Presidenti Donald Trump u kthye në Shtëpinë e Bardhë të hënën, duke njoftuar veprime të shumta ekzekutive për çështjet kryesore si emigracioni dhe energjetika. Siç njofton korrespondentja e Zërit të Amerikës Anita Powell Presidenti Trump, në fjalimin e tij të parë si President, premtoi gjithashtu se do të zgjerojë territorin e Shteteve të Bashkuara, siç tha ai, deri në Mars.

Në ditën e parë të mandatit të dytë, Presidenti Donald Trump shpalosi vizionin për një Amerikë më të guximshme dhe më të madhe.

“Shtetet e Bashkuara do të bëhen sërish një komb që rrit pasurinë, zgjeron territorin, ndërton qytete, rrit pritshmëritë tona dhe mbart flamurin tonë në horizonte të reja dhe të bukura. Ne do të ndjekim fatin tonë deri në hapësirë, duke dërguar astronautët amerikanë për të vendosur flamurin tonë në planetin Mars”, tha Presidenti Trump.

Më pas ai filloi punën duke nënshkruar një mori urdhrash ekzekutivë. Ai tha se ato përfshijnë shpalljen e gjendjes së jashtëzakonshme në kufirin jugor, gjë që mundëson dërgimin e trupave në kufi dhe shpalljen e energjetikës si urgjencë kombëtare. Kjo mundëson rritjen e shpimeve në tokë për të nxjerrë më shumë naftë. Ai gjithashtu deklaroi se ka vetëm dy gjini, mashkull ose femër, dhe tha se do të urdhëronte që Gjiri i Meksikës të riemërohej si Gjiri i Amerikës.

Historianët thonë se Presidenti Trump përdori fjalimin që tradicionalisht ka qëllim të bashkojë vendin për të portretizuar një të ardhme me të cilën shumë amerikanë mund të mos pajtohen.

“Fjalimi ishte më pak një fjalim inaugurues dhe më shumë një fjalim që mbahet në Kongres për gjendjen në vend. Ai renditi një sërë idesh e projektesh, nga deportimi i emigrantëve, deri te rimarrja e kontrollit mbi Kanalin e Panamasë. Fjalimi ishte një përzierje e zemërimit, gënjeshtrave dhe termave bullizues. Kjo nuk është diçka që kemi dëgjuar më parë nga fjalimet inauguruese”, thotë për Zërin e Amerikës profesor Jeremi Suri nga Universiteti i Teksasit në Austin.

Mijëra mbështetës të Presidentit Trump erdhën në Uashington nga i gjithë vendi duke thënë se politikat e tij kanë rëndësi për ta.

“Ai po rikthen gjykimin e shëndoshë në vend. Shumë njerëz mendojnë se ne jemi shumica e heshtur dhe kjo do të na japë mundësinë të flasim me zë të lartë dhe të mos kemi frikë të themi të vërtetën dhe të flasim me logjikë të shëndoshë”, thotë Melanie Voll, banore Cleveland.

Menjëherë pas inaugurimit, Presidenti Trump foli me një grup më të vogël mbështetësish në Kapitol dhe përsëriti pretendimet se zgjedhjet e vitit 2020 ishin “plotësisht të manipuluara”, një pretendim për të cilin nuk ka prova.

“Mendoj se ky ishte një fjalim më i mirë se sa ai që mbajta më parë, apo jo? Unë mendoj se ky është më i mirë”, tha Presidenti Trump.

Disa nga mbështetësit e fuqishëm të Presidentit Trump shprehën gëzimin e tyre.

“Kështu duket një fitore e vërtetë”, tha miliarderi Elon Musk.

Zoti Musk ishte njëri nga miliarderët që morën pjesë në ceremoninë e inaugurimit. Organizatat që merren me mbrojtjen e konsumatorëve po japin alarmin për disa nga lëvizjet më të heshtura të presidentit të ri, që synojnë të zbusin disa rregullore. Ata thonë se nga këto vendime do të përfitojnë kompanitë e miliarderëve.

“Administrata e ardhshme e Trumpit dëshiron të pezullojë një sërë rregullash dhe të heqë një sërë masash mbrojtëse për publikun, me kërkesë të atyre që janë më të pasurit mes nesh, për shkak të interesave të veçanta të korporatave. Ata përfitojnë kur ne nuk kemi masa mbrojtëse”, thotë Lisa Gilbert, presidente e organizatës joqeveritare ‘Public Citizen’.

Historianët dhe analistët thonë se nuk është e qartë se sa nga veprimet e ditës së parë të Presidentit Trump, të cilat zyrtarët thonë se janë mbi 100, do të funksionojnë kur të sfidohen ligjërisht. Për këtë përgjigje, thonë ata, duhet pritur.

Senati konfirmoi shpejt ish senatorin Marco Rubio si Sekretar të Shtetit të hënën me një votim unanim, duke i dhënë Presidentit Donald Trump anëtarin e parë të kabinetit të tij të ri në ditën e inaugurimit.

Marco Rubio, ish senator republikan nga Florida, është ndër kandidatët më pak të debatueshëm të Presidentit Trump dhe votimi ishte vendimtar 99-0. I emëruari i Presidentit Trump për drejtor të CIA-s, John Ratcliffe pritet gjithashtu të miratohet me një votim të shpejtë.

Votimet për emërimet e tjera, duke përfshirë ish veteranin e luftës dhe ish drejtuesin e një emisioni lajmesh në Fox News, Pete Hegseth për postin e Sekretarit të Mbrojtjes, pritet të bëhen më vonë gjatë javës.

“Marco Rubio është një njeri shumë inteligjent me njohuri të jashtëzakonshme të politikës së jashtme amerikane”, tha Senatori republikan Chuck Grassley në hapje të votimit në Senat.

Shpesh është traditë që Senati të mblidhet menjëherë pas ceremonisë së inaugurimit për të filluar me miratimin e anëtarëve të kabinetit të presidentit të ri, veçanërisht të zyrtarëve të sigurisë kombëtare. Gjatë mandatit të parë të Presidentit Trump, Senati konfirmoi me shpejtësi kandidatët e tij për Sekretar të Mbrojtjes dhe Sekretar të Departamentit të Sigurisë Kombëtare në ditën e tij të parë në detyrë.

I emëruari i ish Presidentit Joe Biden për drejtor të inteligjencës kombëtare u konfirmua në ditën e tij të inaugurimit.

Me kthimin e Presidentit Trump në Shtëpinë e Bardhë dhe kontrollin e Kongresit nga Partia e tij Republikane, anëtarët e tij të kabinetit pritet të miratohen pa vështirësi të mëdha, pavarësisht skepticizmit fillestar dhe kundërshtimit nga ligjvënës nga të dyja partitë.

• Donald Trump betohet sot si president i Shteteve të Bashkuara të Amerikës.
• Këtë post, ai e mbajti edhe nga viti 2017 deri më 2021.
• Zëvendësi i Trumpit, JD Vance, betohet gjithashtu.

Trump dhe Biden tashmë në ndërtesën e Kongresit

Biden lë përfundimisht Shtëpinë e Bardhë

Trump dhe Biden udhëtojnë bashkë drejt Kongresit

Si do t’i qaset administrata e re Trump Kosovës?

Disa orë para përfundimit të mandatit të tij, Presidenti Joe Biden fali Dr. Anthony Faucin, gjeneralin në pension Mark Milley dhe anëtarët e Komisionit të Dhomës së Përfaqësuesve që hetoi sulmin e 6 janarit në Kapitol, duke përdorur fuqitë e jashtëzakonshme të postit për t’i mbrojtur ata nga “hakmarrja e mundshme” e administratës së ardhshme të Donald Trumpit.

Vendimi i zotit Biden vjen pasi Donald Trumpi paralajmëroi për një listë armiqsh me emra të atyre që e kanë sfiduar politikisht, ose kanë ndërmarrë hapa për ta mbajtur përgjegjës për përpjekjen e tij për të përmbysur rezultatin e zgjedhjeve të vitit 2020 dhe rolin e tij në sulmin ndaj Kapitolit të SHBA më 6 janar, 2021.

“Shpallja e këtyre faljeve nuk duhet të shihet si një pohim se këta individë kanë kryer ndonjë shkelje, dhe as nuk duhet të keqinterpretohet si pranim fajësie për ndonjë vepër penale”, tha zoti Biden në një deklaratë.

“Vendi ynë u detyrohet këtyre nëpunësve publikë një borxh mirënjohjeje për angazhimin e tyre të palodhur ndaj vendit tonë”, tha ai.

Faljet, të shpallura ndërsa kanë mbetur vetëm disa orë në presidencën e zotit Biden, kanë qenë temë e një debati të nxehtë prej muajsh në nivelet më të larta të Shtëpisë së Bardhë.

Është e zakonshme që një president të lëshojë falje në fund të mandatit të tij, por amistia zakonisht u ofrohet amerikanëve që janë dënuar për krime. Zoti Biden po e përdor këtë kompetencë në mënyrën më të gjerë dhe më të paprovuar të mundshme: për të falur ata që nuk janë hetuar ende. Vendimi hedh bazat për një përdorim edhe më të gjerë të faljeve nga zoti Trump dhe presidentët e ardhshëm.

Ndërsa Gjykata e Lartë vendosi vitin e kaluar se presidenti gëzon imunitet të gjerë nga ndjekja penale për ato që mund të konsiderohen akte zyrtare, këshilltarët dhe aleatët e presidentit nuk gëzojnë një mbrojtje të tillë.

Ekziston frika se Trump ose presidentët e ardhshëm mund të përdorin premtimin për një falje të plotë për të inkurajuar aleatët që të ndërmarrin veprime të cilave mund t’u rezistonin nga frika e pasojave nëse shkelnin ligjin.

“Këto janë rrethana të jashtëzakonshme dhe nuk më lejon ndërgjegjia të mos veproj,” tha zoti Biden, duke shtuar se “Edhe kur individët nuk kanë bërë asgjë të gabuar – dhe madje kanë bërë gjënë e duhur – dhe në fund e vërteta do të dalë, thjesht fakti i të qenit nën hetim ose ndjekja penale mund të dëmtojë në mënyrë të pariparueshme reputacionin dhe financat e dikujt.”

Dr. Fauci ishte drejtor i Institutit Kombëtar të Alergjisë dhe Sëmundjeve Infektive në Institutin Kombëtar të Shëndetit për gati 40 vjet, përfshirë gjatë mandatit të zotit Trump dhe më vonë shërbeu si këshilltar kryesor i zotit Biden për shëndetësinë deri kur doli në pension në 2022.

Ai ndihmoi në koordinimin e përgjigjes së vendit ndaj pandemisë COVID-19 dhe nxiti zemërimin e zotit Trump kur kundërshtoi këshillat e paprovuara shkencërisht të shëndetit publik të zotit Trump.

Zoti Fauci që atëherë është vënë në shënjestër të urrejtjes nga njerëzit e së djathtës, të cilët e fajësojnë atë për urdhrat përm përdorimin e maskave dhe politika të tjera që ata besojnë se shkelnin të drejtat e tyre, edhe pse qindra mijëra njerëz po vdisnin.

Mark Milley është ish-kryetari i Shtatmadhorisë së ushtrisë. Ai më pas e quajti zotin Trump fashist dhe detajoi qëndrimet e zotit Trump lidhu me ngjarjet e 6 janarit 2021.

Ai tha se është mirënjohës ndaj zotit Bidenit për faljen, pasi nuk i duhet të shqetësohet më për “hakmarrjen”. Zoti Biden fali gjithashtu anëtarët dhe këshilltarët e komisionit të 6 janarit që hetoi sulmin, si dhe oficerët e policisë së Kapitolit dhe të kryeqytetit Uashington që dëshmuan para komisionit për përvojat e tyre atë ditë, kur një turmë e zemëruar dhe e dhunshme e mbështetësve të zotit Trump sulmoi Kapitolin.

Biden, një institucionalist, ka premtuar një tranzicion të qetë drejt administratës së ardhshme, duke ftuar zotin Trump në Shtëpinë e Bardhë. Megjithatë ai paralajmëroi gjatë fjalimit të tij lamtumirës për një oligarki në rritje. Ai ka paralajmëruar prej vitesh se kthimi i zotit Trump në Shtëpinë e Bardhë do të ishte një kërcënim për demokracinë. Vendimi i tij për të thyer normat politike me faljet paravepruese u mor për shkak të këtyre shqetësimeve.

Zoti Biden ka vendosur rekordin presidencial për numrin më të madh të faljeve, përfshirë faljen e djalit të tij Hunter.

Ai njoftoi të premten se do të zbusë dënimet e pothuajse 2,500 personave të dënuar për vepra jo të dhunshme të lidhura me drogën. Ai më parë njoftoi se po ua lehtësonte dënimet 37 nga 40 personave të dënuar me vdekje e, duke i kthyer dënimet e tyre në burgim të përjetshëm vetëm disa javë përpara se zoti Trump, një përkrahës i hapur i zgjerimit të dënimit me vdekje, të merrte detyrën.

Gerald Ford i dha një “falje të plotë dhe absolute” në vitin 1974 paraardhësit të tij, Richard Nixon, për skandalin Watergate.

Ai besonte se një gjyq i mundshëm do të “shkaktonte debat të zgjatur dhe përçarje” dhe se zoti Nixon e kishte paguar “me dënimin e paprecedentë të heqjes dorë nga posti më i lartë i Shteteve të Bashkuara”, siç shkruhet në shpalljen e faljes.

Donald Trumpi kthehet në presidencën amerikane të hënën me një ceremoni inaugurimi në Uashington, që do ta bëjë atë presidentin e parë i cili do të shërbejë në mandate jo të njëpasnjëshme që nga vitet 1890.

Miliona amerikanë pritet ta ndjekin në televizion ndërsa 78-vjeçari Donald Trump bën betimin për një mandat të ri katërvjeçar në Shtëpinë e Bardhë, ndërsa Presidenti Joe Biden, 82 vjeç, largohet nga presidenca pas një mandati të vetëm.

Ceremonia e inaugurimit do të jetë një ngjarje në një rreth më të ngushtë për shkak të motit të ftohtë, me rreth 600 pjesëmarrës që do të jenë dëshmitarë të ndryshimit të pushtetit brenda Kapitolit, në vend të ngjarjes tipike në mjedis të hapur për të cilën 250,000 veta kishin siguruar biletat.

Parakalimi tradicional i inaugurimit përgjatë rrugës Pensilvania nga Kapitoli në Shtëpinë e Bardhë është anuluar gjithashtu për shkak të motit. Zoti Trump pas betimit do të shfaqet më pak se tre kilometra larg Kapitolit në një pallat sporti dhe koncertesh me kapacitet prej 20,000 personash.

Zoti Trump u zotua të dielën vonë të “veprojë me shpejtësi dhe forcë historike dhe të zgjidhë çdo krizë me të cilën përballet vendi ynë”, ndërsa u foli mbështetësve të tij në Uashington.

“Nesër në mesditë, bie perdja mbi katër vitet e gjata të rënies amerikane dhe ne fillojmë një ditë krejt të re të fuqisë dhe begatisë amerikane”, tha zoti Trump.

Ai është zotuar të nënshkruajë një mori urdhrash ekzekutivë pas marrjes së detyrës, përfshirë ato që zhbëjnë politikat e administratës së Presidentit Biden. Ndër zotimet e tij të spikatura gjatë fushatës elektorale ishte ai për dënimet masive të atyre që ndodhen ilegalisht në vend.

Zoti Trump është zotuar gjithashtu se do të vendosë shpejt tarifa të larta ndaj partnerëve kryesorë tregtarë, përfshirë Kanadanë, Kinën dhe Meksikën.

Presidenti i zgjedhur thotë se ka në plan të falë shumë nga 1500 mbështetësit e tij që sulmuan ndërtesën e Kapitolit më 6 janar 2021, në përpjekje për të bllokuar Kongresin që të vërtetojë se zoti Biden fitoi zgjedhjet e vitit 2020. Zoti Trump i ka quajtur të arrestuarit dhe të dënuarit “patriotë” dhe “pengje” të përndjekur gabimisht.

Akuzat se republikani Donald Trump u përpoq të përmbyste në mënyrë të paligjshme rezultatin e zgjedhjeve të vitit 2020, u hoqën pas fitores së tij në zgjedhjet e vitit 2024, për shkak të një politike të Departamentit të Drejtësisë kundër ndjekjes penale të presidentëve në detyrë.

Zoti Trump u zotua për muaj të tërë t’i jap fund luftës së Rusisë kundër Ukrainës përpara se të marrë detyrën, por ditët e fundit ndihmësit e tij kanë thënë se synimi tani është të përpiqet të arrijë një armëpushim në 100 ditët e para të administratës së tij.

Kur Donald Trumpi të betohet si presidenti i 47-të i vendit, në Shtëpinë e Bardhë do të ndodhin një seri gjërash në prapaskenë. Për rreth gjashtë orë, sendet personale të Presidentit në largim Joe Biden dhe familjes së tij do të hiqen nga rezidenca ekzekutive. Ndërkohë, siç njofton korrespondentja e Zërit të Amerikës, Dora Mekouar, rezidenca private do të shndërrohet në shtëpinë e presidentit të sapobetuar.

Në momentin që Joe Biden largohet nga Zyra Ovale për herë të fundit – zakonisht në mëngjesin e ditës së inaugurimit – punonjësit e Shtëpisë së Bardhë hidhen në veprim. Zyra e mirënjohur duhet të riorganizohet, sipas shijeve të presidentit të ardhshëm.

“Si u pëlqen që të jetë e pajisur Zyra Ovale? Çfarë tapeti? Çfarë perdesh, çfarë tavoline, etj, sepse kjo është zona e parë që përgatitet“, thotë Angella Reid, ish-punonjëse në Shtëpinë e Bardhë.

Fotot tregojnë se Presidenti Biden ndryshoi tapetin dhe disa karrige në vitin 2017, pasi mori drejtimin nga Donald Trump-i – që është pararendësi dhe pasardhësi i tij.

Por duket se kolltukët dhe perdet kanë mbetur të njëjtat.

Familja e presidentit jeton në katin e dytë dhe të tretë të Shtëpisë së Bardhë.

Përpara ditës së zhvendosjes, presidenti i ardhshëm dhe zonja e parë përzgjedhin mobiljet dhe veprat e artit që dëshirojnë nga koleksioni i Shtëpisë së Bardhë. Në kohën kur presidenti i ri mbërrin në shtëpi në Ditën e Inaugurimit, i gjen të vendosura mobiljet, së bashku me fotot personale.

“Kur hyjnë presidenti i ri dhe zonja e parë, ata gjejnë shampon e tyre të preferuar në dush. Kanë furçën e dhëmbëve, pastën e dhëmbëve, rrobat e tyre të varura në dollap“, thotë Kate Andersen Brower, autore e librit “Rezidenca” (“The Residence”).

Gjithçka ndodh në më pak se gjashtë orë dhe për këtë angazhohen rreth njëqind punonjës të Shtëpisë së Bardhë.

“Nuk realizohet nga profesionistë të ndonjë firme private. Është personeli i rezidencës që e bën këtë. Pra ndihmojnë të gjithë dhe këta nuk janë njerëz që janë të trajnuar për zhvendosjen. Nuk punësohen profesionistë për shkak të shqetësimeve të sigurisë“, thotë zonja Brower.

Shumë nga personeli i rezidencës së Shtëpisë së Bardhë punuan për Donald Trump-in gjatë mandatit të tij të parë nga janari 2017 deri në janar 2021.

“Pra, punonjësve vërtet u pëlqente Donald Trump-i, sepse ai është mësuar të ketë njerëz përreth që i shërbejnë // dhe, ai madje u jepte bakshish në para të thata, me kartëmonedha 20-ëshe dhe 50-ëshe dhe ata e vlerësojnë këtë. Ata nuk janë persona politikë. U intereson vetëm se si i trajton presidenti”, thotë zonja Brower.

Presidenti Barack Obama e punësoi zonjën Angella Reid si drejtuese për shërbimet në Shtëpinë e Bardhë në vitin 2011. Ajo mbikëqyri ditën e zhvendosjes në janar 2017, kur u largua familja Obama dhe hyri familja Trump.

“Përdornim termin ‘kaos i organizuar’, por në të vërtetë është një operacion shumë i koordinuar. // Bëhen prova disa herë për atë ditë; të gjithë mezi presin të vijë momenti“, tregon zonja Reid.

Kishte disa probleme, si për shembull mund të përdorej vetëm një ashensor.

“Ashensori nuk përdorej në maksimum. E korrigjova këtë dhe fituam një orë kohë. Kishte raste për shembull kur dysheku i caktuar për ndonjë dhomë nuk ishte në madhësinë e duhur“, thotë zonja Reid.

Por sfida kryesore është gjithmonë kufizimi kohor. Dhe ka vetëm rreth gjashtë orë për të bërë gjithçka gati, për ta mirëpritur familjen e re presidenciale në shtëpinë e tyre të re.

Presidenti i zgjedhur Donald Trump do të bëjë betimin brenda Kapitolit të hënën më 20 janar, për shkak të parashikimeve se moti do të jetë me temperatura jashtëzakonisht të ulëta.

“Sipas parashikimit të motit për Uashingtonin, ndikuar edhe nga era, do të ketë temperatura në nivele rekord të ulëta”, shkruajti zoti Trump në një postim në platformën “Truth Social”.

“Nuk dua në asnjë mënyrë që njerëzit të kenë pasoja”, theksoi presidenti i zgjedhur Trump.

Gjatë përgatitjeve, si alternativë për çdo inaugurim gjithmonë merren masat që presidenti i zgjedhur ta bëjë betimin në ambientet e brendshme në rast të motit të keq.

Hera e fundit kur një president e ka bërë betimin në ambientet e brendshme ka qenë viti 1985, kur Presidenti Ronald Reagan filloi mandatin e tij të dytë.

Ndërkohë po shyrtohen plane alternative për më shumë se 250 mijë të ftuarit me bileta për të parë inaugurimin dhe dhjetëra mijëra të tjerë që pritet të jenë në rrugë për të ndjekur ceremoninë apo për të parë paradën.

Shërbimi Kombëtar i Motit parashikon që temperatura të jetë rreth minus-6 garë celsius në mesditën e 20 janarit, kur bëhet edhe betimi.

Në vitin 1985 kur presidenti Regan bëri betimin për mandatin e tij të dytë temperaturat u ulën në -14 gradë celsius. Në vitin 2009 kur Barack Obama bëri betimin temperature ishte -2 gradë celsius.

Presidenti Joe Biden e shfrytëzoi fjalimin e tij të lamtumirës drejtuar amerikanëve të mërkurën për të paralajmëruar për një “oligarki” të ultra të pasurve që po hedh themelet në vend dhe për një “sektor të industrisë së teknologjisë” që po cenon të drejtat e amerikanëve dhe të ardhmen e demokracisë.

Duke folur nga Zyra Ovale teksa përgatitet t’i dorëzojë pushtetin Presidentit të zgjedhur Donald Trump të hënën, zoti Biden dha alarmin, për siç tha ai, akumulimin e pushtetit dhe pasurisë tek një grup i vogël individësh.

“Sot, një oligarki me pasuri, fuqi dhe ndikim ekstrem po merr formë në Amerikë, çka përbën kërcënim për demokracinë tonë, të drejtat dhe liritë tona themelore dhe dëmton të drejtën që të gjithë të përparojnë”, tha zoti Biden.

Ai tërhoqi vëmendjen për “një përqendrim të rrezikshëm të pushtetit në duart e disa individëve ultra të pasur dhe pasojat e rrezikshme nëse shpërdorimi i tyre i pushtetit nuk vihet nën kontroll”.

Duke përsëritur paralajmërimet e Presidentit Dwight Eisenhower lidhur me sektorin ushtarako-industrial në fjalimin kur u largua nga detyra në vitin 1961, zoti Biden shtoi, “Jam po aq i shqetësuar për fuqizimin e sektorit teknologjiko-industrial që mund të paraqesë rreziqe të vërteta për vendin tonë”.

Alarmi i zotit Biden vjen pasi disa nga individët më të pasur në botë dhe titanët e industrisë teknologjike muajt e fundit janë rreshtuar përkrah zotit Trump, kryesisht pas fitores së zgjedhjeve të nëntorit.

Miliarderi Elon Musk shpenzoi më shumë se 100 milionë dollarë për të ndihmuar republikanin Trump që të fitojë zgjedhjet. Drejtues të tjerë të lartë, si Mark Zuckerbeg i kompanisë META dhe Jeff Bezos i firmës Amazon, kanë dhuruar para për komisionin e inaugurimit të presidentit të ri dhe janë takuar me zotin Trump në rezidencën e tij në Florida.

Më herët gjatë ditës së mërkurë, Presidenti Biden lajmëroi arritjen e një marrëveshjeje të shumëpritur armëpushimi mes Izraelit dhe Hamasit, çka mund t’i japë fund gjakderdhjes në Lindjen e Mesme.

Por Presidenti Biden nuk po largohet nga Shtëpia e Bardhë në mënyrën që ai shpresonte. Ai kandidoi për një mandat të dytë, duke lënë mënjanë shqetësimet e votuesve për moshën e tij. Pas një paraqitjeje të dobët në debatin me kundërshtarin e tij republikan Donald Trump, nën trysninë e Partisë Demokrate Presidenti Biden hoqi dorë nga gara për një mandat të dytë. Ai mbështeti Nënpresidenten Kamala Harris, e cila humbi përballë zotit Trump në zgjedhjet e nëntorit.

Ndërkohë, Presidenti Biden po përgatitet t’i dorëzojë Shtëpinë e Bardhë një individi të cilin e cilësoi si kërcënim ekzistencial për institucionet demokratike në vend.

Në një letër të hapur të publikuar të mërkurën, Presidenti Biden e pranoi nuk i kishte realizuar premtimet e tij.

“Kandidova për president sepse besoja se shpirti i Amerikës ishte në rrezik. Vetë natyra se kush jemi ishte në rrezik dhe kjo ende vazhdon të jetë”, thuhet në letrën e zotit Biden.

Më tej në letër, Presidenti Biden theksonte arritjet e tij, duke përfshirë drejtimin e vendit dhe luftën kundër pandemisë së koronavirusit, mbështetjen e prodhimit brenda vendit dhe uljen e kostos së barnave me recetë.

Fjalimi prej 15 minutash i zotit Biden mbrëmjen e së mërkurës jo vetëm që shënon fundin e presidencës së tij, por edhe pesë dekadat e tij në politikë. Pas zgjedhjes në moshën 30-vjeçare për të përfaqësuar shtetin e tij të lindjes Delauer në vitin 1972, zoti Biden ishte senatori më ri.

Zoti Biden kandidoi për postin e presidentit në vitet 1988 dhe 2008 përpara se të bëhej nënpresident pas fitores së demokratit Barack Obama. Pasi shërbeu 8 vjet në postin e nënpresidentit, zoti Biden u konsiderua se i kishte dhënë fund politikës. Por ai u kthye në skenën politike në vitin 2020, duke larguar me sukses Presidentin Trump nga Shtëpia e Bardhë.

Presidenti i zgjedhur Donald Trump tha të hënën se do të takohet me Presidentin rus Vladimir Putin “shumë shpejt” pasi të ketë marrë detyrën, javën e ardhshme.

Zoti Trump nuk dha një afat kohor se kur mund të mbahej takimi, i cili do të ishte i pari mes udhëheqësve të të dy vendeve që kur Rusia nisi sulmin në shkallë të gjerë ndaj Ukrainës në shkurt të vitit 2022.

Kur u pyet mbi strategjinë e tij për t’i dhënë fund luftës, zoti Trump i tha televizionit Newsmax se “ka vetëm një strategji dhe ajo varet nga Putini dhe nuk ma do mendja se është shumë entuziast për mënyrën se si ka shkuar lufta sepse nuk ka shkuar mirë as për atë”, tha zoti Trump.

“E di se ai do të më takojë dhe unë do ta takoj shumë shpejt. Do ta kisha takuar më parë, por duhet marrë detyra. Për disa gjëra, është më mirë të kesh marrë detyrën”, tha Presidenti i zgjedhur.

Ligjvënësi Mike Waltz,i cili pritet të jetë këshilltari i ri për Sigurinë Kombëtare tha të dielën se pritet që të ketë një bisedë telefonike mes zotit Trump dhe zotit Putin “në ditët apo javët e ardhshme”.

Zjarret vdekjeprurëse në zonën e Los Anxhelosit po vazhdojnë prej një jave mes përpjekjeve të zjarrfikësve për t’i vënë ato nën kontroll. Të paktën 24 persona kanë humbur jetën prej tyre. Zyrtarët thonë se më shumë se 7,000 objekte, shtëpi banimi, shkolla dhe biznese, janë djegur deri tani. Një prej tyre është shtëpia zjarrfikësit Isaac Baeza dhe familjes së tij, e cila u dogj plotësisht nga zjarri në qytetin e Altadenës.

Baeza, një zjarrfikës me më shumë se 20 vjet përvojë, thotë se zjarri ka qenë i pashembullt.

“Kurrë nuk kam parë një forcë natyre si kjo, erëra dhe thatësirë të tillë”, thotë ai për Zërin e Amerikës.

Gruaja e Baezas, Rosary kujton se si morën një njoftim evakuimi të martën në mbrëmje, por nuk menduan që nuk do të gjenin më asgjë: zjarri dukej larg dhe i vogël, ata paketuan vetëm disa sende.

Në mëngjes, Baeza dhe një shok i tij u kthyen në përpjekje për të shpëtuar shtëpinë, por nuk kishte ujë.

“Ne menduam se mund ta shpëtonim shtëpinë, por zbuluam që nuk kishte ujë. Flakët po përhapeshin me shpejtësi dhe unë u largova me makinë. Mbaj mend që nga pasqyra munda të shoh pjesën e pasme të shtëpisë duke marrë flakë dhe mendoja: Ndoshta nëse do të kisha pasur ujë, do të kisha mundur t’i shuaja këto zjarre të vogla dhe ndoshta shtëpia ime nuk do të ishte djegur”, thotë ai.

Ekipet e zjarrfikësve kanë hasur mungesë uji ose presion të ulët të tij, në përpjekje për të shuar këtë vatër zjarri në Altadena dhe një tjetër, më të madhe në zonën Palisades. Guvernatori i Kalifornisë Gavin Newsom ka njoftuar për një hetim për këtë çështje.

Aktualisht zjarret në Los Anxhelos, janë shtrirë në një sipërfaqe prej rreth 150 kilometrash katrorë. Më shumë se 150,000 vetë kanë marrë urdhër evakuimi. Erërat e thata dhe të shpejta të Santa Anas, që përhapin flakët, po fuqizohen sërish të hënën, thotë shefja e zjarrfikësve të Los Anxhelesit, Kristin Crowley.

“Paralajmërimi për rrezikshmëri të lartë është në fuqi deri në orën 18:00, të mërkurën në mbrëmje. Erërat e forta të Santa Anas pritet gjithashtu të zgjasin deri të mërkurën dhe erërat më të forta do të jenë të martën”.

Familja e zotit Baeza po qëndron me disa miq, duke pritur pagesën nga kompanitë e sigurimeve. Ata thonë se kanë në plan ta rindërtojnë shtëpinë.

“Të gjithë do të kthehemi dhe do të rindërtojmë, ne dhe fqinjët tanë. Ky është komuniteti ynë. Fëmijët tanë luanin në fund të rrugës me fëmijët e tjerë. I festonim ditëlindjet bashkë. Jemi shumë të afërt”, thotë gruaja e tij Rosary Villegas.

Komuniteti i Los Anxhelosit është bashkuar në këtë kohë fatkeqësie për të ndihmuar familjet e zhvendosura, si dhe për të mbështetur zjarrfikësit. Strehat për të evakuuarit dhe stacionet e zjarrfikësve janë të stërmbushura me ushqime dhe rroba, saqë autoriteteve u është dashur të njoftojnë se tani po pranojnë vetëm dhurime monetare.

Rreth 600 mijë shtetas nga Venezuela dhe më shumë se 230 mijë të tjerë nga El Salvadori që aktualisht jetojnë në Shtetet e Bashkuara mund të qëndrojnë në vend ligjërisht edhe për 18 muaj të tjerë, njoftoi të premten Departamenti amerikan i Sigurisë Kombëtare, më shumë se një javë para se Presidenti i zgjedhur Donald Trump të marrë detyrën me premtimin për politika më të ashpra ndaj emigracionit.

Administrata e Presidentit Biden ka përkrahur fort Statusin e Mbrojtjes së Përkohshme, përfitues të të cilit janë rreth 1 milionë njerëz nga 17 vende të ndyshme.

Statusi i Mbrojtjes së Përkohshme, i njohur me inicialet TPS, lejon individët që ndodhen aktualisht në Shtetet e Bashkuara që të qëndrojnë dhe punojnë në mënyrë të ligjshme në SHBA në rast se atdheu i tyre konsiderohet i pasigurtë, për shkak të fatkeqësive natyrore, konflikteve të armatosura apo ngjarjeve të tjera të jashtëzakonshme.

E ardhmja e programit të ‘Statusit të Mbrojtjes së Përkohshme’ është e pasigurt nën drejtimin e Presidentit Trump, i cili u përpoq të kufizonte ndjeshëm përdorimin e tij gjatë mandatit të parë si President.

Ekipi i tranzicionit të Presidentit të zgjedhur Trump nuk iu përgjigj një kërkese për koment nga agjencia Reuters deri në publikimin e këtij lajmi.

Departamenti amerikan i Sigurisë Kombëtare zgjati afatin e qëndrimit në SHBA edhe për 103 mijë shtetas nga Ukraina dhe 1900 nga Sudani, që tanimë jetojnë në Shtetet e Bashkuara.

Për José Palma, një 48-vjeçar nga El Salvadori, i cili jeton në SHBA që prejv itit 1998, vendimi do të thotë se të paktën tani për do të vazhdojë të punojë ligjërisht në Hjuston. Ai është i vetmi person në familjen e tij me status të përkohshëm; katër fëmijët e tij kanë lindur në SHBA dhe kanë shtetësi amerikane dhe bashkëshortja e tij ka marrë statusin e banores së përheshme në Shtetet e Bashkuara. Nëse afati i programit TPS nuk do të zgjatej, ai mund të dëbohej dhe ndahej nga pjesa tjetër e familjes. “Më sjell pak paqe. Më ofron pak qëndrueshmëri”, shprehet ai.

Ky status i lejon individët që të qëndrojnë ligjërisht në vend, por nuk u siguron atyre një rrugë afatgjatë drejt marrjes së shtetësisë. Ata varen nga qeveria, nëse do ta rinovojë statusin e tyre kur të skadojë. Kritikët konservatorë kanë thënë se me kalimin e kohës, rinovimi i ndodh automatikisht, pavarësisht gjendjes në vendin e origjinës së personit.

Njoftimi i së premtes, i cili erdhi pasi Presidenti i Venezuelës Nicolás Maduro mori detyrën për një mandat të tretë gjashtëvjeçar, “bazohet në emergjencën e rëndë humanitare me të cilën vazhdon të përballet vendi për shkak të krizave politike dhe ekonomike nën regjimin e Maduros”, tha Departamenti amerikan i Sigurisë Kombëtare

Ky Departament përmendi “kushtet mjedisore në El Salvador që pengojnë individët të kthehen”, veçanërisht shirat e dendur dhe stuhitë në dy vitet e fundit.

Presidenti i zgjedhur Donald Trump dhe Nën Presidenti i zgjedhur, JD Vance kanë sugjeruar se do kufizojnë përdorimin e programit TPS dhe politikave që japin status të përkohshëm ndërsa zbatohet politika për dëbimet masive.

Në muajt e fundit, aktvitistët kanë shtuar trysninë ndaj administratës Biden për të kërkuar zgjatje të pragamit TPS për ata që tashmë janë përfitues si edhe për të mbrojtur njerëzit nga vende të tjera si Guatemala dhe Ekuadori.

Gjykatësi i Nju Jorkut Juan Merchant vendosi që Presidenti i zgjedhur Donald Trump, të mos vuajë masë dënimi për çështjen e Nju Jorkut. Kjo do të thotë që ai është i dënuar zyrtarisht dhe kjo është pjesë e historisë së tij penale, por se nuk do të marrë dënim me burg, ose pasoja të tjera ndëshkuese. Zoti Trump dhe avokati i tij morën pjesë në seancën e dënimit përmes një videolidhjeje. Donald Trump do të betohet më 20 janar si i vetmi President i Shteteve të Bashkuara me dënim penal për krime.

Presidenti i zgjedhur Donald Trump shfrytëzoi të gjitha mundësitë ligjore për apelim dhe madje kërkoi nga Gjykata e Lartë që të bllokonte dhënien e dënimit lidhur me një nga gjyqet e tij të profilit më të lartë. Por të enjten vonë, Gjykata e Lartë hodhi poshtë kërkesën e tij për shtyrjen e dënimit.

Zoti Trump u shpall fajtor nga një juri më 30 maj të vitit 2024 për 34 akuza penale në lidhje me falsifikimin e të dhënave të biznesit, me qëllim fshehjen e një pagese prej 130 mijë dollarësh për të fituar heshtjen e një aktoreje të filmave pornografikë, pak përpara zgjedhjeve presidenciale të vitit 2016.

“Ky ishte një turp”, tha zoti Trump pas përfundimit të këtij gjyqi.

Analistët politikë si Shannon Bow O’Brien nga Universiteti i Teksasit thonë se kjo çështje ishte personale për zotin Trump.

“Atij nuk i pëlqen të pranojë fajin, dobësitë apo mangësitë”, thotë ajo.

Gjykatësi i Nju Jorkut, Juan Merchan, i cili kryesoi gjyqin, ka refuzuar kërkesat për shtyrjen e dënimit, por gjithashtu ka thënë më parë se nuk do ta dënonte me burg ish-presidentin.

“Mendoj se synimi i vëtetë është që të përçohet mesazhi se askush nuk është mbi ligjin dhe që procesi të çohet deri në fund”, thotë eksperti Gary Rose nga Universiteti Sacred Heart.

Një gjykatëse e emëruar nga zoti Trump këtë javë bllokoi përkohësisht kërkesat e Departamentit të Drejtësisë për publikimin e raporteve përfundimtare të dy hetimeve nga Prokurori i Posaçëm Jack Smith. Të dyja çështjet kanë të bëjnë me mbajtjen e dokumenteve sekrete dhe ndërhyrjen në zgjedhje që kulmoi me sulmin e 6 janarit në Kapitol.

Këtë javë, presidenti i zgjedhur ritheksoi mendimin e tij se prokurori Smith ishte emëruar në mënyrë të paligjshme.

“Ai u tërhoq nga çështja me turp. Pse duhet të lejohet të shkruajë një raport të rremë? Do të ishte vetëm një raport i rremë”, tha ai.

Prokurorëve të posaçëm u kërkohet me ligj që të përpilojnë raporte përmbledhëse. Prokurori i Përgjithshëm i Shteteve të Bashkuara tha se do të publikonte raportin e prokurorit Smith mbi sulmin e 6 janarit në Kapitol. Bërja publike e këtij raporti mund të pengojë përpjekjet e zotit Trump për të falur personat e arrestuar për këtë sulm.

“Publikimi i raportit mund të nxjerrë në dritë faktin që shumë nga veprimet e 6 janarit ishin të planifikuara, keqdashëse dhe kriminale. Kjo do ta bënte atë të dukej se ai po falë aktivitetin kriminal të këtyre njerëzve”, thotë ekspertja Shannon Bow O’Brien nga Universiteti i Teksasit në Austin.

Çështja e kartërt penale ka të bëjë me ndërhyrjen në zgjedhje në shtetin e Xhorxhias. Prokurorja u detyrua të tërhiqej nga kjo çështje për shkak të një marrëdhënieje të papërshtatshme me një punonjës. Pra, çështja është bllokuar derisa të pushohet apo të caktohet një prokuror tjetër.

“Mendoj se votuesit në të vërtetë shpresojnë që e gjithë kjo gjë të marrë fund dhe se tani ne mund të fillojmë përsëri me një mandat të dytë të zotit Trump”, thotë eksperti Gary Rose.

Mandati i dytë i Presidentit të zgjedhur Trump fillon të hënën, më 20 janar.

Funerali i qytetit të lindjes së ish-Presidentit Carter u mbajt në Kishën Baptiste Maranatha të enjtën në mbrëmje, para se në shoqërinë e familjes dhe pastorit të tij ai të varrosej pranë gruas së tij të ndjerë Rosalynn Carter në Plains të Xhorxhias.

Kisha e vogël ofroi një kontrast të fortë me madhështinë e funeralit shtetëror të enjten në Katedralen Kombëtare të Uashingtonit. Pastori personal i ish-Presidentit Carter, Tony Lowden, theksoi besimin e thellë të krishterë të ish-Presidentit Carter, duke vënë në dukje vazhdimisht përkushtimin e tij ndaj mësimeve të Jezu Krishtit.

Pastori Lowden u bëri thirrje anëtarëve të kishës t’i bënin vetes dhe të tjerëve pyetjet që ai tha se Carter i bënte gjithmonë: “Ku ke qenë? Çfarë keni bërë? Kë keni ndihmuar? Dhe si mund t’ju ndihmoj?”

Pastori falënderoi infermieret që u kujdesën për ish-Presidentin Carter dhe të tjerët që ishin pranë tij gjatë jetës së tij.

Arkivoli i ish-Presidentit Carter u largua nga kisha në shoqërinë e këngëve të krishtera “It is Well With My Soul” dhe “Old Rugged Cross”.

Të paktën pesë njerëz kanë vdekur nga zjarret që kanë kapluar një pjesë të konsiderueshme të Los Anxhelosit. Rreth 2 mijë struktura, përfshirë shumë shtëpi janë shkatërruar thellë në zemër të industrisë amerikane të filmit. Erërat që arritën shpejtësinë 160 kilometra e kanë përhapur zjarri në një sipërfaqe të madhe, duke arritur në lagjen e mirënjohur ‘Hollywood Hills’ vazhdon të shkatërrohet nga zjarret, njëri prej të cilëve vlerësohet si më i rëndi në historinë e qytetit. Në mes të shumë shtëpive që janë djegur në tërësi përfshihen edhe rezidencat e një mori yjesh të njohura të Hollivudit.

Auroritetet vazhduan përpjekjet për të shuar zjarret masive në orët e para të së enjtes në zonën e Los Anxhelosit që shkatërruan komunitete të tëra.

Mbi 100 mijë njerëz janë detyruar të largohen nga shtëpitë e tyre. Zjarret që filluan të martën kanë shkaktuar tashmë disa vdekje dhe kanë shkatërruar rreth 2 mijë struktura.

Pamjet dramatike kanë vazhduar gjatë natës deri në orët e para të mëngjesit.

Kalimtarë të rastit u munduan ta shpëtojnë një shtëpi e cila rrezikonte të digjej nga flakët që kishte përfshirë një palmë aty pranë. Kalimtarët komunikuan me banorët e evakuuar të shtëpisë për t’i lejuar të hipin në çati të hedhin ujë mbi pemën që të mos lejonin përhapjen e zjarrit në tërë lagjen. Shumë situata të ngjashme janë publikuar gjithandej në rrjete sociale.

Banorët në qendër të Los Anxhelosit dolën në bulevardin e njohur të Hollivudit ku gjenden disa prej pikave më të njohura të industrisë së filmit për të parë zjarrin që i afrohej qytetit.

“Unë jam shumë e frikësuar sepse kishim një inspektim sot dhe na thanë që zjarret nuk do të kenë mundësi të kalojnë mbi kodra. Kur dolëm këtu në bulevard, fillova të qaja. Është vërtet e frikshme. E di që është më e frikshme për njerëzit që kanë humbur shtëpitë e tyre, por është vërtet e frikshme të mendosh se zjarri është kaq afër nesh”, thotë Allison Martin, banore e qytetit.

Imazhet nga hapësira tregojnë shpërndarjen e zjarrit duke kapluar qytetin dhe zonat përreth ndërsa pamjet që tregojnë situatën para dhe pas zjarreve tregojnë nivelin e shkatërrimeve masive.

Presidenti Joe Biden shpalli gjendjen e jashtëzakonshme për Kaliforninë që autorizon fonde dhe burime të tjera për katastrofën. Shtëpia e Bardhë gjithashtu njoftoi se Presidenti Biden anuloi një vizitë të planifikuar më parë për në Itali për shkak të situatës në Los Anxhelos.

“E di se bota po shikon imazhet e shkatërrimit të qytetit tonë. Unë pashë fushat e betejës me zjarrin dhe ato janë tronditëse”, tha në orët e vona të së mërkurës kryetarja e bashkisë së qytetit Karen Bass.

Deri të enjten në mëngjes, katër zjarre ishin ende aktive në Los Anxhelos, përfshirë edhe kodrat në pjesën perëndimore ku gjenden shumica e rezidencave të yjeve të njohura të Hollivudit.

Në mesin e atyre shtëpitë e të cilëve u janë djegur në tërësi janë edhe aktorët Billy Crystal dhe Mandy Moore. Zyrtarët e qytetit treguan se situata po ndryshon nga çasti në çast.

“Momentalisht zjarri ka kapluar një hapësirë mbi 6300 hektarësh. Dua ta bëj të qartë se ky incident është shumë dinamik dhe situata po ndryshon nga çasti në çast”, tha Kristin Crowley, shefja e departamentit të zjarrfikësve të Los Anxhelosit.

Kalifornia po kalon atë që njihet si sezoni i zjarreve në male. Ky sezon megjithatë ka filluar më herët dhe do të marrë fund më vonë si pasojë e rritjes së temperaturave dhe thatësirës për shkak të ndryshimeve mjedisore.

Shirat që zakonisht përfundojnë sezonin e zjarreve po vonohen, që do të thotë se zjarret mund të vazhdojnë të digjen edhe gjatë muajve të dimrit.

Ndërsa autoritetet po përballen me zjarret masive, republikanët dhe demokratët kanë këmbyer akuza për situatën. Republikanët, përfshirë Presidentin e zgjedhur Donald Trump kanë akuzuar udhëheqjen demokrate të Kalifornisë dhe Los Anxhelosit për keqmenaxhim të situatës, ndërsa demokratët kanë akuzuar rivalët e tyre se po shfrytëzojnë tragjedinë për qëllime politike.

UASHINGTON – Presidenti i zgjedhur Donald Trump mbërriti në Senatin amerikan të mërkurën me synimin për të bashkuar republikanët rreth një strategjie për uljen e taksave, për kontrollet kufitare dhe rritjen e prodhimit të karburanteve fosile, 12 ditë përpara se të rikthehet në Shtëpinë e Bardhë.

Zoti Trump hyri në Kapitolin e Shteteve të Bashkuara për herë të parë që kur mbështetësit e tij sulmuan ndërtesën më 6 janar 2021, bazuar në pretendimet për manipulimin e zgjedhjeve të vitit 2020.

Ai bëri nderimet e tij me një vizitë tek arkivoli i ish-Presidentit Jimmy Carter në hollin e Kapitolit, përpara se të takohej me republikanët, që kanë një shumicë 53-47 në Senat. Presidenti i zgjedhur Trump do të marrë pjesë në funeralin e ish-Presidentit Carter të enjten në Uashington.

Me një shumicë të ngushtë në Senat dhe Dhomën e Përfaqësuesve, republikanët ende nuk kanë rënë dakord nëse duhet të ndjekin një projektligj që përmban përparësitë e tij, ose dy projektligje, si dhe duket se kanë pikëpamje të ndryshme rreth asaj që legjislacioni duhet të përmbajë.

Disa senatorë republikanë kanë argumentuar se duhet ta ndajnë axhendën e zotit Trump në dy projektligje, duke i lejuar ata të arrijnë një sukses të shpejtë për politikën kufitare dhe energjitike, përpara se të merren me çështjen më të mprehtë, atë të taksave. Disa republikanë të Dhomës së Përfaqësuesve paralajmërojnë se, duke patur parasysh shumicën e tyre të ngushtë, përqasja me dy hapa rrezikon të dështojë në miratimin e projektligjit të dytë, që zgjat uljen e taksave të miratuara gjatë mandatit të parë të Presidentit Trump.

“Po shqyrtojmë nëse do jetë një apo dy projektligje. Çfarëdo që të jetë, nuk ka rëndësi, ne do të marrim rezultatin”, u tha Presidenti i zgjedhur Trump gazetarëve, ndërsa po ecte në Kapitol.

Ata gjithashtu do të duhet të merren me mënyrën se si të kompensojnë efektet e uljeve të reja të taksave tek borxhi në rritje i vendit prej 36 trilionë dollarësh.

Në një shenjë të mundshme të zhvillimeve që do të vijojnë, zotit Trump iu desh të ndërhynte në Dhomën e Përfaqësuesve javën e kaluar, kur Kryetari Mike Johnson fillimisht nuk pati votat e nevojshme për rizgjedhjen në postin e tij të lartë. Pas gati dy orësh negociatash, një telefonatë nga Presidenti i zgjedhur Trump ndihmoi që dy kundërshtarë republikanë të linjës së ashpër, të ndryshojnë qëndrimet e tyre dhe të mbështesin zotin Johnson.

“Asgjë nga këto nuk ndodh pa udhëheqjen e Shtëpisë së Bardhë. Diferenca është thjesht shumë e vogël”, u tha gazetarëve senatori republikan Thom Tillis. “Presidenti Trump merr statusin e kapitenit për zgjidhjen e votimit për kryetarin. Dhe ne do të kemi nevojë që ai ta vazhdojë këtë rol, për t’i përfunduar këto projektligje. Është e logjikshme”.

Të premten, presidenti i zgjedhur do të fillojë takime treditore me republikanët e Dhomës së Përfaqësuesve në rezidencën e tij Mar-a-Lago, në Florida.

“Ai duhet të dëgjojë se cilat janë përshtypjet tona për sa i përket mënyrës se si do të arrijmë atje ku të gjithë duam të shkojmë”, tha senatorja Shelley Moore Capito, që ishte organizatorja e takimit të së mërkurës.

Republikanët synojnë të mbështesin axhendën e zotit Trump duke përdorur një manovër komplekse legjislative, që do t’i lejojë ata të anashkalojnë opozitën demokrate në Senat. Shumica republikane, 53-47 në Senat, është shumë e ngushtë për të kapërcyer pragun prej 60 votash që duhen në këtë dhomë për pjesën më të madhe të ligjeve.

Në Dhomën e Përfaqësuesve, një shumicë prej 219 vendesh pritet të zvogëlohet në 217-215 pasi Presidenti i zgjedhur Trump të marrë detyrën në më pak se dy javë. Dy ligjvënës republikanë janë të gatshëm të largohen nga Kongresi dhe t’i bashkohen administratës së tij.

Mijëra njerëz u përballën me temperaturat e ftohta për të shkuar në Kapitolin e Shteteve të Bashkuara për të nderuar ish-Presidentin Jimmy Carter, për të cilin u mbajtën homazhe shtetërore të mërkurën në zemrën e demokracisë amerikane, përpara funeralit të tij shtetëror.

Vizitorët e shumtë, ndër të cilët edhe zyrtarë të shumtë të zgjedhur dhe Nënpresidentja Kamala Harris, theksuan arritjet dhe humanizmin e ish-presidentit 100-vjeçar, i cili vdiq muajin e kaluar.

David Smith, profesor në Shkollën Carter për Paqen dhe Zgjidhjen e Konflikteve në Universitetin George Mason, tha se ish-presidenti padyshim ndikoi në karrierën e tij. Ai i tha Zërit të Amerikës se erdhi në Kapitol për të nderuar njeriun, por edhe për të nderuar kauzat e ish-Presidentit Carter.

“Ai pati një ndikim të tillë tek kaq shumë njerëz”, tha ai. “Puna e tij për mbështetjen e pakicave, emërimet e grave në gjyqësor, mbrojtjen e mjedisit tonë, aktivizmin për të drejtat e njeriut – të gjitha ato gjëra janë shumë të rëndësishme për mua”.

Arkivoli i ish-presidentit i mbështjellë me flamur mbërriti në hollin e Kapitolit të martën, përpara funeralit shtetëror të së enjtes.

Në atë hapësirë madhështore – ku vetëm për rreth 50 amerikanë është bërë ky nderim i veçantë që nga viti 1852 – udhëheqësi i shumicës së Senatit Jon Thune, në një shërbesë të martën vonë, e përshkroi ish-Presidentin Carter si: “Një veteran i marinës, fermer kikiriku, guvernator i Xhorxhias. Dhe presidenti i Shteteve të Bashkuara. Mësues në shkollën e kishës. Fitues i çmimit Nobel. Mbrojtës për paqen dhe të drejtat e njeriut. Dhe para së gjithash, një shërbëtor besnik i krijuesit të tij dhe bashkëqytetarëve të tij”.

Dhe Nënpresidentja Harris – e cila një ditë më parë, në këtë ndërtesë, çertifikoi fitoren e presidentit të ardhshëm – lartësoi politikën e ish-Presidentit Carter.

“Ai ishte presidenti i parë i Shteteve të Bashkuara që kishte një politikë gjithëpërfshirëse energjetike, përfshirë sigurimin e një pjese të mbështetjes së parë federale për energjinë e pastër”, tha ajo të martën. “Ai gjithashtu miratoi mbi dymbëdhjetë pjesë të mëdha të legjislacionit në lidhje me mbrojtjen e mjedisit. Dhe më shumë se dyfishoi madhësinë e parqeve kombëtare të Amerikës”.

Zoti Carter, i cili shërbeu si presidenti i 39-të, vdiq më 29 dhjetor në moshën 100-vjeçare, pas gati dy vitesh nën vëzhgim mjekësor në shtetin e Xhorxhias. Që atëherë, udhëtimi i tij i fundit e kaloi arkivolin e tij nëpër rrugët e ngushta të vendlindjes së tij të thjeshtë, qytezën Plains; nëpër bulevardet e Atlantës, kryeqytetit të shtetit, dhe përmes qiejve në Uashingtonin me dëborë, për funeralin e tij shtetëror.

Funerali i së enjtes do të mbledhë bashkë Presidentin Joe Biden dhe ish-presidentët, ndër ta edhe paraardhësin dhe njëkohësisht pasardhësin e Presidentit Biden, Presidentin e zgjedhur Donald Trump. Presidenti i zgjedhur mbërriti që në mbrëmjen e së mërkurës në Uashington, për të bërë homazhe për ish-Presidentin Carter dhe për t’u takuar me ligjvënësit republikanë.

Presidenti Joe Biden miratoi të mërkurën një deklaratë federale për gjendje emergjence për Kaliforninë, që do të autorizojë fonde dhe burime për të luftuar zjarret.

“Jemi të përgatitur të bëjmë gjithçka dhe për aq kohë sa duhet, për të kontrolluar këto zjarre dhe për të ndihmuar në rindërtimin dhe për t’u siguruar që të kthehemi në normalitet. Do të jetë një rrugë e gjatë”, tha Presidenti Biden. “Do të marrë kohë”.

Departamenti amerikan i Mbrojtjes tha të mërkurën se “do të punojë për të siguruar personel dhe aftësi shtesë zjarrfikëse” në Kaliforni për betejën e saj kundër zjarreve që kanë dalë jashtë kontrollit.

Shuma totale e dëmeve nga zjarret mund të shkojë midis 52 miliardë dhe 57 miliardë dollarë ose edhe më shumë, sipas një analize nga Qendra Globale e Motit e kompanisë “AccuWeather”.

Departamenti i Zjarrfikësve të Qarkut të Los Anxhelosit u përball me katër zjarre të rrezikshme për jetën, që kanë vrarë të paktën pesë persona, kanë djegur më shumë se 1’100 ndërtesa dhe kanë detyruar dhjetëra mijëra njerëz të evakuohen.

“Departamenti i Zjarrfikësve të Qarkut Los Anxhelos ishte përgatitur për një ose dy zjarre të mëdha pyjesh, por jo katër, veçanërisht duke patur parasysh këto erëra të qëndrueshme dhe lagështinë e ulët”, tha të mërkurën shefi i zjarrfikësve të qarkut Los Anxhelos, Anthony C. Marrone.

Ai tha se mbi 2000 hektarë janë djegur dhe zjarri po vazhdon të përhapet.

“Nuk kemi asnjë përqindje kontrolli”, tha zoti Marrone.

Zyrtarët kanë paralajmëruar banorët që t’i kushtojnë vëmendje urdhrave të evakuimit dhe të largohen kur të udhëzohen.

Dy mijë anëtarë të Gardës Kombëtare janë dislokuar për të ndihmuar zjarrfikësit vendas.

Në Palisadet e Paqësorit, zjarri kalonte nga një shtëpi në tjetrën, i shtyrë nga erërat e forta me fuqi uragani. Në të njëjtën zonë, zjarrfikësit thanë se uji pati shteruar.

“Patëm një kërkesë të jashtëzakonshme për sistemin tonë në Palisades”, tha të mërkurën Janisse Quiñones, drejtuese dhe inxhiniere kryesore në Departamentin e Ujit dhe Energjisë në Los Anxhelos. “E çuam sistemin deri në ekstrem”. Kërkesa për ujë ishte “katër herë mbi nivelin… për 15 orë rresht”, shtoi ajo.

Më vonë të mërkurën, aeroplanët mbështetës që ishin ndalur nga erërat e forta, u ngritën sërish në ajër, duke hedhur ujë dhe lëndë anti-zjarr.

Mbi 400,000 shtëpi dhe biznese janë pa energji në të gjithë Los Anxhelosin, sipas faqes në internet poweroutage.us.

Uashingtoni po mbështet përpjekjet për shuarjen e zjarrit të Kalifornisë me katër avionë të mëdhenj cisternë të Shërbimit Pyjor të Shteteve të Bashkuara dhe u njoftua se është nisur edhe një i pestë shtesë. Qeveria federale po ndihmon edhe me 10 helikopterë përpjekjet për shuarjen e zjarrit. Ndërkohë, dhjetëra zjarrfikëse të Shërbimit Pyjor u vendosën në gatishmëri për t’u dislokuar.

Disa nga të dhënat për këtë artikull u morën nga agjencia e lajmeve Associated Press.

Zoti Trump vazhdon të bëjë pretendime të pavërtetuara se humbja e tij në vitin 2020 ishte rezultat i një vjedhje të përhapur. Ai ka vazhduar të shprehë shqetësime të ngjashme gjatë tërë fushatës së vitit 2024, deri në momentin kur arriti të fitonte ndaj zonjës Harris më 5 nëntor.

“Kongresi certifikoi sot fitoren tonë të mahnitshme – një moment i madh në histori. MAGA (inicialet për sloganin “Ta bëjmë Amerikën përsëri të madhërishme)”, shkruajti zoti Trump të hënën në platformën e tij sociale, Truth Social.

Brenda ndërtesës, ekipe shtesë të policëve të Kapitolit kontrollin dokumentet e identifikimit në hyrjet e ndërtesës, përfshirë tek dyert dhe tunelet e nëndheshme që çojnë në sallat e Dhomës së Përfaqësuesve dhe Senatit.

Zoti Trump ka deklaruar se planifikon t’i falë disa nga mbi 1,500 personat e paditur për pjesëmarrje në sulmin e 6 janarit të vitit 2021 ndaj Kapitolit, kur turma u përplas me policinë, duke u futur me dhunë përmes dritareve dhe dyerve, ndërsa brohoriste “Vareni Mike Pence-in”, nënpresidentin e atëhershëm të zotit Trump, në përpjekje për të penguar certifikimin e fitores së zotit Biden nga Kongresi.

Presidenti Joe Biden është zotuar se tranzicioni i pushtetit nga ai te Presidenti i zgjedhur Donald Trump do të jetë i rregullt, ndryshe nga katër vjet më parë. Gjatë një fjalimi që mbajti mbrëmë para ligjvënësve demokratë në Shtëpinë e Bardhë, zoti Biden kundërshtoi atë që ai e quan “përpjekje të pandërprerë” për të nënvlerësuar sulmin e 6 janarit të vitit 2021 në Kapitol nga një turmë mbështetësish të zotit Donald Trump. Turma bëri përpjekje të pengojë certifikimin e fitores së zotit Biden ndaj rivalit Donald Trump në zgjedhjet e vitit 2020

Presidenti Joe Biden tha, se pas asaj që ndodhi në vitin 2021, 6 janari, dita kur sipas kushtetutës Kongresi çdo katër vjet certifikon rezultatin e zgjedhjeve presidenciale, nuk mund të meret më si e mirëqenë që gjithshka do të shkojë qetë.

“Shpresoj që të mos e marrim më kurrë si të mirëqenë. Para katër vjetësh, më 6 janar, Kapitoli u sulmua nga një turmë e dhunshme. Nëse vini në zyrën ovale përpara se të largohem, do t’ju tregoj dhomën ngjitur në të cilën ish-presidenti, për tre orë e gjysmë po shihte çfarë po ndodhte në televizor. Demokracia jonë u vu vërtet në sprovë, por fatmirësisht, ajo mbijetoi. Arsyeja kryesore është guximi i policisë së Kapitolit dhe të njerëzve që qëndruan me ne. Mos i harroni kurrë”, tha Presidenti Biden.

Procesi i certifikimit, zakonisht një formalitet, u përmbys katër vjet më parë kur mbështetësit e Presidentit Donald Trump sulmuan dhunshëm Kapitolin. Ata bënë përpjekje për të ndaluar transferimin e pushtetit te demokrati Joe Biden, i cili kishte fituar zgjedhjet.

Shumica e protestuesve shkuan drejt Kongresit nga një tubim aty pranë ku zoti Trump u kërkoi të “luftonin fuqishëm” kundër asaj që ai e quan “manipulim i zgjedhjeve”. Një mbështetëse e zotit Trump, Ashli Babbitt, u qëllua për vdekje nga një oficer teksa u përpoq të hynte me forcë në ndërtesën e Kongresit. Oficeri i policisë së Kapitolit, Brian Sicknick, i plagosur ndërsa u përball me turmën, pësoi infarkt të nesërmen dhe sipas mjekëve vdiq nga shkaqe natyrore. Kongresi u mblodh disa orë më vonë më 6 janar për të përfunduar certifikimin e rezultatit të zgjedhjeve.

Gjatë fjalimit në Shtëpinë e Bardhë ai u kërkoi ligjvënësve demokratë të “thonin të vërtetën” për sulmin e 6 janarit dhe të mos lejojnin që historia e asaj që ndodhi të “rishkruhej apo edhe të fshihej”.

“Tani është detyra juaj të thoni të vërtetën, të mbani në mend atë që ndodhi dhe të mos lejoni që 6 janari të rishkruhet dhe as të fshihet. Duhet nderuar Kushtetutën, jo vetëm në ditët më të jashtëzakonshme dhe gjashtë janari është një nga ditët më të vështira të historisë amerikane, por çdo ditë. Tani, katër vjet më vonë, po largohem nga posti i presidentit dhe jam i vendosur të bëj gjithçka në fuqinë time për të respektuar transferimin paqësor të pushtetit”, tha Presidenti Biden.

Presidenti Biden kaloi pjesën më të madhe të vitit 2024 duke paralajmëruar votuesit se zoti Trump është një kërcënim serioz për demokracinë e vendit. Javën e kaluar, presidenti i dha Medaljen Presidenciale të Qytetarisë zonjës Liz Cheney dhe ligjvënësit demokrat Bennie Thompson, udhëheqësit e hetimit të Kongresit për sulmin e 6 janarit në Kapitol.

Kongresi do të mblidhet të hënën në Uashington për të certifikuar fitoren e zotit Trump në një seancë, që do të drejtohet nga rivalja që ai mposhti, Nënpresidentja Kamala Harris. Këtë herë nuk pritet dhunë, madje as kundërshtime procedurale, duke shënuar një rikthim në traditën amerikane që të transferimit paqësor të pushtetit presidencial.

Presidenti Biden sqaroi se arsyeja pse ai do të veprojë ndryshe nga Presidenti i zgjedhur Trump dhe republikanët është se “rregullat dhe institucionet kanë rëndësi”.

“Traditat thelbësore që kemi respektuar prej kohësh në Amerikë përfshijnë certifikimin e zgjedhjeve dhe duke marrë pjesë në inaugurimin e një presidenti të ardhshëm”, tha Presidenti Biden.

Republikanët kontrollojnë Dhomën e Përfaqësuesve me një shumicë të vogël me katër vende më shumë se demokratët, si dhe Senatin me gjashtë vende më shumë.

Kongresi amerikan do të mblidhet të hënën për të certifikuar fitoren e zotit Donald Trump në zgjedhjet presidenciale të nëntorit, përballë nënpresidentes aktuale, Kamala Harris.

Nënpresidentja është përgjegjëse për kryesimin e numërimit të rezultateve nga secili prej 50 shteteve të vendit, duke e vënë zonjën Harris në pozicionin e certifikimit të humbjes së saj.

Procedura ishte për një kohë të gjatë një formalitet në procesin zgjedhor, por katër vjet më parë u shndërrua në kaos pasi mbështetësit e zotit Trump hynë në Kapitol, duke plagosur rreth 140 oficerë policie, duke shkaktuar dëme në ndërtesë dhe duke detyruar ligjvënësit të strehoheshin për shkaqe sigurie.

Skena të ngjashme nuk priten të hënën, meqë zonja Harris e ka pranuar humbjen dhe presidenti Joe Biden ka theksuar nevojën për një proces paqësor të kalimit të pushtetit.

Autoritetet janë përgatitur për çdo rast, duke ngritur pengesa të larta metalike rreth kompleksit të Kapitolit.

Duke folur të dielën në Shtëpinë e Bardhë, Presidenti Biden e quajti atë që ndodhi më 6 janar të vitit 2021 “një nga ditët më të vështira në historinë amerikane”.

“Ne duhet të kthehemi në kalimin normal të pushtetit”, tha ai.

Ai shtoi se sjellja e zotit Trump katër vjet më parë, e cila përfshinte pretendime të përsëritura të rreme se ai fitoi zgjedhjet, “ishte një kërcënim i vërtetë për demokracinë”.

Më shumë se 1500 persona janë akuzuar në lidhje me sulmin në Kapitol. Zoti Trump është zotuar se do të shpallë faljen e tyre pasi të marrë detyrën më 20 janar.