*Zef Lleshi: U shit historia për një bark koca thiu
*Bashkia Mirditë: Faza konkurruese për përzgjedhjen e tyre

Simbole fetare në institucione shtetërore. Duket se Mirdita i ka paraprirë projektit të kryeministrit për përfshirjen e fesë në shkollat laike. Kjo është stema e Bashkisë Mirditë, por debate ka hapur simboli dhe ngjyrat e përdorura në të. Dom Agustin Bardhi, prift i zonës së Mirditës e ka prezantuar këtë stemë në rrjetin social dhe menjëherë kanë ardhur dhe kritikat e para. Ngjyra e verdhë e Vatikanit, dhe Kisha e Oroshit, janë elementët fetarë të shtuar në stemë. Për më tepër një kritikë bëhet dhe për shqiponjën, që cilësohet si ajo e Hitlerit.

Dom Gjoni shprehet; “Është padyshim e vështire tu bësh “qejfin” të gjithëve, t’i bësh të gjithë të një mendje… Mua Stema e re e Bashkisë, Mirditë me pëlqen, ka elementë shumë të bukura e të rëndesishme…, një më mire nuk kisha ditur ta beja!”.

Por, një komentues, që duket se ka qenë dhe konkurrent në garën për stemën e Bashkisë, Zef Lleshi shprehet me nota kritike të forta. Sipas tij, stema është jashtë cdo konteksti historik të Mirditës, dhe është është përzgjedhur fituese nga intersaxhinj, që Zef Lleshi, thotë se; kanë shitur shitur interesa madhore të Mirditës për interesa të vogla personale. Zef Lleshi thotë se stema e re e Bashkisë, u shit për një bark me koca thiu.

Ja cfarë shkruan Zef Lleshi:
0Tani që komisioni inkopetent i nxori këmbët plotësisht në procesparacaktimin e fituesit përmes përjashtimit të konkurencës punimeve, duke përjashtuar autoret pa diskutuar në detaje apo qoftë dhe punët në përgjithësi të cdo autori në vecanti, tani po flas shkoqur si thonë… Ajo steme e quajtur fituese në fakt është një version jashtë cdo konteksti qoftë historik-sistemiqeverisës apo edhe etnogjeografike e religjioze. Sado që aty në sfond duket një kryq i vogël, sërish ashtu ne ate variant ai qëndron me të ashtuquajturën kurorë -kortezike mbi stemën në fjalë, pra as ai kryq nuk është në fakt pjesë e stemës. Kështu që ashtu sic ai gallopeni-si ka bërë vetëm një Shqiponjë plagjiature e gjallë sic edhe ishte dhe ai versioni i parë plagjiature e shqiponjës së Rajhut, por sërish edhe në këtë të dytën plagjiature ai tregohet i vendosur të luaje me Mirditën e mirditasit përmes disa pseudo-intelektualëve hora që shesin miqtë dhe interesat madhore të vetë Mirditës në interesa të vogla personale te tyre a për një bark me koca thiu dikund nëpër mejhane-sofrashqylesh, zyrtaresh pseudointelektual që po e shpërfytyrojnë nga pak edhe këtë pak Mirditë të mbetur.

Stema në fjale është thjeshte një shqiponjë arbërit-principatës-mbretërisë arbërit, pa asnjë element që të na sjellë në kohë të sotme modernitet, ku Mirdita kaloi etapa të ndryshme që nga Mesjeta. Pra nëse do krahasojmë stemën që këta qyloshat e kocave të thiut ndër mejhane qebabesh sollën duke e trumbetuar në fakt një vendim të paracaktuar si individ, gabuan rëndë dhe nuk bënë asgjë të hajrit, e kështu do të shkonte. Jo vetëm pse ata nuk arrijnë të kuptojnë, as sot e as mot me sa shihet, se cfarë është një logo-stemë-emblemë e një njësie administrative shtetërore sic konkretisht është Mirdita, Bashki e Republikës së Shqipërise, pra jo principate as mbretëri, si stema e Gallopeni, si flet edhe pse përmes një plagjiature të dukshme.

N.q.s dikush do të kërkojë të marrë një mesazh, ju siguroj që nga injoranca e atij, atyre *magjistricave, nënteksti i saj është, të ngrihemi të bëjmë edhe njëherë principatën e Arbërit ose mbretërine e Arbërit për hir të asaj steme që kanë shpallur si *fituese* në fakt e paracaktuar, dhe që të ndodhe kjo ne duhet të rikthehemi në kohe në Mesjetë e të luftojmë si qëmoti për *kauzën e këtyre*, por si të mos mjaftojë, kjo stemë e ktyre të kocave të thiut është shumë prapa edhe stemës së qeverisë së Mirditës e cila ne kontekstin Republikan, jo mbretërore.

Jashtë kontekstit kohore barazvlefshëm me cdo stemë simbolike shtetdrejtimi sundimi qofshin ato në mesjetë apo edhe në diktaturën komuniste janë jashtë kontekstit, jokoherentë.

Pra mund të themi se, ‘u mbars mali dhe polli një mi’. Ju përshëndes për vargun e sakte dhe koherent mbi edhe permendjen e emrit tim mes miqsh, por ajo qe dua te nenvizoj eshte fakti qe, ne kete paudhesi, ndikuan ME HIRE A ME PAHIRE, edhe qendrimet menjdengushta te jo pak autorve krijues qe tentuan te behen pjes e kesaj zgjidhjeje PERMES QENDRIMEVE JO FORT TRANSPARENTE DHE JO FORT MIQSORE PAS KUINTASH, me shume ne te mire te vehten se në te mire te vendlindjes por edhe ne rruge jo fort transparente, rruge kjo e cila solli te bere fakt dhe perçudnimin krejte jashte kontekstit kohore edhe jashte kontekstit estetik artistik për një stemë profesionalisht te justifikuar në tërësinë e saj”.

E pavarësisht kësaj kritike, stema sipas Bashkisë MIrditë është parashikuar të përdoret në medalje, në vula, bluza të futbollit të ekipit mirditor, madje dhe në filxhanë, stilolapsë, apo kuti shkrepse.

POR SI U PËRZGJODH STEMA E BASHKISË MIRDITË?

Bashkia Mirditë thotë se ka pasur një konkurs ndërsa shpjegon në faqen e saj, arsyet që cuan në përzgjedhjen e kësaj steme.

Ja përzgjedhja sipas Bashkisë Mirditë
Pas një procesi të gjatë studimor dhe konkurues, është realizuar stema e bashkisë Mirditë, me fitues magjistër të dizajnit grafik nga Theranda-Kosovë, Refki Gollopeni.
Për një realizim sa më të saktë dhe përfaqësues në elementë të stemës së bashkisë Mirditë, ka patur një organizim transparent, realizuar përmes disa fazave konkuruese.
Fillimisht, me urdhër nr 08, datë 20.01. 2016 të kryetarit të bashkisë z.Ndrec Dedaj, mbështetur në ligjet përkatëse, u ngrit komisioni këshillimor 3me studiues, publicistë, artistë e intelektualë në Mirditë dhe jashtë saj, për të ardhur më pas në hartimin e një procedure transparente për realizimin e stemës së re.
Kështu u bë publike ky proces duke ftuar konkurues në Mirditë apo jashtë saj përmes portalit të bashkisë Mirditë. Pati interesim të madh në këtë konkurim, ndaj 14 syresh paraqitën punimet e tyre, të cilat u morën në shqyrtim në një takim të hapur për publikun në fazën e parë më 10 shkurt 2016. Nga faza e parë u selektuan pesë pjesëmarrës me punimet më të mira, që ishin më afër idesë për një stemë sa më përfaqësuese për Mirditën, mbështetur në shkencën e heraldikës dhe në një qasje sa më të saktë historike për krahinën.

Më pas pesë të interesuarve iu dha mundësia në një takim të dytë në Tiranë me komisionin, të ishte prezent dhe studiuesi dhe njohës i heraldikës kombëtare Moikom Zeqo, ku u përcaktuan më qartë dhe elementët më përfaqësues, qe duheshin ref5lektuar në punimin për stemën e bashkisë Mirditë.

Kësisoj, 4 të interesuar e vazhduan garën, për të ardh në fazën përfundimtare më 21 mars 2016, ku pas diskutimeve në komision me shumicë votash, u morën në konsideratë për të diskutuar te kater modelet: atë të Artan Toma, Gjoke Pepa, Refki Gollopenit dhe Viktor Cupi.
Komisioni debatoi gjate rreth këtyre punimeve dhe u ndal më pastaj më shumë në dy punimet që u cilësuan unanimisht si më të spikaturat; ai i Refki Gollopenit dhe Gjokë Pepës. Me shumicë votash komisioni percaktoi për të paraqitur në këshillin e bashkisë Mirditë punimin e sjellë nga Refki Gollopeni, magjistër i dizajnit dhe grafikës.
Refki Gollopeni, 6 mjeshtër i grafikës me eksperiencë në stemat e Kosovës dhe më gjerë, paraqiti 5 variante te stemes dhe gjithe mekanizmin ku perdoret ajo si në flamurin e bashkisë, në dokumenta zyrtare, medalione, mirenjohje, suvenire etj etj.
Në sqarimin e tij ai ka përmbledhur se “Stema e bashkisë së Mirditës është e thjeshtë dhe përmbajtësore që paraqet karakterin, traditën, besimin, energjinë pozitive të njerëzve të mençur, të guximshëm, mikpritës, bujarë si dhe veprimtarinë etnokulturore7 patriotike, historike dhe ekonomike të mirditasëve”.
Në stemë janë vendosur elementet simbolike siç janë:
a)- Shqiponja e Arbrit:
Eshtë e punuar në formë grafike bashkëkohore, që simbolizon lidhjen historike dhe traditën shtetformuese të Mirditës, e cila në vitet 1160 deri në vitin 1216, është dokumentuar nga burimet historike si qendër e Principatës së Arbrit.
b)-Element i mburojës:
Simbolizon këtë qëndresë stoike dhe të papërsëritshme, qëndresë në luftë për liri, për dije, për kulturë dhe për shqiptarizëm. 9Prandaj ajo përbën një element emblematik të kësaj treve.

c)- Kompanjeli i kishës së Oroshit:
Është simboli i besimit, traditës, arkitekturës dhe si element i përkujtimit të rilindasve dhe patriotëve mirditorë. Është i pari shkrim shqip prej një kleriku katolik pra Ipeshkëvit Pal Engjelli, apo i pari libër në shqip prej një kleriku katolik, Gjon Buzuku për të vazhduar me shoqërinë “Bashkimi”, e drejtuar nga abati i famshem i Mirdites, Prend Doci. Janë kishat katolike në malet e Veriut të Shqiperisë, pra dhe në Mirditë të kthyera në çerdhe të kulturës dhe të dijës, të identitetit kombëtar, që e mbajnë fort të lidhur këtë trevë me shqiptarizmën dhe atdhetarizmin. Prandaj nuk mund të neglizhohej ky element për t’u vendosur në stemën heraldike të kësaj treve.
d)- Kalaja – Kulla:
Simbolizon traditën, zhvillimin e trungut familjar arbëror, më pas të Dukagjinëve, e pas 1570 në Mirditë me unitetin e 12 bajraqeve. Kalaja, kulla janë simbol i qëndresës ,pranë kalasë janë vendosur edhe majet e shtizave të 12 bajraqeve që simbolizojnë unitetin dhe gadishmërinë për mbrojtjen e vendit.
Të gjithë këto elemente duke u mbështetur në parimet heraldike, përputhen estetikisht, por dhe lehtësisht të përdorëshme në të gjithë elementet zyrtare dhe ballafaques me publikun apo me institucionet brenda dhe jashtë vendit.
Është përdorur ngjyra e kuqe, që së pari, është ngjyra e shqiptarizmës, ngjyra e flamurit kombëtar. Ngjyra e verdhë e ndritur pasi vetë kjo trevë është njëra ndër përpunueset e bakrit dhe arit si ndërlidhje me pirustët apo epokat e mëpastajme. Këto dy ngjyra u alternuan me ngjyrat e tjera për të pasqyruar edhe shpirtin e pasur dhe estetik të mirditasit të përdorur në veshjen apo punimet artizanale të kësaj treve

Autori eshte kujdesur që të mos ndërlikohej, por të ishte një stemë funksionale, lehtësisht e përdorëshme , sa më identitare dhe përfaqësuese.
Gjithashtu aty ruhen dhe jepen elementet përfaqësuese, që e identifikojnë fort këtë trevë e që e bëjnë unike atë, por duke ruajtur elementin kombëtar dhe atdhetar.
Pas kësaj me shumicë votash, komisioni vendosi t’i rekomadojë këshillit të bashkisë si stemën më përfaqësuese, atë të Refki Gollopenit nga Kosova, me mendimin për të përmirësuar disa detaje teknike.
Stema do te perdoret për:
– Vendimet dhe Aktet e Këshillit të Bashkisë Mirditë;
– Urdhrat dhe udhëzimet e kryetarit të bashkisë;
-Dokumentet e krijuara nga bashkia dhe institucionet vartëse etj.
Përmasat e stemës janë si më poshtë:
-Në varësi të madhësisë që kërkohet për ambjente të ndryshme, dhënë sipas modelit të paraqitur në zhkallën zvogëluese dhe zmadhuese.
-Për flamurin: dimensionet 100 x 150 me thekë anash.
-Dimensionet e flamurit të vogël për tavolinë 21 cm X 16 cm
Ngjyrat për stemën, flamurin dhe për suveniret:
E verdhë e ndritur, Light Yeloë C: 0 M:0 Y:60 K:0. E kuqe boj gjaku, Red C: 19 M:100 Y:100 K:18
Për prodhimin e stemës do të ndiqet procedura përkatëse me specialistë në studio të licensuara për vulat dhe simbolet.

I dashur kryetar i Komunitetit Mysliman, miku im, Haxhi Skënder Bruçaj! Për të ardhur këtu mes jush dhe për të qenë pjesë e kremtimit të kësaj dite, që shumë prej dijetarëve tuaj e konsiderojnë si më të shënuarën e kalendarit të mbarë njerizimit, duhet t’ju them se mu desh të thyeja qëndresën e Protokollit të Kryeministrisë.
Është e habitshme sesi në kundërshtim me doket e mira dhe urtësinë kokulur zakonore të trevave tona, ku prej shekujsh është kultivuar si një melhem i rrallë, virtyti dhe praktika e vëllazërisë, jo vetëm mes individëve të feve të ndryshme, por edhe mes vetë institucioneve fetare si shembuj të kësaj vëllazërie, institucionet publike, shteti si i tillë i druhen disi vëllazërisë dhe bashkëpunimit vizionar me bashkësitë e besimtarëve dhe përfaqësitë e komuniteteve fetare.
Kur e mendoj këtë dasi të padukshme, por jo gjithmonë të padukshme, pa bereqet dhe pa kuptim, në një shoqëri të prirur për dasi si kjo e jona, por dhe të mbrujtur nga dëshira e zjarrit për t’iu qasur universales, më kujtohen disa vargje të një poeti mistik shqiptar, i mbrujtur me frytin e vreshtës së krishterimit në fëmijëri dhe pastaj, me fuqinë poetike të islamit në rininë e të gjitha pasioneve.
Dua këtu ta sjell paksa, Jahja bej Dukagjin-Zadenë, princ në Shqipëri dhe mistik në botën islame, i cili shkruante në kapërcyellin e shekujve drithërues XV-XVI, një “Jusuf dhe Zyliha” krejt origjinal, sado në përputhje me shkrimet e shenjta. Usulmame-ja, Libri i Parimeve, po aq sa Shah-u Geda, Shahu dhe Lypësi, e përafrojnë Jahja beun për nga vetitë profetike me korifeun e tij, profetin Muhamed dhe e kthejnë në një sinjal të fortë për kohën tonë. E ja çfarë thotë ai:  ”Unë s’i kam përkthyer fjalët e tjetërkujt, s’kam përzier fjalët e huaja në gojën time, qoftë të fantazisë, qoftë gjëra të mira apo të këqija, por kjo fjalë është timja, është trishtimi im”.
Dhe është trishtim i madh të mendosh sesi në kohët moderne, ku mbizotërojnë dhe aq lehtësisht përdoren dhe shpërdoren nga të gjithë, të mëdhenj e të vegjël dhe sidomos të rinj, informacione të të gjitha llojeve, vektorë propagande dhe helmimi mendor, mendimit të lirë e besimit të çiltër t’i merret fryma e t’i nëpërkëmbet emri nga një lloj aleance e pahijshme e injorancës, e përfitimit dhe e terrorit.
Profetit Muhamed, krenari e njerëzit po aq sa të gjithë ata të paktë kolosë, themelues qytetërimesh të përbotshme, i takon nderimi, vlerësimi dhe respekti i të gjithë njerëzve vullnetmirë, pa dallim bindjesh fetare, të cilët bashkëndajnë me ithtarët e tij, ithtarët e një prej besimeve kryesore botërore, të njëjtin planet, të njëjtin dinjitet njerëzor, të njëjtat përgjegjësi ndaj shoqërisë njerëzore, familjes së njerëzve, familjes së njeriut dhe të ardhmes së përbashkët të çdo njeriu.
Më pëlqen të citoj filozofin dhe shenjtin katolik Agustinin, banor i viseve të Afrikës së Veriut, ku islami do të farëzohej me lehtësi në flatrat e erërave të shkretëtirave dhe butësisë së klimës dhe të popullsisë, sa herë më kujtohet fraza e tij e thjeshtë, por shumë domethënëse:
”Njeriu do, njeriu çmon atë që njeh”. Por kush e njeh me të vërtetë sot islamin? Kush flet sot me distancën e duhur, qetësinë e domosdoshme dhe dijet sovrane mbi dituritë islame? Madhështia e vargjeve të Jahja Dukagjin-Zadesë qëndron në sublimimin e besimit të tij të thellë, në luftën e brendshme shpirtërore, në përpjekjen e gjithhershme të trazimit të brendshëm personal të njeriut, i cili si vetëmohimi në çdo fe monoteiste konsiston mbi të gjitha në bërjen e hesapeve, duke marrë parasysh këqyrjen ekzigjente të syrit të Zotit mbi vetveten e trazuar.
T’i japësh vetveten paqes së botës, duke përligjur dhe shenjtëruar kështu, emrin e Islamit-Selamit dhe Paqen si 99 emrat e lavdishëm të Zotit, kjo është përpjekja e prore që, sipas studiuesit Muhamed Arkun, karakterizon ithtarin e vërtetë të mesazhit të profetit.
“O besimtarë – shkruhet në Kuran – zhytuni kokë e këmbë në Is-Salam”, në paqen e Zotit dhe jo në paqen e të ligës, në kaosin e padijes, në marrëveshjen me errësirën.
Marrëveshjes së errësirës, aleancës së injorancës me krimin, marrëveshjes së kobshme mes terrorit dhe gjakderdhjes absurde të të pafajshmëve, çfarë mund t’i kundërvihet sot, kush mund t’i bëjë ballë?
Dikur, rinia ishte një lokomotivë e pandalshme e emancipimit dhe e përparimit të njeriut, qoftë ky besimtar apo jo. Rinia ishte pengesa e patjetërsueshme ndaj obskurantizmave të shfrenuar, garant i të drejtave të patjetërsueshme dhe të paparashkrueshme të arsimit, qytetërimit, barazisë dhe vëllazërimit.
Sot, trullosja e shkaktuar prej padijes, përballë mjeteve të panumërta të kalimit të informacionit dhe shpërdorimi, shpeshherë qëllimkeq, i këtyre të fundit prej padijes, braktisja nga shoqëri të nginjura e individit, që me zor dhe gjithmonë e më me zor i gjen rrënjët e tij, magjepsja, nën mungesë entitetesh që realisht japin sensin e përkatësisë, përkarshi forcës brutale e përçudnuese të një terrorizmi joshës për errësirën e injorancës e të dëshpërimit, po e çojnë rininë drejt një rruge gjithnjë e më të panjohur, ku, sipas fjalës së Shekspirit tek “Mbreti Lir”:
“Të verbër, të kapur pas dore, udhëhiqen nga të marrë”.
Globalizmi dhe relativizmi, që vjen nga një mirëqenie më shumë e trashëguar nga të tjerët sesa e fituar me mund, i kërcënon pareshtur nocionet themeltare të vlerave, që shpesh na duken si kuti boshe zbukurimi në shoqëritë tona, në të cilat nevojtari në rrugëtim nuk gjen me çfarë ta mbajë gjallë jo barkun, por shpirtin, jo gojën, por arsyen, jo interesin, por inteligjencën.
Çfarë i thotë një të riu sot, një varrezë dëshmorësh, një nekropol luftëtarësh, një muze historie? Çfarë i thotë një myslimani të ri, jo vetëm simbolika e besimit të vet, pak e njohur në të vërtetë, por struktura e besimeve sivëllezër, simbolet e tyre, arkitektura, arti, estetika dhe anasjelltas, çfarë u thotë të rinjve të besimeve të tjera, simbolet, arkitektura, arti dhe estetika islame? Çfarë janë për fëmijët tanë sot, Bagdadi, Omejadët, Ispahani, Firdusi, dinastia Hashemite, apo Palmira, Babilonia, Petra, letërsia e divaneve, ahidnametë e sundimtarëve myslimanë?
Më së shumti, brezat e ardhshëm rrezikojnë të shëtisin mbi këto pasuri, duke i parë si muze vjeturinash dhe kur ndodh që nuk do të kenë – larg qoftë! – nëpërmjet kulturës, ndjeshmërinë e duhur, do të përzgjedhin gjithmonë e më shumë qorrazi, aty – këtu, këtë apo atë figurë, këtë apo atë prirje dhe do të kenë opinione, në funksion perceptimesh të përcipta politike, ideologjike apo mediatike.
Shoqëritë tona, të kthyera në supermarkete, do të kenë – larg qoftë! – si përgjigje të vetme indiferencën dhe manipulimin dhe do të vërtetohet kështu, – larg qoftë! – mot pas moti, nëse asgjë nuk ndryshon, thirrja e shurdhët, shekullore, që shkrimtari i shquar i islamit shqiptar, Suzi Prizrenasi, i adreson besimtarit në Fetih-Namen e shekullit të XVI:
“Ruaju, mos i kalo kufijtë e tu,
se fati të bën qesharak përpara njerëzve të botës;
Ec, por me kujdes, mos i zgjat shumë hapat,
se në çdo hap ka mijëra pengesa e po ngatërrohesh;
Mos ia hap botës kraharorin si  mburojë,
se do bëhesh nishan i shigjetave qiellore”.
Kultet janë kursorë të rëndësishëm leximi të romanit kombëtar dhe universal. Pak e dinë edhe në Shqipëri dhe kjo është një fatkeqësi kombëtare, në këndvështrimin tim, se kulti islam, aq shumë në qasjen e tij qytetëruese e tolerante, ka promovuar në këtë vend, shkollimin dhe kulturën. U deshën shekuj përpara se studiuesit Hasan Kaleshi dhe Nehat Krasniqi, emri i të cilëve tingëllon, si të thuash me pak humor, arabisht në shkollat tona, të mund të nxirrnin në pah ato kontribute shqiptare në dituritë islame, që janë po aq kontribute në kulturën botërore dhe trashëgimi e njerëzimit.
Prandaj, të dashur miq, pa formimin dhe nxitjen sa më herët të aftësive njohëse dhe vlerësuese të çka e rrethon, nuk është për t’u habitur që për hir të një demagogjie joshëse, ai që vjen rishtas në peripecitë e jetës, të struket nëpër xhami e nëpër kisha nëntokësore apo në tempuj të fanatizuar dhe të ketë për fatin më të keq të tijin, por edhe të shoqërisë ku ai jeton, përçmim dhe makthe që shtyjnë në krim, përballë mrekullive të artit islam, përballë mrekullive të artit dhe kulturës fetare në tërësi, përballë gjenezës antike, që e ndërlidh islamin me besimet e tjera monoteiste.
Në vobektësinë e tij, shtetit të sotëm në tërësi i ka mbetur amanet nga ai i shtetit providencë, një mision unik që shteti në Shqipëri, në Europë, në çdo vend që kërkon të jetojë në paqe, duhet ta përmbushë me çdo kusht në këtë kohë, kur jemi përballë një pakti të frikshëm, të kobshëm, të terrorit dhe nëpërkëmbjes së besimit, nëpërmjet kultivimit të injorancës.
Shtetet duhet të mbarështojnë kudo dhe në çdo kohë, vëllazërinë dhe sensin e përkatësisë së të gjithëve në shtëpinë e përbashkët të besimeve, nëpërmjet kultivimit të njohjes për besimin tënd dhe për besimin e të tjerëve dhe të pranimit se besimi yt nuk është epërsi mbi besimet e të tjerëve, por është pjesë e një kurore, pa të cilën njerëzimi do të na dukej sot, krejt i zhveshur dhe i pafuqishëm përballë sfidave.
Si dje, si sot, si nesër, shkolla, vendi ku më së pari farkëtohet ndjenja dhe dëshira e përkatësisë, e përpjekjes dhe e nismave të individit me të tjerët, e nisjes në rrugën e njohjes dhe diturisë, e nxitjes së zbulimeve të mëdha e të vogla, duhet të jetë, duam apo nuk duam, skena kryesore e luftës për dritë, e betejës për qytetërim, e kultivimit të vëllazërisë mes gjithë fëmijëve tanë, qofshin myslimanë, qofshin të krishterë, apo të çfarëdo besimi tjetër qofshin.
Unë besoj fort se ka ardhur momenti që me kurajë, shteti shqiptar t’u çelë dyert e shkollave për njohjen e besimeve fetare, t’u çelë dyert e shkollave për t’i dhënë çdo fëmije, mundësinë që të armatoset me instrumentet e dijes dhe që të mos jetë nesër, viktimë  e propagandës tunduese të atyre që nuk kanë asnjë lidhje me profetin Muhamed, nuk kanë asnjë lidhje me profetët që i çelën rrugë qytetërimeve të sotme dhe që në emër të islamit kryejnë krime, të cilat janë të destinuara të ndëshkohen. Sepse janë të ndëshkuara qysh në librat e shenjtë.
Unë besoj se sot, të gjithë duhet të ndiejmë përgjegjësinë e madhe të faktit se të rinjtë, adoleshentët në Tiranë apo në Paris, në Prishtinë apo në Londër, në Europë apo në Amerikë janë të paarmatosur me instrumentet e dijes, për t’u përballur me demagogët, me sharlatanët, me maskarenjtë, që kërkojnë të nxjerrin përfitime duke e përgjakur njerëzimin, apo duke e tërhequr për hunde.
Prandaj, unë besoj se mbi këtë terren injorance, ku përfitojnë ekstremistët e dhunshëm apo ekstremistët e veshur me kostum e me kravatë, që i flasin Europës dhe Amerikës për rrezikun që iu vjen nga myslimanët, i takon çdo shteti që i do dhe e do të ardhmen e fëmijëve të vet, t’i hapë rrugë mundësisë që çdo fëmijë të ushqehet edhe me kulturën e feve. Te kultura e feve qëndron një forcë e madhe, jo vetëm për besimtarët,  por edhe për jobesimtarët, që përmes aq shumë mrekullive që kultura e feve solli në kulturë, në art, në të menduarit filozofik dhe estetik të njerëzimit, të jenë të armatosur dhe fitimtarë ndaj çdo forme ekstremizmi të dhunshëm, apo ekstremizmi të propaganduar me kostum e me kravatë.
Unë e përshëndes dhe si kryeministër jam krenar për Komunitetin Mysliman Shqiptar. Një komunitet që në çdo moment ka luajtur një rol emancipues dhe paqtues për kombin tonë. Një komunitet, që sot e mbështet plotësisht projektin tonë të ri për ta kthyer shkollën publike në një hapësirë njohëse jo vetëm për shkencat, por edhe për fenë.
Ky projekt konsiston jo në cenimin e laicitetit të shkollës sonë, por në forcimin e themeleve të kulturës laike, e cila është e dobët dhe e pafuqishme të përballet me format e ekstremizmit të dhunshëm, apo të ekstremizmit me kostum e me kravatë, nëse nuk arrin dot të pajisë fëmijët e të gjitha besimeve me instrumentin njohës për faktin fetar si gjenerues civilizimesh dhe përparimi filozofik e social dhe me vëmendjen e mprehur për të mos rënë pre e tundimeve të mëdha, që joshin dhe kthejnë në viktima fatkeqe të xhihadizmit apo të ekstremizmit politik, vajza e djem që s’kanë fuqinë e brendshme shpirtërore, pikërisht sepse iu mungojnë këto instrumente, për t’u përballur me vështirësitë e jetës.
Do të fillojmë me një numër shkollash në zona urbane dhe rurale dhe bashkëpunojmë me shumë institucione ndërkombëtare në Perëndim dhe në Lindje. Kemi thirrur në ndihmë ekspertë, të mirënjohur botërisht, të kulturës së civilizimeve dhe do të eksperimentojmë për herë të parë, falë teksteve të përgatitur në harmoni të plotë mes këtyre institucioneve, duke filluar që nga Observatori i Laicitetit në Paris dhe komuniteteve tona fetare në Shqipëri. Për herë të parë, nxënësit do të nxiten nga mësues të trajnuar enkas, brenda dhe jashtë vendit, të përvetësojnë elementët e të folurit, premisat e dialogut, hapat e parë të të argumentuarit pa pasione, pa hatërmbetje, pa paragjykime, duke zhvilluar sensin e përkatësisë, pikërisht falë dhe jo në pësim të dallimeve fetare.
E kemi thënë dhe e përsërisim gjithmonë që ne jemi me fat që dallimet fetare në Shqipëri janë një pasuri dhe jo një problem. Por, nuk duhet të harrojmë se ashtu si çdo njeri, edhe çdo popull e bën vetë fatin e vet. Ajo çka na kanë lënë të parët është detyra jonë ta mbrojmë dhe ta promovojmë, për të mos bërë që të rinjtë, fëmijët tanë ta marrin si të mirëqenë njëherë e përgjithmonë, por për t’ua transmetuar si pasurinë më të çmuar që duhet ta njohin në vlerën e vet dhe duhet ta ruajnë si sytë e ballit.
Të luftosh ekstremizmin e dhunshëm nuk mjafton të çosh ushtarë në front, nuk mjafton të mobilizosh ushtri dhe koalicione ushtarake, sado të forta të jenë, sepse nuk është një betejë që fitohet thjesht dhe vetëm përmes armëve. Por është një luftë që fitohet në mendjet dhe në zemrat e më të rinjve në mbarë globin.
Ky mision fisnik i përket mësimdhënies dhe edukimit, qasjes ushqyese ndaj paqes për t’i bërë qëndresë frymës së përballjes dhe për ta ripërtërirë brez pas brezi, vëllazërinë njerëzore pa të cilën jemi të gjithë të dënuar të mbetemi endacakë të humbur. E në këtë vëllazëri të përditësuar, gjithmonë djep paqtimi dhe mirëkuptimi, emancipimi dhe ndërgjegjësimi, shqiptari, por jo vetëm, do të mund të krenohet se aty është ai syth i njerëzimit të ripërtërirë, ai Betlehem dhe ajo Mekë e Arabisë ku, po e mbyll, duke perifrazuar të madhin Themistokli Gërmenji: “Rilindin e naltësohen Muhamed i Myslimanisë dhe Is i Krishtërisë”.
* Fjala e kryeministrit në ceremoninë  kremtuese të ditës së lindjes së profetit Muhamed, organizuar nga Komuniteti Mysliman Shqiptar.

*Socialistët votuan sot për mandatin e Ramës
* Rama votoi në Qesarakë: Moment me rëndësi për socialistët, po bëhen vendimmarrës në PS
*Hafizi: Në Shkodër ndryshuan Komisionin, procesi u manipulua

TIRANE-Anëtarësia e socialistëve iu drejtua sot kutive në 385 qendra votim,  në një referendum për t’i dhënë përgjigje me “Po” ose ” JO” pyetjes: “Kur Partia Socialiste është në qeveri dhe Kryetari i saj është i zgjedhur Kryeministër. A konsiderohet i rinovuar automatikisht mandati i Kryetarit?

Me referendumin e sotëm, rreth 81 mijë anëtarë të PS-së i dhanë fund debateve të brendshme në parti për legjitimitetin e mandatit të kryetarit, ku shumica e të cilëve votuan pro, duke konfirmuar mandatin e Ramës.

Në një reagim në faqen e tij në “Facebook”, Rama theksoi se “referendumi i sotëm mbështeti me një “PO” shumë të fuqishme, vendimin e kongresit të ri për ndryshimin përkatës në statutin e Partisë Socialiste, lidhur me mandatin e kryetarit kur ky i fundit ka edhe detyrën e kryeministrit”.

Kryeministri Rama theksoi se PS dha sot një provë shumë kuptimplotë të vetëdijes dhe angazhimit demokratik. Sipas kryeministrit, referendumi kaloi pritshmëritë për pjesëmarrjen falë angazhimit të të gjitha gjeneratave të socialistëve.

Plot 81.572 socialistë në mbarë vendin kanë shprehur sot qëndrimin e tyre me votë. Ata dhanë verdiktin e tyre në pyetjen e referendumit “Kur Partia Socialiste është në qeveri dhe kryetari i saj është zgjedhur Kryeministër, a konsiderohet i rinovuar automatikisht mandati i kryetarit?”.
Kryetari i PS-së, Edi Rama, ka votuar në orën 10:00 në qendrën e votimin në Qesarakë, në zonën e tij në Surrel të Dajtit, ku tashmë banon prej kohësh.
Të drejtë vote në këtë referendum kishin të gjithë anëtarët e Partisë Socialiste të anëtarësuar deri më datë 31 dhjetor 2015. Ky vendim është marrë nga drejtuesit e PS­-së për të shmangur pretendimet e zërave kundër, se referendumi do të manipulohet me anëtarë të rinj të anëtarësuar në parti.REZULTATET E VOTIMIT
Votuesit që i përgjigjen me “PO” pyetjes së referendumit, nënkuptojnë rinovim automatik të mandatit të kryetarit të PS në rast se zgjidhet kryeministër. Votuesit që i përgjigjen me “JO” pyetjes së referendumit, nënkuptojnë se mandati i kryetarit nuk duhet të rinovohet automatikisht nëse ai është kryeministër, pra brenda partisë duhet të ketë zgjedhje.

TIRANE, NJËSIA NR.1 VOTUAN 501 ANËTARË
383 anëtarë – PO
118 anëtarë – JO

SHKODËR
1027 anetarë – PO
39 anëtarë – JO

LEZHE
97.5%, 1468 anëtarë- PO
2.5%, 43 anëtarë- JO

KRUJE
168 anëtarë- PO
21 anëtarë –JO

MALLAKASTËR
95.8 %  e anëtarëve-  PO
4.2 % e anëtarëve – JO

ROSKOVEC
97% e anëtarëve – PO
3 % e anëtarëve – JO

PJESEMARRJA
Pjesëmarrja më e madhe ka qenë në Malësinë e Madhe, me 94.8 % të votuesve. Në Vaun e Dejës pjesëmarrja në referendum ishte 93.6%, në Pukë 86.3%, në Has 87.9% dhe në Tropojë 83.8%.

Ndërsa në Lezhë pjesëmarrja ka qenë 76.7 për qind, në Rrogozhinë 83 %, në Mallakastër 86.3%.  Në Elbasan pjesëmarrja ka qenë 86.3 %, në Librazhd 81.3 %, në Peqin 93.4 %, në Prrenjas 86.9 %, në Gramsh 74.1 %, në Belsh 87.9%, në Cërrik 88.5%, në Korçë 88.1%, në Kolonjë 82%, në Maliq 85.2% dhe në Pustec 64.2%.

REFERENDUMI, RAMA: “PO”-ja E FUQISHME, PËR MUA ARSYE MË SHUMË PËR T’I SHËRBYER ME MISH E ME SHPIRT PS-se
Rezultatet përfundimtare të referendumit të PS, për çështjen e zgjedhjes së kryetarit të partisë, nuk janë publikuar ende, por të dhënat paraprake flasin për një mbështetje të konsiderueshme për kryetarin Edi Rama.

Në një reagim në faqen e tij në “Facebook”, Rama theksoi se “referendumi i sotëm mbështeti me një “PO” shumë të fuqishme, vendimin e kongresit të ri për ndryshimin përkatës në statutin e Partisë Socialiste, lidhur me mandatin e kryetarit kur ky i fundit ka edhe detyrën e kryeministrit”.

Kryeministri Rama theksoi se PS dha sot një provë shumë kuptimplotë të vetëdijes dhe angazhimit demokratik. Sipas kryeministrit, referendumi kaloi pritshmëritë për pjesëmarrjen falë angazhimit të të gjitha gjeneratave të socialistëve.

“I falenderoj me dashuri dhe respekt që të gjithë, nga 90-vjeçarët që ishin dëshmia më emocionuese përpara kutive të votimit, deri tek 16-vjeçarët që janë dëshmitarët më të rinj, të të parit referendum partiak në Shqipërinë e këtyre 25 vjetëve. Referendumi i sotëm ishte një ushtrim demokratik e organizativ plotësisht i suksesshëm. I cili rrit energjitë pozitive të akumuluara në familjen tonë të madhe gjatë procesit nëntë mujor të hapjes, zgjerimit e fuqizimit të partisë. Ky proces do të vazhdojë pa u ndalur prej ditës së hënë, për të realizuar objektivin e 150 mijë anëtarëve në ditën e 25-vjetorit të lindjes së Partisë Socialiste.”- shkruan Rama në faqen e tij në “Facebook”

“As unë e as shumica dërrmuese e shokëve e shoqeve të trupës drejtuese të PS, nuk kemi dyshuar asnjë çast se anëtarët e familjes sonë politike që, bashkë me qindra-mijëra qytetarë të tjerë, na dhanë besimin dhe privilegjin e jashtëzakonshëm, për të drejtuar qeverinë e Shqipërisë pas fitores së zgjedhjeve të 23 qershorit, e kanë mirëkuptuar e mbështetur plotësisht mosmbajtjen e zgjedhjeve për kryetar partie pas marrjes së detyrës së kryeministrit nga ana ime. Por referendumi i sotëm, e konfirmoi katërcipërisht bindjen tonë, ashtu sikundër mbështeti me një “PO” shumë të fuqishme, vendimin e kongresit të ri për ndryshimin përkatës në statutin e Partisë Socialiste, lidhur me mandatin e kryetarit kur ky i fundit ka edhe detyrën e kryeministrit. Kjo ditë na dha të gjithëve një arsye më shumë për të qenë krenarë për Partinë Socialiste, ndërsa mua vetë edhe një arsye më shumë për t’i shërbyer me mish e me shpirt familjes sonë të madhe politike, në radhë të parë duke e bërë me ndershmëri, përkushtim e dinjitet, detyrën e lartë të Kryeministrit të Shqipërisë. Faleminderit të gjithëve.”- përfundon Rama.

KLOSI: PROCESI I NUMËRIMIT I THJESHTË, SHUMË SHPEJT DO KEMI REZULTATIN
Ora 19:15 – Në një komunikim telefonik në “News24”, sekretari organizativ i PS-së Blendi Klosi deklaroi se rezultatet e referendumit pritet të dalin shumë shpejt, pasi procesi i numërimit të votave është shumë i thjeshtë.

“Pati një pjesëmarrje shumë të mirë. Nuk kemi pasur asnjë kontestim. Nuk u pengua askush të votonte. Në terren nuk kemi ndjerë asnjë shqetësim. Në qarqet ku është mbyllur numërimi, PO-ja në referendum është e qartë.  U dëshmua që PS është një parti e cila e ka kuptuar që mendimi i anëtarëve të saj është gjëja kryesore. Anëtari i partisë të marrë vlerën e tij më të madhe.”- deklaroi Klosi.

NË KRUJË 168 ANËTARË VOTUAN “PO” DHE 21 “JO”
Ora 18:30 – Rreth orës 18:20 ka përfunduar procesi i numërimit të votave në Krujë. Nga 254 anëtarë të PS-së në Krujë, 189 morën pjesë në votim. Sipas rezultateve, 168 anëtarë iu përgjigjën me “PO” referendumit, ndërsa 21 votuan me “JO”.

PËRFUNDON VOTIMI EDHE NË TIRANË, PRITET TË NISË NUMËRIMI
Ora 18:00- Ka përfunduar numërimi i votave edhe Tiranë. Gazetarja Eglantina Alliaj deklaroi se procesi i numërimit të votave pritet të nisë pas pak, ndërsa duke qenë se është vetëm një fletë votimi, numërimi pritet të mos zgjasë më shumë se një orë e 30 minuta.

KLOSI: PJESËMARRJA MË E MADHE SE AJO PËR DELEGATËT
Ora 17:30- Sekretari Organizativ i PS-së, Blendi Klosi ka komentuar nga Berati referendumin në PS. Sipas tij, ky referendum tregoi se PS është parti e organizuar.

“Rezultati në pjesëmarrje ishte spektakolar. Pjesëmarrja më e madhe se ajo për delegatët. Pjesëmarrja vetëm për Beratin ishte mbi 85%. Procesi ishte transparent, nuk u shënuan incidente. Lista është miratuar që në 31 dhjetor 2015”.

NUMËROHEN VOTAT NË LEZHË, 97.5% I KANË THËNË “PO” REFERENDUMIT
Ora 17:20 – 97.5% e anëtarëve të PS-së në Lezhë i janë përgjigjur me “Po” pyetjes së referendumit “Kur Partia Socialiste është në qeveri dhe kryetari i saj është zgjedhur Kryeministër, a konsiderohet i rinovuar automatikisht mandati i kryetarit?”.

Numërimi i votave në Lezhë ka përfunduar rreth orës 17:15. Nga 1906 anëtarë të PS-së, të regjistruar nga ky rreth kanë votuar 1555. 1468 anëtarë kanë votuar me po, ndërsa 43 i janë përgjigjur me “Jo” pyetjes së referendumit.

HAFIZI: NË SHKODËR PROCESI U MANIPULUA
Ora 16:48- Deputetja Socialiste e Shkodrës, Mimoza Hafizi e njohur si mbështetëse e deputetit Ben Blushi, deklaron se procesi i votimit për referendumin në Shkodër, është manipuluar. Sipas saj, “Janë ndryshuar 3 nga 5 anëtarët e Komisionit. Duhet të njoftohesha për këtë ndryshim”.

NE TIRANE, VOTIMI DO TË VIJOJË DERI NË OREN 18:00
Ora 16:17 – Votimi është mbyllur në të gjitha qendrat në orën 16:00, siç ishte parashikuar, ndërsa në Tiranë votimi do të vijojë deri në orën 18:00.

ORA 14:05 – MAJKO: NUMRI I VOTUESVE MË I LARTË SE VOTIMI PËR DELEGATËT
Deputeti Pandeli Majko ka folur për ecurinë e referendumit të Partisë Socialiste. Majko ta se deri në orën 14:00 procesi i votimit ka qenë i qetë. Ai tha se nga 1500 anëtarë të PS që janë në njësinë numër 5 në kryeqytet, deri më tani janë votuar rreth 800 socialistë.

“Numri i votuesve është më i lartë se votimi për delegatët. Nuk ka pasur asnjë parregullsi deri në këto momente”, tha deputeti Majko.

Ora 13:50-PETRIT AGO: REFERENDUM I DËSHTUAR. PJESMARRJA E ULËT, ANËTARËT VOTOJNË ME NGA DY FLETË
Petrit Ago ka kritikuar votimin në referendumin e sotëm në PS. Ai shprehet se, ky referendum është i dështuar dhe i trukuar ndërsa denoncon se një djalë i ri votoi me dy fletë votimi.
“Flasim sot për një referendum të dështuar dhe të trukuar. Ata që kanë bërë vetë listat dhe vetë kanë votuar. Mori dy fletë votimi dhe i hodhi në kuti dhe unë i thashë; ‘djalë pse dy fletë e jo një. Ou më tha e dija që votohej me dy fletë’.
Në një vend që nuk ka një palë që e kundërshton dhe një palë qe thotë pro nuk ke si të bësh zgjedhje. Sot në Kashar, pjesëmarrja e ulët dhe votimi m nga dy fletë është kuptimplotë për dështimin ekëtij Referendumi”.

Ora 13:30-HAFIZI LETËR KOMISIONIT ZGJEDHOR TË PS: 3 ORË NË PRITJE DHE NUK MARR PËRGJIGJE PËR KËRKESAT E MIA
Mimoza Hafizi i ka drejtuar një letër komisionit Zgjedhor të Partisë Socialiste Bashkisë Shkodrë.
Hafizi në këtë letër pretendon se ka 3 orë në pritje të takimit për kërkesat që ka adresuar.
“Dua të njihem zyrtarisht me përbërjen e re të Komisionit. Kërkoj fotokopje të shkresës zyrtare të emërimit. Pse KZPB nuk u mblodh asnjëherë? Kërkoj listën me adresat e qendrave të votimit”, shkruan Hafizi ndër të tjera në këtë letër.

ORA 12:50 – TAHIRI: REFERENDUMI, SHEMBULL PER DEMOKRACINE NE PS, PARTIA PERBALLE ESHTE NE BUNKERIN E NJE INDIVIDI
Ministri i Brendshëm ka ndjekur nga afër procesin e votimit të socialistëve në Tiranë për referendumin, duke u shprehur se pjesëmarrja është e lartë. Tahiri tha se ky proces tregon për demokracinë brenda partisë, ndërsa tha se PD, “është një parti në bunkerin e një individi”.

Gazetari: Z. Tahiri nga informacionet që ju keni deri tani sa ka shkuar perqindja e votuesve në këtë referendum për Tiranën?

Saimir Tahiri: Jemi afër 50% po është ende herët për të dal në konkluzion, unë kam shumë besim që këtë radhë anëtarët e Partisë Socialiste do përgjigjen më shumë se sa edhe votimi për delegatët. Ky është shembulli më i mirë se si mund të zhvillohet një demokraci brenda partisë për të marrë vendime të mëdha te gjithë bashkë dhe për t’i dhënë drejtimin e duhur edhe Partisë Socialiste. Besoj se gjithkush e ka shumë të qartë modelet e ndryshme që përfaqësojmë ne dhe ata që kemi përballë. Këtu vendosin anëtarët e partisë nëpërmjet një referendumi. Ata që kemi përballë, jo referendum që as e imagjinojnë por vendos vetëm njëri. Ne jemi të hapur, transparent, gjithëpërfshirës dhe anëtarësia thotë fjalën e vet. Ata përballë flasin me dhunë dhe me bllokim. Këto janë dy qasje të ndryshme brenda partisë që sigurisht kanë të bëjnë edhe me qasjen në tërësi që kemi ne ndaj qeverisjes dhe ndaj reformave të mëdha që kemi ndërmarrë.

Sot Partia Socialiste dhe gjithë anëtarësia është e thirrur të japë mendimin dhe çdo anëtar të thotë fjalën e tij lidhur me atë që do bëjmë në vijim, reformën statutore dhe veçanërisht çështjen e zgjedhjes së mandatit të kryetarit të partisë. Por më shumë se kaq kjo ka të bëjë me dimensionin demokratik që kemi ne brenda forumeve të PS për t’i dhënë secilit fjalën dhe për të vendosur të gjithë bashkë.

Pyetje: A ka pasur ndonjë problematikë?

Saimir Tahiri: Jo nuk ka asnjë problem. Unë e kam ndjekur procesin nga fillimi. Të gjithë anëtarët janë të informuar, po marrin pjesë. Nuk ka pasur asnjë problem, por dua gjithsesi t’jua përsëris, mendojeni pak, sikur edhe problemin më të vogël ta gjeni, jemi në fokusin e publikut dhe vëmendjen e qytetarëve sepse po japim një pasqyrë shumë të mirë të dimensionit të demokracisë dhe pjesëmarrjes në PS. Shikoni pak përballë, është historia e një njeriu të vetëm, kështu që dallojmë shumë në dy modele.

Ne mirëpresim çdo sugjerim nga kushdo qoftë, anëtar i Partisë Socialiste, deputet apo edhe ata që nuk janë anëtarë të Partisë Socialiste dhe e gjykojnë me vend që të na japin mendime dhe sugjerime si ta bëjmë më mirë këtë proçes apo cilindo proçes në Partinë Socialiste, por mos harroni kurrë, përballë kemi një parti që është në bunkerin e një individi, kështu që janë dy modele tërësisht të ndryshme. Këtu vendosin anëtarët dhe atje vendos vetëm një njeri.

ORA 11:55 – SHIMAJ: JAM I HABITUR NGA DEKLARATAT E HAFIZIT, NUK KA ASNJË PARREGULLSI
Kreu i Partisë Socialiste në Shkodër, Agim Shimaj, ka reaguar pas deklaratave të deputetes Mimoza Hafizi. Duke theksuar se procesi ka ecur normalisht, Shimaj tha se deri më tani nuk ka patur asnjë parregullsi.

“Jam i habitur nga deklarimet, nuk ka asnjë parregullsi. Pjesëmarrja në referendum është e madhe. Hafizi u zgjodh deputete nga PS ndaj duhet t’i bashkohet partisë. Nuk ka mundësi që të gjithë veç saj të jemi gabim”, tha Shimaj.

ORA 11:45 – NIKOLLA: KY PROCES TREGON SHKALLËN E DEMOKRACISË QË KA PS
Ministrja e Arsimit, Lindita Nikolla, ka ndjekur nga Lezha procesin e votimit për referendumin. Duke u shprehur se në Lezhë dhe Dibër procesi po ecën normalisht, Nikolla tha se ky proces tregon shkallën e demokracisë që ka PS.
“Anëtarësia i është drejtuar qendrave të votimit për të shprehur mendimin e tyre për vendime kaq të rëndësishme. Ky është një hap demokratike, përmes votimit një anëtar një votë. Në Lezhë dhe në Dibër procesi po ecën normalisht. Kjo tregon shkallën e demokracisë që ka PS. Qëndrimi i Blushit le të mbetet qëndrimi i tij”, tha ministrja Nikolla.ORA 11:30 – VOTON VELIAJ: SOCIALISTËT PO KONFIRMOJNË MANDATIN E RAMËS
Kreu i Bashkisë së Tiranës, Erion Veliaj, ka votuar për referendumin në PS. Ai tha se PS është e vetmja parti ku ka diskutim dhe zhvillime.
“Moti i keq nuk i ka ndaluar socialistët të votojnë. Socialistët po konfirmojnë mandatin e Ramës. Rama na ka çuar në 2 fitore, që përkthehen në reforma dhe në një ekonomi që po shkon më mirë. Me Ramën në krye të PS do të kemi një fitore tjetër, që vitin tjetër do të kthehet në numrat e duhur për të qeverisur. Ka patur debat për këtë proces, dhe e vetmja mënyrë për t’iu përgjigjur kritikave është puna. PS është e vetmja parti që përkthen në garë çdo përpjekje për të diskutuar brenda vetes. Një patri që është demokratike brenda vetes, është demokratike edhe për të qeverisur vendin.Shohim se në këtë orë kanë votuar më shumë se gjysma e anëtarësisë. Kur kritikon dikë që punon, sjell efektin e kundërt. Qytetarët flasin në ditë si sot, minoranca e zhurmshme flet çdo ditë”, tha Veliaj.

ORA 11:15 – XHAFAJ: PJESËMARRJE E LARTE NE REFERENDUM, PROVE E PJEKURISË POLITIKE TE PS
Xhafaj tha se procesi i votimit për referendumin po ecën normalisht, ndërsa theksoi se vërehet një impenjim i madh i anëtarësisë së PS për të marrë pjesë në proces.

Sipas Xhafajt, ky referendum është një provë e pjekurisë politikë të Partisë Socialiste.

“Jam votues te njësia administrative 10, dhe shoh një impenjim të anëtarësisë së partisë jo vetëm në Tiranë, por edhe në shkallë vendi. Ka kohë që PS nuk ka pasur një proces referendumi, kjo është një risi, dhe shprehje e kulturës dhe nivelit të lartë politik që ka brenda partisë.

Unë bëj pjesë tek ata që kanë debatuar nëse do të kishte apo jo një referendum. Sipas meje statuti e zgjidh dilemën sesi zgjidhet kreu i PS dhe kur zgjidhet. Kongresi vendosi t’i japë një zgjidhje këtij diskutimi, duke ftuar anëtarësinë e partisë në një referendum për t’iu përgjigjur pyetjes që është shkruar edhe në fletën e votimit. Ky është një proces referendumi për normën kushtetuese të partisë.
Ka një pozicion që bëhet debat dhe një pozicion tjetër që bëhet opozitë brenda partisë. Me sa po shoh unë nuk shoh asnjë problem. Listat janë afishuar, dhe janë lista që njihen. Është një proces shembullor.

Nuk besoj se Rama kur e ka hedhur këtë ide e ka patur faktin për të provuar sesa popullor është ai në PS, pasi e kanë votuar shumica e qytetarëve të këtij vendi për të qeverisur. Kjo është më shumë një prove e pjekurisë politike të PS.

Xhafaj tha se shumë shpejt do të bëhet edhe zgjedhja e forumeve drejtuese të PS-së”, tha Xhafaj.

ORA 11:10-BUSHATI: NË SHKODËR GJITHÇKA NORMALE, NUK DI PSE HAFIZI KA TERR INFORMATIV

Drejtuesi i PS për rajonet Shkodër e Kukës, Ditmir Bushati në një komunikim telefonik me studion e lajmeve News24, u shpreh se procesi i votimit në këto zona po ecën normalisht, ndërsa ftoi deputeten Hafizi të monitorojë situatën që sipas tij paraqitet shumë e mirë.
“Në rajonin Shkodër-Kukës procesi po ecën normalisht dhe ka vijuar në kohë. Në zonat me infrastrukturë paksa më të vështirë është vënë re një një rritje të pjesëmarrjes dhe në tërësi vihet re e njëjta pjesëmarrje si për delegatët e asamblesë.

Kjo sot është një ushtrim korrekt demokratik dhe normal. Cdo gjë ka ecur normalisht dhe nga pikëpamja infrastrukturtore gjithçka ka ecur normalisht.

Lidhur me kritikat e deputetes Mimoza Hafizi, Bushati u shpreh se, “shtabi në rajonet Shkodër e Kukës është mbledhur rregullisht, sikundër për cdo bashki është miratuar dhe komisioni që do të administrojë këtë proces kaq të rëndësishëm. Nuk di se cilat janë cekimet konkrete të Hafizit. Terr informativ? Nuk është aspak e vërtetë se gjithçka është bërë me proces kolegjial. Se të gjithë të zgjedhurit në PS janë mbledhur në disa takime dhe në këto takime Hafizi ka qenë prezente dhe është biseduar për pjesëmarrjen masive në këtë proces referendumi.

Sa i përket vëzhguesve ky ka qenë procesi më i hapur përfshirë dhe zonjën Hafizi, dhe secili nga deputetët është i lirë ta ndjekë dhe ta monitorojë njjë proces sa më demokratik në rast se beson për këtë proces demokratik ose jo. Besoj se duhet të ndajmë opinionet personale që mund të jenë të kundërta”.

ORA 10:45 – FIER, RUÇI: REFERENDUMI, NJË PROCES I RËNDËSISHËM PËR PS-NË
Nga qyteti i Fierit, kreu i grupit të PS Gramoz Ruçi tha se procesi për referendumin po ecën normalisht. Ai e vlerësoi këtë si një proces të rëndësishëm për PS-në.

“Referendumi është një proces i rëndësishëm për PS-në. Kjo e treta herë që në vendin tonë bëhet referendum. Jam krenar që jam pjesë e një force politike si PS”, tha Ruçi.

Ora 10:00-RAMA VOTON NË QESARAKE: MOMENT ME RËNDËSI PËR SOCIALISTËT, PO BËHEN VENDIMMARRËS NË PS
Edhe pse referendumi do të bëhet pikërisht për mandatin e tij, kryetari i PS-së Edi Rama ka votuar ashtu si herën e parë për delegatët, në zonën e tij në Surrel të Dajtit, ku tashmë banon prej kohësh. Rama e cilësoi këtë një moment me rëndësi për socialistët të cilët sipas tij po bëhen vendimmarrës për partinë.

Rama theksoi se është me rëndësi arritja e objektivit të partisë për të numëruar 150 mijë anëtare në 25-vjetorin e PS.

“Pavarësisht se moti nuk ishte në mbështetje të pjesëmarrjes, unë kam besim se sot anëtarësia do të shfrytëzojë këtë instrument demokratik, për t’u shprehur lidhur me një çështje të brendshme të Partisë Socialiste, që edhe një herë tjetër dëshmon se është një forcë transformuese, jo vetëm në qeverisjen e vendit, por edhe në demokracinë aktive të brendshme. Është një moment shumë i rëndësishëm, sepse është hera e parë në këtë histori të re të pluralizmit, që një parti i drejtohet instrumentit të referendumit dhe u jep mundësi të gjithë pjesëtarëve të familjes së saj për të qenë pjesë e një vendimmarrje me rëndësi.

Dua të them se kjo është e para, por nuk është e fundit herë që ne do të përdorim edhe referendumin, për të zgjeruar hapësirat e pjesëmarrjes dhe aksesin në vendimmarrje të çdo anëtari dhe anëtareje të partisë sonë, në një proces që është me rëndësi të veçantë, pasi Partia Socialiste është rihapur, po zgjerohet dita ditës, po rritet me anëtarë të rinj. Kemi sot një trup të ripërtërirë dhe me thuajse fare fiktivitet, pasi kemi bërë një betejë këmbëngulëse kundër anëtarësisë fiktive dhe vazhdojmë të punojmë për objektivin që në 25 vjetori e vet të lindjes, Partia Socialiste të numërojë 150 mijë anëtarë dhe anëtare, brenda dhe jashtë Shqipërisë.

Nga ana tjetër përfitoj nga rasti, që duke shfrytëzuar aksesin përmes jush tek çdo pjesëtar i familjes sonë në gjithë Shqipërinë, t’ju bëj thirrje që jo vetëm të marrin pjesë, por njëkohësisht të vazhdojmë të punojmë përditë, për të realizuar objektivin që secili dhe secila të sjellin edhe një tjetër të afërm, në kuptimin e ideve dhe të idealeve për Partinë Socialiste, për Shqipërinë, në familjen tonë politike. Shumë faleminderit”, tha Rama.

ORA 9:45 – PJESËMARRJE E LARTË VOTUESISH NË DURRËS
Socialistët e Durrësit i janë drejtuar që prej orës 8 të mëngjesit të sotëm qendrave të votimit për të dhënë verdiktin e tyre për referendumin. Nga Durrësi njoftohet se ka një pjesëmarrje të lartë votuesish.

Në këtë qark kanë të drejtë vote 3500 anëtarë, ndërsa vetëm në Durrës kanë të drejtë vote 2300 anëtarë.

ORA 9:30 – HAFIZI: DJE U NDRYSHUAN ANËTARËT E KOMISIONIT TË VOTIMIT PËR SHKODRËN
Deputetja socialiste Mimoza Hafizi ka ngritur shqetësimin se pasditen e djeshme janë ndryshuar anëtarët e Komisionit të Votimit, duke u shprehur se ajo nuk ka mundur të kontaktojë me ta për të paraqitur disa kërkesa.

“Që dje kam ardhur në Shkodër për të parë ecurinë e referendumit. Deri dje mbasdite Komisioni Zgjedhor për Shkodrën nuk ishte mbledhur ende. Vetëm në mbasdite kanë ndryshuar anëtarët e Komisionit, për arsye që nuk dihen. Kisha disa kërkesa për të parashtruar në këtë Komision, por nuk kam mundur t’i takoj. Vetëm mëngjesin e sotëm kam takuar kryetarin e komisionit. Kërkesa kryesore është për të pasur vëzhgues në procesin zgjedhor, por kam të pamundur të kem vëzhgues pasi nuk kam mundur ende të kontaktoj me komisionin”, tha Hafizi.

RAMA E DEPUTETET FTOJNE SOCIALISTET TE MARRIN PJESE NE REFERENDUM
Dje kryeministri Rama, njëherësh kryetar i PS, ftoi gjithë anëtarët socialistë që të votojnë në referendum, për të dhënë kontributin e tyre, në forcimin e demokracisë brenda partisë.

Rama publikoi dje, pasdite, vetëm një status në rrjetin social, “Facebook”, ku shkroi: “Nesër (sot) një ditë e shënuar për PS që pyet anëtarësinë me referendum. Pjesëmarrja e çdo anëtari kontribut për forcimin e demokracisë në PS”.

Ndërkohë deputetët e ministra socialistë ishin dje të shpërndarë nëpër rrethe të ndryshme të vendit, për të ndihmuar në përgatitjen e referendumit të sotëm.

Ndërsa pala kundërshtare e referendumit, dy deputetët Ben Blushi e Mimoza Hafizi, gjithashtu kanë zgjedhur pak rrethe për të kërkuar bojkotimin e referendumit. Ishte vetë kryetari i PS-së, Edi Rama, i cili në fund të kongresit të 19 marsit shtroi për diskutim çështjen e mandatit të tij si kryetar.

Megjithëse e ka pranuar se PS nuk ka bërë zgjedhje për kryetarin me marrjen e pushtetit, Rama tha se kjo nuk mund të bëhej tani, por hodhi në kongres idenë për një referendum. Pas shumë debatesh, për shkak të mospranimit të kësaj ideje nga Blushi e mbështetësit e tij, ishte kreu i Asamblesë Kombëtare, Gramoz Ruçi që caktoi datën 9 prill për këtë referendum.