VOAL

Shqipëri

Sherri me thika në gjimnaz, banorët e zonës: Nuk është hera e parë, nxënësit kanë rrahur edhe mësuesit, bëhen 3-4 vetë dhe…

Disa prindër në zonën e Cakranit kanë reaguar pas sherrit të mëngjesit të sotëm në gjimnazin e zonës, ku një 17-vjeçar plagosi me thikë një bashkëmoshatar të tijin pas një sherri.

Një prej tyre tregoi se ngjarja është shumë shqetësuese dhe se situata është tepër e rrezikshme.

“Kjo na shqetëson shumë. Unë dëgjova sikur kishte ardhur policia dhe kishte thirrur prindërit dhe s’ka ndodhur gjë. Kjo e vë situatën shumë në rrezik. Këtu nuk ka pasur raste të tilla më parë”, tha ai.

Një tjetër prind tregoi se kjo nuk është hera e parë që në zonë ndodhin konflikte të tilla.

Ai tregoi se ka pasur raste edhe më ekstreme kur grupe nxënësish kanë dhunuar mësues të shkollës.

“Nuk është hera e parë që ndodhin të tilla raste, por nuk janë bërë publike. Kanë rrahur edhe mësuesit, janë bërë bashkë 3 ose 4 çuna dhe kanë rrahur mësuesin. Unë e kam shtëpinë këtu afër shkollës dhe informohem për ato që ndodhin”, tha një banor i zonës. bw

“Ditëlindjen e 35-të të PD e festojmë në pushtet”, Berisha: Më 23 dhjetor kemi mosbindjen civile më të fuqishme

Kreu demokrat Sali Berisha, gjatë fjalës së mbajtur në ceremoninë e 34-vjetorit të themelimit të PD-së, tha se më 23 dhjetor qytetarët do të dalin në mosbindjen civile më të fuqishme.

Berisha i ka bërë thirrje qytetarëve që t’i bashkohen mosbindjes civile, duke theksuar se vetëm sëbashku do të përzëmë këtë regjim.

“Njerëzit do na mbështesin sepse ne u provuam shqiptarëve se nuk shitemi, por në thelb qëndrojmë shqiptarë të vërtetë. Si mik do t’u them një fjalë, në çdo vështirësi që të vini, kurrë mos harroni se po qe se duhet të shohim galerinë e heronjve, nuk ka komb tjetër me heronj si ne. Ndaj dhe duhet të ndjehemi krenarë me qenien tonë shqiptarë. Ku ka bota një Skënderbe? Ku ka bota një Adem Jashar? Ku ka lëvizja një Azem Hajdar? Kurrë mos u dorëzoni. Kurrë mos i jepni!”, tha Berisha.

Në vijim ai theksoi se shqiptarëve i kemi provuar se nuk përkulemi, por më kryesorja ne i kemi frymëzuar shqiptarët.

“Ne i frymëzuam shqiptarët se luftuam ndonëse kishim kundër narkoshtetin, mafien e perandorisë së Sorosit, mediat e kontrolluara, drejtësinë si degë ekzekutive dhe bandat e qeverisë.

Ne frymëzuam shqiptarët se qëndruam 330 ditë dhe nuk u dorëzuam.

Dhe kur nuk dorëzohesh, edhe një rrugicë pa drita mund ta kthesh në një prozhektor dritash dhe shprese për mbarë vendin.

Kur nuk dorëzohesh edhe një dritare mund ta kthesh në armën më të fuqishme kundër kundërshtarit të lig që nuk njeh normë as moral.

Mund ta kthesh në një portë ferri për të keqen dhe të fitosh.

Prandaj dhe Rrugën e Shpresës, dritaren e katit të tetë, me qëndresën tonë të përbashkët, i shndërruam në burim frymëzimi për shqiptarët, në makth të tmerrshëm për narkoqeveritarët.

Prandaj PD do të shpëtojë Shqipërinë vitin tjetër sepse ne nuk dorëzohemi kurrë për dinjitetin njerëzor.

Kemi një diktaturë të dytë për të shembur. Kemi një komb për të shpëtuar. Kemi familjen shqiptare për ta shpëtuar. Kemi demokracinë për ta shpëtuar. Kemi Shqipërinë për ta ripopulluar me bijtë dhe bijat e saj”, tha Berisha.

Ai theksoi se ditëlindjen e 35-të të PD duhet ta festojmë në pushtet, në liri. bw

DOKUMENTI- PD regjistrohet në Gjykatën e Tiranës me kryetar Sali Berishën

Pas tre vite përplasje dhe një sage të gjatë gjyqësore, më në fund Sali Berisha zotëron Partinë Demokratike edhe ligjërisht. Partia Demokratike është regjistruar në Gjykatën e Tiranës me kryetar Sali Berishën. Në një dokument të firmosur nga Sekretarja e Regjistrit të Partive Politike dhe të shpërndarë nga PD, thuhet: Vërtetojmë se në Regjistrin e Partive Politike pranë Gjykatës së Shkallës së Parë të Juridiksionit të Përgjithshëm Tiranë, rezulton se me urdhër nr.12 datë 19.12.1990 të Ministrit të Drejtësisë, është miratuar krijimi i Partisë “Partia Demokratike”, me iniciale “PD” ose “PDSH”. Kryetar i Partisë është z.Sali Berisha. E lëshojmë këtë vërtetim në përgjigje të kërkesës së subjektit të interesuar”.

Vijon…

Idajet Beqirit i pezullohet licenca e avokatit

Dhoma e Avokatisë i ka pezulluar lejen e ushtrimit të profesionit avokatit Idajet Beqiri.

Vendimi erdhi pas një ankese të bërë nga një klient i tij, i quajtur Ferdi Kastrati.

Ai e akuzon se Beqiri i ka marrë atij një shumë prej 200.000 lekësh për një shërbim të parealizuar.

Dhoma e Avokatisë e akuzon Beqirin për sjellje joprofesionale të avokatit dhe për shërbime të papërshtatshme profesionale.

Karriera e Beqirit është e mbushur me shpifje, mashtrime dhe dënime.

Më 12 tetor 2023, një dokument zyrtar bën me dije se SHBA ka përditësuar listën e personave të sanksionuar në të gjithë botën, mes tyre 29 shqiptarë nga Shqipëria, Kosova e Maqedonia me status politikanë, avokatë, biznesmenë e anëtarë të UÇK, ku bie në sy emri i avokatit “rilindës”, Idajet Mane Beqiri.

Ai është i sanksionuar nga SHBA dhe Departamenti i Thesarit si terrorist.

Madje edhe në listën e SHBA, ai gjendet dy herë non-grata, njëherë me emrin Idajet dhe njëherë me emrin Hidajet.

Po përse e ka sanksionuar SHBA, avokatin e Ramës, Idajet Beqiri? Ish-spiuni i sigurimit u burgos në prill 1986 kur ishte kryetar i Gjykatës së Krujës, për falsifikime vendimesh me mashtrime financiare.

Idajet Beqiri arrestua në Kosovë me 24 maj 2012, pas kërkimit ndërkombëtar nga drejtësia e Belgjikës, si i dënuar 4 vite burg dhe i skeduar nga FBI e DEA, për mashtrime me viza perëndimore dhe ushtrim aktiviteti trafiku droge e kontrabande.

Për t’i shpëtuar urdhër-arrestit në Shqipëri, në tetor 1998 u arratis në Belgjikë, ku u paraqit me pasaportë false si komandant lufte i UÇK.

Atje krijoi organizatën e tij kriminale, si gjoja lëvizja “Fronti i Bashkuar Kombëtar Shqiptar”.

Me logon e kësaj organizate, grumbulloi shqiptarë nga Shqipëria, Kosova e Maqedonia, të gjithë eksponentë të botës së krimit.

Veprimtaria e organizatës që drejtonte Idajet Beqiri, u cilësua “organizatë terroriste” nga EUROPOL, EUROJUST, FBI e DEA Amerikane, dhe nëpërmjet një dosjeje me prova konkrete në 2800 faqe të gjetura fashikuj e në kompjuterë, ai u dënua 4 vite burg nga drejtësia e Belgjikës.

Por arrestimi i tij nuk mund të realizohej, mbasi me një pasaportë tjetër false shqiptare me emër “Hidajet Riza Kuta”, mashtruesi Idajet Mane Beqiri, u arratis në Gjermani.

Atje filloi të përdorte emrin tjetër kosovar fals, duke treguar një medalje nderi false me logo të NATO-s, 1 certifikatë, 5 dekorata të UÇK dhe 1 autorizim sikur ishte ngarkuar nga komanda qendrore e UÇK-së, për grumbullim donacionesh për luftën, por pas denoncimeve, gjurmimit e verifikimit u prangos.

Pas 6 muajve burg në Gjermani, në muajin maj 2004, Idajet Mane Beqiri i maskuar me emrin fals “Hidajet Riza Kuta”, u ekstradua në Shqipëri.

Sepse më parë se Belgjika, Idajeti me 7 emra ishte shpallur në kërkim në shumë shtete, për krimet e mashtrimeve financiare, trafikut njerëzor nëpërmjet vizave për SHBA-BE dhe përfshirje në trafikun e drogës kur ishte kryetar i Partisë së Unitetit Kombëtar.

Pas përfundimit të burgut në Shqipëri, i dënuar 3 vite në dy shkallët gjyqësore, më 3 qershor 2010 drejtësia belge e ridënoi Idajet Beqirin edhe me 4 vite burg, duke i kërkuar drejtësisë shqiptare ta ekstradonte, por ai u arratis në Kosovë, ku qëndroi afro 2 vite i fshehur me 3 emra fals.

Më 24 maj 2012, Idajeti u arrestua në Prizren për llogari të drejtësisë belge, por pas 40 ditësh burg, në vend të ekstradohej në Belgjikë u deportua në Shqipëri, ndërsa në Belgjikë, përveç heqjes së shtetësisë, ka akoma në fuqi dënimin 2 herë nga 4 vite burg. sn

Lala: Afera e Artan Gaçit dhe Olta Xhaçkës është 100 mln euro. Investimi strategjik në kundërshtim me ligjin

Në “Opinion” në News24, është diskutuar lidhur me opinionin e dhënë nga Komisioni i Venecias lidhur me mandatin e Olta Xhaçkës.

Gazetarja Klodiana Lala tha se tashmë Kuvendi duhet të mblidhet dhe të marrë një vendim, ndërsa theksoi se mazhoranca fitoi kohë duke e çuar çëshjen në Komision.

Klodiana Lala: Kuvendi duhet të mblidhet jo më larg se nesër dhe të marrë vendim. Duhet të shkojë me vendim. Mazhoranca duke e dërguar në Venecia fitoi kohë, mandati i saj përfundon deri kur GJK ta marrë në shqyrtim sepse zgjedhjet janë afër. Socialistët po mbrojnë një aferë 100 mln euro, investim strategjik i marrë në kundërshtim me ligjin. Një kryetar bashkie në detyrë është pas hekurave. Artan Gaçi dhe Olta Xhaçka janë pyetur nga SPAK. GJK nuk e detyron Kuvendin të votojë në mënyrë të caktuar, por thotë merrni vendim. bw

Mandati i Xhaçkës- Komisioni i Venecias publikon raportin: Vendimet e Gjykatës Kushtetuese duhet të zbatohen

Komisioni i Venecias ka publikuar raportin në lidhje me mandatin e deputetes së PS Olta Xhaçka.

Sipas opinionit të parë nga “BalkanWeb” vendimet e Gjykatës Kushtetuese duhet të zbatohen. Vetë qëllimi i GJK është të kufizojë shkeljet e mundshme të ligjvënësit ose pushteteve të tjera shtetërore, thuhet në raportin e Venecias.

Po kështu thuhet se kur vendimi i një Gjykate Kushtetuese interpreton Kushtetutën si kufizim të fuqisë vendimmarrëse të Parlamentit, ky i fundit duhet të marrë një vendim në përputhje me gjykimin e Gjykatës dhe të votojë për çështjen e kufizuar të përcaktuar nga Gjykata Kushtetuese, dhe jo edhe për mundësinë për ta referuar çështjen në Kushtetuese. Pra, Parlamenti nuk është i detyruar të votojë në një mënyrë të caktuar, por është në gjendje të votojë vetëm për çështje që janë në kompetencën e tij.

Për çështjet në lidhje me standardet për dispozitat e papajtueshmërisë dhe rolin e organeve legjislative dhe gjyqësore (pyetjet 2 dhe 4, pjesa 1) mund të konkludohet në vijim. Në përgjithësi, parimi i ndarjes së pushteteve shtetërore imponon që funksione të caktuara nuk mund të mbahen nga një person në të njëjtën kohë, duke siguruar kështu integritetin dhe funksionimin e duhur të çdo pushteti (legjislativ, ekzekutiv apo gjyqësor). Në disa nga këto raste, standardet ndërkombëtare parashikojnë një papajtueshmëri absolute (për shembull të jesh deputet ndërsa të jesh gjyqtar).

Lejohen përjashtime (për shembull një deputet që është pjesë e Qeverisë). Normalisht, kur një person zbulohet se ka dy funksione të cilat janë të papajtueshme me njëri-tjetrin, kjo situatë mund të riparohet nga personi – zakonisht duke zgjedhur njërën nga detyrat dhe duke i dhënë fund tjetrës.

Megjithatë, në rastet kur situata nuk zgjidhet, pasoja e zakonshme është që personi në fjalë humbet mandatin e tij. Për sa i përket procedurës së vendosjes për papajtueshmërinë, nuk ka standarde të qarta.

Lidhur me praktikën shtetërore për dispozitat e papajtueshmërisë dhe rolin e organeve legjislative dhe gjyqësore (pyetjet 2 dhe 4, pjesa 2), Komisioni i Venecias ka mbledhur informacion mbi dispozitat kushtetuese për papajtueshmërinë në 12 shtete anëtare të tij dhe në Bashkimin Evropian (BE). Gjetjet e analizës tregojnë se nuk ka qasje uniforme për çështjen.

Papajtueshmëritë dhe praktika e shteteve ndryshon në varësi të faktorëve të ndryshëm, si struktura e qeverisë, numri i dhomave dhe parametra të tjerë specifikë të vendit. Prandaj, pyetjet e Kryetares së Kuvendit të Shqipërisë në lidhje me praktikën shtetërore mund të trajtohen me njëfarë kujdesi si më poshtë. Bazuar në materialin që Komisioni i Venecias ka shqyrtuar për këtë Opinion, konstatimi i papajtueshmërisë me mandatin e një deputeti është në nivel kushtetues – në shumicën e rasteve bëhet në bazë të funksioneve të tjera që mban deputeti. Në disa vende, aktivitetet (siç janë aktivitetet fitimprurëse) të deputetit mund të konsiderohen të papajtueshme me detyrën e një deputeti (edhe pse kjo nuk rregullohet gjithmonë në nivel kushtetues). Në shumicën e shteteve, subjektet që kanë të drejtë t’i referojnë një çështje një organi gjyqësor janë organe politike ose persona pjesë e një organi politik; dhe më së shpeshti shqyrtimi bëhet nga një gjykatë kushtetuese ose një gjykatë e zakonshme. Vetëm në disa vende, çështja e papajtueshmërisë vendoset nga organi legjislativ.

Megjithatë, kufiri i saktë ndërmjet interpretimit të një norme kushtetuese ekzistuese dhe krijimit të një norme të re kushtetuese nuk është i qartë.

Ajola Xoxa i la dy orë jashtë, Soko: Pse agjentët e BKH nuk ia shqyen derën?

Pano Soko, ka qenë i ftuar në emisionin “Të Paekspozuarit”, ku ka folur për kontrollin e BKH te familjarët e Veliajt dhe hetimet për kryebashkiakut.

Soko tha se nuk duhet treguar mbështetje e verbër te SPAK, sepse kur vjen fjala te Erion Veliaj, prokuroria ka qenë shumë e ngadaltë, pavarësisht se ai ka disa çështje në hetim. Soko u ndal edhe te fakti që bashkëshortja e Veliajt i la agjentët e BKH të presin dy orë jashtë banesës, ndërkohë që ky standard nuk ndiqet me të tjerët.

“Ajo që kërkojmë ëhtë fillimisht të ndalohet vjedhja dhe të merren paratë mbrapsh. Edhe po ta lësh Veliajn vetëm gjashtë muaj, por t’ja marrin të gjithë paratë… Sa më shumë kohë e lë Erionin, aq më shumë mundësi i jep të fshehë paratë sa më mirë. Nëse ke për synim të ndalosh vjedhjen dhe të kapësh paratë… Dua që këto para të mos ikin.

Unë nuk jam prokuror, por rrogën po e marrin 10 mijë euro prokurorët. Çfarë të duan ata e kanë marrë, mjete, materiale, amerikanët janë aty, izraelitët me teknologji, cdo gjë. Tani duam shpejtsi. Entoni thotë me të drejtë, mos po shantazhohen këta?

Nuk mund ta përjashtojmë dhe të themi se po ecin shumë mirë. I kemi mbështetur por nuk po ecin shumë mirë.

SPAK të na tregojë a jemi të barabartë para ligji. Nëse SPAK nuk e ka forcën të tregojë që nga KM deri të qytetari janë të barabartë… Jo se janë ca më të barabartë.

Po shoh hetuesit e BKH që rrinë dy orë para derës së një banese, kur kanë të drejtë të shqyejnë çdo derë. Këto tregojnë shumë.

A jam unë si Pano Soko i barabartë me ta? Në derën time, po mos ta hap BKH vjen dhe e hap. Disa dyer shqyhen, disa të tjera…

Ideja është, nëse ne jemi të barabartë para ligjit, hetuesit e BKH derën time do ta kishin shqyer, por para një dere të dikujt me spaleta…

Mbështetja nuk përkthehet në verbëri dhe naivitet. Pra, kërkoj shumë mirë ti shkohet hetimit deri në fund, pse e kërkoj te Erion Veliaj, sepse në gjendjen e tij ai mund të ndikojë te shumë hetime, ka pesë hetime, mund të ndikojë te provat.

Nuk dua që njerëzit që kanë vjedhur këtë vend për 34 vjet të shpëtojnë prej neglizhencës apo se dikush bie pre e shantazhit”, tha Soko.

DASH nderon Altin Dumanin si kampion kundër korrupsionit

VOA

Altin Dumani u nderua të hënën nga Departamenti i Shtetit si kampion i luftës kundër korrupsionit në Shqipëri për rolin e tij në drejtimin “e Strukturës së Posaçme Anti-Korrupsion (SPAK) me integritet, profesionalizëm dhe guxim”.

“Kryeprokurori i Posaçëm i Shqipërisë, Altin Dumani, drejton një agjenci të re kombëtare – e ngritur në bazë të reformave kushtetuese të vitit 2016 – që ndjek penalisht zyrtarë të lartë dhe drejtues të krimit të organizuar. Sot është institucioni publik më i besuar në Shqipëri”, tha Sekretari amerikan i Shtetit, Antony Blinken gjatë ceremonisë që u mbajt në Departamentin e Shtetit në ditën ndërkombëtare të luftës kundër korrupsionit.

Ai ishte mes 10 kampionëve të anti-korrupsionit nga e gjithë bota që u nderua të hënën nga Shtetet e Bashkuara.

“Korrupsioni gërryen qeverisjen demokratike, minon besimin tek qeveria dhe pengon zhvillimin, prandaj Departamenti i Shtetit promovon integritetin, transparencën dhe llogaridhënien si përparësi të politikës së jashtme dhe interesa thelbësore të sigurisë kombëtare”, thuhet në një njoftim të zëdhënësit të Departamentit të Shtetit.

Zoti Dumani u zgjodh në krye të SPAK-ut, Struktura Anti-Korrupsion që u krijua me mbështetjen e Shetetve të Bashkuara, para dy vjetësh në dhjetor të vitit 2022.

FOTOT- “Lindëm në Demokraci, jetojmë në diktaturë”- Marshimi për 8 Dhjetorin, të rinjtë e FRPD vendosen para Kryeministrisë

Të rinjtë e FRPD, pas fjalimit të mbajtur nga kryedemokrati Sali Berisha në Qytet Studenti, kanë marshuar drejt Kryeministrisë.

Ata u vendosën para godinës ku të rinjtë demokratë po mbajnë fjalime të rastit.

Pjesë e manifestimit është edhe kreu i PD, ndërsa të rinjtë mbajnë në duar pankarta ku lexohet “Lindëm në Demokraci, jetojmë në diktaturë”. Marshimi vjen në kuadër të 8 dhjetorit, Ditës Kombëtare të Rinisë, për të kujtuar Lëvizjen e Dhjetorit që solli më pas ndryshimin e sistemit politik në vend. BW

FOTOT- “Lindëm në demokraci, jetojmë në diktaturë”, të rinjtë e FRPD marshojnë drejt Kryeministrisë me thirrje kundër qeverisë, Berisha me ta

Të rinjtë e FRPD-së kanë protestuar dhe marshuar drejt Kryeministrisë, pas një aktiviteti të mbajtur në Qytetin Studenti ku ishte dhe kreu i PD-së Sali Berisha.

Me parulla “Duam sistemin VAR në zgjedhjet e 2025” dhe sloganin “Lindëm në demokraci, jetojmë në diktaturë” ata kanë bërë thirrje kundër qeverisë.

Shpopullimi e plakja: jemi në buzë të greminës- Nga ADRI NURELLARI

Censi i vitit 2023 na tregoi se Shqipëria po përjeton një transformim të thellë demografik, duke u zbrazur e plakur para syve tanë, gjë që megjithëse shpesh kalon pa u vënë re në zhurmën e përditshmërisë, mbart pasoja të thella e të rënda për të ardhmen e vendit. Me këtë prirje dhe sistemin ekonomik të ngritur nga kjo qeveri, është e qartë se po gërmon vetë varrin e buxhetit të shtetit, por edhe të aleatëve të saj biznesorë. Shpopullimi masiv dhe plakja e popullsisë po krijojnë një bombë me sahat, që do të shpërthejë nën këmbët e qeveritarëve dhe bizneseve të mëdha që kanë ortakë, të cilët mbështeten kryesisht te tregtimi i mallrave që importojnë. Me modelin aktual ekonomik që ka ndërtuar kjo qeveri, duket qartë se po sharron degën ku është varur vetë, sepse po shkurton ndjeshëm kontributet për sigurime shoqërore dhe tatimet mbi konsumin. Kur popullsia e aftë për punë largohet dhe fuqia blerëse bie, pakësohen paratë si për buxhetin e shtetit, ashtu edhe për xhepat e këtyre tregtarëve importues të mëdhenj, që kanë partneritet me qeveritarët.

Në regjistrimin e fundit të popullsisë, të kryer gjatë vitit 2023, numri i përgjithshëm i banorëve është ulur në rreth 2.4 milionë banorë. Ndërsa mosha mesatare e popullsisë është 42,5 vjet (nga 35,3 vjet që ishte në Censin 2011) duke u afruar me mesataren prej 44 vjet që ka Bashkimi Evropian. Kjo rritje e moshës së popullsisë, që është ndikuar kryesisht nga emigracioni masiv dhe deri diku nga rritja e jetëgjatësisë dhe rënia e lindshmërisë, po e ndryshon rrënjësisht mënyrën se si jetojmë, punojmë dhe ndërtojmë të ardhmen tonë. Pra, rritja e numrit të të moshuarve dhe emigrimi i të rinjve e bën demografinë tonë si një orë me rërë, që po shkon drejt fundit.

Bazuar në të dhënat e EUROSTAT-it, del se gjatë periudhës 2010-2022, 652 993 shtetas të Shqipërisë që janë pajisur me leje qëndrimi për herë të parë, pra kanë emigruar legalisht në një vend të Bashkimit Evropianë. Kuptohet që kjo shifër nuk tregon totalin e emigrimit, sepse aty nuk përfshihen shqiptarët që qëndrojnë ilegalisht, si dhe ata që kanë emigruar në shtete perëndimore që nuk janë në BE si SHBA, Britani të Madhe, Kanada etj.. Për me tepër, prirja e braktisjes së vendit duket se sa vjen e përkeqësohet, sepse vetëm vitin e kaluar rezidencën evropiane e kanë marrë 74938 veta, shifër kjo që përfaqëson 3.12% të popullsisë sonë totale.

Vazhdimi i largimit masiv nënkupton që Shqipëria humbet jo vetëm fuqi punëtore, por edhe breza të të rinjve që do të mund të kontribuonin në zhvillimin e vendit. Emigracioni po na merr të rinjtë më të mirë, si një stuhi që shkul pemët më të larta, gjë që dëmton rëndë bizneset, të cilat gjithnjë e më shumë po hasin vështirësi për të gjetur punonjës të kualifikuar (edhe ata pak që gjejnë, detyrohen t’i paguajnë me fatura të kripura). Më pak të rinj do të thotë gjithashtu më pak biznese të reja apo start-up-e, më pak inovacion e teknologji, më pak fleksibilitet për t’u përshtatur me kërkesat e tregut, më pak gatishmëri nga krahu i punës për t’u rikualifikuar për të qenë kompetentë për dinamikat e ekonomisë.

Kjo metamorfozë demografike që po pësojmë, gjithashtu, zvogëlon ndjeshëm aftësinë konkurruese në tregjet ndërkombëtare, sepse mungesa e fuqisë punëtore si dhe tkurrja e fuqisë blerëse e bëjnë vendin tonë më pak atraktiv për investitorë të huaj. Nëse vazhdojmë të katandisemi në një azil pleqsh, ne njëherazi do ta përjashtonim vendin nga revolucioni teknologjik bashkëkohor, që po ndodh sot me epokën e inteligjencës artificiale. Popullsia e moshuar është më rezistente ndaj përqafimit të inovacionit dhe teknologjive moderne, të cilat sot nuk janë më luks, por domosdoshmëri, nëse duam të kemi një rritje të qëndrueshme të ekonomisë.

Megjithatë, duhet theksuar se pasoja me e rëndë e këtij fenomeni është padyshim shkatërrimi potencial i skemës sonë pensionale. Censi tregon një rënie dramatike të popullsisë aktive, që manifestohet nga ulja e ndjeshme e grup-moshave që janë aktive në tregun e punës. Të dhënat e tregojnë se një në pesë individë (19.7 për qind) janë 65 vjeç e lart, krahasuar 11.3% në 2011 dhe 7.5% 2001. Për rrjedhojë, sot kemi më shumë pensionistë se kurrë më parë, nga 570 mijë në vitin 2013, numri i tyre është rritur në 717 mijë në vitin 2024, duke reflektuar një popullsi që plaket me ritme të shpejta. Nga ana tjetër, të dhënat e fundit tregojnë se numri i të punësuarve me rrogë është diku te 730 mijë veta (ndër të cilët rreth 25% janë të punësuar në administratë dhe ndërmarrje me pronësi publike).

Kjo rritje e pensionistëve vjen në një kohë kur të rinjtë po largohen masivisht nga vendi, duke lënë pas një boshllëk të madh në fuqinë punëtore dhe në burimet që mbështesin skemën aktuale të pensioneve. Prandaj pyetja e parë që shtrohet në këtë situatë është: Çfarë ndodh kur ka gjithnjë e më pak kontribuues për të mbështetur një numër gjithnjë në rritje përfituesish të pensioneve? Në vitin 2023, kontributet e sigurimeve përbënin rreth 24% të të ardhurave tatimore për shtetin dhe ky largim i forcës aktive të punës po hap gradualisht një vrimë shumë të madhe në thesin e qeverisë.

Ky problem bëhet edhe më i ndërlikuar nga fakti që një popullsi më e moshuar kërkon më shumë kujdes shëndetësor dhe social prej shtetit. Kërkesa në rritje për shërbime shëndetësore po vë nën presion një sistem tashmë të mbingarkuar, të përballur me mungesë fondesh dhe të kërcënuar më së shumti nga hemorragjia e mjekëve dhe infermierëve drejt Gjermanisë e vendeve perëndimore. Në kulturën shqiptare, solidariteti mes brezave brenda familjes ka qenë tradicionalisht mbështetja kryesore për të moshuarit. Mirëpo shkuarja në kurbet i të rinjve shpesh lë pas të moshuarit pa mbështetjen e duhur nga fëmijët, duke sjellë shtim të kërkesave për shërbime sociale të posaçme për këtë grup-moshë, të janë shpesh të mangëta tek ne.

Për më tepër, plakja e popullsisë kërcënon rëndë buxhetin e qeverisë, sidomos për shkak të zvogëlimit të taksave indirekte me të cilat mbahet në këmbë shteti. Me një popullsi më të plakur, numri i personave me të ardhura të rregullta zvogëlohet dhe kjo çon në uljen e fuqisë blerëse agregate për mallra dhe shërbime. Dihet që të moshuarit zakonisht janë më të kujdesshëm me shpenzimet dhe konsumojnë mallra të domosdoshme (ushqime bazike, ilaçe), që shpesh kanë TVSH të reduktuar ose janë të përjashtuara nga taksat indirekte ose tarifat doganore. Me pak fjalë, ndryshimi demografik sjell edhe ndryshimin e strukturës së konsumit, sepse të moshuarit priren të mos blejnë mallra afatgjata me taksa të larta që kërkohen nga të rinjtë, si pajisjet elektronike, mobiliet, mallrat e luksit, veshjet e modës, automjetet etj.. Gjithashtu, efekti domino i emigrimit të të rinjve sjell një ulje të ndjeshme të konsumit për shërbimet më të tatueshme si restorantet, klubet, hotelet, udhëtimet etj.. Këtu duhet vënë në dukje se sipas të dhënave të vitit 2023, TVSH-ja, e cila mblidhet kryesisht falë blerjes së mallrave dhe shërbimeve të sapopërmendura, kontribuoi me rreth 32% të të ardhurave tatimore totale, duke përbërë burimin kryesor të të ardhurave të qeverisë.

Njëkohësisht është fakt i njohur që krahasuar me kohortat e të rinjve, mosha e tretë konsumon shumë më pak duhan dhe alkool dhe e përdor më pak makinën, duke ulur ndjeshëm konsumin e karburanteve. Këto produkte janë subjekt i akcizave, të cilat gjithashtu kontribuojnë ndjeshëm në të ardhurat buxhetore, duke përbërë rreth 10.1% të totalit. Në mënyrë të veçantë vlen të theksohet se të moshuarit nuk investojnë në blerjen e shtëpive të reja ose projekte të mëdha, duke ulur të ardhurat e majme që qeveria vjel prej sektorit të ndërtimit dhe vënë në pikëpyetje të ardhmen një sektori, që së fundmi ka arritur të zërë 12% të Prodhimit të Brendshëm Bruto.

Sipas të dhënave më të fundit, nga 1,082,529 banesa në Shqipëri, 32.9% (nga 21.7% që ishin në censin e 2011) rezultojnë të pabanuara si rezultat i boshllëkut demografik, që po krijohet nga largimi në shkallë të gjerë i njerëzve. Fluska e ngritur në këtë sektor rrezikon njëherazi të pëlcasë, edhe për shkak të bllokimit të rubineteve të parave të pista që e ka fryrë ndërkohë që kërkesa reale bie prej rënies së numrit të banorëve. Nga njëra anë SPAK-ku me luftën kundër parave të korrupsionit dhe krimit në Shqipëri nga ana tjetër policitë evropiane me goditjet masive ndaj rrjeteve kriminale shqiptare (ndihmuar deshifrimet e kriptofonëve ‘Sky Ecc’, ‘EncroChat’ dhe ‘Matrix’), po ia ndalin rrjedhën kapitalit të vrullshëm të krimit që e ka ushqyer tej mase tregun e ndërtimit dhe patundshmërisë.

Pakësimi i konsumit të mallrave nga një popullsi që rritet në moshë, por zvogëlohet në numër dhe fuqi blerëse, është një goditje e drejtpërdrejtë edhe për bizneset më të mëdha të Shqipërisë, të cilat sot duket se po lundrojnë drejt një deti të trazuar. Po të analizohet lista bizneseve më të mëdha në vend, që shpesh konsiderohen të privilegjuara nga politika, shihet se ato janë kryesisht importues të mëdhenj dhe shitës të mallrave me shumicë e pakicë. Nëse baza e konsumatorëve reduktohet dhe fuqia blerëse e popullsisë bie, këto kompani do të përballen me ulje të fitimeve, ngushtim të tregut dhe rritje të kostove për të mbajtur aktivitetin. Me një strukturë ekonomike që mbështetet kryesisht në tregti dhe importe, ky model po bëhet i pambrojtur ndaj ndryshimeve radikale demografike dhe po krijon një spirale destruktive, që dëmton jo vetëm shtresat e gjera të popullsisë, por edhe vetë oligarkinë ekonomike që ka përfituar nga ky sistem. Thënë më shkoqur, modeli aktual ekonomik po hyn në një cikël vicioz, që kërcënon të ardhmen e ekonomisë kombëtare dhe vetë burimet e fitimit të këtyre aktorëve të mëdhenj. Për pasojë, shteti jo vetëm që do të humbasë të ardhurat nga këto biznese, por ka gjasa që ne do të përjetojmë një ortek që mund ta prekë të gjithë ekonominë.

Nëse nuk ndërmerren reforma të guximshme dhe politika të mirëstudiuara për të adresuar sfidat e moshimit dhe shpopullimit, Shqipëria rrezikon të zhytet në një dinamikë të rrezikshme të krizës ekonomike dhe sociale. Humbja e fuqisë punëtore aktive, tkurrja e konsumit dhe shtimi i presionit mbi sistemet publike të shëndetësisë dhe pensioneve janë duke kërcënuar themelet e ekonomisë shqiptare. Struktura e brishtë aktuale, e cila mbështetet kryesisht te konsumi dhe importet, si dhe te fluksi i parave të pista të hedhura në ndërtim e turizëm, është e paqëndrueshme dhe nuk mund të mbajë dot mbi supe peshën e një popullsie, që zvogëlohet dhe plaket me ritme kaq të shpejta. Pa masa për të frenuar emigrimin, për të rikthyer fuqinë punëtore, për të nxitur lindshmërinë dhe për të transformuar modelin ekonomik drejt një ekonomie që mbështetet në prodhim dhe inovacion, vendi do të rrezikojë të përballet me një kolaps ekonomik. Çdo vonesë do të përkeqësojë problemet dhe do ta fundosë vendin në një krizë nga e cila mund të jetë shumë vonë për të dalë.

/Gazeta Panorama

‘Krijimi i një qeverie kujdestare’- Unioni Ndërkombëtar Demokrat miraton rezolutën për Shqipërinë! Zbardhen pikat, ja çfarë kërkohet

Unioni Ndërkombëtar Demokrat në mbledhjen e Komitetit Ekzekutiv miratoi më 6 dhjetor me unanimitet një rezolutë për Shqipërinë propozuar nga Partia Demokratike e Shqipërisë dhe Partia Republikane.

Në rezolutë shprehet shqetësim i madh në lidhje ‘me përqendrimin e pushtetit në duart e një personi dhe shndërrimin e zgjedhjeve në fasadë, persekutimin politik ndaj të gjithë liderëve të opozitës, që sipas saj përballen me persekutim politik, burgosje dhe kërcënime si Sali Berisha, Ilir Meta, Fatmir Mediu, Ervin Salianji dhe Fredi Beleri, duke e krahasuar me regjimet autoritare në Bjellorusi dhe Tunizi; korrupsionin e shfrenuar dhe lidhjet mes krimit të organizuar dhe drejtuesve të Partisë Socialiste, për të manipuluar zgjedhjet dhe ndikimin ne emërimet në postet kyçe; dështimin e qeverisjes së Ramës për të trajtuar rekomandimet e OSBE/ODIHR në lidhje me abuzimet elektorale’.

Shqetësimi i IDU bëhet akoma më i madh duke pasur parasysh afrimin e zgjedhjeve të vitit 2025 ndërkohë që represioni politik po përshkallëzohet, që dëshmon që gjyqësori është kthyer në një mjet për të shtypur opozitën dhe për të manipuluar zgjedhjet.

Kryetar i PR Fatmir Mediu faleminderoi EPP dhe CDI për miratimin e dy rezolutave për Shqipërinë.

“Sot, ne kërkojmë mbështetjen tuaj për zgjedhje të lira dhe të ndershme. Qeveria socialiste po përdor sistemin gjyqësor si një armë kundër liderëve politikë të opozitës përmes arrestimeve, gjyqeve, dhe ndodhemi në këtë situatë vetëm katër muaj përpara zgjedhjeve.

Një e treta e popullsisë, të rinjtë dhe profesionistët, kanë lënë vendin, duke krijuar një problem të madh për të ardhmen tonë; krimi i organizuar ka lidhje të forta me qeverinë, duke vendosur se kush do të jenë deputetët në listën e Partisë Socialiste. Kryeministri po bën gjithçka për të manipuluar zgjedhjet e ardhshme, me qëllim të sigurimit të 2/3 së mandateve parlamentare, për të ndryshuar Kushtetutën dhe për të krijuar një sistem presidencial nën kontrollin e tij.

Rezoluta e miratuar nga IDU është një sinjal i fortë që kërkon vetëm standarde për zgjedhje të lira dhe të ndershme.

Një qeveri kujdestare është e nevojshme për të mbajtur larg duart e krimit të organizuar, korrupsionit dhe qeverisë nga zgjedhjet”.

Në prezantimin e Rezolutës Vokshi, përfaqësuese e PD, theksoi:“Përtej propagandës së madhe, të paguar me para korrupsioni dhe krimi të organizuar, ekziston një realitet shumë i errët dhe i trishtë. Shqipëria ndodhet nën një regjim autoritar, ku Kryeministri kontrollon të gjitha pushtetet (politike, institucionale, ekonomike, mediatike dhe drejtësisë).

Sistemi i drejtësisë, pas reformës «së famshme» në drejtësi, e cila u ndikua shumë dhe u financua nga Fondacioni i Shoqërisë së Hapur dhe George Soros, në vend që të bëjë drejtësi, po përdoret si një armë në duart e mazhorancës duke e shndërruar Shqipërinë ne një vende me të burgosur politikë: Sali Berisha, Ilir Meta, Fatmir Mediu, Ervin Salianji, Fredi Bejleri.

Zgjedhje të lira dhe të ndershme – tha znj Vokshi- nuk janë organizuar në Shqipëri që nga viti 2013. Vota është e shantazhuar, e kërcënuar dhe e dhunuar. Zëri i Amerikës, media zyrtare e qeverisë në SHBA, ka publikuar një studim me një informacion tronditës: Një nga katër votues, e ka ndryshuar votën për shkak të presionit të administratës publike të këqpërdorur nga mazhoranca socialiste.

Bandat kriminale në Shqipëri, të lidhura me Kryeministrin dhe mazhorancën socialiste u përdorën nga maxhoranca për zgjedhje, dhe tani drejtojnë trafikun e drogës nga Amerika Latine në portet e Europës e janë shndërruar në rrezik jo vetëm për Shqipërinë, por për Evropën, Amerikën Latine.

Kërkojmë mbështetje për zgjedhje të lira dhe të ndershme. Modeli maqedonas, i një qeverie kujdestare, është një mundësi e mirë për ne për të pasur zgjedhje të lira dhe të ndershme.

Rezoluta e IDU kërkon:

Të ndalet persekutimi politik ndaj liderëve të opozitës, dhe sigurimi i një mjedisi të lirë e të ndershëm për të gjithë aktorët politikë në mënyrë që të bëjnë fushatë pa asnjë persekutim politik.

Garantimin e shtetit të së drejtës dhe integritetit institucional si themele të një shoqërie demokratike.

Sistem gjyqësor të paanshëm dhe të lirë nga ndërhyrjet politike.

Intensifikimin e luftës kundër krimit të organizuar, trafikimit të drogës dhe pastrimit të parave, duke siguruar që veprimet të mbeten të paanshme duke mos targetuar opozitën.

Zgjedhje të lira dhe të ndershme që garantojnë pavarësinë e administratës publike nga partia në pushtet.

Krijimin e një qeverie kujdestare, sipas modelit të Maqedonisë së Veriut, për të siguruar zgjedhje të lira dhe të ndershme.

IDU do të monitorojë nga afër zhvillimet dhe do të mbështesë aspiratat demokratike dhe europiane të Shqipërisë. sn

FJALËT E MBAJTURA NË CEREMONINË E VENDOSJES SË BUSTIT TË MUSTAFA MERLIKA KRUJËS MË 24 NËNDOR 2024 NË KRUJË

Eugjen Merlika : “Dita më e bukur e jetës sime”
Nue Oroshi: “Rikthimi i Kryeministrit të Shqipërisë Etnike Mustafa Merlika Kruja në Krujë.
Tomë Mrijaj: “Përshëndetja për tubimin kulturor mbi vendpsjen e bustit historik kushtuar personalitetit të shquar Mustafa Merlika Krujës në qytetin e tij.
Suadela Balliu: “Fjaja e mbajtur gjatë moderimit të ceremonisë së përurimit të bustit të Mustafa Merlika Krujës, në Krujë më 24 nëndor 2024.
Nevila Nika: “Mustafa Asim Merlika Kruja – atdhetari, studjuesi dhe politikani.
Qerim Lita: “Mustafa Merlika Kruja dhe projekti i tij për zgjidhjen e çështjes shqiptare”.
Gjet Ndoj: “Mustafa Kruja – themelues i Shqipërisë Etnike”.
Enriketa Papa; “Mustafa Merlika Kruja – Rrugëtimi i tij në historinë bashkëkohore shqiptare”.
Rovena Vata: “Kontributi i Mustafa Krujës në albanologjinë shqiptare”.
Besim Morina; “Kontributi i Kryeministrit Mustafa Merlika Kruja për Dardaninë”.
Marçel Hila: “Ndërhyrje “.
Klajdi Lulollari: “Mustafa Merlika Kruja, një jetë në shërbim të kombit”.

Dhuna verbale e Braçes ndaj Zhupës- Rrjeti i organizatave Barazi në Vendimarrje: Minon vlerat demokratike dhe pengon përparimin e shoqërisë sonë!

Rrjeti i organizatave Barazi në Vendimarrje ka reaguar në mbrojtje të deputetes Ina Zhupa, duke dënuar gjuhën e dhunës me bazë gjinore në Kuvend, në seancën e 5 dhjetorit.

Ato shprehen se gjuha e dhunës mbi bazë gjinore dekurajon gratë të merren me politikë.’ Dënojmë me vendosmëri çdo formë dhune, qoftë ajo verbale, psikologjike apo fizike, duke theksuar se dhuna minon vlerat demokratike dhe pengon përparimin e shoqërisë sonë’.

Kjo deklaratë vjen pas gjuhën së dhunës verbale të përdorur nga deputeti Erjon Brace, ndaj deputetes Ina Zhupa, duke përdorur terma si “mos hidh parfum” “pri thonjtë” “nuk di të lexosh, nuk di të shkruash” “dukesh si ruse”. Deputetja më pas ju kundërpërgjigj në gjuhë popullore “O Erion ti rritë boja, sa shumë m.. të ha goja”. Kjo solli edhe mbylljen e seancës plenare pas shumë përplasjeve në sallë mes kryetarëve të grupeve parlamentare Bardhi dhe Peleshi.

Deklaratë:

Thirrje për Kujdes në Komunikim dhe Dialog

Në kushtet e tensioneve të shtuara politike, Task Forca Kundër Dhunës ndaj Grave në Politikë u bën thirrje deputetëve dhe institucioneve më të larta që të zgjedhin komunikimin dhe dialogun si mënyrën kryesore për zgjidhjen e mosmarrëveshjeve. I ftojmë të gjithë aktorët politikë që të zhvillojnë një komunikim paqësor dhe me respekt, duke nxitur bashkëpunimin dhe mirëkuptimin e ndërsjellë.

Dënojmë me vendosmëri çdo formë dhune, qoftë ajo verbale, psikologjike apo fizike, duke theksuar se dhuna minon vlerat demokratike dhe pengon përparimin e shoqërisë sonë. Le të punojmë së bashku për të krijuar një mjedis ku mosmarrëveshjet zgjidhen përmes diplomacisë, respektit dhe mirëkuptimit.

Dhuna nuk ka vend në politikë, dialogu duhet të jetë rruga e vetme për të ecur përpara.

Task Forca Kundër Dhunës ndaj Grave në Politikë

Erion Veliaj sulmon Edi Ramën dhe konfirmon hetimin pasuror ndaj tij dhe familjarëve

Erion Veliaj reagoi pas shumë orësh për kontrollin e ushtruar në banesën e tij nga SPAK dhe BKH.

Kontrolle u ushtruan edhe në banesën e vëllait të Veliajt, por edhe në galerinë e të shoqes.

Veliaj sulmoi opozitën dhe mediat, por nuk la pa lëshuar një ‘thumb’ edhe për Edi Ramën, duke thënë se: “Unë nuk bëj pjesë në atë kastë të vjetër politike që, për shumë kohë, e vendosën veten mbi ligjin, mbi drejtësinë dhe mbi llogaridhënien institucionale”.

Veliaj konfirmoi se ndaj tij dhe familjarëve po bëhet hetim pasuror. Reagimi i tij erdhi pasi u kthye nga Gjermania. Ai u fotografua në avion kur kthehej nga Hamburgu.

REAGIMI

Duke marrë shkas nga zhvillimet e ditës së sotme, hapat procedurale të kryera nga prokuroria e posaçme në lidhje me hetimin pasuror që po kryhet ndaj meje dhe familjarëve të mi, jo vetëm janë të mirëpritura, por edhe i mbështes në çdo hap.

U bë një kohë e gjatë që hetimin dhe gjykimin tim e bëjnë opozitarët e zhytur në llumin e korrupsionit dhe të “ashtuquajturat media”, që luftojnë çdo zyrtar e funksionar publik që nuk bie prè e presioneve dhe shantazheve të tyre për përfitime të padrejta.

Familjarët e mi dhe unë, si qytetar i këtij vendi, por njëkohësisht edhe në cilësinë e kryetarit të Bashkisë së Tiranës, do të jemi gjithmonë të hapur për çdo veprim dhe vendim të institucioneve të drejtësisë, por duke përbuzur njëkohësisht me neveri çdo të pavërtetë, që ka si qëllim dëmtimin e imazhit tim dhe familjarëve të mi, si dhe duke përhapur, mbi të gjitha, disinformacione edhe mbi vetë punën e këtyre institucioneve.

Unë nuk bëj pjesë në atë kastë të vjetër politike që, për shumë kohë, e vendosën veten mbi ligjin, mbi drejtësinë dhe mbi llogaridhënien institucionale.

Të gjithë këta që i kanë borxhe drejtësisë, rrokin flamurin e përkrahjes së drejtësisë kur në përputhje me ligjin dhe vendimet e gjykatave kryhen veprime procedurale në kuadër të hetimeve, dhe e sulmojnë atë me çdo mjet tashmë që drejtësia ka filluar të veprojë mbi ta, duke thyer kështu tabunë shumë vjeçare të mosndëshkueshmërisë. sn

Shqipëria do të mbajë zgjedhjet parlamentare më 11 maj

Presidenti i Shqipërisë, Bajram Begaj, shpalli datën 11 maj të vitit 2025 për mbajtjen e zgjedhjeve të reja parlamentare.

Zyra e Presidencës shqiptare sqaroi për mediat se kreu i shtetit shqiptar vendosi që të respektojë kërkesën e Komisionit Qendror të Zgjedhjeve në caktimin e datës së zgjedhjeve.

“Shkaku themelor për caktimin e datës 11 maj 2025 si datë për mbajtjen e këtyre zgjedhjeve qëndron në nevojën e shprehur nga KQZ-ja për të shfrytëzuar të gjithë kohën në dispozicion për përgatitjen e infrastrukturës ligjore dhe organizative, që të bëhet i mundur votimi i suksesshëm dhe rezultativ i shqiptarëve nga jashtë vendit”, u tha në njoftimin e Presidencës shqiptare.

Gjatë konsultimeve që presidenti Begaj zhvilloi me krerët e partive politike, data 11 maj ishte propozuar edhe nga Partia Socialiste në pushtet.

Në konsultimet për datën e zgjedhjeve nuk morën pjesë përfaqësuesit e Partisë Demokratike në opozitë. Përfaqësues të kësaj partie i cilësuan farsë konsultimet e thirrura nga presidenti, pasi sipas tyre, data ishte paracaktuar nga shumica qeverisëse.

Partitë opozitare kishin shprehur shqetësim se planifikimi i samitit të gjashtë të Komitetit Politik Evropian për datat 8 dhe 9 maj të vitit 2025, dy ditë para datës së fundit të mundshëm për zhvillimin e zgjedhjeve, formon ndikim dhe avantazh të papranueshëm për Qeverinë.

Për këtë çështje, Presidenca sqaroi se ky aktivitet do të zhvillohet pas zgjedhjeve parlamentare, fakt ky i konfirmuar edhe nga ndërkombëtarët.

Për këto zgjedhje, presidenti Begaj kishte në dispozicion katër ditë të diela midis datave 15 prill dhe 15 maj 2025. REL

Kreu i Dhomës Amerikane të Tregtisë: “Korrupsioni, një nga arsyet pse njerëzit largohen”

Kryetari i Dhomës Amerikane të Tregtisë në Shqipëri, Grant Van Cleve thotë se korrupsioni është një nga arsyet pse njerëzit largohen nga vendi.

I ftuar në emisionin “Open” në News24, ai u shpreh se janë të gatshëm të bëjnë pjesën e tyre për të përmirësuar klimën e biznesit në Shqipëri.

Ai shprehet optimist se gjerat janë drejt përmirësimit, por thekson se ka shumë që mendojnë se nuk ka shpresë, duke i detyruar të largohen.

“Njerëzit emigrojnë! Pavarësisht se unë jam optimist që gjerat janë drejt përmirësimit, por të tjerët që shikojnë edhe më thellë thonë që nuk ka shpresë. Mendoj se korrupsioni është një nga arsyet që njerëzit largohen! Ne jemi gati të bëjmë pjesën tonë të punës për përmirësimin e klimës”, tha Grant Van Cleve.

I pyetur për çmimet e larta të apartamenteve në Tiranë, kreu i Dhomës Amerikane të Tregtisë u shpreh se këto çmime nuk diktohen nga tregu, por nga pastrimi i parave.

“Nuk mendoj që kemi një treg të sofistikuar fatkeqësisht. Kjo është një ndikim i madh i pastrimit të parasë, njerëz që kanë lekë që duan të ndërtojnë dhe apartamentet mbeten bosh dhe çmimi është i lartë. Pra çmimi për metër katror në ndërtim është artificialisht i lartë”, u shpreh Grant Van Cleve. Panorama

Me kërkesa të njëjta por të ndarë në dy grupe, protestojnë para Kuvendit Lëvizja Bashkë dhe Bashkimi i Sindikatave te Pavarura te Shqipërisë

Përpara Parlamentit po zhvillohen dy protesta të ndryshme, por kërkesat e së cilave janë të njëjta.

Tubimet po zhvillohen, një e mbështetur nga “Lëvizja Bashkë” dhe tjetra nga “Bashkimi i Sindikatave të Pavarura të Shqipërisë”.

Kërkesat e tyre janë të njëjta.

Të dyja kërkojnë miratimin e statusit të minatorit, pensione dinjitoze dhe jo pensione elektorale. gsh

“Nuk mund ta hapin kurrë…”- Jo vetëm Nuredin Dumani, zbardhen emrat e anëtarëve të bandave në Shqipëri që kanë përdorur aplikacionin “Matrix”

Deshifrimi i bisedave në aplikacionin “Matrix” nga Europol pritet të sjellë një valë të re zbardhjesh të ngjarjeve kriminale dhe arrestime.

Shqiptarët duket se kanë qenë përdorues aktivë të këtij aplikacioni siç është zbuluar nga disa dosje hetimore.

Për përdorimin e këtij aplikacioni ka folur edhe Nuredin Dumani, i penduari që ka rrëfyer në SPAK të gjitha krimet dhe porositësit që jepnin shuma marramendëse për eliminimin e armiqve.

“Gjatë komunikimit që kam pasur me Suel Çelën në Matrix më dha një kontakt të një mikut të vet, që ishte i interesuar për eliminimin e pronarit të shkollës Wilson. Më dha kontaktin e këtij personi dhe me këtë person fola disa ditë dhe më kërkoi eliminimin e pronarit të shkollës Wilson për shumën 150.000 Euro”, thuhet në komunikime.

Ardian Sufaj, një 40-vjecar i arrestuar në Shqipëri për llogari të Italisë, si pjesë e një grupi të trafikut të kokainës nga Amerika Latine, në një nga bisedat e tij të zbardhura nga Anti-Mafia italiane shprehej:
“Mund ta jap në dorë … nuk mund ta hapin kurrë … kurrë …duhen 75 vjet për t’i hapur këto dhjetë … Izraelitët janë …100 % të koduar … ata quhen Matrix … kjo është një Matricë …”.

Në një tjetër operacion të Anti-Mafias italiane në nëntor 2023 ku u lëshuan 19 urdhër arreste për trafik ndërkombëtar droge u zbulua sërish përdorimi i “Matrix”.

“Korrierët përdornin celularë të enkriptuar me origjinë shqiptare, të pajisur me sistemin e mesazheve të çastit “Matrix” dhe përdorej për kujdesin për logjistikën dhe lëvizjen e sasive të mëdha të drogës” thuhej në komunikatë.
Në atë kohë policia italiane sekuestroi 420 kg kokainë, heroinë dhe hashash ndërsa krahas arrestimeve në Itali u arrestuan në Shqipëri edhe Ardian Korriku, Jurgen Korriku e Etleva Adami.

Komisioni “Xhafaj” merr fond 500 mijë euro nga Kuvendi, emra edhe nga diaspora në listën e ekspertëve që do përfitojnë pagesa shtesë

Kuvendi ka miratuar një fond prej 500 mijë eurosh për të mbështetur financiarisht komisionin anti-korrupsioni të drejtuar nga Fatmir Xhafaj. Ky i fundit, kërkoi mbështetje nga Byroja e Kuvendit për të caktuar pagesë për ekspertët që do të punojnë pranë këtij komisioni.

Sipas ndarjes që ka bërë Fatmir Xhafaj, ekspertët do të kenë 3 nivele pagesash. Niveli i parë i ekspertëve të nivelit të lartë, ka 30 emra. Ata do të marrin 3 paga bruto të një këshilltari, ose e thënë ndryshe rreth 8 mijë euro.

Niveli i dytë, prej 11 emrash, do ta marrin nga 2 paga të një këshilltari në Kuvend, ose 5 600 euro.

Sekretariati teknik i përbërë nga 15 vetë, dhe 12 ekspertë të nivelit të tretë do të marrin për punën pranë këtij komisioni, 2 800 euro.

Fatmir Xhafaj ka parashikuar pagesë edhe për një kategori të quajtur: “ekspertë të huaj”. Ata janë 23 persona dhe do të paguhen 5600 euro. Siç duket nga specifikimi i emrave, ekspertët e huaj, rezultojnë të jenë shqiptarë me banim jashtë vendit.

‘Shqipëria, kartel droge’- Alizoti: Berisha së shpejti në Gjermani … opozita në pushtet

Deputeti demokrat, njëkohësisht drejtues politik në qarkun e Elbasanit, thotë se Shqipëria është kthyer në një vend kartel të trafikut ndërkombëtar të kokainës.

I ftuar në edicionin e orës 19.00 në Syri Tv, Alizoti ngriti alarmin, mbi përfshirjen e vendit tonë në trafikun ndërkombëtar të lëndës narkotike më të shtrenjtë, kokainës, ku gjenerohen miliarda euro të ardhura nga fitimet.

Teksa iu referua vizitës që ka pasur në Gjermani së bashku me drejtuesin politik të Tiranës, Belind Këlliçi, Alizoti tha se opozita dhe PD ka kërkuar mbështetjen dhe sensibilizimin e ndërkombëtarëve për të parandaluar kartelet e drogës në Shqipëri, të cilat i konsidetron të dëmshme jo vetëm për vendin tonë, por edhe për vetë BE.

Alizoti paralajmëroi gjithashtu edhe mbi vizitat që do të ndërmarrë kryedemokrati Sali Berisha në Gjermani dhe vende të tjera të BE, për të hedhur informuar ndërkombëtaret, mbi atë se çfarë po ndodh në Shqipëri.

Policia në Shqipëri ësjtë në kontrollin e krimit. Policia kriminale gjermane dhe belge, është e shqetësuar që Shqipëria po shkon në një vend kartel dhe është një vend kartel. Paralelizmi i Shqipërisë me Meksikën, dhe trafiku i kokainës. Të njëtat tregues ka marrë Shqipëria, është në kufi me BE dhe këtu shitet lënda më shtrenjtë e drogës, kokaina. Kjo i ka shqetësuar gjëermanët, ne si opozitë kërkojmë suport ndërkombëtar për të parandaluar këto kartele. Ne këtë kemi kërkuar nga ndërkombëtarët, që jo vetëm të shpëtojmë Shqipërinë por edhe evropën. Shqëipëria është bërë e rrezikshme. Rama ka investuar miliona e milarda për të lobuar ndaj ‘realitetit’ shqiptar dhe zvogëlimin e opozitës.

Opozita është në formën më të mirë në aspektin ndërkombëtar. Së shpejti Berisha mund të ketë vizia në Gjermani, me CDU-në për të treguar realitetin në Shqipëri. Beteja në terren, ndjej se ka ndryshuar qëndrimi. Gjermanët janë mbështetje e mirë, nëse motivohet fuqishëm opozita, së shpejti e shoh në pushtet.

Nëse në Shqipëri nis, ruhet dhe stabilizohet mirë rruga e trafikut ndërkombëtar të kokainës, që janë miliarda euro do jetë e pamundur të shkëputet, sepse rrezikon ekonomitë botërore. Shqipëria është afër, s’e ka kapur ende. S’ka ndodhur që kartelet të caktojnë drejtorin e policisë. Bandat sot janë kartele, me grupe të mëdha financiare, nëse shqiptarët nuk çohen sot, do jetë e pamundur nësë kjo rrugë e madhe kokaine do arrijë të jetë në Shqipëri, nesër do jetë e pamundur. Të mbrojmë Shqipërinë, sepse rreziku është më i madh se komunizmi. Gjithë qytetet janë në duart e karteleve, Durrrësi, së shpejti do jetë në Tiranë.

Nëse SPAK lufton kartelët e drogës në Shqipëri, ky është rreziku i shkombëtarizimit të Shqipërisë. E gjithë Shqipëria është emigruar, kjo është e rrezikshme. Duhet të frenojmë këtë kartel droge, Rama e ka degraduar vendin, njëri i përfshirë në botën e drogës. Te përgjimet është e gjithë Shqipëria, ka rënë gjithçka. Rama po I lufton përgjimet, pasi kërkon që ato të mos publikohen. sn

Shqetësim në Shqipëri lidhur me shtimin e portaleve me origjinë ruse

Ministri i Brendshëm i Shqipërisë, Ervin Hoxha, tha se në vend janë shtuar portalet në gjuhën shqipe, që kanë origjinë ruse.

Këto deklarata ai i bëri gjatë një seance dëgjimore në Komisionin e posaçëm për koordinimin dhe mbikëqyrjen e veprimeve institucionale për të luftuar “dezinformimin dhe format e tjera të ndërhyrjes së huaj në proceset demokratike të vendit”.

“Kohët e fundit vlerësohet se infrastrukturës dezinformuese ruse në rajon i janë shtuar portale edhe në gjuhën shqipe, vazhdojnë të kenë shikueshmëri dhe lejueshmëri të kufizuar dhe numër të vogël klikimesh”, tha ministri Hoxha.

Ndërkaq, kryetari i Komisionit kundër dezinformimit, Erion Braçe, tha se shumë e vështirë që të identifikohet se kush qëndron pas këtyre portaleve.

“Jemi në dijeni të qartë të portaleve në gjuhën shqipe, por që kanë origjinë Rusinë dhe vende të tjera keqdashëse. Nuk ka instrument që të merret me portale që kanë origjinë ruse dhe që janë në gjuhën shqipe. Problem i madh mbetet dhe dezinformimi i brendshëm, nuk janë formale dhe nuk mbajnë përgjegjësi për ata që thonë”, tha ai.

Rreth dy muaj më herët, kryetari i Autoritetit të Komunikimeve Elektronike dhe Postare, Tomi Frashëri, deklaroi në një nga seancat e këtij komisioni se institucioni që drejton ka mbyllur 155 domene ruse. Ai theksoi se mbyllja e tyre lidhej kryesisht me qëndrime pro luftës së Rusisë kundër Ukrainës.

Ndërkaq, ministri i Brendshëm, Ervin Hoxha, theksoi se si vend anëtar i NATO-s, Shqipëria ka prioritet aftësinë për të parandaluar, kundërshtuar e për t’iu përgjigjur sulmeve hibride të Rusisë.

Ai theksoi se forcimi i kapaciteteve për zbulimin dhe parandalimin e kërcënimeve hibride përmes investimeve në teknologji, edukimit të publikut dhe forcimit të institucioneve demokratike, mbeten jetike për përballimin e kësaj sfide.

Ministri i Brendshëm tha se autorët kryesorë të fushatave hibride dhe formave kryesore të tyre në sulmet kibernetike si dhe të çdo aktiviteti tjetër janë aktorë shtetërorë dhe organizma të sponsorizuar prej tyre, dhe më pak organizata biznesi joqeveritare.

“Rusia ka shtuar prezencën dhe ndikimin në rajon, duke kundërshtuar dhe vonuar procesin e integrimit evropian të këtyre vende përmes influencës politike, por edhe ekonomike. Pranohet se propaganda politike e Moskës nuk vjen direkt nga Moska, por vjen e ripaketuar në të njëjtën mënyrë si të vinte nga andej dhe shpërndahet përmes satelitëve të saj në rajon. Nëntëdhjetë për qind e kësaj propagande ruse bëhen në gjuhën serbe”, tha Hoxha.

Ai tha se gjatë viteve 2023-2024 Shqipëria është përballuar dhe me sulme kibernetike të infrastrukturave të saj kritike të informacionit. Ministri ngriti shqetësimin se aktualisht në Kodin Penal të Shqipërisë nuk është i përkufizuar termi “dezinformim”.

Edhe kryetari i Komisionit kundër dezinformimit, Erion Braçe, theksoi se ka boshllëk ligjor për të adresuar problemin e dezinformimit dhe se nëse nuk adresohen mund të ketë ndikim në zgjedhje që pritet të mbahen pranverën e vitit që vjen.

“Jemi zbuluar, është shqetësim i madh. Ministria e Brendshme dhe Policia e Shtetit bëjnë me dije se janë në boshllëk të plotë ligjor për të vepruar për ndërhyrjet e huaja që përdorin dezinformimin për të goditur institucionet apo për të krijuar ndarje të qartë në shoqëri. S’ka bazë ligjore për të vepruar në të tilla raste. Nëse ky boshllëk nuk përmbushet para zgjedhjeve do ketë probleme në financimin fushatave, por edhe sa i takon dizinformimit. Mjafton t’iu sjell rastin e Rumanisë”, theksoi Braçe.

Shefi i NATO-s, Mark Rutte, ditëve të fundit ka thënë se aleanca po rrit përpjekjet për t’iu kundërvënë akteve “sabotuese” të Rusisë, por edhe Kinës, pasi ka thënë se këto dy shtete viteve të fundit kanë tentuar që të destabilizojnë shtetet e aleancës përmes akteve të sabotimit, sulmeve kibernetike dhe dezinformatave. REL

Protestuesit e opozitës mbajnë një minutë heshtje në nderim të Arben Tafajt

Protestuesit e opozitës, të mbledhur përpara Bashkisë së Tiranës, mbajtën një minutë heshtje në nderim të Arben Tafajt, i cili ndërroi jetë një ditë më parë.

Kërkesa për nderimin e tij u bë nga Tedi Blushi.

“Në nderim të një qytetari model si Arben Tafaj, kryetar i shoqatës Tirana, kolegu dhe miku ynë, një nga mbrojtësit më të vendosur të vlerave historike dhe kulturore të këtij qyteti,” tha ai. sn

Buxheti 2025- Buxhuku: Është bërë i shkëputur nga politikat ekonomike, i dobët nga ana profesionale. PS e mendon të lehtë fitoren në zgjedhje

Kreu i Konfindustrisë Gjergj Buxhuku, në një intervistë me Skype në News 24 foli për projekt-buxhetin 2025.

Buxhuku deklaroi se buxheti është bërë i shkëputur nga politikat ekonomike, duke shtuar se është i dobët nga ana profesionale. Sipas Buxhukut, PS mendon se e ka të lehtë fitoren, prandaj dhe debatin për projekt-buxhetin e ka marrë lehtë.

Gjergj Buxhuku, kreu i Konfindustrisë: Është buxhet afër 8.2 miliardë euro. Projektbuxheti është bërë i shkëputur nga politikat ekonomike. Shqipëria ka pensionet në nivele tepër të ulëta. Nëse ka rritje ekonomike, kjo duhet të reflektohet në mirëqënie më të mirë të qytetarëve.

Paratë që jepen për pensionet për politikën konsiderohen “para të humbura”. Shqipëria ka nevojë për debat për analizën ekonomike në vend. Ky është buxhet i dobët nga ana profesionale, ngaqë PS pret fitore të lehtë në zgjedhje.bw

Shuhet politikani dhe drejtuesi i shoqatës ‘Tirana’, Arben Tafaj- Këlliçi: Ngushëllimet më të sinqerta për familjen

Drejtuesi politik i PD për Qarkun Tiranë, Belind Këlliçi, në një postim në Facebook ka shprehur ngushëllime për humbjen nga jeta të politikanit dhe aktivistit të njohur Arben Tafaj, i cili u nda nga jeta ditën e sotme.

Si anëtar i Këshillit Bashkiak Tiranë ai ishte një përfaqësues i palodhur i qytetarëve dhe një derë e hapur për këdo që kishte një shqetësim. Pa Arbenin, Tirana është sot më e varfër, me një referencë që do të na mungojë të gjithëve’– shkruan Këlliçi.

Postimi:

Me hidhërim të thellë mora vesh lajmin për ndarjen para kohe nga jeta të mikut, qytetarit, familjarit, bashkëpunëtorit, politikanit dhe aktivistit të palodhur për Tiranën tonë, z. Arben Tafaj.

Arben Tafaj bëri kaq shumë për qytetin, kontribuoi për vlerat më të mira që ne të gjithë aspirojmë e luftojmë për to. Si kryetar i “Shoqatës Tirana”, punoi pa u lodhur për të ruajtur trashëgiminë, shpirtin e qytetit e autenticitetin tiranas. Po gjithnjë duke përkrahur bashkëjetesën dhe frymën e miqësisë me secilin komunitet.Si anëtar i Këshillit Bashkiak Tiranë ai ishte një përfaqësues i palodhur i qytetarëve dhe një derë e hapur për këdo që kishte një shqetësim.

Pa Arbenin, Tirana është sot më e varfër, me një referencë që do të na mungojë të gjithëve.

Por ai ka lënë pas shumë punë të mira e rezultate dinjitoze, kujtime dhe vlera, siç është dhe dera e madhe Tafaj, nga ai vjen.

Ngushëllimet më të sinqerta për familjen, miqtë e të afërmit.

Qofsh i Parajsës mik i mirë [🙏🏻]

Berisha kërkon një minutë heshtje në nder të Sami Repishtit, e gjithë salla në këmbë, nderon figurën e profesorit

Kuvendi ka mbajtur sot një minutë heshtje për ndarjen nga jeta të profesorit Sami Repishti, akt ky i propozuar nga kreu i PD Sali Berisha.

“Një kolos i mendimit intelektual shqiptar, një avokat i pamposhtur i çështjes kombëtare, një luftëtar i paepur kundër diktaturës komuniste, një martir i gjallë”, u shpreh Berisha.

Prof. Sami Repishti lindi në Shkodër, Shqipëri, në vitin 1925; në Shkodër kreu studimet fillore e të mesme. Studimet universitare për histori moderne i filloi në Universitetin e Firenzes, Itali. Student 14 vjeçar u aktivizue në demonstratat e 7 prillit 1939 dhe ma vonë në lëvizjen e rezistencës kundër pushtuesve fashistë italianë dhe nazistë gjermanë. I zhgënjyem nga propaganda dhe ushtrimi i terrorit masiv komunist, ai mbeti demokrat parimor dhe intelektual jokonformist. Gjatë L2B humbi babën, viktimë e terrorit fashist, dhe kushërinin, viktimë e terrorit nazist.

Që nga viti 1945, me ardhjen e pushtetit diktatorial stalinist, ai u gjend në nji situatë që impononte, politikisht e moralisht, marrjen e nji qendrimi patriotik në lëvizjen klandestine antikomuniste. Me arrestimin e tij me 22.X.1946, studenti Repishti u torturue egërsisht për 14 muej; me 27.XI 1947 u dënue me 15 vjet burgim të randë, Më 1949, nana, motra dhe vëllai, të mitun, u internuen në Berat, dhe Veliqot, Tepelenë, viktima të komunizmit.

I liruem nga burgu, 1.VII.1956, punëtor krahu i përbuzun dhe i përndjekun, vendosi të arratisej në Jugosllavi, më 22.VIII.1959, tue lanë familjen në gjendje shumë të vështirë.

Si emigrant politik u mbajt 11 muej në izolim “incommunicado”, u dërgue në kampin Gerovo, Kroaci, u përjashtue në Itali më 1.IX.1961. Emigroi në Amerikë, 9.IV.1962. Në Botën e Lirë, refugjati Sami Repishti iu nënshtrue nji arsimimi rigoroz, dhe fitoi diplomën B.A.(1964), dhe M.A.(1969) pranë Queens College., dhe Ph.D. (Universiteti “la Sorbonne”, Paris (bursist i Qeverisë franceze) dhe Graduate Center of the City Universtiy of New York, (French, shkurt 1973). Për 26 vjet me radhë ka dhanë mësim në gjimnazet amerikane, kryetar i departmentit për gjuhët e hueja (1974-1990) dhe pedagog i jashtëm pranë Adelphi University, N.Y. (1972-1978).

Dr. Sami Repishti ashtë autor, kryesisht i dy vëllimeve: “Pika Loti-Tregime burgu” (1997), dhe “Nën hijen e Rozafës-Narrativë e jetueme” (2004) bashkautor dhe publicist me shkrime për problemin e “Shqipërisë Lindore”, Kosova e lirë u ba leitmotivi i jetës tij.

I aktivizuem në lamin politik, ai bashkëthemeloi e drejtoi disa organizata shqiptaro-amerikane: nga këta Rinia Shqiptare-Kosovare në Botën e Lirë dhe Këshilli Kombëtar Shqiptar-Amerikan (N.A.A.C) për shumë vite kanë qenë dy grupimet politike ma efektivë në emigracion. Në vitin 1965, ai ka dëshmue para Kongresit Amerikan për probleme kombëtare shqiptare, me lidhje të vazhdueshme me Departamentin e Shtetit dhe Shtëpinë e Bardhë. Prof. Repishti ashtë dekorue disa herë nga qeveritë shqiptare, amerikane, dhe kosovare.

Akti rebel që pothuejse e vrau, e çliroi njikohësisht. Si i ri, ai u ndërgjegjsue për rolin e tij, nga dashunia për atdhe dhe etja për liri, nji i ri me sensibilitet të theksuem, besnik i vetëvetes, i jetës me dinjitet. Gjatë udhës, ai njohu ma mirë “Njeriun”, krijesën fisnike. Udhëtimi e solli në botën e nëntokës komuniste ku takoi viktimën dhe e deshti me pasion, nji dashuni për Krijesën që mundi edhe kercënimin e vdekjes,….

Sot, ai largohet nga kjo botë i shqetësuem që akoma nuk ka nji punë të organizueme me shkye perden e konspiracionit komunist. Akoma sot, Shqipëria nuk e ka pranue fajin publikisht: ajo jeton me nji ndërgjegje të randueme. Kjo gjendje fluide frikëson mendjet e ndrituna që kanë përqafue demokracinë. Në qoftë se akoma refuzojmë me përballue demonët e së kaluemes, breznitë e ardhme do të pësojnë rrjedhimet e paevitueshme.

Dr. Repishti ka folë, ka shkrue, ka denoncue pa kompromis këtë tragjedi që shtrembnon çdo gja dhe çdo mendim dhe shtron pyetjen a do të jemi në gjendje me rikrijue nji bashkësi vëllazënish e motrash të lirë, të ndërgjegjshëm për rolin e tyne në shoqëni e kryesisht të çliruem nga frika e persekutimit të organizuem shtetnor të “shtetit tonë”?

Pasiviteti sot mundëson ushtrimin e dhunës kundër të pafajshmit e lejon kryqëzimin e pafajnisë! Zemrat e djeguna si ajo e Sami Repishtit nuk gjejnë ngushëllim derisa të gjindet nji përgjigje.

Sot, ai largohet nga kjo botë me shqetësimin se Shqipëria lëkundet në mes të së vjetrës që nuk jep shpirt, dhe së resë pa fuqi me lindë. Ai do të lutet për nji rilindje premtuese – me ndihmën e Zotit!

Sot, ai largohet me dashuni për të gjithë, veçanërisht për herojt, dëshmorët e viktimët e regjimeve totalitare në Shqipëri dhe pa urrrejtje për të gabuemët dhe të mashtruemët.

Ai largohet tue çfaq mirënjohjen e tij të pakufishme për prindët e vet, Hava dhe Hafiz Ibrahim Repishti, dy viktima të diktaturave, për motrat Fejzije, Merjeme e Hadije, për vëllazënit Fahri e Vehbi e familjarët tjerë në Shqipëri që vuejtën aq shumë.

Sot, ai shpreh mirënjohjen ma të thellë për bashkëshorten e tij Diana Çipi, dashuninë e mirëkuptimin e saj të plotë; për djalin Daren e fëmijët Bryan, Julia e Nicole; për vajzën Ava Repishti-Safir, e fëmijët Åudrey T. e Ålexander H. Safir, që mundësuen rihymjen e tij në jetë “normale”, të gjithë burim gëzimi e kryenaltësie për mbi 60 vjet banimi në Shtetet e Bashkueme!

Dhashtë Zoti paqë në botë dhe mirëkuptim në mes të njerëzimit!

VLERESIME
– 4.IX.1986 –“…For as long as people like Dr. Repishti who has spent eleven years in Communist jails escape and seek refuge in the United States, the country of his freedom, our Nation and Democracy will flourish…” George W. Bush, N/President of the United States of America

-16.V.1995 –“I përkushtuar që në moshë të re çeshtjes së drejtësisë shoqërore, armik i betuar i diktaturës komuniste, intelektual dhe studjues erudit që të gjithë veprimtarinë e tij të pandërprerë e vuri në sherbim të çeshtjes kombëtare, të zhvillimit të kulturës shqiptare, mbrojti interesat kombëtare, sidomos punoi me përkushtim për të njohur të drejtat legjitime të popullit tonë në Kosovë, duke arritur që çeshtjen kosovare ta ndërkombëtarizojë në qarqet më të larta shtetrore të Evropës, të Amerikës dhe në Organizatat Ndërkombëtare”.
Dr.Sali Berisha,President, Repubika e Shqipërisë.

-15.VI.1996- “I dashur Sami, Jam i bindur se e kemi të përbashkët gëzimin për hapjen e Zyrës Informative Amerikane në Prishtinë, për të cilën Ju jeni angazhuar dhe keni punuar me terë qenien bashkë me miq amerikanë dhe veprimtarë të çeshtjes së Kosovës dhe të kauzës shqiptare në SH.B.A. Hapja e kësaj Zyre në Prishtinë padyshim ashtë kurorëzimi dhe sukses i juaji, prandej me lejoni t’ju shpreh përgëzimet më të përzemërta. Besoj se ju me dijen, përvojen dhe kurajon e pashembullt do të punoni edhe në të ardhmen për sensibilizimin e opinionit shtetror e publik amerikan për pavarësinë e Kosovës dhe çeshtjen shqiptare në përgjithësi. Në emër të popullit të Republikës së Kosovës dhe emrin tim personal, Ju falënderojmë edhe një herë për punën e madhe që bëni në Amerikë dhe ju urojmë shëndet”
Dr.Ibrahim Rugova, Kryetar,Republika. e Kosovës.

-6.VIII.1997- “Dear Sami: Thank you for your Letter of June 12 (1997) regarding the situation of ethnic Albanians in the Balkans… My Administration is equally concerned about human rights abuses, particularly with regard to Kosovo. Again, thank you for your active interest in this important issue”.
Sincerely, Bill Clinton” President of the United States of America

– 5.IX.2001-(The liberation of Kosova)…could not have prevailed had not you and the others spent years patiently educating the American public, and more important our political leaders, of the serious problem posed by Serb repression of the Albanians there. You maybe justly proud of what you have accomplished. No, you did not do it single-handedly, but I doubt that without your long efforts American political leaders could have acted as they did. With warm personal regards,
Sincerely,
Bill Ryerson” first US Ambassador to Albania (1991-1994)

– 25.XII.2003-“…Për mendimin tim, prof. dr. Sami Repishti qendron në krye të intelektualëve të diasporës shqiptaro-amerikane. Ai është pasardhës i denjë i Rilindasve sepse ka zbatuar me besnikëri idealet e tyre të larta”.
Peter R.Prifti, autor dhe historian.

– Korrik 2015- “Ju jeni njeriu që idealeve për shqiptarizëm u mbete besnik, dhe kështu i bëre borxh kombit tonë. Nji jetë e terë në shërbim të kombit; kjo është madhështia tek ju, misioni fisnik dhe jo i dalun mode…Ju jeni intelektuali me forma të mirëfillëta, luftar i thekur për demokraci në kuptimin e plotë të fjalës, kundër komunizmit pa kursim, e qendrim herkulian…”
Dr.Bujar Bukoshi, KM i Kosovës

– 17.VII.2015- “… Bejmë urimet tona duke kujtuar kontributin në luftën kundër totalitarizmit enverist, përpjekjet fisnike për Kosovën, punën e rrallë e të lavdrueshme në të mirën e kulturës shqiptare, ku veçojmë librat tuaj me karakter autobiografik”.
Ismail Kadare e Elena Kadare, dy monumentë të kulturës shqiptare.

– 15.IX.2016- “Me mirënjohje për vuajtjet dhe sakrificat e parrëfyeshme, përpjekjet mbinjerëzore dhe qendresën stoike ndaj diktaturës komuniste. Në nderim të veprimtarisë së palodhun atdhetare për çeshtjen kombëtare, si dhe në respekt të rolit dhe kontributit të çmuar dhënë për dekada me radhë si veprimtar i shquar i të drejtave të njeriut, farkëtues i lidhjeve të gjithanëshme shqiptaro-amerikane, duke u shndërruar në një simbol të rrallë e të vyer të shqiptarizmit”.
Bujar Nishani, President i Republikës së Shqipërisë.

– 17 .VI.2012 – “Dear Sami: One of the most important things I have done as President is read Americans like you…I would like to thank you for writing. I promise I will be there along with you continue to build a better, more prosperous, more diverse and inclusive America with a future full of hope. Thanks for writing; all the best…”
Barak Obama, President of the United States of America.

– 14..XII.2020….”Ish I burgosuri Sami Repishti është ndoshta personaliteti më i shquar dhe më i urti që shqiptarët kanë sot në SHBA. Sami Repishti është i dënuar politik, i arratisur nga Shqipëria në kohën kur komunistët e gëzonin pushtetin” Gazeta PANORAMA, Tiranë.

– 6.I.2021- Kjo dashuri famiijare dhe njerëzore që buroi pashterrësisht prej jush…jane çelsi i artë i jetës suej plot talandi, stuhi, e sukseseshme dëshmuar në veprat e jueja që mbeten vlerë kombëtare e mësimdhenëse për brezat e rij.”
Fotaq Åndrea, autor, ish Ambasador i R.Sh. pranë UNESCO. sn

110 milionë euro Becchettit- Grupi i PD kërkon interpelancë urgjente me Kryeministrin për ekzekutimin e pagesës…

Grupi Parlamentar i Partisë Demokratike, kërkon interpelancë urgjente me Kryeministrin për egzekutimin e pagesës 110 milionë euro të shtetit shqiptar për biznesmenin Becchetti.

Në një shkresë drejtuar Kryetares së Kuvendit Gazment Bardhi shkruan se “Megjithëse, Kryeministri Edi Rama dhe ish-Ministri i Financave Arben Ahmetaj e kanë mohuar në vazhdimësi se Shqipëria do të paguante dëmshpërblimin prej 110 milionë euro sipërmarrësit Becchetti dhe ortakëve të tij, proceset e iniciuara nga qeveria shqiptare pranë ICSID dhe tribunaleve të tjera ndërkombëtare nuk arritën të prodhonin asnjë ndryshim, sa i përket detyrimit të qartë të shtetit shqiptar për shlyerjen e plotë të faturës financiare të mbylljes dhe shkatërrimit të televizionit Agonset”.

“Në javën e dytë të nëntorit, mediat shqiptare raportuan gjërësisht se një përmbarues belg kishte arritur të ekzekutonte vlerën e plotë të dëmit në favor të biznesmenit italian nëpërmjet fondeve të Albcontrol, që mbaheshin të bllokuara në llogarinë e Eurocontrol prej dhjetorit 2020”. “Sipas raportimeve mediatike, në 12 nëntor 2024, Eurocontrol ka njoftuar zyrtarisht qeverinë shqiptare dhe kompaninë Albcontrol për kryerjen e ekzekutimit të plotë tëvendimit të ICSID”.

Kërkesa

Znj. Kryetare e Kuvendit,

Në prill 2021, opinioni publik shqiptar është njohur me vendimin “Becchetti dhe të tjerë kundër Shqipërisë”, të marrë nga Qendra për Zgjidhjen e Mosmarrëveshjeve të Investimeve pranë Bankës Botërore (ICSID), e cila kishte vendosur t’iu akordonte palëve paditëse një dëmshpërblim në vlerën 110 milionë euro nga Republika e Shqipërisë, përfshirë interesat dhe shpenzimet gjyqësore.

Ky shpërblim iu akordua palëve paditëse Becchetti dhe të tjerë, pasi nga faktet dhe provat e vëna në dispozicion, ICSID ka konstatuar se si rezultat i veprimeve të paligjshme të zyrtarëve të lartë shtetërorë, ku përfshihen Edi Rama, me detyrë kryeministër i Shqipërisë, Erion Veliaj, me detyrë Kryetar i Bashkisë Tiranë dhe Ëngjëll Agaci, me detyrë Sekretar i Përgjithshëm i Këshillit të Ministrave, në bashkëpunim me zyrtarë të tjerë të një rangu më të ulët si Enkelejd Joti, me detyrë drejtor i Qendrës Spitalore Universitare “Nënë Tereza” (asokohe), ish-drejtor i përgjithshëm i Top Channel, shtetasi Skerdi Drenova, me detyrë administrator i Operator të Sistemit të Transmetimit (asokohe), ish-zëvëndësdrejtor i përgjithshëm i Top Channel dhe shtetasi Gentian Sala, kryetar i Autoritetit të Mediave Audiovizive (asokohe), ish-drejtor i Top Channel dhe Digitalb, sipërmarrjet e biznesmenit italian Becchetti janë shkatërruar plotësisht.

Konkretisht ICSID, pasi shqyrtoi mesazhin e dërguar në datën 5 shtator 2014, nga Erion Veliaj, ish-Ministër i Mirëqënies Sociale dhe Rinisë, bisedën e zhvilluar në fillim të vitit 2014 me Ëngjëll Agacin, Sekretar i Përgjithshëm i Këshillit të Ministrave, statusin në Facebook të Edi Ramës, Kryeministër i Shqipërisë dhe deklaratat e tij në medianë qershor 2015, arriti në përfundimin se vendimi i sekuestrimit të Agonset ishte finalizimi i një fushate politike kundër sipërmarrësit Becchetti dhe ortakëve të tij. Për ICSID ishte e qartë se në këtë rast nuk kemi pasur të bëjmë me një proces të rregullt ligjor, por vetëm me një proces të motivuar politikisht, që kishte për qëllim mbylljen e televizionit dhe shkatërrimin e sipërmarrjeve të biznesmenit italian Francesco Becchetti në Shqipëri (shih paragrafin 724 të vendimit).

Megjithëse, Kryeministri Edi Rama dhe ish-Ministri i Financave Arben Ahmetaj e kanë mohuar në vazhdimësi se Shqipëria do të paguante dëmshpërblimin prej 110 milionë euro sipërmarrësit Becchetti dhe ortakëve të tij, proceset e iniciuara nga qeveria shqiptare pranë ICSID dhe tribunaleve të tjera ndërkombëtare nuk arritën të prodhonin asnjë ndryshim, sa i përket detyrimit të qartë të shtetit shqiptar për shlyerjen e plotë të faturës financiare të mbylljes dhe shkatërrimit të televizionit Agonset. Në javën e dytë të nëntorit, mediat shqiptare raportuan gjërësisht se një përmbarues belg kishte arritur të ekzekutonte vlerën e plotë të dëmit në favor të biznesmenit italian nëpërmjet fondeve të Albcontrol, që mbaheshin të bllokuara në llogarinë e Eurocontrol prej dhjetorit 2020. Sipas raportimeve mediatike, në 12 nëntor 2024, Eurocontrol ka njoftuar zyrtarisht qeverinë shqiptare dhe kompaninë Albcontrol për kryerjen e ekzekutimit të plotë tëvendimit të ICSID.

Megjithatë, deri në datën e paraqitjes së kësaj kërkese, nga ana e qeverisë shqiptare dhe kompanisë Albcontrol nuk ka pasur asnjë reagim a qëndrim zyrtar sa i përket vërtetësisë së raportimeve mediatike dhe në funksion të transparencës së plotë me taksapaguesit shqiptarë, të cilët për shkak të veprimeve arbitrare e të paligjshme të kryera nga zyrtarë të lartë të shtetit shqiptar, si Kryeministri, Kryebashkiaku i Tiranës dhe Sekretari i Përgjithshëm i qeverisë duhet të shlyejnë faturën më të lartë në historinë e arbitrazheve ndërkombëtare me palë shtetin shqiptar. Qeveria dhe kompania Albcontrol kanë për detyrë të informojnë Kuvendin e Shqipërisë, dhe nëpërmjet tij qytetarët shqiptarë lidhur me vërtetësinë e këtij procesi, përgjegjësit dhe pasojat e këtij dëmi kaq të lartë financiar.

Prandaj, duke pasur parasysh sa më sipër, në cilësinë e kryetarit të Grupit Parlamentar të Partisë Demokratike, në mbështetje të nenit 80 të Kushtetutës së Shqipërisë dhe neni 97 të Rregullores së Kuvendit, kërkojmë zhvillimin e një interpelance urgjente me Kryeministrin e Shqipërisë Edi Rama, me qëllim dhënien e informacioneve dhe shpjegimeve të detajuara lidhur me ekzekutimin e vendimit “Becchetti dhe të tjerë kundër Shqipërisë”, të Qendrës për Zgjidhjen e Mosmarrëveshjeve të Investimeve (ICSID). sn

Dumani: Kemi zbuluar lidhje të zyrtarëve me krimin e organizuar. Ose janë korruptuar ose janë anëtarë bandash

Kreu i SPAK, Altin Dumani, u shpreh se SPAK ka bashkëpunime me shumicën e vendeve të BE-së, ndërsa theksoi se Prokuroria Speciale ka rritur hetimet proaktive. Në këtë kuadër, Dumani tha se shtylla e suksesit të SPAK është bashkëpunimi ndërkombëtar. Dumani tha se nga hetimet për krimin e organizuar kemi evidentuar lidhjet e krimit me zyrtarë të niveleve të ndryshme, që janë korruptuar apo janë bërë pjesë e grupeve të krimit të organizuar.

“SPAK duhet të fokusohet në çështjet më të ndjeshme dhe që janë më vështirë për t’u hetuar”, u shpreh Dumani.

Ai tha se në fund të këtij viti SPAK do të përfaqësojë rolin e Komisionerit Publik në rastet kur mund të ketë ankesa në KPA ndaj vendimeve të KPK për gjyqtarët dhe prokurorët, përsa i takon procesit të Vetting.

“Kemi nevojë për bashkëpunimin e institucioneve të tjera në luftën ndaj korrupsionit”, tha Dumani, duke theksuar se korrupsioni nuk mund të luftohet i vetëm nga SPAK.

Duke marrë fjalën në takimin e Komisionit të Monitorimit të Këshillit të Europës, tha se SPAK ka sekuestruar e konfiskuar 150 mln euro asete.

“SPAK është në vijën e parë të luftës ndaj korrupsionit, duke ndjekur një qasje të bazuar në transparencë bashkëpunim ndërkombëtar dhe rezultate konkrete. Pavarësia institucioneve, kapacitetet njerëzore dhe teknike kanë dhënë rezultate premtuese që janë përkthyer në çështje konkrete.

Krahas ushtrimit të ndjekjes penale për zyrtarë të lartë, SPAK ka në fokus edhe luftën kundër krimit të organizuar, ku falë bashkëpunimit me agjenci të huaja të zbatimit të ligjit, kemi bërë të mundur të godasim grupe të ndryshme kriminale, organizata të ndryshme kriminale të përfshirë në krime të dhunshme apo trafik droge. Krahas ushtrimit të ndjekjes penale, në fokus të SPAK është edhe identifikimi dhe konfiskimi i produkteve te veprës penale si për subjekte që janë ndjekur penalisht për veprën penale të korrupsionit dhe krimit të organizuar. Nga data e krijimit të SPAK deri ditën që flasim kemi sekuestruar një total asesh 150 mln euro”, tha Dumani.

Në fjalën e tij, kreu i SPAK tha se është ushtruar ndjekja penale ndaj zyrtarëve dhe ish-zyrtarëve të lartë, prokurorëve dhe gjyqtarëve, por edhe drejtuesve të pushtetit vendor, apo ish-drejtuesve të Bashkive.

Ai tha se numri i total i të paraburgosurve me kërkesë të SPAK është më pak se 9%.

“Kemi një laborator modern të përgjimeve, një laborator modern të ekspertizës kriminalistike, gjithashtu kemi investuar në mjete dhe teknologji bashkëkohore që na shërben në kryerjen e hetimeve të suksesshme”, tha Dumani.

Në vijim, kreu i SPAK tha se nga vitit 2020 deri në 2023 janë krijuar 32 skuadra të përbashkëta hetimore, nga të cilat 25 janë aktive. “Janë të angazhuara në hetimin e veprave të rënda nga trafiku i narkotikëve, te pastrimi i parave, kryer në bashkëpunim në formën e grupeve apo organizatave kriminale”, tha Dumani.

(BalkanWeb)

Protestë para Kryeministrisë kundër kampeve të emigrantëve, tubimi pritet të zhvendoset para ambasadës Italiane dhe delegacionit të BE

Para Kryeministrisë, në bulevardin Dëshmorët e Kombit, një grup të rinjsh po protestojë kundër marrëveshjes mes qeverisë shqiptare dhe asaj italiane, lidhur me qendrat pritëse të emigrantëve që kapen në det nga autoritetet e shtetit fqinj.

Të rinjtë shprehesh kundër këtyre kampeve duke thirrur në kor “marrëveshja ilegale, rezistenca globale”.

Pritet, që pas tubimit para Kryeministrisë, të shkojnë dhe të protestojnë tek Ambasada Italiane në Tiranë si dhe te delegacioni i BE.

protesteee

Kujtojmë se aktualisht në dy kampet që hapën dyert në tetor, nuk ka asnjë emigrant. Kjo për shkak se në dy raste që janë sjellë emigrantët, me vendim të një gjykate në Romë, ata janë kthyer sërish në Itali.

kampet ne gjader shengjin

Panorama

Kundër dhunimit të të drejtave të njeriut, qindra aktivistë të shoqërisë civile në Itali dhe Shqipëri protestë në Shëngjin për emigrantët

Aktivistë të shoqërisë civile në Itali dhe në Shqipëri janë bërë bashkë në një protestë kundër dhunimit të të drejtave të njeriut ndaj emigrantëve të ndaluar në brigjet italiane dhe planit për t’i dërguar në kampin e Gjadrit.

Protesta e tyre ka nisur në Shëngjin aty ku është qëndra e pritjes së emigrantëve për të vijuar më pas në Gjadër aty ku është vendosur kampi i emigrantëve. Pas dy lundrimeve të pasuksesshme më 15 tetor dhe 8 nëntor, kur anija Libra solli 16 dhe 8 emigrantë në Shëngjin, ndalimi i të cilëve u anulua më pas nga gjykata e Romës, qendrat tani janë bosh. bw

“U cënua siguria kombëtare e e Kosovës”- Sulmi në Zubin Potok, Begaj bisedë me Osmanin: Dënoj ashpër sulmin terrorist!

Presidenti i Republikës së Shqipërisë Bajram Begaj zhvilloi një bisedë telefonike me Presidenten e Republikës së Kosovës, znj. Vjosa Osmani ku dënoi ashpër aktet terroriste me lëndë eksplozive mbi Kanalin e Ibër-Lepenci që synojnë shkatërrimin e infrastrukturës kritike të Kosovës e cënon sigurinë kombëtare të Kosovës.

Presidenti mbështet fuqishëm të gjitha përpjekjet e Republikës së Kosovës për përballimin e situatës dhe hetimin e ndëshkimin e plotë të këtij akti sabotues e terrorist.

Një shpërthim i fuqishëm ndodhi të premten mbrëma në fshatin Varagë të Zubin Potokut, duke dëmtuar rëndë kanalin e ujit të Ibër-Lepencit.

Ky kanal është thelbësor për furnizimin me ujë të pijshëm për rreth 700 mijë banorë të Kosovës dhe për ftohjen e turbinave të termocentraleve të KEK-ut.

Kryetari i Zubin Potokut, Izmir Zeqiri, konfirmoi se shpërthimi ka shkaktuar dëme materiale të konsiderueshme, përfshirë përmbytjen një shtëpie.

“Në kanalin e Ibër-lepencit, në kanalin që përcjell ujin prej liqenit të Ujmanit dhe natyrisht është shumë jetik për qytetarët kjo rrjedhje e ujit. Është bërë dëmin bukur i rëndë në këtë kanal.

Pasojat janë të mëdha munden me qenë. Ekipet janë në terren, Ibër-Lepenci, polica, zjarrfikësit e të gjitha për të vlerësuar dëmin dhe sanimin e dëmit.

Disa qytetarët kanë pësuar edhe nga rrjedha e ujit. Uji ka vërshuar shtëpinë e janë qytetari aty dhe ka bërë dëme materiale koxha shumë. Mirëpo dëme në njerëz nuk ka. Bëhet fjalë për qytetarë serbë, u informova edh prej tyre nëse kanë dëgjuar një shpërthim të madh”, ka thënë Zeqiri. bw

U godit 4 herë me thikë në sherrin ku u vra Martin Cani, del nga spitali 14-vjeçari Luis Meçja

11 ditë pas ngjarjes së rëndë te shkolla “Fan Noli” ku humbi jetën 14-vjeçari Martin Cani, ka dalë nga spitali shoku i viktimës, Luis Meçja, i cili u plagos në përballje me autorin.

Lajmi konfirmohet për BalkanWeb nga gazetarja Klodiana Lala.

Vrasja- Nga Manastirliu, te Proda e Felaj, emrat që fshihen pas gjakut të 14-vjeçarit

Dhjetë ditë pas vrasjes së 14-vjeçarit Martin Cani pranë shkollës 9-vjeçare “Fan Noli” në Tiranë, nga autori i dyshuar, M. Përlleshaj, dhimbjes së pakufijshme të familjes dhe trishtimit të madh që përfshiu opinionin publik, i është shtuar edhe dyshimi i fortë mbi mos-reagimin, madje edhe akuza më të rënda për fshehje të krimit, nga ana e institucioneve arsimore dhe ato ligjzbatuese.

Të paktën tre protesta qytetare para Ministrisë së Arsimit nuk e kanë luajtur aspak këtë institucion të marrë masa ose më së paku të tregojë nëse ka zhvilluar një hetim administrativ dhe cilat janë konkluzionet e mundshme mbi stafin pedagogjik dhe drejtuesit e shkollës.

Nën parimin “gjithçka harrohet shpejt”, Ministrja Ogerta Manastirliu dhe bashkëpunëtorët e saj po paraqesin në media plane e projekte për rritjen e sigurisë në shkolla, pa thënë më parë se çfarë dështoi në rastin e vrasjes së 14-vjeçarit.

Por, kur ka kaluar më shumë se një javë nga ngjarja tragjike, akuzat më të rënda publike po ngrihen mbi institucionet ligjzbatuese, Policinë në radhë të parë, e më tej Prokurorinë.

Për ngjarjen, tashmë është arrestua M. Përlleshaj, si autor i dyshuar. Por, të dhëna publike, të deklaruara nga aktorë të dorës së parë në ngjarje, flasin edhe për më së paku një autor tjetër, po 14-vjeçar.

Në sherrin mes të miturve, krahas vrasjes së M. Canit, ka mbetur i plagosur edhe një miku i tij, L. M., i cili prej ditësh qëndron në regjim spitalor. Babai i të plagosurit, por edhe vetë i dëmtuari i mitur, kanë deklaruar që në ditët e para se në sherr ka qenë edhe një goditës i dytë, K. Bekaj, gjithashtu 14-vjeçar.

Ky deklarim është një akuzë shumë e rëndë për Policinë, për atë të Tiranës, por edhe për Drejtorinë e Përgjithshme.

Pas gjithë këtyre ditëve, Policia nuk rezulton të ketë kryer veprime hetimore ndaj këtij personazhi që dyshohet si “goditës i dytë” me thikë.

Madje, në një reagim pas deklaratave publike të babait të djaloshit të plagosur, Policia reagoi në mënyrë cinike dhe kërcënuese.

“Policia e Shtetit vëren se burime të caktuara janë angazhuar në një fushatë mediatike dizinformimi, lidhur me vrasjen e 14-vjeçarit nga një bashkëmoshatar i tij, në një distancë rreth 200 metra nga shkolla “Fan Noli” në Tiranë”, u tha në një deklaratë të lëshuar në datën 24 nëntor, pa përmendur se “burime të caktuara dizinformimi” në fakt janë vetë i plagosuri dhe babai i tij.

Partia Demokratike në opozitë akuzoi Drejtorin e Përgjithshëm të Policisë, Ilir Proda, se po fsheh autorin e dytë të dyshuar, pasi prindërit e tij punojnë në SPAK dhe BKH.

Nuk është hera e parë për Policinë që gjendet nën akuza publike për fshehje krimesh, prishje vendngjarjesh e të tjerë.

Si rregull, veprimet e Policisë, edhe ato të dyshimtat, verifikohen dhe kontrollohen nga Prokuroria.

Në rastin konkret, prokuroria e Tiranës dhe prokurorja e çështjes, Alma Felaj, kanë mbajtur heshtje publike, nën argumentin e “zhvillimit të hetimeve” dhe “kryerjes së ekspertizave”.

Vrasja tragjike e M. Canit nuk ka elementë të sekretit hetimor. Ngjarja ka ndodhur në sy të shumë njerëzve, pjesa më e madhe e tyre të mitur të shkollës “Fan Noli”.

Policia, ashtu edhe Prokuroria, i kanë që ditën e parë emrat e personave të përfshirë, kanë dinamikën e ngjarjes, siç e ka edhe publiku, nëpërmjet dëshmive të shumë dëshmitarëve okularë.

Prokuroria ka në dorë të tregojë nëse Policia e ka fshehur ngjarjen, nëse ka shmangur persona nga përgjegjësia penale dhe, nëse ka ndodhur diçka e tillë, për cilat arsye ka vepruar në këtë mënyrë.

Por, nga ana e prokurorisë po mbahet një “heshtje peshku”, duke shtuar më shumë dyshimet se ka element të rëndësishëm të krimit që po mbahen të fshehur dhe po mbulohen.

Një postulat akademik thotë që “drejtësia jo vetëm duhet të jepet, por edhe të duket që po jepet”. Në rastin e 14-vjeçarit, M. Cani, deri më tani, “drejtësia nuk duket se po jepet”.

Ndoshta është shpejt, por gjaku i 14-vjeçarit u tha, shoqëria në përgjithësi, por sidomos prindërit nuk po arrijnë të kalojnë traumën. Ndaj, akuzat publike për “fshehje autorësie” kanë nevojë për një përgjigje. Sot, jo nesër!/Boldnews.al

“Ftoj opozitarët e rinj të na bashkohen”, Berisha thirrje Ramës pas lirimit: Krijo qeverinë teknike!

Kreu i Partisë Demokratike, Sali Berisha, mbajti fjalimin e tij të parë pas lirimit nga arresti shtëpiak, duke u drejtuar mbështetësve të tij në oborrin e selisë blu.

Ai theksoi se fitorja e tij dhe e opozitës ishte rezultat i bashkimit dhe qëndresës së demokratëve, duke i falënderuar ata për mbështetje. Megjithatë, Berisha kishte edhe një mesazh të qartë për kryeministrin Edi Rama.

Ai i bëri thirrje Ramës që të krijonte një qeveri teknike, duke e paralajmëruar se “narkopushteti” po merrte fund dhe se mosbindja civile ishte gati të vazhdonte. “Mos e zvarrit kot narkopushtetin tënd,” tha Berisha, duke shtuar se “vetë Zoti ka thënë, që të kthehem unë pastroni shtëpinë. Ne do pastrojmë shtëpinë tonë!”

Në fund të fjalës, Berisha ftoi edhe opozitarët e rinj dhe qytetarët e ndershëm, përfshirë ata që punojnë në administratë, të bashkohen me PD-në për të vazhduar luftën për një Shqipëri më të drejtë. “Boll keni vuajtur,” tha ai, duke siguruar se opozita do të vazhdojë të luftojë për kauzën e saj. bw

“U krye dhe kjo punë”, Berisha flet nga selia e PD: Kam thyer rekord këtë vit, 330 fjalime. Tani veprimi do jetë kryefjala ime

Kreu i PD-së Sali Berisha ka mbërritur në selinë e PD-së i pritur nga qindra mbështetës, teksa ka dhënë edhe një mesazh. Berisha tha se këtë vit ka thyer rekordin e tij për numrin e fjalimeve, 330 të tilla, por se tani veprimi do jetë kryefjala e tij.

Ai theksoi se pas një kohe të gjatë që Shqipëria nuk sheh një ditë të mirë, sot është një ditë e mirë për shqiptarët, për opozitarët, një ditë shprese.

“Të dashur miq, u krye dhe kjo punë. Në historinë e drejtësisë europiane, sot goditjet më fatale. Përshëndes çdo shqiptar me mirënjohjen më të madhe. Sot Shqipëria u ndriçuar nga rrezet e para të rikthimit të pandalshëm të demokracisë. Sot është dita kur monstrat e demokracisë Edi Rama dhe George Soros dështuan përfundimisht. Dështuan në tentativën e tyre për të shkatërruar opozitën shqiptare, në grushtin e shtetit që i bënë asaj. Sot ne së bashku, sakrifica e 330 ditëve, mundi triumfoi dhe u shpërblye.

Ne qëndruam për të vërtetën, për vlerat që besojmë. Pas një kohe të gjatë që Shqipëria nuk sheh një ditë të mirë, sot është një ditë e mirë për shqiptarët, për opozitarët, një ditë shprese. Por sot është një ditë e mirë dhe për ata që nuk janë opozitarë. Sepse sot nuk fitoi Sali Berisha, sot ka fituar e vërteta, ka fituar ligji dhe Kushtetuta, ka fituar Kushtetuta. Këtë vit unë kam thyer rekordin tim për numrin e fjalimeve, 330 të tilla. Tani veprimi do jetë kryefjala e Sali Berishës. Veprimi do jetë kryefjala jonë e përbashkët”, deklaroi Berisha. bw

VIDEO/ Berisha pritet me brohorima në seli, mbështetësit takojnë liderin e PD pas rreth 1 viti

Kreu i PD-së Sali Berisha ka mbërritur në selinë e PD, i pritur nga qindra mbështetës. Pas 11 muajsh, Berisha ka dalë nga shtëpia, ku ishte nën masën e sigurisë “arrest shtëpie” dhe i është drejtuar selisë së PD, ku ka lajmëruar konferencë me gazetarët.

Me thirrjet “O Sali o hero, gjithë Shqipëria ty të do”, ishin thirrjet e mbështetësve të cilët kanë pritur me duartrokitje dhe ovacione kreun e PD. Pas rreth 1 viti, Sali Berisha mbërrin për herë të parë në selinë blu.

Sali Berisha fitoi lirinë sot me vendim të gjyqtares së GJKKO, Flojera Davidhi. Ish-kryeministri ishte në hetim nga SPAK për privatizimin e ish-kompleksit Partizani. Megjithatë, dosja për gjykimin e çështjes ndodhet në seancë paraprake në GJKKO.

Gjatë periudhës së arrestit shtëpiak, Berisha shfrytëzoi daljet virtuale, online nga shtëpia si në komunikimet me mediat ashtu edhe me strukturat drejtuese të PD. Ndërsa mbrëmjeve, për 330 ditë me radhë, Berisha ka mbajtur fjalime nga ballkoni pasi poshtë shtëpisë së tij mblidheshin simpatizantët. bw

GJKKO i hoqi masën e arrestit, Berisha gati të shkojë në selinë e PD? Ja çfarë po ndodh pranë banesës së tij

Pak minuta pasi GJKKO vendosi t’i heqë masën e arrestit, kreu i PD-së Sali Berisha pritet të shkojë në zyrën e tij në seli. Gazetari Osman Stafa raportoi për “BalkanWeb” se makina e Berishes ka mbërritur poshte pallatit ku banon, me sa duket për të marrë kreun e PD.

Ndërkohë që nuk ka lëvizje të tjera pranë banesës.

Berisha lirohet nga arresti shtëpiak, reagon Gjekmarkaj: Fitorja e Trump arrin dhe në Shqipëri, era e ndryshimit po vjen!

Nënkryetari i PD, Agron Gjekmarkaj, ka reaguar pas heqjes së masës së “arrest shtëpie” ndaj Sali Berishës, me vendim të Gjykatës së Posaçme.

“Fitorja e Tramp arrin dhe në Shqipëri! Lirohet lideri i opozitës Prof. Dr. Sali Berisha! Era e ndryshimit po vjen në vendin tonë!”, shkruan Gjekmarkaj.

Gjykata e Posaçme ka dhënë vendimin për heqjen e masës së arrestit shtëpiak për Berishën ditën e sotme.

Revokimi i masës është bërë nga gjyqtarja Flojera Davidhi. Sali Berisha u vendos në arrest shtëpie më 30 dhjetor të vitit të kaluar, pasi SPAK ngriti ndaj tij akuzën për korrupsion pasiv në bashkëpunim për privatizimin e ish-kompleksit Partizani.

Ishte gjyqtarja Irena Gjoka që vendosi arrest shtëpiak ndaj ish-kryeministrit Berisha, pasi ishte dhënë më herët masa e detyrimit të paraqitjes, teksa kjo masë nuk ishte respektuar nga kreu i PD. bw

Berisha i lirë- “Do të shikoni më tutje se çfarë do të ndodhë”, avokati i Berishës: Vendimi i ekzekutueshëm që sot. SPAK-u i ka hipur një kali së prapthi

“Do të shikoni më tutje se çfarë do të ndodhë”. Kështu deklaroi Genc Gjokutaj, avokati i kreut të PD-së Sali Berisha pak minuta pasi GJKKO dha vendimin për heqjen e masës së arrestit shtëpiak ndaj ish-kryeministrit.

Gjokutaj tha se “vendimi absolutisht është i ekzekutueshëm, sot është i lirë”.

“Është një masë që nuk ka as kushte as kritere përcaktimi i saj. Nga sot z. Berisha është i lirë dhe pa asnjë masë sigurimi ndaj tij. Kërkesa ishte për z.Berisha. Nuk ka asnjë masë sigurimi. Unë nuk mund të relatoj dosjen. Gjykata konstatoi që për z.Berisha nuk ekzistojnë më kushtet dhe kriteret për përcaktimin e asnjë mase sigurimi. Mos harroni që jemi në kërkimin paraprak”, tha Gjokutaj.

Ai deklaroi më tej se Prokuroria kërkoi që të mbetej në arrest shtëpie. “Kjo ishte kërkesa jonë e depozituar një ditë para seancës paraprake. Këto kërkesa shqyrtohen brenda 5 ditëve dhe gjyqtarja brenda këtij afati caktoi seancë. Kjo kërkesë është bërë këtu pas vendimit të Gjykatës Kushtetuese. Ligji nuk zbatohet me analogji. Ne sigurisht që nuk i besojmë gjykatave që…ne kemi një vit e ca luftë me Irena Gjokën dhe me shumë gjyqtarë të tjerë. Duhet të kuptoni që qëndrimi i Strasburgut është determinant dhe ka një rol parësor. Procesi është kryekëput politik. Ekzistokan arsye dhe jo ligjore, nuk mund t’i hyj ndërgjegjes së brendshme”, tha avokati i Berishës.

Nuk mungoi një mesazh për Prokurorinë e Posaçme. “SPAK-u le të bëjë çfarë të dojë, SPAK-u duhet të ulë kokën dhe të shikojë se çfarë ka bërë, të kthehet në retrospektivë. I ka hipur një kali së prapthi, do të shikoni më tutje se çfarë do të ndodhë. Vendimi absolutisht është i ekzekutueshëm që nga sot. Sot është i lirë. Mos u mërzisni pse u lirua”, tha Gjokutaj. bw

Faqja 26 prej 273« Fillimi ‹ Prapa 22 23 24 252627 28 29 30 Para ›Fundi »

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL