Presidenti amerikan, Donald Trump përmes një postimi në mediat sociale, u shpreh se ligjvënësit demokratë po bëjnë “gjithçka që kanë në dorë për të shtyrë përpara mashtrimin e Epstein-it”.

Në postimin e tij në Truth Social, Trump shtoi se grupi i fundit i dokumenteve po përdoret për të “shmangur” vëmendjen nga “politikat dhe humbjet e këqija të demokratëve, veçanërisht TURPI I MBYLLJES, ku partia e tyre është në rrëmujë të plotë dhe nuk ka ide se çfarë të bëjë”.

Presidenti Trump shkoi më tej kur tha se do t’i kërkojë Prokurores së Përgjithshme dhe institucioneve të tjera ligjzbatuese, që të hetojnë lidhjen e Bill Clinton me Epstein.

‘Tani që demokratët po përdorin mashtrimin e Epstein-it, që përfshin demokratë, jo republikanë, për të provuar të shmangin mbylljen e tyre katastrofike dhe të gjitha dështimet e tyre të tjera, do t’i kërkoj AG Pam Bondi-t dhe Departamentit të Drejtësisë, së bashku me patriotët tanë të mëdhenj në FBI, të hetojnë përfshirjen dhe marrëdhënien e Jeffrey Epstein-it me Bill Clinton-in, Larry Summers-in, Reid Hoffman-in, JP Morgan-in, Chase-in dhe shumë njerëz e institucione të tjera, për të përcaktuar se çfarë po ndodhte me ta dhe me të. Ky është një tjetër mashtrim Rusia, Rusia, Rusia, me të gjitha shigjetat që tregojnë nga demokratët. Të dhënat tregojnë se këta burra, dhe shumë të tjerë, kaluan pjesë të mëdha të jetës së tyre me Epstein-in dhe në “Ishullin” e tij. Qëndroni në kontakt!!!’, ka shprehur qëndrimin e tij kreu i Shtëpisë së Bardhë, Donald Trump.