Kurt Volker, i dërguari special i Shteteve të Bashkuara për përpjekjet për ndaljen e konfliktit në pjesën lindore të Ukrainës, tha se do të takohet me ndihmësin e Kremlinit, Vladislav Surkov, në kryeqytetin Beograd në Serbi.

“Ne do të takohemi me kolegun rus më 7 tetor në Beograd për të diskutuar se si ta shpejtojmë implementimin e marrëveshjes së Minskut dhe ta ripërtrijmë integritetin territoril të Ukrainës”, ka shkruar sot herët në mëngjes zoti Volker në rrjetin Twitter.

Ky do të jetë takimi i dytë ndërmjet amerikanit Kurt Volker dhe Vladislav Surkovit, që është përfaqësues i presidentit të Rusisë, Vladislav Surkov, për konfliktin në pjesën lindore të Ukrainës.

Kryetari demokrat i Komisionit të Zbulimit të Senatit thotë se “ekziston një konsensus i gjerë” se rusët kanë siguruar përmes hakerimit dokumente politike dhe e kanë bërë të njohur informacionin e siguruar, në përpjekje për të patur ndikim tek zgjedhjet presidenciale të vitit 2016.

Senatori i Virxhinias Mark Warner i bëri këto komente në një konferencë shtypi që tha të mërkurën lidhur me hetimin që po zhvillon Komisioni i Senatit për ndikimin e Rusisë në zgjedhjet presidenciale amerikane. Konferencën e shtypi senatori demokrat e dha së bashku me Kryetarin republikan të Komisionit, senatorin republikan të Karolinës së Veriut, Richard Burr.

Komisioni i Zbulimit i Senatit është njëri prej disa komisioneve që janë duke zhvilluar hetime lidhur me ndërhyrjen ruse në zgjedhjet presidenciale të Shteteve të Bashkuara dhe për mundësinë e bashkëpunimit mes Rusisë dhe anëtarëve të ekipit të fushatës së zotit Trump.

Senatori Warner tha se përpjekja e Rusisë për të patur ndikim tek zgjedhjet amerikane, po ashtu përfshin edhe disa përpjekje për të testuar dobësitë e sistemeve zgjedhore të 21 shteteve amerikane.

Senatori Burr tha se Rusia nuk ka mundur të ndikojë në procesin e numërimit të votave. Ai tha se Komisioni i Senatit është duke e vazhduar hetimin lidhur me mundësinë e bashkëpunimit të ekipit të zotit Trump me Rusinë gjatë fushatës elektorale, por ai shtoi se ende nuk ka ka një përfundim të qartë për atë që ka ndodhur.

Senatori demokrat Mark Warner tha se qeveria federale duhe të mbajë “një qëndrim më agresiv” lidhur me ndërhyrjen ruse, meqenëse hetimi i deritanishëm ka treguar për depërtimin rus në sistemet elektorale të 21 shteteve amerikane.

Megjithëse senatori republikan Burr theksoi se hetimi ende nuk ka arritur në konkluzione, ai tha se beson që komisioni nuk mund të presë derisa të përfundojë i gjithë hetimi. Ai tha se publiku duhet ta dijë se Rusia mund të ndërhyrë përsëri.

Shumica e ekipit të sigurisë kombëtare të presidentit Trump bie dakord me përfundimin e komunitetit të zbulimit se Rusia ka ndërhyrë në zgjedhjet e vitit të kaluar në favor të tij. Por Presidenti nuk ka thënë se ai u beson atyre.

Gjatë hetimit, anëtarët e komisionit si dhe stafi i hetuesve kanë zhvilluar kryesisht intervista me dyer të mbyllura me disa anëtarë të rrethit të ngushtë të presidentit dhe komunitetit të zbulimit.

Pavarësisht provokimeve të tij të vazhdueshme dhe gatishmërisë për t’u angazhuar në retorikë të nxehtë, zyrtarët e lartë të zbulimit amerikan thonë se udhëheqësi i Koresë së Veriut, Kim Jong Un nuk është i çmendur.

“Kim Jong Un është një aktor shumë racional,” tha të mërkurën zëvendësndihmës drejtorja e Qendrës së Misionit të Koresë në Agjencisë Qendrore të Zbulimit, CIA.

“Me përjashtim të retorikës agresive, Kim Jong Un nuk ka dëshirë të përballet me forcat e komandës së përbashkët (të Shteteve të Bashkuara dhe Koresë së Jugut)”, tha Yong Suk Lee në një konferencë për zbulimin në Uashington, të organizuar nga CIA.

“Kim Jong Un dëshiron atë që të gjithë sundimtarët autoritarë duan, të qeverisë për një kohë të gjatë dhe të vdesë paqësisht në shtratin e tij”, tha zonja Lee.

Vlerësimi i agjencive të zbulimit duket se është në kundërshtim me retorikën që përdoret nga Presidenti i Shteteve të Bashkuara, Donald Trump.

Në një seri mesazhesh në Twitter, Presidenti Trump e ka quajtur udhëheqësin e Koresë së Veriut një “njeri të vogël raketash” dhe në një mesazh të postuar muajin e kaluar, ai tha se Kim është “padyshim një njeri i çmendur”.

Megjithatë, zonja Lee dhe zyrtarë të tjerë të CIA-s besojnë se ka pasur një “qëllim të caktuar” në mënyrën se si udhëheqësi i Koresë së Veriut po vepron në skenën botërore.

Një gjykatë në Shtetet e Bashkuara, ka urdhëruar qeverinë e Iranit, të paguajë 63.5 milionë dollarë ish-marinsit amerikan, Amir Hekmati i cili ishte mbajtur në burgjet iraniane për katër vite.

Gjykatësja e qarkut, Ellen Huvelle, vendosi në favor të 33 vjeçarit me origjinë iraniane, Hekmati, pasi Irani nuk arriti t’i përgjigjej ankesës.

Hekmati ishte ndaluar në gusht të vitit 2011, pasi ai ishte kthyer në Iran për të vizituar familjen e tij.

Ai ishte akuzuar për spiunazh dhe i ishte shqiptuar dënim me vdekje. Dënimi ishte hedhur poshtë më vonë, nga Gjykata Supreme e Iranit dhe ai u dënua me 10 vjet burgim.

Hekmati ishte liruar në janar të vitit 2016 së bashku me disa të burgosur tjerë amerikanë, pasi Uashingtoni kishte falur dhe liruar shtatë iranianë.

Hekmati kishte paditur Iranin në vitin 2016, nën akuzën se ishte torturuar dhe mashtruar për të dhënë deklaratë të pavërtetë derisa ishte në Tehran.

Bashkë me Hekmatin, ishin liruar edhe gazetari i Washington Post, Jason Rezaian dhe dy amerikanë tjerë me origjinë iraniane.

Së paku gjashtë anëtarë të administratës së presidentit amerikan, Donald Trump – në mesin e tyre dhëndrri dhe vajza, që të dy këshilltarë të tij – kanë përdorur emailet private për punë zyrtare të Shtëpisë së Bardhë, raportojnë mediat amerikane.

Dhëndrri i Trumpit, Jared Kushner, ka pranuar përmes avokatit se ka përdorur emailin privat në ditët e para të administratës.

Sipas gazetës New York Times, Ivanka Trump, këshilltarët e tjerë, Gary Cohn dhe Stephen Miller, si dhe ish-anëtarët e administratës, Steve Pannon dhe Reince Priebus, kanë përdorur po ashtu emailin privat për punë zyrtare.

Gjatë fushatës zgjedhore, Trump ka kritikuar vazhdmisht rivalen e tij demokrate, Hillary Clinton, për përdorimin e emailit privat gjatë kohës së ka qenë sekretare e shtetit.

Trump ka thënë se do ta burgoste Clintonin nga shqetësimet se mund t’i ketë keqpërdorur informacionet e klasifikuara.

Hetimet për këtë çështje janë mbyllur pa akuza.

Clinton tha se raportet se gjashtë zyrtarë të administratës Trump kanë përdorur emailet private për punë zyrtare janë “kulmi i hipokrizisë”.

Shtëpia e Bardhë ka hedhur poshtë pohimet e ministrit të Jashtëm të Koresë së Veriut që SHBA-ja i ka shpallur luftë Koresë së Veriut, këto pretendime u quajtën “absurde”.

Kjo deklaratë erdhi nga Zëdhënësja e Shtëpisë së Bardhe, Sarah Sanders, disa orë pasi diplomati verikorean tha se Phenjani ka të drejtë të mbrojë vetën dhe të sulmojë bombarduesit strategjik të SHBA-së.

“Ne nuk i kemi deklaruar luftë Koresë së Veriut. Sinqerisht, ky sugjerim është absurt”, ka thënë Sanders.

Ri Yong Ho, duke folur në Nju Jork, në Asamblenë Gjenerale të Kombeve të Bashkuara,si përgjigjie ndaj SHBA-së, ai u ka thënë gazetarëve se “ të gjitha opsionet janë në tryezë” për Korenë e Veriut.

“Bota duhet të kujtojë se SHBA-ja ishte e para që i shpalli luftë vendit tonë”, ka thënë Ri.

Ri ka paralajmëruar se Phenjani ka të drejtën të sulmojë bombarduesti strategjik të SHBA-së, edhe nëse janë jashtë zonës ajrore të Koresë së Veriut.

Javën e kaluar, Trump e quajti liderin verikorean, Kim Jong Un-in “ të çmendur”, vetëm një ditë pasi Kim e quajti presidentin amerikan “ matuf i çmendur amerikan”.

Katër ndër pesë amerikanë mbështesin të drejtën e qëndrimin të përhershëm për emigrantët pa dokumenta që kanë hyrë në Shtetet e Bashkuara si fëmijë, sipas një ankete të re të televizionit ABC News dhe gazetës Washington Post.

Të dhënat që tregojnë se 86 për qind e të anketuarve nga i gjithë spektri politik e mbështesin qëndrimin e tyre, vjen vetëm disa javë pasi administrate e Presidentit Donald Trump e shfuqizoi programin e quajtur DACA.

Sipas politikës së administratës së ish-Presidentit Obama, emigrantët pa dokumenta që ishin sjellë në Shtetet e Bashkuara si fëmijë, mund të merrnin autorizim për qëndrim që mund të ripërtërihej çdo dy vjet. DACA nuk parashikonte një rrugë për shtetësi, duke i lënë rreth 800 mijë përfituesit e asaj politike në një status gjysmë ligjor.

Anketa e së hënës tregonte gjithashtu se dy të tretat e amerikanëve duan që një marrëveshje e ngjashme me DACA-n të zbatohet paralelisht me masa më të forta kontrolli në kufi.

Presidenti i Shteteve të Bashkuara, Donald Trump, thotë se prova iraniane e raketës së re balistike, tregon se marrëveshja madhore atomike është e diskutueshme dhe se Irani bashkëpunon me Korenë Veriore.

“Irani posa e ka testuar raketën balistike me kapacitet për të arritur në Izrael. Ata po ashtu, punojnë me Korenë Veriore. Nuk ka mbetur shumë nga marrëveshja që e kemi!” ka shkruar mbrëmë vonë në rrjetin Twitter presidenti Trump.

Irani e ka testuar raketën përkundër vërejtjeve nga Uashingtoni.

Transmetuesi shtetëror iranian, IRIB, ka dhënë pamje të lansimit të raketës, Khorramshahr, që së pari ishte zbuluar në paradën ushtarake të profilit të lartë para dy ditësh, me të cilën është shënuar lufta e viteve të 80-ta ndërmjet Iranit dhe Irakut.

“Kjo është raketa e tretë iraniane me rreze të veprimit prej 2 mijë kilometrash”, u tha në raportin e transmetuesit.

Televizioni shtetëror iranian nuk tha se kur ishte kryer testi, megjithëqë zyrtarët iranianë thanë para dy ditësh se ajo do të provohej “së shpejti”.

Gjatë paradës ushtarake, presidenti i Iranit, Hassan Rohani, tha se Teherani do ta vazhdoj programin e vet raketor dhe do t’i forcoj kapacitetet ushtarake iraniane, përkundër kërkesës së presidentit amerikan, Donald Trump, që Irani ta ndal zhvillimin e “raketave të rrezikshme”.

Në fjalimin e tij në Asamblenë e Përgjithshme të Kombeve të Bashkuara më 19 shtator, presidenti amerikan, Donald Trump, e ka akuzuar Iranin për mbështetje të terroristëve, ndërsa qeverinë iraniane e ka vlerësuar se është “diktaturë e korruptuar”.

Zoti Trump, po ashtu, ka kërkuar qëndrim më të ashpër kundër Iranit nga shtetet e tjera anëtare të Kombeve të Bashkuara, duke thënë se “ne nuk mund ta lejojmë regjimin vrasës të vazhdojë me aktivitete destabilizuese, derisa prodhon raketa të rrezikshme”.

Duke iu referuar marrëveshjes atomike të Iranit dhe gjashtë fuqive botërore, përfshirë Shtetet e Bashkuara, në vitin 2015, Trump tha se Uashingtoni “nuk mund ta respektoj një marrëveshje, e cila shfrytëzohet si mbulesë për ndërtimin eventual të programit atomik”.

Në fjalimin e tij një ditë më vonë në Asamblenë e Përgjithshme të Kombeve të Bashkuara, presidenti iranian, Hassan Rohani, u është përgjigjur komenteve të Trumpit, derisa fjalimin e presidentit amerikan e ka vlerësuar si “injorant, absurd dhe retorikë urrejtëse”.

Rohani tha se Irani nuk do të jetë pala e parë që do ta shkelte marrëveshjen atomike.

Nuk është e qartë nëse zoti Trump e ka marrë vendimin përfundimtar për të vazhduar të veproj në harmoni me marrëveshjen atomike me Teheranin, sipas së cilës Irani është pajtuar për t’i kufizuar aktivitetet e veta bërthamore, në këmbim për tërheqjen e sanksioneve ndërkombëtare.

Administrata e Trumpit dy herë ka certifikuar se Irani po bashkëpunon me marrëveshjen, duke i respektuar obligimet e veta të parapara me këtë dokument.

Por, administrata amerikane, po ashtu, ka thënë se programi raketor iranian paraqet shkelje të frymës së marrëveshjes atomike.

Pritet që më 15 tetor, Uashingtoni do të shpall nëse konsideron se Irani ende po e respekton marrëveshjen.

Nënshkruesit e tjerë të kësaj marrëveshjeje janë Rusia, Kina, Britania, Franca dhe Gjermania.

Uashingtoni ka imponuar sanksione të njëanshme kundër Iranit, duke thënë se testet e raketave balistike paraqesin shkelje të rezolutës së OKB-së, me të cilën mbështetet marrëveshja atomike dhe i bën thirrje Iranit që të mos ndërmerr aktivitete të ndërlidhura me raketa balistike, me kapacitet për të bartur armatim atomik.

Irani këmbëngul se programi i tij raketor nuk paraqet shkelje të rezolutës së OKB-së, pasi raketat nuk janë të parapara për bartje të armatimit atomik.

Përgatiti: Fatmir Bujupi

Sekretari amerikan i Shtetit, Rex Tillerson, tha se shpreson se Irani do të pajtohet për t’i negociuar ndryshimet që i kërkon SHBA-ja në marrëveshjen bërthamore të vitit 2015, pavarësisht kundërshtimeve nga presidenti i Iranit për bisedime të reja.

Në një konferencë për media, pas takimit në Kombet e Bashkuara me palë të tjera të marrëveshjes , Tillerson për herë të dytë veçoi klauzolat e marrëveshjes, të cilat u japin fund kufizimeve të aktiviteteve bërthamore të Iranit – të tilla si pasurimi i uraniumit – në vitin 2025. Këto kufizime janë vënë në këmbim të lehtësimit të sanksioneve kundër Iranit.

Tillerson tha se presidenti i Shteteve të Bashkuara, Donald Trump, do që këto klauzola të rienegociohen.

Por, presidenti i Iranit, Hassan Rohani, kujtoi vështirësitë në arritjen e marrëveshjes komplekse, e cila, përveç SHBA-së dhe Republikës Islamike, ka përfshirë Francën, Gjermaninë, Rusinë, Kinën dhe Britaninë.

“Është një marrëveshje që ka marrë mbi dy vjet negociata mbi çdo fjalë dhe fjali”, tha Rohani për gazetarët në margjina të Asamblesë së Përgjithshme të Kombeve të Bashkuara në Nju Jork.

“Kemi arritur të pajtohemi për data dhe afate të pranueshme reciprokisht. Prandaj, kjo marrëveshje nuk është diçka që mund ta prekni. Nëse nxirrni një tullë të vetme, e gjithë ndërtesa do të shembet”, tha Rohani.

Edhe presidenti i Francës, Emmanuel Macron, tha se dëshiron të rihapë negociatat për klauzolat skaduese dhe të përpiqet të ndërmjetësojë mosmarrëveshjet e tjera midis SHBA-së dhe Iranit.

Por, shefja për politikë të jashtme të Bashkimit Evropian, Federica Mogherini, tha se kundërshton rihapjen e negociatave për marrëveshjen. Ajo tha se marrëveshja “po funksionon” dhe se BE-ja “do të sigurojë që ajo të vazhdojë”.

Rohani tha se kërcënimet e vazhdueshme të administratës Trump për të braktisur marrëveshjen, tregojnë se asaj nuk mund t’i besohet.

Presidenti i Iranit, Hassan Rohani.

Marrëveshja bërthamore është negociuar fillimisht nga ish-presidenti i Shteteve të Bashkuara, Barack Obama.

“Një qeveri amerikane që zgjedh të shkelë angazhimet e saj ligjore ndërkombëtare… Bisedimet me një qeveri të tillë do të ishin humbje kohe”, tha presidenti iranian.

Rohani tha se, në çdo rast, Trump së pari duhet të kërkojë falje për akuzat “jashtëzakonisht ofenduese” dhe “të pabaza” se Teherani është një “diktaturë e korruptuar” dhe “regjim vrasës”.

Trump, qysh përpara se të merrte detyrën e presidentit në muajin janar, ka thënë se marrëveshja bërthamore me Iranin është ujdia më e keqe që ka dëgjuar ndonjëherë.

Në fjalimin e parë para Asamblesë së Përgjithshme të OKB-së, të mbajtur të martën, Trump tha se bota duhet t’i kundërvihet Iranit, i cili “minon paqen në të gjithë Lindjen e Mesme”.

Përgatiti: Valona Tela

Mediat amerikane po raportojnë se nën urdhërat e një gjykate sekrete, hetuesit federalë kanë përgjuar ish- udhëheqësin e fushatës së presidentit, Donald Trump, Paul Manafort.

Gazeta, New York Times, ka cituar dy persona të kenë thënë se agjentët e SHBA-së e kanë njoftuar Manafort se po planifikojnë ta padisin atë, derisa po e bastisnin shtëpinë e tij në shtetin e Virgjinias.

CNN, duke cituar burime anonime, ka raportuar se hetuesit kishin urdhër sekret për të përgjuar Manafort-in, para dhe pas fushatës presidenciale të vitit 2016.

Manafort dhe avokatët e tij nuk kanë reaguar ndaj raportimeve.

Manafort u bë udhëheqës i fushatës së presidentit amerikan, Donald Trump, në qershor të 2016-tës, ndërsa u detyrua të jepte dorëheqje pas dy muajve, pas raporteve se biznesi i tij kishte lidhje me partinë e presidentit ukrainas të mbështetur nga Rusia, Viktor Yanukovich.

Senati i Shteteve të Bashkuara të Amerikës, ka mbështetur fuqishëm një projektligj 700 miliardë dollarësh, të politikës së mbrojtjes, që i bën thirrje Pentagonit të luftojë propagandën ruse.

Akti i autorizimit të mbrojtjes kombëtare pre 1.215 faqesh, po ashtu do të përfshijë një dispozitë që ndalon përdorimn e softuerit, Kaspersky Lab, në kompjuterët e qeverisë.

Departamenti i mbrojtjes është i autorizuar të shpenzojë 65 milion dollarë, për të ndërtuar një raketë të re, si përgjegjie e deklaratave se Rusia ka shkelur traktatin e Forcave Bërthamore në vitin 1987.

Rusia vazhdimisht ka refuzuar akuzat e SHBA-së se ajo ka testuar dhe lëshuar një raketë që prishë marrëveshjen e njohur si INF.

Në projektligji udhëzon Departamentin e Mbrojtjes të raportojë në Kongres për përpjekjet e Rusisë, që të “shpërndajë propaganda, përmes aplikacioneve në rrjete sociale apo përmes internetit”

Ky projektligj është mbështetur fuqishëm nga Demokratët dhe Republikanët, ndërsa kritikët cilësojnë se kjo do të çojë në shkatërrimin e marrëveshjes së Luftës së Ftohtë.

Bob Martin kishte raportuar edhe gjatë luftës së Kosovës

Reporteri me përvojë të gjatë në një rrjet televiziv nga qyteti Albukerki, Bob Martin, është vrarë pasi helikopteri, pilot i të cilit ishte ai, është përplasur dhe përfshirë nga flaka, në një fushë afër shtetit amerikan, Nju Meksiko, kanë thënë mbrëmë autoritetet.

Sipas policisë shtetërore në Nju Meksiko, i ndjeri Martin, 64 jeçar, është shpallur i vdekur në vendin e rrëzimit, të shtunën gjatë natës, raporton agjencia AP.

Helikopteri i tij i tipit, The Bell B200, ishte shkatërruar, tha Administrata e Aviacionit Federal.

Rrjeti KRQE-TV tha se Bob Martin kishte punuar për këtë stacion më tepër se 20 vite, duke xhiruar, shkruar dhe redaktuar raporte dhe tregime të ndryshme.

Bob Martin, që ishte edhe pilot i aeroplanëve dhe helikopterëve komercialë, shpeshherë kishte raportuar për zjarret, që i kishin përfshirë territoret e ndryshme.

Ai, po ashtu, kishte raportuar edhe nga zonat e luftës, përfshirë Afganistanin, Irakun, Kosovën, El Salvadorin dhe Nikaraguan.

Presidenti amerikan, Donald Trump, ka bërë thirrje për reformë të Kombeve të Bashkuara, duke theksuar se kjo organizatë nuk e ka shfrytëzuar potencialin e vet.

“Në vitet aktuale Kombet e Bashkuara nuk e kanë arritur potencialin e tyre të plotë për shkak të burokracisë dhe keqmenaxhimit”, tha sot Donald Trump, në një ngjarje të mbajtur në selinë e OKB-së në Nju Hork, ku ai ka synuar të arrijë mbështetje globale për reformim të Kombeve të Bashkuara.

Sipas zotit Trump, Kombet e Bashkuara shpenzojnë shumë para dhe kanë shumë të punësuar.

“Ne nuk shohim rezultate në linjë me këtë investim”, tha Trump.

Në këtë tubim mori pjesë edhe sekretari i përgjithshëm i Kombeve të Bashkuara, Antonio Guterres, dhe liderët e 120 vendeve, që e kanë nënshkruar një propozim-deklaratë në mbështetje të reformave.

Nesër, presidenti amerikan, Donald Trump, për të parën herë flet në Asamblenë e Përgjithshme të Kombeve të Bashkuara, e cila zgjatë deri më 25 të këtij muaji.

Senatori demokrat, Ben Cardin, thotë se Turqia mund të ballafaqohet me sanksione automatike amerikane, për shkak të blerjes aktuale të sistemeve raketore kundërajrore nga Rusia, pasi kjo mund të paraqes shkelje të legjislacionit të Shteteve të Bashkuara.

Zoti Cardin, anëtar i Komitetit për raporte të jashtme të Senatit të Shteteve të Bashkuara, këtë vërejtje e ka bërë në letrën e djeshme dërguar administratës së presidentit, Donald Trump.

Në letër theksohet se blerja e raketave ruse të tipit S-400 nga ana e Ankarasë, që ishte finalizuar para disa ditësh, paraqet shkelje të sanksioneve të Shteteve të Bashkuara kundër Rusisë, që ishin shndërruar në ligj në muajin gusht.

Cardin ka theksuar se ky legjislacion kërkon sanksione për “çdo person që ndërmerr transakcione të rëndësishme” me mbrojtjen e Rusisë ose me sektorët e inteligjencës.

Shtetet e Bashkuara i kanë bërë thirrje Kinës dhe Rusisë që të ndërmarrin “aksione direkte” kundër Koresë Veriore, pasi ajo sot e ka lansuar raketën e dytë balistike mbi Japoninë.

“Kina e furnizon Korenë Veriore me pjesën më të madhe të naftës së nevojshme”, tha sekretari amerikan i shtetit , Rex Tillerson, dhe ka shtuar se “Rusia është punëdhënësi më i madh i forcës punëtore verikoreane”.

“Kina dhe Rusia duhet ta theksojnë jotolerancën e tyre për këto lansime raketore të pamatura, duke ndërmarrë aksione direkte”, tha Tillerson.

Kjo deklaratë e zotit Tillerson u bë derisa Këshilli i Sigurimit i Kombeve të Bashkuara pritet të debatoj për lansimin e fundit verikorean, për të cilin zyrtarët amerikanë dhe jugkoreanë thanë se ka fluturuar aq gjatë sa mund ta arrijë territorin e Guamit në Paqësor të Shteteve të Bashkuara.

Gjykata Supreme e Shteteve të Bashkuara dje ka vendosur që presidenti, Donald Trump, mund ta zbatojë ndalesën e tij të përkohshme për refugjatët që hyjnë në Amerikë.

Gjyqtarët e pranuan kërkesën e Departamentit të drejtësisë për ta bllokuar një vendim gjyqësor të apelit federal, për të cilën departamenti tha se lejon 24 mijë refugjatë shtesë, që të hyjnë në Shtetet e Bashkuara.

Kështu, vendimi i Gjykatës Supreme paraqet një fitore të pjesërishme, derisa kjo gjykatë përgatitet për dëgjimin më 10 tetor për kushtetutshmërinë e urdhrit ekzekutiv të përkohshëm të Trumpit, me të cilin u ndalohet hyrja refugjatëve dhe udhëtarëve nga gjashtë vende me popullatë shumicë myslimane.

Presidenti i Shteteve të Bashkuara, Donald Trump, ka mbajtur një minutë heshtje në një ceremoni në Shtëpinë e Bardhë, me rastin e 16-vjetorit të sulmeve terroriste të 11 shtatorit, 2001.

Afro 3,000 njerëz janë vrarë pasi rrëmbyesit kanë përplasur katër aeroplanë komercialë në Qendrën Botërore të Tregtisë, në Pentagon dhe në një fushë në Pensilvani.

Trump dhe bashkëshortja e tij, Melania, kanë mbajtur një minutë heshtje në orën 8:46, për të shënuar momentin kur aeroplani i parë është përplasur për Qendrën Botërore të Tregtisë në Nju Jork.

Presidenti mori pjesë edhe në një ceremoni në Pentagon.

“Tmerri dhe ankthi i asaj dite të errët është ngulitur përgjithmonë në kujtesën tonë kombëtare”.

“Vlerat tona do të rezistojnë, njerëzit tanë do të përparojnë, kombi ynë do të mbizotërojë dhe kujtesa për të dashurit tanë nuk do të vdesë kurrë”, tha Trump në ceremoninë në Pentagon.

Sulmet e 11 shtatorit, më vdekjeprurëset në tokën amerikane, kanë bërë që Shtetet e Bashkuara të pushtojnë Afganistanin dhe më vonë Irakun.