Në artikull thuhet se jeta politike shqiptare prej vitesh karakterizohet nga përplasje, madje edhe brenda parlamentit, si dhe nga sulme të ashpra verbale.

TIRANË– Gazeta franceze LE MONDE i ka bërë jehonë protestës së opozitës, e cila u zhvilluar dje. LE MONDE shkruan se forcat e rendit shpërndanë me ujë me piper dhe gaz lotsjellës mbështetësit e opozitës para ndërtesave të qeverisë dhe parlamentit.

Gjithashtu gazeta franceze ka cituar Kryedemokratin Sali Berisha, i cili thotë se opozita ka nisur ‘Kilometrin e fundit’ dhe Shqipëria do shpëtojë nga Edi Rama.  Më tej në artikull thuhet se jeta politike shqiptare prej vitesh karakterizohet nga përplasje, madje edhe brenda parlamentit, si dhe nga sulme të ashpra verbale.

Artikulli i LE MONDE: 

Një tubim i organizuar nga opozita shqiptare kundër qeverisë u shndërrua në përplasje me forcat e rendit, të premten më 20 shkurt, në Tiranë.

Mijëra mbështetës të Partia Demokratike e Shqipërisë (e djathtë), e drejtuar nga veterani i politikës vendase dhe ish-kryeministri Sali Berisha, i janë përgjigjur rregullisht muajt e fundit thirrjes “Kilometri i fundit” dhe mblidhen para selisë së qeverisë për të kërkuar largimin e kryeministrit socialist, Edi Rama, në pushtet që prej vitit 2013.

“Ne do ta shpëtojmë Shqipërinë nga Edi Rama, i cili e ka zhytur vendin në varfëri dhe korrupsion. Ai është vetëm një kufomë politike”,  i tha turmës z. Berisha, 81 vjeç.

Por u detyrua ta ndërpriste fjalimin pak më vonë, kur disa protestues nisën të qëllonin drejt godinës së qeverisë me një top fishekzjarresh dhe të hidhnin koktej molotov në sheshin përpara dhe kundër fasadës së ndërtesës.

Dhjetëra ndalime

Policia shpërndau turmën duke përdorur disa topa uji dhe gaz lotsjellës. Të udhëhequr nga z. Berisha, protestuesit më pas u drejtuan përpara parlamentit, disa qindra metra më tej, ku u përballën me një prani të madhe të forcave të rendit, përfshirë njësi anti-trazira.

Skenat e përplasjeve mes protestuesve dhe policisë zgjatën rreth dy orë në rrugët pranë parlamentit. Rreth tridhjetë protestues u ndaluan, sipas policisë. Nga ana e saj, Partia Demokratike e Shqipërisë raportoi për rreth dyzet ndalime të militantëve të saj.

Ministrja e Brendshme, Albana Koçiu, dënoi aktet e “vandalizmit”. “Të sulmosh policinë nuk është akt trimërie, është krim. Kjo nuk është protestë kundër qeverisë, por protestë kundër Shqipërisë që funksionon, kundër stabilitetit”, shkroi ajo në rrjetet sociale.

Tensione politike dhe akuza për korrupsion

Jeta politike shqiptare prej vitesh karakterizohet nga përplasje, madje edhe brenda parlamentit, si dhe nga sulme të ashpra verbale, me parti që shkëmbejnë rregullisht fyerje dhe akuza për korrupsion e lidhje me krimin e organizuar.

Tensionet janë shtuar që prej nëntorit, pas ngritjes së akuzës për korrupsion ndaj zëvendëskryeministres dhe ministres së Infrastrukturës, Belinda Balluku, një e afërt e z. Rama, e pezulluar nga detyra përmes një procedure gjyqësore. E akuzuar për favorizim në tendera që lidhen me projekte të infrastrukturës rrugore, ajo i mohon akuzat e prokurorisë.

Disa ish-ministra në qeveritë e Edi Ramës janë vënë nën hetim nga drejtësia për çështje korrupsioni. Edhe vetë Sali Berisha dyshohet se ka dhënë kontrata publike për të afërmit e tij gjatë kohës kur ishte në pushtet, gjë që ai e mohon me forcë.

Lufta kundër krimit të organizuar dhe korrupsionit është një nga kushtet kryesore për anëtarësimin e Shqipërisë në Bashkimin Evropian./Dosja.al