VOAL

VOAL

Zemërimi i Khameneit: “Kryengritja është vepër e SHBA”

October 3, 2022

Komentet

Problemet kibernetike globale pezullojnë fluturimet dhe bllokojnë bizneset

Shumë kompani të mëdha ajrore në Shtetet e Bashkuara, i kanë anuluar fluturimet të premten, duke cituar probleme me komunikim, derisa kompani tjera mediale, banka dhe spitale në shumë vende të botës, kanë raportuar që kanë probleme me sistemet kompjuterike dhe që po u pamundësohet puna.

Në Kroaci raportohet të ketë rënë Sistemi Qendror Informativ Shëndetësor.

Televizioni britanik Sky News ka qenë për pak kohë jashtë transmetimit.

Policia në shtetin amerikan të Alaskës ka raportuar për bllokim të linjës për emergjenca – 911.

Në Australi, mediat, bankat dhe kompanitë kanë thënë se kanë hasur në probleme me internet, për të cilat Qeveria ka thënë se duket që lidhen me kompaninë globale për siguri kibernetike, Crowdstrike.

Kjo kompani krijon softuerë për të luftuar viruset kompjuterike dhe ka raportime që një përditësim në sistem ka shkuar keq.

Faqja Downdetector e kompanisë Crowdstrike ka gjetur probleme në qasje në shumë banka dhe kompani telekomunikimi.

Crowdstrike e ka lëshuar një mesazh të incizuar telefonik, me njoftimin se kompania është e vetëdijshme për raportimet e problemeve në sistemin operativ Windows të Microsoftit.

Nuk ka informacione që sugjerojnë që kjo ndërpreje përbën incident të sigurisë kibernetike.

Situata me fluturime në Evropë

Në Aeroportin Ndërkombëtar të Prishtinës “Adem Jashari”, nuk është raportuar për ndonjë vonesë.

Aeroporti në Berlin ka paralajmëruar që vonesa në fluturime do të ketë gjithë ditën.

Zëdhënësi i Aeroportit të Cyrihut ka thënë se nuk ka probleme, por fluturimet për Berlin i ka anuluar për shkak të problemeve atje.

Kompania e fluturimeve Lufthansa ka thënë se operacionet e saj janë prekur pjesshëm, dhe që mund të ketë anulime apo vonesa në fluturime.

Air Franc ka raportuar, gjithashtu, që fluturimet e kompanisë janë prekur si pasojë e problemeve me kompani tjera në gjithë botën.

Ngjashëm edhe linja holandeze KLM. REL

Rritja e kërkesës për rrymë “do t’i mbajë gjallë termocentralet me thëngjill”

Thëngjilli konsiderohet ndër ndotësit më të mëdhenj të ambientit.

 

Kërkesa për rrymë në botë është duke shënuar rritjen më të shpejtë në gati 20 vjet, për shkak të përdorimit të kondicionerëve, si pasojë e rritjes së temperaturave, ka thënë Agjencia Ndërkombëtare e Energjisë, në një raport të publikuar të premten.

Sipas gjetjeve, ky trend, që pritet të vazhdojë edhe më 2025, nënkupton vazhdimësinë e përdorimit të energjisë me thëngjill, ndonëse do të rriten kapacitetet e energjisë së ripërtrishme.

Shumë vende në botë janë duke regjistruar temperature rekorde dhe valë të të nxehtit.

Rritja e konsumit global të energjisë pritet të shkojë në gati 4 për qind më 2024 – më e madhja prej vitit 2007.

Rritje e njëjtë është parashikuar edhe për vitin 2025, në krahasim me 2.5 për qind të rritjes së kërkesës më 2023.

India pritet të jetë lidere në këtë aspekt, e pasuar nga Kina.

Në gjetjet e raportit është përmendur që në këtë periudhë do të rriten edhe kapacitetet për energji të ripërtrishme dhe që kjo energji të tejkalojë atë me thëngjill më 2025.

Megjithatë, mënyrat për prodhim të energjisë që shkaktojnë më shumë ndotje, siç është ajo me thëngjill, do të vazhdojnë të jenë të qëndrueshme, sidomos në Kinë.

Gjyqi kundër Evan Gershkovichit hyn në fazën finale

Gazetari amerikan, Evan Gershkovich, i cili po mbahet në burg në Rusi.

 

Një gjykatë në Rusi ka nisur të premten seancën me argumentet përmbyllëse në rastin e gazetarit amerikan, Evan Gershkovich, i cili është akuzuar për “spiunim” dhe po mbahet në burgun rus prej vitit të kaluar.

Ndalimi i tij është dënuar ashpër nga Shtetet e Bashkuara dhe gazeta për të cilën ka punuar, e përditshmja amerikane, Wall Street Journal.

“Gjykatësit kanë hyrë në dhomë. Leximi i argumenteve përmbyllëse ka nisur”, ka thënë zëdhënësja e gjykatës, Yekaterina Maslennikova.

Procesi gjyqësor po mbahet me dyer të mbyllura në Jekaterinburg, ku edhe është ndaluar Gershkovich.

Ai është arrestuar më 29 mars 2023, sa ka qenë në një udhëtim pune, dhe është akuzuar se ka tentuar të mbledhë sekrete ushtarake për t’ia dhënë Agjencisë Qendrore të Inteligjencës (CIA) në SHBA.

Ai është gazetari i parë që është arrestuar në Rusi nën akuzat për spiunim prej Luftës së Ftohtë.

Gershkovich, 32-vjeçar – ka lindur në SHBA dhe është i biri i imigrantëve që janë shpërngulur nga Bashkimi Sovjetik i dikurshëm.

Ai përballet me 20 vjet burgim, nëse shpallet fajtor.

Ambasada amerikane në Moskë ka thënë se autoritetet ruse kanë dështuar që të ofrojnë dëshmi për akuzat ndaj gazetarit dhe ka kërkuar lirimin e tij të menjëhershëm.

Arrestimi i tij ka ndodhur rreth një vit pasi Rusia ka miratuar ligje të reja, të cilat e kanë bërë vepër penale kritikën ndaj luftës së Rusisë në Ukrainë, të cilën Moska e quan “operacion special ushtarak”.

Gershkovich është një prej dy gazetarëve amerikanë që po mbahen në burgjet ruse.

Alsu Kurmasheva, me shtetësi ruso-amerikane, gazetare veterane e Radios Evropa e Lirë (REL), është ndaluar nga autoritetet ruse prej tetorit të vitit të kaluar, me arsyetimin se ka dështuar që të regjistrohet si “agjente e huaj”.

Një regjistrim i tillë është i detyrueshëm sipas një ligji rus që synon të shënjestrojë gazetarët, aktivistë të shoqërisë civile dhe ata që nuk kanë qëndrime të njëjta me pushtetin.

Kurmasheva është akuzuar ndërkohë edhe për përhapje të informacioneve të rreme për ushtrinë ruse dhe mund të përballet me 10 vjet burgim.

Radio Evropa e Lirë dhe Qeveria amerikane kanë thënë se akuzat ndaj saj janë hakmarrje për punën që ka bërë si gazetare për REL-in në selinë e kompanisë në Pragë. REL

Rusi, vazhdon gjyqi kundër gazetarit amerikan Gershkovich

Gazetari i ‘Wall Street Journal’ Evan Gershkovich qëndron i mbyllur në një qeli prej xhami në një gjykatë të Jekaterinburguyt të Rusisë më 26 qershor 2024.

 

VOA/Marrë nga Associated Press

Gazetari amerikan Evan Gershkovich u shfaq në seancën e dytë të procesit kundër tij në Rusi. Ai u arrestua në mars të vitit të kaluar me akuzën për spiunazh ndërsa ishte me detyrë nga gazeta ‘The Wall Street Journal’. Gazeta dhe zyrtarët amerikanë e kanë denoncuar gjyqin si të sajuar dhe të paligjshëm. Departamenti i Shtetit e ka shpallur atë ‘të arrestuar padrejtësisht’, një vendim që e detyron qeverinë amerikane të kërkojë më ngulm lirimin e tij.

Procesi ndaj gazetarit Gershkovich po mbahet me dyer të mbyllura në Jekaterinburg, qytet pranë maleve Urale ku ai u arrestua para më shumë se një viti. Ai akuzohet për spiunazh.

Gjatë seancës së parë, procesi u shty deri në mes të muajit gusht, por avokatët e gazetarit amerikan bënë kërkesë që procesi të vazhdojë me shpejtësi, njofton agjencia shtetërore ruse e lajmeve ‘RIA Novosti’ dhe faqja e pavarur e lajmeve në internet “Mediazoan”.

Zyra e Prokurorit të Përgjithshëm të Rusisë tha muajin e kaluar se gazetari akuzohet për “mbledhjen e informacioneve sekrete” me urdhër të CIA-s. Sipas akuzës, zoti Gershkovich po mblidhte informacion rreth Uralvagonzavod-it, një impiant rreth 150 kilometra në veri të Jakterinburgut që prodhon dhe riparon tanke dhe pajisje të tjera ushtarake.

Gazeta ‘The Wall Street Journal’ dhe zyrtarë amerikanë e kanë hedhur poshtë akuzën dhe e kanë denoncuar procesin si të jashtëligjshëm.

“Evan nuk ka punuar kurrë për qeverinë amerikane dhe ai nuk është spiun. Gazetaria nuk është krim dhe Evani nuk duhej të ishte arrestuar. Rusia nuk ka dhënë prova që të justifikojnë vazhdimin e paraburgimit të tij”, tha John Kirby, zëdhënës i Këshillit të Sigurisë Kombëtare muajin e kaluar kur Rusia filloi procesin gjyqësor kundër zotit Gershkovich.

Nëse shpallet fajtor, zoti Gershkovich mund të dënohet me 20 vjet burg.

Rusia ka sinjalizuar mundësinë e një shkëmbimi të burgosurish që përfshin gazetarin Gershkovich, por ajo thotë se paraprakisht duhet të merret vendim për gazetarin, një gjë që mund të marrë muaj të tërë.

Por edhe nëse merret një vendim i tillë, për të shkëmbyer të burgosurit mund të duhen muaj apo vite.

Është pothuajse e sigurt që gazetari Gershkovich do të dënohet. Gjykatat ruse dënojnë më shumë se 99% të të pandehurve. Prokurorët mund të apelojnë dënimet që i konsiderojnë si shumë të buta dhe madje mund të apelojnë edhe lirimin e tyre.

Gazetari i “The Wall Street Journal” është djali emigrantësh rusë nga Bashkimi Sovjetik. Ai është gazetari i parë amerikan që është arrestuar dhe gjykohet me akuzën për spiunazh në periudhën pas rënies së Bashkimit Sovjetik.

Departamenti i Shtetit e ka shpallur atë person ‘të arrestuar padrejtësisht’, një vendim që e detyron qeverinë amerikane të kërkojë më ngulm lirimin e tij.

Një tjetër gazetare amerikane, Alsu Kurmasheva mbahet në burg prej tetë muajsh për shkak se nuk u regjistrua si agjente e huaj. Gazetarja që ka edhe nënshtetësi ruse, e Radios Evropa e Lirë, që ashtu si Zëri i Amerikës, është pjesë e Agjencia Amerikane për Media Globale, mohon të ketë bërë ndonjë shkelje.

Porta e Shenjtë e Shën Marisë do të hapet nga Papa më 1 janar 2025, të çon në misterin e Mishërimit

Porta e Shenjtë e Shën Marisë së Madhe do të hapet nga Papa më 1 janar 2025. Bazilika, e ndërtuar me urdhër të Papës Liberius në vendin ku, në gusht 359, nisi një reshje e mrekullueshme bore, ruan brenda saj reliket e Djepit a Grazhdit të Shenjtë. Prandaj njihet si Sancta Maria ad Praesepem, kryevepër e artit mesjetar. Është fjala për skenën e lindjes së Krishtit nga Arnolfo di Cambio, një nga veprat më të lashta artistike të Lindjes së Krishtit.

Një ngjarje e mrekullueshme: një reshje bore në mes të verës në Romë. Ashtu si ia zbuloi Zoja në ëndërr Papës Liberius, Pasardhësit të 36-të të Pjetrit.

Image
Papa Liberius shënon perimetrin e bazilikës së S. Maria Maggiore në dëborë, Cappella Paolina, Santa Maria Maggiore

Perimetri i shënuar mbi borë

Është 5 gushti i vitit 359. Kodra Esquiline zbardhet nën flokët e dëborës. Flokët e rënë në tokë shënojnë perimetrin, mbi të cilin do të ndërtohet një tempull kushtuar Virgjërës. Është bazilika Santa Maria Maggiore, e njohur si “Liberiane”.

“Tempulli origjinal sigurisht që nuk ishte i tillë. Ishte një bazilikë shumë më modeste, me një navatë të vetme” – shpjegon për Vatican News Imzot Ivan Ricupero, Mjeshtër i Kremtimeve Liturgjike të Bazilikës Papnore në Santa Maria Maggiore.

“Gjithçka tjetër është shtuar gjatë shekujve. Bazilika u rindërtua në 432 me Papën Sixtus III. Mozaikët e harkut të triumfit të kujtojnë pikërisht atë çast historik”.

Betlehemi i dytë

Me Papën Sixtus III, Bazilika mori menjëherë, simbolikisht, karakterin e “Betlehemit të dytë”. Brenda saj u ndërtua një Orator i Lindjes, riprodhim besnik i shpellës në të cilën lindi Jezusi, i realizuar me gurë nga Toka Shenjte. Për më tepër, rreth mesit të shekullit të VII, pikërisht në vitin 644, këtu mbërriti dhurata e çmuar që Patriarku i atëhershëm i Jeruzalemit, Shën Sofroni, i bëri Papës Teodori I, me origjinë nga Jeruzalemi: reliken e Djepit Shenjt ose kunabulum.

Relikja e çmuar

Në atë kohë, sulme të shumta persiane kishin shkatërruar shumë vende të lidhura me kujtimin e jetës së Krishtit. Shenjtori, murgu dhe teologu i ardhshëm, mbrojtësi i flaktë i Ortodoksisë, i dhuroi Papës pesë shufra prej druri të fikut nga grazhdi i Betlehemit, së bashku me pelenat, mbi të cilat, sipas traditës, ruhet trupi i vogël i Jezusit në brendësi të relikuarit të çmuar prej kristali, të zbukuruar me basorelieve argjendi, krijuar nga Giuseppe Valadier në fillim të shekullit të tetëqindtë.

Është e vendosur në Confessio, e zbukuruar me mbi 70 mermere të ndryshme nga Piu IX, që përkujtohet nga një shtatore vigane, e gjunjëzuar, që shikon drejt mozaikut të absidës, ku soditet Kurorëzimi i Virgjërës.

Mesha e parë e Krishtlindjes

Prandaj nuk është rastësi që Bazilika Liberiane, e quajtur Sancta Maria ad Praesepem për shekuj me radhë u bë cak lutjesh për shtegtarët “romakë” gjatë kremtimit të Krishtlindjeve, si dhe objekt përkushtimi e bujarie të madhe nga ana e papëve dhe sovranëve. “Që atëherë, Mesha e Krishtlindjes u kremtua në këtë Bazilikë – vazhdon Imzot Ricupero – Pak e dinë se Nata e parë e Krishtlindjes u kremtua këtu. Më pas ky zakon u transmetua dhe u bë traditë liturgjike e Kishës Katolike në mbarë botën.

Image
Një hollësi e Djepit a Grazhdit të Shenjtë

Për shekuj me radhë, natën e 24 dhjetorit, Papa vinte këtu për të kryesuar meshën e mesnatës dhe deri para urgjencës së pandemisë, relikja u mbart me procesion përgjatë navatave për të kënduar Glorian “Lumni i qoftë Zotit në qiell – e paqe mbi tokë njerëzve vullnetmirë!”. “Që nga viti i kaluar”, saktëson prifti, “vendosëm ta nxjerrim sërish jashtë tekës së tij, të ngritur lart, në mënyrë që të nderohet natën e Krishtlindjes e deri në ditën e  Epifanisë – a të Ujit të Bekuar”.

Zhvendosja e  Oratorit të skenës së Lindjes

Oratori i lashtë i Skenës së Lindjes, që fillimisht ishte vendosur në navatën e djathtë të Bazilikës, falë një sistemi të sofistikuar rrotullash dhe çikrikësh të projektuar nga arkitekti Domenico Fontana, u zhvendos nën tabernakullin madhështor prej bronzi të praruar të Kapelës monumentale të të Shenjtnueshmit Sakrament, ndërtuar në vitin 1590 nga Papa Sixtus V Peretti, në përputhje me normat e Koncilit të Trentit.

Mesha e parë e Shën Injacit dhe vizioni i Shën Gajtanit të Thiene-s

I rrethuar nga afreske kushtuar paraardhësve të Krishtit dhe tregimeve të Virgjërës, Papa i Rilindjes paraqitet në murin e majtë të kapelës në monumentin funebër që i kushtohet: në lutje, me sytë drejtuar kah altari mesjetar i Oratorit të Shpellës së Betlehemit ku, në netët e Krishtlindjeve të 1517 dhe 1538, Shën Gajtani i Thienës pati vegimin mistik të  Krishtit Fëmijë e Shën Injaci i Lojolës kremtoi meshën e tij të parë. “Themeluesi i Shoqërisë së Jezusit”, shpjegon imzot Ivan Ricupero, “do të kishte dashur ta festonte në Betlehem, por nuk mundi ta bënte këtë për shkak të një sërë situatash të paparashikuara. Ai e realizoi ndjetin këtu, në Santa Maria Maggiore, në këtë vend që konsiderohet si Betlehemi i Romës”.

Betlehemi i Arnolfos

Në këtë mjedis u vendos ajo, që konsiderohet si skena më e vjetër e lindjes në historinë e skulpturës, e krijuar nga Arnolfo Di Cambio më 1289, porositur nga Papa i parë françeskan, Nikolla IV, më pak se shtatëdhjetë vjet pas paraqitjes së gjallë të Lindjes së Krishtit, realizuar nga Shën Françesku në Greccio.

Betlehemi i Arnolfo di Cambio

Nga kjo kryevepër unike e artit plastik mesjetar, e përmendur edhe nga Vasari, të paktën pesë statuja origjinale prej mermeri kanë mbijetuar: Shën Jozefi, dy Mbretër Dijetarë në këmbë, i treti që lutet në gjunjë, kokat e kaut dhe gomarit. Gjithë këtyre u shtohet Zoja me Foshnjën e ulur në një shkëmb dhe me përmasa më të mëdha: rreth një metër lartësi. Atribuimi i këtij të fundit Arnolfos është i diskutueshëm pasi, sipas disa studiuesve, u ripunua shumë në shekullin e gjashtëmbëdhjetë. Gjurmët e pigmentit të pranishëm në gur tregojnë se si Betlehemi origjinal prej guri, për të cilën nuk dihet numri i saktë i shtatoreve, duhet të ketë qenë i ngjyrosur.

Ashtu si barinjtë e thirrur nga engjëlli për lindjen e Shëlbuesit, në Vitin Shenjt 2025 shumë shtegtarë do të mbërrijnë në Bazilikën Liberiane, Betlehem i Perëndimit.

Papa do të hapë Derën e Shenjtë të Shën Marisë së Madhe më 1 janar 2025, në solemnitetin e Marisë, Nënës së Shenjtë të Zotit “Që në vitin 1390 – përfundon Imzot Ivan Ricupero – ka të dhëna që vërtetojnë se këtu ka pasur një derë shenjte, që besimtarët mund ta kalonin për të marrë dhuratën e faljes së mëkateve. Të vizitosh këtë Bazilikë të lidhur me Lindjen e Krishtit për shtegtarët dhe turistët është mundësi për t’iu afruar misterit të madh të Mishërimit”.

Image

Druri i fikut i Djepit të Shenjtë

Image

Inspektimi i relikteve të Djepit të Shenjtë

Image

Porta Shenjte e Shën Marisë së Madhe sn

SHBA-ja raportohet se u informua për një komplot iranian për vrasjen e Trumpit

Radio Evropa e Lirë

Një informator u tha autoriteteve amerikane së voni se Irani po bënte komplot për të vrarë ish-presidentin amerikan, Donald Trump, raporton CNN, duke cituar burime në dijeni për këtë çështje.

Në përgjigje, Shërbimi Sekret i SHBA-së e rriti sigurinë rreth Trumpit – me agjentë shtesë kundër-sulm dhe kundër-snajper, dronë dhe qen robotikë, raporton rrjeti televiziv.

Sipas burimit të njëjtë, Thomas Matthew Crooks, i cili u përpoq ta vriste Trumpin më 13 korrik, nuk duket se ka pasur lidhje me komplotin iranian.

Ish-zyrtarë të administratës Trump, përfshirë këshilltarin e tij për sigurinë kombëtare, John Bolton, dhe sekretarin e Shtetit, Mike Pompeo, thuhet se kanë marrë po ashtu kërcënime nga Irani.

Kjo, pasi Qasem Soleimani, ish-komandant i Forcave elitare Quds të Korpusit të Gardës Revolucionare të Iranit, është vrarë në janar të vitit 2020 në një sulm të forcave amerikane, nën komandaën e presidentit të atëhershëm, Trump.

Irani u zotua se do të hakmerrej për këtë vrasje.

Misioni i Iranit në Kombet e Bashkuara tha se raportet për komplotin iranian për vrasjen e Trumpit, janë “të pabazuara dhe keqdashëse”, dhe shtoi se Trump është “një kriminel që duhet të ndiqet penalisht dhe të dënohet në gjykatë”.

Anthony Guglielmi, zëdhënës i Shërbimit Sekret të SHBA-së, tha se ai dhe agjencitë e tjera “kanë marrë vazhdimisht informacione të reja për kërcënime të mundshme” dhe se ata “kanë ndërmarrë veprime për t’i përshtatur burimet sipas nevojës”.

“Ne nuk mund të komentojmë për ndonjë rrjedhë specifike të kërcënimeve, përveçse të themi se Shërbimi Sekret i merr seriozisht ato dhe përgjigjet në përputhje me rrethanat”, tha Guglielmi.

Adrienne Watson, zëdhënëse e Këshillit të Sigurisë Kombëtare të Shtëpisë së Bardhë, tha se zyrtarët amerikanë të sigurisë i kanë përcjellë me vite “kërcënimet e Iranit kundër ish-zyrtarëve të administratës Trump”.

“Këto kërcënime kanë lindur nga dëshira e Iranit për t’u hakmarrë për vrasjen e Soleimanit”, tha ajo, raporton BBC. “Ne e konsiderojmë këtë si çështje të sigurisë kombëtare me prioritetin më të lartë”, shtoi Watson.

Megjithatë, ajo përsëriti se hetimet “nuk kanë identifikuar lidhje” midis Crooksit dhe “ndonjë bashkëpunëtori të huaj apo vendas”.

Crooks qëlloi në drejtim të Trumpit, duke e plagosur në vesh, derisa ai po fliste në një tubim në Batlër të Pensilvanisë, më 13 korrik.

Një person në audiencë u vra dhe dy të tjerë u plagosën.

Crooks, 20 vjeç, u qëllua dhe u vra nga Shërbimi Sekret, por motivi i tij mbetet i paqartë.

Pas sulmit u ngritën pyetje sesi oficerët e policisë dhe agjentët përgjegjës për tubimin, e lejuan Crooksin të afrohej aq shumë.

Shërbimi Sekret pranoi se policia lokale ishte brenda ndërtesës, ndërsa Crooks ishte në çatinë e saj, duke shënjestruar Trumpin nga 130 metra largësi.

CBS News raportoi se tre snajperistë të policisë lokale ishin brenda ndërtesës dhe se e kishin parë Crooksin duke u ngjitur në çati.

Presidenti amerikan, Joe Biden, urdhëroi një rishikim të pavarur të mënyrës sesi personi i armatosur ka arritur deri aty.

Shërbimi Sekret do të përballet gjithashtu me hetime nga Kongresi.

Përgatiti: Valona Tela

Një diplomat i lartë i Koresë së Veriut u arratis për në Korenë e Jugut

Mësohet se një diplomat i profilit të lartë të Koresë së Veriut i vendosur në Kubë ka dezertuar për në Korenë e Jugut. Këtë e ka konfirmuar agjencia e spiunazhit të Seulit për BBC.

Këshilltari politik besohet të jetë diplomati më i lartë i Koresë së Veriut që është arratis për në Korenë e Jugut që nga viti 2016.

Diplomati ka dezertuar që në nëntor, tha Shërbimi Informativ Kombëtar (NIS). Hollësitë rreth dezertimeve të koreano-veriorëve shpesh duhen muaj që të dalin në dritë pasi të larguarit duhet të ndjekin kurse për shoqërinë koreano-jugore përpara se të integrohen zyrtarisht.

Mediat e Koresë së Jugut thonë se i larguari ishte një këshilltar përgjegjës për çështjet politike në ambasadën e Koresë së Veriut në Kubë.

Shërbimi sekret jugkorean NIS nuk e ka konfirmuar këtë për BBC.

Gazeta Chosun Ilbo tha se ishte në gjendje të intervistonte diplomatin, të cilin e identifikoi si 52-vjeçarin Ri Il Kyu.

Gazeta shtoi se ai u largua për shkak të “zhgënjimit me regjimin e Koresë së Veriut dhe një të ardhmeje të zymtë”.

Puna e tij thuhet se përfshinte ndalimin e Havanës nga krijimi i marrëdhënieve zyrtare diplomatike me Seulin.

Megjithatë, në shkurt, të dy qeveritë vendosën marrëdhënie zyrtare, në atë që u pa si një pengesë për Phenianin.

“Çdo koreano-verior mendon të paktën një herë për të jetuar në Korenë e Jugut”, citon gazeta të ketë thënë ai.

Dezertimi i fundit i njohur i profilit të lartë në Jug ishte ai i Tae Yong-ho në vitin 2016. Ai është ish-zëvendës ambasadori i Koresë së Veriut në Mbretërinë e Bashkuar.

Të dielën, Koreja e Jugut mbajti ceremoninë e saj të parë të Ditës së Dezertorëve të Koresë së Veriut.

Në fjalën e tij në ceremoni, presidenti i Koresë së Jugut, Yoon Suk Yeol premtoi mbështetje më të mirë financiare për dezertorët e Koresë së Veriut dhe stimuj tatimorë për kompanitë që i punësojnë ata.

Yoon, një konservator, ka marrë një qasje më të ashpër ndaj Koresë së Veriut, krahasuar me paraardhësin e tij Moon Jae-In.

Ai mbështet sanksionet kundër regjimit të Kim Jong Un dhe ka premtuar të zhvillojë teknologji për të kryer një sulm parandalues ​​ndaj Koresë së Veriut nëse Pheniani synon të sulmojë Seulin.

Dezertimi i fundit vjen në një kohë të tensioneve të rritura midis dy Koreve.

Udhëheqësi i Koresë së Veriut Kim Jong Un ka braktisur zyrtarisht qëllimin e ribashkimit me Jugun dhe gjithashtu së fundmi e ka quajtur Seulin si “Armikun numër Një” – një kthesë dramatike nga vetëm gjashtë vjet më parë kur ai takoi zyrtarisht udhëheqësin e atëhershëm të Koresë së Jugut, Moon Jae In.

Që atëherë, ka pasur një rritje të retorikës në të dy anët e kufirit.

Të dy vendet lëshuan balona propagandistike përgjatë qyteteve të tyre kufitare, me ato nga veriu që përmbanin mbeturina dhe parazitë.

Dhe më herët në qershor, Pheniani pretendoi se kishte testuar një raketë të avancuar me kokë bërthamore. REL

Një sulm me dron godet një fabrikë pajisjesh elektrike në Rusi

Harta e Rusisë – fotografi ilustruese

Një sulm i Ukrainës me dron i vuri flakën një fabrike të pajisjeve eletrike në qytetin Korenevo të rajonit Kursk të Rusisë, bëri të ditur guvernatori i përkohshëm i rajonit, Aleksei Smirnov, në një postim në Telegram.

Korenevo gjendet rreth 25 kilometra larg kufirit me Ukrainën.

“Asnjë nga punëtorët nuk u plagos”, tha Smirnov, duke shtuar se zjarri në fabrikë u shua nga ekipet e zjarrfikësve.

Ministria e Mbrojtjes e Rusisë tha se mbrojtja ajrore rrëzoi 13 dronë të Ukrainës gjatë natës së shkuar, përfshirë një dron mbi rajonin e Kurskut.

Ukraina nuk i komentoi këto pretendime.

Që nga fillimi i vitit 2024, kompani të shumta në sektorin e naftës në Rusi janë sulmuar me dronë, për ç’gjë njësitë e përpunimit primar të naftës kanë ndaluar së punuari në disa rafineri.

Siç raporton Reuters, në tremujorin e parë të këtij viti, së paku shtatë fabrika ruse ndaluan prodhimin.

U mbyll “Dasma e vitit” në Indi

Anant Ambani dhe gruaja Radhika Merchant gjatë festimeve të dasmës së tyre në Indi

Pas një muaji festimesh, djali i njeriut më të pasur në Azi (dhe i nënti në botë), Mukesh Ambani dhe e fejuara e tij u martuan. Por një dasmë e tillë shkakton edhe kritika të ashpra

VOAL- Një pritje martese të dielën mbuloi festimet e një muaji: Djali më i vogël i Mukesh Ambani, njeriu më i pasur i Azisë, u martua me të dashurën e tij prej shumë kohësh. Festimi kishte një kosto të papërcaktuar të vlerësuar në gjysmë miliardë dollarë.

Anant Ambani u martua me Radhika Merchant, vajzën e manjatëve farmaceutikë Viren dhe Shaila Merchant. Ritualet e dasmës, duke përfshirë çiftin duke shkëmbyer kurora dhe duke ecur rreth zjarrit të shenjtë, filluan të premten dhe përfunduan të shtunën.

Nusja dhe dhëndri u brohoritën nga miqtë dhe të afërmit në Jio World Drive të Mumbait – një qendër kongresesh në pronësi të familjes Ambani – si pjesë e ‘Mangal Utsav’ (pritja e dasmës që rezultoi në një festë madhështore), e cila shfaqi atë që shumë e kanë quajtur “dasma e vitit” në Indi.

Ish-kryeministrat britanikë Boris Johnson dhe Tony Blair, si dhe Kim dhe Khloe Kardashian, Priyanka Chopra dhe Nick Jonas, ish-kryeministri italian Matteo Renzi, mundësi dhe aktori amerikan John Cena, superyjet e Bollywood-it Amitabh Bachchan, Shahrukh Khan dhe Salman Khan ishin mes tyre. të famshmit që morën pjesë në ceremoni të premten dhe të shtunën.

Kryeministri indian Narendra Modi bekoi të sapomartuarit gjatë një pritjeje të organizuar nga Mukesh Ambani të shtunën, duke theksuar peshën në rritje të miliarderit edhe nga pikëpamja politike.

Ambani është njeriu i nëntë më i pasur në botë, me një pasuri neto prej 116 miliardë dollarësh sipas Forbes dhe është gjithashtu personi më i pasur në Azi. His Reliance Industries është një konglomerat me të ardhura vjetore prej më shumë se 100 miliardë dollarë, me interesa që përfshijnë petrokimikat, naftën dhe gazin, telekomunikacionin dhe shitjen me pakicë.

Familja Ambani zotëron, mes pasurive të tjera, një kompleks familjar 27-katësh në Mumbai me vlerë 1 miliard dollarë. Ndërtesa përmban tre platforma helikopterësh, një garazh për 160 makina dhe një kinema private.

Megjithatë, nuk munguan polemika të lidhura me ceremoninë. Pompoziteti i theksuar shkakton diskutim edhe në Indi, një vend ku varfëria mbetet e dukshme në të hapur dhe ku 1% e banorëve zotërojnë 40% të pasurisë. Shfaqja e kaq shumë bujari, në fakt, irriton shumë qytetarë që stigmatizojnë se si kaq shumë mirëqenie ekonomike ka përfunduar në kaq pak duar.

Është e vërtetë që marrëdhëniet e familjes Ambani me politikën janë të vjetra. Kritikët e Mukesh Ambani thonë se kompania e tij mbështetej në miqësitë politike gjatë qeverive të udhëhequra nga Partia e Kongresit në vitet 1970 dhe 1980 dhe nën qeverinë e Modi që nga viti 2014.AP/RSI

Varësia e Perëndimit nga lënda djegëse bërthamore ruse

VOA

Një analizë e Institutit Mbretëror të Shërbimeve të Bashkuara të Britanisë tregon se shumë vende perëndimore ende mbështeten tek lënda djegëse bërthamore ruse për përdorim në centralet bërthamore. Siç njofton korrespondenti i Zërit të Amerikës, Henry Ridgwell nga Londra, pavarësisht se Perëndimi është përpjekur të shkëpusë lidhjet ekonomike me Kremlinin pas agresionit të Rusisë në Ukrainë, vendet perëndimore ende varen nga lënda djegëse bërthamore ruse për të prodhuar energji elektrike.

Franca ka 56 reaktorë bërthamorë, që prodhojnë rreth dy të tretat e energjisë elektrike të vendit. Franca është gjithashtu një nga klientët më të mëdhenj të Rusisë për uraniumin e pasuruar që përdoret në centralet bërthamore, sipas një raporti të Institutit Mbretëror të Shërbimeve të Bashkuara, shkurtimisht RUSI, me seli në Londër.

Analiza vë në dukje se pavarësisht masave për të ndërprerë lidhjet ekonomike me Rusinë, disa vende perëndimore ende varen tek lënda djegëse bërthamore që tregtohet nga Rusia. Zëri i Amerikës bisedoi me autoren e raportit, Darya Dolzikova.

“Që nga fillimi i vitit 2022 Franca ka shtuar ndjeshëm importin e uraniumit të pasuruar nga Rusia. Një rritje prej 184%”.

Madje kompania franceze EDF po planifikon një sipërmarrje të përbashkët me kompaninë shtetërore ruse, Rosatom për përpunimin e uraniumit në Gjermani. Por nuk është vetëm Franca. Raporti detajon eksportet ruse për Shtetet e Bashkuara, Gjermaninë dhe Holandën.

“Rusia vazhdon të jetë eksportuesi më i madh në botë i uraniumit të pasuruar dhe shërbimeve të pasurimit. Në shkallë botërore, Rusia mbulon rreth 44% të kapacitetit total të shërbimeve të pasurimit”, thotë Darya Dolzikova me Institutin Mbretëror të Shërbimeve të Bashkuara.

Mbështetja botërore për energjinë bërthamore pësoi rënie pas incidentit në centralin bërthamor Fukushima të Japonisë në vitin 2011.

Mes përpjekjeve për uljen e ndotjeve nga karboni, shumë vende e kanë përqendruar vëmendjen tek energjia bërthamore. Në një takim të kohëve të fundit të Agjencisë Ndërkombëtare për Energjinë Atomike në Bruksel, disa udhëheqës bënë thirrje për riinvestim në energjinë bërthamore.

“Për të përshtatur zinxhirët e furnizimit sa më shpejt të jetë e mundur dhe gjithashtu për t’u shkëputur nga furnizimi rus. Por duhet që ne t’i balancojmë gjërat. Nëse duam të ulim ndotjet nga dioksidi i karbonit, ne duhet të sigurohemi që centralet tona bërthamore funksionojnë”, tha kryeministri belg, Alexander De Croo.

Instituti me seli në Londër, RUSI, vlerëson se gjatë vitit 2023 Rusia shiti në tregun global uranium të pasuruar me një vlerë prej rreth 2.7 miliardë dollarë.

Raporti thotë se janë rritur eksportet drejt Kinës, duke ngritur dyshime se Pekini mund të importojë uranium të pasuruar nga Rusia për të lehtësuar eksportet më të mëdha të furnizimit me uranium të pasuruar nga Kina.

“Sanksionet, ose çdo lloj kufizimi, duhet të jenë shumëpalëshe. Ose në të kundërt, si rezultat i kompleksitetit të furnizimit me uranium të pasuruar dhe zinxhirëve të furnizimit me lëndë djegëse, Rusia do të gjejë hallkën më të dobët të kufizimeve në përpjekje për vazhduar qasjen në tregjet perëndimore”, thotë Darya Dolzikova me Institutin Mbretëror të Shërbimeve të Bashkuara.

Vendet perëndimore po përpiqen të rrisin pavarësinë e tyre bërthamore. Franca po rrit kapacitetin e pasurimit të uraniumit me mbi 30%, sipas raporteve të industrisë bërthamore.

Firma amerikane Westinghouse dhe firma ukrainase Energoatom kanë filluar prodhimin e uraniumit të pasuruar që mund të furnizojë ish-reaktorët sovjetikë në Evropën Lindore, nga një objekt në Suedi.

Raporti thotë se do të duhen të paktën dy vjet që Perëndimi t’i japë fund varësisë nga lënda djegëse bërthamore ruse.

Moskë, dënohet në mungesë gazetarja amerikane Masha Gessen

Gazetarja amerikane Masha Gessen gjatë një aktiviteti në Nju Jork

 

VOA/Marrë nga Associated Press

Gazetarja dhe autorja amerikane Masha Gessen u dënua në mungesë të hënën nga një gjykatë në Moskë për akuzat për përhapje informacioni të rremë në lidhje me ushtrinë ruse. Asaj iu dhanë tetë vite burg.

Zonja Gessen ka lindur në Moskë dhe banon në Shtetet e Bashkuara. Ajo shkruan për revistën “The New Yorker” dhe për gazetën “The New York Times”. Zonja Gessen është ndër kritiket e presidentit rus Vladimir Putin dhe një shkrimtare e vlerësuar me çmime për krijimtarinë e saj.

Policia ruse futi emrin e saj në dhjetor në një listë të personave në kërkim dhe mediat ruse njoftuan se kjo ishte bërë për shkak të deklaratave të saj, gjatë një interviste me një bloger popullor rus në internet, mbi mizoritë në qytetin ukrainas Bucha.

Që nga shtatori i vitit 2022 intervista e saj ka marrë 6.5 milionë shikime në rrjetin YouTube. Në intervistë, zonja Gessen dhe bloggeri Yury Dud diskutonin për mizoritë e bëra më herët atë vit në qytetin ukrainas Bucha.

Forcat ukrainase që rimorën qytetin nga forcat ruse, gjetën të paktën 400 trupa burrash, grash dhe fëmijësh nëpër rrugë, shtëpi dhe varre masive, disa me shenja torturash. Zyrtarët rusë kanë mohuar me forcë që ushtarët rusë të kishin përgjegjësi dhe kanë proceduar penalisht disa personalitete publike ruse që kanë folur për Buchan.

Akuzat ndaj tyre u ngritën bazuar në ligjin rus të miratuar pak ditë pasi filloi sulmi në Ukrainë. Ligji i ri i bëri vepër penale të gjitha shprehjet publike për luftën që devijojnë nga versioni i Kremlinit. Rusia thotë se forcat e saj në Ukrainë godasin vetëm objektiva ushtarake dhe jo civilët.

Zonja Gessen ka dy shtetësi, atë amerikane dhe atë ruse. Ajo jetonte në Rusi deri në vitin 2013, kur vendi miratoi ligje kundër komunitetit LGBTQ+.

Ajo nuk ka gjasa të burgoset në Rusi, nëse nuk udhëton drejt një vendi që ka në fuqi marrëveshje ekstradimi me Moskën.

Që kur filloi sulmin në Ukrainë në shkurt 2022, Rusia ka shtypur me ashpërsi disidencën dhe ka vendosur në objektiv shtetas amerikanë.

Janë ngritur 1,053 çështje penale në Rusi ndaj protestuesve kundër luftës, sipas grupit të të drejtave të njeriut OVD-Info, i cili mbledh të dhëna për arrestimet politike dhe ofron ndihmë ligjore.

Po të hënën, shtetasi rus Richard Rose u shpall fajtor për përhapje informacioni fals për ushtrinë ruse në Bucha, tha OVD-Info. Edhe zoti Rose u dënua me tetë vite burgim.

Sipas OVD-Info, ai ishte shprehur në një video se “masakra në Bucha nuk do të harrohet kurrë… Fashistët rusë nuk do të falen kurrë për këtë”.

Në deklaratën e tij përfundimtare në gjykatë, zoti Rose tha se e konsideron veten të burgosur politik dhe se nuk do t’i ndryshojë pikëpamjet e tij, tha OVD-Info.

Përpjekje që “aparteidi gjinor” të njihet si krim

Forcat e sigurisë në Iran duke ua tërhequr vërejtjen grave për ta veshur sipas rregullave hixhabin e tyre.

 

Radio Azadi

Prej kohësh, bota ka qenë e vetëdijshme për dëmin e shkaktuar nga aparteidi – ndarjes sistematike apo diskriminimit të njerëzve bazuar në racën e tyre. Po praktika e instutucionalizuar e veçimit dhe keqtrajtimit të njerëzve për shkak të gjinisë?

Përpjekjet që “aparteidi gjinor” të njihet në të drejtën ndërkombëtare janë intensifikuar, me shtypjen e grave dhe vajzave në Afganistan dhe Iran që kanë rritur thirrjet për veprim të menjëhershëm. Megjithatë, ende ka pengesa të mëdha.

Çfarë duan grupet për të drejtat e njeriut?

Avokuesit duan një përkufizim të qartë të aparteidit gjinor si krim në bazë të ligjit ndërkombëtar. Aktualisht, vetëm “ndjekje penale” me bazë gjinore njihet si krim kundër njerëzimit. Por, grupet e të drejtave të njeriut dhe aktivistët thonë se koncepti i ndjekjes penale nuk pasqyron shkallën e vërtetë të shkeljeve që kryen në sisteme ku aparteidi gjinor është i institucionalizuar.

Qëllimi është që Kombet e Bashkuara të mbushin këtë boshllëk duke mbrojtur ligjërisht gratë dhe vajzat nga shkeljet sistematike dhe dhuna.

Mbrojtësit e të drejtave të grave afgane vlerësohet se janë të parët që kanë artikuluar konceptin e aparteidit gjinor në vitet ’90, gjatë regjimit të parë të talibanëve.

Që kur talibanët u rikthyen në pushtet më 2021, grupi islamist i linjës së ashpër ka rikthyer politikat shtypëse ndaj grave dhe vajzave, përfshirë edhe kufizimet e ashpra për dukjen e tyre, lirinë e lëvizjes dhe të drejtën e punësimit dhe arsimimit.

Hoda Khamosh, aktiviste afgane për të drejtat e grave, tha se njohja e aparteidit gjinor do të sillte përfitime të mëdha për të drejtat e grave në këtë shtet.

“Ne do të ishim në gjendje të mbanin përgjegjës autoritetet dhe kryesit e dhunës me bazë gjinore dhe të diskriminimit kundër grave”, tha Khamosh për Radion Azadi të Radios Evropa e Lirë.

Ndërkaq, aktivistët për të drejtave e grave iraniane thanë se institucionalizimi i diskriminimit të grave në Republikën Islamike është aparteid gjinor.

Ekspertët e OKB-së thanë se zbatimi i dhunshëm i ligjit për hixhabin dhe ndëshkimet e grave dhe vajzave që dështojnë të veshin shaminë e kokës mund të përshkruhen si një formë e aparteidit gjinor.

Kur duan që aparteidi gjinor të njihet si krim?

Sot. OKB-ja është duke e shqyrtuar miratimin e një Traktati të madh që do të bashkonte nënshkruesit kundër krimeve kundër njerëzimit. Dhjetëra grupe për të drejtat e njeriut dhe qindra individë në mars nënshkruan një deklaratë përmes së cilës bënë thirrje që aparteidi gjinor të përfshihet në draft-listën e krimeve të tilla.

Ata shpresojnë që Asambleja e Përgjithshme e OKB-së do të miratojë procedurat për nisjen e negociatave për traktatin gjatë mbledhjes së ardhshme, në shtator.

Rrugë e vështirë

Përderisa koncepti i aparteidit gjinor gjithnjë e më shumë po përdoret nga OKB-ja dhe organizatat ndërkombëtare, veçmas në lidhje me shkeljet ndaj grave dhe vajzave në Afganistan dhe Iran, por po ashtu ka pasur mundësi të humbura.

Gjatë bisedimeve në Doha me talibanët – të organizuara nga OKB-ja – në fillim të korrikut, për shembull, gratë nuk kishin një ulëse në tavolinën e bisedimeve.

Aktivistët për të drejtat e njeriut, që kërkojnë njohjen e aparteidit gjinor dhe bëjnë thirrje për sanksionimin e atyre që bëjnë shkelje të tilla, kanë akuzuar OKB-në se po i jep legjitimitet sundimit të talibanëve dhe po e tradhton angazhimin e saj ndaj të drejtave të grave.

“Komuniteti ndërkombëtar ka obligim moral për të siguruar mbrojtje për të drejtat e grave afgane dhe të respektojë parimet e drejtësisë dhe barazisë në çdo angazhim me talibanët”, tha Sima Samar, ish-kryetare e Komisionit të Pavarur të të Drejtave të Njeriut në Afganistan (AIHRC). Këtë deklaratë ajo e bëri për CIVICUS, që është një aleancë globale e organizatave të shoqërisë civile.

Burgim dhe vdekje në Iran

Sikurse talibanët në Afganistan, regjimi klerik i Iranit është cilësuar nga organizatat e të drejtave të njeriut si “regjim i aparteidit gjinor”.

Laureatja e Çmimit Nobel për Paqe, Shirin Ebadi, e cila është aktiviste iraniane për të drejtat e njeriut dhe që jeton në mërgim, është në mesin e nënshkruesve kyçë të përpjekjes globale për T’i Dhënë Fund Sot Aparteidit Gjinor.

Kjo lëvizje, duke përmendur përpjekjen e suksesshme të komunitetit ndërkombëtar për t’i dhënë fund aparteidit në Afrikën e Jugut dekada më parë, theksoi se grave në Iran nuk u lejohet të studiojnë në shumë fusha, nuk u lejohet të marrin pjesë në ngjarje sportive, të kenë pasaportë apo të udhëtojnë jashtë shtetit pa lejen e bashkëshortëve të tyre.

Kjo lëvizje tha se qëllimi i autoriteteve është që të mbajnë gratë të nënshtruara ndaj burrave dhe ndaj shtetit përmes një sistemi ligjesh. Shkeljet mund të çojnë në “dhunë, burgim dhe vdekje”.

“Situata në Republikën Islamike të Iranit dhe në Afganistanin nën sundimin talibanë nuk janë thjesht raste të diskriminimit gjinor”, tha lëvizja, duke bërë thirrje për mbështetje. “Përkundrazi, këto sisteme po kryejnë një luftë më ekstreme, sistematike dhe strukturore kundër grave të dizajnuara për të dehumanizuar dhe shtypur ato me qëllim të forcimit të pushtetit”. Radio Evropa e Lirë

Përgatiti: Mimoza Sadiku

Send this to a friend