Sot shënohet dita e 100-të e protestave kundër qeverisë, ndërsa në Tiranë pritet të zhvillohet një tubim i madh qytetar. Pas 100 ditësh protestash dhe marshimesh, aktivistët kanë bërë thirrje për pjesëmarrje masive në protestën e sotme, duke e cilësuar këtë ditë si një moment të rëndësishëm për vijimin e aksionit qytetar.

Protesta e sotme vjen pas tubimit të zhvilluar një ditë më parë, kur qytetarët vijuan marshimin në kryeqytet dhe përsëritën kërkesat e tyre për ndryshim politik. Në qendër të thirrjeve të protestuesve janë dorëheqja e kryeministrit Edi Rama dhe krijimi i një qeverie teknike.

Për protestën e ditës së 100-të, aktivistët kanë bërë thirrje që qytetarët të bashkohen jo vetëm nga Tirana, por edhe nga qytete të tjera të vendit. Aktivisti Ilir Xhemalaj ka kërkuar pjesëmarrje masive dhe ka deklaruar se aksioni duhet të vijojë përmes mosbindjes civile.

Në deklaratat e bëra gjatë ditëve të fundit, aktivistët kanë paralajmëruar edhe përshkallëzim të protestave. Ata kanë folur për vijimin e mosbindjes civile dhe kanë përmendur bllokimin e institucioneve dhe rrugëve si forma të mundshme të aksionit.

Protesta e sotme pritet të jetë një nga tubimet më të rëndësishme të kësaj periudhe, ndërsa mbetet për t’u parë nëse thirrjet për pjesëmarrje masive do të shoqërohen me një mobilizim të gjerë qytetar dhe nëse lëvizja do të kalojë në një fazë të re të mosbindjes civile. bw

Protesta kundër qeverisë hyn sot në ditën e 99-të, ndërsa qytetarët pritet të rikthehen para godinës së Kryeministrisë për të vijuar tubimet e tyre.

Pas afro 100 ditësh protestë, kërkesa e qytetarëve mbetet e pandryshuar: largimi i Edi Ramës nga posti i kryeministrit, dorëheqja e qeverisë dhe ngritja e një kabineti tranzitor.

Një tjetër pikë e rëndësishme e qëndrimit të protestuesve lidhet me disa prej ligjeve të miratuara nga qeveria. Ata kërkojnë të tërhiqen ligji për investimet strategjike dhe ai për zonat e mbrojtura, të cilat prej kohësh janë kundërshtuar nga qytetarë dhe grupe opozitare.

Në prag të nisjes së sesionit të ri parlamentar, protesta pritet të marrë një tjetër formë. Për 8 shtatorin është paralajmëruar përshkallëzim i aksionit, ndërsa protestuesit kanë bërë të ditur se do të presin deputetët me vezë, në shenjë revolte ndaj mazhorancës.

Organizatorët dhe pjesëmarrësit deklarojnë se nuk kanë ndërmend ta ndërpresin protestën. Sipas tyre, qëndrimi në shesh do të vijojë derisa të realizohet kërkesa për ndryshimin e qeverisjes dhe largimin e kabinetit aktual. bw

Pamje të rënda janë regjistruar pas zjarrit masiv që përfshiu zonën e Himarës, duke lënë pas dëme të konsiderueshme në banesa dhe në sipërfaqe me ullinj.

Flakët përfshinë një sipërfaqe të gjerë, ndërsa banorët u përballën me një situatë të vështirë për shkak të përhapjes së shpejtë të zjarrit.

Në pamjet e siguruara pas shuarjes së flakëve, shihen banesa të dëmtuara dhe pemë ulliri të djegura, ndërsa në disa zona ka mbetur vetëm hiri.

Zjarri ka shkaktuar dëme të konsiderueshme në pronat dhe tokat bujqësore të banorëve, ndërsa vijon evidentimi i pasojave dhe i sipërfaqeve të prekura.

Zjarri vijon të jetë masiv, por nuk kërcënon më banesat. bw

Sot shënohen 10 vite nga shenjtërimi i Nënë Terezës, Anjezë Gonxhe Bojaxhiut, si dhe 29 vite nga vdekja e saj.

Ajo u shpall shenjtore nga Papa Françesku, duke marrë emrin Shën Tereza e Kalkutës. Ceremonia e shenjtërimit u zhvillua në Sheshin e Shën Pjetrit në Vatikan dhe u drejtua nga Papa, në kuadër të Jubileut të Mëshirës. Në ceremoni morën pjesë më shumë se 120 mijë besimtarë, mes tyre edhe shumë shqiptarë.

Nënë Tereza, fituese e Çmimit Nobel për Paqen, u shpall shenjtore pas njohjes nga Kisha Katolike të dy mrekullive të lidhura me shërimin e personave të sëmurë pas vdekjes së saj.

Papa Françesku vendosi gjithashtu emrin e Shën Terezës së Kalkutës në Kalendarin e Përgjithshëm Romak, ndërsa 5 shtatori, dita e vdekjes së saj në vitin 1997, u përcaktua si dita e përkujtimit liturgjik të shenjtores.

Procesi i lumturimit të Nënë Terezës kishte nisur më herët. Në tetor 2003, Papa Gjon Pali II e shpalli të lumturuar, pasi Vatikani njohu mrekullinë e parë të lidhur me ndërmjetësimin e saj. Bëhej fjalë për shërimin e një gruaje 30-vjeçare në Kalkutë, e cila vuante nga një tumor në stomak. Një komitet i Vatikanit vlerësoi se shërimi nuk mund të shpjegohej nga pikëpamja shkencore.

Në Shqipëri, 5 shtatori është përcaktuar si ditë përkujtimore për Nënë Terezën, duke zëvendësuar datën 19 shtator, e cila më parë shënonte Ditën e Lumturimit të saj.

Po më 5 shtator shënohet edhe Dita Ndërkombëtare e Bamirësisë, e shpallur nga Asambleja e Përgjithshme e Kombeve të Bashkuara në nder të Nënë Terezës.

Anjezë Gonxhe Bojaxhiu lindi më 26 gusht 1910 në Shkup. Në vitin 1929 ajo nisi misionin e saj në Kalkutë dhe në vitin 1950 themeloi Kongregatën e Misionareve të Dashurisë. Përmes këtij misioni, ajo iu përkushtua përkujdesjes ndaj njerëzve të varfër, të sëmurë dhe në nevojë në vende të ndryshme të botës.

Në vitin 1979, Nënë Tereza u nderua me Çmimin Nobel për Paqen për punën e saj humanitare. Ajo kërkoi që fondet e çmimit të përdoreshin për të ndihmuar të varfrit.

Nënë Tereza e vizitoi Shqipërinë pas rënies së regjimit komunist, ndërsa kishte ardhur në vend edhe më herët, në vitin 1989. Gjatë vizitave të saj ajo takoi familje me të cilat kishte lidhje farefisnore, fëmijë, besimtarë dhe autoritete të larta të vendit.

Në Shqipëri ajo kontribuoi gjithashtu në hapjen e shtëpive të Misionareve të Dashurisë, të cilat vijojnë të ofrojnë shërbime për njerëzit në nevojë.

Nënë Tereza u nda nga jeta më 5 shtator 1997, në moshën 87-vjeçare. Sot, 29 vite pas vdekjes së saj dhe 10 vite pas shenjtërimit, ajo vijon të konsiderohet një prej figurave më të njohura të humanizmit dhe bamirësisë në botë. gsh

Protesta kundër qeverisë hyn sot në ditën e 98-të, me qytetarët që pritet të mblidhen sërish në Tiranë për të vijuar aksionin e tyre dhe kërkesën për dorëheqjen e kryeministrit Edi Rama.

Qëndresa e përditshme tashmë po i afrohet një tjetër momenti të rëndësishëm. Të hënën mbushen 100 ditë nga nisja e protestave dhe nga sheshi është paralajmëruar një mobilizim më i madh, me thirrje drejtuar qytetarëve nga e gjithë Shqipëria për t’iu bashkuar tubimit në kryeqytet.

Dita e 97-të solli ndërkohë disa zhvillime. Protesta e së premtes nisi që në paradite përpara Gjykatës Penale, ku qytetarët u mblodhën në mbështetje të protestuesve të arrestuar pas tensioneve të 1 shtatorit përpara Kryeministrisë.

Gjykata vendosi lirimin e 14 protestuesve të arrestuar. Vendimi u prit si një fitore nga aktivistët, të cilët deklaruan se ndalimet nuk do ta ndërpresin protestën dhe se aksioni do të vazhdojë.

Në mbrëmje, qytetarët u mblodhën sërish në sheshin “Skënderbej” dhe më pas marshuan drejt Kryeministrisë. “Rama jep dorëheqjen” dhe “Arrestoni Ramën” ishin ndër thirrjet që shoqëruan marshimin, ndërsa protestuesit mbanin pankarta me mesazhe kundër qeverisë dhe në mbështetje të të arrestuarve të ditëve të fundit.

Pas fjalimeve përpara Kryeministrisë, protesta nuk u mbyll aty. Qytetarët vijuan marshimin përgjatë bulevardit dhe rrugëve të kryeqytetit, duke përsëritur kërkesën për largimin e Ramës dhe duke paralajmëruar vazhdimin e protestave.

Në qendër të fjalimeve ishte edhe ajo që pritet të ndodhë të hënën. Aktivistët kanë bërë thirrje për pjesëmarrje masive në ditën e 100-të, ndërsa është paralajmëruar rrethimi i Kryeministrisë. Krahas dorëheqjes së Ramës, nga protesta është artikuluar edhe kërkesa për largimin e qeverisë dhe krijimin e një qeverie teknike.

Protestuesit kanë sinjalizuar gjithashtu se aksioni do të zhvendoset edhe përpara Parlamentit me rinisjen e sesionit parlamentar. Kuvendi rikthehet të martën, më 8 shtator, vetëm një ditë pas protestës së 100-të, duke paralajmëruar një fillim jave me tension të lartë politik. bw

“Natyra mbrohet me shkencë, me transparencë dhe në terren”, kështu e mbyll statusin e tij përmes facebook-ut Ministri i Mjedisit Sofjan Jupaj, të cilin ATSH e ka botuar nën titullin “Përfundon procesi dyvjeçar i rivlerësimit të Monumenteve të Natyrës”. Në se ky studim i përket një periudhe dy vjeçare të bën të kuptosh se ministri Jupaj është i përditësuar sa duhet me studimin e trashëguar nga ministrja e mëparshme Mirela Kumbaro që mbulonte njëkohësisht sektorët në konflikt interesash Turizmin dhe Mjedisin. Duke mbajtur vetëm njërin që prej shtatorit 2025 nga CV e Sofjan Jupaj ka një hark kohor të rëndësishëm prej lindjes deri tani që dorëzon Rivlerësimin e Monumenteve. Ai u lind në muajin Shkurt të 1991, kur ra monumenti i diktatorit Hoxha dhe u diplomua në vitin 2013 kur në piedestalin bosh vuri këmbët rilindësi Rama.

Protestuesit e arrestuar mbrëmjen e 1 shtatorit, pasi rrethuan godinën e Kryeministrisë teksa kryeministri Edi Rama ndodhej brenda në zyrën e tij, janë lënë të lirë nga Gjykata e Tiranës, e cila e konsideroi arrestimin të jashtëligjshëm.

Ndaj protestuesve kishte dyshime për veprat “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Prishja e qetësisë publike” dhe “Pengimi i qarkullimit të mjeteve të transportit”.

Gjatë seancës gjyqësore, protestuesit kërkuan deklarimin e paligjshëm të arrestimit dhe lirimin pa asnjë masë sigurie, duke këmbëngulur se nuk kanë kryer asnjë vepër penale.

Teksa brenda në gjykatë zhvillohej seanca, jashtë dyerve të saj qytetarët bënin thirrje të vazhdueshme për lirimin e protestuesve dhe arrestimin e zyrtarëve të lartë, me brohoritjet: “Arrestoni Ramën, arrestoni Ballukun!”.

Shtetasit Dritan Goxhaj, Junik Matoshi, Edison Lika, Erlind Almeta, Sokol Bushi, Lulzim Gjini, Valtion Shameti, Florian Manarkolli, Desiderjo Alimuçaj, Bora Mitrovica, Arvina Lleshi, Ylli Brahaj, Arben Kola dhe Aumiraldi Dalliu u arrestuan mbrëmjen e 1 shtatorit, pasi rrethuan godinën e qeverisë sapo u mësua se kryeministri ndodhej brenda. Pas disa orësh rezistencë nga ana e protestuesve, kryeministri e la zyrën nën masa të rrepta sigurie. Protestat qytetare vijojnë prej më shumë se tre muajsh, ku qytetarët kërkojnë dorëheqjen e shefit të ekzekutivit. bw

Fotografia e shtëpisë së familjes Jashari pas shkatërrimit nga ana e forcave serbe më 1998, Prekaz, pjesë e një ekspozite më 2014.

Për të 97-ën ditë radhazi, qytetarët pritet të mblidhen sërish sot në Tiranë për të vijuar protestën kundër qeverisë. Qëndresa, e cila ka hyrë tashmë në muajin e katërt, vijon me kërkesën kryesore për dorëheqjen e kryeministrit Edi Rama, ndërsa protestuesit kërkojnë edhe ndryshim të sistemit politik.

Protesta e mbrëmshme shënoi ditën e 96-të të mobilizimit. Qytetarët u mblodhën fillimisht përpara Kryeministrisë dhe më pas marshuan në rrugët e Tiranës, me flamuj kombëtarë dhe flakadanë. “Rama në burg, Berisha në burg”, “Ju erdhi fundi” dhe “Shqipëri e Re” ishin ndër thirrjet e përsëritura gjatë tubimit.

Protesta ka marrë prej kohësh karakter të përditshëm. Ajo nisi si reagim ndaj projektit të Zvërnecit, por me kalimin e javëve kërkesat u zgjeruan dhe lëvizja u pozicionua kundër qeverisë dhe klasës së vjetër politike. Në protestat e mëparshme janë artikuluar njëkohësisht thirrje kundër Ramës dhe Berishës, si dhe kërkesa për një sistem të ri politik.

Ditët e fundit klima është tensionuar. Protesta e 1 shtatorit u shoqërua me përplasje me Policinë dhe shoqërime, duke bërë që dje dhe pardje qytetarët të marshojnë drejt Bllokut të Sigurisë, duke kërkuar lirimin e personave të arrestuar. “Nuk jeni vetëm” dhe “Lironi çunat, lironi gocat” ishin thirrjet që shoqëruan marshimin.

Edhe mbrëmjen e djeshme protestuesit përsëritën se nuk kanë ndërmend ta ndërpresin qëndresën dhe se tubimet do të vazhdojnë deri në realizimin e kërkesave të tyre.

Në shesh kanë marrë fjalën gjatë këtyre ditëve qytetarë, aktivistë dhe përfaqësues të medias, të cilët kanë ngritur çështje që shkojnë nga korrupsioni dhe kostot e jetesës te arsimi, shëndetësia dhe mënyra e funksionimit të institucioneve.

Gazetari Osman Stafa e lidhi protestën me pakënaqësinë sociale dhe kërkoi vijimin e rezistencës, ndërsa denoncoi edhe arrestimet e protestuesve.

Kritika ndaj qeverisë pati edhe nga aktivisti Tomi Progni, i cili e akuzoi ekzekutivin se është më i fokusuar te komunikimi dhe rrjetet sociale sesa te problemet e qytetarëve.

Pavarësisht se protesta ka hyrë në ditën e 97-të, organizatorët dhe pjesëmarrësit nuk kanë dhënë sinjale tërheqjeje. Përkundrazi, slogani “Nesër më shumë” është përdorur vazhdimisht si mesazh për vijimin e tubimeve. bw

Qytetarëve me një formim të përgjithshëm kur i sjell në mendje Arkimedin (287-212 p.k). mes ligjeve të praktikuara ata/ato do të jepnin përgjigjen ose do të shpjegonin se dy prej tyre i kanë të mirë provuar.

Pikën e mbështetjes dhe Pasqyrën.

Le ta shohim këtë si Protesta Qytetare dhe kryeministri i padorëhequr.

Shpresojmë se gjatë këtij shënimi që nuk do të zgjasë si në konfuzionin 90 minutësh që dha Rama në GPS e së Mërkurës, 3 Shtator, 2026, mund të kuptojmë dy tre gjëra kryesore.

Peshën dhe rëndësinë e tyre ndoshta gjithsekush do t’ia japë vetë pa emocion dhe mbi bazë të qartësisë se si e njohin sot realitetin e shoqërisë shqiptare dhe se çfarë ata/ato duan që ai vend të ndryshojë dhe të zhvillohet.

Largimi i ministres së shëndetësisë, dorëheqja e Prof. Evis Sala u zëvendësua menjëherë nga deputetja e PS Klodiana Spahiu me një vjetërsi 17 vjeçare në politikë që prej kur u zgjodh dhe që sot pa dashur të shkojmë në CV e saj, po tregojmë se Znj. Spahiu është ende zv/kryetare e Kuvendit të RSH-s deri në fillimin e sesionit të ri (më 7 Shtator).
Mediat pranë qeverisë dhe ato portale nga më të besueshmet prime time me siguri që do ta shtjellojnë profilin e saj. Të njëjtën gjë bëri edhe ATSH kur e dha njoftimin, por në CV e saj nuk pamë ose dalluam kontributin më pikant që lidhet me ditët dhe gjendjen e sotme të Shqipërisë, ose Shqipërisë dhe BE-së më konkretisht. Njoftimi lë pa përmendur ministren e sapo propozuar që dha kontribut në propozimin e Ligjit 21/2024 “Për Zonat e Mbrojtura”* , i cili u mbështet  nga Ministrja për Turizmin dhe Mjedisin Mirela Kumbaro, u votua me shumicë kartonash socialistë dhe u dekretua më 18 Mars, 2024 nga presidenti Begaj.

E megjithëse nuk u përmend, pjesa tjetër e së fshehtës është parlamenti.

A do ketë një drejtim të ri kryesia e Kuvendit?

Ky është paralajmërimi më shumë se sa emërimi i një ministri/e.

Në se ndryshimi i ministreve pas dorëheqjes nuk kalon me togfjalëshin “shërim të shpejtë”, leksioni i Ramës mbi ‘Besën’, ‘Praninë Besnike’, ‘Pasqyra Albania”, ‘Shkalla e Meritave’ e deri tek kundërvënia provokuese me protestën “Pasqyra e Flamingove”, këto janë ca teori mëndjembushëse që vetëm Rama i kupton. Shkaktar i turbullimeve që i ngjashëm me  formatet “Sy m’sy”, “Flasim” dhe “Akademia Politike Socialiste”, pa asnjë produkt veç fuqisë autokratike dhe ideologjizimit të ndjekës ë të tij dhe ku ka bërë që të luaj aq shumë kukamçeftas* me drejtësinë gjithë këto vite sa që qëndrimin në pushtet e quan reformë politikë. E bukura e kësaj është se vetë Rama rri jashtë e të tjerët u duhet ta gjejnë.

Nuk do të ndalemi në inflacionin teorik dhe shpjegimet e panumërta, pasi frytet rilindase piqen shpejtë në daljet televizive dhe pushtimin e mediave sociale  për të na shpjeguar seç çdo të thoshte
Rama sot.

Disa nënvizime që mund të dalin nga një tjetër këndvështrim janë gjendjet si:

1-Kaos, tymnajë dhe diversion.

2-E-Albania një aplikim që mes shërbimeve që thuhet se kryen, po përsos njëkohësisht listën e  të larguarve nga Shqipëria. Çdo informacion në duart e një shteti të korruptuar dhe të pa sinqertë në lidhje me shtetasit e vet është një lloj tjetër përndjekje dhe persekutimi.

3- Merita si të ishte një emër femëror, tani  na rri përpara pasqyrave. Atyre që u vë përpara kryeministri edhe kur thotë “Pasqyra e Flamingove”.  Ornitologët  mund ta shpjegonin edhe më mirë shkencërisht rrezikun e Pasqyrës së Flamingove. Me shpendët (MRS-ja ose Njohja e Vetes nga Pasqyra) nënkupton si sjelljet në vazhdimësi që shpesh janë imitime, luftë për territor, rivalitet dhe këto e të tjera përgjithësisht ndodhin si pasojë e vetmisë dhe izolomit.

4- Në se evidencat që Rama sjell përmblidhen  si kura e tri plagëve. Ajo më kryesorja që duhet të thuhet troç është korrupsioni si plagë. Dhe për këtë është një kurë. Ajo është Drejtësia.

Si do të arrihet tek veprimi i saj këtë arsyeshëm po e përcjell protesta.

Në këtë rast  duke sjellë ndërmend Arkimedin me parimin e tij të pikës së mbështetjes, Protesta me levën e drejtësisë nga një anë e bëjnë si duhet këtë zhvendosje. Ndryshe Rama me “fantazitë dhe filozofinë”, blen kohë dhe përpiqet të gjejë rrugëdalje për të shpëtuar veten edhe pse i ka shkaktuar prej 14 vitesh këto plagë.

Ajo çka ndodh me sheshin dhe fjalën e lirë për ata që duan ta kuptojnë kryesore janë: 1-Protestë e pandalshme qytetare, 2-Paqësore dhe e pa provokuar, 3- Qëndresë dhe ndërgjegjësim deri në dorëheqje për të siguruar zgjedhje të lira dhe të ndershme.

_________

* Ligji 21/2024-Deputetët propozues ishin:Fadil Nasufi – qarku Berat, Florenc Spaho – qarku Elbasan, Arkend Balla – qarku Durrës, Edona Bilali – qarku Shkodër, Bujar Çela – qarku Fier-Lushnje, Anduel Tahiraj – qarku Vlorë, Shpresa Marnoj – qarku Lezhë, Mirela Pitushi – qarku Fier, Denis Deliu – qarku Durrës, Klodiana Spahiu – qarku Durrës, Enslemvera Zake – qarku Korçë, Eduart Ndreca – qarku Lezhë.

* Kukamçeftas- Gjetja e lojtarit të fshehur.

3 Shtator, 2026