Flamur në stuhi (Kushtuar Zahir Pajaziti — hero i kombit dhe themelues i celulës së parë të UÇK-së.)- Nga ARIF EJUPI

February 10, 2026

Flamur në stuhi

(Kushtuar Zahir Pajaziti — hero i kombit dhe themelues i celulës së parë të

UÇK-së.)

Zemrën e kishe gurëthyes

që dhembjen bluan,

ujëvarë që plagën pastron.

Frikën e pate vrarë në djep,

guximin ua pate rrëmbyer luanëve.

Syrin e kishe dylbi,

dorën shigjetë, që shponte tej për tej.

Vdekjen e bëre me armë në duar, duke zanuar

ata që mendonin se Kosovën e shndërruan në

Shumadi.

Shumëherë pate thënë:

“ Në vdeksha pa marrë hak për ty, Kosovë,

mos qofsha biri yt. ”

Betimi kurrë nuk të mbeti peng.

Ishe e mbete kandil mbi Gallap e Pashtrik!

ARIF EJUPI

Gjenevë, 4 shkurt 2026

KLITHMË

(Vargje proteste ndaj lojës së pafund me votuesit)

Partiakë e kuvendarë,

mos u qofshim falë,

nga zgjedhjet në zgjedhje

na çuat —

për ne fare s’menduat.

Na iku moti

kot së koti,

u dënoftë Zoti!

Do vijë dita

që Donald Trump

t’ju kapë për veshi

e t’ju tubojë si macet

rreth përsheshit.

Gjithmonë në emër të popullit

u thirrët,

por vullnetin e tij

kurrë s’e përfillët.

Vetëm për xhepat tuaj

punuat,

ju bindët e u bindeni

atyre që japin

lekun

e me mito u marrin

tenderin.

Deri kur

do t’ua shohë populli

sherrin?

Me ju gjatë

do të lëngojë demokracia —

mbajeni mend:

as celulë

s’do t’ju mbetet

partia.

ARIF EJUPI

Gjenevë, 6 shkurt 2026

Xha Jorgo

Skicë

Me të gdhirë dita merrte shishen me raki, pinte gëllënk pas gëllënke me stomakun bosh.

Në qytezën ku lindi dhe u rrit, gjykimi vinte në shprehje para mëshirës; këtu edhe ëndrrat

paragjykoheshin.

I madh e i vogël e përgojonin dhe shushurisnin gojë më gojë e vesh me vesh, pa pyetur asnjëherë për

problemet dhe hallet me të cilat ballafaqohej ai.

Po të kishte empati dhe përkujdesje njerëzore, xha Jorgo s’do të kishte vdekur në vetmi e i braktisur.

Ndoshta gojëkëqinjtë do ta trazojnë edhe në varr, por ai tani as nuk sheh, as nuk dëgjon.

Edhe kur vdiq xha Jorgo, të gjithë thanë: — paska vdekur pijaneci.

Arif Ejupi

Gjenevë, 30 janar 2026

• twitter

  Follow
• facebook
• linkedin

Fjalë kyçe: Arif Ejupi