DËGJOJ FRYMËMARRJEN TËNDE – Poezi nga ROLAND GJOZA

October 19, 2025

 

dëgjoj frymëmarrjen tënde

kam tridhjetë vjet që e dëgjoj kur je në gjumë

dhe s’ngopem

është koha kur vesa bie mbi shpatoret ngjyrë gurë kali të kopshtit

s’ka ndodhur asgjë e veçantë

veçse unë dëgjoj frymëmarrjen tënde

dhe s’ngopem

ti ke dalë nga shtrati dhe ia ke mbathur

kushedi ku endesh pa më lënë një shënim

prandaj është nata me ëndrra

që dashuria të bëjë pushim

xheloz jam, pse ta fsheh

sonte bije kaq shumë vesë në kopsht

dhe yjet shkëlqejnë kaq fort

sa s’të shkon mendja për keq

dëgjoj frymëmarrjen tënde

dhe s’ngopem

shtrihem dhe unë pranë teje të fle 

tridhjetë vjet që s’ta bëra dot pyetjen

po ti ç’bën kur mua më zë gjumi

s’tronditesh,

xhelozi s’ndjen?

prandaj është nata me ëndrra

që dashuria të bëjë pushim

në ëndërra u takofshim të dy

dhe po s’ndodhi

vjen mëngjesi përsëri

të kam pranë kur të hapësh sytë

erdhe? do të pyes

po ti s’përgjigjesh

sikur mban të fshehtë diçka enigmatike

ah, këto ëndrrat që na ndajnë çdo natë

sikur t’ua gjenim ilaçin

dhe ta pinim

që dhe në ëndrra të ishim bashkë

• twitter

  Follow
• facebook
• linkedin

Fjalë kyçe: ROLAND GJOZA