Kreu i PD, Sali Berisha shprehet se policia konfirmon përdorimin e verbuesit të ariut kundër demonstruesve paqësorë.

Lideri i opozitës reagoi pasi Policia e Shtetit shpërndau për mediat foton e spray-t që përdori kundër protestuesve mbrëmjen e kaluar.

Në reagimin e tij, Berisha thekson se policia mashtroi, duke shtuar se foto e spray-t nuk është e njëjta me mjetet e përdorura nga efektivët gjatë protestës. “Nga shikimi i vëmendshëm konstatohet se mekanizmi i hedhjes së spray-t i bombolës në dorën e narkopolicit është mekanizmi tipik i bombulave të spray-t të verbuesit të ariut dhe është krejt tjetër nga mekanizmi i bombulës të shpërndarë për mashtrim nga policia”, shprehet ai.

Reagimi:

Të dashur miq,
për të përgënjeshtruar deklaratat e PD për përdorimin e verbuesit të ariut nga narkopolicia dje kundër protestuesve, sot pasdite ajo ka shpërndarë foto të spray-t që përdoret nga policia kundër protestuesve.

Por cilido që shikon me vëmendje foton e bombulës së spray-t në dorën e policit, konstaton se ajo është krejt tjetër nga bombula që ka shpërndarë në media policia, gjoja të përdorur prej saj. Nga shikimi i vëmendshëm konstatohet se mekanizmi i hedhjes së spray-t i bombolës në dorën e narkopolicit është mekanizmi tipik i bombulave të spray-t të verbuesit të ariut dhe është krejt tjetër nga mekanizmi i bombulës të shpërndarë për mashtrim nga policia.

Dënoj me forcën më të madhe këtë mashtrim publik të ulët të narkopolicisë, e cila pasi ka kryer krimin kërkon të fshihet. Përdorimi i verbuesit të ariut kundër njerëzve është një vepër me pasoja të rënda kriminale, e ndaluar nga konventat ndërkombëtare. bw

Media spajolle ABC ka ndarë pamje nga protesta e mbajtur në kryequytetin shqiptar.

Në artikull theksohet se menjëherë pas përfundimit të kreut të PD Sali Berisha, shpërtheu dhunë policore ndaj protestuesve.

“Protestuesit dolën në rrugë këtë të premte për të kërkuar dorëheqjen e kryeministrit shqiptar Edi Rama, të cilin e akuzojnë për një sërë aktesh armiqësore kundër sundimit të ligjit dhe demokracisë në Shqipëri. Dhuna shpërtheu pas një fjalimi të politikanit Sali Berisha”, thuhet në artikull. bw

Televizioni gjerman ZDF i ka kushtuar një kronikë protestës së 17 prillit në Tiranë, duke theksuar akuzat e opozitës ndaj kryeministrit për korrupsion dhe përplasjet me policinë.

Sipas raportimit, protesta u shoqërua me tensione, ku pati përleshje mes protestuesve dhe forcave të rendit në kryeqytet.

ZDF raporton se policia ndërhyri duke përdorur ujëhedhës dhe spraj piper për shpërndarjen e turmës, ndërsa nga ana tjetër protestuesit hodhën mjete zjarrvënëse drejt godinës së Kryeministrisë.

Në kronikë theksohet se opozita, organizatore e protestës, “akuzon kryeministrin për korrupsion dhe kërkon dorëheqjen e tij”. bw

Protesta kombëtare e organizuar nga Partria Demokratike ka bërë jehonë edhe në mediat ndërkombëtare.

Media italiane TGCOM shkruan se gjatë protestës u përdorën topa uji dhe gaz lotësjellës për të shpërndarë qytetarët, ndërkohë që theksohet se qëllimi i protestave është largimi i kryeministrit Edi Rama, pas skandalit “Balluku”.

Artikulli:
Kokteje Molotovi u hodhën nga qeveria e Tiranës , gjatë një proteste të organizuar ngë opozita e drejtuar nga Sali Berisha. Protesta kishte si kërkesë kryesore dorëheqjen e kryeministrit socialist Edi Rama. Policia reagoi me topa uji dhe më pas me gaz lotsjellës, duke arritur të shpërndajë turmën brenda sekondave dhe të ndalojë grupin e protestuesve që kishin hedhur koktejet molotov. Një deputet i Partisë Demokratike, Luçiano Boçi, dhe një person tjetër u dërguan në urgjencë. Disa minuta më vonë, tensionet u përshkallëzuan pranë ndërtesës së Parlamentit, ku disa protestues u përpoqën të thyenin kordonin e policisë, por u sprapsën nga përdorimi i topave të ujit.
Protesta të këtij lloji kanë ndodhur periodikisht në Shqipëri që nga fillimi i vitit: demonstruesit dhe Partia Demokratike, partia kryesore e opozitës, po kërkojnë dorëheqjen e kryeministrit Edi Rama për shkak të skandalit të korrupsionit që përfshin Belinda Ballukun, aleaten e tij të ngushtë. bw

5 pyetje është podkast i Radios Evropa e Lirë, ku një temë sqarohet me ndihmën e profesionistëve dhe ekspertëve, përmes përgjigjeve që kapin thelbin. Nga shëndeti e ekonomia, deri te politika dhe ligji, çdo episod sjell bisedë të qartë, verifikim faktesh dhe sqarime të nevojshme.

Zyrtarëve publikë në Kosovë, që dyshohen për pasurim të jashtëligjshëm, pritet t’iu verifikohet pasuria, e cila në raste të caktuara mund të përfundojë edhe në konfiskim nga Byroja Shtetërore për Verifikimin dhe Konfiskimin e Pasurisë së Pajustifikueshme.

Projektligji i ri për këtë mekanizëm kaloi në lexim të parë në një seancë të Kuvendit të Kosovës më 17 prill, pasi versioni paraprak ishte rrëzuar nga Gjykata Kushtetuese.

Byroja parashihet të ketë departamente të veçanta dhe zyrtarë që do të verifikojnë pasuritë për të cilat ka një dyshim se janë fituar jashtëligjshëm nga zyrtarët publikë.

Nëse pasuria përcaktohet si e pajustifikueshme, projektligji parasheh konfiskimin e pasurisë nga gjykata.

Por, mënyra se si do të funksionojë Byroja ka ngritur pikëpyetje.

Vullnet Bugaqku, hulumtues në Institutin Demokratik të Kosovës, thotë në podkastin 5 pyetje të Radios Evropa e Lirë se drejtori i Byrosë parashihet të zgjidhet me votat e shumicës parlamentare, dhe të ketë kompetenca të plota në inicimin e procedurave për verifikim të pasurisë.

▶️ Shiko podkastin:

🎧 Dëgjo podkastin:

I njëjti drejtor, sipas Bugaqkut, mund të vendosë edhe që të ndalet verifikimi i pasurisë së një zyrtari, me arsyetimin se nuk ka prova të mjaftueshme. Kjo, konsideron ai, mund të përdoret politikisht, pasi më asnjë institucion i drejtësisë nuk do të mund ta trajtonte atë pasuri.

“Askush nuk mund ta kontestojë më atë pasuri, dhe ky lloj mekanizmi mund të shërbejë si një mekanizëm i legjitimimit të pasurisë, që potencialisht nëse do të shkonte në gjykatë ndoshta do të vërtetohej se është e paligjshme”, thotë ai.

Bugaqku pohon se në kuptimin e konfiskimit civil të pasurisë, Byroja do të jetë mbi organet e tjera të sistemit të drejtësisë.

Ai thotë se ka kundërthënie në ligj sa i përket periudhës kohore të verifikimit ta pasurisë, pasi, sipas tij, qëndron dispozita që parasheh verifikimin e pasurisë që është fituar nga 17 shkurti 2008, por edhe tjetra që thotë se zyrtarit publik mund t’i verifikohet pasuria vetëm deri në 10 vjet pasi ta ketë përfunduar mandatin.

“Nëse një zyrtari publik, ta zëmë i ka pushuar mandati në vitin 2010, afati maksimal që atij mund t’i verifikohet dhe konfiskohet pasuria është viti 2020”, thotë Bugaqku, duke sqaruar se asnjë institucion bankar apo tatimor nuk obligohet të ruajë të dhëna më gjatë se dhjetë vjet, që do të shërbenin si prova.

Projektligji i ri për Byronë u përcoll me vërejtje të opozitës parlamentare, ashtu sikurse edhe versioni paraprak, të cilin Partia Demokratike e Kosovës e kishte dërguar në Gjykatë Kushtetuese.

Podkastin mund ta dëgjoni edhe në Apple Podcasts dhe në Spotify.

Autore: Flaka Zogu | Realizimi teknik: Rrahman Osmani, Mahir Elshani | Producent: Trim Haliti

Janë identifikuar emrat e 11 anëtarëve të dyshuar të grupit kriminal të drejtuar nga Jetmir Pepaj alias Jetmir Marashi.  

Këta persona akuzohen për trafikimin e mbi 7 tonëve kokainë.

Kujtojmë që ditën e djeshme (17 prill) Gjykata e Posaçme kundër Krimit të Organizuar dhe Korrupsionit (GJKKO) la në fuqi masat e arrestit në burg për tre anëtarët e grupit kriminal të Jetmir Pepës.

Emrat e grupit 

1-Aleks Pepaj alias Shkëlqim Pepaj

2-Jetmir Pepaj alias Jetmir Marashi

3-Albert Pjetri

4-Fatjon Marku

5-Anton Marku alias Anton Tamure

6-Florjan Vuka alias Vathaj

7-Kristjan Lleshi

8-Klevi Leka

9-Lulzim Pepa

10-Anton Kola

11-Ilir Lazri

Jetmir Pepa është një emër i njohur për blutë, pasi në janar 2025 u shpall në kërkim pasi qëlloi me armë në një koncert festiv të organizuar ‘Cinco Cavalli’ në Parkun Olimpik të Tiranës.

HETIMET E SPAK

Sipas SPAK, hetimet kanë dokumentuar aktivitetin e grupit gjatë viteve 2019–2021 në Amerikën Latine, Belgjikë dhe Holandë, ku janë evidentuar 8 episode të trafikut të kokainës në sasi të mëdha.

Sipas SPAK, grupi kriminal ka realizuar disa episode të trafikut të kokainës, kryesisht nga Amerika Latine drejt porteve europiane, veçanërisht në Roterdam dhe Amsterdam.

8 EPISODET E TRAFIKUT TË LËNDËS NARKOTIKE

Episodi 1 – Janar- Mars 2020 – Trafikimi i një sasie të konsiderueshme lënde narkotike kokainë gjatë periudhës Janar-mars 2020. Nga kjo sasi, më 21.03.2020 u sekuestrua një sasi prej 8.5 kg në qytetin e Amsterdamit të Mbretërisë së Holandës.

Episodi 2 – 7-8 Prill 2020 – Trafikimi i një sasie prej 1,018 kg lëndë narkotike të llojit kokainë, nga Peruja drejt Portit të Roterdamit të Hollandës. Ngarkesa kishte mbërritur në portin e Roterdamit me një anije kolumbiane ndërsa lënda narkotike ishte fshehur në një enë frigoriferike që përmbante lëng frutash të ngrira. Vlera e shitjes ishte mbi 1.3 milionë euro.

Episodi 3 – 6 Qershor 2020 – Trafikimi i një sasie prej 2020 kg lëndë narkotike të llojit kokainë, nga Ekuadori drejt Portit të Roterdamit të Hollandës. Kjo ngarkesë kishte mbërritur në portin e Roterdamit me një anije detare nga Porti i Guayaquil, Ekuador dhe ishte e destinuar për një kompani në Hungari. Një pjesë e kësaj ngarkese i përkiste këtij grupi kriminal.

Episodi 4 – 26 Qershor 2020 – Tentativa e trafikimit të një sasie prej 516 kg lënde narkotike kokainë, e sekuestruar në Terminalin Portual Muelle Sur, DP World Callao, Peru, si dhe e destinuar për në Mbretërinë e Hollandës.

Episodi 5 – 30 Qershor 2020 – Trafikimi i një sasie prej 500 kg lënde narkotike kokainë më, e sekuestruar në Portin e Roterdamit, që kishte ardhur në një kontejner nga Kolumbia që përmbante konserva me peshk ton dhe ishte i destinuar për një kompani në Gjermani.

Episodi 6 – 7 Gusht 2020 – Trafikimi i një sasie të konsiderueshme lënde narkotike e llojit kokainë, e llogaritur në rreth 1600 kg, prej së cilës është sekuestruar një sasi prej 104 kg po në të njëjtën datë në autostradën nr A2 pranë qytetit Abcoude të Mbretërisë së Holandës.

Episodi 7 – 16 Gusht 2020 – Trafikimi i një sasie rreth 1100 pako me peshë bruto 1238,39 kg lënde narkotike kokainë, e cila ishte ishte fshehur në një ngarkesë me banane në një kontenier që vinte nga Ekuadori drejt Portit të Roterdamit në Hollandë dhe kishte mbërritur në portin e Roterdamit me një anije detare e ardhur nga Porti i Antwerp, e destinuar për një kompani në Hagë.

Episodi 8 – 1 – 2 Tetor 2020 – Trafikimi i një sasie prej 531 kg lënde narkotike kokainë në Portin e Roterdamit, Hollandë, sasi e cila është kapur nga autoritetet holandeze, e fshehur në një kontenier të ngarkuar me rrush të thatë, i destinuar për në Suedi.

PASURITË E SEKUESTRUARA

Me një tjetër vendim GJKKO ka vendosur sekuestro preventive ndaj 232 pasurive të luajtshme dhe të paluajtshme, me një vlerë totale rreth 12 milionë euro. Panorama

Emirton Suli, një përgjegjës sektori në Agjencinë Kombëtare të Shoqërisë dhe Informacionit,(AKSHI) është thirrur në SPAK, dhe ka dhënë shpjegime në datën 10 janar 2026, duke treguar atë që ndodhte me paracaktimin e tenderave brenda zyrave të këtij institucioni.

Ai ka shërbyer si përgjegjës pranë Drejtorisë së Agjendës Digjitale, por tashmë është kthyer një nga dëshmitarët kryesorë të SPAK në dosjen penale nr.20/1 që flet për abuzimet me tenderat e AKSHI-t, në të cilët ai disa herë ka qenë kryetar i Njësisë së Prokurimit dhe anëtar i Komisionit të Vlerësimit të Ofertave.

Suli, është pyetur si person që ka dijeni për rrethanat e ngjarjes, por hetimet e kryera nga SPAK, tregojnë se ai është implikuar në këto procedura duke ngritur dyshime të arsyeshme se ai së bashku me zyrtarë të tjerë të AKSHI, përfshirë dhe Daniel Shimën, kanë “Shpërdoruar detyrën” dhe kryer “Shkelje të pabarazisë në tendera dhe ankande publike”.

Gazetari Elton Qyno ka mësuar se pyetja e Emirton Sulit është realizuar në ambientet e SPAK në 10 Janar 2026, duke tregur të gjithë dinamikën e “qepjes” së letrave për të paracaktuar kompanitë fituese në tenderat e AKSHI-t.

Suli ka shpjeguar se dhe vetë kallëzuesi i kësaj çështje, Gerond Meçe, ka qenë një ndër “lojtarët” kryesorë të paracaktimit të tenderave në AKSHI, duke bashkëpunuar në disa praktika me Daniel Shimën dhe biznesmenin tjetër, Ermal Beqirin.

Zyrtari i AKSHI-t, ka deklaruar ndër të tjera se në procedurën e prokurimit “Përmirësimi dhe Integrimi i Sistemeve të Menaxhimit të Informacionit për Ndihmën Ekonomike, Personat me aftësi të Kufizuara dhe Shërbimi Social”, rezulton se termat e referencës, kriteret dhe ftesat për ofertë kanë ardhur të parapërgatitura nga Drejtoria e Projekteve, konkretisht nga Klea Korça.

Sipas tij, kjo e fundit është caktuar me urdhrin e titullares së AKSHI-t, Mirlinda Karçanaj, duke mbetur vetëm nënshkrimi nga ana e grupit të punës.

Suli, ka rrëfyer në SPAK se zv/drejtori i AKSHI-t, Daniel Shima, kishte krijuar një adresë E-maili projekte@akshi.goc.al, nga i cili niseshin në E-mailiet e grupit të punës të gjitha dokumentat gati për projektet e prokurimit publik dhe se kjo gjë ishte bërë nga ai qëllimisht që të mos identitikohej, se cili subjekt i niste këto E-maile dhe përgatiste këto dokumente.

Para oficerëve të BKH-së, Emirton Suli, ka identifikon edhe një shtetase të quajtur, Rega Kaja, e cila përgatiste dokumentacionin, i cili përgatitej nga një grup pune i ngritur posaçërisht për këtë çështje.

Përgjegjësi i sektorit në AKSH, ka treguar se nga kjo procedurë kuptohej paraprakisht se ishte ndërtuar në atë mënyrë që të përfitohej nga shoqëria “Image & Communication Development”, me zotërues Igli Gjelishti, duke shtuar më tej se ofertë të paftuar kishte paraqitur në “AKSHI” dhe shoqëria “ABS” e Gerond Meçes.

“…Gerond Meçe ishte futur me një shumë financiare prej 20 për qind më të ulët, gjë e cila kuptohej se ishte jashtë paraplanifikimit, pasi diferenca e fondit limit me ofertën është zakonisht maksimumi 7 për qind dhe se në këtë rast ishte ndjeshëm më e madhe…”-ka treguar Emirton Suli.

Kjo gjë, sipas tij, diktonte dhe detyronte që autoriteti kontraktor të shpallte fitues shoqërinë “ABS”, por se ky fakt nuk duhet të ndodhte, pasi procedurat ishin të paracaktuara dhe duhet të anulohej tenderi dhe më pas rihapej sërish me qëllim dhënien e kompanisë që ishte paracaktuar.

Sipas dëshmisë së këtij zyrtari të AKSHI, po të shikohet dokumentacioni rezulton se ka artifica ligjore, të cilat e kanë detyruar AKSHI-n të anulohet procedura tenderuese, vetëm që të mos lidhej kontratë me këtë operator “ABS”, edhe pse në një tender tjetër e kishin shpallur në muajin mars fitues “ABS”, duke gjetur si shkak çështjen e “CSI” si të vlefshme.

Ai tregon më tej se, pas anulimit të prokurimit. AKSHI i bëri një shkresë AKSIK, që të listoheshin operatorët ekonomikë që ishin të pajisur me “CSI” të vlefshme.

Ndër të tjera Emirton Suli tregon se kur ka ardhur përgjigjja, Helena Çupi, i ka treguar se nuk ka asgjë në të për ”CSI” dhe “CSP” dhe se nuk jepte arsye për të anuluar tenderin dhe se e pyeti atë se ku mund të bazohej për ta anuluar procedure, duke qenë se deri në lidhjen e kontratës autoriteti kontraktor e kishte të drejtën që të anulonte prokurimin nëse konstatonte se nuk plotësonte shoqëria fituese kriteret.

Nga ana tjetër Suli ka rrëfyer në SPAK se kriteri i pajisjes me “CSP” të operatorëve ekonomik tek kriteret e veçanta e ka futur, Daniel Shima, në kohën kur ai ishte zv/drejtor, edhe pse nuk vinte në punë fizikisht, duke shtuar se në këtë kohë kanë patur një numër ankesash nga shoqëria “Kreatx” e Panajot Gjiknurit, duke u bllokuar një numër i madh procedurash.

Ndër të tjera Suli, ka shpjeguar se ky operator ankohej sepse nuk kishte mundësi të fitonte procedura prokurimi, duke qenë se Daniel Shima, bashkëpunonte me biznesmenin Gerond Meçen dhe me Ermal Beqirin dhe se Shima e dinte që shoqëria “Kreatx” nuk kishte “CSP”.

Qëllimisht, që ta përjashtonte “Kreatx” nga garat e prokurimit pranë AKSHI-t, krijoi këtë kriter si kusht për pjesëmarrje në prokurime, duke e shmangur më tej edhe nga ankimet dhe nga bllokimi i procedurave.

Ai shpjegon se ky kriter nuk u hoq, pasi të gjithë operatorët ekonomikë kishin marrëdhënie të mira me AKSHI-n dhe se e dispononin këtë certifikatë.

Suli ka treguar se e ka patur edhe “ABS” këtë autorizim por se, pasi nuk ka patur më marrëdhënie Gerond Meçe me AKSHI-n, atëherë kësaj shoqërie nuk i është rinovuar më tej certifikata, duke i krijuar një artificë ligjore për ta mbajtur jashtë procedurave të prokurimit.

Më tej ai sqaron se Helena Çupi, në këto kushte bëri shkresën “Memo” me qëllim që të anulohej procedura e prokurimit, duke treguar se ajo ishte në një siklet të madh, pasi siç e kupton ai, ajo rrezikonte të anulonte një procedurë prokurimi tërësisht e detyruar nga urdhrat e eprorëve, duke treguar se ajo i ka thënë se: “…po më detyrojnë që kjo procedurë të anulohet…”.

Ndërkohë pyetjes së oficerëve të BKH-së se përse dhe si zgjidhen ofertuesit kur bëhet kërkesa nga AKSHI, Emirton Suli është përgjigjur se ftesa u është drejtuar në këtë rast “Fastech”, “Pirst”, “Soft & Solution”, “Axians” dhe “Communication Progress”.

Suli u ka treguar oficerëve të BKH-së se këto ftesa bëheshin qëllimisht nga AKSHI, që të fryhet artificialisht fondi limit dhe qëllimisht që të shkojë prokurimi aty ku është paracaktuar fituese, duke treguar se ftesat për ofertë vinin gati nga ai që kontrollonte procesin.

Zyrtari i AKSHI-t, u ka treguar oficerëve të BKH-së se për të vërtetuar këtë mjafton të pyetet, Klea Korça dhe Aldo Kita, se cili ia jepte listën e ofertave dhe kujt duhet t’i dërgoheshin ato.

Suli ka treguar se mjafton të shikohet se sa është përcaktuar fondi limit në këto raste dhe se sa ka qenë oferta e “ABS”, diferencë e cila rezulton të jetë rreth 21 për qind.

Paracaktimi i tenderit, 16.5 milion euro “SMART Laborator”.

Më tej Emirton Suli është pyetur për procedurën e prokurimit “Implementami laboratorëve SMART” me vlerë 16.5 milion euro, ku Suli ka treguar se ka qenë kryetar i njësisë së prokurimit dhe se fituese ka qenë paracaktuar, konkretisht shoqëria “Albascan” që drejtohet nga Elton dhe Elision Jorgji.

Sipas tij paracaktimi ishte bërë nga Gerond Meçe dhe Daniel Shima.

Ai tregon se dokumentet e kritereve i erdhën të gatshme nga Arjola Muça, për të cilin vinte zarfi në zyrë me pseudonimin “Zarf për Albanin”.

“…ky zarf, mund të jetë dhënë nga Daniel Shima, pasi ai na pyeste vazhdimisht nëse erdhën ofertat dhe se si po shkon puna me “smart-labet”…”-tregon Suli.

Sipas tij Daniel Shima, ishte në një zyrë me Arjola Muça dhe se dokumentet i përgatiste ajo me temat e referencës, fondin limit dhe raportimin.

Për këtë rast, Emirton Suli, i ka treguar oficerëve të BKH-së se ai ka marrë draft-vlerësimet nga Komisioni i Vlerësimit të Ofertave (KVO) dhe se ia ka paraqitur zv/drejtoreshës, Hava Delibashi, duke treguar më tej se ajo i kishte thënë: “…të dyja…” dhe “…e more mesazhin besoj…”, duke i lënë të kuptoj se ajo kishte marrë paraprakisht konfirmimin edhe nga drejtoresha Mirlinda Karçanaj dhe në këtë mënyrë duhet të shpallej fitues kompania “Progres Communication” me pronar Gentian Likaj.

Tenderi për sistemin e ATP-së së pronave.

Ndërsa lidhur me procedurën e prokurimit “Mirëmbajtja e sistemit të ATP-ËEB-GIS”, Emirton Suli, ka shpjeguar në SPAK, se kompania “Air” e Alban Meça dhe Joriana Xamo është future në garë si mbështetëse.

Ndërsa “Fastech” e Andis Papa vjet me ofertë më të lartë dhe se për rrjedhojë fiton “Progress Communication” e Gentian Likaj, duke konkluduar se gara organizohet fiktivisht dhe se fituesi është i paracaktuar.

Emirton Suli, ka treguar se duhet të shikohet se kush ka marrë pjesë në testimin e tregut dhe se rezulton se “Fastech” dhe “Progress Communication”, kanë marrë pjesë dhe se tregohet qartazi në këtë mënyrë se fituesi ka qenë i paracaktuar.

Arrestimi në Mal të Zi në kuadër të një operacioni ndërkombëtar kundër krimit të organizuar, më 15 prill 2026.

Një nga institucionet përgjegjëse për sa i përket ushqimit në Shqipëri është edhe Instituti i Sigurisë Ushqimore dhe Veterinarisë, i cili kryen edhe analiza rreth mykotoksinave.

Kështu, ky institucion i lindur nga një vendim i Këshillit të Ministrave në vitin 2006 “Për ristrukturimin e instituteve kërkimore – shkencore, në varësi të Ministrisë së Bujqësisë”, është i cilësuar si laborator kombëtar reference.

Ky laborator kombëtar ka si funksion monitorimin për sëmundje të ndryshme virale, diagnostifikimin e tyre, prodhimin e biopreparateve veterinare, kontrollon pjesën mikrobiologjike të produkteve dhe nënprodukteve ushqimore me origjinë shtazore, qofshin këto të prodhuara në vend apo të importuara, si dhe bën kontrollin e mbetjeve të substancave.

Megjithatë, Kontrolli i Lartë i Shtetit ka kryer një auditim rreth këtij institucioni në vitin 2024, rreth pasqyrave financiare dhe përputhshmërisë. Grupi i auditimit kishte konstatuar 22 gjetje, 16 prej të cilave janë masa organizative dhe 4 masa për eliminimin e efekteve negative të konstatuara në administrimin e fondeve publike dhe për menaxhimin me ekonomicitet, eficence dhe efektivitet të fondeve publike.

Sipas tyre, në aspektin e menaxhimit financiar dhe kontrollit, ISUV nuk ka hartuar plan strategjik dhe plane veprimi, nuk ka ngritur Grupin e Menaxhimit Strategjik i cili duhet të mblidhet katër herë në vit dhe nuk ka rregullore të brendshme. Po ashtu, u konstatua se nuk ka strategji për menaxhimin e riskut dhe nuk ka hartuar regjistër risku në nivel institucional apo në nivel drejtorish.

Një problem tjetër qëndron me laboratorët që disponon ky institucion. ISUV ka gjithsej 41 laboratorë, përfshirë 3 laboratorë për shërbime të brendshme. Nga 38 laboratorë funksionalë, vetëm 19 kanë teste të akredituara, ndërsa rreth 50% e laboratorëve janë të paakredituar.

Nga 1,909 analiza të akredituara në total, 93.1% janë të përqendruara në Departamentin e Mbrojtjes së Bimëve, ndërsa departamente kyçe si Mikrobiologjia dhe Monitorimi i Ujërave, Monitorimi i Mbetjeve dhe Shëndeti i Kafshëve kanë përqindje minimale, duke nisur nga 1 e deri në 5 për qind. Sektori i barnave veterinare dhe ai i diagnostikimit të dëmtuesve të bimëve nuk kanë asnjë test të akredituar.

“Nuk ka mekanizma të formalizuar që të kenë në thelb bashkëpunimin mdisi klinicistëve apo institucioenve që kontrollojnë sigurinë ushqimore apo institucione që merren me politika të shëndetit publik. Gjë të formalizuar nuk ka, e cila sinjalizon dukuri epidemologjike ose t’i adresojnë ato në mënyrë sistematike. Nuk ka të tilla”, shprehet Klejdia Mati, mjeke onkologe.

ISUV është furnizuar me kite me vlerë gati 20 milionë lekë për periudhën kohore 2022–2024. Furnizimet janë shpërndarë menjëherë në laboratorë pa qëndruar në magazinë qendrore. Përdorimi i tyre nuk është dokumentuar me procedura të miratuara, mungonte një sistem për monitorimin e skadencave si dhe një sistem sinjalizues në prag skadence, ndërsa administrimi bëhej manualisht. Mbetjet laboratorike nuk regjistroheshin në regjistra të posaçëm dhe nuk ruheshin në ambiente të dedikuara. Magazina qendrore nuk plotësonte kushtet teknike për ruajtjen në zinxhir të ftohtë.

Po ashtu, auditimi i Kontrollit të Lartë të Shtetit ka konstatuar shkelje në hartimin e specifikimeve teknike, mungesë argumentimi teknik, mos përfshirje specialistësh fushe, ndarje e pajustifikuar në lote, vendosje kriteresh të paargumentuara dhe mosverifikim i plotë i dokumentacionit gjatë zbatimit të kontratave.

Në disa raste nuk janë administruar certifikata kalibrimi, nuk është verifikuar stafi i autorizuar për servis, dhe nuk janë dokumentuar të dhëna të rëndësishme si origjina dhe skadenca e mallrave.

Përsa i përket analizave të kryera jashtë vendit, për periudhën 2022–2024 janë shpenzuar rreth 1,880,000 euro, pra rreth mesatarisht 627, 000 euro/viti, për laboratorin “C. Group” në Belgjikë. Përfshirja e TVSH-së në vlerën gati 21% në fatura ka sjellë një kosto shtesë prej afërsisht 298 mijë euro ose ndryshe gati 33 milionë lekë. Kjo është konsideruar nga KLSH-la si përdorim i fondeve pa ekonomicitet. Po ashtu, procesi i përzgjedhjes së laboratorëve të huaj është kryer pa urdhrin përkatës të ministrit dhe pa studim të mirëfilltë krahasues.

“Kështu që nuk e kam parë atë prioritet, siguria ushqimore dmth. Institucionet përgjegjëse, Ministria e Bujqësisë, e ushqimit, institucionet e tjera, më duket sikur janë vetëm në pozicion pasiv. Dmth ndodh problemi dhe ata janë të detyruar të evidentojnë ose të prononcohen, por jo që të jenë pararojë apo zgjidhjes së problematikave. Ky është mendimi im ndoshta”, shprehet më tej profesori pranë FSHN-së, Dritan Topi.

Ndërkohë më 3 tetor të vitit 2025, ministri i Bujqësisë dhe Zhvillimit Rural, Andis Salla zhvilloi një vizitë në ambientet e ISUV-it, ku sipas tyre, laboratorët janë riakredituar dhe janë zgjeruar kapacitetet analitike të institutit sipas standardit ndërkombëtar dhe se numëronte rreth 1900 teste të certifikuara.

Megjithatë, disa tenderë që janë njoftuar në po të njëjtën periudhë kohore tetor 2025 nga Instituti i Sigurisë Ushqimore dhe Veterinarisë, kanë rezultuar me flamur të kuq për mungesë konkurrence dhe skualifikim i ofertës më të ulët, sipas openprocurement.al.

Këto katër tendera kanë të bëjnë ose me servis-kalibrim të pajisjeve laboratorike për analiza të avancuara ose blerje materialesh apo reagentësh. Shuma e këtyre tenderave niste nga 432 mijë lekë të reja e deri në gati 27 milionë lekë të reja.

Tenderi për “blerje reagentësh” u njoftua më 1 tetor të vitit 2025 dhe fituesi u shpall 30 ditë më vonë. Ndërkohë që konkurronin gjashtë kompani, ky tender iu dha “KRIJON” sh.p.k, në pronësi të Piro Zogës. Ky i fundit njihet si i përfshirë në aferën e përfitimit të tenderave fiktivë të Universitetit Bujqësor të Tiranës dhe akuzohet nga SPAK për kryerjen e veprës penale “Falsifikim i dokumenteve”.

Kujtojmë se persona të stafit të UBT-së kanë përgatitur të dhëna jo të vërteta të projekteve, në bashkëpunim me “Krijon” sh.p.k., dhe dy kompani të tjera. Këta kanë përfituar nëntë procedura prokurimi të zhvilluara në vitin 2022, me një vlerë të fondit limit prej 90 milionë lekësh të reja.

“Ky transformim është rezultat i profesionalizmit të burimeve njerëzore, investimeve të qëndrueshme në kapacitetet laboratorike dhe mbështetjes së politikave tona zhvillimore. Sigurojmë cilësi për konsumatorin, besim për fermerin dhe besueshmëri për produktet shqiptare në tregjet ndërkombëtare”, është shprehur në tetor të vitit 2025, ministri i Bujqësisë, Andis Salla. gsh