Një tren futurist që udhëton në një tunel special dhe përshkruan distancën nga qyteti Los Angeles për në San Françisko brenda 30 minutash… Kjo ishte ëndrra pesë vite më parë e zotit Elon Musk, themeluesi i kompanisë SpaceX. Me kalimin e viteve, ëndërra e tij po i afrohet realitetit. Para disa ditësh në Los Angeles u zhvillua gara e tretë vjetore për mjetin që do tëpërdorë tunelin që quhet Hyperloop. Në këtë garë u shënua një rekord tjetër shpejtësie.

467 kilometra në orë, ky është rekordi i ri i shpejtësisë nga ekipi gjerman WARR Hyperloop, i përbërë nga studentë të inxhinierisë. Kjo ishte gara e tretë vjetore që zhvillohet në qytetin Los Angeles. Më shumë se 600 ekipe nga e gjithë bota morën pjesë në gara. 20 prej tyre arriten finalen ndërsa vetëm tre ishin aq të shpejta, sa të provonin mjetet e tyre në një tunel special mbi 1 kilometër të gjatë. Kriteri kryesor ishte shpejtësia në tunelin me presion të kontrolluar.Florian Janke është përfaqësues i ekipit gjerman WARR Hyperloop.

“Provuam modele të ndryshme, një motor të madh, dy motorë të mëdhenj në të njëjtën shasi, që ishin ide të mira. Përfundimisht zgjodhëm motorë të vegjël që kanë raport të mirë mes fuqisë dhe peshës. Simulimi na tregoi se ky do të ishte varianti më i mirë.”

Inxhinierët thonë se u përballën me vështirësi të papritura, siç ishin pjesët elektronike që nuk ishin të përshtatshme për tunelin me presion të kontrolluar. Antoine Coppens është me ekipin EPFLOOP.

“Përdorëm bateri të tipit D dhe i përshtatëm së bashku në një kuti mbajtëse në një strukturë të bërë me printim 3D që e rrethon kutinë dhe bëmë të gjitha provat e efetshmërisë. Kjo të jep qëndrueshmëri sepse kur bateritë ekspozohen në mjedise me presion, mund të zgjerohen dhe rrezikojnë të shpërthejnë, apo të marrin zjarr. Ndaj kur i mban brenda një foleje, sigurohesh që kjo të mos ndodhë.”

Por ky nuk është i vetmi problem që duan të zgjidhin inxhinierët. Një ekip nga Holanda thotë se një sistem i plotë trasnporti me hyperloop do të eleminonte fluturimet e shkurtra, si dëmet që i shkaktohen mjedisit.Jelle Van Der Zon është me ekipin Delft Hyperloop.

“Këto mangësi ndikojnë tek fluturimet në distanca të shkurtëra deri në 1 mijë e 500 kilometra. Ne mendojmë se duhet rritur cilësia e transportit, pra do të përdoret sistemi me hyperloop. Mund të lidhim distancat prej 500 kilometrash si Amsterdamin, Brukselin, Parisin apo Berlinin.”

Shefi i kompanisë SpaceX dhe sponsorizues i hyperloop, Elon Musk, thotë se gara është për të thyer kufinjtë.

“Gara është për të nxitur njerëzit që të mendojnë për modele të reja transporti, që do të transformojnë rrënjësisht qytetet dhe lëvizjen. Besoj se do të ketë përmirësime rrënjësore.”

Gara e këtij viti tregoi se inxhinierët janë gjithnjë e më pranë kësaj zgjidhjeje.

Departamenti i Shtetit tha të shtunën se Sekretari i Shtetit Mike Pompeo dhe Ministri i Jashtëm turk Mevlut Cavusoglu kanë diskutuar për çështjen e pastorit amerikan Andrew Brunson, i cili është ndaluar në Turqi, nën akuzat për spiunazh dhe terrorizëm.

Nuk u dhanë hollësi lidhur me bisedën, por zëdhënësja Heather Nauert tha se të diplomatët ishin “të përkushtuar për t’i vazhduar diskutimet për zgjidhjen e çështjes”.

Ndalimi i pastorit Brunson është bërë një çështje që administrata Trump i ka kushtuar vëmendje të veçantë, madje duke kërcënuar edhe me vendosjen e sanksioneve, si një formë presioni për lirimin e pastorit.

Brunson u mbajt në burg për 21 muaj në Turqi dhe të mërkurën e kaluar ai u vu në arrest shtëpie.

Ndalimi i Brunsonit, pastor evangjelist nga Karolina e Veriut, ka shkaktuar tension në marrëdhëniet mes Turqisë dhe SHBA, dy vende aleate në NATO.

49 vjet më parë, në muajin korrik astronautët amerikanë kryen ecjen e tyre të parë në Hënë. Gazetarja e Zërit të Amerikës Greta Van Susteren zhvilloi një diskutim në studio lidhur me eksplorimin e hapësirës dhe cila është perspektiva në këtë fushë, ndërsa propozimi i Presidentit Donald Trump për një forcë të re ushtarake të hapësirës, është ndeshur me pengesa në Kongres.

Ngjante si një sfidë e pamundur në ato vite, kur idenë e hodhi presidenti John F. Kennedy:

“Unë mendoj se vendi ynë duhet t’i përkushtohet një qëllimi, që para fundit të dekadës të çojmë njeriun e parë në Hënë, i cili të kthehet i sigurtë në Tokë”.

Tetë vjet më pas ndodhi hapi gjigant i njerëzimit.

“Pasi Presidenti Kennedy e filloi këtë sfidë, arritëm të përjetojmë për herë të parë hapësirën, për 15 minuta. Ishte e paimagjinueshme, por në fakt ne mundëm ta realizojmë dhe vitin e ardhshëm shënohet 50-vjetori I udhëtimit të parë të njeriut në Hënë.”- thotë Valerie Neal, drejtoreshë e Muzeut të Hapësirës.

Valerie Neal, drejtoreshë e Muzeumit Kombëtar të Hapësirës, kujton emocionet dhe admirimin që përjetoi kur pa ecjes së parë në Hënë. Por tani, 5 dekada më pas, ajo shqetësohet për mundësinë që hapësira të përdoret si arenë luftrash:

“Çaktivizimi i satelitëve të komunikimit, apo i sistemit të navigimit, do ta paralizonte jetën në Tokë. Nejemi të varur tek kjo teknologji. Jemi shumë vigjilentë që kjo të mos ndodhë, por mbetet një kërcënim i pranishëm,”-thotë ajo.

Presidenti Trump, në qershor, i dha urdhër Pentagonit të krijojë një “forcë të re ushtarake të hapësirës”:

“Kur është fjala për të mbrojtur Amerikën, nuk është e mjaftueshme të kemi praninë tonë në hapësirë, duam që Amerika të jetë dominuese në hapësirë”.

Kongresi, institucioni përgjegjës për krijimin e një dege të re të ushtrisë, nuk është ende i bindur për këtë ide të presidentit. Në fillim të javës, Komisionet e Dhomës së Përfaqësuesve dhe të Senatit nuk përfshinë fonde për një forcë të hapësirës në buxhetin e mbrojtes për vitin e ardhshëm, megjithë shtysën nga sektori privat për komercializimin e eksplorimit të hapësirës.

“Ne mendojmë se duhet ta shfrytëzojmë hapësirën për njerëzit.”– tha një përfaqësues biznesi.

Aktualisht gjashtë kompani private janë duke u përpjekur për zhvillimin e turizmit në hapësirë dhe ndoshta vetëm pak muaj na ndajnë nga dërgimi i qytetarëve të thjeshtë në orbitë.

“50 vitet e para udhëtimi në hapësirë lidhej me qeverinë, ishte i kushtueshëm dhe i rrezikshëm. Në 50 vitet e ardhshme ka për të qenë ndryshe.”- thotë Terry Virts, ish komandant i Stacionit të Hapësirës.

Virts mendon se e ardhmja e industrisë së hapësirës është në dorë të partneritetit publik me atë privat.

Por prirja mund të jetë drejt shtimit të investimeve për biznes, thotë Peter McGrath, i kompanisë “Boeing’.

“Unë do të thoja se zakonisht qeveria është e para dhe pastaj idenë e zhvillon më tej biznesi.”– thotë Peter McGrath, i kompanisë Boeing.

Me afrimin e 50-vjetorit të vizitës së parë në Hënë, fokusi kalon tani tek drejtimi që do të marrë shkenca e hapësirës në 50 vitet e ardhshme.

Presidenti Donald Trump thotë se shifrat pozitive të bëra publike për rritjen e ekonomisë amerikane janë “shumë të qëndrueshme”. Komentet e tij u bënë pasi u bë e ditur rritja me 4.1% e GDP-së gjatë tremujorit të dytë. Por analistët ngrenë pikëpyetje nëse kjo rritje do të jetë e qëndrueshme.

Presidenti Trump nuk humbi kohë për të marrë meritat e shifrave “mahnitëse” të ekonomisë, siç i quajti ai, duke parashikuar se ky është vetëm fillimi.

“Po shkojmë drejt nivelit më të lartë të rritjes në mbi 13 vjet. Po e theksoj këtu sot, se ndërsa do të na ofrohen marrëveshjet e reja të tregtisë, këto shifra do të rriten shumë më tepër”, deklaroi Presidenti Trump.

Duke u rritur me 4.1%, GDP-ja e Shteteve të Bashkuara arriti për herë të parë në katër vite të thyejë tavanin e rritjes prej katër përqind.

“Konsumatorët blejnë më shumë shërbime – diçka pozitive kjo. Shohim gjithashtu investime të forta në biznes gjatë tremujorit të dytë. Bizneset investojnë në paisje. Gjithashtu, shohim një rritje të madhe me gati 10% në eksporte”, thotë ekonomisti Gus Faucher.

Një ndër arsyet kryesore për rritje të eksporteve është se fermerët amerikanë po shesin produktet e tyre për t’i paraprirë tarifave të Presidentit Trump. Kjo do të ishte një arsye përse nuk do të ishte e qëndrueshme kjo lloj rritjeje.

“Kur rriten të ardhurat nga taksat, kemi rritje të fortë të pagave, vendeve të punës, si dhe investime të biznesit që mendoj se do të qëndrojnë edhe gjatë gjysmës së dytë të këtij viti, e cila ndoshta nuk do të jetë aq mirë sa tani, por do të jetë solide”, parashikon zoti Faucher.

Për momentin, mbështetësit e zotit Trump thonë se kjo është një fitore dhe se shifrat dëshmojnë për zgjuarsinë e përqasjes së tij kategorike ndaj tregtisë.

“Votuesit kërkojnë siguri për të ardhmen dhe për familjet e tyre. Duan që të gjejnë punë kur kërkojnë, si dhe të kenë lëvizshmërinë ekonomike. Pra, njerëzit do të shkojnë tek kutitë e votimit duke gjykuar nga gjendja e kuletës”, thotë Chris Garcia, ish-zyrtar i administratës Trump në Departamentin e Tregtisë.

Ndërsa po afrojnë zgjedhjet e mesmandatit në SHBA, këta janë treguesit se perspektiva politike e Presidentit Trump mund të jetë më e mirë se ç’mendohet.

Kryenegociatori amerikan për Ukrainën rikonfirmoi garancitë e dhëna nga Departamenti i Shtetit dhe Shtëpia e Bardhë se Presidenti Donald Trump nuk ka arritur ndonjë marrëveshje për Ukraininën gjatë takimit privat prej dy orësh me homologun rus në Helsinki të Finlandës.

Presidenti rus Vladimir Putin tha të mërkurën në një takim me diplomatët në Moskë se ai dhe zoti Trump diskutuan mundësinë e një referendumi të mbikqyrur nga bashkësia ndërkombëtare për rajonet seperatiste pro-ruse të Ukrainës lindore. Pohimi në fjalë u përsërit më vonë nga ambasadorit i Kremlinit në Shtetet e Bashkuara.

((https://www.bloomberg.com/news/articles/2018-07-19/putin-said-to-have-made-trump-a-new-offer-on-ukraine-at-summit ))

Në një intervistë ekskluzive me Myroslava Gongadze, shefe e shërbimit ukrainas të Zërit të Amerikës, Kurt Volker, përfaqësues i posaçëm i Shteteve të Bashkuara për negociatat në Ukrainë, tha se komentet e Kremlinit rreth referendumit nuk ishin vetëm çorientuese, por edhe të pambështetura.

“Nuk pa patur përpjekje drejt njohjes së aneksimit të Krimesë nga Rusia. Nuk ka mbështetje për një referendum. Asnjë lëvizje ndaj pozicionit të Rusisë për një forcë mbrojtëse për vëzhguesit e OSBE, që do ta ndanin në mënyrë efektive vendin”,tha zoti Volker duke iu referuar propozimit të debatueshëm të Moskës në Kombet e Bashkuara në shtator të vitit 2017.

(( https://www.euractiv.com/section/europe-s-east/news/russia-asks-un-to-set-up-mission-for-east-ukraine/ ))

Referendumet nuk janë pjesë e marrëveshjes së Minskut të vitit 2015, që synon t’i janë fund konfliktit, të sigurojë një armëpushim dhe hapë rrugën për zgjedhje rajonale, tha zoti Volker. Çdo votim i drejtpërdrejtë për shkëputjen nga Kievi, tha ai, nuk do të kishte korrnizën e nevojshme ligjore.

“Pra, shumë gjëra për të cilat shqetësoheshin njerëzit apo kishin parashikuar se mund të ndodhnin (në Helsinki), nuk ndodhën. Prandaj nuk mendoj se ka ndonjë bazë reale për shqetësim”, tha ai duke vënë në dukje se administrata ka vazhduar mbajtjen e sanksioneve ndaj Rusisë në bashkëpunim me aleatët evropianë dhe miratimin e shitjes së armëve për Kievin.

Pentagoni, shtoi zoti Volker, kohët e fundit ka shpalosur planet për një paketë të re ushtarake financimi për vendin e pushtuar të Evropës Lindore.

“Më lejoni të them këtë, se në të gjitha çështjet që ukrainasit i cilësojnë të rendësishme, asgjë nuk është premtuar”, tha ai. “Asnjë dhuratë për Rusinë në kurriz të Ukrainës.”

Komentet e zotit Volker mbështeten reagimet e para nga Garrett Marquis,zëdhënësi i Këshillit të Sigurisë Kombëtare amerikane, i cili tha se Shtëpia e Bardhë nuk po “shqyrton” mbështetjen për referendum në Ukrainën lindore, dhe një deklerarë nga zëdhënësja e Departamentit të Shtetit Heather Nauert, e cila tha se një referendum në Ukrainën lindore “nuk do të kishte legjitimitet”.

Komentet nga tre zyrtarët e lartë amerikanë vijnë pas spekulimeve disa ditore rreth atyre që u diskutuan gjatë një takimi të veçantë kokë më kokë mes Presidentit Trump dhe homologut rus Vladimir Putin në prezencë vetëm të përkthyesve.

Që nga kthimi nga Helsinki, Presidenti Trump ka vazhduar të mbrojë takimin, kryesisht një moment kyç kur ai u pyet rreth ndërhyrjes ruse në zgjedhjet presidenciale amerikane në vitin 2016 ndërsa përbri tij qëndronte udhëheqësi rus.

(( https://www.voanews.com/a/trump-defends-putin-summit-as-poll-shows-high-disapproval/4495141.html ))

Një shkëmbim kyç në konferencën e përbashkët të shtypit të javës së kaluar mes Presidentit amerikan Donald Trump dhe atij rus Vladimir Putin, nga ana e dokumentimit zyrtar as Uashington as në Moskë

Ndërsa qëndronin pranë njëri-tjetrit pas takimit të tyre të lartë në Helsinki, presidentët Trump dhe Putin iu përgjigjën pyetjeve të gazetarëve amerikanë dhe rusë, ku një nga pyetjet më të rëndësishme u shtrua nga gazetari i agjencisë së lajmeve Reuters, Jeff Mason, lidhur me çështjen e debatueshme nëse Putini donte që Trump t’i fitonte zgjedhjet presidenciale të vitit 2016 dhe nëse ai kishte ndërhyrë për ta ndihmuar zotin Trump që të arrinte në Shtëpinë e Bardhë.

Gazetari amerikan i bëri këtë pyetje udhëheqësit rus, “President Putin, a keni dëshiruar që Presidenti Trump të fitonte zgjedhjet dhe a keni urdhëruar një nga zyrtarët tuaj që ta ndihmonte atë në këtë përpjekje?”

Putin u përgjigj: “Po, e bëra. Po, e bëra sepse ai foli për normalizimin e marrëdhënieve SHBA-Rusi”.

Por Kremlini e ka përjashtuar të gjithë shkëmbimin nga transkripti i konferencës së shtypit dhe Shtëpia e Bardhë eliminoi pjesën e parë kyçe të pyetjes së gazetarit Mason, nëse Putin donte që Trump të fitonte kundër rivales së tij demokrate, Hillary Clinton.

Presidenti Trump me ngurrim e ka pranuar ndërhyrjen e Rusisë në zgjedhje, por ai gjithashtu e ka quajtur atë një “mashtrim të madh”. Ai ka hedhur poshtë me forcë çdo akuzë se fushata e tij kishte bashkëpunuar në mënyrë të fshehtë me Rusinë, çështje e cila është duke u hetuar nga prokurori i posaçëm Robert Mueller. Prokurori Mueller është duke hetuar edhe çështjen nëse Trump ka penguar drejtësinë, duke u përpjekur të shmangte hetimin.

Të martën, Presidenti Trump tha, pa ofruar asnjë provë, se Rusia po ndërhyn në zgjedhjet e ardhshme të mesmandatit për Kongres, që do të zhvillohen në nëntor, por për të ndihmuar ligjvënësit demokratë të opozitës, e jo kandidatët republikanë që mbështet ai.

Presidenti i SHBA, Donald Trump, tha të martën se Rusia “do të përpiqet shumë për të ndihmuar demokratët” në zgjedhjet e nëntorit për Kongresin, kundër kandidatëve republikanë të favorizuar prej tij.

Zoti Trump shkruante në Twitter se ai është “shumë i shqetësuar se Rusia do të luftojë fort për të ndikuar në zgjedhjet e ardhshme”.

Presidenti shkruante se bazuar në faktin që asnjë President nuk ka qenë më i ashpër ndaj Rusisë se ai, “ata do të përpiqen shumë në favor të demokratëve. Ata në asnjë mënyrë nuk e duan Trumpin!”

Deklarimet e Presidentit Trump se Moska do të favorizonte demokratët në garat e 6 nëntorit për Kongresin, bie në kundërshtim me përfundimet e komunitetit të zbulimit amerikan se Rusia ndërhyri në zgjedhjet presidenciale të 2016-s për të ndihmuar kandidatin Trump të fitonte Shtëpinë e Bardhë.

Në samitin e javës së shkuar në Helsinki me Presidentin rus Vladimir Putin, Presidenti Trump duket se mbështeti mohimin e udhëheqësit rus që Rusia kishte ndërhyrë në zgjedhje dhe ia kundërvuri deklaratën e Putinit përfundimeve të zbulimit amerikan që thotë se Moska kishte ndërhyrë.

Pasi u kthye në Uashington, zoti Trump tha se ai mbështeste zyrtarët e tij të inteligjencës dhe përfundimin e tyre, shpesh duke i shtuar kësaj deklaratën e tij të zakonshme se fushata e tij nuk bashkëpunoi në mënyrë të fshehtë me rusët dhe se ndërhyrja ruse nuk pati efekt në rezultatin e zgjedhjeve.

Të dielën, megjithatë ai fajësoi ish-Presidentin Barak Obama për mos ndalimin e ndërhyrjes së Rusisë në zgjedhje, duke e quajtur këtë një sajesë të madhe.

Zyrtarët më të lartë amerikanë të zbulimit thonë se Rusia po përpiqet përsëri të ndërhyjë në procesin zgjedhor amerikan në nëntor edhe pse zyrtarët e administratës Trump kanë premtuar se do të përpiqen ta ndalojnë këtë.

Republikanët kanë tani shumicën në të dyja dhomat e Kongresit, por analistët politikë thonë se demokratët mund të marrin kontrollin e njërës ose të dyja dhomave në nëntor. Demokratëve u duhen dy vende për të patur shumicën e Senatit dhe 23 për Dhomën e Përfaqësuesve kur Kongresi i ri të fillojë punën në janar.

Edhe me kontrollin që kanë tani, republikanët kanë pasur vështirësi në miratimin e agjendës legjislative të Presidentit Trump dhe me gjasë do ta kenë edhe më të vështirë nëse demokratët fitojnë më shumë vota.

Nëse demokratët marrin kontrollin e Dhomës, kundërshtarët e Presidentit Trump mund të fillojnë hetime të shumta për administratën e tij dhe të hapin seanca dëgjimore për ta hequr atë nga Shtëpia e Bardhë.

Prokurori i posaçëm Robert Mueller po vazhdon hetimin e tij për ndërhyrjen ruse në zgjedhjet e 2016-s, duke hetuar gjithashtu nëse fushata Trump ka bashkëpunuar fshehtazi me Moskën.

Zoti Mueller ngriti akuza së fundmi ndaj 12 zyrtarëve të inteligjencës ushtarake ruse për piraterimin e kompjuterave të komitetit demokrat kombëtar.

Në epokën para Internetit, spiunët përballeshin me më shumë sfida se tani në përpjekjet e tyre për të depërtuar në qarqet politike perëndimore, për të mbledhur informacione, për të identifikuar rekrutë potencialë, për të marrë ndihmën e simpatizantëve dhe për të ngritur operacione aktive, si ndërhyrja në zgjedhjet e një vendi të huaj.

Tani ata përfitojnë nga mediat sociale si Facebook dhe LinkedIn për të zgjeruar kontaktet e tyre, thonë ish-zyrtarët dhe zyrtarët e shërbimeve inteligjente amerikane dhe britanike.

Qeveritë perëndimore akuzojnë shërbimet e zbulimit rus për shfrytëzim të gjerë për qëllime propaganduese të platformave të mediave sociale, ku ata mund të përhapin “lajme të rreme”, acarojnë grindjet politike në shtetet kundërshtare dhe ndërmarrin fushata të ndikimit në përpjekje për të ndryshuar opinionin publik perëndimor. Por spiunët rusë, në krahasim me trollët (përdoruesit e internetit që bëjnë komente për të avancuar synimet e tyre), janë duke përdorur faqet e rrjeteve në mënyra shumë më të sofistikuara për të depërtuar në qarqet politike perëndimore.

Maria Butina, që dyshohet se është spiune ruse, të cilën prokurorët amerikanë besojnë se e kanë demaskuar, është një mësim se si mediat sociale mund të ndihmojnë operacionet e fshehta të ndikimit, jo vetëm në platforma propaganduese që synojnë të lëkundin ose të shtrembërojnë opinionin publik, tha një zyrtar amerikan i kundër-zbulimit i cili kërkoi që emri i tij të mos identifikohej në këtë artikull.

Në epokën para Internet-it, agjentët rusë kishin për objektiv organizatat dhe ambasadat të cilat organizonin konferenca, diskutime dhe prezantonin raporte dhe analiza mbi çështje të ndryshme politike, ekonomike etj. Por tani ata mund të kombinojnë praninë fizike me atë virtuale. “Butina po përdorte metodën e vjetër, duke u paraqitur në ngjarje politike, duke vendosur kontakte dhe pastaj duke u miqësuar me ta në Facebook ose LinkedIn dhe anasjelltas. Platformat e mediave sociale janë të dobishme në krijimin e rrjeteve të miqësisë,” shton ai.

Butina, 29 vjeç, u akuzua javën e kaluar se ka vepruar si agjente për Kremlinin në Shtetet e Bashkuara. Departamenti i Drejtësisë pohon se ajo ishte në kontakt të rregullt me shërbimet e inteligjencës ruse. Ajo është akuzuar për komplot për të vepruar në emër të qeverisë ruse dhe mos regjistrim si agjente e huaj. Ajo nuk është akuzuar zyrtarisht për spiunazh, pasi ka shumë të ngjarë që roli i saj nuk ishte vjedhja e sekreteve shtetërore dhe ushtarake, por krijimi i kontakteve në qarqet politike amerikane në mënyrë që ato t’i shërbenin qëllimeve të politikës së jashtme të Rusisë, duke përfshirë thellimin e ndarjeve partiake në vendet perëndimore dhe krijimin e rrugëve për ndikim.

Prokurorët federalë akuzojnë Butinën për komplot me dy shtetas amerikanë, me njërin prej të cilëve ajo ka bashkëjetuar, dhe një zyrtar të lartë rus për të ndikuar në politikën amerikane ndaj Rusisë duke infiltruar grupin që promovon të drejtën e armëmbajtjes, Shoqatën Kombëtare të Armëve dhe grupe të tjera konservatore me ndikim në administratën e Presidentit Trump.

Prokurorët amerikanë pohojnë në një memorandum të dorëzuar në gjykatë në mbështetje të kërkesës për ta mbajtur në paraburgim Butinën, se aktivistja ruse për të drejtat e armëve “ka ruajtur informacionet e kontaktit të individëve të identifikuar si punonjës të FSB-së (shërbimit rus të zbulimit) ruse”. Përveç kësaj, prokurorët pretendojnë se FBI-ja kishte vëzhguar Butinën kur ajo ishte takuar për darkë private me një diplomat rus, të cilin qeveria amerikane e dëboi në mars të vitit 2018 për dyshimin se ishte oficer rus i kundërzbulimit.

Në dokumentet gjyqësore të dorëzuara nga prokurorët amerikanë javën e kaluar nuk është e qartë nëse operacioni i saj ishte nisur nga Shërbimi Federal rus i Sigurisë, FSB-ja, apo nga miku i saj, Aleksandër Torshin, një bankier rus, si një mënyrë për të promovuar veten brenda administratës së Kremlinit, me një përfshirje të mëvonshme të FSB-së.

Një ish oficer britanik i kundërzbulimit thotë se ky është një dallim i pa rëndësishëm në administratën e Kremlinit të mbushur me të ashtuquajturit policë siloviki, oficerë të inteligjencës ruse, të cilët kanë lënë zyrtarisht agjencitë e sigurisë por që ende konsiderohen si të aktivizuar nga zyrtarët e inteligjencës perëndimore. Shumë prej tyre mbajnë poste të larta në qeverinë e udhëheqësit rus Vladimir Putin, i cili vetë dikur ka qenë oficer i KGB-së.

Ndër teknikat më tradicionale që pohohet se Butina përdorte është edhe ofrimi i marrëdhënieve seksuale me politikanët dhe lobistët e Uashingtonit, në një rast, sipas prokurorëve amerikanë, në përpjekje për të siguruar një vend pune në një organizatë amerikane me interes të veçantë për të. Ajo jetoi dy herë me një operativ politik republikan të moshës së saj. Sipas mediave amerikane bëhet fjalë për lobistin Paul Erickson. Megjithatë, ajo hoqi dorë nga bashkëjetesa, dhe sipas prokurorëve ajo e trajtoi marrëdhënien “thjesht si një aspekt të domosdoshëm të aktiviteteve të saj”.

Butina nuk ka pranuar fajësinë. Avokati i saj, Robert Driscoll, thotë se ajo thjeshtë po përpiqej të ndihmonte në përmirësimin e marrëdhënieve mes Shteteve të Bashkuara dhe Rusisë së Vladimir Putinit. Dhe ai e mohon se ajo është spiune, duke i thënë kanalit televiziv CNN të premten se shumica e veprimeve të saj “është marrë tërësisht jashtë kontekstit”.

Butina, e cila erdhi në Shtetet e Bashkuara në 2014 me një vizë studentore, krijoi një grup për promovimin e armëmbajtjes në Rusi të quajtur “E drejta për armëmbajtje”. Sipas prokurorëve amerikanë, krijimi i këtij grupi ishte planifikuar me durim nga bankieri Torshin për të infiltruar Shoqatën Amerikane të Armëve dhe grupe të tjera konservatore me synim përfundimtar depërtimin në qarqet politike amerikane.

Gazetari Michael Isikoff i agjencisë Yahoo News ka studiuar metodat e përdorura nga Butina. Ai së bashku me autorin David Corn kanë shkruar librin “Ruleta ruse: Lufta e Putinit në Amerikë dhe zgjedhja e Donald Trump-it” dhe ka ndjekur nga afër aktivitetet e Butinës.

Isikoff thotë se Butina dhe Torshini po bënin përpjekje për të ndikuar organizatat politike konservatore amerikane. Në një intervistë për radion publike amerikane, NPR ai tha: “Siç e kemi përmendur edhe në libër, një lobist republikan tregon se si iu afrua Butinës në një konferencë të grupit Konferenca e Veprimit Politik Konservator, CPAC, dhe ishte befasuar nga mënyra se si ajo ishte e kujdesshme, se si ajo donte të qëndronte në kontakt me të dhe donte të bëhej mike e tij në Facebook. Ky është një zotëri disi i moshuar, i pastër, nuk ishte mësuar me këtë vëmendje nga një grua e bukur ruse”.

Përdorimi i platformave të mediave sociale mund të shoqërohet me rreziqe. Nëse jeni shumë aktiv në Facebook, ju mund të rrisni mundësinë e tërheqjes së vëmendjes së agjentëve të kundërzbulimit dhe të gazetarëve. Në një shkëmbim elektronik me Zërin e Amerikës, Isikoff vuri në dukje se ai u bë mik i Butinës në Facebook në mënyrë që të mund ta kontaktonte atë për një intervistë.

Një zyrtar amerikan i kundërzbulimit thotë se Butina tërhoqi vëmendjen e të tjerëve si me praninë e saj në mediat sociale ashtu edhe me praninë e saj fizike. Ajo madje u thirr për të dëshmuar më parë këtë vit nga Komisioni Senatit për Inteligjencën, ku, sipas kanalit televiziv CNN, ajo zbuloi se aktivizmi i saj për armëmbajtjen kishte marrë fonde nga miliarderi rus Konstantin Nikolaev, një oligark tjetër i lidhur me Kremlinin.

Rasti i Butinës po hedh më shumë dritë mbi fushatën e sofistikuar dhe shkatërruese të ndikimit rus në Shtetet e Bashkuara dhe në Perëndim, dhe se si Kremlini ka vënë në shënjestër të dyja anët e spektrit politik, thonë zyrtarët perëndimorë. Në kohët e Bashkimit Sovjetik, Moska përqëndrohej në partitë e ekstremit të majtë dhe në grupet e çarmatimit bërthamor, por siç theksohet në raportin e vitit 2014 të organizatës Political Capital me seli në Budapest, Kremlini në vitet e fundit është bërë më i sofistikuar, duke vënë në shënjestër si lëvizjet populiste të spektrit të djathtë ashtu edhe atij të majtë në vendet perëndimore.

Natyra politikisht dinake e fushatave të zbulimit dhe ndikimit rus u shfaq në mënyrë dramatike gjatë kremtimit të 10 vjetorit të transmetuesit RT (Russia Today ose Rusia Sot) të financuar nga Kremlini në dhjetor të vitit 2015. Në këtë aktivitet mori pjesë Jill Stein, kryetarja e Partisë së Gjelbër në Shtetet e Bashkuara. Në këtë ceremoni, në të njejtën tavolinë ku ishte ulur Presidenti rus Vladimir Putin, ishte ulur edhe gjenerali amerikan Mike Flynn, i cili shërbeu shkurtimisht si këshilltar i sigurisë kombëtare për Presidentin Donald Trump. Më vonë ndaj Gjeneralit Flynn u ngritën akuza se kishte gënjyer FBI-në për kontaktet që kishte me zyrtarët rusë gjatë fazës së tranzicionit presidencial të zotit Trump.

Sekretari amerikan i Shtetit, Mike Pompeo ka organizuar konferencën e parë të Shteteve të Bashkuara mbi lirinë e besimit, duke mbledhur në Uashington zyrtarë qeverish, udhëheqës fetarë, aktivistë për të drejtat civile dhe pjesëtarë të shoqërisë civile nga e gjithë bota.

Zoti Pompeo tha për faqen elektronike të Vatikanit se misioni i takimit që filloi të martën është “shumë i drejtpërdrejtë dhe i rëndësishëm”. Ai tha se synimi është “të përhapet fjala për rëndësinë e lirisë së besimit për çdo individ në botë”.

“Njerëz të të gjitha besimeve duhet të kenë të drejtën të ushtrojnë besimin e tyre ashtu si zgjedhin, ose të mos ushtrojnë një besim fetar nëse nuk duan,” tha zoti Pompeo.

Sekretari i Shtetit tha se në Uashington janë ftuar 40 ministra të jashtëm për konferencën tri-ditëshe. Ky është numri më i madh i shefave të diplomacisë të mbledhur ndonjëherë në Departamentin e Shtetit.

Siç u shpreh zoti Pompeo, administrata Trump sheh një lidhje të thellë mes lirisë së besimit, të drejtave të njeriut dhe interesave ekonomike.

“Kur njerëzve u jepet mundësia të veprojnë lirisht për sa i përket besimit, ata kanë aftësinë të arrijnë vepra madhore. Investitorët preferojnë vende ku ka liri të gjerë feje. Ata i shohin vendet me liri fetare si vende më të hapura dhe më pak të rrezikshme,” tha Sekretari i Shtetit, Pompeo.

Në një intervistë për Rrjetin e Transmetimeve të Krishtera, zoti Pompeo tha se konferenca do të dalë me një numër nismash që do të njoftohen gjatë punimeve.

Presidenti amerikan, Donald Trump, paralajmëroi presidentin iranian, Hassan Rouhani, që “asnjëherë të mos kërcënojë Shtetet e Bashkuara”, në një koment në twitter, pak kohë pasi që sekretari amerikan i shtetit, Mike Pompeo, mbajti një fjalim kritik ndaj udhëheqësve të Iranit.

“Për presidentin iranian, Rouhani: Kurrë më mos i kërcënoni Shtetet e Bashkuara, ose do të përballeni me pasoja çfarë kanë pësuar shumë pak deri tash në histori. Nuk jemi më vendi që do të rrijë duarkryq përballë fjalëve tuaja të marra të dhunës e vdekjes. Kujdes”, shkroi presidenti Trump të dielën vonë.

Ai u është përgjigjur kësisoj raportimeve të së dielës që citonin presidentin iranian Rouhani të ketë paralajmëruar presidentin Trump, “që të mos luaj me bishtin e luanit”.

“Amerika duhet ta kuptojë mirë se paqja me Iranin është nëna e paqes dhe lufta me Iranin është nëna e të gjitha luftërave”, citohet të ketë thënë ai.

Sekretari Pompeo, tha gjatë një fjalimi në Kaliforni se qeveria e Iranit është shndërruar në makth për qytetarët e Iranit.

Shefi i diplomacisë amerikane tha se Shtetet e Bashkuara nuk kanë frikë që të ushtrojnë trysni mbi qeverinë iranianë në nivelin më të lartë, duke u bërë thirrje aleatëve të Shteteve të Bashkuara që t’i bashkohen trysnisë financiare mbi qeverinë e Teheranit.

“Kjo vlen posaçërisht për aleatët në Lindjen e Mesme dhe në Evropë, qytetarët e të cilëve janë terrorizuar nga veprimtaritë e dhunshme të regjimit për dekada të tëra”, tha sekretari Pompeo.

Ai tha se administrata e presidentit Trump, nuk do të heshtë përballë, siç tha ai, krimeve dhe shkeljeve të shumta të qeverisë iraniane.

Kjo përfshinë kleptokracinë, thaë sekretari Pompeo, duke nënvizuar se ata në krye kanë shpenzuar mirëqenien e njerëzve në terrorizëm e vjedhje dhe në zellin për të përhapur revolucionin islamik në vende të tjera.

Sekretari Pompeo tha se ekonomia e Iranit “është e shkëlqyer”, por vetëm për elitën, duke akuzuar ajatollahët dhe udhëheqësit e lartë për mbushje të xhepave të tyre me miliarda dollarë, ndërsa një e treta e iranianëve jetojnë në varfëri.

“Gjykuar nga pasuria e tyre e madhe, ata duken më të shqetësuar me pasuritë sesa me besimin”, tha ai. “Këta njerëz të shenjtë hipokritë kanë ngritur të gjitha llojet e skemave mashtruese që të bëhen disa prej burrave më të pasur në botë, ndërsa njerëzit e tyre vuajnë”.

Derisa sekretari Pompeo po fliste për mungesën e lirisë së shprehjes në Iran, ndërpre nga një protestues. Sekretari qëndroi i qetë para se të theksonte se iranianët duhet të kenë të njëjtën liri të shprehjes.

Sekretari njoftoi gjithashtu se BBG, që mbikëqyrë Zërin e Amerikës, po ndërmerr hapa të rinj për t’i ndihmuar iranianët të shmangin censurën e internetit. BBG gjithashtu po hap një kanal të ri 24 orësh në gjuhën farsi në televizion, radio dhe rrjetet sociale.

Ai tha se synimi i Shteteve të Bashkuara është që të shohë iranianët të jetojnë brenda vendit të tyre njësoj sikurse edhe iranianët ne Shtetet e Bashkuara.

Në SHBA, ligjvënësit demokratë po përpiqen të detyrojnë një përkthyese të qeverisë për të dëshmuar rreth asaj që është diskutuar gjatë takimit kokë më kokë të Presidentit Donald Trump me udhëheqësin rus Vladimir Putin në Helsinki, megjithëse analistët ligjorë thonë se kjo nuk ka gjasa të ndodhë – përveç rastit nëse vetë presidenti e lejon këtë.

Trump dhe Putin u takuan privatisht për më shumë se dy orë të hënën në Helsinki.

Në takim ishin të pranishëm vetëm përkthyesit dhe hollësitë e asaj që u diskutua mbeten të panjohura.

Demokratët duan ta detyrojnë përkthyesen e qeverisë, Marina Gross, të dëshmojë përpara ligjvënësve, ndërkohë që republikanët po e bllokojnë përpjekjet e tyre.

Thirrja që përkthyesja të dëshmojë ngre pikëpyetje në lidhje me ligjshmërinë, privilegjin ekzekutiv dhe kodin etik për përkthyesit, të cilët krenohen me konfidencialitetin dhe me besimin që u jepet.

“Nuk ka asnjë precedent për të kërkuar që përkthyesja të detyrohet të dëshmojë,” tha për Zërin e Amerikës studiuesi William Pomeranz.

Pomeranz, i cili është zëvendës drejtor i Institutit Kennan për Studimet e Avancuara Ruse të Qendrës Woodrow Wilson në Uashington, tha se ai nuk pret që përkthyesja të merret në pyetje nga Kongresi “veçanërisht për shkak se vetë synimi i takimit Trump-Putin ishte që të ishte një bisedë jashtë protokollit”.

Zyrtari më i lartë i zbatimit të ligjit në Shtetet e Bashkuara, që po mbikëqyr hetimin lidhur me ndërhyrjen ruse në zgjedhjet e vitit 2016, i ka dalë në mbrojtje procesit të ndjekjes penale të agjentëve të huaj, të cilët mund të mos dalin kurrë përpara një gjykate amerikane.

Duke folur të enjten në një forum për sigurinë në Kolorado, zëvendës Prokurori i Përgjithshëm Rod Rosenstein tha se shtrirja e zbatimit të ligjit në Shtetet e Bashkuara nuk duhet të nënvlerësohet.

“Ka shumë njerëz që mendonin se ishin të sigurt nën mbrojtjen e qeverive të huaja, kur kryen krime kundër Amerikës, por më vonë e kanë gjetur veten në burgjet amerikane”, tha ai.

Një javë më parë, zoti Rosenstein njoftoi akt-padinë e Prokurorit të Posaçëm Robert Mueller ndaj 12 shtetasve rusë për akuza që lidhen me ndërhyrjen e Rusisë në zgjedhje.

Drejtori i Zbulimit Kombëtar amerikan, Dan Coats tha se kërcënimi i Rusisë ndaj Shteteve të Bashkuara vazhdon dhe se duhet të ndërmerren masa për të parandaluar një ndërhyrje ruse në zgjedhjet e këtij viti për Kongresin.

Duke folur në Kolorado, zoti Coats tha se është e pamohueshme që rusët qëndrojnë në krye të sulmeve kibernetike kundër Shteteve të Bashkuara si dhe të përpjekjeve për të përçarë SHBA nga aleatët, duke minuar vlerat bazë të vendit.

Ai tha gjithashtu se nuk ka dyshim që presidenti rus Vladimir Putin është drejtpërdrejt përgjegjës për këto veprime.

Zoti Coats pranoi se ishte befasuar nga lajmi se zoti Putin ishte ftuar të vizitonte Shtëpinë e Bardhë.

Drejtori i Zbulimit Kombëtar tha se agjencitë amerikane të inteligjencës do të shohin se çfarë rreziqesh të mundshme do të paraqiste një vizitë e tillë dhe do t’ia ofronte informacionin presidentit Trump.

Departamenti i Shtetit ka denoncuar kërkesën e Rusisë për të marrë në pyetje disa shtetas amerikanë në këmbim të lejimit të një hetuesi amerikan që të marrë në pyetje 12 zyrtarë rusë të paditur nga Prokurori i Posaçëm Robert Mueller për ndërhyrjen e tyre në zgjedhjet amerikane.

Njëri nga amerikanët që Kremlini dëshiron ta marrë në pyetje është ish ambasadori i Shteteve të Bashkuara në Rusi. Shtëpia e Bardhë tha të mërkurën se presidenti amerikan nuk ka përjashtuar mundësinë e lejimit të zyrtarëve rusë për të marrë në pyetje amerikanët.

Gjatë samitit të Helsinkit mes Presidentit të amerikan Donald Trump dhe homologut të tij rus Vladimir Putin, udhëheqësi rus ofroi një marrëveshje. Ai tha se Prokurori i Posaçëm amerikan Robert Mueller mund të vijë në Rusi dhe të hetojë 12 rusët e paditur nëse Kremlini mund të marrë në pyetje 11 amerikanë që dyshohet se kanë bërë veprime të paligjshme në Rusi.

Synimi kryesor i Moskës është investitori me qendër në Londër, Bill Browder, i cili i ka prishur marrëdhëniet me Kremlinin. Vladimir Putin pretendon se bashkëpunëtorët e zotit Browder kanë realizuar fitime të mëdha në Rusi pa paguar taksa dhe se disa nga paratë janë transferuar jashtë vendit me ndihmën e oficerëve amerikanë të zbulimit.

Departamenti i Shtetit të mërkurën hodhi poshtë pohimet e Rusisë, duke i quajtur ato “absolutisht absurde”.

“Ne vazhdojmë t’u bëjmë thirrje autoriteteve ruse që të punojnë me Departamentin amerikan të Drejtësisë për të ndjekur ata në Rusi të cilët në fakt kanë kryer skemën mashtruese të cilës i referohet Rusia dhe që kishte në shënjestër jo vetëm zotin Browder, por edhe kompaninë e tij dhe të tjerët, si dhe popullin rus në përgithësi”, tha Heather Nauert, Zëdhënëse e Departamentit të Shtetit.

Por Shtëpia e Bardhë nuk e ka hedhur poshtë ofertën e Putinit.

“Ka patur disa biseda për këtë, por Shtetet e Bashkuara nuk kanë ndërmarrë asnjë angazhim. Presidenti do të punojë me ekipin e tij dhe ne do t’ju njoftojmë nëse do të ketë ndonjë zhvillim mbi këtë çështje”, tha Sarah Sanders, zëdhënëse e Shtëpisë së Bardhë.

Prokurorët rusë duan të marrin në pyetje disa ligjvënës amerikanë, oficerë të sigurisë dhe diplomatë, duke përfshirë ish-ambasadorin e amerikan në Rusi Michael McFaul. Zoti McFaul i ka kërkuar Shtëpisë së Bardhë të dënojë në mënyrë kategorike atë që ai e quajti “kërkesë qesharake nga Putini”. Por edhe para samitit të Helsinkit, McFaul shprehu shqetësimin rreth qëndrimit të Presidentit Trump ndaj Rusisë.

“Frika ime më e madhe është se Presidenti Trump do të jetë shumë miqësor dhe lavdërues me Vlaidmir Putinin”, tha ish ambasadori amerikan në Ukrainë.

Trump të mërkurën i hodhi poshtë këto kritika.

“Asnjë president nuk ka qenë më i ashpër se sa unë kundër Rusisë. Ju duhet të shikoni se çfarë kemi bërë, shikoni sanksionet, shikoni ambasadorët që ne kemi tërhequr”, tha Presidenti Trump.

Në një zhvillim tjetër, një grua që dyshohet se është agjente e Rusisë është arrestuar në Shtetet e Bashkuara. Ministria e jashtme ruse thotë se arrestimi i së dielës ishte një përpjekje për të minuar suksesin e samitit Trump-Putin para se ai të ndodhte.