Ministri i brendshëm i Letonisë, Rihards Kozlovskis, tha sot se autoritetet nuk e kanë lejuar reporterin televiziv nga Rusia, Anatoly Kurlayev, për të hyrë në këtë vend “për një periudhë të pacaktuar kohore”.

Në deklaratën e tij, ky ministër nuk i ka dhënë arsyet e ndalesës së tillë.

Kozlovskis tha se Letonia në vitin 2007 e kishte përpiluar një listë të zezë me afro 100 emra për shkaqe të ndryshme, përfshirë “qasjen jomiqësore” ndaj Letonisë dhe popullit të vet.

Kurlayev është arrestuar dhe dëbuar nga Letonia, pasi më 1 janar kishte hyrë në Letoni.

Kurlayev më vonë i ka thënë televizionit rus, Channel One, se autoritetet e Letonisë ia kanë paraqitur atij një dokument të nënshkruar nga ministri i brendshëm, me të cilin shpallet se atij i është ndaluar hyrja në Letoni prej vitit 2015.

Raportohet se tensionet ndërmjet Rusisë dhe ish-republikave sovjetike baltike, Letonisë, Estonisë dhe Lituanisë, janë shtuar prej aneksimit ilegal të Krimesë së Ukrainës nga ana e Rusisë, në vitin 2014.

Të tri këto shtete baltike aktualisht janë anëtare të NATO-s.

Kryeministri i Spanjës, Mariano Rajoy (Mariano Rahoi), mbrëmë e ka hedhur poshtë ftesën e ish-liderit të Katalonjës, Carles Puigdemont (Karles Puxhëmon), për bisedime të reja jashtë Spanjës.

Kreministri Rajoy tha se ai do të zhvillonte negociata me çdokend, që zgjedhet shef i qeverisë së Katalonjës, por udhëheqësit e ri duhet t’i marrrin postet e tyre në Katalonjë.

Më herët, Puigdemont tha se ishte i gatshëm për takim me zotin Rajoy çdokund në Bashkimin Evropian, por jo në Spanjë, ku ai ballafaqohet me arrestim, lidhur me akuza për kryengritje, revoltë dhe keqpërdorim të fondeve.

Këtë thirrje ai e bëri pasi partitë separatiste e fituan shumicën në zgjedhjet madhore rajonale në Katalonjë, të mbajtura pardje.

Separatistët katalanë janë gati të fitojnë pushtetin në rajonin e pasur spanjoll, pasi zgjedhjet rajonale e përballin me pengesë të ashpër kryeministrin spanjoll, Mariano Rajoy dhe liderët evropianë që e mbështetën atë.

Pasi janë numëruar gati të gjitha votat, zyrtarët kanë thënë se partitë separatiste kanë fituar një shumicë elementare në parlamentin e Katalonjës.

Ky rezultat tregon se mund të vazhdojnë tensionet politike, të cilat kanë dëmtuar ekonominë e Spanjës.

Rajoy, i cili ka kërkuar zgjedhje pas shkarkimit të qeverisë së kaluar, ka shpresuar në atë që ka thënë “shumicë të heshtur”, e cila do të kundërshtonte separatizmin përmes votës.

Rezultati i papritur krijon situatë për kthimin në fuqi të presidentit të shkarkuar të Katalonjës, Carles Puigdemont, i cili ka bërë fushatë nga Brukseli.

Prokurorët shtetërorë e kanë akuzuar atë për kryengritje, duke e përballuar me arrestim në rast se kthehet në Spanjë.

“Shteti spanjoll është mundur”, ka thënë Puigdemont përmes një fjalimi televiziv.

“Ose Rajoy le të ndryshojë mënyrën e qeverisjes, ose ne do ta ndryshojmë shtetin”, ka shtuar ai.

Një ndihmës i kryeministrit ukrainas, Volodymyr Hroysman është arrestuar nën dyshimin se është agjent i Shërbimit Federal të Sigurisë së Rusisë (FSB).

Një përfaqësues i Qeverisë në parlament, Vadym Denysenko, i ka thënë një televizionit Ukrayina TV se Stanislav Yezhov është arrestuar një ditë më parë.

Mediat kanë raportuar se Yezhov e kishte shoqëruar kryeministrin ukrainas Hroysman në udhëtimet jashtë vendit dhe shpesh kishte punuar si përkthyes për të.

Në të kaluarën, Yezhov ka punuar në zyrën e presidentit dhe në Ambasadën e Ukrainës në Shtetet e Bashkuara.

Ml 20 dhjetor, Shërbimi ukrainas i Sigurisë (SBU) ka njoftuar se ka arrestuar një punonjës të Qeverisë, identiteti i të cilit nuk ishte bërë publik. Ky shërbim kishte thënë se i arrestuari dyshohet se ka vepruar “në interesat e shërbimeve të sigurisë të një shteti agresor”.

Konservatorët e Austrisë kanë arritur marrrëveshje për koalicon qeverisës me Partinë e Lirisë, që është kundër emigrimit, dhe është hapur rruga që ky vend të jetë i vetmi në Evropën Perëndimore, me një parti të ekstremit të djathtë në qeveri.

Sebastian Kurz, 31 vjeçar, lideri i Partisë Popullore Austriake konservatore, do të jetë kryeministri më i ri në Evropë, pasi partia e tij doli fituese e zgjedhjeve të mbajtura më 15 tetor.

Kurz dhe lideri i Partisë së Lirisë, Heinz-Christian Strache, kanë shpallur mbrëmë se e kanë arritur një marrëveshje për koalicion qeverisës.

Patia Popullore Austriake i fitoi zgjedhjet duke mbajtur linjë të fortë për çështjen e imigrimit, që shpeshherë përputhej me qëndrimin e Partisë së Lirisë, e cila në zgjedhje doli e treta.

Liderët e krahut të djathtë ekstrem evropian do të takohen sot në Pragë të Çekisë në kuadër të një konference, e cila me gjasë do të pritet me protesta.

Lëvizja për një Evropë të Shteteve dhe Liri (MENL), i sjell së bashku Frontin Kombëtar të Francës të udhëhequr nga Marine Le Pen, Partinë e Lirisë së Austrisë e liderit, Heinz-Christian Strache, pastaj partinë italiane Lega Nord, dhe Partinë e Lirisë në Holandë, që udhëhiqet nga Geert Wilders.

Ky takim organizohet nga personaliteti më i ri i skenës së djathtë ekstreme në Evropë: Tomio Okamura, nga partia e Lirisë dhe Demokracisë Direkte, që është një parti anti-islame dhe anti-emigrante, e cila në zgjedhjet parlamentare në Çeki, në tetor të këtij viti, i fitoi 11% të votave.

Por ka paralajmërime se do të organizohen protesta afër një hoteli ku mbahet konferenca.

Policia e Çekisë ka ndërmarrrë masa speciale të sigurisë për disa prej liderëve të së djathtës ekstreme.

Liderët e Bashkimit Evropian kanë krijuar një marrëveshje për mbrojtje dhe integrim, ashtu që 25 anëtarët bashkërisht të financojnë, zhvillojnë dhe pozicionojnë trupat e armatosur të këtyre vendeve.

Presidenti i Këshillit Evropian, Donald Tusk e ka përshkruar këtë hap si “të keq për armiqtë tanë”.

Pakti për Bashkëpunim të Përhershëm Strukturor (PESCO), do të përfshijë ushtrinë e të gjitha vendeve anëtare përveç Britanisë, e cila është duke u larguar nga BE-ja.

Në këtë marrëveshje nuk janë përfshirë as Danimarka dhe Malta.

Integrimi i aftësive ushtarake ka qenë qëllim i shumë vendeve anëtare të BE-së për një kohë të gjatë, ndonëse Britania ka vënë rezistencë duke shfaqur frikën se kjo mund ta dobësojë NATO-n.

Britania e Madhe nuk do të jetë e përfshirë direkt në këtë projekt, mirëpo do të ketë mundësi t’i bashkohet këtyre vendeve në misione specifike.

PECSO është projektuar me qëllim të bashkimit të forcave të vendeve anëtare dhe financimit më efikas në fushën e mbrojtjes, duke përfshirë zhvillimin e armëve të reja, kanë thënë zyrtarët.

Në disa propozime në kuadër të PESCO përfshihet edhe mundësia që Belgjika të zhvillojë dronë për identifikimin e minave në det.

Shefi i NATO-s, Jens Stoltenberg, ka thënë se aleanca ushtarake e Perëndimit e mbështet “iniciativën për të rritur mbrojtjen evropiane, sepse unë besoj se kjo do të jetë e mirë për Bashkimin Evropian, Evropën dhe NATO-n”.

Aleatët e NATO-s i zgjatën mandatin Jens Stolenbergut si sekretar i përgjithshëm i aleancës perëndimore deri më 30 shtator, 2020.

“Aleatët e përgëzojnë sekretarin e përgjithshëm dhe kanë besim të plotë në aftësinë e tij për të vazhduar punën me përkushtim, në përshtatjen e NATO-s ndaj sfidave të sigurisë të shekullit 21”, thuhet në njoftimin e NATO-s.

Stoltenberg, i cili më herët ka qenë kryeministër i Norvegjisë, ka udhëhequr NATO-n qysh në vitin 2014.

Ai shkroi në Twitter se është “i nderuar” me vendimin e 29 vendeve anëtare.

Stoltenberg mori kryesimin e aleancës në muajt pasi Rusia aneksoi gadishullin ukrainas të Krimesë dhe nxiti separatizmin në Ukrainën lindore.

Më shumë se 1000 persona të veshur në rroba të Babadimrit, kanë vrapuar nëpër rrugët e Michendorf afër Berlinit, për të shënuar këtë aktivitet tradicional në kuadër të festimeve për Krishtlindje.

Rreth 1,100 të rritur dhe fëmijë, i rezistuan kohës së ftohtë për të qenë pjesë e garës e cila dallonte nga 1-10 kilometra gjatësi.

Benedikt Statt, i cili fitoi garën për meshkuj në 10 kilometra gjatësi ka thënë se “është me të vertetë ndjenjë e mire, atmosferë e mirë, kohë perfekte. Ishte kënaqësi”.

Mijëra ukrainasë janë duke marshuar nëpër rrugët kryesore të Kievit duke kërkuar lirimin e liderit opozitar, Mikheil Saakashvili si dhe shkarkimin e presidentit Petro Poroshenko.

Ministria e Brendshme ka thënë se rreth 2,500 persona kanë qenë pjesë e protestës.

Gruaja e Saakashvilit, Sandra ka qenë në mesin e pjesëmarrësve.

Pas marshimit, mbështetësit e Saakashvilit planifikuan që të mblidhen afër zonës ku po mbahet lideri i tyre.

Ish presidenti i Gjeorgjisë është arrestuar nga autoritetet ukrainase të premten vonë për supozimet se ka nxitur një “grup kriminal” të udhëhqur nga Yanukoych, i cili ka ikur në Rusi më 2014.

Zyrtarët ukrainasë besojnë se protestat e Saakashavillit janë pjesë e komplotit rus kundër Ukrainës.

Saakashvili i hedhë poshtë këto akuza.

Autoritetet e kanë arrestuar atë në Kiev, derisa qindra mbështetës të tij kanë protestuar duke kërkuar lirimin e tij.

Të afërm të Saakashvilit i kanë thënë Radio Evropa e Lirë se ai është arrestuar në një apartament të një miku.

Avokati i tij ka thënë se lideri opozitar është në grevë urie si protestë ndaj arrestimit.

Saakashvili, “duhet të përgjigjet tek hetuesit dhe shoqëria sa i përket akuzave ndaj tij”, ka thënë presidenti Poroshenko, gjatë një vizitë në Lituani.

“Në rast se nuk përgjigjet, kjo do të thotë se akuzat janë të bazuara”, ka shtuar tutje ai.

Një fshat i vogël në Brandenburg të Gjermanisë është shitur për 140.000 euro në një ankand.

Shtëpia e ankandit, The Karhausen në Berlin, ka thënë se fshati Alwine, me një popullësi prej 20 personash është shitur tek një person anonim, i cili ka kontakuar përmes telefonit.

Kjo zonë ishte pjesë e ish Gjermanisë Lindore, rreth 100 kilometra në jug të Berlinit.

Në këtë pjesë nuk ka dyqane dhe as shërbime të udhëtimit.

Politikani opozitar ukranias, dhe ish presidenti i Gjeorgjisë, Mikheil Saakashvilli është në grevë urie, u ka thënë gazetarëve, avokati i tij, Ruslan Chornolutskiy.

Përmes një letre ai ka treguar se Saakashvili u ka bërë thirrje mbështetësve të tij të protestojnë në Kiev më 10 dhjetor dhe të kërkojnë shkarkimin e presidentit Petro Poroshenko.

Zyrtarët ukrainas e kanë akuzuar Saakashvilin për mbështetjen e një “grupi kriminal” të dyshuar, që është udhëhequr nga ish presidenti, Viktor Yanukoych, i cili ka ikur në Rusi më 2014.

Saakashvili i ka hedhur poshtë akuzat.

Ai është arrestuar në kryeqytetin e Ukrainës, në orët e vona të së premtes, derisa qindra përkrahës kanë demostruar duke kërkuar lirimin e tij.

Të afërm të Saakashvilit i kanë thënë Radios Evropa e Lirë, se ai është arrestuar në apartametin e një shoku, tek i cili kishte shkuar në vizitë.

Kreu i Social-Demokratëve të Gjermanisë, Martin Schulz, partner i mundshëm qeverisës i kancelares Angela Merkel, bëri thirrje për krijimin e “Shteteve të Bashkaura të Evropës” deri në vitin 2025.

Schulz, në kongresin e partisë së tij në Berlin, tha se Evropa duhet të jetë më e bashkuar dhe federale.

“Dua një traktat kushtetues evropian që krijon një Evropë federale”, tha Schulz, ish-president i Parlamentit Evropian.

Ai tha se vetëm një Evropë më e bashkuar mund të përballet me sfidat si ndryshimet klimatke apo menaxhimi i migrimit masiv, mund të detyrojë gjigantët e internetit, si Google dhe Facebook, të respektojnë të drejtat civile, ose mund t’i pengojë kompanitë e mëdha që t’iu shmangen taksave.

“Evropa është sigurimi ynë jetësor”, tha ai.

Schulz po ashtu tha se vetëm një BE e fuqishme do të ndalonte përparimin e nacionalistëve të krahut të djathtë, duke përmendur këtu fitoret e tyre në Gjermani, Austri, Danimarkë, Finlandë, Francë dhe Holandë.

Mbështetësit e ish-presidentit të Gjeorgjisë, Mikheil Saakashvili, e nxorën atë nga furgoni i policisë, pasi forcat ukrainase të sigurisë bastisën apartamentin e tij në Kiev, e tërhoqën zvarrë nga çatia dhe e arrestuan.

Në një përplasje dramatike midis policisë dhe qindra protestuesve, të cilët bllokuan rrugët në përpjekje për t’i penguar autoritetet që ta largojnë Saakashvilin, ky i fundit u tërhoq nga furgoni, me gjithë rezistencën e policisë, dhe bëri thirrje për largimin nga pushteti të presidentit të Ukrainës, Petro Poroshenko.

“Ju bëj thirrje të nisni protesta paqësore për largimin e Poroshenkos. Nuk duhet të frikësoheni nga asgjë”, i tha Saakashvili turmës.

Ky zhvillim vjen pasi agjentët e zbatimit të ligjit hynë në apartamentin e Saakashvilit, njëherësh ish-guvernator i rajonit të Odesës, dhe e arrestuan atë nën akuzat se ka lidhje lidhje kriminale me ish-presidentin e Ukrainës, Viktor Yanukovych, i cili është rrëzuar nga pushteti.

Dy ditë më parë, Lëvizja e Forcave të Reja e Saakashvilit ka organizuar një tubim masiv në Kiev, duke kërkuar shkarkimin e Poroshenkos.

Protestat fillimisht janë thirrur nga Saakashvili, dikur aleat i Poroshenkos, por atyre u janë bashkuar më pas shumë liderë të partive politike opozitare.

Nga viti 2004 deri më 2013, Saakashvili ka qenë president i Gjeorgjisë, ku tani kërkohet nën dyshimet se ka bërë përpjekje të organizojë grushtshtet, pasi ka dalë nga zyra. Saakashvili i mohon akuzat.

Në vitin 2015, ai është emëruar nga Poroshenko guvernator i rajonit Odesa dhe ka dorëzuar shtetësinë gjeorgjiane për të marrë postin.

Megjithatë, Saakashvili ka dhënë dorëheqje në nëntor, 2016, duke thënë se përpjekjet e tij për reforma janë bllokuar nga aleatët e Poroshenkos.

Saakashvilit më pas i është marrë shtetësia ukrainase nga Poroshenko – vendim të cilin Saakashvili e ka sfiduar në gjykatë.

Poroshenko tha se qëllimi i vërtetë i organizatorëve të protestave është të destabilizojnë Ukrainën.

Ish-presidenti i Gjeorgjisë dhe ish-guvernatori i Odesës, Mikheil Saakashvili, u arrestua nga Shërbimi i Sigurisë i Ukrainës, në Kiev.

Zëdhënësja e këtij shërbimi, Olena Hitlyanska, i tha Radios Evropa e Lirë se bastisja në apartamentin e Saakashvilit është kryer së bashku me hetuesit e Zyrës së Prokurorit të Përgjithshëm.

Ajo nuk dha detaje për arsyen e bastisjes.

Bastisja u bë dy ditë pasi Lëvizja e Forcave të Reja e Saakashvilit ka organizuar një tubim masiv në Kiev, duke kërkuar shkarkimin e presidentit të Ukrainës, Petro Poroshenko.

Protestat fillimisht janë thirrur nga Saakashvili, dikur aleat i Poroshenkos, por atyre u janë bashkuar më pas shumë liderë të partive politike opozitare.

Nga viti 2004 deri më 2013, Saakashvili ka qenë president i Gjeorgjisë, ku tani kërkohet nën dyshimet se ka bërë përpjekje të organizojë grushtshtet, pasi ka dalë nga zyra. Saakashvili i mohon akuzat.

Në vitin 2015, ai është emëruar nga Poroshenko guvernator i rajonit Odesa dhe ka dorëzuar shtetësinë gjeorgjiane për të marrë postin.

Megjithatë, Saakashvili ka dhënë dorëheqje në nëntor, 2016, duke thënë se përpjekjet e tij për reforma janë bllokuar nga aleatët e Poroshenkos.

Saakashvilit më pas i është marrë shtetësia ukrainase nga Poroshenko – vendim të cilin Saakashvili e ka sfiduar në gjykatë.

Poroshenko tha se qëllimi i vërtetë i organizatorëve të protestave është të destabilizojnë Ukrainën.

Policia thotë se një person ka shpërthyer dy granata gjatë një gjykimi për vrasje në qytetin Nikopol në Ukrainë, duke vrarë veten dhe plagosur shtatë persona të tjerë.

Babai i një viktime kishte marrë dy granata në gjykatë dhe i ka detonuar ato, ka thënë për Radion Evropa e Lirë, Hanna Strachevska, zëdhënëse e Policisë Kombëtare për rajonin Dnipropetrovsk.

Ky person është vrarë dhe shtatë persona – përfshirë tre të pandehur, dy roje, një punëtor të gjykatës dhe një shikues- janë lënduar. Të lënduarit janë dërguar në spital për të marrë trajtim mjekësor, ka njoftuar Strachevska.

Të pandehurit janë duke u gjykuar për vrasjen e dy personave me pushkë në shkurt të vitit 2016.

Televizioni kroat ka raportuar se ish-komandanti i kroatëve të Bosnjës, Sllobodan Praljak, ka vdekur, qartasi, pasi ka pirë helm në Gjykatën për krime të luftës në Hagë.

Policia e Holandës ka refuzuar të komentojë.

Më herët Gjyqtarët e kanë suspenduar një seancë të apelit, pasi njëri prej gjashtë kroatëve të Bosnjës, të akuzuar për krime të luftës, ka pirë atë që tha se ishte helm, duke brohoritur dhe duke e ngritur një gotë te buzët e tij në Gjykatën e Kombeve të Bashkuara në Hagë.

Një zyrtar i gjykatës më vonë ka thënë se i akuzuari, Sllobodan Praljak, i cili pretendoi se ka pirë helm, ishte gjallë dhe nën kujdesin mjekësor.

Pralajk, ish-komandant i forcave kroate në Bosnjë gjatë luftës në periudhën 1992-95, duket se pinte diçka disa momente para se gjyqtarët e konfirmuan dënimin e tij me 20 vjet burg.

“Sllobodan Praljak nuk është kriminel lufte. E refuzoj vendimin me neveri”, tha Praljak.

Gjyqtari kryesues, Camel Agius, me të shpejtë e ndali procesin e dëgjimit të sotëm.

Lideri i lëvizjes separatiste i Katalonjës, Carles Puigdemont, sot e ka lansuar fushatën e tij për zgjedhjet e ardhshme në këtë rajon, nga Belgjika, ku pritet përfundimi i procesit për ekstradimin e tij eventual në Spanjë.

Zoti Puigdemont, i cili dëshiron të rizgjedhet në postin e presidentit të Katalonjës, e ka filluar fushatën me emrin “së bashku për Katalonjën”, nga qyteti Bruzhes në Belgjikë.

Mediat spanjolle kanë raportuar se 90 kandidatë që ai i ka zgjedhur, kishin udhëtuar nga Katalonja në këtë qytet në Belgjikë për fillimin e fushatës.

Puigdemont dhe katër ish-anëtarë të tjerë të qeverisë së tij kanë ikur në Belgjikë, pas shpalljes së deklaratës së pavarësisë në Parlamentin e Katalonjës më 27 tetor të këtij viti.

Pas kësaj, qeveria qendrore në Madrid pat ndërmarrë goditje të shpejtë, përfshirë shkarkimin e qeverisë së tij dhe shpalljen e zgjedhjeve të reja për 21 dhjetor.

Procesi për ekstradimin eventual të zotit Puigdemont në Spanjë mund të zgjasë disa javë dhe kjo nënkupton se ai mund të zhvillojë fushatë nga Belgjika.

Nëse ktethet në Spanjë ai ballafaqohet me arrestim nga ana e autoriteteve spanjolle, raportona gjencia AP.