Dy poezi: MOLLËT E BAHÇES SIME dhe E MIRA ËSHTË LULE E BUKUR- Nga Emine S. HOTI

March 19, 2026

MOLLËT E BAHÇES SIME

.

Vjel mollët e bahçes sime

një e nga një unë ato i vjelë,

kujtoj mollët e vendlindjes sime,

në Drenicën e bukur plot me diell.

.

Janë edhe këto mollë të mira,

të ëmbla dhe majhoshe janë,

i pëlqejnë fëmijët dhe të rriturit,

flladet i ëmbëlsojnë e shije kanë.

.

Edhe të tjerët këtu i pëlqejnë,

më thonë “mollë të ëmbla prodhon”,

ata i vlerësojnë dhe më lëvdojnë,

ku më rreh mendja, dot s`e thonë.

.

Mendja më rreh në Drenicën time,

atje mollët i bëja ëmbëloshe,

eh, ato mollë kanë tjetër aromë,

janë të vendlindjes sime arbërore.

.

Janë mollë të selitura nga gjyshërit,

me ndjenjën e punës dhe të

lirisë,

janë mollë flakë – kuqe si flamuri,

janë varieteti më i mirë i ëmbëlsisë.

.

E MIRA ËSHTË LULE E BUKUR

.

Të gjitha stinët janë të bukura,

secila prej tyre ka vendin e vetë,

por ne të parën kemi pranverën,

në atë stinë natyra vellon hedh.

.

E mira pëlqehet dhe respektohet,

si një lule pranvere ajo lulëzon,

të bëjmë të mira në këtë jetë,

mirësia lule jetën zbukuron.

.

Me lule nderojmë dëshmorët,

me lule urojmë në festa dhe gëzime,

lule i dhurojmë vajzës kur martohet,

lule dhurojmë për ditëlindje…

.

Lulja ka dhe gjemba, doemos,

në vaj asgjë nuk kalon,

gjithsesi lulja është mirësi,

që ne dhe botën e gëzon.

• twitter

  Follow
• facebook
• linkedin

Fjalë kyçe: Emine S. Hoti