Ministri në detyrë i Mbrojtjes së Kosovës, Ejup Maqedonci, ka deklaruar se Kosova është e gatshme të ndihmojë Shqipërinë dhe Malin e Zi në përballimin e zjarreve.

Përmes një reagimi në rrjetet sociale, Maqedonci tha se u ka përcjellë homologëve gatishmërinë për të vënë në dispozicion kapacitetet e Kosovës dhe të FSK-së.

Ndërkohë, situata nxjerr në pah edhe njëherë mungesën e kapaciteteve të mjaftueshme të shtetit shqiptar për përballimin e zjarreve, veçanërisht për shkak të mungesës së mjeteve të specializuara dhe investimeve të pamjaftueshme në këtë sektor.Postimi

Postimi i plotë:

Në këto ditë sfiduese, kur Shqipëria dhe Mali i Zi po përballen me zjarre në zona të ndryshme të vendeve të tyre, u kam përcjellë homologëve të mi, ministrave të Mbrojtjes, gatishmërinë e Ministrisë së Mbrojtjes së Republikës së Kosovës për të ofruar mbështetje me kapacitetet që kemi në dispozicion.

Kosova është e gatshme të kontribuojë në mbështetje të autoriteteve përkatëse, nëse një ndihmë e tillë vlerësohet e nevojshme, duke vënë në dispozicion kapacitetet tona për përballimin e situatës së krijuar nga zjarret.

Në momente të tilla solidariteti dhe bashkëpunimi marrin një rëndësi të veçantë.

Ministria e Mbrojtjes, Forca e Sigurisë së Kosovës dhe institucionet tjera të Republikës mbeten të gatshme të ofrojnë mbështetje dhe të kontribuojnë aty ku kapacitetet tona mund të jenë të dobishme.