Askujt nuk mund t’ia merrte mendja se dalja e pafajshme nga “Sekretariati për Procedurat, Votimet dhe Etikën” jo vetëm që nuk pati asnjë masë disiplinore, por fill pas Seancës Plenare për heqjen e imunitetit të deputetes Balluku, Kryetari i GPS dhe drejtuesi politik për Diasporën Taulant Balla të shfaqej në Athinë sipas ATSH-s për:- “…me rastin e 20-vjetorit të krijimit të strukturave të Partisë Socialiste në Greqi”* sikurse dhe  përmes rrjeteve sociale të postonte “Nesër votojmë për pr. rezolutën për regjimin e Iranit, keqardhje për bojkotin e opozitës”* duke përmbushur me shpejtësi vendndodhjet në krye të detyrave që i kërkon koha.

Pikërisht mbi menaxhimin e kohës kur preje orëve të sikletshme në Kuvend dhe udhëtimeve kur të këqijat duhen larë, skica nga LD-NY26 jep diciturën “Taulanti kërkon nurin 0800 44 88 të UKT, Ujësjellës Kanalizimeve Tiranë”. Një kujtesë për politikanët e kudondodhur të mazhorancës, që kanë kohë të fyejnë, të bëjnë të paditurin, të luajnë me hilenë e të kërkuarit falje, të ndodhen në vende të ndryshme në të njëjtën kohë, të postojnë nga çdo cep i botës dhe të jenë të gatshëm edhe për seanca plenare që ku në datat e paracaktuara të shtyhen rezoluta që shkaktojnë zhurmë politike dhe mediatike në mënyrë që t’u shmangen problemeve tepër të mprehta nga fronti i luftës së drejtësisë me korrupsionin.

Në qoftë se kjo do të mjaftonte për ilustrimin e skicës, për të folur mbi të kudondodhurin Balla sidomos mes hapësirave që krijojnë seancat parlamentare vlen të jepet dhe një fakt i ri mbi zhvillimin e veprimtarive të kuvendit ku gjithshka është e orientuar në dobi të parti-shtetit.

Për të konfirmuar pretendimin e Kryetarit të GPS Balla sipas ATSH që i referohet postimit në FB se:-“Seanca e nesërme, ditën e Martë 17 Mars 2026, është propozuar në Konferencën e Kryetarëve të datës 18 Shkurt 2026 dhe miratuar me vendim të Seancës Plenare, pra një muaj më parë (referojuni proces-verbalit të Mbledhjes së Konferencës së Kryetarëve, të cilat janë publike) Kush ju ka urdhëruar të bojkotoni nesër seancën, nuk jua dashka të mirën ju dhe Shqipërisë”,* por procesverbali i datës 18 Shkurt 2026 nuk është përditësuar në faqen e Kuvendit të Shqipërisë ashtu sikurse do të duhej të ishte marrë mundimi të botohej në një mënyrë të caktuar për t’ia lehtësuar publikut. Megjithatë në FB e kryetarit të Kuvendit Peleshi shënohet se :

U mblodh Konferenca e Kryetarëve

Në drejtimin e Kryetarit, z.Niko Peleshi, u zhvillua sot mbledhja e Konferencës së Kryetarëve. Pika e parë dhe e dytë e rendit të ditës ishin shqyrtimi i projektprogramit të punës së Kuvendit për periudhën 2 Mars–10 Prill 2026 dhe shqyrtimi i projektkalendarit të punimeve të Kuvendit për periudhën 2 Mars–20 Mars 2026. Pas diskutimeve, Konferenca e Kryetarëve nuk arriti mirëkuptimin dhe çështja i kaloi për votim seancës plenare.
Pika e tretë e rendit të ditës ishte shqyrtimi i projektkalendarit vjetor “Për mbikëqyrjen parlamentare për vitin 2026”, propozuar nga Komisioni për Nismat Qytetare, Bashkëpunimin dhe Mbikëqyrjen Institucionale. Pas diskutimeve edhe për këtë pikë Konferenca nuk arriti mirëkuptimin dhe Kalendari u miratua me votat e shumicës. Kryetari i komisionit z. Fatmir Xhafaj ftoi kryetarët e komisioneve të përhershme për të dhënë propozimet e tyre për aktivitete të përbashkëta me Komisionin për Nismat Qytetare, Bashkëpunimin dhe Mbikëqyrjen Institucionale gjatë zbatimit të Kalendarit “Për mbikqyrjen parlamentare për vitin 2026”.

Pra “Konferenca e Kryetarëve nuk arriti mirëkuptimin dhe çështja i kaloi për votim seancës plenare”.* Gjithshka tjetër mbi të vërtetën për atë që zoti Balla dhe e përforcon më datë 16 Mars, 2026 përmes FB të vet janë vlerësime që nuk i përkasin kërkesës më të freskët për një Projekt Rezolutë për Regjimin e Iranit, ku ka më shumë rëndësi të theksohet sipas FB të Ballës se ndjehet:-“…keqardhje për bojkotin e opozitës”.

Duke ndjekur seancat  dhe komisionet e Legjislaturës XI të Kuvendit të Shqipërisë, kartonat e mazhorancës vendosin jetën parlamentare dhe ngushtojnë çdo ditë hapësirat e opozitës në Kuvend duke arritur përzënien më parë se bojkoti.

Një strategji e Rilindjes Socialiste “për të thelluar fitoren në 2029-ën” (?!).

______________

*ATSH 

* postime nga FB të N. Peleshi dhe T. Balla

16 Mars, 2026