Aleanca e Gjelbër dhe e Majtë në Itali i ka kërkuar qeverisë së Giorgia Melonit të japë sqarime për shkak se gazi lotsjellës dhe plumbat e gomës të përdorur nga policia shqiptare për të shuar protestat studentore kundër qeverisë së Edi Ramës janë prodhuar nga kompanitë italiane.

Sipas mediave italiane, deputeti Marco Grimaldi kërkon llogari nga qeveria në parlament, kërkon informacion mbi dërgimin e municioneve drejt Shqipërisë që nga viti 2019, si dhe mundësinë e pezullimit të shitjeve nëse ato janë përdorur kundër protestuesve.

“Marco Grimaldi, deputet i Aleancës së Gjelbër dhe të Majtë, i ka paraqitur një pyetje parlamentare qeverisë Meloni duke pyetur se çfarë autorizimesh janë lëshuar për furnizimin e autoriteteve shqiptare me municione për kontrollin e trazirave dhe për të marrë në konsideratë ndalimin e tyre, “me qëllim ndalimin e çdo shitjeje armësh forcave policore të punësuara në shtypjen e dhunshme të disidencës legjitime”, raporton FanPage.it.

Sipas Grimaldit, në fotografitë e publikuara në rrjetet sociale shfaqen fishekë me markën Fiocchi dhe bombola gazi lotsjellës që dyshohet se janë prodhuar nga kompania Simad. Deputeti italian specifikon se një nga fishekët ka një datë skadimi në korrik 2023, prandaj përdorimi i tij i mundshëm në protestat në Tiranë duhet të verifikohet.

“Jam shumë i shqetësuar për atë që shohim në mediat sociale dhe atë që miqtë dhe të njohurit, avokatët dhe aktivistët na thonë çdo ditë», tha Detjon Begaj, kreu i listës së Koalicionit Qytetar në Këshillin e Qytetit të Bolonjës dhe një aktivist i diasporës shqiptare. Këto janë foto të plagëve të lëna nga plumbat italianë mbi njerëzit tanë dhe kjo vetëm sa mund të na dëmtojë”, tha ai, duke iu referuar fotove që protestuesit e rinj ndanë në mediat sociale.

Në kërkesën drejtuar Kryeministres Giorgia Meloni dhe Ministrave të Mbrojtjes, Punëve të Jashtme dhe të Brendshme, Grimaldi pyet:

“Çfarë autorizimesh janë lëshuar që nga viti 2019 për të eksportuar municione për kontrollin e trazirave tek autoritetet shqiptare, duke përfshirë edhe përmes ndërmjetësve ose vendeve të treta. Ai dëshiron të dijë llojet e produkteve të shitura, sasitë, marrësit përfundimtarë dhe kontrollet e kryera mbi përdorimin e tyre.

nëse qeveria nuk e konsideron të nevojshme të rishikojë autorizimet dhe të pezullojë dërgesat , në rastet e parashikuara me ligj, dhe të ndërhyjë për të parandaluar shitjen e armëve forcave policore të punësuara në shtypjen e dhunshme të protestave.

Nëse informacioni, këshillat apo trajnimet mbi menaxhimin e protestave u ndanë me autoritetet në Tiranë, duke pasur parasysh se Ministri i Brendshëm i Shqipërisë Ervin Demo dhe Rama diskutuan kontaktet dhe bashkëpunimin me Italinë dhe Francën mbi sigurinë publike dhe masat për të luftuar dhunën gjatë demonstratave.” Panorama