Shqipëria hyn sot në ditën e 46-të të protestës qytetare, ndërsa organizatorët kanë bërë të qartë se revolta nuk do të ndalet as gjatë sezonit veror.

Edhe këtë mbrëmje, qytetarët pritet të mblidhen në sheshin “Skënderbej”, për të marshuar më pas drejt Kryeministrisë, ku do të vijojnë protestën kundër qeverisë së Edi Ramës dhe gjithë klasës politike.

Ajo që nisi si një reagim kundër projektit
në Zvërnec është shndërruar tashmë në një lëvizje të gjerë qytetare, e cila prej 46 ditësh kërkon dorëheqjen e kryeministrit, ndryshimin e sistemit politik dhe, sipas protestuesve, ndërtimin e një Shqipërie të re.

Ditët e fundit aktivistët kanë ritheksuar se nuk do të ketë asnjë ndërprerje të protestës gjatë verës. Ata deklaruan se qytetarët do të vazhdojnë të dalin çdo mbrëmje në shesh deri në muajin shtator, duke e cilësuar qëndresën si mënyrën e vetme për të mbajtur presion ndaj qeverisë.

Gjatë protestës së 45-të, nuk munguan thirrjet “Rama jep dorëheqjen”, “Revolucion”, “Shqipëri e re” dhe “Rama në burg, Berisha në burg”, ndërsa nga podiumi u bë thirrje që pjesëmarrja të rritet çdo ditë.

Organizatorët kanë ftuar sërish qytetarët nga e gjithë Shqipëria, por edhe diasporën, t’i bashkohen protestës, duke theksuar se “nuk ka pushime për revoltën” dhe se tubimet do të vazhdojnë pa ndërprerje deri në realizimin e kërkesave të saj. BW

Shqipëria mbajti ditën e 45-të të protestave qytetare, ndërsa organizatorët kanë bërë të qartë se revolta nuk do të ndalet, pavarësisht temperaturave të larta apo sezonit turistik. Edhe këtë mbrëmje qytetarët u mblodhen para Kryeministrisë, duke kërkuar dorëheqjen e kryeministrit Edi Rama dhe ndryshimin e sistemit politik. Pasi marshuan në disa rrugë të Tiranës, duke lëshuar thirrje kundër qeverisë dhe opozitës, protestuesit u mblodhën sërish te Kryeministria dhe më pas u shpërndanë.

Në protestë dominuan sërish thirrjet “Rama në burg, Berisha në burg”, “Revolucion” dhe “Shqipëri e re”, ndërsa në podium u ngjitën aktivistë, përfaqësues të diasporës dhe qytetarë të cilët kërkuan vazhdimin e qëndresës deri në realizimin e kërkesave të protestës.

Ajo që nisi si një reagim kundër projektit në Zvërnec është shndërruar tashmë në një lëvizje mbarëkombëtare kundër qeverisë dhe gjithë klasës politike. Çdo ditë, protestuesit kanë marshuar drejt bulevardit “Dëshmorët e Kombit”, duke mbajtur fjalime, pankarta dhe simbole që tashmë janë bërë pjesë e identitetit të kësaj lëvizjeje.

Edhe në tubimin e një dite më parë, protestuesit përsëritën se nuk do të tërhiqen. Nga podiumi u deklarua se rezistenca do të vazhdojë gjatë gjithë verës, pa asnjë ndërprerje, deri në muajin shtator, duke ftuar qytetarët dhe diasporën të mos e braktisin sheshin.

Organizatorët theksuan se protesta do të zhvillohet çdo ditë, pa pushim, gjatë gjithë sezonit veror, duke e cilësuar këtë si fazën më të rëndësishme të lëvizjes qytetare. Sipas tyre, qëllimi është që presioni ndaj qeverisë të mos zbehet, por të rritet deri në shtator.bw

TIRANË- Ditën e sotme do të zhvillohet protesta e 45-të e qytetarëve shqiptarë, të cilët kanë kërkuar dorëheqjen e kryeministrit Edi Rama. Ata do të mblidhen fillimisht në sheshin “Skënderbej” dhe më pas të vijojnë marshimin drejt Kryeministrisë, ku dhe do të zhvillojnë fjalimet e tyre.

Protesta e cila nisi si një reagim i drejtpërdrejtë ndaj situatës së ndodhur në Zvërnec, përfundoi në kërkesën për dorëheqjen e kryeministrit Edi Rama. Me pankarta në duar dhe flamuj kuqezi, protestuesit kanë bërë thirrje për ndryshim. Protesta ka bërë bashkë fëmijë, të moshuar, studentë, profesionistë, aktivistë dhe turistë.

Qytetarët kanë kërkuar plotësimin e pesë kërkesave të cilat përfshijnë dorëheqjen e panegociushme të kryeministrit Rama, krijimin e një qeverie teknike dhe ndryshime kushtetuese.

Gjatë marshimit të djeshëm, protestuesit ka brohoritur një zëri: “Edi Rama, o tradhtar, me Shqipërinë mos bëj Pazar”, “Rama, jep dorëheqjen”, “Pa rini nuk ka Shqipëri”, “Poshtë patronazhistët”, “Shqipëria e shqiptarëve, vdekje tradhtarëve”, “Shqipëria kërkon revolucion”,  “O Erion, o legen, prite Ramën se po vjen” dhe “Ju erdhi fundi”.

KËRKESAT E PROTESTUESVE:

1. Dorëheqjen e panegociueshme të kryeministrit dhe të qeverisë.

2. Krijimin e një qeverie teknike tranzitore, jopartiake dhe me mandat 12-mujor.

3. Ndryshime kushtetuese, ku të gjithë shtetasit shqiptarë të jenë të barabartë para ligjit, si dhe miratimin e tyre me referendum popullor, duke përfshirë ndër të tjera: ndryshimin e Kodit Zgjedhor, ndryshimin e ligjit për financimin e partive politike dhe organizatave të ndryshme, kufizimin e ushtrimit të detyrës së kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.

4. Paralelisht kërkohet anulimi i ndryshimeve të bëra në ligjin për zonat e mbrojtura, anulimin e ndryshimeve të bëra në ligjin për trashëgiminë kulturore, shfuqizimin e Paketës së Maleve, si dhe shfuqizimin e statusit dhe të kuadrit ligjor për investimet strategjike.

5. Kërkohet një kontratë të re sociale mes qytetarëve dhe shtetit, e cila do të përpilohet pas konsultimit me intelektualë, ekspertë teknikë dhe qytetarë apartiakë, të propozuar nga sheshi i protestës./Dosja.al

Shqipëria hyn sot në ditën e 45-të të protestave qytetare, ndërsa organizatorët kanë bërë të qartë se revolta nuk do të ndalet, pavarësisht temperaturave të larta apo sezonit turistik. Ashtu si në 44 ditët e fundit, edhe këtë mbrëmje qytetarët do të mblidhen para Kryeministrisë, duke kërkuar dorëheqjen e kryeministrit Edi Rama dhe ndryshimin e sistemit politik.

Ajo që nisi si një reagim kundër projektit në Zvërnec është shndërruar tashmë në një lëvizje mbarëkombëtare kundër qeverisë dhe gjithë klasës politike. Çdo ditë, protestuesit kanë marshuar drejt bulevardit “Dëshmorët e Kombit”, duke mbajtur fjalime, pankarta dhe simbole që tashmë janë bërë pjesë e identitetit të kësaj lëvizjeje.

Edhe në tubimin e një dite më parë, protestuesit përsëritën se nuk do të tërhiqen. Nga podiumi u deklarua se rezistenca do të vazhdojë gjatë gjithë verës, pa asnjë ndërprerje, deri në muajin shtator, duke ftuar qytetarët dhe diasporën të mos e braktisin sheshin.

Në protestën e 44-t dominuan sërish thirrjet “Rama në burg, Berisha në burg”, “Revolucion” dhe “Shqipëri e re”, ndërsa në podium u ngjitën aktivistë, përfaqësues të diasporës dhe qytetarë të cilët kërkuan vazhdimin e qëndresës deri në realizimin e kërkesave të protestës.

Organizatorët theksuan se protesta do të zhvillohet çdo ditë, pa pushim, gjatë gjithë sezonit veror, duke e cilësuar këtë si fazën më të rëndësishme të lëvizjes qytetare. Sipas tyre, qëllimi është që presioni ndaj qeverisë të mos zbehet, por të rritet deri në shtator.

Me këtë mesazh, protesta hyn sot në ditën e saj të 45-të, ndërsa qytetarët pritet të rikthehen sërish para Kryeministrisë, duke vijuar atë që e konsiderojnë si një rezistencë pa afat deri në largimin e qeverisë. BW

Në protestën para Kryeministrisë, aktivisti Erjon Murataj deklaroi se në Kongresin Amerikan është kërkuar dhe sekretuar një hetim ndaj qeverisë shqiptare dhe kryeministrit Edi Rama, duke e lidhur me çështje të narkotrafikut ndërkombëtar.

“Kam disa lajme për t’ju dhënë. E para, këta janë ndrydhur keq nga ky shesh. E dyta, është që një orë më parë, në Kongresin Amerikan, një kërkesë e kongresmenëve për hetim të qeverisë shqiptare dhe Ramës është sekretuar për hetim të narkotrafikut ndërkombëtar”, tha ai.

Murataj reagoi edhe ndaj akuzave që, sipas tij, u janë bërë protestuesve gjatë ditëve të fundit, duke i quajtur agjentë serbë, grekë, etj.

Erjon Murataj: Kam disa lajme për t’ju dhënë. E para, këta janë ndrydhur keq nga ky shesh. E dyta, është që një orë më parë, në Kongresin Amerikan, një kërkesë e kongresmenëve për hetim të qeverisë shqiptare dhe Ramës është sekretuar për hetim të narkotrafikut ndërkombëtar.

Kanë shumë ditë që na kanë quajtur agjentë serbë, grekë. Na kanë quajtur agjentë rusë. Po pres me padurim të na quajnë afrikanë, sepse do t’ua japim përgjigjen fiks si afrikanët. gsh

Sezonin e verës së kaluar, nga fundi i muajit Qershor Policia e Shtetit nisi “Aksionin e Ndotjes Akustike” gjobiste me 4000 euro baret, restorantet dhe diskot në Lungomaren e qytetit të Vlorës, dhe disa ditë më pas ju fut Bashkisë duke emëruar staf të ri dhe nisi shkallën e dytë të goditjes me lirimin e  e hapësirave publike. Fadromat dhe ekskavatorët si dhe shpërthimet e kontrolluara me eksploziv shoqëruan gjithë stinën nga jugu në veri, nga Lungomarja dhe çdo autostradë e deri në Theth.
Kush mundi nga shqiptarët dhe që e ndjeu se ju shkel liria dhe prona më vete protestoi, por edhe u gjobit, u padit e u godit. Gjithçka u shua dhe qeverisja e një viti më parë ishte ajo që e tregoi forcën me popullin duke u prishur ekonominë dhe kursimet në emër të rregullave dhe ligjeve, kur nisën zjarret dhe përmbytjet tregoi se as forcë dhe as para nuk nxorri për të përballuar emergjencat civile dhe natyrore.
Ky ishte prologu i asaj se kush dëgjohej më shumë.
Tani kemi ardhur në fazën e asaj se edhe kryeministrit i ka ardhur zëri dhe po e prodhon zhurmën për të kundërshtuar me çdo mënyrë protestën.
Pra i shkundur jo vetëm nga nervat, por edhe nga paratë kryeministri i rilindësve socialistë dhe mediat pranë tij kishin të njëjtin shqetësim “me shkundjen”. Ndaj edhe titujve të lajmeve “Shkundet Tirana nga …” do t’i shtoheshin detajet si: një koncert i së Shtunës në “Eagle Stadium”, pranë Kasharit-Tiranë me pjesëmarrjen e Kanye West, me një publik ndërkombëtar të numëruar prej 80 vendesh, dhe papërmendur atë se për të plotësuar ardhjen e rreth 60 mijë spektatorëve në koncert u përdorën metodat e zbritjes 30% të biletës si dhe dhënie falas për grupe dhe kolektiva shkollore e punonjësish e që në fund do të ishte edhe qerasja bujare e vetë kryeministrit me 4 milion euro nga fondi i emergjencave. Kjo e fundit që do ta shpëtonte koncertin e paralajmëruar, dhe kryeministri menjëherë pas mbylljes së kritikave në llogaritë e rrjeteve sociale do të niste luftën e titujve mediatikë nga makineria propagandistike dhe mediat që e mështesin.
Sa për protestën qytetare mjaftonte që të përmendej titulli i zakonshëm Dita e 43-të…
Titujt sulmues ishin; Rama: “Katër milionë eurot investim për të mos hapur një plagë të re mosbesimi ndaj Shqipërisë”, “Koncerti në Tiranë, Rama pret reperin Kanye West”,  “Tirana hyn në hartën e koncerteve globale me Kanye West”, “Kanye West: Faleminderit Edi Rama dhe gjithë Shqipërisë për mikpritjen në vendin tuaj të bukur”, “Koncerti i Kanye West në Tiranë, Rama: Shqipëria organizoi një ngjarje, që u bë lajm në çdo cep të botës”, “Koncerti spektakolar i Kanye West, Rama: 80 kombësi ka rreth asaj vatre”,”Koncerti i Kanye West, mijëra fansa e turistë nga vende të ndryshme po i drejtohen Eagle Stadium”, “Koncerti i Kanye West, apel për mbërritje në kohë të pjesëmarrësve”, “Rama: Koncerti i Kanye West, marketing global që sjell turizëm dhe ekonomi për Shqipërinë”, “Kanye West në Tiranë, Gonxhja: Ngjarja muzikore për të cilën do të flitet gjithë verën”, “Gonxhja: Suksesi i koncertit të Kanye West i fiton kryeqytetit besueshmëri ndërkombëtare për evente të mëdha”… etj. etj.
Pra me dhjetra tituj të përgatitur për të nisur një sulm për të cilin ja vlen të ndalemi në dy tre të vërteta.
Protesta qytetare në Tiranë mes ditës së 42 dhe 43 kishte pjesëmarrjen e saj dhe u zhvillua megjithëse koncertet e sponsorizuara i hynë në mes.
Koncertet?!

Me qenë se çudia zgjat tre ditë, le të shohim se çdo të sjellë java.

Sa për Sheshin e Protestës një gjë është e sigurt, se qytetarët dhe rinia do të vazhdojnë me “Revolucionin e Flamingove”, çka u bë eventi më i njohur paqësor në botë për rrëzimin e një qeverisje.

Në mbyllje do të sillnim edhe njëherë vëmendjen për mbrojtjen e natyrës dhe respektin për gjallesën e egër, mjedise ku njeriu nuk kontrollon sjelljen e tij

Si ju duket juve Festivali Sundance katër ditor “go wild” në Zvërnec, kur kjo qeveri urdhëroi Policinë një vit më parë të gjobiste bizneset për “Ndotjen Akustike”.

Mos vallë Rama e ka nisur mbrapsht këtë rradhë. Do t’u prishë qetësinë Zvërnecit dhe Flamingove, në mënyrë që të pushojë protesta dhe kështu qeveria dhe politika shkojnë të qetë për pushimet e verës për t’u shkëputur nga refreni; ‘Rama jepe dorëheqjen’.

12 Korrik, 2026

Sot protesta qytetare hyn në ditën e saj të 44-t, duke u kthyer në një nga lëvizjet më të gjata qytetare që ka njohur Shqipëria në vitet e fundit.

Për 44 ditë me radhë, qytetarët janë mbledhur çdo mbrëmje para Kryeministrisë me të njëjtat thirrje që dëgjohen që prej ditës së parë: “Rama në burg, Berisha në burg”, “Rama jep dorëheqjen” dhe “Shqipëri e Re”.

Edhe mbrëmjen e djeshme, si në 43 ditët e tjera, pas tubimit para Kryeministrisë, protestuesit marshuan në rrugët e Tiranës, ndaluan para Kuvendit dhe më pas përpara selisë së Partisë Demokratike, ku brohoritën “Opozitë e shitur”, duke akuzuar opozitën se është bërë pjesë e të njëjtit sistem që qytetarët kërkojnë të rrëzojnë. bw

Gazeta franceze Le Temps i kushton një artikull të gjatë situatës politike në Shqipëri, duke e përshkruar kryeministrin Edi Rama si një lider që “luan me provokimin” në përpjekje për të zhvendosur vëmendjen nga vala e protestave që ka përfshirë vendin prej gjashtë javësh.

Sipas prestigjiozes franceze, financimi me 4.2 milionë euro i koncertit të Kanye West nuk arriti të ndalte revoltën qytetare, ndërsa “Revolucioni i Flamingove” vazhdon të zgjerohet, me mijëra protestues që kërkojnë dorëheqjen e kryeministrit dhe denoncojnë korrupsionin, oligarkinë dhe projektet e diskutueshme turistike në Sazan dhe Zvërnec.

SHKRIMI I PLOTE I LE TEMPS
“Edi Rama luan me provokimin”. I sfiduar nga një valë protestash që nuk bën gjë tjetër veçse rritet prej gjashtë javësh, kryeministri shqiptar këmbënguli ta priste personalisht reperin shumë kontrovers amerikan Kanye West, të ndaluar të mbajë koncerte në shumicën e vendeve evropiane për shkak të provokimeve të tij antisemite dhe islamofobe, si edhe për admirimin e tij të deklaruar ndaj Adolf Hitlerit.

Madje, vetëm pak ditë para koncertit, u mësua se qeveria kishte shpenzuar 4.2 milionë euro për të mundësuar zhvillimin e këtij eventi, i cili fillimisht ishte paraqitur si një “koncert privat”, që nuk do t’i kushtonte asgjë taksapaguesve. Kjo shkaktoi indinjatën e artistëve shqiptarë, të cilët protestuan të enjten para ministrisë së tyre, duke kujtuar se kultura përfaqëson vetëm 0.1% të buxhetit publik. Ministri Blendi Gonxhja i hodhi poshtë këto kritika, duke i cilësuar si “donkishoteske”.

Për qeverinë, koncerti duhej të nxiste turizmin duke e vendosur Shqipërinë në hartën botërore të këtyre ngjarjeve të mëdha. Në realitet, biletat pothuajse nuk u shitën dhe, për të mbushur 60 mijë vendet e stadiumit të përkohshëm Eagle Stadium, të ndërtuar posaçërisht për këtë rast pranë autostradës që të çon në Durrës dhe aeroportin e Tiranës, qeveria solli me autobusë të posaçëm nxënës të shkollave të mesme dhe punonjës të administratës publike. Aktivistë të lëvizjes së majtë Bashkë arritën gjithashtu të hynin në stadium dhe të shpalosnin një banderolë ku shkruhej: “Edi Rama, Fuck Ye! Jep dorëheqjen!”

Ndërkohë, 10 deri në 15 mijë persona marshonin në Bulevardin “Dëshmorët e Kombit”, në qendër të Tiranës, për mbrëmjen e 42-të radhazi. Koncerti nuk arriti të ndezë një kundërzjarr të aftë për të larguar vëmendjen nga vala e zemërimit që po trondit Shqipërinë. Që nga 31 maji, protesta të përditshme denoncojnë dhënien e ishullit të Sazanit dhe gadishullit fqinj të Zvërnecit Trump Organization, konglomeratit familjar të drejtuar nga Ivanka Trump dhe bashkëshorti i saj Jared Kushner, të cilët duan të ndërtojnë aty një resort luksoz, duke vënë në rrezik zona natyrore të mbrojtura, veçanërisht lagunën e Nartës, strehë e flamingove.

“Revolucioni i Flamingove”

Që atëherë, protestuesit e “Revolucionit të Flamingove” denoncojnë vullnetin për ta shitur vendin interesave të disa oligarkëve, duke pohuar se “Shqipëria nuk është në shitje”. Këta protestues, shpesh të rinj, kërkojnë dorëheqjen e Edi Ramës, kreut të Partisë Socialiste, në pushtet që prej vitit 2013, por nuk kanë më shumë besim as te forca kryesore opozitare, konservatorët e Partisë Demokratike të Sali Berishës. Ata kërkojnë “një Shqipëri të re”, duke denoncuar rrjetet oligarkike që dominojnë vendin që nga rënia e komunizmit.

“Çdo parti ka mediat e veta dhe ka ndërtuar rrjetet e saj në botën e biznesit, madje edhe në qarqet kriminale. Pikërisht këtë duopol refuzojnë protestuesit”, shpjegon eseisti Fatos Lubonja, ish-i burgosur politik i diktaturës dhe një figurë e njohur e kundërshtimit.

Sigurimi ndërkombëtar i jetës

Lexoni gjithashtu: “Shqipëria nuk është në shitje!” Në rrugët e Tiranës, revolta po zien kundër mega-projektit turistik të familjes Trump në ishullin e Sazanit.

Që nga fillimi i lëvizjes, Edi Rama i është përgjigjur vetëm me përçmim, duke u përpjekur të diskreditojë kundërshtarët e tij, duke i akuzuar se janë “të manipuluar nga forca armiqësore ndaj Shqipërisë dhe Izraelit”, madje edhe nga Irani. Këto akuza tingëllojnë me ironi kur kryeministri sjell me një kosto të madhe një këngëtar të njohur për antisemitizmin e tij si Kanye West, por kjo shpjegohet me marrëdhëniet e ngushta që ai mban me qeverinë e Netanyahut.

“Edi Rama mbështetet te aleatët e tij ndërkombëtarë për të dalë nga kjo situatë, te evropianët dhe amerikanët. Ky është sigurimi i tij i fundit i jetës”, vijon Fatos Lubonja.

Në fakt, prirja autoritare dhe e korruptuar e regjimit shqiptar është e njohur në Bruksel, por Komisioni Evropian ka mbetur gjithmonë shumë i përmbajtur në kritikat e tij. Edi Rama, i cili e ka rreshtuar politikën e jashtme të vendit me atë të Bashkimit Evropian, shfaqet si një e keqe më e vogël e pranueshme dhe, ashtu si homologu i tij serb Vuçiç, si garant i stabilitetit rajonal.

Dyshime mbi financimet

Kryeministri, i cili nuk ka hequr kurrë dorë nga pretendimet e tij si artist i arteve pamore, pretendon gjithashtu se po farkëton “fytyrën e re” të Shqipërisë dhe kishte investuar shumë te botimi, rreth dhjetë ditë më parë, i një libri luksoz arkitekture me titull “The Albanian Files”, ku paraqiten projektet e mëdha urbanistike në zhvillim ose të planifikuara.

Por opozita menjëherë iu referua SPAK-ut, Prokurorisë së Posaçme Kundër Korrupsionit, pasi këto projekte ngrenë pikëpyetje mbi financimin e tyre tepër të dyshimtë.

“Zyrat më të mëdha ndërkombëtare të arkitekturës janë thirrur për të legjitimuar qarkullime ekonomike që bien ndesh me interesin e përgjithshëm”, shpjegon Fatos Lubonja.

Mobilizimi vazhdon të rritet, i forcuar edhe nga diaspora që po kthehet në vend për pushimet verore. Florian Haçkaj, zëdhënës i grupit “Diaspora për një Shqipëri të Lirë”, i bërë i njohur për debatet e tij me video me kryeministrin Rama, ishte një nga figurat e tubimit të së shtunës.

Ky profesionist shpjegoi se sapo kishte mbërritur nga Zvicra me familjen e tij, duke iu drejtuar turmës me fjalët:

“Ju jeni heronjtë tanë, mos lejoni t’ju frikësojnë. Koha e frikës ka marrë fund.” gsh

Sot është dita e 43-të e protestave qytetare. Edhe këtë të diel grumbullimi i protestuesve do të nisë nga sheshi Skënderbej dhe më pas do të marshohet drejt Bulevardit “Dëshmorët e Kombit”.

Protestat qytetare janë karakterizuar nga masiviteti, energjia dhe vendosmëria për ta mbajtur të gjallë kauzën pavarësisht se ka kaluar mbi 1 muaj që qytetarët mbushin rrugët çdo ditë.

Ndërkohë mijëra qytetarë u mblodhën edhe këtë të shtunë në Bulevardin “Dëshmorët e Kombit”, përpara Kryeministrisë, në ditën e 42-të të protestave kundër qeverisë së kryeministrit Edi Rama.

Pas fjalimeve të mbajtura para godinës së Kryeministrisë, protestuesit nisën marshimin në rrugët e kryeqytetit, duke shprehur pakënaqësinë e tyre ndaj qeverisë dhe klasës politike.

Gjatë marshimit u dëgjuan thirrje si “Ju erdhi fundi”, “Revolucion”, “Nesër më shumë”, “Arrestoni Ramën”, “Rama në burg, Berisha në burg” dhe “Shqipëria kërkon revolucion”.

Protestuesit u shprehën të vendosur se nuk do të ndalen deri në largimin e kryeministrit Edi Rama, ndërsa marshimi vijoi në rrugët kryesore të Tiranës prej disa orësh. bw

Të rinjtë e kanë kthyer koncertin e reperit amerikan, Kanye West në një “protestë” kundër qeverisë së Edi Ramës.

Ata dëgjohen duke brohoritur thirrjen “Rama jepe dorëheqjen” që prej 42 ditësh dëgjohet çdo mbrëmje përpara Kryeministrisë.

Kujtojmë se qeveria financoi koncertin me 4 milionë euro nga fondi rezervë, një vendim që u shoqërua me debate dhe kritika të shumta për përdorimin e parave publike për një event privat. Panorama