Alyaksandr Llukashenko ka hapur zyrtarisht centralin e parë dhe të vetëm bërthamor në Bjellorusi, duke thënë se ky shtet i Evropës Lindore “do të kthehet në fuqi bërthamore”.
“Stacioni bërthamor Astravets përbën një hap drejt së ardhmes dhe garantimit të sigurisë së energjisë së këtij shteti”, ka thënë Lukashenka në një adresim përmes televizionit shtetëror më 7 nëntor.
Ndërtuar nga kompania ruse, Rosatom dhe e financuar nga Moska me 10 miliardë dollarë hua, ndërtimi i centralit bërthamor afër qytetit Astravets, është kundërshtuar nga Lituania, kryeqyteti i së cilës, Vilnus, është vetëm 50 kilometra larg.
Astravets tërheq ujin për reaktorët e tij ftohës nga Lumi Nevis, që po ashtu furnizon me ujë të pijshëm Lituaninë.
Bjellorusia ka nisur aktivizimin e këtij centrali më herët gjatë javës, duke e shtyrë Lituaninë që të ndalë importet e elektricitetit nga shteti fqinj.
Ndërtimi i këtij centrali është parë ndryshe edhe në mesin e bjellorusëve, të cilët janë përballur me dëme të mëdha si pasojë e katastrofës bërthamore të Çernobilit më 1986.
Një çerek i territorit të këtij shteti ishte kontaminuar në aksidentin më të tmerrshëm civil bërthamor në gjithë botën.
Ky inaugurim vjen teksa Bjellorusia përballet gati çdo ditë me protesta dhe greva, prej zgjedhjeve të 9 gushtit.
Opozita dhe Perëndimi besojnë se ky proces zgjedhor është manipuluar.
Lukashenka, i cili ka qenë në pushtet nga viti 1994 ka kundërshtuar akuzat dhe ka hedhur poshtë thirrjet e opozitës për të dhënë dorëheqje.
Shtetet e Bashkuara, Bashkimi Evropian, Kanadaja dhe shtete tjera, kanë refuzuar të njohin Lukashenkas si lider legjitim të Bjellorusisë.
Më 6 nëntor, BE-ja e ka shtuar Lukashenkan, djalin e tij, Viktar dhe 13 zyrtarë tjerë në listën e zezë të zyrtarëve bjellorusë, për rolin e tyre në falsifikimin e votave dhe shtypjes së protestave nga ana e qeverisë. rel
Në Evropë është tejkaluar shifra e 300 000 të vdekurve nga sëmundja COVID-19, që shkakton koronavirusi, teksa shtetet nga Rusia e deri tek Italia, kanë regjistruar rekord të personave të infektuar brenda një dite.
I gjithë kontinenti evropian tani pothuajse ka rikthyer kufizimet në lëvizje, me qëllim të frenimit të pandemisë.
Organizata Botërore e Shëndetësisë ka njoftuar për një rekord të ri të personave të infektuar brenda një dite në nivel global.
Evropa ka regjistruar 300,688 të vdekur nga virus, bazuar në të dhënat e agjencisë së lajmeve AFP, ndërkohë që dy të tretat e viktimave janë regjistruar në Mbretërinë e Bashkuar, Itali, Francë, Spanjë dhe Rusi.
Rritja e shkallës së infektimit ka ndikuar në mbushje të kapaciteteve spitalore në këtë kontinent.
Kjo pasi, zyrtarët shëndetësorë janë duke paralajmëruar se vala e dytë e infektimit është më e fuqishme dhe më serioze.
Ndonëse Ministria e Shëndetësisë së Gjermanisë ka paralajmëruar se dyfishimi i numrit të pacientëve me COVID-19, në njësitë e kujdesit intensiv çdo 10 ditë, është i papërballueshëm, spitalet në këtë shtet kanë vazhduar të pranojnë pacientë të sëmurë nga kufiri francez.
Më shumë se 85 për qind e shtretërve për kujdes intensiv në Francë janë të zënë me pacientë të infektuar me koronavirus, apo mbi 4,000.
Të hospitalizuar janë mbi 30,000.
Situata është duke u përkeqësuar edhe në Rusi, aktualisht vendin e katërt me më së shumti të infektuar në botë.
Rusia ka raportuar 20,396 persona të infektuar më 7 nëntor, duke e çuar në mbi 1.7 milion, numrin e personave të prekur nga COVID-19.
Për dallim nga pjesët tjera të Evropës, Rusia nuk ka vënë kufizime në lëvizje dhe as nuk ka mbyllur bizneset.
Autoritetet ruse kanë thënë se nuk ka nevojë për diçka të tillë, sepse sistemi shëndetësor mund t’i përballojë rastet. rel
voal.ch – Qeveria e Austrisë urdhëroi të premten mbylljen e dy xhamive, të frekuentuara nga një militant islamist, i cili ka vrarë katër vetë në Vjenë.
Dy xhamitë ndodhen në periferi të Vjenës – njëra quhet Melit Ibrahim në rrethin Otakring dhe tjetra Tewhid në zonën Majdling.
Ministrja e Integrimit e Austrisë, Susanne Raab, tha se agjencia vendase e inteligjencës BVT ka vlerësuar se “vizita në këto xhami e ka përshpejtuar radikalizimin e sulmuesit”.
Sulmuesi, i identifikuar nga autoritetet austriake si Kujtim Fejzullai, me prejardhje nga Maqedonia e Veriut, ka kryer sulmin të hënën, duke hapur zjarr në gjashtë lokacione në qendër të Vjenës.
Dy gra dhe dy burra janë vrarë dhe 23 janë plagour.
Policia e ka vrarë sulmuesin dhe ka zbuluar se ai ka pasur edhe shtetësi austriake, edhe shtetësi maqedonase.
Sulmuesi ka udhëtuar në Turqi në vitin 2018, në një përpjekje për t’u bashkuar me militantët e Shtetit Islamik në Siri, por është kapur dhe dërguar përsëri në Austri.
Grupi militant Shteti Islamik ka thënë se qëndron pas sulmit në Vjenë.
Të premten, edhe policia në Gjermani tha se ka bastisur shtëpitë e katër personave, për shkak të lidhjeve të dyshuara me sulmuesin e Vjenës.
Policia tha se ata nuk konsiderohen të dyshuar, porse kanë pasur kontakte me sulmuesin dhe dy prej tyre e kanë takuar personalisht.
Bastisjet u kryen në Kasel, Osnabryk dhe Pineberg, pranë Hamburgut.
Disa të dyshuar janë ndaluar në Austri, ndërsa hetime kanë nisur edhe në Zvicër./REL
Katër civilë janë vrarë dhe 22 janë plagosur gjatë sulmit të së hënës në Vjenë, të cilin, autoritetet austriake e cilësuan si “terrorist”.
I vrarë është edhe një sulmues, të cilin autoritetet e idenifikuan si Kujtim Fejzullai, 20 vjeç, me shtetësi të Austrisë dhe Maqedonisë së Veriut.
Autoritetet maqedonase konfirmuan të martën se edhe dy shtetas të tjerë maqedonas kanë qenë të përfshirë në sulmin në Vjenë.
Kjo është shtëpia e familjes Fejzullai, në fshatin Çellopek të Tetovës. Autoritetet austriake thanë se Kujtim Fejzullai, 20 vjeç, është sulmuesi që vrau 4 persona në Vjenë.
Ministri i Brendshëm austriak, Karl Nehammer tha se 14 persona janë arrestuar në lidhje me sulmin në Vjenë.
Ai shtoi se pas bastisjes së shtëpisë së sulmuesit, tashmë të vrarë, janë kryer edhe 18 bastisje.
Ministri i Brendshëm austriak tha se bazuar nga të dhënat, nuk ka indikacione se edhe një sulmues i dytë ka qenë i përfshirë në sulmin në Vjenë.
Ai po ashtu shtoi se sulmuesi në Vjenë, dukej se ishte integruar në shoqërinë austriake, por në fakt ishte e kundërta.
Sipas Nehammer, ai “ai arriti të mashtronte njerëzit brenda programit të deradikalizimit dhe përmes kësaj të lirohej nga burgu”.
Dy shtetas të Maqedonisë së Veriut, të lidhur me sulmin në Vjenë
Ministria e Punëve të Brendshme e Maqedonisë së Veriut ka bërë të ditur se përveç Kujtim Fejzullait edhe dy persona të tjerë, shtetas të Maqedonisë së Veriut kanë qenë të përfshirë në sulmin e ditës së hënë në Vjenë.
“Nga lista e policisë austriake, e cila iu dorëzua disa policive, përfshirë edhe policisë sonë, konstatuam se edhe dy persona tjerë, përveç austriakut, gjithashtu kanë shtetësinë e Republikës së Maqedonisë së Veriut, përkatësisht K.F. (i lindur në Modling, Austri), A.G. (i lindur në St. Polten, Austri) dhe U.A. (i lindur në Vjenë, Austri). Sektori për Bashkëpunim Policor Ndërkombëtar në Ministrinë e Brendshme u vu menjëherë në dispozicion të kolegëve nga Austria dhe ne po bashkëpunojmë intensivisht me të gjithë elementët që lidhen me këtë rast”, thuhet në njoftimin me shkrim të MPB-së në Shkup.
Ministria e Punëve të Brendshme e Maqedonisë së Veriut gjithashtu njofton për një bisedë telefonike mes kryeministrit Zoran Zaev me kancelarin austriak, Sebastian Kurz.
“Kryeministri austriak i shprehu mirënjohje kryeministrit Zaev për solidaritetin dhe mbështetjen e shprehur. Kryeministrat shprehën gatishmërinë për të vazhduar komunikimin dhe bashkëpunimin në lidhje me sulmin terrorist nëse shërbimet austriake përcaktojnë një nevojë të tillë”, thuhet në njoftimin e Ministrisë së Punëve të Brendshme.
Sulmuesi, mbështetës i IS-it
Ministri Nehammer tha të martën në mëngjes se sulmuesi i vrarë në të kaluarën ka qenë i dënuar për përfshirje në një organizatë terroriste.
Ai tha se “terroristi i dyshuar” ishte dënuar në prill të vitit 2019, për shkak se kishte tentuar që të udhëtonte për në Siri me qëllim që t’i bashkohej grupit militant, Shteti Islamik. Ai ishte dënuar me 22 muaj burgim, por ishte liruar me kusht në dhjetorin e vitit të kaluar.
Ministria е Punëve të Brendshme e Maqedonisë së Veriut ka thënë për Radion Evropa e Lirë se “është në kontakt të vazhdueshme me autoritetet e Austrisë për verifikimin e identitetit të sulmuesit, por edhe për lidhjet e tij të mundshme me persona të tjera. Policia austriake përmes INTERPOL-it ka paraqitur kërkesë për bashkëpunim për këtë rast dhe autoritetet tona menjëherë i janë përgjigjur kërkesës për veprim”.
Këto janë lokacionet ku kanë ndodhur të shtëna në Vjenë.
Ministri i Brendshëm i Austrisë, Karl Nehammer, e përshkroi sulmuesin e vrarë nga policia si një “terrorist islamik”.
Duke folur në një konferencë për shtyp, ministri Nehammer tha se personi i armatosur rëndë – i vrarë nga policia –ishte një mbështetës i grupit militant, Shtetit Islamik (IS) dhe se shtëpia e tij ishte kontrolluar ku është sekuestruar video-material. Policia tha se ai kishte veshur një rrip shpërthyes të rremë.
Më parë, Nehammer tha se të paktën një sulmues “i armatosur rëndë dhe i rrezikshëm” besohej të ishte akoma i lirë. Zyrtarët u cituan të thoshin se mund të kishin qenë deri në katër sulmues. Ministri i Brendshëm kërkoi nga njerëzit të shmangnin Vjenën qendrore dhe u tha prindërve të mbanin fëmijët e tyre në shtëpi të martën.
Më herët gjatë ditës së martë, ministri Nehammer kishte deklaruar se 1,000 pjesëtarë të sigurisë ishin angazhuar në operacionet e kërkimit për sulmues të mundshëm, duke shtuar se edhe vendet fqinje kanë ofruar ndihmë në këtë drejtim.
Viktimat janë dy gra dhe dy burra. Njëra nga gratë thuhet se ishte kameriere. Gruaja e dytë vdiq nga plagët e saj në spital, thanë raportet.
Viktimat ishin në një zonë të qendrës së qytetit të mbushur me njerëz në bare dhe restorante, afër sinagogës qendrore të Vjenës, por nuk është ende e qartë nëse ajo ishte shënjestra e sulmit.
Shtatë persona që janë plagosur, sipas mediave austriake, kanë marrë plagë të rrezikshme për jetë.
Në mesin e të plagosurve është edhe një polic, 28 vjeç, i cili sipas Ministrisë së Brendshme, është jashtë rrezikut për jetë.
Qeveria austriake ka shpallur tri ditë zie.
Kancelari austriak Sebastian Kurz e quajti atë një “sulm të neveritshëm terrorist”.
Ai të martën tha se është i vetëdijshëm se kjo nuk është një “mosmarrëveshje midis të krishterëve dhe myslimanëve”.
“Por ne gjithmonë duhet të jemi të vetëdijshëm se kjo nuk është një mosmarrëveshje midis të krishterëve dhe myslimanëve ose midis austriakëve dhe migrantëve. Kjo është një luftë midis shumë njerëzve që besojnë në paqe dhe atyre pak që duan luftë”, tha Kurz.
Ndërkaq, gjatë një adresimi televiziv, Kurz u zotua se do të “kapim autorët dhe ata që qëndrojnë pas tyre”.
Liderët botërorë solidarizohen me Austrinë
Presidenti i Shteteve të Bashkuara, Donald Trump dënoi sulmin në Vjenë, duke thënë se akte të tilla “ndaj njerëzve të pafajshëm” duhet të ndalen.
“Lutjet tona janë me njerëzit në Vjenë pas edhe një akti të terrorizmit në Evropë. Këto sulme djallëzore kundër njerëzve të pafajshëm duhet të ndalen. SHBA-ja qëndron me Austrinë, Francën dhe me gjithë Evropën në luftën kundër terroristëve, përfshirë edhe terroristët radikalë islamikë”, ka shkruar Trump në Twitter.
Kancelarja gjermane Angela Merkel, të martën tha se “terrori islamik është armiku ynë i përbashkët”.
“Lufta kundër këtyre vrasësve dhe atyre që i nxisin – është lufta jonë e përbashkët,” shkroi zëdhënësi i Merkelit në Twitter, duke shtuar: “solidaritet” me Austrinë.
Presidenti i Francës, Emmanuel Macron tha se “Evropa është e bashkuar, dhe e vendosur. Ne jemi një”.
Turqia ka dënuar sulmin në Vjenë, duke thënë se qëndron në solidaritet me popullin austriak.
“Ne jemi të pikëlluar me lajmin se ka të vdekur dhe të plagosur si rezultat i sulmit terrorist që ndodhi në Vjenë”, tha ministria e Jashtme turke në një deklaratë.
Kryeministri izraelit, Benjamin Netanyahu dënoi sulmin në Vjenë duke thënë se “Izraeli dënon sulmin brutal në Vjenë dhe qëndron në solidaritet total me Austrinë.
“Popujt e civilizuar kudo duhet të bashkohen për të mposhtur egërsinë e terrorizmit islamik të ringjallur”, tha ai.
Presidenti i Kosovës, Hashim Thaçi përmes një postimi në Twitter tha se sulmi terrorist në Vjenë është sulm “ndaj vlerave që ne ndajmë”.
“Ky moment i vështirë do të na afrojë më shumë në luftën kundër terrozmit”, tha Thaçi, duke shtuar se Kosova qëndron përkrahë popullit dhe shtetit austriak.
Policia ka thënë se sulmi ka nisur në sinagogën Seitenstettengasse.
Policia në Republikën Çeke ka thënë se ka nisur të kryejë kontrolle rastësore kufitare në kufi me Austrinë, pas shqetësimeve se sulmuesit mund të jenë nisur në atë drejtim.
Dëshmitarët thanë se sulmi ndodhi teksa qytetarët ishin në bare e restorante, duke shijuar natën e fundit, para se Austria të nisë së zbatuari kufizimet e reja në lëvizje, me qëllim të frenimit të koronavirusit.
Për këtë arsye, shume njerëz janë parë në qendër të Vjenës, nëpër bare dhe restorante, të cilat do të mbyllen deri në fund të muajit nëntor.
Mediat e huaja raportojnë se një prej 4 viktimave nga sulmi terrorist në Vjenë është shqiptar.
Ato e kanë identifikuar viktimën si Nexhip Vrenezin, nga Struga e Maqedonisë së Veriut. Ndërkohë nga pala tjetër, po ashtu kishte shqiptarë, pasi autor kryesor i sulmit ishte Kujtim Fejzullahu nga Maqedonia e Veriut i cili mbeti i vrarë nga forcat e policisë austriake pasi qëlloi mbi disa civilë e policë.
Po ashtu të përfshirë në këtë ngjarje dyshohet se janë dhe 12 të dyshuar të tjerë, prej të cilëve dhe shqiptarë nga Kosova.
Media austriake Heute i ka kushtuar një shkrim Kujtim Fejzullahut, shqiptarit me origjinë nga Maqedonia e Veriut që në një sulm terrorist në Vjenë vrau së pak 4 qytetarë si dhe plagosi mbi 15 të tjerë përfshi dhe një polic.
20-vjeçari Fejzullahu sipas medias austriake, ka qenë futbollist në qytetin e Mödling në adoleshencë, por aty ka rënë në kontakt me ekstremistë islamikë apo simpatizantë të ISIS që e kanë futur në rrugën e radikalizimit.
Ai njihet si frekuentues i xhamive, po ashtu kishte dhe rekorde penale teksa pjesë e lëvizjes Salafiste. Zbulohet se në korrik me një makinë jo të tijën ai ka shkuar në Sllovaki për të marrë municion. Atë do e siguronte për armën e tij AK-47.
Po ashtu përveç tij si të dyshuar për sulmin terrorist janë dhe 12 persona të tjerë. Ata jetojnë 10 në Vjenë dhe 2 në Sankt Pölten teksa arrestimet kanë filluar. Ata janë të gjithë me prejardhje të huaj nga Kosova, Bangladeshi dhe Çeçenia. Madje një prej tyre është ende minoren, vetëm 12 vjeç.
Pjesë të qendrës së Vjenës mbetën të mbyllura nga policia të martën në mëngjes pasi një sulm me armë në kryeqytetin austriak la pas vets pesë persona të vrarë, përfshirë edhe një sulmues.
Ministri e Brendshme tha se dy burra dhe dy gra vdiqën nga pasojat e plagëve që pësuan në sulmin e së hënës.
Sulmuesi i dyshuar, i cili mbante një pushkë dhe një jelek të rremë vetëvrasës, u qëllua dhe u vra nga policia.
Ministria e Brendshme tha se i dyshuari i vrarë ishte simpatizues i grupit Shteti Islamik.
Ministri i Brendshëm austriak, Karl Nehammer, tha se ai ishte një 20 vjecar me shtetësi të dyfishtë, të Austrisë dhe të Maqedonisë së Veriut.
Policia tha se sulmi ndodhi ndaj qytetarëve që kishin dalë për të shijuar një mbrëmje të fundit në Vjenë përpara se të hynin në fuqi masat e ndalim-qarkullimit për shkak të koronavirusit.
“Jam i kënaqur që policia jonë ishte në gjendje të neutralizonte një nga autorët e sulmit,” tha kancelari austriak Sebastian Kurz. “Ne kurrë nuk do t’i lejojmë vetes të frikësohemi nga terrorizmi dhe do t’i luftojmë këto sulme me të gjitha mjetet.”
Policia bllokon një rrugë pranë sheshit Schwedenplatz, pas sulmit në Vienë.
Policia tha se disa të shtëna u qëlluan pak pas orës 8 në mbrëmje në një rrugë me shumë lëvizje në qendër të qytetit dhe se zjarri ishte hapur nga gjashtë pika.
Zyrtari më i lartë i sigurisë i Austrisë tha se autoritetet besojnë se bëhej fjalë për disa persona të armatosur dhe një operacion policor po vazhdonte disa orë pas sulmit.
“Duket se ka qenë një sulm terrorist,” i tha Ministri i Brendshëm Karl Nehammer medias publike ORF, duke shtuar se autorët e sulmeve ishin të armatosur me pushkë. Ai tha se ushtrisë iu kërkua të ruante zonat kyçe në qytet, në mënyrë që oficerët e policisë të kishin mundësi të merreshin me ndjekjen e autorëve të sulmit.
Kryebashkiaku i Vjenës, Michael Ludwig tha se 15 persona u shtruan në spital, shtatë prej të cilëve me plagë të rënda.
Oskar Deutsch, kreu i komunitetit hebre në Vjenë, tha se të shtënat ndodhën në rrugën para sinagogës kryesore të qytetit, por se nuk ishte e qartë nëse ajo ishte objekti i sulmit. . Sinagoga ishte e mbyllur në atë kohë, shkruante Deutsch në Twitter.
Rabini Schlomo Hofmeister tha se kishte parë të paktën një person që kishte hapur zjarr ndaj njerëzve që ishin jashtë në bare në rrugën poshtë dritares së tij.
“Ata po qëllonin me të paktën 100 fishekë para ndërtesës sonë,” tha rabini Hofmeister.
“Të gjitha këto bare kanë tavolina jashtë. Kjo mbrëmje është e fundit para masave të mbylljes,” shtoi ai. “Që nga mesnata, të gjitha baret dhe restorantet do të mbyllen në Austri për një muaj dhe shumë njerëz ndoshta donin të përfitonin nga kjo mbrëmje për të dalë jashtë.”
Kancelari Kurz tha se këto ishin “orë të vështira për republikën tonë” dhe u zotua: “Policia jonë do të veprojë me vendosmëri kundër fajtorëve të këtij sulmi të neveritshëm terrorist”.
Presidenti francez Emmanuel Macron shkroi në Twitter se francezët “ndajnë tronditjen dhe pikëllimin e popullit austriak të vënë sot në shënjestër të një sulmi “.
“Pas Francës, ky është një vend mik që është sulmuar. Kjo është Evropa jonë. Ne nuk do të dorëzohemi,” shkruante ai.
Franca ka përjetuar tre sulme për të cilat mbahen përgjegjës ekstremistë myslimanë në javët e fundit: një nga një refugjat pakistanez që plagosi dy persona para zyrave të dikurshme të gazetës satirike Charlie Hebdo; prerja e kokës së një mësuesi që u kishte treguar studentëve karikaturat e Profetit Muhamed; dhe një sulm vdekjeprurës me thikë të enjten në një kishë në qytetin mesdhetar të Nicës. Franca ka vendosur nivelin maksimal të sigurisë.
Autoritetet në Vjenë u kërkuan njerëzve të shmangin të gjitha hapësirat e hapura dhe transportin publik. Policia tha se tramvajet dhe autobusët nuk po ndalonin dhe u kërkoi përdoruesve të mediave sociale të mos postojnë video të operacionit policor në mënyrë që të mos rrezikojnë oficerët.
Autoritetet franceze kanë identifikuar të dyshuarin për një sulm me thikë që la tre të vdekur në qytetin jugor të Nisës.
I dyshuari është identifikuar si Brahim Aouissaoui, një tunizian 21-vjeçar.
Sipas BBC-së dhe Reuters-it, Aouissaoui mbërriti me anije në ishullin italian të Lampeduzës në shtator. Pasi përfundoi një periudhë karantinë për koronavirusin, atij iu tha të ikte nga Italia. Ai mendohet se arriti në Francë më herët këtë muaj.
Aouissaoui nuk ishte në listën e militantëve të dyshuar nga Tunizia dhe nuk ishte i njohur nga shërbimet e zbulimit francez, tha Reuters.
Sulmi po trajtohet si një akt terrorizmi dhe Franca ka ngritur alarmin e saj të sigurisë kombëtare në nivelin më të lartë.
Zyrtarët thonë se sulmi ndodhi të enjten në mëngjes në kishën Notre Dame të Nisës. Dy persona vdiqën brenda kishës, thonë zyrtarët, dhe të paktën njërit prej tyre iu pre koka. Një person i tretë, i cili u plagos rëndë, arriti të largohej nga kisha, por vdiq pak më vonë.
Në një zhvillim tjetër, policia qëlloi për vdekje një burrë të armatosur me thikë në qytetin jugor francez Avignon. Dhe në Arabinë Saudite, një burrë u arrestua pasi plagosi një roje para konsullatës Franceze në Jeddah.
Kryebashkiaku i Nisës, Christian Estrosi e karakterizoi sulmin në qytetin e tij si një incident terrorist. Ai tha se ishte përsëri viktimë e asaj që ai e quajti islamo-fashizëm. Ai tha se i dyshuari, i dërguar në një spital pasi u plagos gjatë një arrestimi policor, vazhdoi të thoshte “Allahu Akbar” gjatë ndalimit.
Sulmi vjen ndërsa Franca përgatitet të fillojë një periudhë tjetër masash shtrënguese për t’u mbrojtur nga koronavirusi – dhe pas dy sulmeve të tjera me thikë, për të cilat po ashtu janë përgjegjës islamikët radikalë dhe të cilat janë të lidhura me karikaturat e Profetit Muhamed. Në një nga sulmet, mësuesit Samuel Paty iu pre koka pranë Parisit.
Po ashtu goditja e fundi, është më e fundit në një numër sulmesh terroriste islamike që ka prekur Francën në vitet e fundit, përfshirë një sulm xhihadist 2016 në Nisë.
Mbrojtja e fundit që i bëri Presidentit Emmanuel Macron karikaturave të Profetit Muhamed në emër të fjalës së lirë ka shkaktuar protesta dhe bojkot në një numër vendesh myslimane. Shumë myslimanë janë shumë të ofenduar nga karikaturat. Por në Francë, mijëra njerëz janë grumbulluar në mbështetje të shprehjes së lirë, përfshirë disa udhëheqës të shquar myslimanë.
Asambleja Kombëtare e Francës mbajti një moment heshtje për viktimat e sulmit të fundit dhe udhëheqësit myslimanë francezë i nxitën besimtarët të anulonin të enjten festimet për ditëlindjen e profetit Islam. Qeveritë evropiane dhe të tjera gjithashtu kanë dërguar mesazhe ngushëllimi dhe kanë dënuar sulmet në Nisë.
Një njeri i armatosur me thikë vrau tre persona në një kishë të enjten në qytetin francez të Nisës.
Rreth orës 9 të mëngjesit, njeriu me thikë hyri në kishën Notre Dame të qytetit dhe i preu fytin kujdestarit të kishës, i preu kokën pjesërisht një gruaje të moshuar dhe plagosi rëndë një grua të tretë, sipas një burimi të policisë.
Kujdestari i kishës dhe gruaja e moshuar vdiqën në vend, ndërsa gruaja e tretë mundi të dilte nga kisha dhe të shkonte në një kafene aty pranë, por edhe ajo vdiq nga plagët.
Kryetari i bashkisë, Christian Estrosi, e cilësoi si një sulm terrorist ngjarjen, e treta e këtij lloji në Francë brenda dy muajve.
“Ai vazhdonte të përsëriste fjalët Allahu Akbar ‘(Zoti është i Madh) edhe kur ishte nën ndikimin e ilaçeve” pas plagosjes gjatë arrestimit nga policia” tha kryebashkiaku.
Prokurorët kundër terrorizmit kanë filluar një hetim mbi vrasjet, të cilat vijnë pas prerjes së kokës të mësuesit Samuel Pati në fillim të këtij muaji. Autori i atij sulmi, me origjinë çeçene, tha se donte ta ndëshkonte mësuesin sepse u tregoi nxënësve karikaturat e Profetit Muhamet gjatë një ore mësimi për edukimin qytetar.
Nuk është e qartë nëse vrasjet e së enjtes ishin të lidhura me karikaturat, të cilat konsiderohen fyerje nga myslimanët.
Që nga vrasja e mësuesit Samuel Pati, zyrtarët francezë, me mbështetje të gjerë nga publiku, kanë ripohuar të drejtën e tyre për të shfaqur karikaturat, shumë prej të cilave janë shfaqur gjerësisht gjatë marshimeve në solidaritet me mësuesin.
Shfaqja publike e imazheve ka shkaktuar një zemërim të thellë në botën myslimane dhe disa qeveri kanë akuzuar Presidentin Emmanuel Macron për ndjekjen e një axhende kundër fesë islame.
Nisa ishte shënjestër e një prej sulmeve më vdekjeprurëse në Francë vitet e fundit. Një tunizian 31-vjeçar drejtoi një kamion mbi turmën që ishte duke kremtuar Ditën e Bastijës më 14 korrik të vitit 2016, duke vrarë 86 veta.
Mbërritja e vaksinave të mundshme Covid-19 në vendet e Bashkimit Evropian mund të fillojë në Prill, tha Presidentja e Komisionit Europian Ursula von der Leyen.
“Numri i madh i furnizimeve pritet të fillojë në Prill”, tha zonja von der Leyen, duke shtuar se në rastin më të mirë kompanitë mund të dorëzojnë deri në 50 milionë vaksina në muaj në BE.
Von der Leyen premton se “ne do të jemi në gjendje të vaksinojmë 700 milionë njerëz” me një diapazon prej 20-50 milion doza të shpërndara çdo muaj në bazë të marrëveshjeve me kompanitë farmaceutike. Pastaj ajo shpjegon: “Masat u lehtësuan shumë shpejt, kjo është arsyeja pse ekziston vala e dytë”. Brukseli po synon për një Bashkim Evropian të shëndetit, me një paketë iniciativash të përbashkëta.
Komisioni po propozon një seri masash të reja për të luftuar pandeminë, duke thënë që rritja e re e infeksioneve në kontinent është “alarmante”.
Evropa përsëri duket të jetë epiqendra e pandemisë në të gjithë botën. Belgjika është një pikë e nxehtë dhe shumë vende po vuajnë gjithashtu norma rekord ditore të infeksionit.
Virusi po përhapet me shpejtësi në Holandë, pjesën më të madhe të Spanjës dhe Republikës Çeke, dhe Gjermania dhe Franca po përgatiten për bllokime të reja.
Belgjika ka numrin më të lartë 14-ditor të rasteve Covid-19 për 100,000 qytetarë, duke tejkaluar Republikën Çeke, sipas Qendrës Evropiane për Parandalimin dhe Kontrollin e Sëmundjeve.
Ajo tejkalon madje Francën dhe Spanjën. Në total, 11,038 njerëz kanë vdekur deri më tani nga pandemia në Belgjikë. Të martën, 689 njerëz u dërguan me urgjencë në spital me Covid-19, 60 më shumë se rekordi gjatë pikut të marsit.
Komisioni Evropian u ka kërkuar 27 qeverive të BE të bëjnë më shumë dhe në një mënyrë më të koordinuar për të trajtuar virusin.
Brukseli tha se qeveritë e BE duhet të koordinojnë strategjitë e tyre të testimit dhe të përdorin më shumë testet e shpejta të antigjenit, pavarësisht nga fakti që furnizimi global për këto pajisje tani po shtrëngohet.
“Situata është shumë serioze, por ne ende mund të ngadalësojmë përhapjen e virusit nëse të gjithë marrin përgjegjësinë (e tyre)”, tha zonja von der Leyen.
Në Republikën Çeke, zyrtarët e shëndetësisë thanë se rritja e rasteve të përditshme të vendit arriti një rekord të ri të lartë me 15,663 të Martën – aq sa Gjermania, e cila ka tetë herë më shumë popullsi.
Vendi kishte 284,033 raste të konfirmuara në total, më shumë se gjysma e tyre të regjistruar në dy javët e fundit. Deri më tani, 2,547 njerëz kanë vdekur, me një rekord 139 vdekje të regjistruar të hënën. Qeveria Çeke ka forcuar më tej rregullat, duke vendosur një shtetrrethim mbarëkombëtar midis orës 21:00 dhe 6 të mëngjesit.
Në Gjermani, numri i infeksioneve të sapo regjistruara në një ditë ka arritur edhe një rekord të lartë. Instituti Robert Koch, agjencia gjermane e kontrollit të sëmundjeve, tha se 14,964 raste të reja u regjistruan në ditët e fundit, duke e çuar totalin që nga fillimi i shpërthimit në 449,275.
Gjermania gjithashtu pati edhe 27 vdekje të tjera të lidhura me Covid, duke rritur numrin e përgjithshëm të vdekjeve në 10,098.
Polonia, gjithashtu, ka shënuar një rekord të ri në infeksionet e përditshme, me të paktën 18,800 raste dhe janë regjistruar 236 vdekje të reja të lidhura me Covid.
Italia të martën regjistroi gjithashtu numrin më të lartë të saj një-ditor në pandemi – gati 22,000 raste të reja – dhe 221 vdekje të tjera.
Protestat janë organizuar në disa qytete italiane kundër shtetrrethimit brenda një dite në disa rajone. Kufizimet në mbarë vendin filluan këtë javë, duke mbyllur palestrat, pishinat, kinematë dhe teatrot. Restorantet kërkohet të mbyllen para orës së darkës.
Rastet totale të konfirmuara të Italisë u rritën në 564,778 dhe numri i të vdekurve arriti në 37,700. Rajonet e Lombardisë Veriore dhe asaj të Kampanias Jugore kanë përjetuar ngarkesat më të larta ditore në ditët e fundit.
Edhe Suedia, e cila shmangu një bllokim kombëtar dhe në përgjithësi vendosi masa shumë më të lehta sesa vendet e tjera evropiane, tani po u bën thirrje njerëzve të shmangin qendrat tregtare, dyqanet dhe transportin publik.
Javën e kaluar, komisioni tha se do të blinte deri në 22 milionë analiza antigjeni për të përmbushur “nevojat e menjëhershme” të vendeve të BE. Tani po u kërkon shteteve të blejnë më shumë përmes një skeme të përbashkët prokurimi.
Gjithashtu tha se shtetet duhet të kenë kërkesa të zakonshme testimi për udhëtarët që vijnë, duke përfshirë testet gjatë mbërritjes nëse testet nuk ishin të disponueshme në vendin e nisjes. Ai bëri thirrje për rregulla të koordinuara për karantinat.
Brukseli gjithashtu u kërkoi qeverive të ndajnë më shumë të dhëna mbi shpërthimet në vendet e tyre dhe mbi situatën në mjediset e tyre të kujdesit shëndetësor.
Pas Francës dhe Spanjës dhe Gjermania vendos për të rifutur vendin në karantinë.
Vendimi është marrë pak minuta më parë gjatë mbledhjes së kancelares Angela Merkel me drejtuesit e 16 landeve.
Kjo do të shihte që shkollat dhe kopshtet të mbesin të hapura, por restorantet, baret dhe disa dyqane mbyllen për të paktën një muaj. Ngjarjet e mëdha do të anuloheshin edhe një herë dhe shkurajoheshin udhëtimet e panevojshme
Në të gjithë Gjermaninë, do ndalohen lëvizjet e panevojshme, do mbyllen objektet e argëtimit, baret, restorantet dhe disa dyqane të mbyllen, por mbeten hapur shkollat dhe kopshtet. Masat do të hyjnë në fuqi në të gjithë Gjermaninë nga 2 nëntori dhe do të zbatohen deri në fund të muajit.
Kjo vjen pas shtimit të rasteve me Covid-19 dhe humbjeve të jetës.
Në Gjermani gjatë 24 orëve të fundit janë konfirmuar 14.964 raste të reja me coronavirus, që është numri më i madh në baza ditore që nga fillimi i epidemisë, ka njoftuar Instituti Robert Koch.
Sipas përllogaritjeve, kostoja për një muaj bllokim varion nga 7 deri në 10 miliardë euro.
Komisioni i Venecias njoftoi të martën se ka vendosur të jap vlerësimin e tij lidhur me ndryshimet e fundit të Kodit zgjedhor të bërëa nga parlamenti shqiptar në dritën e ndërhyrjeve kushtetuese të 30 korrikut, lidhur me zbatimin e një sistemi me lista të hapura.
Në përgjigje të kërkesës që Presidenti Ilir Meta i drejtoi Komisionit, drejtuesi i këtij institucioni, Gianni Buquicchio bëri të ditur se “në dritën e kohës së shkurtër para seancës së ardhshme plenare dhe të ndërlikueshmërisë së çështjes, Byroja e Komisionit ka vendosur të mos autorizojë procedurën urgjente”, duke shpjeguar se “opinioni do të përgatitet sipas procedurës së zakonshme dhe do t’i paraqitet seancës plenare për shqyrtim dhe miratim në dhjetor”. Në mbyllje të letrës, zoti Buquicchio vë në dukje se “sipas praktikës sonë, ky mendim në parim do të hartohet së bashku me ODIHR-in”.
Kërkesa e zotit Meta u shoqërua me debate, kryesisht rreth faktit nëse do të duhej të pritej opinion I Venecias, përpara se parlamenti të rivotonte ndryshimet në Kod, pas dekretit të Kreut të shtetit për t’ja kthyer atë pas deputetëve.
Shumica rikonfirmoi të martën vendosmërinë e saj për të miratuar ndryshimet. Presidenti Meta i bëri sërish thirrje parlamentit që të priste mendimin e Venecias. Por Komisioni i Ligjeve rrëzoi dekretin e tij, ndërsa vetëm dy përfaqësues të opozitës parlamentare votuan kundër, duke mbështetur idenë që rivotimi të bëhej pasi të shprehej Komisioni i Venecias.
Ashtu si dhe një ditë më parë, Komisioneri për Zgjerimin Oliver Harvelyi ripërsëriti gjithashtu qëndrimin se do të ishte e udhës që parlamenti të vepronte pasi të kishte një vlerësim nga ekspertët e Venecias. “I kënaqur që Kryeministri mirëpret mendimin e Komisionit të Venecias për ndryshimet kushtetuese të korrikut. Prandaj do të ishte e matur të presim që të shprehet, para se të rivotohet në Parlament. Pres zgjedhje të lira dhe të ndershme në prill 2021”, shkruajti komisioneri europian në një postim në Twitter.
Por kryeministri Edi Rama, i qëndroi mendimit se koha nuk pret, ndërsa shpjegoi se kishte patur një komunikim të drejtpërdrejtë me zotin Harvelyi. “Unë e kam sqaruar Komisionerin në bisedat që kemi patur, si gjithmonë biseda të drejtpërdrejta, miqësore, pa dorashka, që parlamenti nuk do të presë asnjë sekondë për arsye se ne kemi zgjedhjet në 25 prill dhe nuk ka asnjë mundësi të hyjmë në spiralen e një aventure ku na fton Ilir Meta, i cili nuk ka qëllim të përmirësojë Kodin Zgjedhor, por të sabotojë nga pozicioni i tij ekstremist antishumicë dhe antiparlament, këtë proces”, tha zoti Rama duke shtuar se lëvizjet e presidentit janë një “përpjekje që është tanimë një përpjeke botërisht e identifikuar si përpjekja e një lideri alternativ të një opozite të copëtuar dhe e një lideri absolut të një partie të degraduar”.
Për zotin Rama “Komisioni i Venecias është patjetër i mirëpritur të sjellë kur të pjekë, opinionin e vet. Ai opinion do të diskutohet me të gjitha forcat politike dhe natyrisht, duke patur parasysh kohën që kemi në dispozicion, do të mbetet për të adresuar çfarëdolloj çështjeje që mund të dalë përtej 25 prillit. Nuk kemi kohë për të humbur dhe nuk mund të hyjmë në asnjë aventurë, po e përsëris, sepse strukturat e reja të administrimit zgjedhor që kanë nisur punën, kanë nevojë të kenë të shkruar të zezë mbi të bardhë ligjin zgjedhor dhe implementimi i ligjit zgjedhor kërkon kohën e vet”.
Ndaj qëndrimit të Kryeministrit reagoi menjëherë Partia Demokratike. “Këmbëngulja arrogante e Edi Ramës në injorimin e apelit të Komisionerit për Zgjerimin në BE, Oliver Varhelyi nxjerr zbuluar Kryeministrin autokrat që, për hallin e pushtetit të tij, është gati t’i shpallë luftë Shqipërisë dhe Bashkimit Europian. Shqiptarët nuk do ta lejojnë këtë! Reforma Zgjedhore dhe zgjedhjet demokratike janë kusht për nisjen e bisedimeve të anëtarësimit në BE. Duke mos dëgjuar këshillën për të pritur Opinionin e Komisionit të Venecias, Edi Rama po tenton të marrë peng të ardhmen europiane të Shqipërisë dhe të hedhë në erë zgjedhjet e radhës”, shkruajti në Facebook Sekretari i Përgjithshëm i PD-së Gazmend Bardhi.
Më vonë dhe presidenti Ilir Meta, përmes një postimi në Facebook, falenderoi “miqtë e vërtetë të Shqipërisë, që duan çeljen sa më parë të negociatave me Bashkimin Europian dhe nuk duan të na ndajnë nga Maqedonia e Veriut, për durimin e tyre dhe këshillat e sinqerta. Shpresoj shumë që ato të dëgjohen me mençuri deri të enjten. Por i siguroj miqtë tanë të sinqertë ndërkombëtarë se kohës së injorimit të kushteve dhe standardeve për integrimin do t’i vijë fundi, në çdo rast, në 25 prill 2021. Pas kësaj date të gjitha kushtet do plotësohen rrufeshëm, me qëllim që Shqipërinë europiane ta ndërtojmë këtu dhe së bashku! Në 25 prill 2021, do fillojë epoka e re e sundimit të ligjit, që do të sjellë edhe sundimin e ligjit në Shqipëri”, nënvizoi Kreu i Shtetit.
Muzeu Hebre i Berlinit akordoi ish-sekretares amerikane të Shtetit, Madeleine Albright dhe yllit të pianos, Igor Levit, titullin si fitues të çmimit vjetor për ”Mirëkuptim dhe Tolerancë”.
“Si një figurë politike, profesore dhe autore, Madeleine Albright mbetet një zë i domosdoshëm sot”, theksoi juria në një deklaratë të postuar në faqen e internetit të muzeut.
“Ndërgjegjja e tij politike bazohet në përvojën e dyfishtë të arratisjes: nga nacional-socialistët në Pragë dhe më vonë nga diktatura komuniste në Beograd”, shtoi muzeu në deklaratën e tij.
Levit, një pianist gjermano-rus, është vlerësuar si një nga “zërat më të rëndësishëm politikë të brezit të tij”.
“Ky virus është shumë i vështirë. Kemi shumë informacion, por nuk dimë gjithçka. Kjo valë e dytë do të jetë ndoshta më e madhe se e para dhe ndikimi në sistemin shëndetësor do të jetë i menjëhershëm në tri javët e ardhshme, sidomos në shërbimet e reaminacionit”- tha tha presidenti i komitetit shkencor francez, Jean-Francois Delfraissy gjatë një interviste për radion RTL.
Sipas tij, aktualisht ka mbi 50 mijë raste të reja me koronavirus në ditë, por Delfraissy beson se kjo shifër po shkon drejt 100 mijë rasteve në ditë.
“Përballë kësaj vale të fortë të koronavirusit ekzistojnë “dy mundësi”, ose një “izolim më masiv si në orë ashtu edhe në shtrirjen gjeografike të territorit kombëtar dhe një bllokim “më pak i vështirë”, si ai i llojit irlandez. Në të dy rastet shkollat duhet të qëndrojnë të hapura”, tha Delfraissy, i cili theksoi se çdo vendim në këtë drejtim varet nga qeveria dhe politika.
Thomas Opperman, nënkryetari i parlamentit gjerman, vdiq papritur në moshën 66-vjeçare. Oppermann ra pa ndjenja pak para një transmetimi televiziv. Kolegët nga i gjithë spektri politik kanë shprehur tronditjen e tyre.
Oppermann, Politikani kryesor Social Demokrat (SPD) dhe nënkryetari i Bundestag ra pa ndjenja të dielën në mbrëmje papritur ndërsa do të intervistohej për ZDF. Transmetuesi publik konfirmoi vdekjen e tij të hënën, duke thënë se ai ishte duke shkuar në spital pasi u sëmur.
Oppermann filloi karrierën e tij politike në 1980. Ai së pari u bë një ligjvënës në nivelin shtetëror në Saksoninë e Ulët në 1990 dhe vazhdoi të shërbejë si ministër i shkencës. Ai kaloi në skenën kombëtare në 2005, ku përfaqësoi zonën elektorale të Göttingen. Ai kishte mbajtur postin e nënkryetarit të Bundestag që nga viti 2017.
Nga 2013 në 2017 ai shërbeu si drejtues i partisë parlamentare për SPD të qendrës së majtë në Bundestag.
“Tronditje për të gjithë ne”
Bashkë-udhëheqësi i SPD-së Norbert Walter-Borjans e quajti lajmin e vdekjes së Oppermann “një tronditje të fortë për të gjithë” në një postim në Twitter.
“Thomas Oppermann vdiq papritur dje”, shkroi Walter-Borjans. “Ne jemi thellësisht të tronditur dhe të pikëlluar me të afërmit e tij.”
Ministri i Punës dhe ligjvënësi tjetër i SPD Hubertus Heil mbajti zi për vdekjen “e papritur” të Oppermann.
“Lajmi për vdekjen e papritur të kolegut dhe shokut tim Thomas Opperman më mbush me trishtim të thellë”, shkroi Heil në Twitter. “Me pasion dhe intelekt, Thomas i ka bërë një shërbim të madh vendit tonë dhe demokracisë sociale. Mendimet e mia janë me familjen e tij.”
Zëvendëskancelari dhe Ministri i Financave Olaf Scholz, i cili është kandidati i SPD për kancelar në zgjedhjet kombëtare të vitit të ardhshëm, e quajti vdekjen Oppermann një “tronditje për të gjithë”.
“Vendi po humbet një politikan të arrirë, Bundestagu një nënkryetar të shquar dhe SPD një shok të pasionuar dhe të ashpër”, shkroi Scholz në Twitter. “Ne të gjithë po humbasim një mik – dhe jemi të trishtuar.”
Kancelarja Angela Merkel, një anëtare e Bashkimit Konservator Demokristian, i cili shërben në një qeveri koalicioni me SPD, tha se ajo ishte “tronditur dhe trishtuar nga vdekja e parakohshme e Thomas Oppermann”.
“Unë e kam vlerësuar atë për shumë vite si një partner i besueshëm dhe i drejtë në koalicionin e madh”, tha ajo në një deklaratë. “Si nënkryetar i Bundestagut gjerman, ai i bëri një shërbim të jashtëzakonshëm parlamentit tonë në kohë të trazuara.”
Pensioni i planifikuar
Oppermann kishte njoftuar në gusht se nuk do të kërkonte rizgjedhjen në Bundestag në votimin e vitit të ardhshëm.
“Pas 30 vitesh si delegat në parlamentin shtetëror të Saksonisë së Ulët dhe në Bundestagun Gjerman është tani koha e duhur që unë të bëj përsëri diçka ndryshe dhe të marr projekte të reja”, tha ai në atë kohë.
Në orën tre pas mesnate fillon llogaritja dimërore e kohës me çka akrepat do të kthehen një orë prapa nga ora 03:00 në orën 02:00.
Parlamenti Evropian në mars të vitit të kaluar votoi për heqjen e ndërrimit të kohës sezonale nga viti 2021 ndërsa vendet anëtare të Bashkimit Evropian duhet të vendosin nëse do të zbatojnë llogaritjen e përhershme dimërore apo verore të kohës.
Ndryshimi i kohës në Evropën Perëndimore u vendos në fillim të viteve 1970 me arsyetimin se me atë zgjatet dita, mundësohet kursimi i energjisë elektrike, rritet produktiviteti, përmirësohet përshtatja e njerëzve dhe dita e punës bëhet më efikase.
Kalimi nga llogaritja verore në llogaritjen dimërore të kohës për herë të parë u vu re në vitin 1916 në vendet e Evropës Veriore dhe deri tani është vendosur në rreth 70 vende, kryesisht në hemisferën veriore. aa
Raportuesja për Kosovën në Parlamentin Evropian, Viola Von Cramon ka thënë se nuk pajtohet me deklaratën e Emisarit të BE’së Miroslav Lajçak për ndryshimin e Kushtetutës së Kosovës.
Von Cramon ka shkruar në Twitter se nuk pajtohet me qëndrimin e Lajçak duke thënë se ndryshimi i Kushtetutës së Kosovës nuk dërgon askund, raporton Gazeta Express.
“As unë nuk pajtohem me lëvizjen e fundit të Miroslav Lajçakut. Nuk mendoj se të flasësh për ndryshim të Kushtetutës së Kosovës na çon diku”, ka shkruar Von Cramon.
Deputetja e Parlamentit Evropian e ka quajtur si deklaratë shumë të mirë atë të ambasadorit të Gjermanisë në Këshillin e Sigurimit të OKB’së, Christoph Heusgen, i cili i reagoi Ivica Daçiqit se të gjithë fjalimin e ka copy-paste dhe nuk përmend asnjëherë faktin se Serbia ka kryer spastrim etnik në Kosovë.
“Absolutisht e vërtetë. Një deklaratë shumë e mirë e ambasadorit të Gjermanisë në OKB”, ka shkruar ajo.
Sekretari i Përgjithshëm i NATO-s Jens Stoltenberg konfirmoi të enjten se aleanca ushtarake do të krijojë një qendër hapësinore në bazën e Komandës Ajrore të Forcave Aleate në Ramshtajn të Gjermanisë.
Duke folur në Bruksel pas një konference virtuale të ministrave të jashtëm të NATO-s, Stoltenberg konfirmoi njoftimet në lidhje me qendrën hapësinore të bëra më parë këtë javë nga agjencitë evropiane të lajmeve.
“NATO është e vendosur të ruajë avantazhin e saj në të gjitha fushat”, tha ai, duke përfshirë “tokën, detin, ajrin, fushën kibernetikën dhe hapësirën”.
Gjatë një takimi dhjetorin e kaluar, Stoltenberg deklaroi “hapësirën si një fushë operacionale për NATO-n. Dhe sot ne bëmë një hap tjetër të rëndësishëm”.
Në komentet e tij, shefi i NATO-s tha se qendra hapësinore e Komandës Ajrore Aleate do të ndihmonte për të koordinuar aktivitetet hapësinore të aleatëve dhe për të siguruar mbështetje për misionet dhe operacionet e NATO-s nga hapësira duke përdorur komunikimet satelitore dhe imazhet. Stoltenberg tha se qendra gjithashtu do të ndihmonte në mbrojtjen e sistemeve hapësinore aleate të NATO-s duke shpërndarë informacione rreth kërcënimeve të mundshme.
Stoltenberg ka thënë vazhdimisht se NATO nuk ka interes në “militarizimin” e hapësirës. Por të enjten, ai tha se kërcënimet ndaj satelitëve të NATO-s dhe sistemeve hapësinore janë reale.
“Për shembull,” tha ai, “Rusia dhe Kina tani po zhvillojnë aftësi që mund të verbojnë, shkatërrojnë satelitët, të cilat do të kenë një ndikim të rëndë si për ushtrinë ashtu edhe aktivitetet civile në terren.”
Stoltenberg gjithashtu tha se ministrat e jashtëm të NATO-s shprehën shqetësimin në lidhje me arsenalin në rritje rus të raketave të sofistikuara bërthamore dhe rëndësinë e zgjatjes nga Rusia dhe Shtetet e Bashkuara të traktatit START i Ri.
Sekretari i Përgjithshëm i NATO-s gjithashtu bëri thirrje për një armëpushim të menjëhershëm dhe ndërprerjen e të gjitha armiqësive midis Armenisë dhe Azerbajxhanit në rajonin e debatueshëm të Nagorno-Karabakut. Ky rajoni ndodhet brenda Azerbajxhanit por ka qenë nën kontrollin e forcave etnike armene të mbështetura nga Armenia që kur përfundoi lufta atje në vitin 1994.
Luftimet aktuale në Nagorno-Karabak shënojnë përshkallëzimin më të madh të konfliktit që nga përfundimi i luftës. Stoltenberg i bëri thirrje Turqisë që “të përdorë ndikimin e saj të konsiderueshëm në rajon për të ulur tensionet”. zëri i amerikës
Brukseli vlerëson se deklarata e përfaqësuesit special për dialogun Kosovë-Serbi, Mirosllav Lajçak për ndryshimet e nevojshme kushtetuese është keqinterpretuar. Zëdhënësi për Politikë të Jashtme dhe Siguri i BE-së, Peter Stano, i tha Radios Evropa e Lirë se duhet bërë dallimi mes asaj që është “percepcion dhe keqinformim, me realitetin e shpjeguar nga zoti Lajçak”.
“Në këtë rast, është thënë ajo çka është e qartë – dhe zoti Lajçak ka shpjeguar se çfarë ndodh nëse je duke e negociuar një marrëveshje ndërkombëtare. Kur arrin një marrëveshje ndërkombëtare, atëherë duhet të konsiderohen rregullimet e nevojshme ligjore nga qeveria, duke përfshirë edhe nivelin kushtetues, në mënyrë që ta integrojë atë në rendin ligjor dhe kushtetues. Dhe kjo vlen për Kosovën dhe Serbinë”, tha Stano.
Të enjten, më 15 tetor, në konferencën për media në Beograd, Lajçak kishte thënë se në një proces serioz negociator, “është e logjikshme që do të duhet të ndryshojë edhe Kushtetuta”.
Një deklaratë e tillë ka nxitur reagime të shumta në Kosovë, kryesisht kundër çdo mundësie për ndryshimin e Kushtetutës së Kosovës. Kur bëhet fjalë tek Asociacioni, brenga kryesore është te kompetencat të këtij organi.
Por, zëdhënësi i Komisionit Evropian për Politikë të Jashtme dhe Siguri, Peter Stano thotë se qëndrimi i BE-së për Asociacionin nuk ka ndryshuar.
Ai iu referua fjalimit të ish-përfaqësueses së Lartë për Politikë të Jashtme, Federica Mogherini në Parlamentin e Kosovës më 2016, ku ajo kishte hedhur poshtë mundësinë që Asociacioni të jetë pushtet i ndarë në Kosovë.
“Ky Asociacion nuk do të jetë qeveri paralele brenda Kosovës dhe nuk do të ketë kompetenca legjislative. Do të formohet brenda kornizës ligjore dhe qeverisëse të Kosovës”, pati thënë Mogherini më 6 maj, 2016 në Kuvendin e Kosovës. Sipas Stanos, ky vazhdon të jetë qëndrim zyrtar i BE-së.
Mogherini poashtu atëbotë pati thënë se Asociacioni “do të jetë në përputhje me vendimin e Gjykatës Kushtetuese që ofron udhëzime që të sigurohemi se statuti i Asociacionit do të reflektojë ligjet e Kosovës kur të përpilohet”.
Formimi i Asociacionit është paraparë me një marrëveshje midis Kosovës dhe Serbisë, të nënshkruar në Bruksel, në vitin 2013.
Dy vjet më vonë, Kosova dhe Serbia arritën edhe një marrëveshje shtesë për parimet e themelimit të tij, por Gjykata Kushtetuese e Kosovës ka konstatuar se parimet nuk janë në harmoni me Kushtetutën e Kosovës.
Gjykata Kushtetuese kishte konstatuar që akti juridik i Qeverisë së Republikës së Kosovës dhe statuti që zbaton parimet, për të qenë në pajtueshmëri me frymën e Kushtetutës, duhet të plotësojë standardet kushtetuese.
Kjo temë ka ndikuar në shtyrjen e dialogut në Bruksel, pasi Serbia po insiston që të diskutohet sërish për Asociacionin e Kosova po konsideron si çështje të mbyllur, e cila do të zbatohet pas arritjes së marrëveshjes finale për njohje reciproke.
Çka është Asociacioni i komunave me shumicë serbe në Kosovë?
Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë ku shumica e popullsisë janë serbë, të cilat janë Mitrovicë e Veriut, Kllokot, Partesh, Ranillug, Graçanica, Zveçan, Zubin Potok, Novobërdë, Leposaviq dhe Shtërpcë.
Sipas Marrëveshjes për Asociacionin dhe në përputhje me Marrëveshjen e parë të Brukselit, objektivat kryesore e Asociacionit janë: ushtron vështrimin e plotë për zhvillimin e ekonomisë lokale; ushtron vështrimin e plotë në fushën e arsimit; ushtron vështrimin e plotë për përmirësimin e shëndetësisë lokale primare e sekondare dhe përkujdesjen sociale; ushtron vështrimin e plotë për koordinimin e planifikimit urban dhe rural; aprovon masa për përmirësimin e kushteve lokale të jetesës për të kthyerit në Kosovë; zhvillon, koordinon, lehtëson aktivitete hulumtuese dhe zhvillimore; promovon, shpërndan, dhe avokon për çështjet me interes të përbashkët të anëtarëve të tij dhe i përfaqëson ata përfshirë tek autoritetet qendrore; vendos marrëdhënie dhe hyn në marrëveshje bashkëpunimi me asociacionet tjera të komunave, vendore dhe ndërkombëtare, etj.
Franca u përfshi nga tubime në mbarë vendin me thirrjet pro lirisë së shprehjes dhe laicizmit, ndërkohë që qeveria diskutonte të dielën forcimin e masave kundër ekstremizmit islamik pas sulmit makabër që la të vrarë një mësues të premten.
Duke respektuar udhëzimet për maska, mijëra vetë u mblodhën në sheshin “Place de la Republique” në Paris, të revoltuar nga ekzekutimi me prerje koke i mësuesit të historisë Samuel Paty. Disa mbanin flamuj francezë, ndërkohë që ata që e morën fjalën kujtuan viktimën e fundit të terrorizmit në Francë.
Tronditja dhe revoltimi që përfshiu vendin i ngjante në shumë mënyra dhimbjes që përfshiu Francën gjashtë vjet më parë kur miliona protestues me lapsa në duar dolën për të mbrojtur lirinë e shprehjes, pas sulmeve terroriste në redaksinë e revistës satirike Charlie Hebdo.
“Liria e shprehjes është një ndër vlerat thelbësore të identitetit tonë,” tha Kryeministri Jean Castex për gazetën e përjavshme Le Journal du Dimanche.
Ndërkaq ata që e morën fjalën në tubimet e së dielës paralajmëruan se nuk duhet t’i përgjigjen urrejtjes me urrejtje.
Duke iu referuar slloganit “Unë jam Charlie” që u dëgjua fillimisht pas sulmeve të janarit 2015 tek revista Charlie Hebdo, zoti Castex tha “Jam më tepër se kurrë Charlie”.
Por, megjithë thirrjet për unitet kombëtar pas sulmit të dytë terrorist brenda një muaji, francezët kanë mendime të ndryshme kur flitet për përgjigjen ndaj radikalizmit islamik.
Një pjesë e këtij dallimi në mendime ushqehet edhe nga reagimi i autoriteteve ndaj koronavirusit.
“Ose ne, ose ata,” ishte titulluar një artikull redaksional i revistës Le Point lidhur me vrasjen, ndërsa Le Telegramme shkruante se sulmi i së premtes “na kujton se sa i kërcënuar është modeli ynë i sistemit arsimor si dhe ndarja e fesë nga shteti”.
Karikaturat e Profetit Muhamet
Të paktën 11 vetë janë ndaluar dhe po merren në pyetje lidhur me vrasjen e së premtes në një periferi pranë Parisit, kur mësuesi po kthehej nga shkolla në shtëpi.
Ndër të ndaluarit janë të afërm të të akuzuarit, një 18-vjeçar, refugjat nga Çeçenia i identifikuar nga zyrtarët si Abdoullakh A., i cili u qëllua për vdekje nga policia pak pasi kishte ekzekutuar me prerje koke viktimën.
Pasi kishte vënë një fotografi të viktimës Samuel Paty në Twitter, pas ekzekutimit, 18-vjeçari kishte lënë një mesazh kërcënues për Presidentin Macron.
Agjencia e lajmeve Reuters njofton se Twitter e hoqi shpejt postimin, duke thënë se llogaria ishte pezulluar sepse kishte shkelur rregullat e platformës së medias sociale.
Incidenti ndodhi më pak se një muaj pasi një imigrant pakistanez sulmoi me thikë dy persona para redaksisë së vjetër të revistës Charlie Hebdo në Paris.
Në të dyja rastet duket se autorët reaguan ndaj botimit të karikaturave të Profetit Muhamet. Sulmet u ndërmorrën ndërkohë që në Paris vazhdon gjyqi lidhur me sulmet e vitit 2015 në redaksinë e Charlie Hebdo.
Në Conflans-Sainte-Honorine, rreth 30 km nga Parisi, buqeta me lule ishin vënë para shkollës ku jepte mësim zoti Paty. Banorët nderuan mësuesin, që shumë e përshkruan si “të sjellshëm dhe të rreptë”.
A është në rrezik liria e shprehjes?
Vrasja e mësuesit ndodhi pasi kishte treguar gjatë mësimit lidhur me lirinë e shprehjes dhe karikatura të Profetit Muhamet. Sipas nxënësve, në raste të ngjashme para ditës së sulmit ai kishte paralajmëruar nxënësit myslimnë se mund të dilnin nga klasa nëse i konsideronin karikaturat ofenduese.
Por prindërit e nxënësve myslimanë kishin shprehur ankesa. Babai i një nxënësi kishte shprehur pakënaqësi në median sociale, gjë që ishte mbështetur nga Abdelhakim Sefrioui, një islamist i njohur.
Sipas gazetës Le Journal du Dimanche, autoritetet e konsiderojnë Sefriouin si agjitator të rrezikshëm, megjithëse nuk mendonin që reagimi do të ishte deri në vrasje, por vetëm me protesta.
Hetuesit ende nuk kanë gjetur ndonjë lidhje direkte mes të dyshuarit çeçen që jetonte në Normandi dhe zonës ku ndodhej shkolla.
Të dielën, Presidenti Macron u takua me kabinetin e tij për të diskutuar masat kundër ekstremizmit. Partia e zotit Macron ka përgatitur një projekt-ligj kundër separatizmit që kryesisht përqendrohet tek islamizmi radikal.
Presidenti ndërkohë ka pësuar rënie të popullaritetit si rezultat i reagimit të autoriteteve ndaj koronavirusit. Kritikët e akuzojnë qeverinë se edhe në rastin e ekstremizmit, masat e saj kanë qenë të zbehta.
Në përgjigje të komenteve të zotit Macron se ekstremistët nuk do të fitojnë kurrë, udhëheqësja e ekstremit të djathtë, Marine Le Pen reagoi në Twitter me postimin “Ata i kemi këtu, i kemi edhe në shkolla!”.
“Fjalët e mëdha duhet t’ua lënë vendin veprimeve të mëdha,” tha udhëheqësi i qendrës së djathtë Christian Jacob.
Ndërkaq, udhëheqësit e komunitetit mysliman në Francë, komuniteti më i madh mysliman në Evropën Perëndimore, shqetësohen se sulmi i fundit do të pasohet me shtim të ndjenjave anti-myslimane.
“Jam shumë i vrarë nga ky akt i papërshkrueshëm në emër të një feje që nuk ka asgjë të përbashkët me të. Pa dyshim që do të na ndikojë, si qytetarë të Francës dhe si myslimanë,” tha kleriku i xhamisë së Bordosë, Tareq Oubrou në një intervistë për radion franceze.
Kancelarja gjermane, Angela Merkel u bëri thirrje bashkëqytetarëve të saj që të shmangin grumbullimet dhe udhëtimet për shkak të koroanvirusit.
“Hiqni dorë nga çdo udhëtim që nuk është vërtet i nevojshëm, nga çdo festë që nuk është vërtetë e nevojshme. Qëndroni në shtëpitë tuaja sa më shumë të jetë e mundur. Se si do të jetë dimri, se si do të jenë Krishtlindjet, do të vendoset në ditët dhe javët e ardhshme”, shprehet Merkel.
Për të luftuar rikthimin e epidemisë, Merkel kujtoi rëndësinë e respektimit të mbajtjes së barrierave mbrojtëse dhe maskave dhe ventilimin e rregullt të hapësirave të mbyllura duke shpjeguar se tashmë duhet të shkohej më tej.
“Nëse secili prej nesh redukton tashmë në mënyrë domethënëse numrin e takimeve jashtë familjes së tij për disa kohë, ne mund të jemi të suksesshëm në ndalimin dhe përmbysjen e trendit të rritjes së infeksioneve”, paralajmëroi ajo.
Gjermania ka regjistruar 7 830 raste me COVID-19 në 24 orët e fundit, një rekord për vendin që prej shpërthimit të pandemisë së COVID-19, sipas të dhënave zyrtare të publikuara sot.
Shefi i politikës së Jashtme të Bashkimit Evropian, Josep Borrell, tha të hënën se beson që arritja e një marrëveshjeje përfundimtare ndërmjet Kosovës dhe Serbisë është çështje muajsh dhe jo vitesh, nëse të dyja palët angazhohen në mënyrë konstruktive.
Ai i bëri këto komente pas takimit të ministrave të jashtëm të Bashkimit Evropian, të cilët diskutuan një sërë çështjesh, përfshirë bisedimet Kosovë-Serbi.
Zotri Borrell tha se Bashkimi Evropian nuk “përshkruan zgjidhjen, nuk synon të përshpejtojë artificialisht procesin por as ta zvarrisë atë”, duke theksuar se Kosova dhe Serbia e kanë të qartë se gjetja e një zgjidhjeje është kusht i domosdoshëm në rrugën e tyre drejt integrimeve evropiane.
Përfaqësuesi i posaçëm i Bashkimit Evropian për bisedimet Kosovë-Serbi, Miroslav Lajçak, raportoi, para ministrave të jashtëm për procesin e bisedimeve, pas të cilit tha se “diskutimi i sotëm konfirmoi që bisedimet janë qartazi të lidhura me të ardhmen evropiane të Kosovës dhe Serbisë”.
Zoti Lajçak, gjatë javës do të qëndrojë në Prishtinë dhe në Beograd në përpjekje për rifillimin e bisedimeve, të cilat duket se ngecën për shkak të mospajtimeve rreth çështjes së Asociacionit të komunave më shumicë serbe në Kosovë.
Serbia kërkon që në bisedimet e lehtësuara nga Bashkimi Evropian të diskutohet për këtë asociacion, ndërsa Kosova thekson se kjo çështje është mbyllur me marrëveshjet ekzistuese të vitit 2013 dhe 2015.
Serbia kërkon që ky mekanizëm të krijohet sipas marrëveshjes së arritur në vitin 2015, që parasheh përgjegjësi të gjera në disa fusha, por Gjykata Kushtetuese e Kosovës kishte gjetur shkelje të shumta në marrëveshje dhe sipas opinionit të saj, asociacioni mund të krijohet vetëm sipas kushtetutës dhe ligjeve të Kosovës.
Serbia kërkon ndryshime në Kushtetutën e Kosovës për të mundësuar kalimin e më shumë përgjegjësive ekzekutive tek asociacioni i komunave me shumicë serbe, por Kosova kundërshton çdo ndryshim që do t’i jepte përgjegjësi ekzekutive një asociacioni të tillë.
Përgjatë diskutimeve të së hënës, ministrat e jashtëm thanë se bisedimet Kosovë – Serbi janë thelbësore për qëndrueshmërinë e rajonit por edhe Bashkimit Evropian.
Muajin e kaluar, dy vendet kanë arritur një marrëveshje për normalizimin e marrëdhënieve ekonomike, e cila është nënshkruar në Shtëpinë e Bardhë, në praninë e presidentit amerikan, Donald Trump.
Komisioni Evropian synon që, gjatë dekadës së ardhshme, të investojë deri në 20 miliardë euro në Ballkanin Perëndimor, thuhet në një plan investimi që ka parë Radio Evropa e Lirë.
Draft-dokumenti thekson se prioritet do të jenë lidhjet më të mira të ekonomive të Ballkanit Perëndimor, brenda rajonit, por edhe me Bashkimin Evropian.
“Një gjë e tillë kërkon një angazhim të fuqishëm nga Ballkani Perëndimor për zbatimin e reformave themelore, për thellimin e integrimit ekonomik rajonal dhe për zhvillimin e një tregu të përbashkët rajonal, bazuar në legjislacionin e BE-së, për ta bërë rajonin një zonë më tërheqëse për investime”, thuhet në dokument.
Paketa, e paralajmëruar në kulmin e krizës nga pandemia COVID-19, do të paraqitet nga Komisioni Evropian të martën pasdite.
Bashkimi Evropian konfirmon se rajoni do të përfitojë shumë nga përpjekjet e intensifikuara, që synojnë “kapërcimin e trashëgimisë së të kaluarës, jo vetëm në drejtim të normalizimit të marrëdhënieve midis Serbisë dhe Kosovës, por edhe të përfundimit me sukses të dialogut, me ndihmën e BE-së”.
Paketa po ashtu parashikon që, përveç granteve, Bashkimi Evropian të ofrojë garanci që ndihmojnë në uljen e kostove për investime publike dhe private dhe, në këtë mënyrë, zvogëlojnë rreziqet për investitorët.
Presidentja e Komisionit Evropian, Ursula von der Leyen.
Presidentja e Komisionit Evropian, Ursula von der Leyen, tha se ka dalë negative në testin për koronavirus, porse do të vazhdojë të vetizolohet deri të martën mbrëma, pasi mori pjesë në një takim me dikë që doli pozitiv.
Në një postim në Twitter, von der Leyen konfirmoi se ky është testi i dytë negativ.
Ajo, megjithatë, tha se do ta vazhdojë vetizolimin deri nesër mbrëma, “ashtu siç parashihet me rregulloret në fuqi”.
Në një postim të mëhershëm në Twitter, von der Leyen njoftoi se është futur në vetizolim, pasi një person, me të cilin është takuar të martën e kaluar, ka dalë të dielën pozitiv në testin për koronavirus.
Von der Leyen tha se u testua edhe të enjten, kur po ashtu doli negative.
Presidentja e Komisionit Evropian, Ursula von der Leyen, njoftoi se ka hyrë në vetizolim pasi ka qenë në kontakt me një person të infektuar me koronavirusin e ri, që e shkakton sëmundjen COVID-19.
Përmes një postimi në rrjetin social Twitter, von der Leyen tha se ajo mori pjesë në një takim, më 29 shtator, ku ishte prezent “një person i cili dje doli pozitiv”.
Presidentja e Komisionit Evropian tha se testi të cilin e ka bërë më 1 tetor, ka rezultuar negativ dhe se ajo do t’i nënshtrohet një testi tjetër, më 5 tetor.
Von der Leyen tha se ajo do të jetë në vetizolim deri më 6 tetor në mëngjes.
Një pjesë e vendeve evropiane po marrin masa të reja kundër koronavirusit, derisa numri i të infektuarve po rritet.
Në të gjithë botën, vendet që dikur e kishin vënë nën kontroll përhapjen e virusit me bllokime dhe protokolle shëndetësore, tani po përballen me një ringjallje shqetësuese, derisa ekspertët e shëndetësisë paralajmërojnë një vjeshtë dhe dimër të vështirë përpara. rel
Presidenti amerikan Donald Trump tha të dielën se do të kërkojë që sfiduesi i tij demokrat për zgjedhjet e 3 nëntorit, ish-Nënpresidenti Joe Biden, të bëjë testin për drogë para ose pas debatit të tyre këtë të martë në mbrëmje.
Ai sugjeroi se paraqitja jo e njëtrajtshme e zotit Biden në debatet e mëparshme politike, ishte tregues se ai ishte i droguar. Akuza e pazakontë e zotit Trump, të cilën ai e ka ngritur edhe më parë gjatë javëve të fundit, vjen ndërsa ai vazhdon të renditet pas zotit Biden në sondazhet kombëtare, prej disa muajsh me radhë.
“Unë kërkoj me forcë që “gjumashi” Joe Biden të kryejë testin për drogë para ose pas debatit të së martës në mbrëmje“, shkruante zoti Trump në Twitter.
“Natyrisht që edhe unë pranoj që ta bëj një të tillë gjithashtu. Prezantimi i tij në debate ka qenë rekord për sa i takon të qënurit jo i njëtrajtshëm, për ta thënë në mënyrë të butë. Vetëm barnat mund ta kenë shkaktuar këtë gjendje???”, shkruante ai.
Prej vitit të kaluar deri në 2020, zoti Biden u përfshi në një varg debatesh me pretendentë të tjerë demokratë për fituar emërimin e Partisë Demokrate si kandidat për president.
Disa herë ai doli dobët gjatë debateve me 10 kandidatë të rreshtuar së bashku në një podium. Por ai u duk se e rifitoi ritmin pas një prezantimi të fortë në një debat kokë më kokë në mars kundër senatorit të Vermontit Bernie Sanders, kundërshtari i fundit i tij përpara se pranonte kandidimin zyrtar për president në emër të demokratëve.
Muajin e kaluar zoti Trump tha se: “Ju i patë disa nga ato debate me numrin më të madh të njerëzve në skenë. Thosha: si është e mundur që ai mund të bëjë përpara?! Sinqerisht, prezantimi i tij më i mirë ishte kundër Bernie-t. Ne do të bëjmë thirrje për të kryer testin për drogë, meqë ra fjala sepse, prezantimi i tij më i mirë ishte kundër Bernie-t. Nuk ishte se u paraqit si Winston Churchill, por ishte një debat normal dhe i mërzitshëm. Asgjë e jashtëzakonshme nuk ndodhi. Nëse ktheheni dhe shikoni disa nga ato debate të shumta, ai ishte shumë keq. Nuk ishte as koherent. Ndërsa kundër Bernie-t ishte”, përfundonte postimi i zotit Trump.
Presidenti Trump 74-vjeçar e ka vënë shpesh në dyshim mprehtësinë mendore të zotit Biden, 77 vjeç. Por zoti Biden i ka ironizuar shpesh akuzat e zoti Trump dhe ka shtuar ai do të jetë në nivelin e zotit Trump apo më lartë gjatë debateve me të.
“Më shihni, zoti President, na shihni çfarë them, çfarë bëj, çfarë di e në ç’formë jam”, tha zoti Biden gjatë një interviste për ABC News. Por zoti Biden pranoi se ka “pyetje legjitime” për t’u bërë në lidhje me gjendjen mendore të dy kandidatëve.
Në një intervistë të regjistruar paraprakisht e të transmetuar të dielën në CNN, bashkëshortja e zotit Biden, Jill, tha se “ai është gati”.
“Një nga gjërat për të cilën jam e ngazëllyer është momenti kur populli amerikan të shohë Joe Bidenin atje lart në atë skenë. Ata do të shohin se si duket një president. Dikush që është, i qetë, i qëndrueshëm, i fortë, elastik“.
Jill Biden tha se ka një diferencë si “nata me ditën mes dy kandidatëve. “Mezi pres që populli amerikan ta shohë atë burrë shteti përpara publikut amerikan”, tha ajo.
Presidenti Trump dhe ish-Nënpresidenti Biden debatojnë tre herë, duke filluar me debatin 90-minutësh të së martës të moderuar nga gazetari i Fox News-it, Chris Wallace në qytetin e Klivlendit në shtetin Ohajo.
Zoti Wallace ka zgjedhur gjashtë tema për diskutim të ndara në segmente 15 minutëshe: mes tyre rezultatet e punës së dy kandidatëve, Gjykatën e Lartë me emërimin nga zoti Trump të juristes konservatore Amy Coney Barrett, gjithashtu çështje si COVID-19, ekonomia, integriteti i zgjedhjeve” si dhe “gara e dhuna në qytetet amerikane”. zëri i amerikës
Qeveria franceze pritet së shpejti të paraqesë një projekt-ligj të ri kundër separatizmit, me Presidentin Emmanuel Macron që pritet të mbajë një fjalim të rëndësishëm mbi këtë temë javën e ardhshme. Detajet janë ende të paqarta, por pritshmëritë janë tashmë të mëdha dhe kanë shkaktuar shqetësim në komunitetin mysliman të Francës, më i madhi në Evropën perëndimore.
Në Francë këtë muaj është kthyer vëmendja në të ashtuquajturin gjyqi “Charlie Hebdo” kundër bashkëpunëtorëve të dyshuar të ekstremistëve islamikë që sulmuan një gazetë satirike franceze dhe një supermarket hebre në vitin 2015.
Ky ishte i pari i një numri sulmesh terroriste, së bashku me kryengritjen islamike në Lindjen e Mesme dhe gjetkë që çoi në përqëndrimin e vëmendjes së publikut francez tek islami radikal. Ky është pjesërisht sfondi i legjislacionit të pritshëm mbi të ashtuquajturin separatizëm.
Detajet nuk janë të qarta, por njoftimet sugjerojnë se ligji do të godasë imamët e huaj dhe financimin e huaj të shkollave private dhe do të rrisë mbikëqyrjen e grupeve të dyshuara.
Qeveria thotë se qëllimi i legjislacionit është luftimi i të ashtuquajturve “armiq të Francës”, vlerave franceze dhe mënyrës franceze të jetës. Zyrtarët thonë se në mesin e këtyre armiqve janë edhe grupet si supremacistët e bardhë.
Alexandre Del Valle e mirëpret legjislacionin. Ai është bashkëautor i një libri rreth pretendimit se Vëllazëria Myslimane synon të infiltrojë dhe pushtojë perëndimin.
“Unë mendoj se së pari është e nevojshme që të ndalojmë çdo organizatë që rrezikon vlerat tona perëndimore, franceze, republikane dhe laike. Vëllazëria Myslimane është në mesin e organizatave radikale islamike më fanatike.”
Zyrtarët qeveritarë thonë se ligji nuk synon të vendos në shënjestër myslimanët e moderuar.
Një sondazh i fundit i organizatës “Odoxa” tregon se shumica e të anketuarve francezë mbështesin projekt-ligjin për separatizmin. Por disa udhëheqës dhe grupe myslimane janë të shqetësuar se ligji do të drejtohet padrejtësisht kundër tyre.
“Dhuna nuk i përket një komuniteti të caktuar. Terrorizmi nuk është problem i një komuniteti të vetëm. Nuk është e drejtë të stigmatizohet një komunitet i tërë sepse një anëtar i tij ka kryer sulme terroriste”, thotë Jawad Bachar, drejtor i organizatës “Kolektivi Kundër Islamofobisë në Francë”.
Organizatat si ajo që drejtohet nga Jawad Bachar citojnë një rritje të veprimeve anti-myslimane dhe shtim të mungesës së tolerancës ndaj tyre në vitet e fundit.
Disa vëzhgues thonë se politika qëndron prapa projektligjit të separatizmit, duke pretenduar se presidenti Macron dhe partia e tij e qendrës “Në Lëvizje” po anojnë nga e djathta përpara zgjedhjeve të vitit 2022.
Ndërkohë, partia kryesore e opozitës në Francë, Tubimi Kombëtar, një parti e ekstremit të djathtë, thotë se zoti Macron është shumë i butë ndaj ekstremizmit dhe po bën thirrje për t’i dhënë fund çdo sistemi që inkurajon komunitetet etnike të funksionojnë jashtë linjës kryesore të shoqërisë.
“Ajo që duam është një luftë pa mëshirë kundër ‘komunitarizmit ’dhe separatizmit. Por kjo nënkupton trajtimin e politikës në rrënjë, ndryshimin e politikës së imigracionit, mbylljen e xhamive salafiste, ndalimin e financimit për shoqatat e të dyshuarve. Ekzistojnë një numër mjetesh që deri më tani nuk janë përdorur”, tha Sebastien Chenu, zëdhënës i Tubimit Kombëtar.
Ekziston shumë pritshmëri dhe frikë rreth asaj se çfarë nënkupton luftimi i seperatizmit, veçanërisht për komunitetin mysliman të Francës.
Në Francë kanë filluar hetime ndaj gazetave që publikuan përmbajtjen e bisedës telefonike mes presidentit të Rusisë, Vladimir Putin dhe presidentit francez, Emmanuel Macron, transmeton Anadolu Agency (AA).
Një gazetar në pjesën “pyetje-përgjigje” që ndodhet në faqen e Ministrisë së Jashtme franceze ka pyetur ministrinë lidhur me publikimin nga gazetat franceze të detajeve për bisedën mes presidentëve Putin dhe Macron lidhur me pretendimet e helmimit të opozitarit rus, Alexei Navalny.
Në përgjigjen me shkrim nga ministria thuhet se “Është e papranueshme rrjedhja e dokumenteve sekrete që u përkasin çështjeve të brendshme. Për këtë arsye distancohemi për të dhënë komente. Hetimi lidhur me çështjen vazhdon. Presidenti ynë (Macron) synon dhe do të vazhdojë që të zgjidhë me dialog dhe çiltërsi të gjitha çështjet lidhur me Rusinë dhe kryesisht për çështjet që ndikojnë ndaj sigurisë tonë”.
Ndërkohë shtypi rus ka shkruar se hetimi ka filluar për gazetën “Le Monde”.
Putin dhe Macron zhvilluan një bisedë telefonike më 14 shtator. Gazeta “Le Monde” në artikullin e saj lidhur me bisedën kishte pretenduar se Putin ka vënë theksin se duhet përqendrim mbi skenarin se Letonia ku jetojnë ata që kanë zhvilluar substancën “Noviçok” është e përfshirë në çështjen e Navalny-t.
Pretendimi për helmimin e Navalny-t
Gjendja shëndetësore e Navalny-t u përkeqësua më 20 gusht gjatë një fluturimi nga qyteti siberian Tomsk për në Moskë. Avioni më pas bëri ulje emergjente në Omsk. Pasi Navalny u dërgua me urgjencë në një spital, u pretendua se ai ishte helmuar me një substancë të përzier në çajin e tij.
Rikujtohet se 44-vjeçari Navalny u transferua më 22 gusht nga Omsk në spitalin privat Charite në Berlin të Gjermanisë. Zëdhënësi i qeverisë gjermane, Steffen Seibert më 2 shtator njoftoi se përfundimisht kanë përcaktuar se Navalny është helmuar me një kimikat nga grupi i Noviçok që përdoret në luftën kundër sëmundjeve nervore.
Seibert, edhe më 14 shtator tha se helmimi i Navalny-t është konfirmuar edhe nga dy laboratorë të pavarur në Suedi dhe në Francë.
Spitali Charite më 7 shtator informoi se situata shëndetësore e Navalny-t është përmirësuar dhe se ka dalë nga koma. Ekipi i Navalny-t pretendon se kimikati i grupit të Noviçok është gjetur në një shishe në dhomën e hotelit ku Nanalny ka qëndruar më parë në qytetin Tomsk.
Më 23 shtator u njoftua se Alexei Navalny ka dalë nga spitali Charite në Berlin ku mori trajtimin mjekësor.
Alexander Lukashenko sot zyrtarisht është betuar për një mandat të shtatë si president i Bjellorusisë, pavarësisht polemikave të vazhdueshme mbi rezultatet e zgjedhjeve të muajit të kaluar, raporton Anadolu Agency (AA).
Ceremonia e betimit u zhvillua në Pallatin e Pavarësisë në kryeqytetin Minsk, tha zyra presidenciale e shtypit në një deklaratë.
Pasi Lukashenko bëri betimin, duke mbajtur dorën në Kushtetutën e vendit, Lidia Yermoshina, kryetarja e Komisionit Qendror të Zgjedhjeve të Bjellorusisë, i dha atij certifikatën presidenciale.
Pas ceremonisë, Lukashenko tha se bjellorusët jo vetëm që rizgjodhën presidentin e tyre, ata “mbrojtën jetën paqësore dhe sovranitetin në Bjellorusi”.
“Kjo është dita e fitores sonë të mrekullueshme”, tha ai.
Në mënyrë të pazakontë, ceremonia ishte një ngjarje modeste me vetëm disa qindra të ftuar, nuk u njoftua paraprakisht, me sa duket për arsye sigurie.
Ajo u zhvillua derisa demonstratat e opozitës kundër rezultateve të zgjedhjeve presidenciale të 9 gushtit vazhdojnë të trondisin vendin.
Protestat shpërthyen pasi Lukashenko, i cili ka shërbyer si president që nga viti 1994, u shpall fitues i zgjedhjeve. Kandidatët e opozitës, megjithatë, akuzuan administratën për manipulim të votave.
NATO dhe udhëheqësit evropianë e kanë nxitur Lukashenkon të fillojë dialog me opozitën dhe të respektojë të drejtat themelore të njeriut të qytetarëve të Bjellorusisë.
Presidenti turk Rexhep Tajip Erdogan dhe ai francez Emmanuel Macron thanë të martën se kishin zhvilluar bisedën e tyre të parë pas konfrontimit midis dy aleatëve të NATO-s lidhur me tensionet në rritje në Mesdheun Lindor.
Në një deklaratë pas telefonatës midis dy udhëheqësve, e para pas disa muajsh, presidenca turke tha se zoti Erdogan theksoi nevojën e përdorimit të mundësive diplomatike për shtensionimin e gjendjes dhe zhvillimin e negociatave të qëndrueshme.
Ministria e jashtme franceze tha pas telefonatës që zgjati mbi një orë, se shpresonte që dialogu midis Turqisë dhe Greqisë do të mund të vazhdojë. Ajo tha se Presidenti Macron kishte bërë thirrje për një qasje të ngjashme me Qipron.
“Ai (Macron) i bëri thirrje Turqisë që të respektojë plotësisht sovranitetin e vendeve anëtare të Bashkimit Evropian si dhe të drejtën ndërkombëtare, dhe të përmbahet nga çdo veprim i mëtejshëm i njëanshëm që mund të provokojë tensione”, tha ministria e jashtme franceze, duke shtuar se Macron dhe Erdogan kishin rënë dakord të qëndronin në kontakt.
Marrëdhëniet midis Bashkimit Evropian dhe Turqisë janë tensionuar mjaft për një numër çështjesh, siç është kërkimi i hidrokarbureve në Mesdheun Lindor, ku Ankaraja ka mosmarrëveshje me vendet anëtare të BE-së, Qipron dhe Greqinë. zëri i amerikës
Prokurorët rumunë njoftuan zbulimin e rreth 200 librave antikë me një vlerë prej më shumë se 2,5 milionë euro, të grabitur në vitin 2017 në një depo në Britaninë e Madhe.
Botimet e para të Galileut dhe Isak Njutonit, një libër i Petrarkës, disa botime të rralla të Dante Aligierit apo dhe 80 skica të piktorit spanjoll Fransisko de Goja ishin vjedhur gjatë një grabitjeje spektakolare natën e 29-30 janarit 2017.
”Grabitësit kishin hyrë nga çatia në një depo në Feltham, pranë Londrës, pa u zbuluar nga detektorët”, theksuan prokurorët.
Ata kërkuan për disa orë mes mijëra librave që do të dërgoheshin në SHBA në pritje të një panairi ndërkombëtar të librit dhe dolën nga e njëjta rrugë.
Katër të dyshuar rumunë u arrestuan në qershor 2019 gjatë rreth 30 kontrolleve të shtëpive të kryera në Rumaninë Verilindore, ndërsa dhjetëra të tjerë, kombësitë e të cilëve nuk u bënë të ditura, u arrestuan në Britaninë e Madhe.
“Ky është një sukses i dyfishtë, pasi të dyshuarit u identifikuan dhe u arrestuan dhe thesaret u gjetën para se të hidheshin në shitje”, theksoi Eurojust.
Qytetarët e Italisë po votojnë sot një referendum për uljen e numrit të deputetëve të Parlamentit dhe senatorëve.
Këtë të diel dhe të hënë qytetarët italianë janë thirrur të votojnë për të ulur numrin e ligjvënësve në Parlament. Kjo do të thotë reduktim edhe në dhomën e deputetëve por edhe në senat.
Krahasuar me shtetet e tjera evropiane, Italia është vendi me numrin më të lartë të deputetëve të zgjedhur për numër popullsie. Synohet që numri ligjvënësve të reduktohet nga 945 në 600.
Ky ka qenë një propozim i kërkuar me këmbëngulje nga lëvizja “5 Yjet”.
“Përafrimi me standardet e vendeve të tjera evropiane do të thotë rritje e efikasitetit. Deri më tani, parlamenti është përdorur si një parking për të dashuruarit dhe miqtë e politikanëve të caktuar.
Është e qartë se nëse numri i deputetëve zvogëlohet, partitë do të duhet të bëjnë një përzgjedhje bazuar në cilësi”, është shprehur Michele Sodano, deputet i lëvizjes “5 Yjet”.
Por për disa kjo mund të nënkuptojë më pak përfaqësim sidomos për minoritetet.
“Ne duhet të përqendrohemi në vendosjen e njerëzve kompetentë në parlament, njerëz që vërtet dëshirojnë të na përfaqësojnë dhe të bëjnë ligje që përfshijnë sanksione për ata që nuk shkojnë, për t’u siguruar që partitë të ndjekin rregullat”, thotë Jasmine Cristallo, koordinatore e lëvizjes “Sardines”.
Reforma është aprovuar në parlament tetorin e shkuar pasi ishte një nga parakushtet e M5S për të formuar qeverinë e koalicionit me Partinë Demokratike.
Analistët shprehen se kjo është një përpjekje për t’iu përgjigjur politikës jo të mirë ndër dekada dhe skandaleve.
“Ajo ka për qëllim të ndëshkojë politikanët. Kjo do të thotë që kjo është një reformë anti-politike ose populiste dhe kjo është arsyeja kryesore pse është kaq e diskutueshme, përtej kuptimit të saj të vërtetë”, shpjegon drejtuesi i shkollës Luiss.
Kjo reformë kushtetuese zbulon krizën e thellë me të cilën po përballet demokracia përfaqësuese në Itali për momentin.
Sipas kritikëve, ajo lë shumë çështje të pazgjidhura siç janë nevoja për një ligj të ri zgjedhor dhe një reformë më të gjerë të funksionimit të parlamentit pas ndryshimit të numrave.
Gjermania planifikon të ofrojë strehim për 1 500 emigrantë që aktualisht janë në ishujt grekë, kanë thënë disa burime qeveritare për agjencinë e lajmeve AFP, ndërkohë që çështja e ndjeshme e migrantëve është përfshirë sërish në agjendën politike të Bashkimit Evropian, pasi një zjarr ka shkatërruar një kamp të stërngarkuar të migrantëve në ishullin grek Lesbos.
Rreth 12 000 ish-banorë të kampit Moria në Greqi janë duke jetuar aktualisht në ndërtesa të braktisura, apo rrugë, pasi kampi është shkatërruar më 8 shtator.
Teksa rritet presioni ndaj bllokut evropian për ta bërë punën e tij, Berlini veçse i është bashkuar iniciativës evropiane për të strehuar 400 fëmijë të pashoqëruar të këtij kampi. rel
Mirëpo përveç 150 fëmijëve tjerë, Gjermania po ashtu planifikon të mirëpresë familjet me fëmijë që tashmë kanë siguruar statusin e refugjatit dhe mund të mos jenë nga kampi Moria, është cituar një plan i miratuar nga kancelarja gjermane, Angela Merkel dhe ministri i Brendshëm gjerman, Horst Seehofer.
Ky plan është thënë të jetë krijuar pasi qytetet gjermane i kanë bërë thirrje Berlinit që të bëjë më shumë.
Qeveria e Merkelit ka insistuar se duhet të gjendet një zgjidhje evropiane për këtë çështje në vend të individualitetit.
Shefi i Këshillit Evropian, Charles Michel, ka thënë në Athinë, teksa ka takuar kryeministrin Kyriakos Mitsotakis, se BE-ja duhet të ofrojë “përgjigje të fuqishme dhe efikase” për problemin e emigrimit.
Greqia është duke rritur përpjekjet për të krijuar strehim të përkohshëm, ndërkohë që banorët lokalë janë duke u përgatitur për mbajtje të protestave kundër emigrimit.
Të martën, ministria greke për Migrim ka thënë se rreth 800 banorë të kampit Moria janë strehuar në vendbanime të përkohshme në Lesbos.
Prej tyre, 21 kanë rezultuar pozitivë në testet për koronavirus, ka thënë kjo ministri. rel
Bashkimi Evropian (BE) ka arritur marrëveshje për blerjen e 200 milionë dozave të vaksinës potenciale të zhvilluar nga kompania farmaceutike BioNTech-Pfizer kundër koronavirusit të ri (COVID-19), transmeton Anadolu Agency (AA).
Komisioni Evropian njoftoi se kanë përfunduar bisedimet eksploruese për blerjen e vaksinës kundër COVID-19 të zhvilluar nga kompania farmaceutike amerikane Pfizer dhe kompania bioteknologjike gjermane BioNTech.
Pasi vaksina e zhvilluar të provojë se është e sigurtë dhe efektive kundër COVID-19 në emër të vendeve anëtare të BE-së do të blihen 200 milionë doza. Në marrëveshjen që do të bëhet do të përfshihet edhe alternativa për blerjen e 100 milionë dozave shtesë.
BE-ja deri më tani ka përfunduar bisedime të ngjashme për blerjen e vaksinës edhe me kompanitë Sanofi-GSK, Johnson & Johnson, CureVac, Moderna thuhet në deklaratën në të cilën vihet theksi se kompaninë AstraZeneca është nënshkruar marrëveshje.
Autoritetet kufitare të Bjellorusisë thanë se Maria Kolesnikova, një ndër anëtaret kryesore të opozitës, u arrestua të martën në mëngjes kur do të kalonte për në Ukrainën fqinje.
Zyrtarët thanë se zonja Kolesnikova po udhëtonte me dy anëtarë të tjerë të opozitës, Anton Rodnenkov dhe Ivan Kravtsov, të cilët përfundimisht hynë në Ukrainë.
Rrethanat se si grupi i opozitarëve u ndodh në kufi nuk janë ende të qarta.
Agjencia e lajmeve Interfax për Ukrainën tha se veprimtarja kishte grisur qëllimisht pasaportën në mënyrë që zyrtarët ukrainas të kufirit të mos ishin në gjendje ta lejonin të kalonte.
Zëvendës Ministri i Brendshëm i Ukrainës Anton Gerashchenko tha se zonja Kolesnikova, e cila ishte zhdukur gjatë 24 orëve të mëparshme, kishte penguar me sukses “një dëbim me forcë nga vendi i saj”.
Menjëherë pas incidentit, Presidenti i Bjellorusisë, Aleksandër Lukashenko u tha gazetarëve rusë se ai nuk do ta përjashtonte mbajtjen e zgjedhjeve të reja pas katër javë protestash të mëdha, por refuzoi çdo bisedim me kundërshtarët, që ai tha se po e çonin vendin drejt katastrofës.
Fati i zonjës Kolesnikova, një figurë kryesore gjatë protestave, kishte mbetur mister që kur mbështetësit e saj thanë se ajo ishte rrëmbyer në rrugë nga njerëz të maskuar në kryeqytetin Minsk të hënën.
“Maria Kolesnikova bëri një veprim të guximshëm që nuk lejoi shërbimet speciale bjelloruse ta dëbonin atë për në territorin e Ukrainës,” tha zoti Gerashchenko për agjencinë Reuters. “Të gjithë përgjegjësinë për jetën dhe shëndetin e saj e mban Aleksandër Lukashenko, diktatori i Bjellorusisë,” tha ai.
Vendndodhja e zonjës Kolesnikova është e paqartë.
Dy figura të tjera të opozitës që rezultonin të zhdukur në të njëjtën kohë me të, Anton Rodnenkov dhe Ivan Kravtsov, megjithatë hynë në Ukrainë në orët e para të mëngjesit të së martës, tha shërbimi kufitar ukrainas.
Dje, Gjermania dhe Britania bënë thirrje që Presidenti Lukashenko të tregonte vendndodhjen e zonjës Kolesnikova, pas njoftimeve se ajo ishte rrëmbyer nga njerëz të paidentifikuar në kryeqytetin Minsk.
Zonja Kolesnikova ishte e fundit nga tre gratë opozitare të mbetura në Bjellorusi, që u bashkuan në këshillin koordinues të opozitës, në përpjekje për të mposhtur Presidentin Lukashenko në zgjedhjet e 9 gushtit.
Ai u shpall fitues, por partitë e opozitës, së bashku me Shtetet e Bashkuara dhe Bashkimin Evropian, thanë se zgjedhjet ishin të manipuluara. zëri i amerikës
Zyrtarja opozitare, Maryya Kalesnikava, e cila raportohet të jetë arrestuar, flet para protestave në Minsk, më 17 gusht, 2020
Zyrtarët dhe dëshmitarët okularë thonë se një organizatore kryesore e protestave të opozitës u arrestua në kufirin me Ukrainën herët më 8 shtator, derisa thirrjet ndërkombëtare janë shtuar ndaj Minskut për të dhënë përgjigje mbi rrëmbimin e saj të dyshuar dhe zhdukjet e tjera të kritikëve të presidentit, Alyaksandr Lukashenka.
Maryya Kalesnikava thuhet se arriti në pikën e kontrollit kufitar Alyaksandrauka rreth orës 5:00 në një makinë me dy organizatorë të tjerë të opozitës, – që u zhdukën një ditë më parë – me sekretarin e shtypit të Këshillin Koordinues, Anton Randyonkau dhe sekretarin ekzekutiv, Ivan Krautsouat.
Të tre janë figurat kryesore në Këshillin Koordinues që ka bërë presion për një tranzicion paqësor të pushtetit, që kur zyrtarët e zgjedhjeve shpallën presidentin Alyaksandr Lukashenka fitues të zgjedhjeve presidenciale të mbajtura më 9 gusht.
Opozita thotë se zgjedhjet ishin të manipuluara, dhe që nga përfundimi i tyre më 9 gusht, ka organizuar protesta, të cilat në shumë raste janë shtypur nga ana e autoriteteve të sigurisë.
Më parë, përfaqësuesi i Komitetit Shtetëror të Kufijve, Anton Bychkouski, deklaroi se që të tre ishin larguar nga vendi.
Por, televizioni shtetëror bjellorus më vonë citoi Bychkouskin duke thënë se Kalesnikava, një zyrtare kryesore e Këshillit të Koordinimit, u arrestua duke u përpjekur të kalonte kufirin ndërsa dy të tjerët kishin hyrë në Ukrainë.
Shërbimi Shtetëror i Kufirit i Ukrainës më vonë konfirmoi se Kalesnikava nuk ka hyrë në vend.
Një dëshmitar okular raportoi se kishte parë Kalesnikavan duke u rrëmbyer nga disa burra të paidentifikuar në qendër të qytetit Minsk, më 7 shtator. Më pas u raportua se kontakti ishte humbur menjëherë me dy zyrtarët tjerë të opozitës, Randyonkau dhe Krautsou.
Zhdukjet e tyre nxitën akuza nga Bashkimi Evropian se regjimi i bjellorus ishte duke përdorur rrëmbimet dhe frikësimet për të shuar protestat që po organizohen kundër presidentit Lukashenka.
Gjermania, e cila aktualisht mban presidencën e radhës së BE-së, ka kërkuar informacion për të zhdukurit dhe lirimin e të burgosurve politikë.
“Ne kërkojmë informacione për vendndodhjet dhe lirimin e të gjithë të burgosurve politikë në Bjellorusi”, tha ministri i Jashtëm gjerman, Heiko Maas për Bild.
Deri më tani, mijëra njerëz janë arrestuar, përfshirë gazetarë.
Anëtarët e Këshillit Koordinues dhe organi i tij vendimmarrës janë thirrur nga policia dhe në disa raste janë dënuar me burg.
Kandidatja e opozitës në zgjedhjet e muajit të kaluar ishte Svyatlana Tsikhanouskaya, e cila iku në Lituani disa ditë pas votimit.
Më 8 shtator, Tsikhanouskaya është planifikuar t’i drejtohet Komisionit të Asamblesë Parlamentare të Këshillit të Evropës (PACE) për Çështjet Politike dhe Demokracinë mbi situatën në Bjellorusi.
Ajo gjithashtu do të vizitojë Varshavën këtë javë për të zhvilluar takime me zyrtarë të lartë polakë.
Lukashenka, i cili ka shërbyer pesë mandate tashmë, ka refuzuar të mbajë bisedime me kundërshtarët e tij dhe ka hedhur poshtë thirrjet për të mbajtur zgjedhje të reja.
I dërguari i Bashkimit Evropian për dialogun Kosovë-Serbi, Mirosllav Lajçak pohoi se në dialogun e zhvilluar mes përfaqësuesve të këtyre dy shteteve në Bruksel, është arritur përparim i plotë në diskutimet rreth bashkëpunimit ekonomik dhe çështjes së personave të pagjetur dhe të zhvendosur.
“Është e rëndësishme që të dy liderët këtë mëngjes, teksa kanë ardhur nga takimet e Shtëpisë së Bardhë, kanë konfirmuar se janë të lidhur me prioritetet e integrimit në Bashkimit Evropian dhe në vazhdimin e punës për dialogun Beograd-Prishtinë, të ndërmjetësuar nga BE-ja”, tha Lajçak pas takimit. Sipas tij, në takimin e së hënës për herë të parë është diskutuar edhe për marrëveshjen gjithëpërfshirëse, ligjërisht obliguese, çështjet e komuniteteve joshumicë, dhe pretendimeve të përbashkëta financiare e pronësore.
“Ky ka qenë këmbimi i parë që na ka lejuar neve të definojmë hapat e ardhshëm të diskutimeve tona. Takimi ynë i radhës do t’iu dedikohet këtyre temave”, ka deklaruar ai. Edhe kryeministri i Kosovës, Avdullah Hoti dhe presidenti i Serbisë, Aleksandar Vuçiç kanë konfirmuar të hënën në Bruksel se kanë përafruar qëndrimet e tyre për çështjen e të zhvendosurve dhe të zhdukurve si dhe bashkëpunimin ekonomik. bw
Në Bjellorusi, persona të maskuar të paidentifikuar ndaluan të hënën në qendër të Minskut udhëheqësen e njohur të protestave Maria Kolesnikova dhe e morën atë me një furgon, sipas një dëshmitari të cituar nga media bjelloruse Tut.By.
Zonja Kolesnikova, anëtare e këshillit koordinues të opozitës, është e fundit nga tre politikanet gra të mbetura në Bjellorusi, të cilat bashkuan forcat para zgjedhjeve presidenciale të 9 gushtit për të sfiduar Presidentin Alexander Lukashenko.
Maria Kolesnikova
Si kritike e zëshme e zotit Lukashenko, ajo ka luajtur rol të rëndësishëm në demonstratat dhe grevat e mëdha që kanë vazhduar prej javësh, në të cilat protestuesit akuzojnë zotin Lukashenko për manipulimin e rizgjedhjes së tij.
Ai mohon se ka patur manipulime dhe ka akuzuar fuqitë e huaja se janë përpjekur ta rrëzojnë me revolucion.
Zoti Lukashenko ka mbështetjen e Presidentit rus Vladimir Putin, i cili ka premtuar të dërgojë policinë për ta mbështetur nëse është e nevojshme.
Rrëmbimi i zonjës Kolesnikova, nëse konfirmohet, vjen ndërkohë që autoritetet bjelloruse duket se po i shtojnë përpjekjet për ndalimin e protestave dhe për të penguar punën e këshillit koordinues që ata e kanë akuzuar se ka komplotuar për rrëzimin e Lukashenkos. zëri i amerikës
Përfaqësuesi i lartë i Bashkimit Evropian për Politikë të Jashtme dhe Siguri, Josep Borrell ka paralajmëruar se sot (7 shtator) në dialogun mes Kosovës dhe Serbisë, do të hapen dy çështje që ai i ka quajtur “të ndjeshme” por “shumë të rëndësishme, më saktësisht çështjet e kërkesave pronësore e financiare si dhe aranzhimet për komunitetet joshumicë në Kosovë”.
Borrell tashmë është duke zhvilluar takime me kryeministrin e Kosovës, Avdullah Hoti dhe presidentin e Serbisë, Aleksandar Vuçiq. Takimet bilaterale do të pasohen me një takim të përbashkët.
“Bisedimet nuk janë gjithmonë të lehta. Prandaj unë jam i lumtur të shoh përkushtim dhe respekt nga të dyja palët. Mirëpres faktin se ata e konfirmuan këtë së bashku në deklaratën e përbashkët ku u shprehen se e kanë si prioritet të lartë integrimin në BE dhe vazhdimin e punës në dialogun e lehtësuar nga BE-ja”, tha Borrell.
Borrell po ashtu tha se “është e natyrshme që qëndrimet të jenë të ndryshme, por se ata kanë ardhur këtu për të gjetur gjërat e përbashkëta dhe të punojnë drejt normalizimit gjithëpërfshirës të raporteve të tyre, duke u përballur më të gjitha çështjet e hapura”.
Sipas tij, në këtë takim do të bisedohen për aranzhimet për komunitetet joshumicë dhe zgjidhjen e kërkesave të ndërsjella financiare dhe pronësore.
“Të dyja këto tema janë shumë të ndjeshme dhe shumë të rëndësishme për raportet e ardhshme mes Kosovës dhe Serbisë dhe për jetën e përditshme të njerëzve”, ka thënë Borrell.
Kryeministri i Kosovës, Avdullah Hoti, dhe presidenti i Serbisë, Aleksandar Vuçiq, janë zotuan se do t’i japin prioritet më të lartë integrimit në Bashkimin Evropian dhe vazhdimit të punës në dialogun për normalizimin e marrëdhënieve, të ndërmjetësuar nga BE-ja.
Ata e bënë këtë zotim te përfaqësuesi i lartë i BE-së, Josep Borrell, thuhet në një komunikatë të lëshuar nga BE-ja.
Takimi i 7 shtatorit në Bruksel vjen pasi më 4 shtator, Kosova dhe Serbia, në Shtëpinë e Bardhë arritën marrëveshje për normalizimin ekonomik. Marrëveshja, u nënshkrua në prani të presidentit të Shteteve të Bashkuara, Donald Trump.
Ndërmjetësues të marrëveshjes për normalizim ekonomik ishin këshilltari për Siguri kombëtare i Shtëpisë së Bardhë, Robert O’Brien dhe i dërguari i presidentit Trump për dialgoun Kosovë-Serbi, Richard Grenell.
Me këtë marrëveshje, Kosova është pajtuar që brenda një viti të mos kërkojë anëtarësim në organizata ndërkombëtare, kurse Serbia në anën tjetër, është pajtuar që brenda një viti të ndalë fushatën për çnjohjen e pavarësisë së Kosovës.
Para takimit të sotëm në Bruksel, kryeministri i Kosovës, Avdullah Hoti, dhe presidenti i Serbisë, Aleksandar Vuçiq, janë takuar me përfaqësuesin e posaçëm të BE-së për dialog, Mirosllav Lajçak, dhe të dërguarin e posaçëm amerikan për çështje të Ballkanit, Matthew Palmer.
Këto takime, në të cilat kanë marrë pjesë dy diplomatë të lartë nga BE-ja dhe nga Departamenti amerikan i Shtetit, konsiderohen si dëshmi për një angazhim më të madh të SHBA-së në dialogun e Brukselit, por edhe si mbështetje për rolin udhëheqës të BE-së, si lehtësuese e dialogut në aspektin politik dhe në kërkim të marrëveshjes gjithpërfshirëse për normalizimin e raporteve Kosovë-Serbi.
