Pestova – Krujë e dytë (Kushtuar Hakif Zejnullahut dhe dy bashkëluftëtarëve të tij)- Nga ARIF EJUPI

February 20, 2026

Rritur me ujin e freskët të burimeve të Llapit

dhe me bukën e arave të tij,

shpejt hodhe shtat e u bëre bajrak.

.

Punëtor e i vyer si bleta,

i qetë e i dashur me familjarë, shokë e miq,

por rrufe për tradhtarë e armiq.

.

I çiltër e i kthjellët në mendim.

Ece në hap me kohën; veprove kur rëndë lëngonte Atdheu.

Nënshtrimin dhe poshtërimin nga mizorë e trushpërlarë

e quaje fytyrë të vdekjes,

akt të ulët që e pranon vetëm horri e tradhtari.

Thirre pandërprerë për mobilizim e ndërgjegjësim:

besë, qëndresë dhe bashkim.

.

Atë që e thoshe e bëje.

Kishe shikim skifteri e guxim luani,

ishe më i fortë se guri,

burrë e trim si Oso Kuka e Dedë Gjo Luli.

.

Së bashku me Zahirin e Edmondin

u nisët drejt Vushtrrisë,

për t’i dhënë hakun një satrapi

që linte gra të veja e fëmijë jetimë.

Në Pestovë kriminelët,

me tanke, kallashë e helikopterë,

ju ngritën pritë.

Tokën e mbërtheu flaka,

qiellin tymi.

.

Në deje me gjak të Gjergj-Kastriotit,

bëtë vdekje të bardhë, duke shkëmbyer zjarr me zjarr.

Pestovën e shndërruat në Krujë të dytë.

Kur kryekasapi i Ballkanit

mori vesh për rënien e tyre,

që frikën në palcë ia kishin futur,

dekoroi pjellën e vet të ndytë —

por harroi se ata tre viganë

do të jenë vetëvrasja e tij.

.

Tre emra të gdhendur me shkronja ari,

të një ngjarjeje madhështore që prek zenitin,

histori e një lavdie dhe krenarie të rrallë.

.

ARIF EJUPI

Gjenevë, 14 shkurt 2026

• twitter

  Follow
• facebook
• linkedin

Fjalë kyçe: Arif Ejupi