Shtetet e Bashkuara duket se po rrisin përpjekjet për të hapur Ngushticën e Hormuzit, duke dërguar avionë luftarakë për të goditur anije iraniane dhe helikopterë Apache për të rrëzuar dronë të Iranit, raportoi sot The Wall Street Journal, duke cituar burime nga zyrtarë ushtarakë amerikanë.

Sipas raportimit, intensifikimi i operacionit nga Pentagoni synon të reduktojë kërcënimet nga Irani, i cili ka ndërprerë lundrimin në Ngushticën e Hormuzit që nga fillimi i marsit.

Nëse kërcënimi zvogëlohet, SHBA mund të dërgojë anije luftarake përmes ngushticës, siç është zotuar të bëjë Donald Trump, dhe të shoqërojë anijet që hyjnë dhe dalin nga Gjiri Persik, me qëllim “çlirimin” e tregtisë së naftës dhe karburanteve.

Megjithatë, sipas The Wall Street Journal, pritet të duhen disa javë që SHBA të neutralizojë rrjetet strategjike iraniane, të cilat kanë shkaktuar tronditje serioze në një pikë kyçe që përpunon rreth 20% të eksporteve globale të naftës dhe një pjesë të madhe të transportit detar tregtar.

Gjatë një konference për shtyp në Pentagon, gjenerali i Forcave Ajrore Dan Caine, kryetar i Shefave të Përbashkët të Shtabit, konfirmoi operacionin, duke deklaruar se avionët e rëndë të armatosur A-10, të njohur si “Warthog”, si dhe helikopterët Apache, po kryejnë misione mbi Ngushticën ose përgjatë bregdetit jugor të Iranit.

“Avionët A-10 Warthog janë tashmë aktivë në frontin jugor, duke goditur mjetet e shpejta sulmuese në Ngushticën e Hormuzit”, u tha Dan Caine gazetarëve. Ai shtoi gjithashtu se helikopterët Apache “janë përfshirë në betejë në frontin jugor”.

Sipas tij, disa aleatë, pa i përmendur konkretisht, po përdorin Apache për të “kundërshtuar sulmet nga dronë njëpërdorimësh”, të cilët konsiderohen ndër armët më efektive që Irani ka përdorur për të goditur vendet arabe fqinje dhe infrastrukturën e tyre energjetike në Gjirin Persik.

Ndërkohë, çmimet e naftës ranë në orët e para të mëngjesit të së premtes në tregjet aziatike, vetëm pak orë pas konferencës për shtyp të kryeministrit izraelit një natë më parë, gjatë së cilës Benjamin Netanyahu deklaroi se Irani “po dobësohet ndjeshëm” dhe se lufta mund të përfundojë “më shpejt” sesa mendohej.

Çmimi i naftës Brent të Detit të Veriut ra me 2,55%, duke arritur në 105,88 dollarë për fuçi, pasi një ditë më parë kishte shkuar pranë 120 dollarëve.

Në të njëjtën kohë, çmimi i naftës amerikane të referencës WTI ra me 2,46%, në 93,20 dollarë për fuçi. Deklaratat e kryeministrit izraelit “qetësuan” tregjet, sipas vlerësimit të Stephen Innes nga SPI Asset Management. gsh