VOAL

VOAL

Please Wait ...
0%

SADULLA DURAKU – ALI AHMETI MË DËRGOI NË KOSOVË TË BISEDOJ ME KOMANDANT SOKOLIN, KY MË THA: NUK JAM NË KUMANOVË

VOAL – KUMANOVË – Pak ditë para se të ndodhte përplasja në Kumanovë, me porosi të Ali Ahmetit, Sadulla Duraku, kryetar i komunës Lukovë, ka takuar në Kosovë Sami Ukshinin, e njohur si Komandant Sokoli për të mësuar se cili është motive që duan të hyjnë në Maqedoni.

Në një intervistë për Ballkan Magazinë, për gazetaren Linda Karadaku, Duraku thotë se takimi ishte bërë në Kosovë dhe komandant Sokoli kishte mohuar që kishte lidhje me ngjarjen.

“Më ka dërguar Ali Ahmeti të takohem dhe më ka kërkuar të mësoj motivin. Sami Ukshinin e kam takuar në Kosovë dhe nuk e kam kuptuar motivin por ai më ka thënë që nuk jam atje,” tha Duraku.

Komandant Sokoli është njëri prej të arrestuarve si pjesëtarëve të grupit të armatosur të cilën policia maqedonase arrestoi në Kumanovë.

Kryetari i komunës Lukovë shton se edhe Shqipëria duhet të shpjegojë motivin pse shqiptari nga Shqipëria ndodhej në Kumanovë.

Për Durakun ngjarja e ndodhur në Kumanovë nuk do të shkaktojë konflikt etnik pasi për herë të parë shumë banorë që janë serbë në Kumanovë i kanë ardhur në ndihmë shqiptarëve të lagjes së Trimave, banesat e të cilave u shkatërruan gjatë operacionit policor.

Duraku e quan të panjohur dhe të pakuptimtë ajo që ndodhi për dy ditë në Kumanovë, por shton se deri tani nuk ka të dhëna për viktima mes civilëve.

“Ka qenë e panjohur dhe pakupimtë ajo që ndodhi. Popullata është e shqetësuar por falë zotit ,ne për momentin nuk kemi të dhëna që kanë vrarë civil por vetëm për dëme materiale në Kumanovë. Banorët janë të shqetësuar por falemi që nuk kemi të vrarë.

Përveç të vrarëve që janë 8 policë dhe jo zyrtarisht nga grupi I armatosur janë të vrarë 12- 14 vetë, nga popullata civile nuk kemi viktima.

Nuk ka ardhur askush të na thotë që familjarët e tyre janë vrarë përveç disa familjeve të afërmit e të cilëve janë të shoqëruar në polici deri në momentin e sqarimit të rrethanave.” Oranews.tv

ÇUN LAJÇI POEZI PËR KOMANDATIN BEG RIZA

Çun Lajçi me poezi për komandantin Beg Riza

Për rënien e komandantit Beg Rizaj në Lagjen e Trimave në Kumanovë Aktori i shquar Çun Lajçi ka kushtuar një poezi, që ia ka dedikuar Begut.

Lajçi këtë poezi e ka shkruar në profilin e tij në Facebook.

Ja vargjet e tij:

Rrjedhë lumi
( Beg Rizes)
Mi ktheni rrugët andej
Lumin ma leni të rrjedhë
Zemrës sime pa dallgë,
Ëndërrat e bardha ua le
Juve që ëndërroni lule.
Dallandyshet nëse ikin
Foletë mos ua prishni.
Ju mjaftojnë mbase dy gur
Tri dërrasa e një grusht Dhé
Të ma bëni një shtëpi!

Komentet

MIRSAD NDRECAJ DHE BEG RIZAJ U KAPËN TË GJALLË – POLICIA I SHPALL TË VDEKUR

VOAL – KUMANOVË – Derisa situata vazhdon të jetë e mjegullt dhe e paqartë rreth zhvillimeve të fundit në Kumanovë, njëri nga pjesëtarët e grupit të armatosur, Sulejman Osmani, i njohur si “Sula”, i cili ka arritur t’ju ikë policisë maqedonase, ka thënë se tre nga kosovarët e shpallur të vdekur, ishin kapur të gjallë nga policia.

Dy nga udhëheqësit e grupit të armatosur, Mirsad Ndrecaj, i njohur si komandant “Nato”, dhe Beg Rizaj, i njohur si komandant Begu, konfirmohet se janë në mesin e 14 personave të vrarë gjatë përleshjes së armatosur me policinë e Maqedonisë, ku po ashtu u vranë tetë policë.

Ministria e Punëve të Brendshme e Maqedonisë e ka konfirmuar zyrtarisht se Ndrecaj dhe Begu janë në mesin e personave të vrarë gjatë aksionit të policisë në Kumanovë, dhe se identiteti i tyre është vërtetuar në bashkëpunim me Byronë e INTERPOL-it.

Mirëpo Osmani, i cili ka arritur t’ju ikë policëve maqedonas, ka thënë për të përditshmën Zëri se, Xhafer Zymberi, Mirsad Ndrecaj dhe Muhamed Krasniqi, i njohur si Malisheva,janë kapur të gjallë nga policia maqedonase.

“E di që Xhafa, Nato dhe Malisheva kanë qenë të plagosur, por janë kapur të gjallë nga policia. Më pastaj se çfarë ka ndodhur nuk e di, sepse policia maqedonase ka bërë shpërndarjen e grupit”, ka thënë Osmani, për të cilin mediet kanë raportuar se ishte ai që ka treguar vendndodhjen e armatimit të grupit, shkruan e përditshmja Zëri.

Në anën tjetër, jozyrtarisht thuhet se numri i personave të të vrarëve në përleshjen që ndodhi ditë më parë në “Lagjen e Trimave” në Kumanovë, mund të jetë më i vogël se sa që ishte thënë në fillim. Sipas medieve maqedonase, nuk janë 14 të vrarë në mesin e grupit të armatosur, por vetëm dhjetë prej tyre. /lajmi.net/

KOMANDANT SULA – TË RRETHUARIT U DORËZUAN ME NDËRMJETËSIM TË ALI AHMETIT

Njëri nga pjesëtarët e Grupit të Armatosur, Sulejman Osmani, i njohur si “Sula”, i cili ka qenë pjesëmarrës në betejën e Kumanovës, por që deklaron se ka arritur t’ju ikë policisë maqedonase pas dorëzimit të grupit, ai ka folur për këtë rast ku sipas tij ka qenë i përfshirë në ndërmjetësim mes policisë dhe grupit Ali Ahmeti lideri i BDI-së, dhe deputeti Artan Grubi, Xhezair Shaqiri –

Komandant Hoxha nga ky takim mes tij dhe Komandant Sula. Me ç’rast ai thotë se me shumë vështirësi sot ka arritur ta takojë dëshmitarin e vetëm të gjallë nga incidenti i armatosur në Kumanovë, e ai është Komandant Sula.

“Diku në malet e Karadakut në territorin e Maqedonisë me vështirësi të madhe e takova dëshmitarin e vetëm të luftërave te Lagjja e Trimave në Kumanovë – Komandant Sula. Ndëgjoni me vëmendje deklaratën e tij se si ka ndodh dorëzimi i ushtarëve tek policia maqedonase me ndërmjetësimin e Ali Ahmetit”, – thekosn Xhezair Shaqiri./tetovasot/

SHKUPI ZYRTAR – NUK JANË 14 POR 10 TË VRARËT NË KUMANOVË

VOAL – SHKUP – Ministria e Brendshme e Maqedonisë ka konfirmuar zyrtarisht shkrimet e Alsat M se trupat e Mirsad Ndrecajt, i njohur si komandant NATO dhe Beg Rizajt, komandant Begu janë në mesin e të vrarëve në aksionin policor të Kumanovës.

Identiteti i tyre ishte vërtetuar në bashkëpunim me Byronë e Interpolit në Shkup. Siç ka marr vesh dje Alsat-M jo zyrtarisht nga Ministria e Brendshme sot kanë konfirmuar se tek Ndrecaj janë gjetur edhe dokumentet e tij të identitetit. Policia thotë se është e sigurt edhe për identitetin e një tjetër të vrari, i cili është shtetas i Maqedonisë.

“Deri tani është konfirmuar pozitivisht identiteti i Mirsad Ndrecajt, i lindur më 17.06.1979, nga Kosova i ashtuquajtur Komandant NATO për të cilin kishte dyshime se është një nga udhëheqësit e grupit të armatosur. Arriti konfirmimi pozitiv për identitetin e Beg Rizajt i lindur më 25.12.1977, nga Kosova i njohur si komandant Begu. Nga të vrarët, është konfirmuar identiteti i Nusret Kaloshit i lindur më 18.04.1975, shtetas i Maqedonisë”, njoftojnë nga MPB-ja.

Në njoftimin publik nga MPB-ja shkruhet se vazhdon identifikimi edhe i trupave tjerë të gjetur. Fillimisht, u raportua se janë gjetur gjithsej 14., por burime të sigurta policore thonë se ai ishte numër nga terreni, dhe se ka variacione të mundshme të vogla në numrin përfundimtar.

Nga burime të tjera spekulojnë se ka mundësi që numri i viktimave në të vërtetë të jetë 10. Zyrtarisht, Ministria e Brendshme nuk bëri komente mbi këtë çështje.

Përveç se është konfirmuar identiteti i Ndrecajt dhe Rizajt, nga MPB-ja thonë se vazhdon identifikimi edhe i 30 të arrestuarve të tjerë.

Zyrtarisht, ajo që mund të shihet nga fotografitë e djeshme të aksionit, u konfirmua se në polici është Sami Ukshini, i njohur si Komandant Sokoli. Alsat M, që dje njoftoi se përveç Sokolit, MPB-ja në Kumanovë ka arrestuar edhe Muhamed Krasniqin i njohur si komandant Malisheva dhe komandant Junikun, Demë Shehun.

Deri tani, policia nuk e ka konfirmuar lajmin, për shkak se sipas informatave jozyrtare, Malisheva dhe Juniku kanë dhënë identitet të rremë, dhe ende pritet konfirmim përfundimtar. Siç raportuam edhe dje, është thuajse e sigurt se të pesë personat që janë konsideruar si udhëheqës të grupit të Kumanovës, të gjallë ose të vdekur, janë në duart e policisë. /Alsat-M/

RAMUSH HARADINAJ – RAJONI RREZIKOHET NGA QEVERITË KRIMINALE DHE TË KORRUPTUARA

VOAL – PRISHTINË – Lideri i AAK-së Ramush Haradinaj në një shkrim të postuar në Facebook ka thënë se Aleanca distancohet nga dhuna por ka potencuar se rreziku I vetëm që ka rajoni janë qeveritë e kriminalizuara.

Postimi i Haradinajt në Facebook:

Ngjarjet në Kumanovë tregojnë se rajoni nuk është i rrezikuar nga “patriotët etnikë”, por nga qeveritë e korruptuara dhe të kriminalizuara të këtij rajoni.

Lëvizjet për ndryshim këto qeveri nuk do të mund t’i ngulfasin duke përdorur dhunën apo konfliktet e paqena ndëretnike.

Ne si Aleancë distancohemi nga dhuna dhe nga çdo formë e zgjidhjes së problemeve në çfarëdo forme të dhunshme, por edhe njëherë potencojmë se i vetmi rrezik që ka rajoni, qëndron tek qeveritë e kriminalizuara dhe të korruptuara.

CARL BILDT – BASHKIMI EVROPIAN T’I PËRKUSHTOHET ME SHUMË BALLKANIT

VOAL – Ish kryeministri i Suedisë, Carl Bildt, ka thënë në një intervistë për Radion Evropa e Lirë, se nuk pret që konflikti i armatosur në Kumanovë të transferohet në vende të tjera të rajonit. Megjithatë, ai ka theksuar nevojën që Bashkimi Evropian t’iu kushtojë më shumë vëmendje ngjarjeve në Ballkan.

Radio Evropa e Lirë: Serbia ka thënë se do të harmonizojë politikën e jashtme me politikën e Bashkimit Evropian. Si e shihni nivelin e këtij harmonizimi?

Carl Bildt: Mendoj se është e rëndësishme që të ndodhë harmonizimi, sepse ai reflekton faktin se vende të ndryshme ndajnë vlera dhe interesa të përbashkët. Andaj, harmonizimi gradual i politikës së jashtme të Serbisë me atë të Evropës do të ishte ndarje e vlerave dhe inetersave të njëjtë.

Por, kur bëhet fjalë për sanksionet kundër Rusisë, Serbia vazhdon të mos ndjekë vijën e BE-së. Mendoj se është për keqardhje. Jo se sanksionet do të ndryshojnë shumëçka sa i përket Rusisë, por ato janë pjesë e paketës sonë politike, për të ruajtur rendin evropian.

Duhet të dihet fakti se Rusia ka rol shumë aktiv në lojën për ndarje në Evropë dhe ka rrezik që Rusia të luajë me Serbinë në atë mënyrë që do të dëmtonte interesat e saj.

Radio Evropa e Lirë: Kur duhet ta përshtasë Serbia plotësisht politikën e saj të jashtme me BE-në?

Carl Bildt: Mendoj se kjo ndodh gradualisht. Natyrisht, harmonizimi i plotë bëhet kur të bëhet anëtare e BE-së, por paraprakisht duhet të dëshmojë përkushtimin për t’u bërë anëtare. Sa më parë që kjo ndodh, aq më mirë.

Radio Evropa e Lirë: Një pjesë shumë e rëndësishme e rrugës evropiane të Serbisë janë marrëdhëniet me Kosovën. A ka rrezik nga ngecja në dialogun Kosovë-Serbi dhe në zbatimin e Marrëveshjes së Brukselit?

Carl Bildt: Ky rrezik gjithmonë ekziston, por shikuar nga anash, mund të them se është mbresëlënëse se sa probleme janë zgjidhur. Kanë mbetur probleme që janë më të vogla nëse krahasohen me ato që janë zgjidhur tashmë. Kanë mbetur detaje dhe gjithmonë ka rrezik nga tensionet rreth detajeve.

Radio Evropa e Lirë: Fundjavën e kaluar ka pasur një konflikt të armatosur në Kumanovë të Maqedonisë. Çfarë mendoni se qëndron prapa kësaj ngjarjeje?

Carl Bildt: Nuk e di. Do të doja të kem më shumë informacione në lidhje me këtë. Të gjithë do të donim. Por, siç duket, ka qenë një grup që ka bërë përpjekje të vendosë diçka në Kumanovë. Kjo ka ndodhur në momentin kur kemi probleme të tjera në Maqedoni, çfarë është shqetësuese.

Radio Evropa e Lirë: A ka rrezik nga transferimi i këtij konflikti në vendet fqinje?

Carl Bildt: Deri më tash, nuk ka pasur shenja për këtë. Nëse shihni periudhën nga viti 2001, kur ka pasur konflikt, e deri më tash, ajo ka qenë e qetë dhe e qëndrueshme. Mendoj se të gjithë shpresojnë se kështu do të vazhdojë.

Radio Evropa e Lirë: Më herët keni vlerësuar se Ballkani është më i ndjeshëm se pjesët e tjera të Evropës. Pra, ka ndodhur konflikti në Maqedoni, paqëndrueshmëria politike atje, Dodik kërcënon me referendum në Republikën Sërpska… A po i kushton BE-ja vëmendje të mjaftueshme Ballkanit?

Carl Bildt: Mendoj se kjo është e saktë dhe se duhet t’iu kushtojmë më shumë vëmendje ngjarjeve në Ballkan. Ka edhe gjëra të mira atje, nuk mund të themi se gjithçka është problematike. Është arritur përparim i rëndësishëm në 15 vjetët e fundit, këtu nuk ka dyshim.

Por, nganjëherë, harrojmë se ka ende çështje të hapura dhe fokusin e bartim te çështje të tjera. Ekziston një nevojë e qartë që BE-ja të jetë më akive rreth çështjeve në Ballkan.
Përgatiti: Valona Tela

MESAZHI I LUFTËTARIT: MOTËR ME SIGURI DO TË VRITEM, M’U KANË VRA SHUMË SHOKË! NUK KEMI ASNJË PLUMB! NA TRADHËTUAN!

VOAL – Është trishtues dhe rrëqethës rrëfimi i fundit nëpërmjet telefonit i njërit prej luftëtarëve që me siguri ka mbetur i vrarë në luftimet në Kumanovë. Biseda rrëqethëse këputet pas pak, asnjë shenjë më dhe asnjë gjurmë… vetëm të shtënat e fundit dëgjohen. Ai i lë amanet motrës ngushëllimin për nënën.
“Me siguri do të vritemi! Nuk na ka mbetur asnjë plumb, mu kanë vrarë shumë shokë, po të kishim municion akoma do luftonim, … edhe këtë vend të trimave do ta mbushnim me varre të tyre. Na tradhtuan motër, por mos më qani e kemi pagur veten.
Mos e le nanën të mërzitet së baba është ma i fortë”.
Dhe këtu merr fund gjithçka, ndihen të shtënat!/ BS

AMERIKANËT ME INCIZIME: QEVERIA KISHTE KONTAKTE ME GRUPIN E ARMATOSUR

VOAL – Dorëheqjet e mbrëmshme të ministres së Punëve të Prendshme të Maqedonisë, Gordana Jankullovska dhe shefit të shërbimit sekret të këtij vendi, Sasho Mijallkov, kanë pasuar pas një takimi që ata kanë pasur në ambasadën e Shteteve të Bashkuara të Amerikës në Shkup.Sipas burimeve të portalit Libertas, në këtë takim, Jankullovskës dhe Mijallkovit u janë dhënë regjistrime (incizime) nga kontaktet telefonike midis përfaqësuesve të Drejtorisë së Sigurisë dhe Kundëzbulimit (DSK) me grupin e armatosur, konkretisht me personin e quajtur komandant NATO dhe njerëzit e tij.Siç thuhet më tej, aty u është dëshmuar përfshirja e DSK-së, e cila ka biseduar me grupin e armatosur në Kumanovë.“Shqiptarë të punësuar në DSK kanë kontaktuar përmes telefonit me grupin e armatosur, duke thënë se ata kanë kontaktuar me urdhër direkt të shefit të DSK-së, i cili ka pyetur se çfarë kompensimi kërkojnë që të tërhiqen. Praktikisht MPB ka hyrë në bisedime me ta”, thotë burimi i Libertas, transmeton INA.Paralelisht me këtë, edhe lideri i BDI-së, Ali Ahmeti, në marrëveshje me partnerët e koalicionit ka kërkuar ndihmë nga OSBE për të tërhequr tre persona të afërt me të që ishin pjesë e grupit, që më pas të negocion me ta.“Gjatë takimit të sotëm në ambasadën amerikanë, edhe Ahmetit iu bë e ditur se komuniteti ndërkombëtar përmes këtyre incizimeve e ka të qartë edhe përfshirjen e Qeverisë në ngjarjet në Kumanovë dhe se aksionin e përgjakshëm MPB-ja e filloi kur veçse në terren kishin humbur jetën disa pjesëtarë të forcave policore”, bën të ditur burimi.

“Dorëheqjet që ndodhen janë logjike pas takimeve mes ambasadorëve dhe zyrtarëve”, ka thënë burimi diplomatik, duke mos e bërë të qartë nëse edhe kryeministri Nikolla Gruevski së shpejti do të japë dorëheqje, edhe pse sipas burimit, ka pasur informatat për kontaktet e kushëririt të tij me grupin kriminal.

MPB KONFIRMON: MIRSAD NDRECAJ DHE BEG RIZAJ NË MESIN E TË VRARËVE

VOAL -​ SHKUP -Ministria e Brendshme ka konfirmuar zyrtarisht se trupat e Mirsad Ndrecajt, i njohur si komandant NATO dhe Beg Rizajt, komandant Begu janë në mesin e të vrarëve në aksionin policor të Kumanovës. Identiteti i tyre ishte vërtetuar në bashkëpunim me Byronë e Interpolit në Shkup.Siç njoftoi dje Alsat-M, nga Ministria e Brendshme sot kanë konfirmuar se tek Ndrecaj janë gjetur edhe dokumentet e tij të identitetit. Policia thotë se është e sigurt edhe për identitetin e një tjetër të vrari, i cili është shtetas i Maqedonisë.

“Deri tani është konfirmuar pozitivisht identiteti i Mirsad Ndrecajt, i lindur më 17.06.1979, nga Kosova i ashtuquajtur Komandant NATO për të cilin kishte dyshime se është një nga udhëheqësit e grupit të armatosur. Arriti konfirmimi pozitiv për identitetin e Beg Rizajt i lindur më 25.12.1977, nga Kosova i njohur si komandant Begu. Nga të vrarët, është konfirmuar identiteti i Nusret Kaloshit i lindur më 18.04.1975, shtetas i Maqedonisë”, njoftojnë nga MPB-ja.

Në njoftimin publik nga MPB-ja shkruhet se vazhdon identifikimi edhe i trupave tjerë të gjetur. Fillimisht, u raportua se janë gjetur gjithsej 14. Por burime të sigurta policore thonë se ai ishte numër nga terreni, dhe se ka variacione të mundshme të vogla në numrin përfundimtar. Nga burime të tjera spekulojnë se ka mundësi që numri i viktimave në të vërtetë të jetë 10.

Zyrtarisht, Ministria e Brendshme nuk bëri komente mbi këtë çështje. Përveç se është konfirmuar identiteti i Ndrecajt dhe Rizajt, nga MPB-ja thonë se vazhdon identifikimi edhe i 30 të arrestuarve të tjerë. Zyrtarisht, ajo që mund të shihet nga fotografitë e djeshme të aksionit, u konfirmua se në polici është Sami Ukshini, i njohur si Komandant Sokoli.

Alsat M, që dje njoftoi se përveç Sokolit, MPB-ja në Kumanovë ka arrestuar edhe Muhamed Krasniqin i njohur si komandant Malisheva dhe komandant Junikun, Demë Shehun. Deri tani, policia nuk e ka konfirmuar lajmin, për shkak se sipas informatave jozyrtare, Malisheva dhe Juniku kanë dhënë identitet të rremë, dhe ende pritet konfirmim përfundimtar.

Siç raportuam edhe dje, është thuajse e sigurt se të pesë personat që janë konsideruar si udhëheqës të grupit të Kumanovës, të gjallë ose të vdekur, janë në duart e policisë.

Ohridsky – UASHINGTONI BLLOKON LLOGARITË DHE PRONAT E POLITIKANËVE MAQEDONAS

VOAL – Shtetet e Bashkuara të Amerikës kanë marrë vendim për t’i bllokuar llogaritë bankare dhe pronat e politikanëve maqedonas nga të gjitha eshallonet e pushtetit, si dhe të një numri të madh biznesmenësh të afërt me pushtetin, për të cilët ekzistojnë dyshime për krime dhe korrupsion, lajmëroi portali maqedonas “Ohridsky”.

Diplomat i paemëruar i lartë amerikan për portalin e ka konfirmuar lajmin, duke shtuar se rekomandim për të vepruar në mënyrën e njëjtë i është dhënë edhe Brukselit, respektivisht të gjitha shteteve anëtare të Bashkimit Evropian.

Bllokimi i llogarive dhe pronave të krerëve të politikës dhe biznesit në Maqedoni, sipas të njëjtit burim, do të zgjasë deri sa në vend të krijohet klimë stabile politiko-ekonomike dhe “deri në lirimin e organeve gjyqësore nga kthetrat e politikanëve”.

PROTESTA SOT NË SHKUP – TË DORËHIQET QEVERIA NË TËRËSI

VOAL – SHKUP – Organizatorët e protestave në Maqedoni, lëvizja qytetare “Protestoj”, kanë përshëndetur dorëheqjen e dy ministrave, Gordana Jankullovska dhe Mile Janakievski, dhe drejtorit të Kundërzbulimit, Sasho Mijallkov, si “një shenjë inkurajuese se veprimi i qytetarëve po sjell ndryshime”, por njëkohësisht konsiderojnë se ato janë vetëm “rekonstruksion kozmetik”.

Së këndejmi, siç transmeton KosovaPress-i, ata për sot në orën 18 në Shkup, kanë thirrur protestë të re para Qeverisë kundër pushtetit aktual dhe me kërkesë për dorëheqje të kryeministrit Nikolla Gruevski dhe të gjithë anëtarëve të kabinetit të tij.

Organizatorët e protestave të përditshme para Qeverisë thonë se tashmë është e qartë se “lëvizja do ta mposhtë regjimin e padrejtë dhe çnjerëzor”.

“Dorëheqjet janë fitore e qytetarëve dhe shenjë inkurajuese se veprimi ynë i përbashkët tashmë po sjell ndryshime pozitive. Por, ne nuk do të ndalemi me kaq! Rekonstruksioni kozmetik i Qeverisë, apo zëvendësimi i një elite të korruptuar me një tjetër nuk do të ndihmojë për tejkalimin e krizës sistemore me të cilën po ballafaqohen Maqedonia dhe qytetarët e saj”, thuhet në komunikatën e lëvizjes “Protestoj”.

Ata porosisin se do të vazhdojnë protestat deri në plotësimin e tri kërkesave të të tyre kryesore: dorëheqjen e menjëhershme të tërë Qeverisë në krye me Gruevskin, lirimin e të gjithë aktivistëve të arrestuar nga 5 maji e këtej dhe formimin e Qeverisë për demokratizimin e institucioneve dhe mundësimin e zgjedhjeve fer dhe demokratike.

“Zëshëm dhe vendosmërisht të kërkojmë dorëheqje nga tërë qeveria”, thuhet në thirrjen për protestën e sotme në Shkup.

Editoriali – DETYRIMET TONA NDAJ SHQIPTARËVE TË VRARË E TË ARRESTUAR NË KUMANOVË

VOAL – Në zhvillimet e para pak ditëve pati shumë shqiptarë të vrarë dhe të arrestuar nga ana e forcave speciale të Maqedonisë. Politika jonë në Tiranë, Prishtinë dhe Shkup e ka për detyrë që të bëjë të mundur ndriçimin e plotë të zhvillimeve të atyre ditëve në Lagjen e Trimave në Kumanovë dhe të dalë sa më shpejt me versionin e saj zyrtar, në mënyrë që të nxirren mësimet e duhura dhe të merren masat e duhura. Ne si komb e kemi për detyrë të tregojmë se jeta dhe integriteti i bijve tanë është i çmuar dhe i shenjtë. Prandaj atyre që dhanë jetën nga plumbat e Maqedonisë t’iu bëhen të gjitha nderimet dhe shërbesat e lamtumirës në vendlindjet e tyre. Për të arrestuarit të sigurojmë një proces absolutisht të drejtë, dhe transparent duke përfshirë avokatë sa më të zotë, mundësisht edhe ndërkombëtarë, dhe duke sensibilizuar të gjitha organizmat shqiptare e ndërkombëtare të të drejtave të njeriut. Është koha e fundit që ne ta mbrojmë të vërtetën shqiptare të shkelur, të fyer, të nëpërkëmbur dhe të poshtëruar nga një Maqedoni, e cila në këtë çerek shekulli është dëshmuar e pabesë dhe armiqësore ndaj qytetarëve të saj shqiptarë dhe ndaj kombit shqiptar në tërësi. Seriozitetin tonë në këtë përkushtim kemi rastin dhe mundësinë tashmë ta shpalosim pikërisht në rastin e zhvillimeve në Lagjen e Trimave të qytetit të Kumanovës, duke i përmbushur një për një detyrimet tona ndaj bashkëkombësve tanë që e humbën jetën dhe ndaj atyre që ndodhen të arrestuar. Nëse i neglizhojmë, nëse nuk i përmbushim me dinjitet këto detyrime, ashtu si do të bënte çdo komb i vërtetë evropian, atëherë nuk kemi pse të ankohemi kurrë më për papërgjegjësitë, për vrazhdësitë dhe për barbaritë e Maqedonisë ndaj popullit shqiptar në Maqedoni dhe ndaj kombit shqiptar në tërësi, nuk kemi pse ta deklarojmë më kurrë shqiptarinë tonë, atdhetarinë tonë.

PYETJA E VOGËLUSHES ZAMIRA JASHARI NGA KUMANOVA – NËNË, A VRASIN FËMIJË?

VOAL – KUMANOVË – Zamira Jashari ishte vetëm një nga vogëlushët që përjetoi tmerrin e mëngjesit të 9 majit. 6-vjeçarja nga fshati Ropalcë, e cila ditën e përleshjeve mes grupeve të armatosura dhe policisë, ndodhej tek dajat e saj në Kumanovë, rrëfen përjetimin e saj për mëngjesin e së shtunës.

Në një intervistë për Radio Pendimi vogëlushja nga Kumanova ka një porosi për politikanët: Kurrë s’do merrni votat tona. Fotografia e saj preku thellë zemrat e opinionit, ndërkohë që të njëjtën tronditje pësuan të gjithë fëmijët e Kumanovës.

Zamira Jashari tregon se ka pasur frikë se mos vritej bashkë me familjen e saj. Ndërkohë që si një fëmijë i çiltër pyetja e saj për nënë ishte: “Ma’, a vrasin fëmijë?”.

Gazeta zvicerane «Südostschweiz»: Maqedonia nuk mbijeton si shtet nëse i sulmon shqiptarët

Po u ngritën maqedonasit kundër shqiptarëve, atëherë shteti i vogël nuk ka shans të mbijetojë. Nëse grinden, siç ka ndodhur muajve të fundit, dy kampet politike të kombit maqedonas, atëherë konflikti, herët apo vonë, po ashtu do të shndërrohet në konflikt etnik. Atëherë shqiptarët do të ikin nga shteti pa perspektivë dhe në fundosje e sipër – dhe ata do të ikin duke e marrë me vete territorin ku banojnë, shkruan në komentin e saj gazeta zvicerane «Südostschweiz».

Prej vitesh në Europë jehon vajtimi se sa e tmerrshme është kur vendet hyjnë para kohe në BE – si për shembull Rumania dhe Bullgaria. Maqedonia tregon se çfarë ndodhë nëse një vend e lini të vuajë urie dhe me dorë të shtrirë. Pa perspektivë konkrete të anëtarësimit kombet e vogla në Europën Juglindore e humbin kompasin. Me çdo vit që largohet anëtarësimit proeuropianët humbin terren dhe liderët autoritarë dhe oligarkët kriminelë fitojnë përparësi. Në fund pasojnë kaosi dhe lufta civile. Maqedonia gjendet pak para tyre.

Ky zhvillim fatal i këtij vendi të vogël të Ballkanit na nisur para tamam shtatë vjetësh: në një samit të NATO-s në Bukuresht, kur Maqedonia duhej të bëhej anëtare, delegati grek befasisht ngriti dorën për veto. SHBA-të dhe fuqitë e mëdha perëndimore rrugën supet dhe e harruan këtë. Që nga atëherë e tutje kush thoshte «Europë» në Maqedoni dhe kërkesën e tij për modernizim dhe reforma e arsyetonte me shpresën për hyrje në BE, ai korrte vetëm ngërdheshje cinike. Ata nuk na duan, përgjigjej qeveria.

Ende është e paqartë nëse këto ditë në Maqedoni vërtet po ngre krye ekstremizmi shqiptar apo konflikti është inskenuar nga qeveria. Diçka e tillë mund të pritet prej saj: rrethi më i ngushtë i pushtetit viteve të fundit ka vepruar në mënyrë ekstreme manipuluese. Por, në thelb, për epilogun e konfliktit nuk luan rol nëse pas kësaj qëndron vërtet një «ushtri çlirimtare» apo këtu i ka gishtat e përzier policia sekrete. Qeveria nuk gëzon kurrfarë kredibiliteti dhe nuk do të mund ta luftonte efektivisht ekstremizmin edhe sikur të donte. Po u ngritën maqedonasit kundër shqiptarëve, atëherë shteti i vogël nuk ka shans të mbijetojë. Nëse grinden, siç ka ndodhur muajve të fundit, dy kampet politike të kombit maqedonas, atëherë konflikti, herët apo vonë, po ashtu do të shndërrohet në konflikt etnik. Atëherë shqiptarët do të ikin nga shteti pa perspektivë dhe në fundosje e sipër – dhe ata do të ikin duke e marrë me vete territorin ku banojnë.

NËNKRYETARI I PARLAMENTIT EVROPIAN KËRKON DORËHEQJEN E GRUEVSKI


Nënkryetari i Parlamentit Evropian, Alexander Graf Lambsdorff i ka kërkuar kryeministrit Nikolla Gruevski që të jap dorëheqje.Ai në një prononcim zyrtar ka kërkuar që Gruevski të jap dorëheqje dhe me këtë të kontribojë për zgjidhjen e krizës, informon INA.

“Shpërthimi i dhunës në Maqedoni përbën një fotografi të thellë shqetësuese. Kryeministri Nikola Gruevski patjetër duhet të tërhiqet si barrierë që është në rrugën për uljen e tensioneve etnike, që sërish janë rindezur, por edhe për zgjedhje të reja që do të mbaheshin në kushte adekuate demokratike. Pa një aksion të shpejtë, rajoni sërish do të jetë buzë një lufte qytetare. Në situatë e tillë, duke pasur parasysh Marrëveshjen e Ohrit, asnjëherë nuk duhej të vinte”, theksoi nënkryetari i PE-së, Lambsdorff.

Parlamenti Evropian ishte një nga faktorët kyç të BE-së që ishte përfshirë në zgjidhjen e krizës në Maqedoni dhe nxitjen e negociatave midis dy partive më të mëdha maqedonase në Bruksel, por që rezultuan të dështuara, edhe përkundër ndërmjetësimit nga eurodeputetët Ivo Vajgl, Richard Hovit dhe Eduard Kukan. (INA)

Dorëhiqen njerëzit më të afërt të Gruevskit, ikin 3 ministra dhe kreu i Shërbimeve Sekrete

VOAL – Njerëzit më të afërt të Kryeministrit të Maqedonisë, Nikolla Gruevski, dhanë dorëheqjen mbrëmjen e së martës. Tre prej tyre kanë qenë edhe personazhet më të akuzuar nga denoncimi i skandalit të përgjimeve që vijon të trondisë vendin prej shumë javësh.

Dorëheqjen e dhanë ministrja e Brendshme, Gordana Jankullovska, ai i Transporteve, Mile Janakievski dhe shefi i Shërbimeve Sekret të Maqedonisë, Sasho Mijallkov.

Dorëheqja e Jankullovskës vjen pas ngjarjes në Kumanovë ku mbetën 22 të vrarë, prej të cilëve tetë pjesëtarë të policisë. Ndërkohë, pas tyre dha dorëheqjen edhe Zoran Stavreski si ministër i Financave dhe zëvendëskryeministër.

Mediat thonë se pritet edhe dorëheqja e Prokurori Publik, Marko Zverlevsk. Ndërkohë Kryeministri Nikolla Gruevski, tashmë ka dorëzuar në Kuvend propozimin për zgjedhjen e anëtarëve të rinj të Qeverisë.

Kryetari i Parlamentit, Trajko Veljanovski ka caktuar për sot në ora 13:00 seancën për zgjedhjen e anëtarëve të rinj të kabinetit qeveritar.

Ndërkohë, mediat maqedonase njoftojnë se në orët në vijim pritet që të ketë të tjera dorëheqje nga anëtarë të Qeverisë, por edhe zyrtarë të lartë të shtetit. Nuk ka asnjë informacion nëse do të ketë dorëheqje të ndonjë prej ministrave shqiptarë të partisë së Ali Ahmetit.

Lideri i LSDM-së, Zoran Zaevi ka komentuar dorëheqjet e para të Qeverisë, ku tha se ky nuk është qëllimi i partisë së tij, por ky është vetëm një hap drejt fundit të Nikolla Gruevskit.

“Çdo gjë që kemi diskutuar është konfirmuar. Kjo është dëshmi e përgjimit dhe për vërtetësinë e bisedimeve. Dorëheqjet e ministrave nuk janë qëllimi ynë përfundimtar. Ky është vetëm një hap drejt fundit të Nikolla Gruevskit”, shkruan Zoran Zaevi, lideri i opozitës maqedonase.

Por nga këto zhvillime duket se një gjë është e sigurt, që vetë Kryeministri Nikolla Gruevski duket se nuk ka asnjë plan për të dhënë dorëheqje, pa të cilin opozita thotë se nuk ka zgjidhje të krizës politike që ka mbërthyer vendin prej kaq kohësh.

TRI DORËHEQJE NË QEVERINË E MAQEDONISË

VOAL- SHKUP – Dorëhiqen Ministrja e Punëve të Brendshme, Gordana Jankullovska, Ministri i Transportit dhe Lidhjeve, Mile Janakievski si dhe drejtori i drejtorisë për zbulim dhe kundërzbulim, Sasho Mijallkov.

Kryeministri, Nikolla Griuevski për ministër te ri të punëve te brendshme ka propozuar, Mitko Çavkov, aktualisht drejtor i byrosë për siguri publike ndërsa për ministër të transportit, Vllado Misajllovskin.

Dorëheqjet vijnë pas përleshjeve te armatosura në Kumanovë, që lanë pas vetes 22 të vrarë por edhe krizës politike të nxitur nga afera e përgjimeve. rel

ZËRI I AMERIKËS – MBIZOTËROJNË PAQARTËSITË NË MAQEDONI

Autoritetet maqedonase nuk japin shumë hollësi në lidhje me identitetin e personave të vrarë, të cilët thonë se i përkasin grupit të armatosur, në përleshjet e së shtunës dhe të dielës në Kumanovë, ndërkohë që thonë se tre nga pesë udhëheqësit e grupit janë arrestuar.

Sipas organeve hetuese, sulmuesit synonin, mes tjerash, të minonin Urën e Gurit mbi lumin Vardar. Ndërkohë, qeveria e Maqedonisë ka bërë të ditur se do të dëmshpërblejë pronarët e shtëpive të dëmtuara. Ndërsa, diplomatët perëndimorë po përpiqen të ulin tensionet në Maqedoni.

Autoritetet maqedonase kanë bërë të ditur emrat e disa prej atyre që besohet të ishin pjesëmarrës në përleshjet e së shtunës dhe të dielës në Kumanovë me forcat qeveritare maqedonase.

Autoritetet flasin për një pjesë të drejtuesve të grupit që janë arrestuar dhe, supas tyre, ata janë Muhamet Krasniqi i njohur si komandant Malisheva, Sami Ukshini apo komandant Sokoli dhe Demë Shehu i njohur si komandant Juniku.

Ndërkohë, zyrtarisht nuk thuhet gjë për katërmbëdhjetë trupat e gjetur, sipas policisë, pas operacionit në Kumanovë, por mjete të informimit të afërta me pushtetin spekullojnë se në mesin e të vrarëve të jetë dhe ai, që shërbimet maqedonase të zbulimit e konsiderojnë si udhëheqës të grupit, Mirsad Ndrecaj. Zyrtarët maqedonas thonë se po bëhet identifikimi nga mjeksia ligjore i personave të vrarë.

Nga ana tjetër, në Shkup janë shtuar debatet nëse grupi i armatosur, të cilin zyrtarët e këtushëm e quajnë terrorist, ishte i manipuluar nga qarqe qeveritare të Shkupit për të krijuar një lloj destabiliteti që do të tërhiqte vëmendjen e opinionit publik nga kriza reale politike, apo të ishin mercenarë të paguar nga shërbime serbe dhe ruse, ose luftëtarë të kauzës kombëtare.

Faktori politik shqiptarë, si në Maqedoni dhe rajon, e ka dënuar dhunën dhe përpjekjet për destabilizimin e Maqedonisë që nuk përkon, sipas tyre, me interesin e shqiptarëve.

Ndërkohë, diplomatët me ndikim në Maqedoni janë angazhuar për të qetësuar gjendjen në këtë vend. Pas takimeve të djeshme me presidentin dhe kryeministrin , ambasadorët e SHBA, BE, Gjermanisë, Britanisë së Madhe, Francës dhe Italisë e pritën në zyrat e Bashkimit Evropian në Shkup, Ali Ahmetin, kryetar i Bashkimit Demokratik për Integrim.

Ambasadori italian duke folur në emër të të gjithë kolegëve, tha se BDI-ja mban përgjegjësi për avancimin e vlerave dhe parimeve demokratike. Ambasadori Ernesto Belelli tha se BDI-ja e ka për detyrë të ndihmojë institucionet e vendit dhe të sigurojë hetimin e plotë, transparent dhe të besueshëm mbi manipulimet e zbuluara nga përgjimet.

“Tani, më shumë se kurdoherë BDI duhet të marrë qëndrim dhe të shfrytëzojë ndikimin e saj për të mirën dhe ardhmërinë e të gjithë qytetarëve të Maqedonisë”, theksoi ambasadori italian në Shkup.

Kryetari i Bashkimit Demokratik për Integrim Ali Ahmeti iu shmang gazetarëve pas takimit. Drejtuesit e dy partive kryesore shqiptare nuk kanë shkuar për t’i parë banorët e dëmtuar në Kumanovë, ndërsa në Kumanovë dje shkoi Zoran Zaev i Lidhjes Social Demokrate maqedonase, i cili u mirëprit nga banorët shqiptarë të lagjes.

Ndërkohë, qeveria e Maqedonisë ka premtuar se do të dëmshpërblejë pronarët e shtëpive që u dëmtuan gjatë operacioneve në Kumanovë. Është formuar një komision qeveritar për vlerësimin e dëmeve dhe premtimet janë që dëmshpërblimi i pronave të paluajtshme dhe të luajtshme të bëhet njëqind për qind.

LUBOMIR FËRÇKOSKI – QEVERIA NË SHKUP PO NXIT TENSIONET NDËRETNIKE Fërçkoski – Konflikti në Maqedoni s’ka të bëjë me “Shqipërinë e Madhe”

 

Ish-ministri i Jashtëm i Maqedonisë, Lubomir Fërçkoski, ka analizuar për Radion Evropa e Lirë zhvillimet në Maqedoni, veçmas prapavijën e konfliktit të armatosur në Kumanovë, dhe ka akuzuar Qeverinë në Shkup për nxitje të tensioneve etnike. Ai thotë se e gjitha është çështje e brendshme e Maqedonisë dhe se nuk ka të bëjë asgjë me fqinjët.Radio Evropa e Lirë: Në Serbi, gazetat kanë dalë me titujt: “Shqipëria e Madhe po troket në derë”, “Nisi lufta për Shqipërinë e Madhe”, “Kumanova sulmohet nga Kosova”… A mund të interpretohen nga ky kënd ngjarjet në Maqedoni?Lubomir Fërçkoski: Kam lexuar tituj të tillë në portale, si: “Çetnikët nisen për të çliruar Kumanovën”, pastaj “Shqipëria e Madhe”, “Nisi lufta në Maqedoni”, “Kaos në Maqedoni” e të tjera. Kjo qeveri edhe e ka merituar këtë. Mirëpo, asgjë e ngjashme me këtë nuk ndodh në terma realë. Bëhet fjalë për një fenomen që e kam cekur gjithmonë. Çdo qeveri e VMRO-DPMNE-së përfundon me tensione etnike. Ky është rregull në Maqedoni; ata thjesht nuk dinë të qeverisin në një shtet multikulturor. Qeverisin me korrupsion, krim, korruptojnë madje edhe shqiptarët. Dhe, në fund, gjithmonë përfundon me ndonjë tension.Radio Evropa e Lirë: Ju thoni se ky është një konflikt i inskenuar?

Lubomir Fërçkoski: Jo, nuk e them këtë, sepse nuk e di. Nëse është inskenuar, atëherë kanë humbur kontrollin. Me kaq të vdekur është një skenar i keq. Nuk dihet se sa civilë kanë pësuar, sa shqiptarë, atmosferë paniku në Kumanovë dhe më gjerë, tensione midis shqiptarëve dhe maqedonasve… Këto të gjitha janë kombinime të këqija. Nëse qeveria mendon se tani do të fitojë mandatin për ta rregulluar këtë, se bashkësia ndërkombëtare do t’i thotë: ju rregullojeni, ne qëndrojmë prapa jush, ajo gënjehet.

Radio Evropa e Lirë: Ministrja e Brendshme e Maqedonisë, Gordana Jankullovska, ka thënë se grupi i armatosur, apo “terroristët” siç i ka quajtur ajo, kanë ardhur nga një vend fqinj dhe se një pjesë e tyre janë nga Maqedonia…

Lubomir Fërçkoski: Ky është një aluzion për UÇK-në dhe për kryengritësit shqiptarë në Maqedoni në vitin 2001. Nuk është e vështirë këtu të gjenden grupe që nuk janë të kënaqura me pjesëmarrjen e shqiptarëve në qeveri. Komandanti i tyre, njëri nga ata të ashtuquajtur komandantë, drejton gishtin kah Ali Ahmeti (kryetari i Bashkimit Demokratik për Integrim – parti që mjerr pjesë në koalicionin qeverisës të Maqedonisë). Ai thotë: ose Ahmeti të dalë nga qeveria, ose do të ketë luftë në Maqedoni. Kjo është teza e tij.

Andaj, unë mendoj se dështimi në qeverisjen e vendit krijon klimën që grupe të ndryshme të organizuara, të gjysmë-organizuara, grupe që vijnë nga jashtë ose nga brenda – çfarë ka pak rëndësi – të gjejnë terren. Ato janë nisur nga nënçmimi i shqiptarëve në qeveri; korrupsioni i tyre shkakton zemërim te shqiptarët. 52 për qind e shqiptarëve të Maqedonisë nuk janë të përfaqësuar në politikë. Kjo pakënaqësi kulmon në incidente të tilla. Kjo nuk ka të bëjë me konceptin e “Shqipërisë së Madhe”, me Kosovën, me Shqipërinë etj. Ky është është frustrim brenda shqiptarëve të Maqedonisë dhe, në njëfarë mënyrë, u drejtohet përfaqësuesve të tyre në qeveri.

Radio Evropa e Lirë: Nëse kjo është çështje e brendshme e Maqedonisë, çfarë parashikoni ju? Flitet se shqiptarët dhe maqedonasit në masë të madhe kanë ruajtur qetësinë, janë të vetëpërmbajtur. A është vërtet një atmosferë e tillë?

Lubomir Fërçkoski: Po, kjo është e saktë. Asnjë parti politike shqiptare, as banorët e Kumanovës nuk duan që kjo të eskalojë. Mirëpo, këto banda do të konsiderohen si të mundura dhe ato kanë paralajmëruar për incidente të tjera. Andaj, nuk është e mundur që të përjashtohen incidentet. Në anën tjetër, ajo çfarë është e rrezikshme, është loja e VMRO-së, mobilizimi i maqedonasve kundër shqiptarëve, si mënyrë e mbijetesës së tyre në pushtet. Kjo është kartë e rrezikshme. Qeveria akuzon opozitën, akuzon të huajt për destabilizim. Deklarata e presidentit tonë të ashtuquajtur është se opozita, BE-ja dhe NATO janë fajtorë për krizën në Maqedoni. Mirëpo, besoj se nuk do t’ia dalin.

Radio Evropa e Lirë: A ka rrezik që dhuna të përhapet në rajon, në vendet fqinje: Serbi, Kosovë?

Lubomir Fërçkoski: Jo, nuk besoj. Këto do të mbeten incidente të Maqedonisë. Opozita ka paralajmëruar protestë të madhe më 17 maj. Opozita e Maqedonisë ka dashur që së bashku me shqiptarët të protestojë kundër qeverisë. Qeveria po punon që të thyejë këtë opozitë të përbashkët të qytetarëve maqedonas dhe shqiptarë. Kjo më bën të zemëruar.

MEDIAT E SERBISË – NESËR FILLON LUFTA E VËRTETË NË MAQEDONI

VOAL – BEOGRAD – Gazetat kryesore të Beogradit sot në faqet e para të tyre janë marrë me atë që ndodhi në Kumanovë, duke mëtuar se kanë informacione që lufta e vërtetë në Maqedoni do të fillojë më 12 maj (nesër) dhe se ajo po bëhet me mbështetjen e Shteteve të Bashkuara të Amerikës. Gazeta serbe ‘Kurir’, e cila njihet për afërsinë e saj me shërbimin sekret (BIA), në ballinën e saj shkruan se ‘Lufta e vërtetë fillon më 12 maj’. Ajo i referohet burimeve të saj dhe në deklaratat publike të saj dhe në në deklaratat publike të pjesëtarëve të armatosur që morën pjesë në përleshjen e Kumanovës e që veten po e quajnë UÇK se lufta e vëtetë e cila ka për qëllim krijimin e Shqipërisë së Madhe, fillon nesër.

Ndërsa gazeta tjetër ‘Informer’, gjithashtu e njohur për afërsinë me pushtetin në Serbi, shkruan se shqiptarët që u përleshën me policinë maqedonase në Kumanovëkëtë po e bëjnë me mbështetje të Shteteve të Bashkuara të Amerikës, dhe kjo me qëllim pengimin e projektit rus të gazsjellësit, i cili kalon përmes Turqisë, Greqisë, Maqedonisë dhe Serbisë, për të dalë më pas në Evropën Perëndimore, transmeton lajmi.net.
Kjo gazetë duke iu referuar burimeve diplomatike shkruan se zyrtarët e inteligjencës amerikane u kanë dhënë sinjal pjesëtarëve të UÇKsë për të filluar sulmet.

‘Ky sulm ishte mesazh që kishte për qëllim t’i dërgohej kryeministrit maqedonas Gruevski dhe homologut të tij serb Vuçiç. Mos harroni se në ditën e sulmit në Maqedoni, në Moskë ushtria serbe marshoi në paradë ushtarake së bashku me rusët,” citon kjo gazetë një prej ambasadorëve të Serbisë, të cilit nuk ia përmend emrin.

MAQEDONIA FSHIN NGA EVIDENCA MBI 200 MIJË SHQIPTARË Nga SHPËTIM POLLOZHANI*

Derisa maqedonasit prodhojnë mbi 100 mijë letranjoftimi fantome (sipas bombave të fundit të kryetarit rë opozitës) dhe shfrytëzojnë mbi 200 mijë votues fiktivë në zgjedhje, përfaqësuesit tanë në Parlament rrahin ujë në havan. Në Parlament ka mbëri një ligj, me të cilin, të gjithë qytetarët që janë mbi tre muaj jashtë vendit, fshihen nga Lista e zgjedhësve, kurse të gjithë ata qytetarë që jetojnë jashtë vendit mbi një vjet, fshihen nuk quhem më shtetas të Maqedonisë. Pavarësisht pronave që kanë, për të cilat paguajnë taksa dhe tatime.

Këtë propozim ligj, gjoja e pengon partia shqiptare në pushtet. Tashti paraqitet e gjallë edhe partia «opozitare» e Menduh Thaçit. Që të dyja deklarojnë se, do ta bllokojnë këtë ligj në Parlament pasi duhet të praktikohet Parimi Badinterit, sipas të cilit ky lloj ligji duhet të votohet edhe nga më shumë se gjysma e deputetëve shqiptarë. Të gjithë deputetët shqiptarë ngrejnë pluhur pasi, ky ligj i ka kaluar të gjitha fazat e parapërgatitjes së ligjeve. Propozimligji ka kaluar në Qeveri dhe në Komisionin për Sistem Politik, i cili është organ i Parlamentit. Ku ishin këta «patriot» derisa Propozim ligji ishte në procedure? Përse që atëherë nuk e informuan opinionin shqiptar, i cili duhej që mospajtimin e vet ta shprehë edhe në rrugë? Të gjithë ligjet antishqiptare që miratohen në Parlamentin e vendit, populli shqiptar i kupton pasi ato të dalin në seancë plenare. Të gjitha partitë maqedonase, mospajtimin e vet me politikën e pushtetit e shprehin në rrugë, si një mjet shumë i fuqishëm i demokracisë parlamentare.

Maqedonasit, pothuajse çdo ditë janë në rrugë. Partitë shqiptare dhe populli shqiptar i tremben rrugës. I tremben njëlloj sikurse dreqi temjanit. Shqiptarët e ngratë mendojnë se një parti politike e keqe mundet të rrëzohet me krijimin e një partie tjetër. Këto parti politike nuk mundet të rrëzohen duke krijuar parti të reja politike. Këta dy parti (BDI-PDSH) mundet të rrëzohen vetëm pasi të jenë rrëzuar shërbimet sekrete të vendit.
Ligji i ri për kartat e identitetit nuk do të kalojë në parlament por, do të kalojë mashtrimi i rradhës i përfaqsuesve, «tanë» se ata po i bllokojnë ligjet antishqiptare. Ky është një pazar i ri dhe turpshëm i Ali Ahmetit, i njëjtë me pazarin e kishës në Kalanë e Shkupit. Ligjin për Branitelat… Ndërtimin e kishës në Kalanë e Shkupit e «pengoi» partia e Ahmetit, edhe pse çështja e ndërtimit të asaj kishe kishte kaluar të gjitha procedurat në kohën kur PDSH ishte në pushtet. Pengimi i ndërtimit të kishës në Kala, ishte një marëveshje BDI-VMRO. Ti bën sikur ndërton, kurse unë do të bëj sikur të pengoj. Ndërtimi i Kishës u «ndërpre». Të dyja partitë dolën të fituara, vetëm populli ngeli i humbur. VMRO fitoi përpara elektoratit të vetë me arsyetimin se po e ndërtonte kishën, mirëpo shqiptarët e këqinj po më pengojnë. «Fitoi» edhe Ahmeti duke i thënë elektoratit të vetë: «A jeni duke parë? Ne jemi të fuqishëm, ne i mbrojmë interesat e shqiptarëve.» Dhe si rasti i kishës në Kala, janë edhe mbi dhjetë raste të tjerë të mashtrimit të qytetarëve.

«Humbja» e tre deputetëve shqiptarë në diasporë, nuk ishte dështim i shqiptarëve që jetojnë në Europë, Amerikë dhe në Australi. Humbja e tre deputetëve ishte pjesë e pazarit të Aliu Ahmetit, për t’u futur në grazhdin e turpshëm të Qeverisë pa asnjë kusht.
Në të ashtuquajturat bomba të kryetarit të opozitës, Zaev, nuk ngacmohet aspak partia e Ahmetit. Nuk del në shesh asnjë e dhënë komprometuese për të, edhe pse mund të jenë qindra të tilla. Zaev do ta mbrojë Ali Ahmetin deri në pikën e fundit, pasi partner më të dëgjeshëm, më të shërbyeshëm dhe më servil nuk do të mund të gjejë. Kryetarit të opozitës mqaedonase i nevojitet një partner shqiptar që, përveç të qenit në Qeveri, nuk kërkon asgjë dhe, për këtë Ali Ahmeti është i përkryer.

Në këto momente, kur Gruevski ka rënë në qarkun e përgjimeve të mbi 25 mijë qytetarëve – e kanë zënë me presh në dorë edhe Ali Ahmetin duke përsëritur fjalët NATO dhe BE, që ma kujton atë somnabulistin, i cili sheh nga hëna dhe, nuk thotë asgjë tjetër vetëmse «Hëna..hëna..hëna…», apo një të pirë, i cili vetëm mërmërit dhe rrotullohet rreth një bendere.

Për fat të keq shqiptarët janë duke pritur shumë nga «bombat» e Zaevit. Do të dëshpërohen shumë, kur do të shohin se ato nuk janë kurgjë tjetër, përveçse, fushqeta (fishekzjarre). Të mos harrojmë se ish kryetari i partisë së Zaevit, Cërvenkovski, u dhuroi nga një revolver Colt, të gjithë atyre forcave peciale, të cilët i masakruam pesë qytetarë të pafajshëm gjatë protestave të Gostivarit dhe, gjatë arrestimit të Rufi Osmani në vitin 1998. Të mos harojmë, pasi, si duket, jemi harrues të mëdhenj dhe, ky është shkaku që ne po na përsëritet historia, herë si tragjedi e herë si farsë…

Vetëm rinia në rrugë mundet ta rrëzojë këtë klasë të mykur e të korruptuar politike – në Shqipëri, Kosovë e Maqedoni. Shqiptarët, gjithandej ku janë, duhet që këtë pranverë ta kenë pranverën e rilindjes. Politika e Berishës, Nanos, Ramës, Thaçëve e Alive, i dëboi rrugëve të botës mbi një million e gjysmë shqiptarë. Thaçi i Kosovës po i dëbon me shumicë, nga 50 mijë në javë. Aliu është duke e zgjidhur problemin me shqiptarët. Do ta zgjidhë në atë mënyrë që një ditë shqiptarët nuk do të jenë më problem. Në zgjedhjet e ardhshme lokale, shqiptarët do ta kenë problem të madh që prefekti i Strugës dhe i Kërçovës të jenë shqiptarë. Strategjia e mësimit të integruar është duke na e futur ujin nën rrogoz, njëlloj sikurse dikur në komunizëm.

Në të gjithë këtë katrahurë politike ka një gjë të mirë: Të gjithë e dimë se nuk jemi mirë. Kur një i sëmurë e din se e ka një problem, ai e gjen një çare. Populli ynë ka djem që i dalin zot atdheut, si gjithnjë kur e ka dashur historia.

*Autori është kryetar i Shoqatës së të Burgosurve Politikë në Maqedoni

Kumanovën nuk ka kush ta mbrojë, se Ali Ahmeti është merecenar i Gruevskit Nga Elida Buçpapaj

Nga Kumanova kanë mbërritur foto të terrorit shtetëror, shtëpi të djegura e të boshatisura e për rrjedhojë familje të zhvendosura. Prona dhe pasuria e banorëve të Lagjes së Trimave është kthyer në hi e pluhur. Mundi, puna, djersa dhe jeta e tyre është kthyer në gërmadhë. Në Lagjen e Trimave ka patur luftë të vërtetë dhe këto rrënoja që po bëjnë xhiron e botës i ka shkaktuar shteti.

Në këto shtëpi, tashmë skeletë të nxirë prej tymit, kanë jetuar deri një javë më parë familje civile, nëna, gjyshe, gjyshër, burra e gra e fëmijë. Çfarë ka patur shteti maqedon me këta civilë? Nga burimet shtetërore të Maqedonisë thuhet se makineria ushtarake e këtij shteti ka luftuar me terroristë, ndërsa pasojat i kanë patur civilët e pafajshëm, ndërkohë që shteti maqedon ka vepruar në mënyrë unilaterale, etnikisht dhe po ashtu në kontekstin e bashkëredimit të veprimeve me Aleatët, duke i përjashtuar kësisoj edhe shqiptarët edhe NATO-n edhe BE-në, kur dihet se forcat e KFOR-it janë aty afër.

Veprimet e papërgjegjëshme të Gruevskit sot, të kujtojnë ato të qeverisë ish-kryeministrit Georgievski në krizën e 2001, kur ministri i tij i brendshëm Ljube Boshkoski, i akuzuar më vonë nga Haga për krime kundër njerëzimit, dërgoi tanket dhe blindat kundër popullsisë civile në fshatin Lubotin, me pretekstin se po luftonte me grupet terroriste, si tani.

Atëhere aleate e Georgievski ishte partia e Arbër Xhaferit, ndërsa sot partia e Ali Ahmetit, e dalë prej konfliktit të 2001, kur Shqiptarët nuk luftonin kundër Maqedonisë, sepse ata janë shkaku që ekziston Maqedonia, por luftonin kundër segregacionit, aparteidit dhe shqiptarofobisë së sllavëve të Maqedonisë që vijojnë të uzurpojnë gjithë pushtetin politik dhe i trajtojnë shqiptarët si qytetarë të dorës së fundit.

Si qytetetarë të dorës të fundit kanë mbetur shqiptarët edhe pas Marrëveshjes së Ohrit, e cila ka mbetur në letër, sepse aleatët politikë shqiptarë të VMRO–DPMNE, që ishte në pushtet edhe në krizën e 2001, janë mercenarë dhe kuislingë, pasi, sa marrin privilegje individuale, i harrojnë premtimet, detyrat dhe detyrimet që kanë ndaj shqiptarëve të Maqedonisë, që në fakt janë një komb shtetformues, dhe duhet të kenë të njëjtat të drejta me sllavët e Maqedonisë. Dhe modelet i kanë. Shikoni se çfarë të drejtash ka pakica serbe dhe pakicat e tjera në Kosovë, ndërsa shqiptarët e Maqedonisë nuk gëzojnë as të drejtat e pakicave. Standardet Perëndimore janë të njëjta, si për serbët, si për sllavët e Maqedonisë, ashtu edhe për shqiptarët. Nëse shteti i Maqedonisë do të vijojë e të mos i respektojë këto standarde, e do të vijojë t’i trajtojë shqiptarët si „terroristë“, duke e djegur bashkë me pronat e shqiptarëve të Kumanovës përfundimisht edhe Marrëveshjen e Ohrit, atëhere në Maqedoni nuk do të ketë qetësi dhe shkaktar për këtë është Gruevski dhe jo shqiptarët.

Sepse në Maqedoni ka pabarazi etnike, që ka në themel diskriminimin etnik dhe racor të sllavëve të Maqedonisë ndaj shqiptarëve të Maqedonisë. Dhe shqiptarët natyrisht që nuk do të lejojnë të jetojnë në aparteid në zemër të Europës. As BE, SHBA dhe NATO nuk mund të tolerojnë më nëpërkëmbjen e shqiptarëve dhe kalljen në flakë të Marrëveshjes së Ohrit nga Gruevski, sepse atëherë nuk do të ketë stabilitet dhe paqe afatgjatë në Ballkan e rajon. Sepse sllavo-maqedonët nuk mund të vijojnë e të mbajnë geto me shqiptarët e Maqedonisë, të cilëve nuk u krijojnë asnjë kusht minimal për të jetuar, nuk u japin as punë dhe asnjë mundësi, por vetëm u tregojnë dhëmbët, duke u djegur shtëpitë dhe duke i lënë në mjerim e nën kërcënimin e shtetit policor i cili është ai që sillet si një makineri terroriste.

Prandaj duhet ndërhyrja e menjëhershme e SHBA, BE, NATO-s. Duhet po ashtu edhe reagimi i politikës shqiptare, jo për të larë gojën. Nga shteti amë dhe Kosova, politika i ka rrahur krahët si Gruevskit, ashtu edhe Ali Ahmetit, ndërsa shqiptarët e Maqedonisë jetojnë në shtëpitë e tyre duke e patur shtetin kundër, e bashkë me të edhe politikanët shqiptarë për të cilët ata votojnë.

Nuk mund të tolerohet më tutje mercenarizmi i politikës shqiptare në Maqedoni, sot i partisë të Ali Ahmetit, që hesht përpara asaj që ka ndodhur në Kumanovë. Të paktën nëse kthehemi në kohë, Arbër Xhaferi protestoi menjëherë ndaj terrorit shtetëror të shtetit maqedon kundër civilëve në fshatin Luboten, ndërsa sot Ali Ahmeti, divizën e luftëtarit në kërkim të të drejtave legjitime të shqiptarëve, që mbante në vitin 2001 e ka ndërruar me atë të mercenarit.

Shqiptarët e Maqedonisë nuk duan luftë, duan punë dhe barazi sociale me palën tjetër shetformuese, e cila i ka uzurpuar të gjitha privilegjet dhe shqiptarëve të Maqedonisë në vend të punës dhe jetës me dinjitet u djeg shtëpitë dhe i shpall terroristë.

TJETËR BETEJË SLLAVO-SHQIPTARE! Ç’ROL LUAN RUSIA? Nga BORIS KALNOKY, Die Welt

Nga përplasjet me armë mes policisë dhe luftëtarëve guerilas në veri të Maqedonisë kanë vdekur rreth 40 persona. Rrezikon të ketë një tjetër konflikt mes sllavëve dhe shqiptarëve- si në vitin 2001. Një rol këtu luan edhe Rusia

Pas luftimeve në fundjavë mes forcave të sigurisë maqedonase dhe shqiptarëve të armatosur, qarqet e sigurisë në Kosovë presin një konflikt më të gjatë dhe më të madh në vendin fqinj- nëse liderët e rajonit nuk mblidhen menjëherë për të gjetur një zgjidhje politike, tha një burim i mirëinformuar në kryeqytetin kosovar, Prishtinë.

Luftimet në Kumanovë kanë sjellë rreth 40 viktima dhe dhjetëra të plagosur. Shumica e viktimave ishte nga njësiti “Tigri” i Ministrisë së Brendshme.

Sipas të dhënave nga njohës të mirë të situatës në Prishtinë, shqiptarët e kapur nga njësitë speciale maqedonase janë keqtrajtuar rëndë në qeli. Disa prej tyre dhe janë të plagosur rëndë. Edhe civilë janë arrestuar, mes tyre një familje me tre fëmijë.

Që në vitin 2001 ka pasur një konflikt të armatosur mes shqiptarëve dhe sllavëve të Maqedonisë, me 200 viktima dhe rreth 1 mijë të plagosur. Konflikti përfundoi me një marrëveshje paqeje në Ohër. Udhëheqja maqedonase premtoi më shumë të drejta kolektive për shqiptarët. Rreth një e treta e popullsisë në Maqedoni janë shqiptarë etnikë, të cilët jetojnë pranë kufirit me Kosovën dhe Shqipërinë.

Qeveria në Shkup bëri të ditur të dielën se një pjesë e luftëtarëve shqiptarë kanë ardhur nga një vend fqinj- duke nënkuptuar Kosovën.

Këtë pretendim e kanë rrëzuar autoritetet në Prishtinë.

Një burim nga qarqe të sigurisë në Prishtinë tha për gazetën Welt se mund të ketë edhe kosovarë të implikuar në luftime. Edhe në vitin 2001, një pjesë nga klani kosovar ishte pjesë e luftimeve.

“Ka një lidhje më të ngushtë mes nesh dhe shqiptarëve të Maqedonisë, shumë më e ngushtë se mes atyre dhe Shqipërisë vetë,” tha ky burim.

Edhe pretendimet e Shkupit se luftëtarët shqiptarë duan një konflikt të ri, ka gjasa të jetë i vërtetë.

“Duket kështu, sikur një pjesë e shqiptarëve, që sulmuan me armë në vitin 2001, duan ta bëjnë sërish këtë, për shkak se qeveria në Shkup nuk ka zbatuar Marrëveshjen e Ohrit”.

Konflikti mund të zgjerohet nëse nuk ndërhyjnë qeveritë e rajonit, por edhe SHBA dhe BE.

Qeveria e Maqedonisë është nën presion të brendshëm politik prej muajsh, pasi ka përgjuar mbi 20 mijë persona, mes tyre politikanë dhe gazetarë. Prej javësh në vend ka protesta masive.

Mundet që aktivistët shqiptarë e kanë zgjedhur këtë moment dobësie për të nisur një konflikt. Por është e mundur edhe që qeveria ka vendosur të shpërthejë këtë konflikt, duke devijuar vëmendjen nga problemet e saj të brendshme. Opozita ka deklaruar se do vazhdojë protestat deri në rrëzimin e Gruevskit.

E gjitha kjo ka shkaktuar edhe valë në politikën e jashtme. Qeveria ruse mbështet Gruevskin dhe ka dënuar betejën dhe protestat ndaj tij. Ministria e Jashtme foli qartë për një përpjekje të qarqeve perëndimore për të destabilizuar Maqedoninë.

Kosova dhe Shqipëria kanë marrëdhënie të ngushta me SHBA dhe po përpiqen për një integrim të shpejtë dhe të plotë në BE- ndërsa Serbia, ish- kundërshtare e luftës në Kosovë- ka po ashtu simpatinë e Moskës.

Nëse nuk ka një zgjidhje të shpejtë politike, qarqet e sigurisë në Prishtinë shohin se shteti maqedonas do jetë në rrezik të madh. Ai është vendi më i paqendrueshëm në Europë, pa një ushtri të vërtetë, me vetëm dy milionë banorë, por me një pakicë të madhe shqiptare. Bullgaria po ashtu pretendon se maqedonasit janë bullgarë në thelb. Edhe Ministria e Jashtme në Sofje ka bërë thirrje për një hetim të plotë të ngjarjeve.

Serbia i sheh maqedonasit si serbë dhe ka pozicionuar ushtrinë në kufirin me Maqedoninë. Greqia e konsideron emrin Maqedoni si grek. Pastaj janë shqiptarët që ëndërrojnë një ndryshim kufijsh- në fakt ëndërrojnë një Shqipëri të Madhe- atdheun e tyre me Maqedoninë verilindore dhe Kosovën si pjesë.

MEDIAT BOTËRORE – NGJARJET NË KUMANOVË PËR SHKAK TË KRIZËS POLITIKE

VOAL – Mediet ndërkombëtare janë përgjithësisht të një linje kur i referohen dhunës së përshkallëzuar në Maqedoni, duke bërë fajtore krizën politike që ka përfshirë vendin.

Ato i kanë kushtuar një vëmendje të veçantë situatës së krijuar atje, duke e cilësuar si një përleshje ndërmjet një grupi të armatosur dhe policisë e ndërsa disa media të tjera i kanë cilësuar si ‘aktivistë terroristë’, ashtu sikurse ministrja e Brendshme e Maqedonisë, Jankullovska.

Prestigjiozja “Washington Post” shkruan se aktet kriminale të Kumanovës, përveçse kanë alarmuar Maqedoninë, kanë rritur edhe shqetësimin për destabilitet në rajonin e Ballkanit.

Skenari i një krize të madhe në Maqedoni ishte parashikuar deri diku nga “New York Times”, e cila i ka dhënë tepër peshë edhe më herët aferës së përgjimeve.

Në një artikull tjetër të saj “New York Times” shkruan se Maqedonia ka bërë hapa prapa, duke iu referuar BE-së, e cila vitin e kaluar ka shprehur shqetësime serioze në lidhje me politizimin në rritje të institucioneve shtetërore dhe kontrollit të qeverisë mbi mediet. Prestigjiozja shkruan se Unioni duhet të ishte treguar më i ashpër me qeverinë e Shkupit, transmeton TCH. Sipas saj, duheshin qartësuar gjërat se Maqedonia nuk ka një demokraci funksionale dhe se autoritetet e bllokut 28 vendesh duhet të bashkëpunojnë më tepër me institucionet shtetërore, me qëllim që të sigurojnë një hetim të pavarur të akuzave mbi çështjen e përgjimeve. “New York Times” e mbyll duke thënë se kriza që ka kapluar vendin është një dështim i Europës që duartrokiti aq shumë nga Maqedonia më herët.

Ndërkohë që buja e dhunës në Maqedoni ka shkuar deri në Australinë e largët, ku një media vendase shkruan se shumë njerëz në Maqedoni, pavarësisht nga përkatësia etnike, janë të mërzitur me ritmin e ngadaltë të integrimit me Perëndimin, duke u përballur kështu edhe me një krizë të madhe ekonomike, si dhe të një papunësie që kap shifrën e 28 %. Po ashtu, liderët perëndimorë janë alarmuar gjithnjë e më shumë për atë që e cilësojnë si një rritje të autoritarizmit në Maqedoni.

HOMOLOGU BULLGAR E KËSHILLON GRUEVSKIN TË JAPË DORËHEQJE

VOAL – SOFJE – Kryeministri bullgar Boyko Borisov e këshillon kolegun e vet maqedonas Nikolla Gruevski që të japë dorëheqje, në mënyrë që të pushojnë protestat dhe përçarjet në vend, shkruan gazeta bullgare “24 Çasa”.

“Unë kam dhënë shembull se si e bën këtë një kryeministër nëse nuk e ka besimin për ndonjë arsye. Pastaj populli do ta kthejë besimin”, ka deklaruar Borisovi, transmeton kp, i cili në mandatin e vet të parë dha dorëheqje pas protestave për shkak të çmimeve të larta të gazit.

Ai ka shfaqur shpresën se situata në Maqedoni do të vihet nën kontroll dhe se shteti do të rregullohet.

“Maqedonia është një vend shumë i rëndësishëm për ne dhe shërbimet në çdo moment më informojnë se si po zhvillohet situata”, ka thënë mbrëmë Borisovi, duke vlerësuar se viktimat që ranë në Kumanovë janë pasojë e përçarjeve dhe problemeve në Maqedoni.

BANORËT E KUMANOVËS PYESIN – KU JANË BDI DHE AHMETI?!

VOAL – KUMANOVË – Banorët e Kumanovës apelojnë që partia shqiptare në pushtet më në fund të flas dhe të thyejë heshtjen.

Kjo thirrje bëhet nga Këshilli emergjent për ndihma që është formuar për t`i dalë në ndihmë banorëve të Lagjes së Trimave ku ndodhën përleshjet dhe terrori i paparë për banorët.

“Përveç një komunikate të lëshuar në mëngjesin e parë të së shtunës, kur kishin filluar krismat në Lagjen e Trimave, partia shqiptare në pushtet është mbyllur në heshtje. Pse heshtin, pse nuk dalin të flasin dhe të sqarojnë çfarë është puna, çfarë ka ndodhur. Ata janë njerëzit që i njohin që ishin këtu si pjesëtar të grupit të armatosur. Është e pafalshme kjo që po ndodhë dhe turp për politikën shqiptare. Ata duhet të japin sqarime dhe llogari, përfshirë edhe do parti tjera”, theksoi për INA, një aktivistë i këtij Këshilli për emergjencë për të ndihmuar banorët e Lagjes së Trimave.

Në lagjen ku ndodhën luftimet është një fotografi rrënqethëse. Banorët nuk shpresojnë shumë se do të ndodhë diçka e mirë për ta pas gjithë këtij terrori dhe dëmeve shpirtërore dhe materiale që kanë përjetuar. Ata apelojnë që bashkësia ndërkombëtare të përfshihet në hetimin e plotë të gjithë asaj që ndodhi dhe të ndihmojë në revitalizimin e kësaj lagje.

Asan.S nga Kumanova thekson se faktori ndërkombëtarë është e vetmja garancë që mund të bëj hetim transparent dhe të na tregojë se çka në të vërtetë ka ndodhur, por edhe të sigurohen mbështetje dhe ndihma për gjithë popullatën që ka përjetuar dëme të mëdha.

Dy përfaqësuesit shqiptarë të partive kryesore politike BDI dhe PDSH ishin në Këshillin e Sigurisë Kombëtare tek presidenti Gjorgje Ivanov, por ata nuk janë deklaruar as para dhe pas takimit, për të dhënë vlerësimet për situatën e krijuar.

KËSHTU DUKET SOT LAGJIA E TRIMAVE NË KUMANOVË – TEKST DHE FOTOGALERI

VOAL – LAGJIA E TRIMAVE, KUMANOVË – Pamje të tmerrshme në Lagjen e Trimave në Kumanovë, pas përleshjeve dyditëshe, sjell sot ina.

Rrugët e lagjes me shtëpi të rrënuara, dëme të mëdha, por edhe banorë me lot në sy, që nuk mund të shohin shtëpitë e tyre.

Një pjesë e tyre akoma nuk kanë mbërritur, për shkak ishin strehuar në vende më të largëta. Pamjet janë rrëqethëse me një kaos të tmerrshëm, shtëpi të rrënuara, rrugë me përplot gëzhoja plumbash, kabllo të energjisë të shpërndara rrugëve, makina të djegura, kafshë të ngordhura dhe pamje tjera rrëqethëse.kumanova duket2kumanova duket2kumanova duket3kumanova4kumanova5kumanova6kumanova7kumanova8kumanova9kumanova11

MANIFESTIM SPONTAN NË TIRANË ‘KUMANOVË NUK JE VETËM’

VOAL – TIRANË – Dhjetëra të rinj të Tiranës dhe shoqëria civile u solidarizuan mbrëmë me shqiptarët e Kumanovës, në një protestë paqësore.

Ata u mblodhën në orën 18:30 para Piramidës me parulla në duar ku shkruanin, “Kumanovë nuk je vetëm” dhe flamuj kombëtarë. Protestuan paqësisht për disa minuta me radhë fillimisht para Piramidës dhe më pas u zhvendosën përballë Ambasadës maqedonase në vendin tonë.

Thirrjet në kor ishin një: “O çohuni burra, o çohuni gra, për Kumanovën duhet me ra!”.

kumanov2

 

 

ZËRI I AMERIKËS – PAQARTËSI RRETH NGJARJEVE NË KUMANOVË

Autoritetet maqedonase e kanë quajtur operacionin e së shtunës dhe të dielës në Kumanovë kundër një grupi të armatosur, si më të vështirin ndonjëherë për forcat e sigurisë së vendit. Kryeministri maqedonas Nikolla Gruevski tha se aksioni nuk u zhvillua kundër popullatës shqiptare, ndërsa shprehu mirënjohje për pjesëtarët e të gjitha komuniteteve etnike në radhët e policisë. Policia speciale u tërhoq mbrëmë nga Kumanova, ku mbetën të vrarë 14 pjesëtarë të grupit të armatosur dhe tetë policë.

Autoritetet maqedonase thanë të dielën se është neutralizuar, sipas tyre, plotësisht grupi terrorist më i rrezikshëm në Ballkan, ndërkohë që radhitën emrat e pesë shtetasve të Kosovës si drejtues të grupit.

Sipas organeve të rendit ata jane: Sami Ukshini i njohur si komandant Sokoli, Beg Rizaj, Demë Shehu, Muhamet Krasniqi si komandant Malisheva dhe Mirsad Ndrecaj. Zëdhënësi i policisë, Ivo Kotevski u tha gazetarëve se katërmbëdhjetë trupa janë gjetur gjatë operacionit, në mesin e të cilëve ai i Xhafer Zymberit nga Gjakova.

Organet shtetërore thonë se tridhjetë terroristë u janë dorëzuar forcave policore, të gjithë shtetas të Maqedonisë dhe një shtetas i Shqipërisë.

Kryeministri maqedonas, Nikolla Gruevski e quajti një aksion heroik atë të policisë speciale maqedonase kundër atyre që mendohet të ishin një grup i armatosur në Kumanovë, të cilëve autoritetet maqedonase u referohen me termin “terroristë”.

Zoti Gruevski duke folur në një konferencë për mjetet e informimit tha të dielën se operacioni ishte një ndër më të vështirët për forcat policore të vendit. Gjatë aksionit kanë marrë pjesë të gjitha bashkësitë etnike, tha ai. Për jetët e humbura të tetë policëve, njëri prej të cilëve i përkatësisë etnike shqiptare, kryeministri maqedonas tha se ata ndoshta penguan vdekjen e tetë mijë njerëzve!

Për personat e arrestuar si pjesëtarë të grupit të armatosur, zoti Gruevski tha se do të gjykohen në bazë të ligjeve të Maqedonisë. Sipas kryemnistrit, disa nga personat që ishin të përfshirë në përleshjet me policinë, kishin marrë pjesë edhe në incidentin e fshatit Goshincë, para pak javësh. Autoritetet maqedonase vlerësojnë se synimi i këtij grupi ishte destabilizimi i Maqedonisë dhe sulmet kundër institucioneve të saj.

Ndërkohë presidenti i vendit, Gjorgje Ivanov, mblodhi Këshillin e Sigurisë, ku bëjnë pjesë drejtuesit më të lartë shtetërorë dhe ministra të resorëve të sigurisë,  si dhe anëtarë të zgjedhur nga presidenti. Gjithashtu të ftuar ishin drejtuesit e partive kryesore. Ali Ahmeti i BDI-së dhe Menduh Thaçi i PDSH-së dërguan përfaqësues të tyre, ndërsa Zoran Zaev i Lidhjes Social Demokrate të opozitës mori vetë pjesë në takim.

Policia me autoblindat dhe armatimin e saj u tërhoq pak para mbrëmjes së djeshme nga Lagja e Trimave në Kumanovë. Rezultati i përleshjeve është 22 të vrarë, sipas të dhënave zyrtare, mes tyre tetë policë dhe 14 pjesëtarë të grupit kundërshtarë.

Ndërkohë, në lidhje me zhvillimet në Kumanovë, është mbledhur në një takim Këshilli i përbashkët i misioneve të jashtme diplomatike, që përfshin ambasadorët e BE-së, SHBA-së, OSBE-në dhe përfaqësues të NATO-së, për të vlerësuar gjendjen e krijuar.

Këshilli shprehu keqardhje për jetët e humbura gjatë operacionit në Kumanovë, ndërsa e dënoi fuqishëm dhunën.

Në emër të këtij Këshilli foli ambasadorja Marijan Berezc, e OSBE-së në Shkup, duke theksuar besimin se ky është çasti kur drejtuesit politikë duhet të përfshihen në dialog për të gjitha çështjet me të cilat ballafaqohet vendi, përfshi edhe krizën e stërzgjatur politike dhe reformat e nevojshme. “Besojmë fort se nuk guxohet që të lejohet prishja e marrëdhënieve në shoqëri”, tha ambasadorja.

Zhvillimet në Kumanovë, kanë nxitur, nga ana tjetër, dyshime te një pjesë e opinionistëve, për shkak të kohës që ndodhi e që përputhet me krizën politike dhe me skandalin e madh të përgjimeve.

Opozita maqedonase sidomos, por dhe mjaft analistë shqiptarë janë të prirur të besojnë se ngjarjet në Kumanovë janë sajuar për të tërhequr vëmendjen e opinionit publik nga kriza reale që ka përfshirë vendin dhe për të futur frikën tek popullata që të mos dalë në protestat, të cilat synojnë rrëzimin e pushtetit.

TIRANA I KËRKON SHKUPIT TRANSPARENCË MBI ZHVILLIMET NË KUMANOVË

VOAL – TIRANË – Qeveria e Shqipërisë i bëri sot në mbrëmje thirrje autoriteteve maqedonase që të bëjnë transparencë të plotë dhe një hetim të thellë bazuar në fate e prova të besueshme për ngjarjet e dy ditëve të fundit në Kumanovë, ndërsa theksoi se kriza politike në Maqedoni nuk duhet të konvertohet në një krizë ndëretnike.

Qeveria shqiptare deklaron se ka ndjekur me vëmendje të veçantë dhe shqetësim të madh zhvillimet tragjike të orëve të fundit në Kumanovë. “Duke shprehur keqardhjen më të thellë për humbjen e jetëve njerëzore, Qeveria e Shqipërisë mbron bindjen se në asnjë rrethanë nuk mund të lejohet që kriza në Maqedoni të përshkallëzohet. Zhvillimet dramatike të ditëve të fundit në Kumanovë kanë cenuar normalitetin dhe marrëdhëniet ndëretnike, të cilat mbeten ende të brishta për shkak të moszbatimit të plotë të Marrëveshjes së Ohrit, por pa dyshim janë jetike për ekzistencën e shtetit maqedonas. Në këto kushte është më shumë rëndësi mbrojtja e jetës, pronës dhe lirive e të drejtave të çdo qytetari të Maqedonisë, pavarësisht, përkatësisë së tij etnike. Më shumë së asnjëherë, kjo vlen aktualisht për Kumanovën e banuar kryesisht nga shqiptare”.

Tirana shpreh shqetësim për mungesën e informacioneve të plota mbi ngjarjen. “Reja e paqartësisë mbi të gjitha orët e rënda të Kumanovës, të cilat u përjetuan me ankth nga shqiptaret kudo ku jetojnë, duhet t’ia lerë vendin sa më parë, transparencës së plotë për këtë ngjarje”, thekson deklarata ndërsa vë në dukje se “përveçse policëve të vrarë dhe të plagosur, ende nuk është thënë asgjë për jetët e qytetarëve të pa mbrojtur të Kumanovës, për arratinë e tyre, për pronën e tyre të bastisur, djegur dhe shkatërruar. Padyshim kjo paqartësi shqetësuese nuk ndihmon në kthimin e plotë të normalitetit. Por po ashtu kjo e bën edhe më imediate nevojën për kthjelltësi, qartësi dhe durim për t’i shkuar të vërtetës deri në fund”.

Qeveria shqiptare nënvizon se autoritetet ligjzbatuese në Maqedoni duhet “të mundësojnë dhe kryejnë një hetim të thellë, të shpejtë, të plotë e transparent, në funksion të së vërtetës dhe vet stabilitetit të Maqedonisë e rajonit. Vetëm transparenca e thellë dhe e plotë, nëpërmjet paraqitjes së fakteve e provave të besueshme për qytetarët, do të shërbente në rikthimin e besimit në institucione dhe do të shmangte përsëritjen e këtij precedenti aq të padëshirueshëm nga popullata civile të një ngjarjeje të tillë”.

Qeveria shqiptare deklaron se “dënon çdo akt dhune, duke e konsideruar atë të papranueshëm për një shoqëri demokratike që aspiron integrimin euro-atlantik”, duke shtuar gjithashtu se “do ta konsideronte jo vetëm kundër produktive po edhe të papranueshme për ambicien europiane të rajonit, çdo paragjykim mbi baza etnike të çdo personi apo grupi personash të armatosur”.

Tirana “thekson me forcë po ashtu se do të ishte e papranueshme humbja e drejtpeshimit në raport me këtë ngjarje dhe kurrsesi nuk duhet lejuar që kriza politike e Maqedonisë të konvertohet në një krize ndëretnike, e cila do të ishte shkatërrimtare për Maqedoninë”, ndërsa “bën thirrje për qetësi, vetëpërmbajtje dhe një zgjidhje të duhur të krizës në shërbim të qytetarëve dhe aq të domosdoshme në funksion të stabilitetit”, përfundon deklarata e Qeverisë së Shqipërisë. za

ZHURNAL – MË SE 50 GRA, FËMIJË DHE PLEQ SHQIPTARË NGA KUMANOVA PO MERREN NË PYETJE NË POLICI

VOAL – KUMANOVË – Më shumë se 50 shqiptarë që kanë banuar në lagjen e Trimave në Kumanovë gjenden në stacionet policore në bisedë informative bëjnë të ditur informacione jozyrtare nga terreni. Në mesin e tyre gra, pleq dhe fëmijë.

Informacionet jozyrtare flasin se këta persona janë marrë nga policia në bisedë informative për kinse a kanë dijeni me grupin e armatosur që dje u përleshë me policinë maqedonase ku 5 pjestarë të njësiteve speciale humbën jetën, ndërsa më shumë se 20 policë u plagosën.

Familjarët e këtyre mbi 50 personave kërkojnë ndihmë nga institucionet përgjegjëse dhe OSBE-ja që të dinë më shumë për fatin e tyre, pasi në mesin e tyre ka fëmijë , grad dhe pleq./zhurnal.mk/

OBORRI MBRETËROR SHQIPTAR – NDËRHYRJA USHATARAKE NDAJ CIVILËVE TË NDALOJË MENJËHERË

VOAL – TIRANË – Familja Mbretërore Shqiptare po ndjek me shqetësim të madh situatën e fundit në Kumanovë.Sipas një komunikate për media, Familja Mbretërore Shqiptare thotë se tensionet e përsëritura demonstrojnë dështimin e faktorit politik në Maqedoni, për të krijuar një ambient të sigurt dhe stabilitet.

“Diskriminimi i vazhdueshëm dhe racizmi janë në mospërputhje të plotë me Marrëveshjen e Ohrit dhe çojnë në tension të mëtejmë dhe trazira nëse mbeten të pazgjidhura”, thuhet në këtë komunikatë.

Në fund, Familja Mbretërore Shqiptare thotë se ndërhyrja ushtarake ndaj civilëve duhet të ndalojë menjëherë.

“Lutjet tona shkojnë për ato familje të cilat janë lënduar nga ky aksion ushtarak”, përfundon komunikata e Familjes Mbretërore Shqiptare e nënshkruar nga Princi Leka.

ANALISTËT – KUMANOVA U INSKENUA NGA GRUEVSKI, PËR TË QËNDRUAR NË PUSHTET

VOAL – SHKUP – Vala e fundit e incidenteve të dhunës në Maqedoni duke e përfshirë eshte këtë në Kumanovë, ku janë shkaktuar dëme të mëdha dhe pasoja katastrofale, ka shkaktuar reagime të shumta nga analistë maqedonas dhe ndërkombëtarë.

Ekspertë të mirënjohur maqedonas dhe ndërkombëtare dyshojnë se incidentet e dhunës në Maqedoni mund të jenë përpjekje e qeverisë maqedonase për të devijuar vëmendjen nga kriza e brendshme politike duke synuar që ta shndërrojnë atë në krizë ndëretnike e cila implikon tërë rajonin.

Gazetarja e mirënjohur maqedonase, Tanja Milevska, e cila aktualisht punon si korrespondente e “Huffington Post” në Bruksel, është shprehur se “në thelb, qëllimi është për të shpallur një lloj gjendjeje emergjente me synim ndalimin e protestave të planifikuara. Së këndejmi, terrorizmi del të jetë një justifikim ideal”.

Hulumtuesi dhe analisti i shquar britanik pranë universitetit prestigjioz “London School of Economics”, James Ker-Lindsay, thotë se “pas zbardhjes së skandaleve të qeverisë nga ana e opozitës, opinioni reagoi ashpër dhe tani vendi përnjëherë përballet me tensione të reja etnike”.

Maqedonasi Goran Peoski nënvizoi faktin që disa njerëz në Maqedoni druajnë se qeveria ka inskenuar akte “terroriste” dhe tani po i përgatitë anëtarët dhe përkrahësit e saj që t’i djegin pronat e shqiptarëve që situata të eskalojë.kp

KUMANOVË – PESË POLICË TË VRARË, 30 TË PLAGOSUR

VOAL – SHKUP – Ministria e Punëve të Brendshme e Maqedonisë tha se pesë policë janë vrarë dhe 30 të tjerë janë plagosur gjatë përleshjeve të së shtunës në Kumanovë. Ministrja e Punëve të Brendshme Gordana Jankullovska tha se nuk ka informacione për pasoja në mesin e civilëve dhe nuk nuk ka njohuri të sakta për  numrin e viktimave nga radhët e grupit të armatosur me të cilin pothuajse gjatë tërë ditës kishte shkëmbim zjarri.

Qyteti i Kumanovës, në veri të Maqedonisë, rreth 40 kilometra larg Shkupit, u gdhi të shtunën nga të shtëna të fuqishme. Sipas autoriteteve, një grup prej dhjetëra personash të armatosur mirë, kanë ndërmarrë sulme me pushkë automatike dhe me bomba, që përbën, sipas tyre, një akt terrorist. Krismat kanë vazhduar deri në orët e mbrëmjes.

Forca të shumta policore kanë ndërmarrë aksion kundër këtij grupi që nuk eshtë parë nga burime të pavarura.

Nga ana tjetër, banorë të qytetit flasin për pasoja në njerëz, por nuk ka asnjë konfirmim zyrtar mbi numrin e viktimave eventuale, apo dhe të të plagosurve.

Ministria e Punëve të Brendshme tha se grupi i armatosur, i veshur me uniforma të zeza, synonte të kryente sulme kundër institucioneve shtetërore. Zëdhënësi i ministrisë Ivo Kotevski tha se bëhet fjalë për një grup të stërvitur mirë që kreu sulme me armë automatike dhe me bomba.

Polica ka bllokuar rrugët e qytetit për orë të tëra. Ka shtëpi që u dogjën nga artileria, ndërsa disa familje me fëmijë të vegjël janë parë duke u larguar nga zona me valixhe.

Lagja e njohur si Divnaselë ose së fundmi si Lagja e Trimave është e banuar kryesisht nga shqiptarë.

Ekipe të gazetarëve janë penguar nga policia që të afrohen tek vendi i ngjarjes. Madje, një televizion që transmeton në gjuhën shqipe, ka njoftuar se ekipi i tij është kërcënuar nga pjesëtarët e policisë dhe se i është marrë video-materiali i regjistruar.

Lidhur me zhvillimet kanë reaguar partitë politike dhe komuniteti ndërkombëtar.

Bashkimi Demokratik për Integrim, përmes një komunikate u bën thirrje banorëve që të jenë të përmbajtur, të ruajnë gjakftohtësinë dhe që të mos bien pre e provokimeve.

BDI konsideron që zhvillimet e së shtunës në Kumanovë janë veprime që bien ndesh me përcaktimet strategjike të kombit shqiptar si në Maqedoni, Kosovë, Shqipëri dhe në Luginën e Preshevës.

Me thirrjen për qetësi ka dalë edhe Partia Demokratike Shqiptare, e cila kërkon nga Ministria e Rendit që të mos cenojnë jetët dhe pronat e qytetarëve.

Ndërkohë, Lidhja Social Demokrate e opozitës u bën thirrje banorëve që të mos bien nën ndikimin e skenarëve të errëta për nxitjen e konfliktit dhe destabilizimit të Maqedonisë. Kryetari i kësaj partie, Zoran Zaev u bëri thirrje kryeministrit Gruevski dhe Ali Ahmetit të BDI-së që t’u shpjegojnë qytetarëve të Maqedonisë se ç’farë po ndodh, se kush dhe pse po përpiqet ta destabilizojë vendin. Pse grupe kriminale nga vendet fqinje hyjnë në Maqedoni, kush i organizon dhe për çfarë qëllimi, shtroi pyetjen shefi i opozitës, duke thënë se viktima të këtyre zhvillimeve janë qytetarët maqedonas dhe shqiptarë, policë dhe banorë civilë. Ai bëri thirrje që banorëve t’u garantohet siguria.

Ndërkohë ka reaguar edhe Ambasada amerikane në Shkup e cila përmes një deklarate, shpreh keqardhje të thellë për humbjen e jetëve në aksionet në Kumanovë dhe përreth, dhe u shprehë ngushëllime familjeve të personave të vrarë dhe të plagosur. Ambasada njofton se po e ndjek nga afër situatën dhe se është në kontakt të vazhdueshëm me autoritetet dhe drejtuesit politikë, ndërkohë që u bën thirrje qytetarëve që të ruajnë qetësinë dhe të lejojnë mbledhjen e fakteve.

Edhe zyra e Bashkimit Evropian në Shkup njofton se është në komunikim të vazhdueshëm me autoritetet dhe me drejtuesit politik.

Bashkimi Evropian bëri thirrje për qetësi, ndërsa shpreson në shmangien e acarimit të tensioneve në këtë vend. Edhe OSBE-së ka lëshuar një reagim të ngjashëm.

Kjo gjendje e acaruar padyshim është rrjedhojë e krizës politike në Maqedoni, të shkaktuar nga skandali i madh i përgjimeve. Fshatrat shqiptare të Kumanovës ishin skenë e përleshjeve të armatosura në vitin 2001 midis kryengritësve shqiptarë, të cilët luftonin për të drejta më të mëdha dhe forcave qeveritare ushtarake-policore maqedonase, një konflikt që përfundoi me Marrëveshjen e Ohrit në gusht të atij viti. za

KUMANOVË – JANË DJEGUR DY SHKOLLA, PËRPLASJA VAZHDON

VOAL – Përleshjet e armatosura mes policisë dhe një grupi të armatosur në Kumanovë po vazhdon, ndërsa banorët e lagjeve të prekura nga ky aksion janë duke u evakuuar.Në të njëjtën kohë është duke u mbajtur edhe një seancë e jashtëzakonshme e Kuvendit Komunal atje.Al Jazeera raporton se rruga drejt këtyre dy lagjeve është e bllokuar, janë djegur dy shkolla, ndërsa, siç kanë raportuar mediat në Maqedoni, banorët, me ndihmën e policisë, janë duke u evakuuar dhe se kryesisht po shkojnë tek të afërmit e tyre, transmeton Koha.net.

Banorët janë duke u larguar më këmbë ndërsa ka edhe të atillë që po i transporton njësia speciale policore dhe se në përgjithësi, gjithnjë sipas mediave në Maqedoni, janë familje me fëmijë e të moshuar.

Ndërkaq, nga këto anë, siç raportohet, ende dëgjohen të shtëna rafali.

Nga distanca mund të shihet tym i zi ndërsa atje nuk po lejohet të shkojë askush përveç zjarrfikësve dhe ndihmës së shpejtë.

RADIO EVROPA E LIRË – QENDRIMI I SHBA E BE – PËRPLASJE TË ARMATOSURA NË KUMANOVË (Tekst dhe fotogaleri)


Të shtëna armësh dhe shpërthime të fuqishme janë regjistruar rreth orës pesë të mëngjesit në Kumanovë të Maqedonisë, të cilat janë duke vazhduar ende.Përleshjet kanë ndodhur ndërmjet forcave policore dhe një grupi të armatosur që ishte strehuar në disa shtëpi në “Lagjen e Trimave”, të banuar me popullatë shqiptare.

Sipas të dhënave të para, ka të plagosur, por ende nuk ka të dhëna zyrtare për viktima, ndërsa është vërejtur edhe tym nga disa shtëpi.

Mbi këtë zonë në vazhdimësi kanë fluturuar helikopterë të policisë dhe një aeroplan pa pilot.

Ministria e Punëve të Brendshme e Maqedonisë, në konferencën e parë për shtyp ka njoftuar se aksioni policor në Kumanovë është ndërmarrë për të zhbërë një grup më të madh terroristësh, të cilët kanë pasur në plan të sulmojnë institucionet e shtetit.

“Sipas informacioneve operative, të cilat i ka pasur MPB-ja, një grup i armatosur ka pasur për qëllim që të organizojë sulme të armatosura ndaj institucioneve të ndryshme shtetërore. Informacionet, të cilat i kemi siguruar më parë, tregojnë se grupi ka hyrë në Maqedoni nga një shtet fqinj dhe nëpërmjet mbështetësve të tyre është strehuar dhe është përgatitur që të veprojë për sulmet e tyre terroriste”.

“Policia ka arritur të gjejë lokacionin e tyre, se ata fshihen në disa shtëpi te ‘Lagjja e Trimave’. Sipas të dhënave, bëhej fjalë për një grup që është i armatosur mirë dhe i trajnuar për luftë në kushte të tilla”, ka deklaruar zëdhënësi i Ministrisë së Punëve të Brendshme të Maqedonisë, Ivo Kotevski, duke dhënë dhe një kronologji të zhvillimeve të mëngjesit të së shtunës në Kumanovë.

“Në aksionin e sotëm, nga ora 5 e mëngjesit, policia ka filluar operacionin, ndërsa ka hasur në rezistencë të ashpër ku është shtënë me armë kallashnikov, armë më të rënda, snajperë dhe bomba. Bëhet fjalë për një vend me rrugë të ngushta dhe policia duhet të bëjë kontrolle nëpër të gjitha shtëpitë me qëllim që ta shkatërrojë deri në fund këtë grup”, ka deklaruar Kotevski.

Ai u ka bërë thirrje qytetarëve që të qëndrojnë të qetë dhe të përmbajtur, ndërkohë që nuk ka dhënë detaje për numrin e të plagosurve apo viktimave eventuale.

Kotevski ka thënëse gjendja ndryshon nga momenti në moment dhe përderisa vazhdon operacioni policor, nuk mund të japë informacione të këtilla.

Por, banorët lokalë thonë se gjendja në “Lagjen e Trimave” ku po zhvillohet aksioni, është shumë e rëndë .

“Kam një porosi për Ali Ahmetin dhe Nikolla Gruevskin, për çka po ndodh kjo situatë, pse trishtohen fëmijët dhe nënat shqiptare?”, ka deklaruar një grua, e cila kishte arritur të dalë nga kjo lagje me të birin e saj të mitur.

Edhe një banor tjetër maqedonas thotë se aksioni policor është përgatitur qysh gjatë mbrëmjes së kaluar:

“Qysh gjatë natës së kaluar ishin të pranishme forca të mëdha policore, të cilat tregonin se diçka do të ndodhë”.

Ndërkaq, deputeti i Zonës, Rexhail Ismaili, ka bërë thirrje për gjakftohtësi dhe që të mos krijohet panik.

“Apelojmë deri te popullata shqiptare e Kumanovës dhe Likovës që të jetë e vëmendshme gjatë kësaj situatë të rëndë, e cila po mbretëron për momentin. Njëherësh luten të mos i lëshojnë shtëpitë e tyre dhe të mos bëhen pre e provokimeve dhe pazareve të ndryshme”, ka thënë Ismaili.

Ambasada e Shteteve të Bashkuara në Shkup ka lëshuar një deklaratë për media, duke shprehur keqardhje për, siç ka thënë, humbjen e jetëve nga aksionet e armatosura në Kumanovë.

“Na vjen keq për humbjen e jetëve të njerëzve dhe shprehim ngushëllimet më të thella për familjet e të vrarëve dhe të plagosurve. Ne po monitorojmë situatën dhe jemi në kontakt të vazhdueshëm me autoritetet dhe liderët politikë. U bëjmë thirrje qytetarëve që të qëndrojnë të qetë dhe të lejojnë verifikimin e të dhënave”, thuhet në deklaratën e Ambasadës Amerikane në Shkup.

Në lidhje me përleshjet e së shtunës dhe incidentin në Kumanovë, ka reaguar edhe zyra e Bashkimit Evropian në Shkup.

“Jemi në kontakt me autoritetet dhe me partitë politike. Fuqishëm bëjmë thirrje te të gjithë qytetarët dhe faktorët politikë që të qëndrojnë të qetë dhe të presin që qeveritarët relevant të tregojnë faktet dhe të sqarojnë atë që po ndodh. Shpresojmë që do të shmanget përshkallëzimi i situatës dhe tensioneve”, theksohet në reagimin e Delegacionit të BE-së.

Nga ana tjetër, partia e tij, BDI, e cila është pjesë e Qeverisë, nëpërmjet një komunikate me shkrim, ka njoftuar se me shqetësim të thellë po ndjek zhvillimet e së shtunës në Kumanovë dhe në vazhdimësi u ka bërë thirrje qytetarëve për përmbajtje, rruajtje të gjakftohtësisë dhe që të mos bien pre e provokimeve.

“Bashkimi Demokratik për Integrim gjykon që zhvillimet e sotme në Kumanovë, por edhe ato të mëhershmet në Goshincë, si dhe shpërthimi para selisë së BDIsë dhe të tjera, janë veprime në kundërshtim të plotë me përcaktimet strategjike të kombit shqiptar si në Maqedoni, ashtu edhe në Kosovë, Shqipëri dhe Luginë të Preshevës”, theksohet në komunikatën e BDI-së, ku shprehet bindje se “asnjë destabilizim i vendit tonë nuk është në interes të kombit shqiptar në rajon”.

“Ministria e Punëve të Brendshme duhet të veprojë me përgjegjësi ndaj ndjeshmërisë së situatës së sigurisë dhe asaj politike”, theksohet në komunikatën e partisë shqiptare në pushtet, Bashkimit Demokratik për Integrim.

Ndërkohë, lideri i partisë maqedonase në opozitë LSDM, Zoran Zaev, i ka bërë thirrje Nikolla Gruevskit që menjëherë të dalë para qytetarëve dhe të japë sqarime, kush, pse dhe me çfarë qëllimi po e destabilizon Maqedoninë.

“Pse grupe kriminale nga territoret e vendeve tjera fqinje hyjnë në Maqedoni? Kush i organizon dhe për çfarë qëllimi? Të njëjtën duhet ta bëjë edhe Ali Ahmeti. Viktima janë qytetarët – edhe maqedonasit edhe shqiptarët, edhe policët, edhe popullata civile”, ka theksuar Zaev.

Edhe Partia Demokratike Shqiptare, nëpërmjet një komunikate ka ftuar qytetarët që ta ruajnë qetësinë dhe në asnjë mënyrë të mos bien pre e provokimeve:

“Partia Demokratike Shqiptare, konform pozicionit momental politik që ka si opozitë, kërkon nga Ministria e Punëve të Brendshme, si dhe institucionet e tjera qeveritare të involvuara në këtë situatë, që me veprimet e tyre në asnjë mënyrë të mos cenojnë jetën dhe pronën e qytetarëve”.

Në rajonin malor të Kumanovës, kohë më parë, kishte ndodhur edhe një incident tjetër, pasi persona të armatosur, të prezantuar si pjesëtarë të Ushtrisë Çlirimtare Kombëtare (UÇK), sipas policisë maqedonase, kanë sulmuar një stacion policie në fshatin Goshincë, në kufirin Maqedoni-Kosovë.

Rasti është vlerësuar si akt terrorizmi nga Qeveria e Maqedonisë, por opozita ka thënë se bëhet fjalë për skenarë të përgatitur për të shpërqendruar vëmendjen pas situatës së krijuar nga audio-incizimet e publikuara nga lideri i opozitës, Zoran Zaev, për të cilat ai thotë se janë bisedime të përgjuara paligjshëm nga ana e Qeverisë.





 

VAZHDON AKSIONI POLICOR NË KUMANOVË – NUK JEPEN TË DHËNA ZYRTARE

VOAL – KUMANOVË – Vazhdon aksioni policor në Kumanovë. Nga të dhëna jo zyrtare ALSAT mëson se numri i të plagosurve është në rritje, 13. Ministria e Punëve të Brendshme, deri në këto momente nuk ofron asnjë informacion zyrtar për ngjarjen në Kumanovë.

Në pyetjet e televizionit ALSAT për informacione mbi atë që po ndodh realisht në Kumanovë, numrin e të plagosurve apo viktimave të mundshme, zëdhënësi i policisë Ivo Kotevski, thjesht u përgjigj se “Aksioni është në vijim e sipër. Në momentin më të parë që do të përfundojë, ne do të dalim me deklaratë zyrtare.” Për momentin, ALSAT nuk mundi të arrinte për përgjigje as zëdhënësin e Sektorit për Punë të Brendshme të Kumanovës.

Ndërkaq, në spitalin shtetëror në Shkup, sapo ka mbërritur edhe ministri i shëndetësisë Todorv.

Zhurnal – GRUPE TË ARMATOSURA LËVIZIN NË MALËSITË E KARADAKUT DHE KUMANOVËS

VOAL – Shkup, 8 maj – Grupa të armatosura vazhdojnë të sillen dhe grumbullohen sërish në fshatrat e rrethinës së Kumanovës. Siç mëson ekskluzivisht agjencia e lajmeve “Zhurnal”, grupe të armatosura ekzistojnë dhe po lëvizin në Malësinë e Karadakut të Kumanovës.

Jozyrtarisht këta persona po bëhen gati të kryejnë ndonjë sulm më serioz se sa incidenti që kishte ndodhur ditë më parë në Gushincë.

Policia e Maqedonisë nuk ka konfirmuar e as mohuar një gjë të tillë.

Por a ka nevojë për një konflikt të ri nga shqiptarët?

Të gjithë miqtë ndërkombëtarë të shqiptarëve, duke përfshirë SHBA, BE dhe vendet anëtare të NATO-s, janë kundër një dhune dhe nxitje të ndonjë konflikti nga shqiptarët në Maqedoni.

Porosia e të gjithë diplomatëve të huaj që vizituan Maqedoninë gjatë ditëve të krizës politike ishte se nuk ka nevojë për konflikt të aramatosur dhe se pushteti duhet të bie me mjete demokratike.

“Të gjitha palët duhet të sillen me përgjegjësi, të tentojnë të gjejnë mënyrë që ta zgjidhin krizën. Maqedonia të progresojë drejt anëtarësimit në BE dhe NATO. Fuqimisht besojmë se ka mundësi për integrim të mëtejshëm të Maqedonisë në institucionet evropiane dhe euroatlantike dhe ky duhet të jetë qëllimi primar edhe i opozitës dhe partisë qeveritare dhe Qeverisë”, theksoi zëvendës-ndihmës sekretari amerikan i shtetit Hojt Ji gjatë qëndrimit të tij në Shkup.

Në Maqedoni qëndruan edhe ambasadorë të pesë shteteve më me ndikim që qëndrojnë në qendrën e misionit të OSBE-së në Vjenë, të cilët gjithashtu theksuan se duhet të ruhet paqja dhe stabiliteti i këtij shteti.

Edhe politika zyrtare e Kosovës dhe ajo e Shqipërisë, si dy shtete të shqiptarëve thanë në mënyrë të prerë se një konflikt i ri nuk është në interes të shqiptarëve.

Shqipëria akuzoi dhe i kërkoi llogari Rusisë për veprimet e fundit pas rastit të Gushincës, ndërsa Kosova tha se në asnjë mënyrë nuk do të lejojë që çfarëdo grupe të prishin imazhin e Kosovës për të cilin shtet u dhanë me qindra mijë jetë të shqiptarëve.

Banorët e fshatrave të Karadakut të Kumanovës thanë se s’ka nevojë askush të vijë e të bëjë luftë në vatrat e tyre, pasi ende nuk i kanë shëruar plagët e luftës së 2001. Ata qartë thanë se çdo kush që tenton për çfarëdo interesi të dëmtojë banorët e kësaj ane nuk do të gjejë përkrahjen e banorëve.

Edhe ish komandantë të UÇK-së qartë thanë se nuk është koha të ketë luftë pasi ajo tani shkon vetëm në dobi të maqedonasve dhe interesave sllave.