Në mediat zyrtare ndeshesh me termat; “vijon puna e forcave operacionale”,  “operacioni vijon”,  “vijon angazhimi i fuqishëm”, “vijon puna e strukturave në terren”, “vijon ndërhyrja”, ” puna vijon në terren të vështirë”, e deri tek  “vijon ndërhyrja nga toka dhe ajri” në një kohë që e gjithë tabloja është front lufte dhe koncepti i drejtë dhe atë që mbarë bota përdor është lufta kundër zjarrit. Në Shqipëri përdoret zjarrfikja dhe mbrojtja kundër zjarrit  të cilat pavarësisht dobisë parandaluese në proces janë koncepte pasive. Janë pasive sepse duhen fonde dhe investime jo vetëm nga ato që kanë parashikuar emergjencat, duhet bashkëpunim me qytetet brenda vendit dhe vendet fqinje, duhen mjete dhe veshje zjarrduruese, duhen trajnime edhe të grupeve vullnetare dhe duhen njohuri deri në çeljen e shkollave nga ato teknike profesionale deri tek universitetet në nivelin e inxhinierisë dhe menaxhimit të zjarreve të cilat në çdo vit për cilëndo arsye tregojnë nivele të rritura.
Policia e përdorur si angazhim nga ministri Lamallari apo qoftë edhe Drejtori  Përgjithshëm të Policisë së Shtetit, Hita dhe 12 drejtorët e qarqeve në vartësi janë thjesht një organizim kur zjarret ndodhin. Detyra e policisë në këtë rast është siguria e qytetarëve, siguria e rrugëve, komunikimi për mjetet e ndërhyrjes së shpejtë etj. deri tek monitorimi pas shuarjes së dëmeve. Por të ngrihesh me idenë se pa i bërë këto dhe ta quash”krim mjedisor” e të fillosh ndjekjen policore dhe nxitur prokurorët për procedim, ky koncept është i frikshëm. Në qoftë se Lamallari e shtron “butë” kur thotë se:-“Detyra jonë është që çdo zjarr të dyshimtë të hetohet profesionalisht, në bashkëpunim të ngushtë me shërbimin zjarrfikës, Emergjencat Civile, bashkëpunimi me komunitetin, shfrytëzimi i teknologjisë dhe ekspertizës më të mirë forenzike brenda dhe jashtë vendit, si dhe Prokurorinë, me qëllim që çdo provë dhe autor i dyshuar të ndiqet deri në fund. Vetëm zjarret këtë vit, dëmi i tyre është i pallogaritshëm, si në fondin pyjor. Sa vite, sa gjenerata i duhet atij fondit pyjor të rikuperohet”, mendoni këtë shtjellim tek një tjetër ish ministër i brendëshëm. Kur zjarret e disa sezoneve më parë bënin kërdinë  në pyje dhe qendra të banuara Balla dhe Peleshi respektivisht me detyrat e ministrave të brendëshëm dhe të mbrojtjes e luftonin nga Facebook-u zjarrin. (UGSHPD ndër vite e ka ngritur shqetësimin)*