Personi për të cilin besohet se është i dyshuar për sulmin me kamion në Tregun e Krishtlindjeve në Berlin është vrarë sot, gjatë të shtënave në një lagje të qytetit verior italian, Milano, i ka thënë agjencisë Reuters një burim i sigurisë.

Një video e postuar në faqen e internetit të revistës italiane, Panorama, ka sugjeruar se të shtënat kanë ndodhur para agimit, ndërsa policia e kishte rrethuar atë hapësirë derisa ende ishte terr.

Ky informacion është njëri nga raportet kundërthënëse lidhur me vendndodhjen e të dyshuarit tunizian, Anis Amri, 24 vjeçar.

Hetuesit gjermanë patën thënë se besonin se i dyshuari Amri ishte ende në Berlin, pasi ai me gjasë ishte i plagosur, pati raportuar Der Tagesspiegel, duke u mbështetur në burime të sigurisë. (REL)

Përgatiti: Fatmir Bujupi

Fronti Kombëtar francez (FN) ka problem që të mbledhë fonde prej 20 milionë eurosh të cilat i ka të nevojshme për zgjedhjet presidenciale dhe parlamentare të vitit të ardhshëm, ka thënë sekretari i thesarit të kësaj partie për “Bloomberg News”.

“Banka e Parë Çeke e Rusisë” me seli në Moskë në vitin 2014 i ka dhënë hua kësaj partie të ekstremit të djathtë, 9 milionë euro, mirëpo Banka Qëndrore ruse ia ka marrë asaj licencën në muajin korrik.

Në një intervistë që është publikuar më 22 dhjetor, sekretari për thesari i Frontit Kombëtar francez, Wallerand de Saint Just i ka thënë “Bloombergut” se partia po kërkon për përkrahës të rinj financiar.

“Humbja e Bankës së Parë Çeke të Rusisë ka qenë goditje e rëndë për ne”, ka thënë Saint Just.

“Huaja ruse ka qenë burim stabël. Tani, ne ende po kërkojmë për hua të reja”, ka thënë më tej ai.

Saint Just ka thënë ata po kërkojnë për hua nëpër shtete të tjera, përfshirë Rusinë sepse bankat franceze po refuzojnë të financojnë partinë.

Sondazhet tregojnë se liderja e Frontit Kombëtar, Marie Le Pen është kandidatja e dytë e preferuar e francezëve për tu bërë president.

Zgjedhjet me dy raunde priten të mbahen në muajin prill dhe maj, ndërsa në muajin qershor francezët do i kthehen kutive të votimit për të zgjedhur deputetët.

Policia gjermane është angazhuar në një kërkim të organizuar për të gjetur të dyshuarin rreth sulmit me kamion të ditës së hënë.

Një urdhër arresti i lëshuar të mërkurën përmend emrin e tunizianit Anis Amri, i cili ka lindur në qytetin e Ghazës në Tunizi. Njoftimi thotë se ai ka përdorur të paktën gjashtë pseudonime të ndryshme dhe tri kombësi të ndryshme në të kaluarën dhe konsiderohet i armatosur dhe i rrezikshëm.

Autoritetet gjermane kanë lëshuar edhe dy foto të të dyshuarit dhe e përshkruajnë atë si me gjatësi dhe peshë mesatare, me flokë të zeza dhe sy kafe.

Policia aktualisht po kërkon për të në të gjithë Gjermaninë dhe në të gjithë shtetet e Zonës Shengen në Evropës. Një burrë tjetër, një pakistanez i cili ishte arrestuar pas sulmit, u lirua për shkak të mungesës së provave.

Pas një konferencë të mërkurën, Ministri i Brendshëm Thomas de Maiziere tha se policia e kishte identifikuar Anis Amrin si të dyshuar të ri, por theksoi se “ai është një i dyshuar, por jo domosdoshmërisht autori i sulmit”.

Pavarësisht se de Maiziere nuk pranoi të konfirmojë apo mohojë raportet e mediave rreth lidhjeve të Anis Amrit me grupet ekstremiste islamike, Stephan Mayer, një ligjvënës konservator, tha se Amri ka qenë nën mbikqyrje për disa kohë.

Mediat gjermane raportojnë se policia e ka lansuar një kërkim masiv për një person tunizian, pasi dokumentet e tij janë gjetur në kamionin, me të cilin është sulmuar tregu i Krishtlindjeve në Berlin, duke i vrarë së paku 12 vetë dhe plagosur afro 50 të tjerë.

E përditshmja Welt dhe javorja Der Spiegel kanë raportuar sot se ky person kishte arritur në Gjermani si refugjat, më herët këtë vit.

Raportet thonë se dokumentet e tij të identifikimit ishin gjetur dje nga policia në kabinën e kamionit.

Nga ana tjetër, policia sot ka shprehur besim se së shpejti do ta gjejë shoferin e kamionit, por u ka tërhequr vërejtjen njerëzve në Berlin, që të jenë të vetëdijshëm se personi në ikje është i armatosur.

“Jam relativisht i sigurt se ne me gjasë nesër ose në të ardhmen e afërt, do të jemi në gjendje ta paraqesim të dyshuarin e ri”, tha Andre Schulz, shef i Asociacionit të detektivëve kriminalë të Gjermanisë, në një rrjet televiziv kombëtar.

Sipas tij, ka “dëshmi të mirë” derisa afro 500 vetë kanë dhënë informacione për këtë krim.

Policia e Berlinit, fillimisht e arrestoi një emigrant 23 vjeçar nga Pakistani, pas sulmit në Tregun e Krishtlindjeve në Berlin, por e liroi atë mbrëmë vonë, pasi nuk është gjetur dëshmi që e lidhë atë me sulmin.

Grupi ekstremist, Shteti Islamik (IS), e ka marrë përgjegjësinë për këtë sulm, duke thënë se sulmuesi ishte “ushtar i Shtetit Islamik”, që po përgjigjej ndaj ftesave të grupit për t’i marrë në shënjestër shtetasit e vendeve të koalicionit të udhëhequr nga Shtetet e Bashkuara, që luftojnë kundër IS-it në Siri dhe Irak.

Policia e Gjermanisë thotë se e ka intesifikuar kërkimin për sulmuesin i cili i ka vrarë 12 vetë dhe plagosur afro 50 të tjerë, duke depërtuar me një kamion në tregun e Krishtlindjeve në Berlin.

Policia sot ka shprehur besim se së shpejti do ta gjejë shoferin e kamionit, por u ka tërhequr vërejtjen njerëzve në Berlin, që të jenë të vetëdijshëm se personi në ikje është i armatosur.

“Jam relativisht i sigurt se ne me gjasë nesër ose në të ardhemn e afërt, do të jemi në gjendje ta paraqesim të dyshuarin e ri”, tha Andre Schulz, shef i Asociacionit të detektivëve kriminalë të Gjermanisë, në një rrjet televiziv kombëtar.

Sipas tij, ka “dëshmi të mirë” derisa afro 500 vetë kanë dhënë informacione për këtë krim.

Policia e Berlinit, fillimisht e arrestoi një emigrant 23 vjeçar nga Pakistani, pas sulmit në Tregun e Krishtlindjeve në Berlin, por e liroi atë mbrëmë vonë, pasi nuk është gjetur dëshmi që e lidhë atë me sulmin.

Grupi ekstremist, Shteti Islamik (IS), e ka marrë përgjegjësinë për këtë sulm, duke thënë se sulmuesi ishte “ushtar i Shtetit Islamik”, që po përgjigjej ndaj ftesave të grupit për t’i marrë në shënjestër shtetasit e vendeve të koalicionit të udhëhequr nga Shtetet e Bashkuara, që luftojnë kundër IS-it në Siri dhe Irak.

Kancelarja gjermane, Angela Merkel, e cila kritikohet për lejimin e hyrjes së 890 mijë emigrantëve në Gjermani në vitin 2015, tha se do të ishte “e neveritshme” nëse refugjati, që kërkon mbrojtje në Gjermani, e ka kryer sulmin në Berlin.

Një gjykatë franceze shpalli fajtore Drejtoreshën Ekzekutive të Fondit Monetar Ndërkombëtar, Christine Lagarde, për neglizhencë pasi nuk kundërshtoi pagesën prej 422 milionë dollarësh në favor të një industrialisti nga arbitrazhi i shtetit, kur ishte ministre e financës. Zonja Lagarde tha se nuk do ta apelojë vendimin, por do të vazhdojë të punojë me të njëjtin dedikim për institucionin financiar botëror.

Çështja lidhet me veprimet e zonjës Lagarde kur ishte Ministre e Financave në Francë, përpara se të punonte për FMN. Biznesmeni në fjalë është Bernarde Tapie, ish pronar i firmës Adidas, i njohur për për organizimin e mbrëmjeve të luksit me elitën franceze.

Tapie ishte ankuar se një institucion kredidhënës, pjesërisht në pronësi të qeverisë, e mashtroi kur u mor me shitjen e aksioneve të tij në kompaninë e veshjeve sportive në vitin 1993.

Shumë vjet më vonë dhe pas shumë procesesh gjyqësore, Lagarde e dërgoi çështjen në arbitrazh. Kritikët thanë se arbitrazhi dhe dështimi për të apeluar vendimin e panelit ishin një gabim serioz.

Lagarde mund të ishte dënuar me një vit burg dhe gjobë, por gjykata nuk dha ndonjë dënim. Pak pas shpalljes së vendimit nga gjykata franceze, Lagarde njoftoi se do ta pranonte atë:

“Nuk jam e kënaqur me vendimin, por vjen një moment kur duhet hequr dorë nga diçka, edhe pse nuk të pëlqen; do të vazhdoj të punoj me ata që kanë besim tek unë. Pra, ndjehem shumë e kënaqur pa e apeluar vendimin e gjykatës, për ta fokusuar të gjithë vëmendjen, kohën, përpjekjet, energjinë dhe entuziazmin tim tek misioni si drejtoreshë ekzekutive e FMN-së,”– tha zonja Lagarde.

Bordi i Drejtorëve Ekzekutivë të FMN-së u takua të hënën pasdite për të peshuar ndërlikimet që mund të sillte vendimi i gjykatës për zonjën Lagarde. Ata dolën me një deklaratë të përbashkët, ku shprehnin “besim të plotë” tek drejtimi i Fondit Monetar Ndërkombëtar nga zonja Lagarde.

Christine Lagarde e filloi mandatin e saj të dytë 5-vjeçar në këtë post vitin e kaluar.

Një kamion është përplasur me turmën në një treg krishtlindjesh në Berlin duke lënë nëntë të vdekur dhe mbi 50 të plagosur.

Mediat gjermane cituan burimet e policisë të kenë thënë se dëshmitë e para flasin për sulm mbi tregun që ndodhet pranë kishës Kaiser Wilhelm, rrënojat e së cilës ruhen si kujtim i bombardimeve gjatë Luftës së Dytë Botërore.

Makinat e policisë dhe autoambulancat mbushën sheshin, ndërsa ka filluar një operacion në shkallë të gjerë. Fati i shoferit nuk është bërë i qartë, por gazeta Bild shkruan se ai është arratisur.

Incidenti ngjalli kujtimet e sulmit të muajit korrik në Nice të Francës kur një tunizian goditi me kamion turmën që po kremtonte ditën e Bastijës duke vrarë 86 veta. Sulmi i Nicës që marrë përsipër nga grupi militant Shteti Islamik.

Protestuesit në kryeqytetin polak, Varshavë kanë vazhduar demonstratat kundër planit të partisë në pushtet për kufizimin e qasjes së mediave në parlament, ndërsa liderët opozitarë janë zotuar se do të vazhdojnë bllokimin e hollit kryesor të parlamentit.

Ditën e dytë të demonstratës, rreth 2 mijë protestues janë mbledhur para pallatit presidencial kundrejt një pranie të madhe policore. Më pas ata kanë marshuar drejt ndërtesës së parlamentit ku politikanët opozitarë janë ulur brenda objektit në shenjë proteste.

Në një deklaratë dhënë për një televizion, kryeministrja e Polonisë Beata Szydlo, veprimin e opozitës e ka quajtur “skandaloz”.

Opozita e ka kritkuar përpjekjen e qeverisë për të kufizuar numrin e gazetarëve që e mbulojnë parlamentin, duke thënë se kjo e sulmon lirinë e mediave.

Presidenti i Këshillit të BE-së, Donald Tusk, ish kryeministër i Polonisë ka kërkuar nga partia qeveritare që të “respektojë popullin, parimet kushtetuese dhe moralin”.

Liderët e Bashkimit Evropian janë pajtuar mbrëmë për zgjatjen e sanksioneve ekonomike kundër Rusisë për shkak të ndërhyrjes në Ukrainë, deri në mes të vitit 2017, megjithqë disa kërkuan periudhë më të gjatë të sanksioneve për shkak të shqetësimeve se presidenti i zgjedhur amerikan, Donald Trump, do ta zbusë presionin ndaj Moskës.

Tash pritet vendimi dhe procesi formal për zgjatjen e sanksioneve kundër Rusisë në sektorët e mbrojtjes, energjisë dhe atë të financave. Vendimi pritet javën e ardhshme, raporton agjencia Reuters nga Brukseli.

“Disa nga kolegët tanë do të dëshironin ndoshta 12 muaj, por ajo që është e mundshme për ta mbajtur formatin tonë aktual, nënkupton gjashtë muaj”, tha presidenti i Bashkimit Evropian, Donald Tusk.

Sanksionet kundër Rusisë janë imponuar për shkak të aneksimit ilegal të Krimesë së Ukrainës në vitin 2014 dhe për shkak të mbështetjes për separatistët në pjesën lindore të Ukrainës.

Siç ishte vendosur më 30 nëntor, këtë javë Beogradi dhe Prishtina, kanë ndërmarrë hapa finalë për implementim të plotë të Marrëveshjes për sistemin e drejtësisë, thuhet në një kumtesë të mbrëmshme të Zyrës për media të Bashkimit Evropian

“Njoftimi nga Serbia më 9 dhjetor për përfundimin e punësimit të gjyqtarëve, prokurorëve dhe personelit adiministrativ, prej 10 janarit të vitit 2017, lejon integrimin e tyre po atë ditë në sistemin e drejtësisë së Kosovës”, thuhet në deklaratën dërguar mediave.

Mëtutje, kjo zyrë thotë se “emërimet e gjyqtarëve, të prokurorëve dhe stafit administrativ, më 10 janar, do të mundësoj sistem të përmirësuar të drejtësisë në gjithë Kosovën”.

Bashkimi Evropian thotë se “i lavdëron palët për këtë arritje të rëndësishme”.

Mediat franceze raportojnë se kryeministri, Maunel Valls pritet të njoftojë se do të garojë në zgjedhjet presidenciale që mbahen vitin e ardhshëm.

Zyra e Valls e ka publikuar një deklaratë zyrtare ku thuhet se ai do e bëjë të ditur këtë gjatë ditës së sotme, por nuk ka dhënë ndonjë detaj tjetër.

Njoftimi bëhet i ditur pasi ish kryeministri, Francois Fillon e ka siguruar një fitore të për tu bërë kandidati presidencial i qëndrës së djathtë.

Socialistët që janë në pushtet pritet të organizojnë garën e brendshme partiake në janar për të zgjedhur kandidatin e tyre. Sondazhet momentalisht tregojnë se socialistët gjenden më poshtë me përkrahje popullore se sa Republikanët e qendrës së djathtë dhe partitë e ekstremit të djathtë të Frontit Kombëtar.

Zgjedhjet e ardhshme presidenciale mbahen në dy raunde, njëri në muajin prill e tjetri në maj të vitit 2017.

Italianët i thanë jo reformave kushtetuese të propozuara nga kryeministri Matteo Renzi, të cilat parashikonin forcimin e kompetencave të kryeministrit, që sipas përkrahësve do t’i sillnin qëndrueshmëri politike Italisë.

Propozimi përfshinte shkurtimin e pushtetit të Senatit, duke pakësuar numrin e senatorëve nga 315 në 100, si dhe zvogëlimin e pushtetit të autoriteteve rajonale.

Kryeministri Renzi pohonte se reformat do të përshpejtonin procesin ligjvënës në Itali, një vend që ka ndërruar 60 qeveri që nga viti 1948.

Por, kundërshtarët thanë se reformat nënkuptonin më shumë pushtet në duart e kryeministrit.

Duke iu drejtuar vendit pas referendumit kryeministri tha se “qeveria ime përfundon këtu”. Anketat e para pas votimit tregonin se ai mund ta ketë humbur referendumin me 20 për qind.

Fushata kundër reformave të propozuara nga zoti Renzi u drejtua nga partia kryesore e opozitës, Lëvizja e Pesë Yjeve e udhëhequr nga Beppe Grillo, i cili kërkon referendum nëse Italia duhet të përdorë monedhën e përbashkët evropiane euro.

Humbja e kryeministrit Renzi mund të forcojë partitë populiste përfshirë Lëvizjen e Pesë Yjeve dhe Ligën e Veriut që ka qasje kundër emigrantëve.

Referendumi në Itali pasoi votën britanike për dalje nga Bashkimi Evropian, ndërsa përkon më ngritjen e Fronit Kombëtar francez me frymë kundër emigrantëve dhe partive tjera populiste në Evropë.

Drejtuesja e Frontit Kombëtar në Francë Marine Le Pen, shkroi në twiter se “italianët kanë refuzuar Bashkimin Evropian dhe Renzin. Duhet të dëgjojmë këtë etje për lirinë e kombeve”.

Në një prej komisioneve të parlamentit evropian ka nisur debati lidhur me të ardhmen e bashkëpunimit ekonomik me Britaninë pas vendimit të saj për largim. Holandezët nëpërmjet ministrit të tyre të financave kanë mbajtur një qëndrim të ashpër duke kërkuar që Londra të mos jetë më qendra kryesore financiare e eurozonës. Diskutimet vijnë në një kohë kur Bashkimi Evropian po përpiqet të zbatojë politika financiare që i japin përgjigje euroskepticizmit, duke stimuluar punësimin dhe rritjen ekonomike të vendeve anëtare.

Presidenti i Eurogrupit dhe Ministri i Financave të Holandës, Jeroen Dijsselbloem deklaroi se Bashkimi Evropian nuk duhet të lejojë më që Londra të jetë qendra kryesore financiare e eurozonës. Eurogrupi është forumi i ministrave të financave të vendeve të eurozonës. Duke folur sot në parlamentin evropian, ai theksoi se BE-ja duhet të mbajë një qëndrim të fortë ndaj Londrës.

“Ne nuk mund ë lejojmë që qendra kryesore finaciare për Evropën dhe eurozonën të jenë jashtë Evropës dhe të ndjekë rrugën e vet përsa i takon rregullave dhe kërkesave. Thjesht nuk mund ta lejojmë këtë që të ndodhë. Duhet të mbajmë një qëndrim të fortë për këtë. Nuk ka asnjë alternativë tjetër”, u shpreh sot zoti Dijsselbloem duke dëshmuar në një prej komisioneve të parlamentit evropian.

Ministri holandez i financave tha se nuk pret që Britania pas largimit të zbatojë rregullat e Bashkimit Evropian.

“Nuk mund të lejojmë një vend të tretë të ketë qasje të plotë në tregjet financiare evropiane, nëse në të njëjtën kohë ne i lejojmë këtij vendi t’u shmanget rregullave tona për standartet kryesore, kërkesat, mbrotjes së konsumatorit e të tjera. Nuk mendoj se kjo është e mundur. Ata po shohin për një model norvegjez për shërbimet financiare, por kjo nuk ka kuptim në rastin e Britanisë, pasi ata vendosën të dalin nga BE-ja pikërisht për arsye sovraniteti”.

Vetëm disa ditë para takimit të ministrave të financave të eurozonës, zoti Dijsselbloem u bëri thirrje udhëheqësve europianë të jenë realistë me objektivat fiskalë për Greqinë pas vitit 2018, kur përfundon edhe programi i ndihmës financiare për këtë vend.

Komentet e tij bëhen në një kohë kur Komisioni Evropian, krahu ekzekutiv i Bashkimit Europian, propozoi në fillim të nëntorit një politikë më të lirë buxhetore për 19 vendet e euro zonës. Kjo sygjeron që deficiti buxhetor të ngrihet nga norma e tanishme prej 3% në 3.5% të Prodhimit të Brendëshëm Bruto për vitin që vjen, si një përgjigje ndaj euroskepticizmit në rritje pas vitesh ulje të vazhdueshme ekonomike dhe papunësie.

Ministrat e jashtëm të Francës, Gjermanisë, Rusisë dhe Ukrainës, javën e ardhshme takohen në Bruksel për të diskutuar për implementimin e marrëveshjes së armëpushimit në pjesën lindore të Ukrainës.

Zëdhënësi i Ministrisë së jashtme të Francës, Alexandre Giorgini, mbrëmë po ashtu, tha se takimi më 29 nëntor do të mundësojë “të shihet se çka është bërë dhe çka nuk është kryer prej takimit në Berlin në muajin tetor”.

Në takimin në Berlin presidenti i Rusisë, Vladimir Putin, dhe ai i Ukrainës, Petro Poroshenko, thanë se synonin zgjidhjen e rrugës pa krye në konfliktin në Ukrainë, deri në muajin nëntor.

Qeveria e Ukrainës dhe separatistët prorusë në pjesën lindore të Ukrainës, kanë dështuar që marrëveshjet e Minskut t’i implementojnë në tërës dhe lufta në këtë rajon ka vazhduar.

Nga ky konflikt deri tash janë vrarë më se 9,600 vetë.

Presidenti i Parlamentit Evropian, Martin Schulz, tha të enjten se nuk do të kërkojë mandat të ri, porse do të kthehet në politikën kombëtare të Gjermanisë, ku do të garojë për parlamentin federal në Berlin, vitin e ardhshëm.

Schulz, socialdemokrat, nuk dha detaje të tjera në konferencën për media.

Partia e tij është aktualisht partner i koalicionit të kancelares Angela Merkel.

Mbetet e paqartë nëse Schulz do të jetë kandidati kryesor për kryetarin e Partisë Social-Demokrate.

Aktualisht në krye të saj është zëvendëskancelari, Sigmar Gabriel.

Emri i Schulzit ka qarkulluar edhe si zëvendësim potencial për ministrin e Jashtëm të Gjermanisë, Frank-Walter Steinmeier, i cili pritet të largohet nga posti në fillim të vitit të ardhshëm, pasi është nominuar për president.

Sekretari i Përgjithshëm i NATO-s, Jens Stoltenberg, tha të mërkurën se beson në bashkëpunimin ndërmjet NATO-s dhe Serbisë në përballjen me sfidat e përbashkëta të sigurisë, duke respektuar qëndrimin e saj për paanësi ushtarake.

Pas takimit më kryeministrin serb, Aleksandër Vuçiç në Bruksel ai tha se Serbia është pjesë e familjes evropiane me të cilën ndahen vlera të përbashkëta të të drejtave të njeriut, demokracisë dhe sundimit të ligjit, ndërsa shfaqi besimin në bashkëpunimin ndërmjet NATO-s dhe Serbisë.

“Ne mund të kujtojmë të kaluarën, por të shohim drejt së ardhmes. Sikundër e kam thënë gjatë vizitës në Beograd, qëllimi i fushatës ajrore në vitin 1999 ishte mbrojtja e civilëve. Dhe ne e bëmë këtë. Humbja e jetëve të pafajshme ishte tragjedi dhe ndjejë keqardhje të thellë. Sot përballemi me sfida të përbashkëta të sigurisë, po punojmë së bashku në mënyra të ndryshme dhe unë e mirëpres bashkëpunimin pragmatik që jemi duke e zhvilluar ndërmjet NATO-s dhe Serbisë“, tha sekretari Stoltenberg.

Kryeministri serb tha se bashkëpunimi me NATO-n është në funksion të paqes e qëndrueshmërisë në rajon.

“Ne jemi të rrethuar me vendet e NATO-s ose me ato që duan të jenë anëtare të NATO-s. Njerëzit në Serbi duhet ta dinë që nëse duam paqe, qëndrueshmëri, zhvillim ekonomik, standard me të mirë jetese, njerëz më të kamur në Serbi, jam tërësisht i bindur që kusht kryesor është të kemi paqe e qëndrueshmëri dhe të ndërtojmë marrëdhënie të mira me NATO-n. Serbia është ushtarakisht e paanshme dhe e respekton vendimin e parlamentit të saj, por Serbisë, pikërisht për shkak të arsyeve që i përmenda dhe shkaqeve tjera të arsyeshme, për shkak të shikimit drejt së ardhmes , dëshiron të zgjerojë bashkëpunimin e saj me NATO-n“, tha ai.

Kryeministri serb e vlerësoi me shumë rëndësi praninë e KFOR-it në Kosovë, në të cilin siç tha, serbët e Kosovës mbështeten shumë.

Bombardimet e vitit 1999 të drejtuara nga Shtetet e Bashkuara, i kanë kthyer serbët kundër perëndimit dhe drejt Rusisë e cila po ashtu kundërshton pavarësinë e Kosovës që u shpall në vitin 2008, me mbështetjen e Shteteve të Bashkuara dhe Evropës perëndimore.

Rusia kundërshton fuqishëm anëtarësimin e mundshëm të Serbisë në NATO, ndërsa është thellësisht e pakënaqur që Mali i Zi tashmë ka marrë ftesën për anëtarësim në aleancë.

Ish-presidenti i Francës, Nicolas Sarkozy, e ka pranuar disfatën në raundin e parë të zgjedhjeve të Partisë Konservatore, për zgjedhjet presidenciale në vitin 2017.

“Nuk ia dola t’i bindi votuesit”, tha Sarkozy gjatë fjalimit të mbrëmshëm në Paris para mbështetësve të tij, pasi doli i treti në këtë garë.

Para tij u renditën ish-kryeministrat, Francois Fillon dhe Alain Jupe, të cilët do të ballafaqohen me njëri-tjetrin javën e ardhshme.

Zoti Sarkozy tha se do ta mbështes zotin Fillon, i cili ishte kryeministër i Francës në periudhën 2007-2012.

Rezultatet e pjesërishme të këtyre votimeve tregojnë se Fillon kishte gati 44%, Juppe afro 28%, ndërsa Sarkozy kishte mbledhur 21% të votave.