VOAL

VOAL

Please Wait ...
0%

Si të përgatisni në shtëpi llokume me arra – Receta e përkryer

By | August 10, 2019

Komentet

Patate të pjekura me krem qumështi – Receta me shije fantastike

Të përgatitura me krem qumështi, patatet arrijnë të zbuten plotësisht por pa e humbur formën e tyre.

Një recetë perfekte e cila me aromën e saj do t’i tërheqë të gjithë pranë tryezës.

Në dy hapa ju do të keni përgatitur një drekë të shijshme dhe të plotë e cila mund të shoqërohet me çdo sallatë.

Të përgatitura me krem qumështi, patatet arrijnë të zbuten plotësisht por pa e humbur formën e tyre.

Vetëm kini kujdes pasi është një ushqim kalorik të mos e shkelni me sasinë që konsumoni.

AgroWeb.org ju këshillon që për këtë recetë të zgjidhni patatet e reja ose ato të vogla.

Përbërësit

3 lugë gjelle gjalpë

3 lugë gjelle me miell

Një lugë e gjysmë me kripë

Një majë luge piper i zi

2 gota me qumësht

1 gotë me djathë kaçkavall të grirë

6 patate mesatare te reja ose 8-9 patate te vogla

Gjysmë qepe

Përgatitja

Si fillim AgroWeb.org ju këshillon që të qëroni dhe të prisni në feta jo shumë të trasha patatet.

Mbushni një tas me ujë dhe futini fetat e patateve aty kështu do të largoni niseshtenë e tepërt që ato kanë.

Ndërkohë në zjarr vendosni një tenxhere dhe hidhni gjalpin që të shkrihet.

Më pas shtoni dhe miellin dhe me një lugë druri përzjejeni mirë në temperaturë të ulët.

Hidhni kripën dhe piperin dhe skuqeni derisa të jetë formuar një pastë e njëtrajtshme.

AgroWeb.org ju këshillon që tani të shtoni ngadalë qumështin dhe ta lini të kthejë një valë.

Pasi të ketë valuar lëreni të ziejë dhe për dy minuta të tjera, në mënyrë që masa të trashet.

Largojeni nga zjarri dhe shtoni aty djathin e grirë kaçkavall dhe përzjejeni derisa ai të ketë shkrirë.

Qëroni qepën dhe grini vetëm gjysmën e saj.

Shtojeni qepën tek kremi i qumështit dhe pasi ta keni përzierë shtoni fetat e patates.

Merrni një tavë dhe lyejeni me pak gjalpë ose vaj ulliri sipas preferencës dhe aty hidhni masën që përgatitët.

Piqeni tavën për 30-40 minuta ose derisa patatet të jenë zbutur plotësisht.

Pasi sipërfaqja të ketë marrë një ngjyrë të artë hiqeni nga zjarri dhe lëreni të ftohet, në mënyrë që të mpikset.

Më pas priteni dhe servireni për të gjithë të dashurit tuaj.

Mund ta ruani edhe në frigorifer, mjafton që ta mbuloni me qese kuzhine dhe ta fusni në frigorifer.

Prevedeja e Thanës – Si ta përgatisni për shije dhe shëndet të mirë

Prevedeja e thanës përdoret edhe për lehtësimin e komplikacioneve që sjell i ftohti.

Prevedeja është e shijshme, e lehtë dhe e butë, delikate në përbërjen e saj xhelatinoze dhe fantastike teksa përgatitet si shurup.

Prevedeja është simboli i mjeshtërisë së amvisave shqiptare në përgatitjen e ëmbëlsirave unike të kuzhinës sonë tradicionale.

Në vazhdën e recetave interesante të publikuara rregullisht, lexuesit e AgroWeb.org, kanë mësuar sekretet e recetave tradicionale, por edhe unike të prevedesë së manaferrës, kumbullës apo ftoit dhe boronicës, të cilat mund të përgatiten lehtësisht në shtëpi.

Kësaj here AgroWeb.org sugjeron recetën e përgatitjes së simbolit të prevedesë shqiptare, atë të thanës.

Prevedeja e thanës është me patjetër ëmbëlsira që nuk duhet të mungojë absolutisht në kuzhinën e familjeve shqiptare, jo vetëm për shijen e saj fantastike të ëmbël, të athët por mbi të gjitha për vlerat kuruese që ajo mbart.

Një gotë shurup nga prevedeja e thanës apo një dy lugë prevede prej saj kanë qenë përherë kura natyrale e përdorur nga nënat e gjyshet për lehtësimin e dhimbjeve të barkut të shkaktuara nga i ftohti.

Gjithashtu, prevedeja e thanës përdoret edhe për lehtësimin e komplikacioneve të tjera që sjell i ftohti siç janë dhimbjet e fytit por edhe të kokës.

Krahas vlerave të saj kurative, prevedeja e thanës është një kombinim i mrekullueshëm në përgatitjen e shumë ëmbëlsirave.

Më poshtë mund të ndiqni recetën e sugjeruar nga AgroWeb.org për ta përgatitur prevedenë e thanës krejt lehtë në shtëpi.

Si të përgatisni prevedenë e thanës në shtëpi

Përbërësit 2 kg thana pa bërthamë

7 filxhanë çaji me sheqer

4 gota me ujë

Udhëzimet

Merrni një tenxhere të madhe. Ziejini thanat deri sa të zbuten dhe të bëhen të bardha. Procesi i zjerjes mund të zgjasë deri në 40 minuta.

Pasi kanë zjerë thanat, kulloni lëngun përmes një site kuzhine apo kullorëse dhe hidheni në një enë.

Lëngu i nxjerrë duhet të arrijë në sasinë e përafërt me 5 filxhanë e gjysmë dhe duhet lënë të ftohet për 30 minuta.

Më pas hidheni lëngun sërish në tenxhere.

Shtoni sheqerin dhe lëreni të valojë derisa masa të trashet në formën e xhelatinës.

Hiqeni nga zjarri dhe me një lugë hiqni shkumën e formuar.

Masën e nxehtë hidheni me kujdes në kavanozë të sterilizuar duke lënë një hapësirë nga kapaku.

Përdorni një lugë për të larguar bulëzat e krijuara dhe mbylleni kapakun fort.

Kavanozët duhen vendosur për pesë minuta në një tenxhere të madhe me ujë të valuar. /AgroWeb.org 

Pastiço me kos – Receta e veçantë me shije të lehtë

Pastiço është një nga recetat tashmë tradicionale dhe në tryezat tona.

Një pjatë që ka aq shumë mënyra për ta përgatitur, nga ajo klasikja me kimë dhe beshamel e deri ajo që përgatitet me spinaq.

Diçka e tillë mundëson që çdo familje ta përgatisë pastiçon sipas preferencave personale.

AgroWeb.org ju sjell një recetë aq të thjeshtë dhe me përbërës që gjenden në çdo shtëpi.

Pastiçoja me kos kërkon vetëm tre përbërës, kos vezë dhe makarona dhe pak mund për ta përgatitur, por është aq e shijshme sa ja vlen çdo minutë.

Përbërësit

750 ml kos

400 g makarona

4 lugë gjelle me vaj ulliri

4 vezë

Kripë

Piper i zi

Përgatitja

Si fillim vendosni një tenxhere me ujë në zjarr.

Kur uji të ketë zierë hidhni kripë dhe më pas shtoni dhe makaronat.

AgroWeb.org ju këshillon që të përzieni pak makaronat në mënyrë që të mos ngjiten me njëra tjetrën.

Ndërkohë që ato ziejnë, merrni një tas dhe thyeni të gjithë vezët që nevojiten dhe përzjejini me kosin.

Shtoni kripë dhe piper sipas dëshirës për t’i dhënë shije.

Kosin dhe vezët duhet t’i rrihni derisa të krijohen një masë e plotë dhe kremoze.

Hiqini makaronat nga zjarri, kullojini dhe shpëlajini me pak ujë të ftohtë, në mënyrë që të mos vazhdojnë të zbuten.

Makaronat shtojini tek masa e kosit dhe vezëve dhe me një lugë mundohuni që t’i përzieni.

Shtoni në këtë fazë dhe vajin e ullirit dhe përsëri përzjejini.

Merrni një tavë dhe spërkateni me pak vaj, dhe më pas kaloni të gjithë masën e përgatitur.

Me lugë përpiquni ta drejtoni sipërfaqen e saj që të jetë e njëtrajtshme.

Piqeni me 200 gradë derisa masa të jetë mpiksur plotësisht dhe sipërfaqja e pastiços të jetë skuqur.

Mjafton që ta nxirrni nga furra e ta lini sa të ftohet pak, kështu do të mpikset më mirë dhe do ta keni më të lehtë për ta prerë.

Nëse dëshironi mund t’i shtoni djathë të bardhë ose gjizë, pasi receta bazë i pranon dhe variacionet e tjera të përgatitjes.

Kefiri – Mësoni të përgatisni pijen e jetëgjatësisë

Si kosi dhe produktet e tjera të bulmetit, kefiri është i pasur me probiotikë, që ndihmojnë në tretjen e ushqimeve.

Kefiri është një nga super ushqimet më të kërkuara të momentit.

Me shijen e tij karakteristike, që vjen pak si e athët, ai është i pasur me probiotikët që kemi dëgjuar kaq shumë.

AgroWeb.org ju sjell mënyrën se si ta përgatisni në shtëpi këtë pije plot vlera.

Çfarë është Kefiri?

Kefiri është një produkt bulmeti i ngjashëm me kosin dhe ajkën e qumështit.

Por ajo që e bën të veçantë këtë pije është mënyra se si përgatitet.

Në vend që të ngrohet qumështi dhe të lihet në ambient të ngrohtë, siç bëjmë kur përgatisim kosin, ju duhen vetëm të keni farat e kefirit.

Këto fara nuk janë vërtetë fara si ato të grurit apo elbit.

Por janë disa struktura qelizore të baktereve dhe tharmit, të cilët fermentojnë qumështin.

Çfarë vlerash ka për organizmin?

Si kosi dhe produktet e tjera të bulmetit, kefiri është i pasur me probiotikë, që ndihmojnë në tretjen e ushqimeve.

Gjithashtu kjo pije ndihmon në rujatjen e florës dhe nivelit të aciditetit të sistemit tretës.

Sipas të dhënave të AgroWeb.org, procesi i fermentimit ndryshon disa nga proteinat e qumështit, duke e kthyer në një pije që tretet më lehtë.

Për disa persona që janë intolerant ndaj qumështit, kefiri është një zëvendësues perfekt.

Ku t’i gjeni farat e kefirit?

Mënyra më e mirë është që ta merrni nga një miku juaj.

Njihen si fara por në të vërtetë kanë formën e kërpudhës.

Farat pas një kohe të caktuar fillojnë dhe shtohen, dhe kushdo që e përgatit qumështin e kefirit vetë ka mjaftueshëm për ta shpërndarë.

Por nëse asnjë nga miqtë tuaj nuk e konsumon, mos u shqetësoni, farat mund t’i gjeni edhe në supermarkete ose në markete të specializuara.

Si të përgatisni Kefirin?

Për një gotë ju nevojiten:

250 ml me qumësht natyral jo i pasterizuar (si për shembull qumështi i fshatatrëve)

Një lugë çaji me fara kefiri

Një kavanoz apo enë qelqi

Përgatitja

Tek ena e qelqit vendosim farat e kefirit dhe më pas shtojmë qumështin me temperaturë ambienti.

E përziejmë ngadalë përbërjen me një lugë druri, duke treguar kujdes që të mos shkëputni farat e kefirit.

Mbulojmë kavanozin me një napë të pastër (si ato që kullojmë kosin) ose mund të përdorni një pecetë të hollë duke e kapur me një llastik.

Mos i vendosni kapak me filetim, pasi avujt që formohen nga fermentimi i farave mund të shkaktojnë një presion që në disa raste e thyen dhe kavanozin.

Përbërjen lëreni në temperaturë ambienti, për 16-18 orë.

Kur të vini re që qumështi ka filluar të pritet, pra të marrë formën e kosit, edhe pak orë duhen që ta keni gati.

Në periudhën e verës, fermentimi kryhet më shpejt, dhe mund të duhen rreth 12-16 orë.

Pasi kefiri të jetë gati, kullojeni me ndihmën e një site të vogël plastike.

Farat e kefirit që mbeten është e këshillueshme që t’i shpëlani pak në ujë të ftohtë para se t’i përdorni përsëri.

Si dhe të përdorni një enë të re qelqi sa herë që përgatisni kefir.

Qumështin e kefirit mund ta pini direkt pasi e keni kulluar ose ta ruani në frigorifer për jo më shumë se sa një javë.

Nëse doni që t’i ruani farat, AgroWeb.org ju sugjeron t’i vendosni në një enë me pak qumësht, dhe të mbuluar vendoseni në frigorifer.

Si të përgatisni në shtëpi llokume me arra – Receta e përkryer

Me arra apo me shurup trëndafili këto janë dy mënyrat speciale të amvisave shqiptare në përgatitjen e llokumeve.

Dikur qerasja e miqve me llokume simbolizonte lidhjen e nishaneve të dy të dashuruarve. Fejesën e martesën, traditë që vijon të ruhet edhe sot.

Padyshim janë ndër ëmbëlsirat më fisnike shqiptare. Prej shekujsh me radhë llokumet janë shndërruar në një traditë e kuzhinës shqiptare, megjithëse origjina e tyre është kuzhina turke.

Me arra apo me shurup trëndafili këto janë dy mënyrat speciale të amvisave shqiptare në përgatitjen e llokumeve.

Mahnitëse e të plota në shije, llokumet qendrojnë në piedestalin e ëmbëlsirave tradicionale shqiptare

Nëse doni të përgastini diçka të veçantë për të dashurit tuaj, të gostisni miqtë dhe t’u shprehni atyre mikpritjen, ndiqni këtë recetë të thjeshtë të AgroWeb.org për të dhuruar vërtetë momente të ëmbla kënaqësie në familje.

Duhet vetëm pak durim e shumë dashuri në përgatitjen e këtyre ëmbëlsirave të vogla me arra dhe gjithçka brenda një ore është gati.

Përgatitja e Llokumeve me Arra Lehtë në Shtëpi

Përbërësit

2 gota sheqer

1 gotë ujë

2 lugë gjelle me niseshte

1 lugë kafeje me limontos (ose lengu i nje kokërr limoni)

3 lugë gjelle sheqer pluhur

2 lugë gjelle miell

1 tas i vogël me arra të thërrmuara

Përgatitja  

Hedhim sheqerin dhe ujin në një tenxhere dhe i lëmë të zjejnë në një nxehtësi të ngadaltë derisa masa të shndërrohet në shurup të trashë.

Gjatë kësaj kohe, në një tas të vogël hollojmë më pak ujë niseshtenë derisa të shkrijë tërësisht. Pasi ka shkrirë e hedhim tek shurupi dhe më pas shtojmë limontosin.

Vijojmë të përzjejmë masën derisa masa të trashet plotësisht.

Në fund, AgroWeb.org u sugjeron që të shtoni arrat e thërrmuara dhe vijoni t’i përzjeni duke ulur edhe më tej nivelin e nxehtësisë.

Vijojmë të përzjejmë deri në momentin që masa nis të shkëputet nga anët e tenxheres.

Në këtë koment e heqim nga zjarri dhe e vendosim në një tepsi apo të tavë të spërkatur më parë me miell të situr nga të gjitha anët.

E lëmë të ftohet dhe të pushojë dhe ditën e nesërme e presim në kubikë të vegjël apo forma të tjera sipas preferencës.

Në fund e spërkasim pak sheqer pluhur. E servirim si gosti ndaj miqve apo për të ëmbëlsuar veten dhe të dashurit në familje.

Si të përgatisni reçelin e kumbullave në dy mënyra – Shije dhe ëmbëlsi fantastike

Në doni të ëmbëlsoni veten apo më të dashurit tuaj apo në doni një gosti të veçantë për miqtë përgatisni reçel me kumbulla.

Të freskëta me shije delikate ato shndërrohen në një mrekulli të ëmbël teksa përgatiten në traditën më fantastike të amvisave shqiptare, atë të reçelit.

AgroWeb.org ju sugjeron më poshtë dy metoda fantastike, krejt të lehta për përgatitjen e reçelit me kumbulla në shtëpi.

Përbërësit për 2 kg reçel me kumbulla

1.5 kg kumbulla të pjekura

1 kg sheqer (sasia e sheqerit hidhet sipas preferencës, mund ta shtoni edhe më pak nëse e preferoni më të ëmbël))

100 ml ujë

Sa më të pjekura të jenë kumbullat aq më të mira.

Përpiquni të zgjidhni kumbulla sa më të buta, pasi reçeli do të bëhet akoma dhe më i shkrifët.

Kumbullat e pjekura kanë dhe nivelin më të lartë të fruktozës, dhe i jep reçelit ëmbëlsinë natyrale të frutit.

Lërini në sheqer përreth 4-6 orë të marinohen.

Mbase mund t’iu duket e çuditshme kjo metodë, duke qenë se zakonisht sheqerin e shtojmë kur vendosim frutat në zjarr.

Marinimi i jep mundësinë kumbullave të përthithin më mirë sheqerin dhe lëngu i reçelit të dali dhe më i trashë.

Përgatitja

Metoda e parë

Pasi t’i keni larë me ujë të bollshëm kumbullat, pritini në katër pjesë.

Në një tas të madh përzieni me duar sheqerin bashkë me kumbullat.

Tasin më pas vendoseni në frigorifer ose në një vend të freskët dhe lëreni përreth 4-6 orë.

Kështu kumbullat do të kenë lëshuar lëngun e tyre dhe do të jetë formuar shurupi shumë i shijshëm.

Në një tenxhere kaloni masën e kumbullave me sheqerin dhe vendoseni në zjarr të ngadaltë.

Çelësi i ruajtjes së shijes është që të përdorni një tenxhere të gjerë.

Më pas shtoni dhe ujin, dhe lëreni që të ziejë. Sigurohuni që ta përzieni herë pas here, kështu  kumbullat nuk do të bien në fund të tenxheres dhe të ngjiten. Por mos e përzieni aq shumë sa që kumbullave t’u humbasë forma e tyre.

AgroWeb.org ju këshillon që të vazhdoni të zieni reçelin derisa sasia e tij fillestare të jetë përgjysmuar.

Gjatë zierjes reçeli formon ajkë në sipërfaqe të tij, që të përfitoni një ngjyrë sa më të bukur, me një lugë hiqeni sa herë formohet.

Nëse doni që reçeli të mos formojë ajkë, mund të shtoni një lugë gjelle me gjalpë të freskët.

Pasi të kenë kaluar 15-30 minuta, është koha për të kontrolluar nëse reçeli është gati.

Me një lugë provoni dendësinë e reçelit. Ai nuk duhet të jetë i trashë si krem, por as dhe shumë i ujshëm.

Pasi të jetë ftohur pak mund të mbushni kavanozat e qelqit.

Reçelin është e mira që ta mbani në temperaturën e ambientit për disa orë e më pas ta vendosni në frigorifer.

Metoda e dytë

Nëse preferoni që reçeli të mos ketë kokrra, mjafton që pasi t’i keni marinuar t’i shtypni me ndihmën e një kullese kuzhine.

AgroWeb.org ju këshillon që të mos i qëroni lëkurat para marinimit, pasi tek to qëndron dhe përqindja më e lartë e shijes unike të kumbullave.

Më pas mund të ndiqni hapat njësoj si tek metoda e parë, dhe do të përfitoni një reçel me një ngjyrë dhe shije mahnitëse.

Mënyrat më të mira për trashjen e reçelit krejt lehtë

Zakonisht kur përgatisim reçel ngaqë duam ta bëjmë më të shëndetshëm nuk i hedhim sasinë e rekomanduar të sheqerit, por diçka e tillë ndikon tek trashësia e reçelit.

Reçeli i shtëpisë është padyshim një produkt që kërkon mund por edhe dashuri të madhe.

Përgatitja e reçelit është traditë e hershme e amvisave shqiptare, por preferencat ndryshojnë.

Nga më të njohurit janë reçeli i fikut dhe ai i qershisë por nuk përjashtohen as ai i luleshtrydhes, kumbullës dhe ftoit.

Po të pyesësh një amvisë, sfida më e madhe në përgatitjen e reçelit është trashja e tij.

Ndonjëherë, pavarësisht sasisë së duhur të frutave, sheqerit dhe lëngut të limonit, reçeli sërish mbetet i hollë.

Ekspertët e AgroWeb.org ju këshillojnë mënyrat më praktike dhe të thjeshta për trashjen e reçelit tuaj të preferuar.

Mos u Nxito

Populli thotë: “i duruari i fituari,” dhe për këtë ka të drejtë.  Ndonëse në fillim duket sikur reçeli nuk është trashur siç duhet dhe është tepër i hollë, prisni pak dhe mos u nxitoni.

Në rastet e shumë reçelërave, veçanërisht atë të luleshtrydheve nevojitet një kohë më e gjatë për ftohjen dhe mpiksjen ashtu siç duhet.

Prandaj lëreni të ftohet në temperaturë ambienti dhe më pas futeni në frigorifer.

Sasia e Sheqerit dhe Lëngu i Limonit

Zakonisht kur përgatisim reçel ngaqë duam ta bëjmë më të shëndetshëm nuk i hedhim sasinë e rekomanduar të sheqerit, por diçka e tillë ndikon tek trashësia e reçelit.

Nga ana tjetër nëse nuk hidhni lëngun e limonit apo limontoz, sheqeri do të karamelizohet duke e ngurtësuar reçelin.

Zierje e Dyfishtë

Përgatitja e reçelrave pa përdorur pektinë kërkon durim dhe praktikë.

Nëse ju shikoni që dhe pasi reçeli juaj është ftohur ai ende nuk është mpiksur, vendoseni për ta zierë edhe njëherë.

Por kini kujdes që zjarri të jetë masatar dhe enët e qelqit që keni përdorur pë të ruajtur reçelin t’i keni larë mirë.

Futeni në furrë

Nëse nuk dëshironi që ta zieni përsëri reçelin në tenxhere, mund të përdorni furrën.

Hidheni reçelin në një tavë dhe futeni në furrë me temperaturë të ulët 150 gradë dhe lëreni për 30 minuta ose deri në një orë.

Diçka e tillë do të përqendrojë shijen dhe do të përthajë lëngun e tepërt të reçeli duke e lënë atë të plotë. Por funksionon tek reçelrat si ai i pjeshkës, kajsisë apo i kumbullës.

Si të përgatisni në shtëpi eskallop me mish pule, pana dhe kërpudhë

Vetë fjala ‘eskallop’ e ka origjinën në Francë dhe u fut në terminologjinë e kulinarisë në shekullin e 17. Domethënia e saj është mish i hollë i mbështjellë dhe i gatuar mirë.

Mishi i pulës ofron mundësinë e shumë gatimeve të shijshme, të lehta e të shëndetshme.

Ai kombinohet mjaft mirë me një sërë ushqimesh siç janë brokoli dhe kërpudhat.

Në këtë artikull të AgroWeb.org do të mësoni recetën e thjeshtë të eskallopit kremoz me fileto pule, kërpudha, brokoli dhe krem pana.

Vetë fjala ‘eskallop’ e ka origjinën në Francë dhe u fut në terminologjinë e kulinarisë në shekullin e 17. Domethënia e saj është mish i hollë i mbështjellë dhe i gatuar mirë.

Kjo recetë është shumë e shijshme dhe mund të serviret jo vetëm në drekë por edhe në mbrëmje.

Eskallop Kremoz Pule Me Kërpudha

Për këtë gatim ju nevojiten:

Vaj ulliri,

2 fileto të mëdha pule të prera hollë.

Gjysëm qepe e grirë hollë,

1 thelb hudhër e grirë hollë,

100 gramë kërpudha të prera,

250 ml lëng pule,

100 ml pana,

1 lugë gjelle me majdanoz të freskët,

300 gramë brokoli

Përgatitja:

Vendoseni tiganin e thellë në zjarr dhe hidhni pak vaj ulliri.

Pasi të jetë nxehur vendosni filetot e pulës dhe kavërdisini nga të dyja anët për rreth 10 minuta ose deri sa sipërfaqja të ketë marrë një ngjyrë kafe të çelët.

Hiqini filetot nga zjarri dhe lërini mënjanë.

Në të njëjtin tigan shtoni pak vaj dhe kavërdisni qepët për 2-3 minuta ose deri sa të zbuten dhe të bëhen të tejdukshme.

Shtoni hudhrën dhe kavërdisini së bashku për një ose dy minuta të tjera.

Më pas vjen rradha e kërpudhave të cilat duhen skuqur deri sa të marrin ngjyrë kafe.

Nëse kërpudhat ngjisin në tigan, shtoni pak lëng pule ose ujë.

Kur kërpudhat të jenë gatuar plotësisht shtoni filetot te pulës dhe lëngun e mishit të saj.

Vendosni një kapak mbi tigan, uleni temperaturën dhe lërini përbërësit të gatuhen së bashku për 12-15 minuta.

Shtoni kripën, piperin, tufat e vogla të brokolit dhe kremin pana.

Në fund të gatimit mund të shtoni gjethet e grira imët të majdanozit dhe servireni menjëherë.

Merrni recetën – Si të përgatisni maja natyrale buke vetë në shtëpi

AgroWeb.org ju sjell më poshtë të gjithë hapat që duhet të ndiqni për përgatitjen e majasë natyrale të bukës dhe recetave të tjera me bazë brumi krejt lehtë në shtëpi.

Një nga mënyrat më të mençura për t’u ushqyer shëndetshëm është përgatitja e shumë përbërësve vetë në shtëpi, edhe e atyre produkteve që duket se gjenden vetëm në markete apo dyqane.

AgroWeb.org ju sjell më poshtë të gjithë hapat që duhet të ndiqni për përgatitjen e majasë natyrale të bukës dhe recetave të tjera me bazë brumi krejt lehtë në shtëpi.

Do t’ju duhen thjeshtë dhe vetëm dy përbërës dhe pak durim e kujdes.

Përgatitja e Majasë Natyrale në Shtëpi    

Përbërësit

200 gr miell

100 ml ujë

Përgatitja

Shtoni miellin në një tas dhe hidhni pak nga pak ujin duke e trazuar përmes një luge. Më pas punojeni me dorë derisa të krijohet një topth i vogël, i butë.

Vendoseni brumin e përgatitur duke e ngjeshur në fund të tasit dhe mbulojeni me pecetë apo peshqir të lagur kuzhine duke e puthitur mirë sipërfaqen e tasit. Kjo do të ndihmojë në shmangien e krijimit të një koreje të fortë në sipërfaqen e brumit. (Por në rast se korja krijohet atëherë hiqeni me kujdes nga sipërfaqja e brumit)

Mund të vendosni edhe një pjatë pasi ta keni mbuluar tasin me pecetën apo peshqirin e kuzhinës.

Lëreni në temperaturë ambjenti për një ditë të plotë.

Ditën tjetër, pasi të kenë kaluar 24 orë, shtoni në tasin ku keni brumin 100 gr miell dhe 50 ml ujë.

Përziejeni me brumin që keni në tas dhe pasi masa të jetë bërë homogjene mbylleni sërish dhe lëreni të pushojë në temperaturë ambjenti edhe për një ditë tjetër.

Ditën e tretë, shtoni sërish 50 gr miell dhe 25 ml ujë, punojeni me brumin që keni lënë për t’u fermentuar. Mbulojeni tasin apo kavanozin ku keni brumin përherë me një pecetë të lagur kuzhine dhe lëreni të pushojë në temperaturë ambjenti.

Kontrollojeni herë pas here duke nuhatur aromën e brumit që po fermentohet. Nëse ka një aromë të mirë dhe jo acidike vijoni përditë të rifreskoni brumin e majasë me pak miell dhe ujë. Gjithmonë në raportin 2 me 1. Pra, në rast se shtoni dy lugë gjelle miell atëherë do t’ju duhet një lugë gjelle ujë.

Ky proces duhet të zgjasë për 15 ditë dhe atëherë majaja natyrale për të përgatitur bukën vetë në shtëpi por edhe receta të tjera me bazë brumi është gati.

Pas 15 ditësh, brumin e majasë që keni përgatitur mund ta ruani në frigorifer në një enë që mbyllet shumë mirë me kapak të puthitur. Dhe mund ta ruani ashtu për 7 ditë, kohë në të cilën edhe mund ta përdorni.

Pas shtatë ditësh duhet ta risfreskoni me pak miell dhe ujë në raportet 2 me 1 si më sipër për të siguruar që majanë natyrale të bukës do ta keni përherë në kuzhinën tuaj.

Majanë e përgatitur vetë duhet ta përdorni një orë pasi e keni nxjerrë nga frigoriferi.

Ndërkohë pasi keni marrë pjesën që duhet,  brumin e majasë mund ta rifreskoni me pak miell dhe ujë dhe tani punoni derisa masa të bëhet homogjene. Pas kësaj lëreni edhe një orë tjetër në temperaturë ambjenti e më pas ruajeni në frigorifer.

Mish viçi i shuar me verë të kuqe – Receta me shije të veçantë

Një nga recetat më të shëndetshme dhe më të shijshme të mishit është ai i shuar me verë të kuqe.

Mishi i viçit është një nga produktet më të konsumuara në Shqipëri.

Në fakt, deri pak kohë më parë, gjellërat e ndryshme nuk imagjinoheshin dot pa mish.

Ndonëse ekspertët rekomandojnë kufizimin e konsumit të mishit të kuq, ata nuk përjashtojnë mundësinë që ky i fundit të konsumohet herë pas here por pa e tepruar.

Një nga recetat më të shëndetshme dhe më të shijshme të mishit është ai i shuar me verë të kuqe, të cilën do ta gjeni më poshtë në këtë artikull të AgroWeb.org

Përbërësit

Vaj ulliri për skuqje,

1 kg mish viçi i freskët, tul i plotë i prerë në kubikë,

3 lugë gjelle me miell,

2 qepë të mëdha të grira hollë,

600 gramë karrota të prera në shiritë të vegjël (nëse preferoni),

4 thelbinj hudhër të shtypur,

Një gotë verë e kuqe

850 ml lëng mishi

3 gjethe dafine,

Disa degëza trumzë të freskët

Patate për servirje

Përgatitja:

Merrni një tigan të thellë dhe vendoseni në zjarr.

Hidhni në të një lugë gjelle vaj ulliri.

Në një enë tjetër, hidhni copat e mishit, spërkatini me miell dhe erëza dhe më pas skuqini me rradhë, duke shtuar nga pak vaj ulliri herë pas here.

Pasi t’i keni skuqur copat e mishit, transferojini ato në një tenxhere.

Në tigan, vazhdoni të skuqni qepët dhe karrotat për 10-12 minuta deri sa të fillojnë të marrin një ngjyrë kafe të çelët.

Shtoni hudhrën dhe kaurdiseni për një minutë dhe më pas verën e kuqe.

Pas 60 sekondash, lëngun me karrotë, qepë dhe verë hidhini në tenxheren e mishit.

Shtoni lëngun e mishit, gjethet e dafinës dhe trumzën dhe lërini të marrin valë.

Më pas uleni temperaturën, mbyllni kapakun e tenxheres dhe lëreni gjellën të gatuhet për dy orë e gjysmë deri sa mishi të jetë zbutur.

Nëse salca duket e hollë, hiqeni kapakun nga tenxherja dhe lëreni të ziejë zbuluar që të trashet.

Më pas hiqeni nga zjarri dhe nëse dëshironi gjellën mund ta servirni me patate të ziera ose pure patatesh.

Sufllaqe shtëpie – Receta origjinale, e shëndetshme me shije të përkryer

Pite të buta plot shije të kombinuara me shije të ndryshme fantastike.

Me origjinë nga kuzhina greke, sufllaqet sot janë shndërruar në një nga ushqimet më popullore në çdo cep të botës përfshirë padyshim edhe Shqipërinë.

Pite të buta plot shije të kombinuara me shije të ndryshme fantastike.

Pavarësisht shijes së tyre të plotë dhe ngopëse, sufllaqja e përgatitur në fast food-e është një ndër produktet më të kontestuara përsa i përket vlerave ushqimore  dhe dëmeve të saj për shëndetin.

Por e përgatitur në shtëpi, sufllaqja mbetet një ushqim fantastik, i shëndetshëm me shije të mrekullueshme.

AgroWeb.org ju sjell më poshtë recetën origjinale të përgatitjes së sufllaqes krejt lehtë në shtëpi.

Përgatitja e Sufllaqes së Shtëpisë

Përbërësit 

2 lugë çaji maja buke

1 lugë çaji me sheqer

160 ml qumësht

80 ml ujë i ruajtur në temperaturë ambjenti

320 gr miell gruri

1 lugë çaji kripë

1 lugë gjelle vaj ulliri

Përgatitja

Bashkoni në një tas sheqerin, majanë e bukës, ujin dhe qumështin. Përzjeini të gjitha bashkë dhe lërini mënjanë për 5 minuta.

Në një tjetër tas të madh, AgroWeb.org ju udhëzon të bashkoni miellin dhe kripën. Përzjeini me një njëra tjetrën.

Shtoni përzjerjen e majasë me qumësht dhe përzjeheni me miellin derisa masa të njëtrajtësohet.

Kalojeni brumin në tavolinën e kuzhinës, të cilën më parë e keni spërkatur me pak miell.

AgroWeb.org ju udhëzon të punoni brumin për disa minuta derisa masa e tij të bëhet e butë.

Më pas, të gjithë brumin rrumbullakoseni dhe mbulojeni me një pecetë të pastër kuzhine. Lëreni të pushojë përreth 40 minuta derisa masa e tij të dyfishohet.

Më pas, vendosni një tigan në zjarr mesatar.

Shtypeni brumi me duar dhe ndajeni në 6 pjesë të barabarta.

Hapeni secilën prej tyre në formën e rrethit me një diametër prej 20 centimetrash.

Shtoni pak vaj ulliri duke lyer të gjithë sipërfaqen e tiganit. Sapo të nxehet pak hidhni një nga pitet.

Kthejini herë pas here nga të dyja anët derisa pitja të piqet dhe kështu bëni me të gjitha pitet.

Mbushja e Sufllaqes

Për mbushjen e sufllaqes mund të përdorni kombinime të ndryshme sipas preferencës.

Klasikja është mish (kryesisht pule), patate të skuqura, salcë kosi e përzjerë me hudhra, mjadanoz e kastraveca, domate, qepë.

Mishin mund ta zjeni dhe ta ndani në fije ose copa të vogla ose ta gatuani më parë në formën e shishqebapit duke e ndarë në copa, kaluar në shkopinj në kuzhine kombinuar me copa të ndryshme perimesh e më pas ta piqni në furrë.

Më pas me shishqebapin mund të mbushni sufllaqen duke e lyer më parë me salcë kosi e duke i shtuar edhe përbërës të tjerë.

Mund ta kombinoni me perime të pjekura dhe djathë të bardhë por edhe me mbushje të tjera sipas preferencës.

Mënyra e shëndetshme e gatimit të peshkut në tigan në 20 minuta

Recetat më të njohura të peshkut janë ato në furrë apo peshk i skuqur.

Peshku shumë i preferuar për çdo tavolinë, karakterizohet nga shija e veçantë e tij.

Recetat më të njohura të peshkut janë ato në furrë apo peshk i skuqur.

Shija tek të dyja është e mrekullueshme dhe konsiderohet si një ushqim i veçantë që përgatitet po në raste të veçanta.

Megjithëse konsumimi i këtij ushqimi rekomandohet shumë për shkak të vlerave të jashtëzakonëshme shëndetësore që ka.

Në mënyrë që t’a bëni atë më shpesh dhe pa mbushur shtëpinë me aromë AgroWeb.org ju sjell një mënyrë të re shumë të shëndetëshme e të shijshme përgatitje.

Peshku i zier në tigan dhe i mbuluar me domate qëndron mes supës dhe gatimit të peshkut në tavë.

Mendohet që kjo recetë të ketë prejardhje të lashta dhe është krijuar nga vetë peshkatarët.

Duke qënë se çmimi i kripës shumë vite më parë ishte shumë i lartë, ata i gatuanin pjatat e tyre të peshkut në tigan duke përdorur ujë deti dhe domate.

Uji i detit zevëndësontë pikërisht kripën e munguar.

Gjithsesi në recetën e sotme kjo metodë nuk përdoret më.

Përtej prejardhjes se veçantë së kësaj pjate, do të jetë shija e mirë e saj që do të bëjë bashkë të gjithë familjen.

Ndiqeni më poshtë sipas këshillave të AgroWeb.org mënyrën e saktë të përgatitjes së këtij peshku.

Përbërësit

1 peshk rreth 400 gr

250 gr domate

2 thelbi hudhër

2-3 lugë uthull e bardhë rrushi

2 lugë vaj ulliri

1 gotë ujë

kripë

piper

1 tufë majdanoz

Përgatitja

Për të nisur me përgatitjen e kësaj recete AgroWeb.org ju këshillon të pastroni fillimisht mirë peshkun dhe të prisni domatet në copa të vogla.

Nëse do të përdorni domate të vogla qershi, mjafton t’i prisni ato përgjysmë.

Më pas zgjidhni një tigan të thellë dhe të gjerë për të vazhduar me pjesën tjetër të gatimit.

Vendosni në tigan peshkun e pastruar mirë dhe copëzat e domateve që pretë më parë.

Hidhni thelbinjtë e hudhrave, majdanozin e grirë hollë dhe vaj ulliri sipas dëshirës tuaj.

Në fund shtoni ujin bashkë me pak uthull rrushi.

Për një shije më të fortë uthullën e rrushit mund t’a zëvendësoni me gjysmë gotë vetë të bardheë dhe gjysmë gotë ujë.

Shtoni sipas dëshirës edhe kripën bashkë me piperin dhe mbulojeni tiganin tuaj me një kapak hermetik.

Vendoseni tiganin në zjarr të mesëm për 20 minuta, gjatë kësaj kohe kontrollojeni peshkun dhe lageni me ujin e tij herë pas here.

Ndonëse 20 minuta janë të mjaftueshëm për një peshk të madhësisë që receta parashikon koha ndryshon në varësi të peshkut.

Pra, nëse keni peshq më të vegjël koha mund të jetë më e shkurtër ose e kundërta.

Pasi të shikoni që peshku është gatuar plotësisht, mund t’a shërbeni në tavolinë duke e shoqëruar me domate dhe lëng.

Sipas dëshirës, shtoni përsëri edhe pak madanoz të grirë për një shije më të freskët.