UGSHPD: Mbështesim dhe përkrahim kërkesat për dorëheqjen e menjëhershme të kryeministrit Rama, si dhe largimin e rinovimin nga themelet të establishmentit politik 36 vjeçar të Shqipërisë

Unioni i Gazetarëve Shqiptarë Profesionistë të Diasporës  (UGSHPD) mbështet fuqishëm protestat e udhëhequra nga studentët shqiptarë dhe përkrah kërkesat e tyre për dorëheqjen e menjëhershme të kryeministrit Rama dhe largimin e establishmentit politik 36 vjeçar të Shqipërisë.

Vetëm kështu i hapet rruga krijimit të qeverisë teknike 12 mujore, e cila ta çojë vendin në zgjedhje të reja, të lira dhe të ndershme, duke ia krijuar vendit perspektivën për ndërtimin e demokracisë perëndimore, shtetit të së drejtës dhe integrimin e suksesshëm në Bashkimin Evropian.

Këtë qëndrim e sjellim pas reagimeve të sotme të kryeministrit Rama ndaj kërkesave të ligjshme të protestuesve në ditën e gjashtë të mobindjes civile. Këto kërkesa janë shqiptuar 135 ditë pandërprerë në kuadrin e Lëvizjes së Flamingove dhe, nëse ato nuk merreshin parasysh, protestuesit e patën shpallur qartë vendosmërinë e tyre për të kaluar  në mosbindje civile.

Vërejmë me shumë keqardhje se kryeministri nuk ka reflektuar aspak dhe nuk ka nxjerrë mësimet nga mesazhet e protestave, si shprehëse të pakënaqësisë së kulmuar tek shqiptarët pas 13 viteve të dështuara të qeverisjes së Rilindjes dhe të padurimit ndaj establishmentit politik 36 vjeçar në Shqipëri.

Kryeministri i shpërfilli protestat 135 ditore si përfaqësuese të denja të zemërimit popullor të grumbulluar veçanërisht gjatë regjimit të Rilindjes, kur të rinjtë janë më të përjashtuarit, më të diskriminuarit dhe më të mohuarit nga regjimi. Shqipëria e Rilindjes socialiste ia mbyll përditë e më shumë perspekivat rinisë shqiptare duke e përzënë çdo ditë e më shumë atë nga Atdheu.

Shqipëria e Edi Ramës është shndërruar në oaz politikanësh dhe oligarkësh të dënuar apo nën hetim për korrupsion nga drejtësia, ku sundon regjimi i patronazhistëve që asgjëson çdo shpresë dhe çdo ëndërr për një Atdhe të barabartë për të gjithë shqiptarët.

Zhvillimet e këtyre katër-pesë muajve treguan se pushtetet në Shqipëri janë të uzurpuar nëpërmjet zgjedhjeve farsë, ku Edi Rama merr për vete aq deputetë sa i duhen atij për të  kapur shtetin, ndërsa opozitës i jep aq deputetë sa i duhen asaj për të vegjetuar.

Kuvendi i Shqipërisë është produkt i zgjedhjeve farsë dhe proceseve farsë të cilat e kanë karakterizuar Shqipërinë sidomos këto 13 vitet e fundit. Të gjitha institucionet dhe pushtetet që burojnë nga ky Kuvend janë institucione dhe pushtete të paligjshme.

Mosbindja civile  në Shqipëri i ka rrënjët pikërisht te këto shtrembërime dhe padrejtësi flagrante. Sikurse gjatës Lëvizja Flamingo, ajo po dëshmon vendosmërinë për të mos u zbrapsur deri në përmbushjen e plotë të saj.