Presidenti Volodymyr Zelensky tha se ka emëruar Oleksandr Syrskiy në postin e komandantit të përgjithshëm të Ushtrisë së Ukrainës. Këtë njoftim Zelensky e bëri disa minuta pasi njoftoi se ishte koha për një “udhëheqje të ripërtërirë” të Forcave të Armatosura të shtetit.

Zelensky u takua me ish-komandantin e përgjithshëm, gjeneralin Valeriy Zaluzhniy, më herët gjatë 8 shkurtit dhe tha se i ka kërkuar që të qëndrojë “në ekipin e tij”, edhe pse nuk specifikoi se në çfarë kapaciteti.

Për javë të tëra ka pasur spekulime se Zelensky po e shqyrtonte mundësinë e largimit të Zaluzniyit, për shkak të dallimeve që kishin në strategji në kohën kur Ukraina po vazhdon luftën kundër forcave pushtuese ruse.

Tensionet mes presidentit Zelensky dhe gjeneralit Zalunzhniy u vunë re në nëntorin e vitit të kaluar, pasi gjenerali kishte publikuar një ediorial në The Economist, ku deklaroi se lufta kishte hyrë në një ngërç dhe se vetëm përparimi teknologjik do t’i mundësonte Ukrainës që të përmbushë qëllimin e saj për të çliruar territoret e pushtuara.

Pas publikimit të editorialit, Zyra e Zelenskyt menjëherë kishte hedhur poshtë vlerësimet e gjeneralit lidhur me situatën në fushëbetejë.

Ndërrimi i udhëheqësit të ushtrisë ukrainase u bë teksa pushtimi i paprovokuar rus i Ukrainës është afër dyvjetorit të nisjes së tij.rel

Parlamenti Evropian, përmes një rezolute të veçantë, pritet të kërkojë hetime të pavarura ndërkombëtare për parregullsitë që janë raportuar gjatë zgjedhjeve në Serbi. Për këtë rezolutë pritet të votohet të enjten, më 8 shkurt, gjatë një seance plenare të PE-së në Strasburg.

Në tekstin e draftit të rezolutës së dakorduar nga disa grupe politike në PE, për të cilin do të votohet, shprehet keqardhje për faktin se Serbia nuk ka siguruar zhvillimin e zgjedhjeve sipas standardeve dhe normave ndërkombëtare. Aty po ashtu shprehet keqardhje edhe për refuzimin nga autoritetet e Serbisë që të pranojnë se kanë ndodhur parregullsi në zgjedhje.

Serbia ka mbajtur zgjedhjet lokale, parlamentare dhe krahinore më 17 dhjetor 2023.

“Bëjmë thirrje për hetime të pavarura nga ekspertë dhe institucione të respektuara ndërkombëtare për parregullsitë në zgjedhjet parlamentare, krahinore dhe lokale, me kujdes të posaçëm në zgjedhjet për Asamblenë e qytetit të Beogradit”, thuhet në tekstin e draftit të rezolutës.

“I bëjmë thirrje Komisionit Evropian që të shqyrtojë dërgimin e një misioni ekspertësh në Serbi, për të vlerësuar situatën dhe zhvillimet pas zgjedhjeve të fundit dhe të bëjë përpjekje për të lehtësuar një dialog shoqëror, i cili do të çonte deri te kthimi i besimit në institucione”, theksohet në draft-rezolutën.

Sipas tekstit të kësaj rezolute të propozuar, PE-ja ka dënuar mungesën e pluralizmit politik gjatë procesit zgjedhor, favorizimin e partisë në pushtet, Partisë Progresive Serbe (SNS) nga ana e mediave gjatë fushatës, fushatat e shumta të dezinformimit, në të cilat, sipas përpiluesve të këtij teksti, pos mediave pro-qeveritare në Serbi ishin përfshirë edhe struktura të Rusisë. PE-ja po ashtu dënoi edhe kërcënimet ndaj organizatave joqeveritare dhe gazetarëve të pavarur.

Ndër parregullsitë në zgjedhje në Serbi Parlamenti Evropian përmendi votimin e shtetasve nga vendet tjera, posaçërisht nga Bosnja e Hercegovina për zgjedhjet lokale, sjelljen në mënyrë të organizuar të votuesve në vendvotime nga partia në pushtet, shlyerjen e votuesve nga regjistri në disa raste, joshja e paligjshme e votuesve dhe forma tjera të shkeljeve të parimeve të zgjedhjeve të lira.

Deputetët e Parlamentit Evropian janë të mendimit se një vend si Serbia, që është kandidat për anëtarësim në BE, duhet të respektojë standardet themelore demokratike.

Në draft-rezolutë po ashtu dënohet edhe përdorimi i tepruar i forcave policore në Serbi ndaj protestuesve gjatë protestave kundër parregullsive në zgjedhje.

Po ashtu deputetët e Parlamentit Evropian përmes rezolutës, dënojnë edhe sulmet verbale nga përfaqësuesit e pushtetit në Serbi ndaj vëzhguesve nga BE-ja si dhe pohimet se vende të BE-së ishin përfshira në organizimin e protestave pas zgjedhjeve. Po ashtu është dënuar edhe gjuhën kundër BE-së që është përhapur në Serbi nga mediat e afërta me partinë në pushtet. Në tekst përmendet se kryeministrja e Serbisë, Ana Bërnabiq, publikisht i ka falënderuar shërbimet e Rusisë për informata rreth protestave, të organizuara nga opozita në Serbi.

Parlamenti Evropian ka kërkuar nga Komisioni Evropian që të shqyrtojë edhe pezullimin e fondeve të BE-së për Serbinë nëse dëshmohet se autoritetet e Serbisë kanë qenë direkt të përfshira në manipulimin e rezultateve zgjedhore.

“Shprehim keqardhje për mungesën e kritikave të zëshme nga Komisioni Evropian, posaçërisht nga komisionari për zgjerim në një varg dyshimesh për mashtrime zgjedhore në Serbi dhe bëjmë ftesë që Komisioni të adresojë këto çështje që solli deri te dyshimet, pa vonesa”, u tha në tekst.

PE po ashtu kërkoi që edhe negociatat e anëtarësimit të Serbisë me BE-në të lidhen me reforma, përfshirë edhe me adresimin e problemeve me zgjedhjet. Pa këto, u tha në tekst, nuk do të duhej të vazhdojnë negociatat.

Partitë opozitare në Serbi kanë akuzuar Qeverinë për manipulimin e procesit zgjedhor dhe kanë organizuar protesta pas zgjedhjeve të 17 dhjetorit. Nga BE-ja është shprehur shqetësim për raportet rreth parregullsive. Por, më kritik, duke kërkuar edhe masa, ka qenë Parlamenti Evropian i cili edhe i kishte dërguar vëzhguesit në zgjedhjet e dhjetorit në Serbi. Në Parlamentin Evropian ishte zhvilluar edhe debate rreth këtyre zgjedhjeve dhe tash pritet të miratohet edhe rezoluta. Qeveria e Serbisë i ka hedhur poshtë kritikat e eurodeputetëve dhe ka bërë akuza personale ndaj deputetëve që kanë folur për parregullsi në zgjedhje.

Disa eurodeputetë i dërgojnë letër zyrtarëve të KE-së dhe BE-së, kërkojnë që të mos njihen rezultatet e zgjedhjeve në Serbi.

Anëtarët e Parlamentit Evropian nga Partia Popullore Evropiane (EPP), të Gjelbrit dhe Social Demokratët (S&D) i dërguan një letër Presidentit të Komisionit Evropian, Komisionerit për Zgjerimin dhe Përfaqësuesit të Lartë të BE-së për Politikat e Integrimit dhe Sigurisë, në të cilat ata kërkojnë një hetim ndërkombëtar të zgjedhjeve parlamentare, provinciale dhe lokale serbe që ishin nën kujdesin e OSBE-së, Këshillit të Evropës dhe Komisionit Evropian.

Letra gjithashtu kërkon që rezultatet e zgjedhjeve të mos njihen derisa të përfundojë një hetim i plotë i pavarur për parregullsitë zgjedhore. Deputetët kërkojnë një hetim me vëmendje të veçantë për zgjedhjet për Kuvendin e Qytetit të Beogradit, si dhe raportimin e tyre në Parlamentin Evropian.

“Ne mbetemi në mbështetje të qytetarëve të Serbisë që po protestojnë për mundësinë e tyre për të ushtruar të drejtat e tyre demokratike, si dhe për anëtarësimin e Serbisë në Bashkimin Evropian. Fatkeqësisht, akuzat e rënda lidhur me zgjedhjet e fundit nuk janë në përputhje me standardet demokratike dhe e cenojnë këtë qëllim”, thuhet në letrën e eurodeputetëve.

“Disa misione vëzhguese ndërkombëtare dhe vendore kanë arritur në përfundimin se zgjedhjet në Serbi nuk mund të konsiderohen të lira dhe të ndershme dhe kanë gjetur dëshmi për parregullsi dhe mashtrime të hapura zgjedhore. Misioni vëzhgues i KRRT-së ka shprehur shqetësim edhe për zgjedhjet lokale në qytetin e Beogradit”, thuhet në letër.

Në letër thuhet se disa nga gjetjet përfshijnë akuza për blerje votash, abuzim me burimet publike, nënshkrime të falsifikuara të mbështetjes në listat zgjedhore, ndikim joproporcional të qeverisë në media, manipulime serioze dhe të planifikuara mirë të listës së votuesve dhe migrim të votuesve, duke përfshirë edhe vendet fqinje, si dhe presionin ndaj përfituesve të ndihmës sociale dhe punonjësve të ndërmarrjeve shtetërore për të votuar për partinë në pushtet për të mbajtur vendet e punës dhe përfitimet e tyre.

Më 8 shkurt Parlamenti Evropian do të votojë për rezolutën për zgjedhjet serbe. Rezoluta u pasua me debate në seancën plenare në Strasburg, si dhe nga Komiteti i Punëve të Jashtme të PE (AFET).sn

Bashkimi Evropian i ka bërë thirrje Kosovës që të ofrojë periudhë të gjatë tranzicioni për largimin nga përdorimi të dinarit serb, pasi më 1 shkurt hyri në fuqi një rregullore që parasheh vetëm përdorimin e valutës euro për pagesa në Kosovë.

Qeveria e Kosovës tha se zbatimi i rregulores së Bankës Qendrore të Kosovës për me para të gatshme do të bëhet përmes një tranzicioni të lehtësuar, duke mos specifikuar një afat kohor për këtë tranzicion.

“Periudha e shkurtër kohore e tranzicionit për zbatimin e rregullores, së bashku me mungesën e informacionit dhe zgjidhjeve praktike për të gjitha komunitetet e prekura, rrezikon që të ndërlikojë seriozisht jetën e tyre”, tha BE-ja përmes një deklarate të lëshuar më 1 shkurt.

Blloku evropian po ashtu bëri thirrje që Kosova “të gjejë një zgjidhje të negociuar për këtë çështje në kuadër të dialogut të ndërmjetësuar” nga Brukseli.

Brukseli shprehu shqetësim për vendimin e BQK-së për pagesat vetëm me euro, pasi sipas bllokut, ky vendim, që pamundëson përdorimin e dinarëve serbë, mund të ketë pasoja në jetën e përditshme të serbëve në Kosovë.

Sipas BE-së, për këtë vendim, që hyn në fuqi më 1 shkurt, nuk ka pasur konsultime paraprake “veçmas për ndikimin që mund të ketë në spitale dhe shkolla, duke pasur parasysh “mungesën e alternativave në këtë moment”.

“BE-ja vë në pah se kjo rregullore do të ndikojë po ashtu në mbështetjen financiare që marrin serbët e Kosovës nga Serbia”, u tha në deklaratën e lëshuar nga BE-ja.

Paraprakisht, komuniteti ndërkombëtar, përfshirë edhe BE-në, i kishte bërë thirrje Kosovës që të shtyjë zbatimin e rregullores së BQK-së.

Qeveria e Kosovës ka deklaruar se rregullorja e BQK-së nuk nënkupton se do të ndalet trasferet e parave nga Serbia dhe po ashtu nuk nënkupton dënime financiare për posedimin e valutave të shteteve të tjera.

Megjithatë, nga 1 shkurti nuk do të lejohet importi i parave nëse institucionet që e bëjnë importin, nuk janë të licencuara nga BQK-ja.

Më 31 janar, zëvendëskryeministri i Kosovës, Besnik Bislimi, deklaroi se do të nisë një fushatë për informimin e qytetarëve për këtë rregullore, duke shtuar se shpreson që do të ketë bisedime mes bankave qendrore të Kosovës dhe Serbisë për gjetjen e një mekanizmi për transfer transparent të mjeteve.

Hyrja në fuqi e rregullores së BQK-së ka ngritur shqetësime te popullata serbe në Kosovë, e cila ka përdorur dinarin serb për të kryer pagesa. Me këtë valutë, pagën e kanë marrë edhe punonjësit në institucioneve serbe në Kosovë, por edhe me dinarë janë paguar edhe pensionet, sipas sistemit serb si dhe shtesat për fëmijë dhe ndihmat sociale.

Gjithashtu, në zonat ku banojnë serbët, dinarët janë përdorur në objektet tregtare, ndërkaq në katër komunat me shumicë serbe në veri, çmimet janë me dinarë.

Lista Serbe, partia kryesore e serbëve në Kosovë, paraprakisht e kishte thënë se vendimi i BQK-së rrezikon mbijetesën e serbëve në Kosovë.rel

Gjermania ka nevojë për punëtorë të kualifikuar nga jashtë dhe ministri i Punës sapo ka nënshkruar një marrëveshje në Vietnam. Por emigrantët e mundshëm kanë frikë se racizmi në Gjermani është në rritje.

Nga Deutsche Welle

Kur presidenti gjerman Frank-Walter Steinmeier dhe ministri i Punës Hubertus Heil u shfaqën në Universitetin Vietnamezo-Gjerman (VGU) në Ho Chi Minh City, ata u kapën në befasi: britmat e studentëve i përshëndetën si yje rocku. Disa prej tyre do të punojnë në kompani gjermane.

Personalitetet politike gjermane u vlerësuan gjithashtu në Institutin Goethe në Hanoi, ku rreth 6000 të rinj vietnamezë çdo vit mësojnë gjermanisht. Shtatë herë më shumë regjistrohen në provimet e gjuhës që i kualifikojnë për formim profesional ose studim në Gjermani.

Në fund të vitit 2023, Gjermania filloi zbatimin e ligjit të ri të imigracionit të kualifikuar, i cili përdor një sistem pikësh për të reduktuar pengesat, me të cilat përballen punëtorët e kualifikuar që duan të vijnë në Gjermani.

Që atëherë, politikanë të lartë gjermanë kanë shtuar përpjekjet e tyre për të tërhequr punëtorë të kualifikuar nga vende të tjera: ministrja e Jashtme Annalena Baerbock ishte kohët e fundit në Filipine, për shembull, dhe ministrja e Ndihmës për Zhvillim Svenja Schulze ndodhet në Marok. Në Vietnam, Steinmeier dhe Heil nënshkruan një memorandum mirëkuptimi që përmirëson rregullimin e imigracionit për motive punësimi në Gjermani.

Vietnami angazhohet për të ndihmuar

Në Vietnamin komunist ka interes të madh për të punuar në Gjermani, ku diaspora vietnameze është rritur në më shumë se 200.000 vetë. Vietnami është një vend i ri nga pikëpamja demografike, kështu që është më pak i kërcënuar nga “ikja e trurit” që prek shumë kombe të tjera. Udhëheqësit vietnamezë ishin gjithashtu shumë të interesuar për arritjen e një marrëveshjeje të përbashkët për të përmirësuar kontrollin e emigrimit të fuqisë punëtore të shtetasve të tyre në Gjermani.

Instituti Goethe luan një rol të rëndësishëm në këtë drejtim. Pikërisht atje, për shembull, 22-vjeçarja Phuong Phan merr trajnimin gjuhësor që i nevojitet për të punuar më vonë në industrinë e hotelerisë dhe gastronomisë në Turingi. Ky land i Gjermanisë Lindore është një nga të parët që ka nënshkruar kontrata dypalëshe me Vietnamin.

Phuong Phan thotë se shpreson se trajnimi në Turingi do t’i sigurojë “të mësuarit praktik” duke kontribuar në zhvillimin e saj personal. Prindërit e mbështesin dhe ajo kërkon çdo ditë në internet për informacione rreth “Gjermanisë simpatike”.

Megjithatë, kohët e fundit ajo ka hasur në diçka që nuk ishte aq e bukur: raporte që flasin me hollësi përksenofobinë që ndonjëherë ndeshet në Gjermani, veçanërisht në lindje. Ajo nuk dëshiron të flasë për këtë në bisedën me DW, por thotë se kjo temë është trajtuar edhe në kurset e saj të gjuhës.

“Po, ne po ndjekim zhvillimin e situatës. Dhe pak nga pak, ne kemi filluar të kemi rezerva, sepse mbajmë përgjegjësi për këta të rinj, përfshirë edhe ndaj prindërve të tyre,” thotë Nguyen Thi Thanh Tam, përgjegjës për vendosjen në Turingi.

Ai aktualisht është duke trajnuar një grup tjetër të rinjsh vietnamezë në Hanoi dhe konfirmon se tema e “racizmit në Gjermani” është trajtuar qartë në orët e fundit. “Ne duam që studentët të përgatiten për situata të pakëndshme në këtë drejtim në Gjermani”, thotë ai.

Foto e gjashtë personave në një tavolinë të mbuluar me ngjyrë të verdhë me lule dhe flamuj në sfond, dy burra që nënshkruajnë një letër.Foto e gjashtë personave në një tavolinë të mbuluar me ngjyrë të verdhë me lule dhe flamuj në sfond, dy burra që nënshkruajnë një letër.
Në nënshkrimin e marrëveshjes ishte i pranishëm edhe presidenti vietnamez Vo Van Thuong (i 3-ti nga dj.).Fotografi: Bernd von Jutrczenka/dpa/picture alliance
Nevojiten 400.000 punëtorë të kualifikuar në vit

Sipas Agjencisë Federale Gjermane të Punësimit (BA), Gjermania ka 1.73 milionë vende pune të lira. Ndryshe nga fushata gjermane për kërkimin e punëtorëve 60 vjet më parë, përpjekjet aktuale nuk janë të përqendruara te punëtorët e industrisë, por te profesionistë të kualifikuar dhe njerëz me përvojë në sektorin e shërbimeve.

Në atë kohë, në Gjermani vinin pak më pak se 300.000 vetë në vit. Sot studimet thonë se Gjermanisë i duhen rreth 400 mijë vetë në vit. Kohët e fundit, Ministri i Punës Heil udhëtoi në Brazil, Indi dhe Kenia për të propaganduar Gjermaninë si një destinacion pune dhe tani ndodhet në Vietnam. “Ne i kemi përmirësuar kushtet me Ligjin e Fuqisë punëtore të Kualifikuar; tani bëhet fjalë për vënien në praktikë të gjërave,” tha ai për DW në Hanoi.

Koordinim i dobët

Zyrtarisht, Ministria e Brendshme mbikëqyr imigrimin e punëtorëve të huaj të kualifikuar. Por në praktikë, përgjegjësitë në këtë fushë mbivendosen. Një shembull janë afro 350 mijë azilkërkuesit në Gjermani, të cilët, nëse refuzohen, nuk integrohen në tregun e punës dhe shumë prej tyre duhet të largohen nga vendi.

Më shumë se 17% e personave që aplikuan për azil në Gjermani në vitin 2023 tani janë turq, kryesisht të rinj të mirëarsimuar. Por vetëm një në 10 azilkërkues turq merr mbrojtje në Gjermani. Dhe, tani për tani, në vend që t’u japë të tjerëve mundësinë për të kërkuar punë, Gjermania i urdhëron ata të largohen nga vendi.

Nga ana tjetër, Ministria e Punëve të Jashtme njihet për procedurat e gjata të vizave, diçka që i pengon edhe punëtorët e kualifikuar. Përgjegjësi kanë edhe ministritë e Ekonomisë dhe Punës dhe Agjencia e Punësimit, përveç organizatave si agjencia zhvillimore GIZ dhe fondacione të ndryshme.

Shumë kompani kanë programet e tyre të rekrutimit dhe trajnimit, sepse burokracia  në sektorin publik është shumë e ngadaltë për të përmbushur nevojat e tyre për rekrutim. Toan Nguyen, drejtor menaxhues i Akademisë TY, e cila vepron si një agjenci për kujdestarët që duan të shkojnë në Gjermani, ankohet se ka “shumë njerëz për të kaluar dhe ende shumë pengesa që kualifikimet të njihen”.

Trafikimi i qenieve njerëzore, një problem tjetër

Kjo i bën gjërat të vështira për punëtorët e interesuar të kualifikuar dhe të lehta për agjencitë e dyshimta dhe trafikantët e qenieve njerëzore. Në Azinë Juglindore, femrat janë pre kryesore e këtyre të fundit, të cilat i futin kontrabandë në Gjermani dhe përfundojnë në punë me pagë të ulët apo edhe në shtëpi publike.

“Ne duhet të përdorim imigracionin e ligjshëm për të shtypur këtë praktikë”, deklaroi Steinmeier në Vietnam. Marrëveshja dypalëshe që sapo është nënshkruar synon të ofrojë këshilla të besueshme për kushte të drejta pune dhe agjenci punësimi të akredituara, si dhe tryeza të rregullta të rrumbullakëta për migracionin për motive punësimi në të cilat marrin pjesë specialistë nga të dy vendet.

Gjithashtu, ligji i ri gjerman për shtetësinë e bën vendin më tërheqës për emigrantët e mundshëm. “Krahasuar me Japoninë, ku emigrojnë shumë vietnamezë gjithashtu, por ku lejohen të punojnë vetëm përkohësisht, Gjermania tani ofron një perspektivë më afatgjatë,” thotë Viet Huong Nguyen i TY Academy.

Ksenofobia, një pengesë

Në dritën e këtyre zhvillimeve pozitive për migracionin për motive punësimi, informacionet aktuale për grupe raciste në Gjermani janë shqetësuese. Ministri i Punës Heil tha për DW se askush nuk kishte folur drejtpërdrejt me të për këtë çështje, por se duhen marrë masa para se të jetë tepër vonë. “Ne duhet ta bëjmë të qartë në Gjermani se ne nuk mund të ruajmë mirëqënien tonë pa fuqi punëtore nga jashtë,” tha ai.

Vietnamezët që tashmë jetojnë në Gjermani janë gjithashtu të shqetësuar. Një prej tyre është Huong Trute, të cilin Presidenti Steinmeier e ftoi ta shoqëronte në udhëtimin e tij në Vietnam. Ajo jeton prej 40 vitesh në Gjermani dhe punon në sektorin e gastronomisë. Ajo thotë se kohët e fundit i është dashur t’u përgjigjet gjithnjë e më shumë pyetjeve nga bashkatdhetarët e shqetësuar në Vietnam. Pasi pa një grup tjetër që po trajnohej në Institutin Goethe për të punuar në hotelet dhe restorantet e Tyringisë , ajo tha: “Sinqerisht? Po do të kisha mundësi t’i çoja këta të rinj diku tjetër, do ta bëja.” Ajo thotë se ngjarjet në Turingi po acarohen dhe kjo e frikëson.

Anëtarësimi i Kosovës në Këshillin e Europës ka bërë bashkë partitë politike. Një delegacion që udhëhiqet nga Kryetari i Kuvendit, Glauk Konjufca ndodhet në Strasburg të Francës për të lobuar për pranimin e Kosovës në institucionin e rëndësishëm për të drejtat e njeriut.

“Siç tregon raporti i juristëve të shquar, ‘rregullat ligjore janë në përgjithësi në përputhje me standardet ndërkombëtare, ose, siç është rasti me Kushtetutën, shkojnë përtej këtyre standardeve”, është shprehur Konjufca.

Në mes të takimeve kyçe që delegacioni ka marrë pjesë ishte dhe diskutimi në Komitetin e Çështjeve Politike dhe Demokracisë, ku Kryetari i kuvendit prezantoi rastin e Kosovës për anëtarësim.

Delegacioni, që përfshinte dhe deputetë të opozitës, është takuar edhe me Lulzim Bashën në Këshillin e Europës.sn

Kremlini ka akuzuar sërish Ukrainën për rrëzimin e një avioni ushtarak rus, që tha se po transportonte 65 ushtarë ukrainas të kapur gjatë luftës, të cilët më 24 janar po transportoheshin për këmbim. Presidenti ukrainas, Volodymyr Zelensky bëri thirrje për një hetim ndërkombëtar të këtij rasti.

Avioni u rrëzua në rajonin e Belgorodit pranë kufirit me Ukrainën.

Rrëzimin e aeroplanit transportues ushtarak, zëdhënësi i Kremlinit, Dmitry Peskov e quajti “akt monstruoz”, megjithëse Moska ende nuk ka treguar ndonjë provë se ai u rrëzua nga një raketë ukrainase apo që ushtarët ukrainas ishin në bord.

Derisa nuk tha se kush e rrëzoi avionin, Zelensky tha se “duhet të vërtetohen të gjitha faktet…shteti ynë do të insistojë në një hetim ndërkombëtar”.

Zyrtarët ukrainas kanë thënë se këmbimi i të burgosurve ishte planifikuar të bëhej më 24 janar dhe Rusia nuk e kishte informuar Ukrainën se të burgosurit ukrainas do të fluturonin me aeroplanë mallrash.

Drejtoria kryesore e inteligjencës së Ukrainës tha se nuk ka “informacion të besueshëm dhe gjithëpërfshirës” se kush ishte në bordin e avionit por tha se të burgosurit rusë për të cilët ishte përgjegjës “u dorëzuan në kohë në pikën e këmbimit të kushtëzuar, ku ata ishin të sigurt”.

Ekspertët e aviacionit i thanë Radios Evropa e Lirë se ishte e mundur që një raketë kundërajrore ukrainase të rrëzonte aeroplanin, por shtuan se ai mund të ketë qenë gjithashtu kundërajror rus.

“Gjatë hetimit, ju mund të përcaktoni lehtësisht se cili sistem rrëzoi aeroplanin bazuar në elementët dëmtues të raketave,” tha Roman Svitan, një kolonel rezervë i Forcave të Armatosura të Ukrainës dhe një pilot instruktor i aviacionit luftarak.

Kur u pyet për pretendimet ruse për dhjetëra të burgosur në bord, Svitan tha se nga pamjet e publikuara deri më tani, ai nuk ka parë asnjë provë për të mbështetur deklaratat.

“Nga pamjet që ishin aty, i shikova të gjitha, nuk është e qartë se ku ka dhjetëra trupa…Nuk shihet fare një trup i vetëm. Një kohë kam qenë hetues ushtarak, duke përfshirë edhe hetimin e fatkeqësive; më besoni, nëse do të kishte shtatëdhjetë apo tetëdhjetë njerëz atje, fusha do të ishte e shpërndarë me kufoma dhe mbetje trupash”, shtoi Svitan.

Rusia akuzoi Ukrainën se e rrëzoi qëllimisht avionin transportues ushtarak Ilyushin Il-76 duke thënë se radari rus regjistroi lëshimin e dy raketave nga rajoni i Harkivit i Ukrainës, i cili kufizohet me rajonin Belgorod.

Shtabi i Përgjithshëm i ushtrisë ukrainase tha në një deklaratë, që nuk përmendi rrëzimin, se ushtria ukrainase kishte vërejtur më shumë avionë transporti ushtarak rus që u ulën në Belgorod, dhe e ndërlidhi këtë me sulmet raketore ruse në Harkiv dhe qytete të tjera të Ukrainës.

“Me këtë në mendje, Forcat e Armatosura të Ukrainës do të vazhdojnë të marrin masa për të shkatërruar mjetet e shpërndarjes dhe të ushtrojnë kontrollin e hapësirës ajrore për të eliminuar kërcënimin terrorist, përfshirë në drejtimin Belgorod-Harkov”, thuhet në Telegram.

Një deklaratë e inteligjencës ushtarake ukrainase, në Facebook, tha se Kievit nuk i ishte kërkuar të garantonte sigurinë e hapësirës ajrore rreth zonës së Belgorodit, siç ishte rasti gjatë shkëmbimeve të mëparshme të të burgosurve të luftës.

Ai tha se akuzat e Rusisë se Kievi rrëzoi avionin e transportit mund të jetë “një veprim i planifikuar për të destabilizuar situatën në Ukrainë dhe për të dobësuar mbështetjen ndërkombëtare për shtetin tonë”.

Rusia bëri thirrje për një seancë urgjente të Këshillit të Sigurimit të OKB-së më 25 janar për të diskutuar rrëzimin e avionit, të cilin Ministri i Jashtëm rus Sergei Lavrov e quajti një akt “kriminal” nga Ukraina.

Zyrtarët rusë thanë se avioni mbante 65 ushtarë ukrainas, gjashtë anëtarë të ekuipazhit dhe tre shoqërues.

Radio Evropa e Lirë e ka siguruar një listë të gjashtë anëtarëve të ekuipazhit, që supozohej të ishin në fluturim. Vdekjen e tre anëtarëve të ekuipazhit e kanë konfirmuar për REL-in të afërmit e tyre.

Videoja në mediat sociale tregoi një aeroplan që rrotullohej në tokë, i ndjekur nga një zhurmë e fortë dhe një shpërthim që drejt qiellit dërgoi flakë dhe një top tymi.

Dhjetëra-mijëra vetë dolën në Gjermani në rrugë gjatë fundjavës për të protestuar kundër ekstremizmit të djathtë. Presidenti Steinmeier tha se ata mbrojnë republikën dhe kushtetutën kundër armiqve të saj.

Nga Deutsche Welle

Gjermania është përfshirë prej demonstratave masive gjatë së cilave në rrugët e qyteteve dolën rreth 1,4 milionë vetë për të protestuar kundër partisë ekstremiste të djathtë Alternativa për Gjermaninë (AfD) dhe agjendës së saj kundër emigracionit.

Të premten dhe në fundjavë në rreth 100 qytete në të gjithë vendin u zhvilluan demonstrata nën moton “Të mbrojmë demokracinë”. Të shtunën dhe të dielën u zhvilluan mitingje në disa nga qytetet e mëdha si Hamburg, Frankfurt, Këln, Dormund, Mynih dhe Berlin.

Pas demonstratave në Halle/Saale dhe asaj në Lajpcig, ku morën pjesë përkatësisht rreth 16.000 dhe 40.000 vetë, demonstrata u zhvilluan edhe në disa qytete në lindje të Gjermanisë, si në Cottbus, Dresden dhe Chemnitz.

Mbështetje nga politikanët

Presidenti gjerman, Frank-Walter Steinmeier, tha në një video-mesazh në lidhje me demonstratat: “Këta njerëz na inkurajojnë të gjithëve”. Ata mbrojnë “republikën dhe kushtetutën tonë kundër armiqve të saj”.

Ministrja e Brendshme, Nancy Faeser (SPD), tha për gazetën “Rheinische Post” se fakti “që qindra-mijëra vetë po dalin në demonstrata dhe po mbrojnë në mënyrë aktive demokracinë tonë është një shenjë shumë inkurajuese”.

Pse po protestojnë kaq shumë njerëz tani?

Vala e mobilizimit kundër partisë së ekstremit të djathtë AfD u ndez nga një shkrim i datës 10 janar publikuar nga grupi investigativ Correctiv, i cili zbuloi seanëtarët e AfD-së ishin takuarnë nëntor 2023  në Potsdam me një grup ekstremistësh për të diskutuar për dëbimin e emigrantëve dhe “qytetarëve të paasimiluar”. Të pranishëm kishin qenë edhe anëtarë të Unionit Kristian Demokrat (CDU), partia kryesore opozitare.

Pjesëmarrësit në takim kishin diskutuar për “riemigrimin”, një term që përdoret shpesh në qarqet ekstremiste të djathta si eufemizëm për dëbimin e emigrantëve dhe të pakicave, përfshirë ata që kanë marrë nënshtetësinë gjermane.

Lajmi për takimin tronditi shumë vetë në Gjermani në një kohë kur AfD-ja po ngjitet në sondazhetqë po zhvillohen në prag të tre zgjedhjeve të mëdha rajonale në Gjermaninë lindore, ku mbështetja për këtë parti është më e fortë. Kancelari Olaf Scholz, i cili iu bashkua një demonstrate fundjavën e kaluar, tha se çdo plan për të dëbuar emigrantë apo qytetarë ishte një “sulm kundër demokracisë sonë, dhe nga ana tjetër, ndaj të gjithë neve”.

AfD-ja e konfirmoi praninë e anëtarëve të saj në takim, por tha se propozimet e saj për emigracionin, të cilat ishin pjesë e manifestit të fundit zgjedhor, nuk përfshijnë shtetas që kanë marrë nënshtetësinë gjermane. Komente të tilla në takim ishin bërë nga një figurë e ekstremit të djathtë austriak, Martin Sellner, i cili nuk është anëtar i AfD-së.

Dhjetëra mijëra njerëz kanë ndalë të shtunën nëpër rrugët e Frankfurtit, për të protestuar kundër partisë së të djathtës ekstreme Alternativa për Gjermaninë (AfD).

Policia ka thënë se rreth 35.000 njerëz kanë marrë pjesë në protestë, nën sloganin “Mbrojeni Demokracinë”.

Protesta është mbajtur në qendër të Frankfurtit, i cili njihet si kryeqyteti financiar i Gjermanisë.

Një zëdhënës i Policisë e ka përshkruar atmosferën si paqësore.

Protesta si kjo e së shtunës, janë mbajtur edhe në disa qytete tjera, dhe ato e gëzojnë mbështetjen e kancelarit të shtetit, Olaf Scholz.

Po të shtunën është raportuar për një protestë të ngjashme edhe në Limburg, dhe që numri ka qenë më i madh sesa është pritur – 2.800.

Protestat janë nxitur nga një raport i platformës Correctiv, prej të cilit është bërë e ditur se politikanët e AfD-së kanë mbajtur një takim me ekstremistët e të djathtës ekstreme në Potsdam.

Pjesëtarë të partisë konservatore Unioni Demokristian, partisë më të madhe opozitare, kanë marrë pjesë, po ashtu, në takim.

Në takimin në Potsdam, ekstremistët e krahut të djathtë kanë diskutuar për temat si “riemigrimi”, termë që përdoret prej qarqeve të së djathtës ekstreme si eufemizëm për dëbim të migrantëve dhe minoriteteve.

Në një paraqitje të bërë të premten, Scholz e ka konsideruar riemigrimin si “sulm ndaj demokracisë sonë”.

Ai i ka mirëpritur protestat e planifikuara për fundjavë.

“E them shumë qartë, ekstremistët e krahut të djathtë janë duke e sulmuar demokracinë tonë”, ka thënë ai.

Dhjetëra mijëra njerëz pritet të marrin pjesë në protesta të ngjashme që do të mbahen në qytetet gjermane.rel

Ambasadori i Gjermanisë në Kosovë, Jorn Rohde, ka folur lidhur me sulmin terrorist ndaj Policisë së Kosovës më 24 shtator, duke thënë se Banjska ndryshoi gjithçka.

Rohde tha se ai vetë as nuk e ka imagjinuar se do të ndodhte diçka e tillë, ndërsa ka kërkuar që autorët të dalin para drejtësisë dhe të ndëshkohen, raporton Express.

“Banjska ndryshoi gjithçka. Ishte një sulm terrorist. Këta nuk ishin qytetarë të pakënaqur, por kishin raketahedhës, automatikë, granata… Jemi ende në kërkim të autorëve të dyshuar që duhet të dalin para drejtësisë. Vetë Milan Radoiçiç tha se është përgjegjës, por ende nuk ka përgjegjësi, nuk mund të pranojmë parimin e mosndëshkimit. Nëse kryen një krim, duhet të gjykohesh. Shpresojmë se Serbia është duke punuar në këtë”, ka deklaruar Rohde në një intervistë për Kosovo Online.

Ambasadori gjerman ka bërë me dije se Gjermania do ta shtojë praninë e saj në Kosovë me një kontigjent nga maji.

“Personalisht, nuk mund ta imagjinoja se do të ndodhte diçka e tillë, dhe për këtë arsye NATO e shtoi praninë e saj dhe Gjermania do të bëjë të njëjtën gjë me një kontingjent të ri nga maji. Ajo që duam është paqe dhe stabilitet. Sulmet si ky janë saktësisht e kundërta e kësaj. Nëse nuk dënohen autorët e sulmit në Banjskë, si mund të rritet besimi mes dy vendeve. Kjo ishte një punë e madhe dhe me të vërtetë autorët duhet të ndëshkohen”, ka deklaruar Rohde.

Në Parlamentin Evropian, të mërkurën është diskutuar mbi parregullsitë në zgjedhjet e përgjithshme dhe ato lokale në Serbi.

Eurodeputetët patën kritika të ashpra për vendin fqinj, duke kërkuar nga udhëheqësit e shtetit që t’i hetojnë gjetjet e monitoruesve ndërkombëtarë.

Pas votimeve nga Parlamenti Evropian, të enjten, presidentja e Komisionit Evropian, Ursula von der Leyen, ka marrë një letër të mbështetur nga 24 politikanë të lartë evropianë, duke i kërkuar asaj që të hetojë akuzat për parregullsi në zgjedhjet e fundit në Serbi, shkruan Klankosova.tv.

Në mesin e nënshkruesve të kësaj thirrjeje, siç ka raportuar “Politico”, që BE-ja të nisë një hetim për zgjedhjet në Serbi, ishte edhe Alicia Kearns, një deputete konservatore e Parlamentit Britanik dhe kryetare e Komitetit të Punëve të Jashtme të Parlamentit Britanik.

Në një bisedë për “Zërin e Amerikës”, shërbimi për Gjeorgjinë në Uashington, deputetja britanike ka thënë se “kolegët që vëzhguan zgjedhjet thanë se nuk kishin parë kurrë abuzime të tilla të tmerrshme të procesit zgjedhor”.

Kearns ishte edhe ndër nënshkrueset e apelit që parlamentarët evropianë dhe amerikanë i dërguan administratave në Uashington dhe Bruksel verën e kaluar, me të cilin kërkohej që të shtrëngojnë politikën ndaj Serbisë dhe ta zbusin atë ndaj Kosovës. Ajo gjithashtu akuzoi Beogradin për kontrabandë armësh në Kosovë përmes Kishës Ortodokse Serbe, të cilën KFOR-i më vonë e mohoi.

Kearns tani ka bërë thirrje përsëri për një ndryshim në politikën e ShBA-së dhe BE-së ndaj Beogradit dhe pretendon se “Serbia po qesh përballë Bashkimit Evropian”.

“Ata pretendojnë se po shkojnë drejt së ardhmes euroatlantike, por në fakt janë të lidhur me Rusinë, me Iranin, kanë zgjedhur aleatët e tyre. Ata aktualisht po i qeshin BE-së në fytyrë, po i marrë paratë e tyre dhe nuk po ecin përpara në çështjen e reformave. Duhet që qasja e BE-së dhe ShBA-së të jetë e drejtë dhe e balancuar. Qasja aktuale ndaj Kosovës është e padrejtë, e pabalancuar dhe e gabuar, dhe ata duhet të paralajmërojnë se Serbia do t’i bartë pasojat dhe t’i jepet fund këtij iluzioni që kanë – se Serbia po punon për një të ardhme euroatlantike”, tha deputetja britanike.

24 nënshkruesit e letrës, duke përfshirë Michael Roth, kryetar i Komitetit të Punëve të Jashtme të parlamentit gjerman dhe homologu i tij francez Jean-Louis Bourlanges, i kërkuan BE-së të hetojë në mënyrë të pavarur akuzat e mashtrimit dhe të bëjë rekomandime për të siguruar zgjedhje të lira dhe të drejta në Serbi, shkruan “Politico”, transmeton Klankosova.tv.

Nënshkruesit kryesojnë kryesisht komitetet e punëve të jashtme ose evropiane në parlamentet e tyre kombëtare dhe vijnë nga e gjithë BE-ja – duke përfshirë nga Franca, Italia, Danimarka dhe Luksemburgu – si dhe nga Ukraina, Moldavia dhe Britania e Madhe.

“Në varësi të gjetjeve të hetimit”, thonë ata, “mund të kërkohen zgjedhje të reja në Serbi”.

“Qëllimi ynë i përbashkët është ta shohim Serbinë si anëtare të Bashkimit Evropian brenda kësaj dekade”, shtojnë ata. Kërkesa për hetim vjen pasi von der Leyen po përgatit planet për një BE me më shumë se 30 anëtarë.

Blloku aktualisht ka 27 vende anëtare, por në dhjetor hapi negociatat e pranimit me Ukrainën dhe Moldavinë. Vende të tjera, si Kosova, Gjeorgjia dhe disa tjera të Ballkanit Perëndimor, janë në faza të ndryshme të procesit të anëtarësimit. /Klankosova.tv

Thirrja për autoritetet kompetente shtetërore të Serbisë që në mënyrë transparente të hetojnë të gjitha raportet e besueshme për parregullsi në zgjedhjet e dhjetorit u dëgjuan disa herë gjatë ditës së sotme nga foltorja e Parlamentit Evropian.

Ky i fundit ka diskutuar për zgjedhjet e fundit në shtetin serb, ku vëzhguesit ndërkombëtarë kanë hasur në parregullsi të shumta ndërsa kritika kishin edhe deputetët.
Më e zëshmja duket se ishte eurodeputetja gjermane, Viola von Cramon, e cila tha se kurrë nuk ishte përballur në karrierën e saj me zgjedhjet sikurse në shtetin serb.

“Që kur u bëra vëzhguese e zgjedhjeve 20 vjet më parë, nuk kam parë kurrë diçka të tillë. Le të jemi të qartë: këto zgjedhje janë të manipuluara. Janë të vjedhura. Opozita e bashkuar mund të kishte fituar në Beograd, nëse mijëra nuk do të ishin sjellë, riregjistruar ose nën presion për të votuar për SNS-in. Ne kërkojmë një hetim të paanshëm ndërkombëtar së bashku me OSBE-në siç ishte rasti në Serbi pas zgjedhjeve të vitit 1996. Është në interesin tonë të përbashkët të shohim një Serbi demokratike evropiane”, deklaroi ajo.

Ndërkohë, Komisioneri Evropian për Drejtësi, Didier Reynders tha se këto zgjedhje ishin shumë të rëndësishme dhe se ato u mbajtën nën vëzhgimin e bashkësisë ndërkombëtare.

Konkluzioni i raportit është se procesi zgjedhor duhet të reformohet, tha ai.

“Kur flasim për procesin zgjedhor të një shteti demokratik, ai duhet të përmirësohet për të folur për fillimin e negociatave me Bashkimin Evropian. Ne presim që të gjitha raportet e besueshme të parregullsive të trajtohen në mënyrë transparente nga forcat vendore të zbatimit të ligjit. Kjo përfshin pretendimet për parregullsi në zgjedhjet në Beograd dhe komunitete të tjera lokale. Këtu përfshihen rekomandimet për zgjedhjet e ardhshme dhe ne presim që Serbia t’i zbatojë ato rekomandime sa më shpejt të jetë e mundur”, tha eurodeputeti.

Ai theksoi rëndësinë e protestave paqësore, si dhe se dhuna nuk është zgjidhje dhe nuk është e pranueshme, duke shtuar se PE do të monitorojë nga afër protestat pas zgjedhjeve.

Ndryshe, partia në pushtet e Serbisë, SNS, e cila dikur udhëhiqej nga presidenti Aleksandar Vuçiq ka fituar zgjedhjet lokale, rajonale dhe parlamentare.

Megjithatë ato u kontestuan nga opozita serbe, e cila ka filluar sërish protestat pas një pushimi dyjavor shkaku i festave të fundvitit.

Parlamenti Evropian pritet të miratojë një rezolutë rreth zgjedhjeve në shtetin serb, e cili pritet të votohet në muajin shkurt.sn

Ushtria e Ukrainës tha të hënën se forcat e saj i kanë rrëzuar dy avionë spiunë rusë gjatë një “misioni të suksesshëm” mbi Detin e Azovit.

“Forcat ajrore të ushtrisë ukrainase i kanë shkatërruar një avion gjurmues A-50 të armikut dhe një post të komandimit ajror Il-22 të armikut”, tha komandanti i Përgjithshëm i ushtrisë ukrainase, gjenerali Valeriy Zaluzhniy, në Facebook.

Zëdhënësi i Kremlinit, Dmitry Peskov, tha se nuk kishte të dhëna për rrëzimin e dy avionëve ushtarakë rusë. Ministria e Mbrojtjes e Rusisë nuk ka komentuar rreth kësaj ngjarjeje.

Këta avionë janë mjete të rëndësishme për Rusinë, e cila i përdor për t’i orkestruar lëvizjet në fushëbetejat e luftës në Ukrainë.

Rrëzimi i tyre do të ishte arritje shumë e madhe për Ukrainën në luftën tashmë dyvjeçare, ku luftimet në vijën e frontit po zhvillohen kryesisht në llogore dhe me artileri.

A-50 është një avion paralajmërues dhe kontrollues me një radar të madh i cili është në gjendje t’i vërejë caqet herët dhe në një largësi prej 650 kilometrave.

Ai bart zakonisht një ekuipazh prej 15 vetave. Raportohet se Rusia vepron me nëntë avionë të tillë.

Il-22 është një post i komandës ajrore, i cili ka për qëllim t’i mbikëqyrë operacionet ushtarake dhe ritransmeton valë radiosh te trupat në vijën e frontit. Raportohet se forcat ajrore ruse kanë dhjetëra avionë të tillë.

Ukrainë është etur t’iu lënë mbresa mbështetësve të vet perëndimorë me aftësitë e saj për t’i përdorur armëve që ia kanë dhënë ata.

Ndërkohë, të hënën më herët, Kombet e Bashkuara u kërkuan donatorëve që gjatë këtij viti të japin 4.2 miliardë dollarë ndihmë humanitare për ukrainasit në shtetin e shkatërruar nga lufta dhe për ata që janë larguar nga shteti.

Mbi 14.6 milionë ukrainas brenda vendit, apo 40 për qind e popullsisë së përgjithshme, kanë nevojë për ndihmë humanitare gjatë këtij viti, tha zyra për Koordinim të Çështjeve Humanitare (OCHA).

Që nga nisja e këtij viti, Ukraina po përballet me një fushatë intensive të sulmeve ajrore ruse, duke vështirësuar edhe më shumë jetën e civilëve.rel

Deputeti i Bundestagut të Gjermanisë, Josip Juratoviç, thotë se Bashkimi Evropian duhet t’i rishikojë negociatat me Serbinë për anëtarësim, pas parregullsive që u raportuan në zgjedhjet e mbajtura në muajin e kaluar.

Juratoviç, mes tjerash theksoi se nuk mund ta tolerojnë më qasjen autokratike gjithnjë e më të fortë të presidentit serb, Aleksandar Vuçiç.

“Në politikën tonë të jashtme, ne nuk mund të zgjedhim gjithmonë partnerët me të cilët do të negociojmë. Por në këtë situatë, në të cilën drejtuesi i kampanjës shpërfill parregullsitë në zgjedhje dhe në këtë mënyrë shkel hapur rregullat demokratike, ne nuk mund ta tolerojmë më këtë dhe nuk jam i vetëm në mendimin se negociatat e mëtejshme të para-anëtarësimit ndërmjet Serbisë dhe BE-së duhet të “ngrihen” derisa të respektohen parimet themelore të sistemit të vlerave demokratike”, ka thënë Juratoviç, në një intervistë për mediumin malazez “Pobjeda”.

“Fatkeqësisht, bashkësia ndërkombëtare nuk mund të krijojë drejtpërdrejt politikën e Serbisë në botën demokratike të cilës ne i përkasim dhe të cilës gjoja synon Serbia, vetëm njerëzit mund ta bëjnë këtë përmes proceseve demokratike, duke përfshirë një garë të ndershme zgjedhore”.

Deputeti vuri në pah se ata që duan të bashkëpunojnë duhet të respektojnë rregullat demokratike.

“Ajo që mund të ndikojmë është që ata që duan të bashkëpunojnë me ne duhet të respektojnë rregullat demokratike nëse duan të jenë partnerët tanë. Dhe ne do të vazhdojmë ta bëjmë këtë në të ardhmen. Këto zgjedhje janë kashta e fundit për tolerancën tonë ndaj qasjes autokratike gjithnjë e më të fortë të Aleksandar Vuçiçit dhe ndjekësve të tij”, tha deputeti i Bundestagut të Gjermanisë, Josip Juratoviç. /Klankosova.tv.

Mesazhi që Shtetet e Bashkuara po dërgojnë në Serbi, duke paralajmëruar shitjen e raketave kundërtanke në Kosovë, është se Beogradi zyrtar nuk konsiderohet partner i besueshëm.

Kështu tha për Shërbimin e Ballkanit të Radios Evropa e Lirë, Kurt Bassuener, hulumtues i latë në Këshillin për Demokratizim të Politikave me seli në Berlin.

SHBA-ja njoftoi më 11 janar se ka pranuar kërkesën e Kosovës për blerjen e 246 sistemeve kundërajrore Javelin, që prodhohen në SHBA.

Departamenti amerikan i Shtetit i tha Radios Evropa e Lirë se blerja e tyre do t’i kushtojë Kosovës 75 milionë dollarë.

Tani kjo çështje është dërguar në Kongresin amerikan për miratim dhe presidentja e Kosovës, Vjosa Osmani, tha se beson që kërkesa për blerjen e këtyre armëve do të miratohet. Ndërkaq, homologu i saj serb, Aleksandar Vuçiq, e ka cilësuar lajmin si “zhgënjim të madh”.

Bassuener tha se beson se kjo lëvizje ende nuk shfaq një ndryshim të politikës së Perëndimit ndaj Vuçiqit, por është tregues se ndryshimi i politkës mund të shqyrtohet.

“Mesazhi që SHBA-ja po dërgon me këtë blerje është se Serbia, pavarësisht deklaratave të Perëndimit se është partnere në dialog, nuk po konsiderohet partnere e besueshme, ose e besueshme nën udhëheqjen aktuale”, tha ai.

Njoftimi për synimin e Kosovës që të blejë sisteme raketore nga SHBA-ja vjen në kohën kur tensionet mes Kosovës dhe Serbisë janë të larta.

Në muajt e fundit, ushtria serbe disa herë ka lëvizur trupat drejt kufirit me Kosovën, kufi që ruhet nga misioni paqeruajtës i NATO-s në Kosovë, KFOR, teksa u regjistruan disa incidente në veriun e Kosovës – të banuar me shumicë serbe – përfshirë edhe një sulm të armatosur nga një grup serbësh ndaj Policisë së Kosovë në Banjskë të Zveçanit.

SHBA-ja ka thënë se dhuna e parë në Banjskë, ku u vra një polic i Kosovës dhe gjatë përleshjeve që pasuan u vranë dhe tre sulmues serb, nuk do të lejohet që të përsëritet.

Eksperti gjerman Bassuener tha se beson që incidenti në Banjskë është një prej motiveve që SHBA-ja dëshiron të forcojë kapacitetet mbrojtëse të Kosovës.

“Në takimet e mia në Uashington, nuk kam parë ndryshim të madh në mënyrën e mendimit. Por, ka më shumë njohje se politikat që janë ndjekur deri më tani nuk kanë dhënë rezultatet e pritura. Prandaj, shpresoj se vendimi për raketat Javelin është sinjali i parë i një ndryshimi të strategjisë ndaj Ballkanit Perëndimor nga të dyja anët e Atlantikut”, tha ai.

Shitja e sistemeve Javelin, sipas DASH-it, mbështet “politikën e jashtme dhe objektivat e sigurisë kombëtare të SHBA-së duke përmirësuar sigurinë e Kosovës dhe zhvillimin e aftësive të saj mbrojtëse, të ndërveprueshme me NATO-n, pa ndryshuar ekuilibrin thelbësor ushtarak në rajon ose pa ndikuar në gatishmërinë mbrojtëse të SHBA-së”.

Kosova edhe në të kaluarën ka blerë ose ka pranuar në formë donacioni armë nga Shtetet e Bashkuara.

Televizioni shtetëror italian tha të hënën në mbrëmje se autoritetet po hetonin përshëndetjen masive në demonstratë.

Politikanët e opozitës në Itali të hënën kërkuan që Qeveria, e kryesuar nga kryeministri i ekstremit të djathtë Giorgia Meloni, të shpjegojë se si qindra demonstrues arritën të bënin një përshëndetje të ndaluar fashiste në një tubim në Romë pa asnjë ndërhyrje policore.

Tubimi i së dielës mbrëma në një lagje të klasës punëtore përkujtoi vrasjen në vitin 1978 të dy anëtarëve të një grupi rinor neofashist në një sulm të pretenduar më vonë nga militantët e ekstremit të majtë.

Në një moment të tubimit, pjesëmarrësit ngritën krahun e djathtë në një përshëndetje me krahun  drejt që i referohet diktaturës fashiste të Benito Musolinit.

Sipas legjislacionit të pasluftës, përdorimi i simbolikës fashiste, përfshirë përshëndetjen me krahun drejt të njohur edhe si përshëndetja romane, është e ndaluar.

Shefja e Partisë Demokratike Elly Schlein, e cila kryeson partinë më të madhe opozitare në legjislaturë, ishte ndër ata që kërkuan të hënën që Ministri i Brendshëm i Melonit të paraqitej në Parlament për të shpjeguar pse policia me sa duket nuk bëri asgjë për të ndaluar tubimin.

Elly Schlein dhe të tjerët të indinjuar nga përdorimi i përshëndetjes fashiste në tubim e vunë në dukje këtë muajin e kaluar, kur një shikues në premierë në La Scala bërtiti “Rroftë Italia antifashiste!” Burri u rrethua shpejt nga policia nga skuadra antiterrorizëm e Italisë.

“Nëse bërtisni “Rroftë Italia antifashiste”në një teatër, ju identifikoheni nga policia; nëse shkon në një tubim neofashist me përshëndetje dhe banderola romane, nuk identifikohesh,” tha Schlein në një postim në platformën e mediave sociale X. Më pas ajo shtoi: “Meloni nuk ka asgjë për të thënë?”

Televizioni Shtetëror Rai tha të hënën në mbrëmje se policia italiane po hetonte përshëndetjen masive në tubim.

Zëvendëskryeministri Antoni Tajani, i cili drejton një parti të qendrës së djathtë në koalicionin 14-mujor të Melonit, u mësy nga gazetarët për përshëndetjen fashiste.

“Ne jemi një forcë që sigurisht nuk është fashiste, ne jemi antifashistë,” tha Tajani në një konferencë shtypi për një çështje tjetër.

Tajani, i cili shërben gjithashtu si ministër i Jashtëm, vuri në dukje se sipas ligjit italian, mbështetja e fashizmit është e ndaluar. Të gjitha mitingjet “në mbështetje të diktaturës duhet të dënohen”, tha ai.sn

SYRI TV ka zbardhur se deri më ora 18.00 të datës 11 janar 2024, deputetët e parlamentit italian kanë afat të prezantojnë në format dixhital, propozimet amenduese mbi draft-ligjin “Ratifikimi e ekzekutimi i protokollit mes Qeverisë së Republikës Italiane e Këshillit të Minsitrave të Republikës së Shqipërisë mbi forcimin e bashkëpunimit në fushën e emigracionit firmosur më 6 nëntor 2023 në Romë si dhe normat e koordinimit të sistemit të brendshëm ligjor.”

Prej orës 17.15 të ditës së sotme, 8 janar 2024 e deri më ora 18.00 të datës 11 janar Komisioni i Çështjeve të Jashtme e Çështjeve Komunitare në parlamentin italian, nis një maratonë dëgjesash informale me ekspertët më të mirë të problematikave të së drejtave kushtetuese e humanitare mbi emigracionin, njoftoi gazetarja Alba Kepi nga Italia.

SYRI TV ka mësuar se në dëgjesat informale me komisionin parlamentar është ftuar të flas në lidhje videokonferencë dhe shqiptarja Lea Ypi, profesoreshë e Teorisë Politike në departamentin e qeverisë pranë Shkollës së Ekonomisë në Londër.

Në kalendarin e këtij komisioni, pasditen e sotme parashikohen dëgjesat me katër profesorë universitarë të Universiteteve King’s College Londër, Universiteti  Tuscia, Universitit Roma Tre e Universiteti i Firenzes, dhe me Ambasadorin italian në Tiranë Fabrizio Bucci.

Ditën e dytë të dëgjesave, datë 9 janar 2024, do të referojnë 6 profesorë të tjerë universitarë mes të cilëve dhe shqiptarja Lea Ypi si dhe përfaqësues të organizatës joqeveritare Mediterranea Saving Humans, përfaqësues të Amnesty International, përfaqësues të Organizatës Botërore të Emigrantëve dhe përfaqësues të shoqatës kombëtare italiane Juristët Demokratë.

Komisioni i Çështjeve të Jashtme do të mbyll dëgjesat më ora 18.00 të datës 11 janar me afatin e fundit kohor të dorëzimit të propozimeve amenduese mbi këtë draft ligj.

Nuk është parashikuar hedhja në votë e tij brenda Komisionit të Çështjeve të Jashtme.

Pas analizës në Komision, draft ligji do të merret në diskutim nga Dhoma e Deputetëve e do t’i nënshtrohet votës së parlamentarëve.

Bashkimi Evropian duhet të formojë ushtrinë e tij të përbashkët që mund të luajë një rol paqeruajtës dhe për të parandalojë konflikte, tha ministri i Jashtëm italian, Antonio Tajani.

Në një intervistë për gazetën italiane, La Stampa, Tajani tha se bashkëpunimi më i ngushtë evropian në fushën e mbrojtjes është prioritet i partisë Forza Italia, që ai udhëheq.

“Nëse duam të jemi paqeruajtës në botë na duhet një ushtri evropiane. Ky është një parakusht thelbësor që të jemi në gjendje të kemi një politikë efektive të jashtme evropiane”, tha ai në intervistën që u publikua më 7 janar.

“Në një botë me lojtarë të fuqishëm sikurse Shtetet e Bashkuara, Kina, India, Rusia – me kriza nga Lindja e Mesme e deri në Indo-Paqësor – qytetarët italianë, francezë apo sllovenë mund të mborhen vetëm nga diçka që veçse ekziston, domethënë Bashkimi Evropian”, shtoi ai.

Çështja e bashkëpunimit evropian në fushën e mbrojtjes është ngritur në agjendën politike që kur Rusia nisi pushtimin e Ukrainës pothuajse dy vjet më parë.

Megjithatë, përpjekjet janë përqendruar më shumë në zgjerimin e NATO-s, me Finlandën – anëtaren e BE-së – që iu bashkua aleancës vitin e kaluar dhe me Suedinë që po ashtu është në rrugë që t’i bashkohet NATO-s.

Tajani po ashtu tha se 27 shtetet e BE-së duhet të përmirësojnë udhëheqjen e tyre dhe të krijojnë një presidencë të vetme, e jo sikurse struktura aktuale, ku Këshilli Evropian ka president dhe Komisioni Evropian po ashtu ka president.

Tajani u bë udhëheqës i Forza Italia vitin e kaluar pas vdekjes së Silvio Berlusconit.

Zgjedhjet e Parlamentit Evropian në qershor do të jenë matësi i parë i popullaritetit të partisë, pasi humbi liderin e saj karizmatik, Silvio Berlusconi.rel

Rusia e ka sulmuar Ukrainën me raketa, me të cilat e furnizoi Koreja e Veriut, për herë të parë prej se e nisi pushtimin e saj para dy vjetëve, tha një zyrtar i Kievit të premten, duke i vërtetuar vlerësimet e mëhershme të Shtëpisë së Bardhë.

Ai e tha këtë në rrjetin social X, pasi guvernatori i rajonit verilindor Harkiv, tha se rajoni u sulmua me raketa të shprehur nga Rusia, të cilat nuk ishin prodhim rus.

“Nuk ka më maskim… në luftën e saj prej gjenocidi, Federata ruse për herë të parë e goditi territorin e Ukrainës me raketa që i ka marrë nga Koreja Veriore”, tha zyrtari i lartë i Kievit, Mykhailo Podolyak.

Ai nuk ofroi prova se raketat ishin verikoreane. Në një komunikatë për media të enjten, Uashingtoni i citoi të dhënat e inteligjencës amerikane.

“[Rusia] po i sulmon ukrainasit me raketa që i ka marrë nga një shtet, ku qytetarët torturohen në kampe të koncentrimit, vetëm pse kanë radio të paregjistruar, pse flasim me ndonjë turist, apo pse shikojnë emisione televizive”, tha Podolyak.

Kremlini nuk u është përgjigjur pyetjeve rreth vlerësimeve të SHBA-së se Rusia shkrepi raketa verikoreane me rreze të shkurtra veprimi në Ukrainë.

Kombet e Bashkuara vendosën embargo armësh ndaj Koresë së Veriut në vitin 2006, kur ajo e kreu testimin e parë bërthamor.

Rezolutat e Këshillit të Sigurimit të OKB-së, të miratuara me mbështetjen e Rusisë, ua ndalojnë shteteve të bëjnë tregti armësh, apo pajisjesh tjera ushtarake me Korenë e Veriut.rel

Polonia i ka bërë thirrje Perëndimit që t’i përgjigjet Rusisë, pasi Moska kreu dy sulme masive ajrore në Ukrainë dhe Kievi u kundërpërgjigj me sulme në rajonet kufitare ruse dhe në Krimenë e pushtuar.

Të paktën pesë persona u vranë dhe dhjetëra të tjerë u plagosën në sulmet ruse me dronë dhe raketa në dhe përreth Kievit, por edhe në Harkiv më 2 janar. Ushtria ukrainase kishte raportuar për sulme në shkallë të njëjtë edhe ditë më parë.

Më 3 janar, ministri i Jashtëm i Polonisë, Radoslaw Sikorski, tha e Perëndimi duhet t’u përgjigjet sulmeve “në gjuhën që [presidenti rus, Vladimir] Putin e kupton: ashpërsimin e sanksioneve në mënyrë që ai të mos mund të prodhojë armë të tjera me komponentë të kontrabanduar dhe duke i dhënë Kievit raketa me rreze të gjatë veprimi që do t’i mundësonin të kryente sulme në vendet prej ku Rusia kryen sulme dhe në qendrat e komandimit”.

Ditë më parë, Putin ka thënë se shteti i tij do të “intensifikojë” sulmet ndaj Ukrainës, duke shtyrë ministren e Jashtme gjermane, Annalena Baerbock, të akuzojë Moskën se po kërkon që ta “asgjësojë” Ukrainën.

Gjermania “do të qëndrojë me popullin e Ukrainës për aq kohë sa të jetë e nevojshme”, shkroi ajo në X, që më herët njihej si Twitter.

Rritja e sulmeve vdekjeprurëse, shumica e të cilave kanë për cak zonat e banuara, ka nxitur ambasadorin e Francës në Kombet e Bashkuara, Nicolas de Riviere, të deklarojë se është pesimist për rrjedhën e ngjarjeve në Ukrainë.

Sipas tij, situata në Ukrainë është përkeqësuar jashtëzakonisht shumë.

Më herët gjatë 3 janarit, dronët ukrainas sulmuan Krimenë, gadishullin që Rusia e aneksoi ilegalisht më 2014, dhe dy rajone ruse në kufi me Ukrainën.

Autoritetet ruse nuk kanë raportuar për viktima nga sulmet në rajonet kufitare. Por, javën e kaluar, si pasojë e sulmeve, që Moska ka thënë se janë kryer nga Ukraina, në rajonin rus të Belgorodit u vranë 25 persona.

Ukraina po i bën thirrje aleatëve perëndimorë që të përshpejtojnë dërgesat e sistemeve të mbrojtjes ajrore, të raketave me rreze të gjatë veprimi, dronëve luftarakë, në mënyrë që t’iu kundërpërgjigjet sulmeve ruse.rel