Gazetari kroat Domagoj Margetiq ka publikuar dokumente të cilat, sipas tij, janë pjesë e dokumentacionit të brendshëm dhe sekret të Shërbimit të Sigurimit Shtetëror të Bosnjë-Hercegovinës që lidhen me rolin e Aleksandar Vuçiqit në Rrethimin e Sarajevës.

Në qendër të materialit është një dokument i datës 17 shkurt 1995, i lidhur me përpunimin operacional të koduar “Lovac”, apo “Gjuetari”.

Dokumenti i atribuohet Nedžad Ugljenit, atëherë drejtues i Shërbimit të Sigurimit Shtetëror të Bosnjë-Hercegovinës.

Sipas përmbajtjes së dokumentit të publikuar nga Margetiq, Ugljeni e identifikon Aleksandar Vuçiqin, i cili në atë kohë ishte sekretar i përgjithshëm i Partisë Radikale Serbe në Beograd, si personin që koordinonte ardhjen e shtetasve të huaj në pozicionet e snajperëve nga ku, sipas dokumentit, qëllohej ndaj civilëve në Sarajevë.

Në dokument thuhet se, pas bisedave me disa persona lidhur me ardhjen e “gjuetarëve të huaj” për të qëlluar njerëz nga pozicionet e snajperëve në Grbavicë dhe Varrezat Hebraike, kontaktet operative kishin siguruar informacione që Shërbimi i konsideronte të besueshme.
“Personi që koordinon aktivitetet e sjelljes së gjuetarëve të huaj në Grbavicë dhe që i shoqëron ata në pozicionet nga të cilat qëllohet mbi civilët në Sarajevë është sekretari i atëhershëm i përgjithshëm i Partisë Radikale Serbe në Beograd, Aleksandar Vuçiq”, thuhet në dokumentin e publikuar.

Në material thuhet gjithashtu se Vuçiq kalonte kufirin dhe lëvizte në territorin nën kontrollin e forcave serbe të Bosnjë-Hercegovinës. Sipas dokumentit, në pikat e kontrollit ai identifikohej me një legjitimacion të rezervistit të Shërbimit të Sigurimit Shtetëror të Serbisë.

Sipas dokumentit, ky legjitimacion ishte lëshuar nga Frenki Simatoviq, atëherë zëvendësdrejtor i DB-së së Serbisë.

Aty theksohet se aktivitetet e Vuçiqit në lidhje me ardhjen e “gjuetarëve të huaj” në Grbavicë dhe në Varrezat Hebraike kishin vazhduar edhe pasi ai ishte kthyer në Beograd dhe ishte zgjedhur sekretar i përgjithshëm i Partisë Radikale Serbe.

Në atë periudhë, sipas dokumentit, ai ishte edhe deputet në Kuvendin e Serbisë.

Pikërisht për shkak të këtyre të dhënave, dokumenti thotë se përpunimi operacional ndaj personit vazhdonte nën emrin “Lovac” – “Gjuetari”.

Sektorët ku zhvilloheshin veprimtaritë

Një pjesë e veçantë e dokumentit përshkruan edhe mënyrën se si, sipas informacioneve të kontakteve operative të SDB-së, ishin organizuar pozicionet për “gjuetarët e huaj”.

Sipas materialit, ndarja në sektorë u mundësonte të huajve që merrnin pjesë në këto aktivitete të zgjidhnin pozicionin nga i cili do të qëllonin.

Dokumenti i përshkruan këto aktivitete si “gjueti njerëzish”, ndërsa Margetiq i referohet atyre si “safari njerëzore me snajper”.

Ugljeni mblidhte informacion pavarësisht ndalimit të hetimeve

Sipas Margetiq, Nedžad Ugljeni kishte vazhduar të dokumentonte informacionet që merrte nga burimet dhe kontaktet operative lidhur me këto aktivitete, pavarësisht një ndalimi zyrtar për zhvillimin e hetimeve.

Informacionet e mbledhura regjistroheshin në dokumente të brendshme me qëllim që të mbetej gjurmë për atë që po raportohej nga burimet operative.

Dokumenti i datës 17 shkurt 1995 përfundon duke e paraqitur Vuçiqin si person me rol të rëndësishëm në organizatën që, sipas informacioneve të kontakteve operative, sillte “gjuetarë të huaj” në pozicionet e kontrolluara nga forcat serbe.

Çfarë ndodhi me dokumentet pas vrasjes së Ugljenit?

Një pjesë tjetër e materialit të publikuar nga Margetiq lidhet me fatin e dokumentacionit të Nedžad Ugljenit pas vrasjes së tij në vitin 1996.

Sipas gazetarit kroat, pas vrasjes së Ugljenit ishte urdhëruar shkatërrimi i dokumentacionit të tij.

Sipas këtij versioni, nuk pati dorëzim formal të zyrës së tij dhe as procesverbal për materialet që u gjetën aty pas vrasjes.

Margetiq thekson se dokumentacioni i gjetur në zyrën e Ugljenit u zhduk. Megjithatë, sipas tij, Ugljeni kishte parashikuar rrezikun dhe kishte ruajtur kopje të një pjese të madhe të dokumenteve në disa vende.

Në veçanti, sipas tij, kopjet përfshinin shënime dhe informacione të brendshme që ai kishte mbledhur gjatë punës së tij.

Dokumentet e publikuara nga Domagoj Margetiq, ngrenë pretendime serioze për përfshirjen e Aleksandar Vuçiqit në organizimin e ardhjes së të huajve në pozicionet e snajperëve gjatë Rrethimit të Sarajevës.

The GeoPost