Presidenti i Republikës, Bujar Nishani përdori tone të forta dhe alarmante pas lajmeve se një pajisje përgjimi, e paautorizuar, gjendet në duart e Policisë së Shtetit dhe se përmes saj, mund të jenë përgjuar zyrtarë të lartë, diplomatë, drejtues të opozitës e gazetarë.

Kreu i shtetit tha se tashmë, ekzistenca e kësaj pajisje është e konfirmuar dhe ai e quajti këtë rast, si cënim të pastër të sigurisë kombëtare.

“I bëj thirrje dhe i kërkoj zyrtarisht dhe publikisht Prokurorisë së Shtetit që të mbrojë dinjitetin e shtetit dhe qytetarëve të tij. Të mbrojë dimensionin e sigurisë sonë kombëtare, që të hetojë të gjithë procesin dhe procedurën e sjelljes në Shqipëri të kësaj pajisjeje ilegale që kërcënon mbi të gjitha, dimensionin e lirisë sonë të përbashkët”.

Presidenti kërkoi hetim edhe mbi personat që kanë bërë të mundur futjen e kësaj pajisjeje në territorin e Shqipërisë.

“Të hetojë kush ka qenë ai autoritet doganor që ka lejuar të vjië dhe të hyjë në Shqipëri, një pajisje e cila në çdo rast, nuk mundet të hyjë kurrë pa lejen dhe autorizimin e institucionit të Prokurorisë së Shtetit Shqiptar. I kërkoj Prokurorisë të hetojë deri në fund të gjithë ato elementë dhe autoritete që kanë përdorur këtë paisje të paligjshme. Paisja dhe veprimtaria e saj kanë kërcënuar sigurinë kombëtare të Shqipërisë. Ka kërcënuar integritetin e të gjitha institucioneve, të çdo qytetari të thjeshtë të vendit tim”.

Veç kësaj, kreu i shtetit ka kërkuar nga institucionet shtetërore të mos bëhen pengesë për hetimin e Prokurorisë.

“I bëj thirrje të gjithë atyre institucioneve apo personave të cilët pengojnë hetimet, nga ana e institucionit të Prokurorisë së Shtetit Shqiptar, të mos bëhen pengesë e funksionimit dhe zbatimit të ligjit në Shqipëri. Çdo akt që pengon zbatimin e Kushtetutës dhe të ligjit, çdo akt që përbën pengim të hetimit, përmes dëmtimit apo tjetërsimit të provave do të përballet me ligjin. ”

Këto deklarata, kreu i shtetit i bëri në një takim me të përndjekurit politikë, me rastin e 25 – vjetorit të krijimit të shoqatës së tyre.

Një ditë më parë, ish – Kryeministri Berisha deklaroi se Presidenti Nishani është ndër personat e përgjuar nga Policia e Shtetit, në mënyrë të paligjshme.