Reporterët pa Kufij, i njohur me shkurtesën e tij franceze RSF, ka denoncuar atë që e quan “sulmin e synuar izraelit” që vrau Hossam Shabat, “një nga gazetarët më të njohur të Gazës”.

Mbikëqyrësi i medias tha se më parë “paralajmëroi se reporteri i Al Jazeera dhe kolegët e tij ishin në rrezik të lartë të vrasjes”.

“Ky model shumë i njohur nxit masakrën e paprecedentë të gazetarëve që po ndodh në Gaza”, tha në një deklaratë Jonathan Dagher, kreu i zyrës së RSF-së në Lindjen e Mesme.

Ushtria izraelite është “tashmë përgjegjëse për vdekjen e gati 200 gazetarëve në 15 muaj, duke përfshirë të paktën 43 të vrarë gjatë punës”, shtoi RSF.

Gazetari Hossam Shabat ishte vetëm 23 vjeç. Në një postim në X, të shkruar paraprakisht nga Shabat, ai është shprehur, “Nëse po e lexoni këtë, do të thotë se unë jam vrarë, me shumë mundësi i shënjestruar nga forcat okupuese izraelite.”

Shabat shkroi se gjatë 18 muajve të fundit të luftës, ai i ka kushtuar “çdo moment” popullit të tij.

“Kam dokumentuar tmerret në Gazën veriore minutë pas minute, i vendosur t’i tregoj botës të vërtetën që ata u përpoqën të varrosnin. Flija në trotuare, në shkolla, në tenda, kudo që të mundja. Çdo ditë ishte një betejë për mbijetesë. Unë durova urinë për muaj të tërë, megjithatë nuk u largova kurrë nga njerëzit e mi.”

“Unë ju kërkoj tani: mos ndaloni së foluri për Gazën,” shtoi Shabat. “Mos e lini botën të shikojë larg. Vazhdoni të luftoni, vazhdoni të tregoni historitë tona, derisa Palestina të jetë e lirë”, ka shkruar i riu para se të vritej. sn

Shtetet e Bashkuara kanë thënë të martën se kanë arritur marrëveshje ndaras me Ukrainën dhe Rusinë për të garantuar lëvizje të lirë të anijeve komerciale në Detin e Zi, dhe për të zbatuar një ndalesë në sulmet ndaj objekteve të energjisë së njëra-tjetrës.

Marrëveshjet, nëse zbatohen, do të përbëjnë përparimin të madh drejt një armëpushimi më të gjerë që Uashingtoni e konsideron shumë të rëndësishëm në bisedimet për paqe, që do t’i jepnin fund luftës trevjeçare të Rusisë në Ukrainë.

Rusia, megjithatë, ka thënë se nuk i beson presidentit ukrainas, Volodymyr Zelensky dhe do të nënshkruajë një marrëveshje për Detin e Zi, nëse Uashingtoni i lëshon “urdhër” atij për ta respektuar ujdinë.

“Neve na duhen garanci të qarta. Marrë parasysh përvojën e hidhur të marrëveshjeve vetëm me Kievin, garancitë mund të jenë vetëm rezultat i një urdhri prej Uashingtonit ndaj Zelenskyt dhe ekipit të tij që të bëjë një gjë dhe jo një tjetër”, ka thënë ministri i Jashtëm rus, Sergei Lavrov në disa komente televizive.

Ministri ukrainas i Mbrojtjes, Rustem Umerov, ka thënë se Kievi është pajtuar me marrëveshjet, dhe që do t’i mirëpresë shtetet e treta që të mbështesin zbatimin e tyre.

Megjithatë, ai ka thënë se Kievi do ta konsiderojë secilën lëvizje të anijeve ruse përtej zonës lindore të Detit të Zi si shkelje të shpirtit të marrëveshjeve, dhe në atë rast, vendi i tij do të ketë të drejtën e vetëmbrojtjes.

Moska ka nisur vazhdimisht raketa dhe dronë në linjën e frontit në Ukrainë, prej nisjes së luftës në shkurt të vitit 2022, duke shënjestruar centralet ukrainase të energjisë, dhe objektet për prodhim të gazit natyror.

Ukraina, në anën tjetër, ka nisur dronë luftarakë me rreze të gjatë për të sulmuar infrastrukturën ruse të naftës, siç janë rafineritë.

Uashingtoni ka lëshuar deklarata të ndara për media, pasi zyrtarët amerikanë janë takuar me përfaqësues të të dyja shteteve në Arabinë Saudite në ditët e fundit.

Disa takime kanë zgjatur mbi 12 orë.

Regjisori palestinez i dokumentarit fitues të çmimit Oscar No Other Land është arrestuar nga ushtria izraelite pasi kolonët e maskuar sulmuan shtëpinë e tij. Sipas pesë aktivistëve hebrenj amerikanë që dëshmuan sulmin, Hamdan Ballal, një nga katër regjisorët e filmit që dokumentoi shkatërrimin e fshatrave në Bregun Perëndimor, u rrethua dhe u sulmua nga një grup prej rreth 15 kolonësh të armatosur në Susya në zonën Masafer Yatta në jug të Hebronit.

“Ata filluan të gjuanin gurë drejt palestinezëve dhe shkatërruan një rezervuar uji pranë shtëpisë së Hamdanit,” tha Joseph, një nga aktivistët nga Qendra për Jo-Dhunë Hebraike, i cili kërkoi të mos përdorej emri i tij i plotë për arsye sigurie.

Dëshmitarët thanë se një grup ushtarësh mbërritën në vendngjarje së bashku me kolonët e tjerë të veshur me uniformë ushtarake, të cilët e ndoqën Hamdanin deri në shtëpinë e tij dhe ia dorëzuan ushtrisë.

“Kolonët shkatërruan makinën e tij me gurë dhe çanë njërën nga gomat. Të gjitha xhamat janë thyer”,  tha një tjetër dëshmitar.

Ballal u plagos nga kolonët dhe u mor nga ushtria izraelite. Anëtarët e grupit aktivist filmuan sulmin dhe më pas hynë në shtëpi dhe panë gjak mbi dysheme, për të cilin një anëtar i familjes tha se ishte derdhur kur Hamdani u godit në kokë.

Bashkëdrejtori izraelit Yuval Avraham shkroi në X se Ballal u sulmua dhe ka postuar një video ku shihet një kolon i maskuar që dyshohet se sulmon shtëpinë e Ballal.

“Që atëherë nuk ka asnjë lajm dhe nuk është e qartë nëse po merr kujdes mjekësor dhe çfarë po ndodh me të”, tha ai.

Sipas një dëshmitari okular, katër palestinezë u plagosën nga gjuajtja me gurë, shumica prej tyre lehtë. Policia tha se tre palestinezë u arrestuan, duke përfshirë një të mitur izraelit, i cili më vonë u lirua për shkak të plagëve të marra pasi u godit nga një gur.

Më 3 mars, “No Other Land”, i cili rrëfen shkatërrimin e fshatit palestinez Masafer Yatta në Bregun Perëndimor nga IDF, fitoi Oscarin për dokumentarin më të mirë. Filmi përfshinte dy regjisorë palestinezë, Ballal dhe Basel Adra, të dy banorë të Masafar Yatta, dhe dy regjisorë izraelitë, Yuval Abraham dhe Rachel Szor.

Në skenën në Los Anxhelos, dy nga katër regjisorët e filmit, një izraelit dhe një palestinez, bënë thirrje për të drejta për palestinezët dhe një zgjidhje të negociuar të konfliktit. Avraham, foli për shkatërrimin e Gazës dhe gjithashtu për pengjet izraelite, të rrëmbyer brutalisht më 7 tetor.

“Ka një rrugë tjetër, një zgjidhje politike, pa supremaci etnike, me të drejta kombëtare për të dy popujt tanë”, tha ai. Disa ditë pas fjalimit të Avrahamit për Oscar, Fushata Palestineze për Bojkotin Akademik dhe Kulturor të Izraelit (PACBI) lëshoi një deklaratë duke dënuar dokumentarin për shkeljen e “udhëzimeve kundër normalizimit” të lëvizjes. Kreu i këshillit bashkiak të fshatit palestinez Susya, kishte një mendim tjetër dhe falënderoi aktivistët për mbështetjen e tyre, përfshirë edhe ata izraelitë. Dokumentari, pavarësisht çmimit Oscar, nuk ka gjetur ende një distributor në Amerikë.  sn

Presidenti i SHBA-së, Donald Trump, tha sot se do të vendosë tarifë prej 25% për çdo vend që blen naftë nga Venezuela.

Me anë të një postimi në Truth Social, Trump theksoi se Venezuela mbetet një vend armiqësor për SHBA-në dhe sipas tij, asnjë shtet nuk duhet asnjë lloj marrëdhënie.

“Venezuela ka qenë shumë armiqësore re ndaj Shteteve të Bashkuara dhe lirive që ne i përkrahim. Prandaj, çdo vend që blen naftë dhe/ose gaz nga Venezuela do të detyrohet t’i paguajë një tarifë prej 25% Shteteve të Bashkuara për çdo tregti që bëjnë me vendin tonë”, shkroi Trump.

CNN raporton se Trump njoftoi se këto tarifa do të hyjnë në fuqi me 2 prill dhe tha se do të shpallë një numër tarifash reciproke ndaj kombeve të tjera, një ditë që ai i referohet si ‘dita e çlirimit’. sn

Sulmet ajrore izraelite në mbarë jugun e Rripit të Gazës kanë vrarë të paktën 19 palestinezë gjatë natës midis 22 dhe 23 marsit.

Në mesin e të vrarëve janë edhe një udhëheqës i lartë politik i Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – dhe disa gra dhe fëmijë.

Ushtria izraelite ka urdhëruar njerëzit që të evakuohen nga pjesë të qytetit të Rafahut, që gjendet në kufi me Egjiptin. Ushtria tha se shumë shpejt do të veprojë kundër militantëve në zonën e Tel al-Sultan – që ka pësuar dëme të mëdha për shkak të bombardimeve paraprake – në Rafah. Megjithatë, ende nuk është e qartë nëse urdhri për evakuim sinjalizon një operacion të ri tokësor të Izraelit.

Izraeli kishte nisur një ofensivë të madhe në Rafah majin e vitit të kaluar, kur mori nën kontroll një korridor strategjik përgjatë kufirit me Egjiptin dhe një pikëkalimi të rëndësishëm.

Ndërkaq, Hamasi tha se Salah Bardawil, anëtari i byrosë të tij politike dhe Parlamentit palestinez, u vra gjatë sulmeve në Mavasi. Edhe gruaja e tij është vrarë gjatë sulmeve.

Bardawil ishte një anëtar i njohur i krahut politik të grupit radikal palestinez, i cili gjatë viteve të fundit ka pasur edhe interviste për media të ndryshme.

Ndërkaq, dy spitale në jug të Gazës thanë se kanë pranuar trupat e 17 palestinezëve të vrarë në sulmet gjatë natës, përfshirë gra dhe fëmijë.

Izraeli javën e kaluar i dha fund armëpushimit që kishte me Hamasin dhe nisi një valë sulmesh ajrore që kanë lënë të vrarë qindra palestinezë në Gazë.

Armëpushimi i arritur në janar, pezulloi luftimet e ashpra që u nxitën nga sulmi i Hamasit kundër Izraelit më 7 tetor 2023. Hamasi kishte vrarë afër 1.200 persona dhe kishte rrëmbyer afër 250 të tjerë.

Si pasojë e ofensivës izraelite në Gazë janë vrarë 49.747 palestinezë dhe sipas Ministrisë së Shëndetësisë së Gazës, mbi gjysma e viktimave ishin gra dhe fëmijë. Izraeli, ndërkaq, pa ofruar dëshmi ka pretenduar se ka vrarë afër 20.000 militantë.

Franca, Gjermania dhe Mbretëria e Bashkuar kanë shprehur shqetësim të thellë për rifillimin e sulmeve izraelite në Gaza, duke i cilësuar ato një “hap dramatik prapa” si për popullsinë palestineze ashtu edhe për robërit e mbajtur në territorin e rrethuar.

Në një deklaratë të përbashkët, tre vendet evropiane bënë thirrje për një armëpushim të menjëhershëm, duke dënuar viktimat civile si pasojë e dhunës së përshkallëzuar. “Ne jemi të tmerruar nga viktimat civile dhe bëjmë thirrje urgjente për një kthim të menjëhershëm të armëpushimit”, thuhet në deklaratë.

Gjithashtu, Parisi, Berlini dhe Londra i kërkuan të gjitha palëve të përfshira të rikthehen në negociata për të shmangur përshkallëzimin e mëtejshëm të konfliktit.

“Më shumë gjakderdhje nuk është në interesin e askujt. Izraeli duhet të respektojë plotësisht ligjin ndërkombëtar dhe të lejojë që ndihma të rrjedhë menjëherë,” thuhet më tej në reagimin e përbashkët.bw