocesorë për gjurmimin e njerëzve.

Gates i cili sot botoi letrën e tij vjetore me përparësitë dhe parashikimet për këtë vit, thotë se beson se banorët në vendet e zhvilluara do të shohin fundin e pandemisë dhe rikthimin në jetën normale në fund të këtij viti, në se 70-80% e banorëve do të vaksinohen. VOA

Shtëpia e Bardhë: SHBA me qasje të re ndaj Kinës

Shtëpia e Bardhë thotë se Uashingtoni po tregohet i matur ndërsa përpiqet për një “qasje të re” ndaj marrëdhënieve me Kinën në një kohë kur të dyja vendet janë në një “konkurrencë strategjike” serioze.

“Ajo që kemi parë gjatë viteve të fundit është se Kina po bëhet gjithnjë e më autoritare brenda vendit dhe më e ashpër jashtë vendit dhe Pekini tani po sfidon sigurinë, mirëqenien dhe vlerat tona në mënyra domethënëse, që kërkojnë një qasje të re nga Shtetet e Bashkuara“, tha zëdhënësja e Shtëpisë së Bardhë, Jen Psaki gjatë një konferencë për shtyp të hënën.

Disa orë më herët, Presidenti kinez Xi Jinping foli përmes videos në Forumin Ekonomik Botëror ku ai u kërkoi vendeve të bashkëpunojnë për ndryshimin e klimës dhe shëndetin publik – dhe paralajmëroi kundër një konflikti mes Uashingtonit dhe Pekinit pa përmendur me emër Shtetet e Bashkuara. Presidenti Xi tha se frenimi i koronavirusit është detyra më e ngutshme për komunitetin ndërkombëtar.

Mesazhi i Pekinit vjen ndërsa ekipi i politikës së jashtme të Presidentit amerikan Joe Biden përgatitet të mobilizojë aleatët për të përballuar sfida të ngutshme, duke filluar nga ruajtja e demokracisë deri tek shkallëzimi i rivalitetit me Kinën dhe shtetet e tjera autoritare.

“Një botë e ndarë nuk mund të trajtojë sfidat e përbashkëta me të cilat përballet njerëzimi dhe përplasja do ta çojë njerëzimin në një rrugë pa krye“, tha zoti Xi gjatë një fjalimi virtual në Forumin Ekonomik Botëror.

Marrëdhëniet midis dy ekonomive kryesore në botë janë në pikën më të ulët prej dekadash, për shkak të përplasjeve për tregtinë, teknologjinë 5G, të drejtat e njeriut dhe sigurinë rajonale. Uashingtoni akuzon Pekinin për një përpjekje shumëvjeçare për të vjedhur pronën intelektuale dhe përfshirje në spiunazh industrial. Të martën e kaluar, Sekretari i Shtetit i administratës së kaluar, Mike Pompeo deklaroi se Partia Komuniste Kineze është angazhuar në gjenocid kundër popullsisë myslimane ujgure. Ky përcaktim mund të sjellë si rezultat masa dhe sanksione të reja.

Ambasada kineze në Shtetet e Bashkuara tha në një deklaratë gjatë fundjavës tha se Pekini shpreson që Uashingtoni të “ketë një frymë kundër konfliktit dhe konfrontimit dhe në favor të respektit të ndërsjellë e bashkëpunimit të frytshëm”.

Ky apel ka të ngjarë të pritet me skepticizëm nga administrata e zotit Biden, e cila është shprehur hapur se si i shikon synimet e Kinës.

“Ne jemi në një konkurrencë serioze me Kinën,” tha zëdhënësja Psaki të hënën. “Kina është e angazhuar në politika që dëmtojnë punëtorët amerikanë, frenon avantazhin tonë teknologjik dhe kërcënon aleancat tona dhe ndikimin tonë në organizatat ndërkombëtare.”

Sekretari amerikan i Shtetit Antony Blinken dhe origjina familjare e tij

Administrata e ardhshme e Presidentit Biden do të jetë një nga më të larmishmet në historinë amerikane. Sekretari i Shtetit Antony Blinken për shembull, e ka origjinën me rrënjë në Rusi, Izrael dhe Evropë. Korrespondentja e Zërit të Amerikës Natalka Pisnya njofton.

Ky është një regjistër i të dhënave të origjinës në qytetin ukrainas Pereyaslav. Të dhënat për familjen Blinken janë regjistruar në vitin 1874: çifti Yankel dhe Rys kishin katër djem dhe dy vajza.

Djali i tyre i vogël Meyer, i cili më vonë emigroi në Amerikë, lindi në vitin 1879.

“Ata erdhën në Pereyaslav nga Zolotonosha, provincë e Kievit. Kur jetonin në Zolotonosha, mbiemri i tyre u bë Blinken. Meyer Blinkin, stërgjyshi i Antony Blinken, e shkruante mbiemrin e tij Blinkin, jo Blinken”.

Nadia Lipes, hulumtuese e gjenealogjisë, shpjegon për Zërin e Amerikës se Meyer Blinkin u vendos më pas në Kiev ku u martua me 20 vjeçaren Hanna-Mahle Turovskaya, vajza e një bujku. Në vitet 1900, familja e re Blinkin festoi lindjen e fëmijës së parë Moses – i cili eventualisht e ndryshoi emrin e tij në Maurice kur jetoi në Shtetet e Bashkuara.

“Gjyshi i Antony Blinken u quajt Moshe kur lindi – Moisi në rusisht. Ai lindi në Kiev”, thotë studiuesja Nadia Lipes për Zërin e Amerikës.

Tre fëmijë të tjerë lindën më vonë – Solomoni, Yakov-Girshel dhe Viktori. Në fillim të vitit 1904, familja Blinkin, bashkë me Moisiun, morën rrugën për në Amerikë përmes Hamburgut dhe Londrës. Në fund të gushtit të atij viti ata do të mbërrinin në qytetin e Nju Jorkut..

“Në fakt Meyer – siç shihet në të dhënat nga ishulli Ellis – u mor në pyetje. Nuk ishte për arsye shëndetësore. Dimë vetëm se ka një shenjë pranë emrit të tij, pra nuk e dime me saktësi arsyen, por ai u nxorr nga rradha e imigrantëve për tu marrë në pyetje”, shpjegon për Zërin e Amerikës Jackie Schalk, drejtore e Qendrës për Historinë e Imigracionit të Familjeve Amerikane.

Djemtë e Meyer-it u martuan dhe ndryshuan emrat e tyre. Solomoni u bë Sam, Moisiu fillimisht e ndryshoi emrin në Morris dhe më vonë në Maurice.

Maurice kishte dy djem. Njëri prej tyre, Donald Mayer Blinken, u bë ambasador i SHBA-ve në Hungari dhe gjithashtu ishte babai i Antony Blinken.

Pas një divorci, Sekretari i ardhshëm i Shtetit do të rritej në Paris nga nëna e tij Judith dhe njerku Samuel Pisar – një shkrimtar, avokat dhe një i mbijetuar i Holokaustit. Antony Blinken flet rrjedhshëm frëngjisht dhe luan kitarë.

Dhe si shumë amerikanë, Blinken ka shumë të afërm të largët, si në Shtetet e Bashkuara edhe jashtë tyre, në vende si Rusia, Izraeli dhe Evropa.

Biden: Unë mendoj se impeachment duhet të bëhet

VOAL – “Unë mendoj se duhet të bëhet”: kështu për herë të parë Joe Biden komentoi gjyqin për fajësimin e Donald Trump në Senat. Duke folur në CNN, Biden pranoi se kjo mund të vonojë zbatimin e axhendës së tij dhe konfirmimin e anëtarëve të kabinetit të tij në Senat. Por ai shtoi se “do të kishte qenë më keq nëse kjo nuk do të kishte ndodhur”.

Ndërkohë, artikulli në lidhje me fajësimin e Trump, dërguar nga kryetarja e Dhomës, Nancy Pelosi, mbërriti të hënën në Senat ku deputeti Jamie Raskin, i cili drejton akuzën, e lexoi atë.

Ish presidenti akuzohet për “nxitje të kryengritjes” për ngjarjet dramatike të sulmit në Kongres në 6 janar dhe përcaktohet si “një kërcënim për demokracinë”. Gjyqi do të fillojë më 8 shkurt. ATS-eb

Dr. Jill Biden dhe roli i saj si Zonjë e Parë e SHBA

Jill Biden, bashkëshortja e Presidentit Joe Biden, e ka bërë të qartë se politikat arsimore do të jetë përparësi për të në rolin e saj si Zonjë e Parë e Shteteve të Bashkuara. Ajo e ka të freskët jetën e Uashingtonit, pasi bashkëshorti i saj ka shërbyer për 36 vite në Senat dhe tetë vjet si Nënpresident nën administratën e ish-presidentit Obama. Korrespondentet e Zërit të Amerikës Esha Sarai dhe Carolyn Presutti na sjellin më shumë hollësi me këtë profil të Jill Biden-it.

Jill Biden, është e para Zonjë e Parë amerikane që mban gradën “doktor i shkencave”.

Pas më pak se një jave nga inaugurimi i bashkëshortit të saj, zonja Biden zhvilloi një aktivitet nëpërmjet internetit me ekspertë të arsimit, duke e bërë të qartë se sfidat me të cilat përballen mësuesit, do të jenë përparësi për të.

“Aktualisht të gjithë jemi duke u përballur me shumë sfida dhe ju më shumë se kushdo tjetër. Por ky është momenti ynë, sepse ne dimë ta shndërrojmë kaosin në diçka të bukur sepse e bëjmë çdo ditë në klasat tona”, thotë Jill Biden, Zonja e Parë e SHBA.

Historia e gjatë e zonjës Biden në arsim pritet të udhëheqë punën e saj si Zonjë e Parë.

“Pres që ajo të jetë shumë aktive në sugjerimin e reformave specifike në sistemin arsimor, por jo të gjithë pajtohen. Shumë njerëz do të donin një Zonjë të Parë që të mos fliste e ta shihnin atë vetëm të veshur bukur. Unë nuk mendoj ashtu, kjo është një platformë e fuqishme”, thotë Betty Boyd Caroli, autore e librit “Zonjat e Para”.

Kur bashkëshorti i saj mori detyrën e Nënpresidentit të SHBA-së, Jill Biden u bë e para Zonjë e Dytë që kishte një punë me pagë jashtë Shtëpisë së Bardhë. Ajo do të vazhdojë të japë lënden e anglishtes në Kolegjin “Northern Virginia ” megjithëse është Zonjë e Parë.

“E di se sa e vështirë është. Po jap mësim vetë në distancë këtë semestër“, thotë Jill Biden, Zonja e Parë.

Gjatë një ceremonie diplomimi në kolegjin e saj, ajo tregoi historinë e një studenti që u fut me vrap në klasën dhe i tha…

“Dr. B, të pashë mbrëmë në televizor me Michelle Obama-n. Thirra mamin dhe i thashë: Mami, kjo është mësuesja ime e anglishtes. Por ajo më tha: Kjo nuk është mësuesja jote, kjo është Zonja e Dytë”, tregon Jill Biden, aso kohe bashkëshortja e kandidatit për president Joe Biden.

Jeta me Joe Biden-in ishte e ndërlikuar fillimisht. Ajo ndodhej në proces divorci ndërsa ai po rriste i vetëm dy djem mes pikëllimit të humbjes së bashkëshortes dhe vajzës së tij së vogël në një aksident me makinë.

Jill dhe Joe u martuan, pasi Joe ia kërkoi këtë gjë pesë herë.

“Herën e pestë, më në fund i thashë: Jill, tashmë po flet krenaria ime prej irlandezi. Kjo është hera e fundit që të pyes. I thashë: Nuk ke pse të më thuash se kur do të martohemi, vetëm nesë do të martohemi…dhe ajo tha: po“, thotë Joe Biden.

Katër vjet më vonë, Jill solli në jetë një vajzë. Por tragjedia do të godiste sërish familjen e tyre në vitin 2015 me vdjekjen nga kanceri në tru të djalit të tyre, Beau Biden.

“Kjo është diçka personale për mua dhe bashkëshorit tim, Joe“, thotë Jill Biden.

Ndaj Jill Biden shtoi nismën ndaj kancerit në listën e saj të kauzave.

Gjatë fushatës presidenciale të bashkëshortit të saj, Jill Biden shkroi një libër për fëmijë lidhur me vitet e para të jetës së tij, shpirtin e tij konkurues dhe qëndrueshmërinë edhe pas talljeve që kishte përjetuar se i mbahej goja.

Edhe pse për ta shteti i vogël i Delauerit është shtëpia e tyre, Jill Biden e ka ndjekur bashkeshortin e saj gjatë 21 viteve të punës së tij si senator në Kapitol dhe tetë viteve në Shtëpinë e Bardhë si Nënpresident, ku ajo rikthehet për të paktën katër vjet të tjera.

Kompania Dominion, padi 1.3 miliardë dollarë kundër Rudy Giulianit

Një kompani amerikane për numërimin automatik të votave ka ngritur një padi prej 1.3 miliardë dollarësh kundër avokatit të ish-Presidentit Donald Trump, Rudy Giuliani. Sipas dokumentave të paraqitura në gjykatë kompania Dominion e akuzon zoti Guliuani për shpifje në atë që e quan fushatën e tij të “gënjeshtrës së madhe” për manipulime të shumta në zgjedhjet presidenciale.

Kompania Dominion Voting Systems Inc me bazë në Denver, kishte ngritur më parë një proces gjyqësor kundër avokates së fushatës së ish-Presidentit Trump, Sidney Powell, të cilën kompania e akuzoi gjithashtu për përhapjen e teorive të rreme të konspiracionit në lidhje me zgjedhjet ku ish-presidenti Donald Trumpi humbi ndaj demokratit Joe Biden.

Edhe një punonjës i kompanisë Dominion, Eric Coomer, paraqiti një padi për shpifje kundër fushatës së ish Presidentit Trump, duke thënë se ai ishte detyruar të fshihej për shkak të kërcënimeve me vdekje që kishte marrë nga mbështetësit e zotit Trump.

Zoti Giuliani dhe avokati i tij, Robert Costello, nuk iu përgjigjën menjëherë kërkesave për komente.

Zoti Giuliani vazhdoi të këmbëngulte tek pretendimet e tij në lidhje me zgjedhjet, duke thënë javën e kaluar gjatë një emisioni në radio se ai po sulmohet për “ushtrimin e të drejtës së fjalës së lirë dhe mbrojtjen e klientit” të tij.

Zoti Trump dhe aleatët e tij mohuan për më shumë se dy muaj humbjen e tij në zgjedhje dhe pretenduan pa prova se ajo ishte rezultat i mashtrimit të gjerë të votave, para se mbështetësit e tij të sulmonin Kapitolin më 6 janar.

Kompania Dominion po kërkon 1.3 miliardë dollarë dëmshpërblim nga ish-kryetari i Bashkisë së Nju Jorkut, duke pretenduar se “ai dhe aleatët e tij prodhuan dhe shpërndanë” Gënjeshtrën e Madhe “, e cila u përhap me shpejtësi dhe mashtroi miliona njerëz që besuan se Dominion u kishte vjedhur atyre votat dhe kishte manipuluar zgjedhjet”.

Dominion tha se ngriti padinë “për të paraqitur faktet e vërteta” dhe për të “mbrojtur reputacionin e saj, të punonjësve të saj dhe të procesit zgjedhor”.

Javën e kaluar, një grup avokatësh të shquar i kërkuan sistemit gjyqësor të Nju Jorkut të pezullonte liçencën e avokatit për zotin Giuliani sepse ai bëri pretendime të rreme në proceset gjyqësore paszgjedhore duke nxitur mbështetësit e Trumpit që të sulmonin Kapitolin në 6 janar.

Kompania Dominion thotë se ka shpenzuar 565,000 dollarë për të mbrojtur punonjësit e saj, të cilët janë përballur me ngacmime dhe kërcënime me vdekje.

Dhoma e Përfaqësuesve dorëzon akuzën ndaj ish-presidentit Trump në Senat

VOA

Dhoma e Përfaqësuesve e Shteteve të Bashkuara paraqet të hënën zyrtarisht akuzën ndaj ish-presidentit Donald Trump për nxitje rebelimi gjatë fjalimit para përkrahësve të tij në 6 janar, përpara sulmit në Kapitol.

Nëntë anëtarë demokratë të Dhomës së Përfaqësuesve, që do të shërbejnë si prokurorë, do të kalojnë të hënën në mbrëmje përmes ndërtesës ku qindra mbështetës të zotit Trump u përplasën me policinë, duke lënë pesë të vdekur, për të dorëzuar akuzën në Senat, ku do të zhvillohet gjyqi ndaj ish-presidentit.

Një ritual i ngjashëm u krye për gjyqin e parë ndaj zotit Trump janarin e kaluar.

Ai është i vetmi president i Shteteve të Bashkuara i akuzuar dy herë për t’u shkarkuar nga detyra dhe i pari që do të përballet me gjyqin, pas largimit nga detyra. Nëse Senati e shpall fajtor, kjo mund të rezultojë në një votë për t’i ndaluar atij mbajtjen e një posti zyrtar në të ardhmen.

Udhëheqësit e Senatit, që është i ndarë 50-50 mes dy partive, po ku demokratët sigurojnë shumicën falë votës së nënpresidentes Kamala Harris, kanë rënë dakord të mos fillojnë gjyqin deri më 9 shkurt. Kjo i jep ish-presidentit Trump më shumë kohë për të përgatitur mbrojtjen dhe i jep mundësi Senatit të përqendrohet në konfirmimet e anëtarëve të Kabinetit.

Pas një fushate dy-mujore pretendimesh pa prova se kishte fituar në zgjedhje, zoti Trump më 6 janar u bëri thirrje përkrahësve të tij të “luftonin” për të përmbysur rezultatin. Më pas një turmë shkoi në Kapitol, duke detyruar ligjvënësit të ndërprisnin senacën, të fshiheshin në mjedise të sigurta dhe të shtynin për disa orë çertifikimin e fitores së zotit Biden.

Dhjetë anëtarë republikanët të Dhomës së Përfaqësuesve u bashkuan me Demokratët në votimin për ta akuzuar zotin Trump. Demokratët e Senatit do të kenë nevojë për mbështetjen e 17 Republikanëve për ta dënuar atë, një objektiv i vështirë për t’u realizuar, duke pasur parasysh popullaritetin e vazhdueshëm të zotit Trump me votuesit republikanë.

Sipas një sondazhi të agjencisë Reuters / Ipsos të premten 51% e amerikanëve mendojnë se Senati duhet ta shpallë fajtor ish-presidentin Trump. Kjo ndarje përputhet me përkatësinë partiake të të anketuarve, nga të cilët më pak se dy ndër 10 republikanë që bien dakord me këtë pohim.

Republikanë të shumtë, përfshirë udhëheqësin e tyre në Senat, Mitch McConnell, e kanë dënuar dhunën dhe e kanë kritikuar zotin Trump për nxitjen e saj.

Më shumë amerikanë kanë vdekur nga COVID-19 sesa në Luftën e Dytë Botërore

Sipas të dhënave të Universitetit “Johns Hopkins” si pasojë e pandemisë së koronavirusit (COVID-19) në SHBA kanë humbur jetën më shumë njerëz sesa amerikanë në Luftën e Dytë Botërore, shifër që kap rreth 420 mijë persona, transmeton Anadolu Agency (AA).

Edhe pse vlerësimet e viktimave ndryshojnë në disa burime, hulumtimi i Muzeut Kombëtar të Luftës së Dytë Botërore në shtetin e New Orleans-it zbulon se nga viti 1939-1945 rreth 418.500 amerikanë kanë humbur jetën gjatë Luftës së Dytë Botërore.

Pas regjistrimit të vdekjes së parë të lidhur me virusin në fillim të shkurtit të vitit 2020, SHBA kryeson listën me 400 mijë viktima brenda një viti. Vendi gjithsej ka regjistruar 25.1 milionë raste dhe 419.215 viktima, duke vazhduar të jetë vendi më i goditur nga pandemia.

Sipas të dhënave të Qendrës për Kontrollin dhe Parandalimin e Sëmundjeve, gjithsej 21.848.655 njerëz kanë marrë vaksinën kundër COVID-19 të prodhuar nga Pfizer-BioNTech apo Moderna.

Ndërkohë, presidenti Joe Biden vazhdon të ndryshojë politikat e paraardhësit të tij Donald Trump pasi thuhet se të hënën ai do të rivendosë kufizimet e udhëtimit për qytetarë jo-amerikanë.

Udhëtarët që kanë qenë në Brazil, Irlandë, Mbretërinë e Bashkuar, pjesën më të madhe të Evropës dhe Afrikën e Jugut do të kufizohen, njoftoi CNN duke cituar një zyrtar të Shtëpisë së Bardhë.

Faqja 27 prej 128« Fillimi ‹ Prapa 23 24 25 262728 29 30 31 Para ›Fundi »

Përgatiti: Valona Tela

Përgatiti: Valona Tela

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL