Një lagje e tërë është ndërtuar në zonën e “Ali Demit”, ku deri më tani janë dhënë plot 50 leje për të ndërtuar pallate, fillimisht me projektin “Mangalem 21”, duke ndërtuar 33 pallate, më pas “Kaimi” dhe “Kadiu”, të cilat kanë mbushur të gjithë kodrën me ndërtime. Projekti fillestar u reklamua edhe nga kryeministri Rama, teksa më vonë rreth tij u bënë edhe pallate të tjera, duke e kthyer të gjithë zonën në një masiv të madh betoni.

Aktualisht, nga llogaritjet e bëra, rezulton se pallatet kanë rreth 3000 apartamente, ku nëse i kthen në numër banorësh, mund të shkojë deri në 10 mijë. Aq sa një qytezë në Shqipëri, si Rrogozhina, Dimali apo edhe Tepelena. Por, ndryshe nga këto qyteza ku ka pasur një infrastrukturë rrugore, arsimore apo shëndetësore, në gjë e tillë mungon në të gjithë zonën. Pavarësisht problemeve me ligjin, ndërtuesi Fatmir Bektashi vijon normalisht biznesin, duke hapur dita-ditës kantiere.

Ai është mësuar me lobime të fuqishme për të marrë këto leje, por a ka bërë ndonjë studim qeveria apo edhe Bashkia e Tiranës për infrastrukturën e të gjithë zonës? A ka në plan për të ndërtuar ndonjë rrugë hyrëse apo dalëse për në kompleks, duke qenë se Bektashi ka shitur edhe parkimet anës rrugës? Por, më skandalozja është rruga hyrëse dhe dalëse për në të gjithë zonën.

Në video: Gjendja e rrugës hyrëse për në kompleksin “Mangalem”, plot gropa, e ngushtë dhe pa trotuar

Gjendja e rrugës “Pasho Hysa” është në gjendje tepër të amortizuar. VoxNews bëri një vëzhgim të segmentit, nga kryqëzimi i rrugëve “Pasho Hysa” e “Ali Demi”, deri në hyrjen e kompleksit. Siç duket qartë në video, rruga është e ngushtë dhe njëkalimëshe, megjithëse është me dy sense lëvizje. Në një pjesë të saj, makinat duhet të presin makinat që vijnë përballë, teksa në orët e pikut, mëngjesin dhe pasditen, rruga bllokohet totalisht nga automjetet.

Gropat e mëdha kanë zëvendësuar asfaltin, por nuk ka asnjë trotuar apo ndriçim. Megjithëse pallatet janë në zgjatim të lagjes së vjetër “Ali Demi”, sërish infrastruktura është skandaloze, megjithëse qeveria vijon të japë leje.

Në video: Rruga s’ka as trotuare duke detyruar nënat me karroca me fëmijë të kalojnë në mes të rrugës gjithë gropa

Pamjet s’kanë nevojë për koment, pasi kamera e VoxNews kapi momentin që edhe nënat me karroca për fëmijë s’kanë ku të kalojnë. Ato detyrohen të lëvizin në qendër të rrugës, sërish me gropa dhe shumë e vështirë për të kaluar. Por, më skandalozja është se, kompleksi vijon të shtohet dita-ditës dhe nga ana tjetër deri më tani s’është hapur ndonjë rrugë e re hyrëse apo dalëse.

Mundësitë janë, por siç duket të gjithë e kanë mendjen të firmosin leje të reja sesa të bëjnë studime dhe të hapin tendera për infrastrukturë. Mundësia e parë është zgjerimi i rrugës “Pasho Hysa”, shtrimi i saj me të gjitha parametrat. E dyta është hapja e një rruge të re, ngjitur me ish-Burgun e Grave, ku do të mundësohej që të shkurtohej distanca. Mundësia e tretë është nga pjesa e Xhamisë së “Ali Demit”.

Por, siç duket të gjitha mundësitë do të zvarriten për vite me radhë, pavarësisht se sipas ligjit, i gjithë ai komunitet që paguan detyrimet për gjithçka të ketë rrugë, çerdhe, kopësht apo shkollë 9 – vjeçare. Madje, qeveria duhet të detyrojë ndërtuesin kontrovers që të bëjë një godinë për shkollën apo t’a detyrojë që paratë që mori nga shitja e parkimeve në sipërfaqe, në rrugët e kompleksit, ti përdorë për rrugë.

Në një kohë që pushteti qendror dhe lokal duhet t’a detyronte biznesmenin Fatmir Bektashin të bënte të gjithë ato të shkruara më sipër, vetë qeveria e “shpërblen” me një leje tjetër ndërtimi për pallat. Në kodrën sipër kompleksit “Mangalem”, në një territor shumë të pjerrët, Bektashi do të ndërtojë një tjetër pallat, të quajtur “Nokia”.

Pallati do të ndërtohet në afërsi të depos së ujit, në rrugën që lidh zonën e Ali Demit me zonën e Farkës. Një çmenduri arkitekture, duke qenë se e gjithë zona më parë ka qenë me banesa private dhe jo me pallate. Për më tepër, do të betonojë një tjetër pjesë të gjelbër, ndërkohë që sërish s’ka asnjë plan për rrugë./ Vox News

Kryeministri Edi Rama ka ngritur një grup pune të përbashkët mes qeverisë dhe bashkive për të trajtuar çështje specifike, përfshirë edhe “Paketa e Maleve”. Ky grup synon koordinimin mes nivelit qeverisës dhe atij lokal për problematika të ndryshme, duke përfshirë aspektet rregullative dhe organizative të projekteve.

Nga kryebashkiakët e përzgjedhur, dy janë aktualisht të pandehur në SPAK: Majlinda Bufi e Roskovecit dhe Benet Beci i Shkodrës. Përzgjedhja nuk duket rastësore, dy personazhe të pandehur janë lehtësisht të shantazhueshëm dhe kësisoj të bindur ndaj KM për të çuar para axhendë e “Paketës së Maleve” kryesisht.

Grupi do të përbëhet nga disa ministra të qeverisë dhe kryebashkiakë nga bashkitë e përzgjedhura. Sipas deklaratës së Ramës, grupin e punës do ta drejtojnë ministri i Rindërtimit, ministrja e Ekonomisë, ministri i Kulturës dhe Turizmit, si dhe ministri i Mjedisit. Nga bashkitë do të jenë përfaqësues kryebashkiakët e Lezhës, Malitqit, Shkodrës, Himarës, Durrësit dhe Roskovecit.

“Është koha të krijojmë një grup pune të përbashkët mes qeverisë dhe bashkive për të trajtuar të gjithë këto probleme dhe për t’i futur në vijë si në aspektin rregullativ dhe në aspektin e problematikave të natyrave të ndryshme që i shikoni të arsyeshme të trajtohen. Ministri do t’i drejtohet më pas qeverisë për ndryshime ligjore, nxjerrje urdhëresash të reja dhe për krijimin e sinergjive të reja për shtetin sipërmarrës”, tha Rama.

Qëllimi i grupit, sipas qeverisë, është përmirësimi i koordinimit mes institucioneve dhe adresimi i çështjeve që lidhen me zhvillimin lokal dhe projektet shtetërore, duke përfshirë dhe “Paketa e Maleve”, si dhe çështje të tjera prioritare për bashkitë dhe qytetarët./Syri.net

E hënë, 4 prill 2022. Me valixhe në duar, çantë në krahë dhe shumë ëndrra në mendje e zemër, Artina – emër i vendosur nga redaksia e Radios Evropa e Lirë për ta ruajtur anonimitetin e së intervistuarës – u nis drejt SHBA-së.

Në maj të vitit paraprak, ajo ishte përzgjedhur fituese e asaj që njihej si ‘llotaria e Kartës së Gjelbër’, por që në të vërtetë quhet Programi i Vizave të Diversitetit.

Artina ishte nxitur të aplikonte nga partneri i saj. Ky i fundit kishte 12 vjet rresht që aplikonte, pasi të ardhmen e tij s’e shihte askund tjetër përveç në SHBA.

Por, fati deshi që Artina të ishte ajo që ta fitonte mundësinë për të emigruar në SHBA. Që atëherë, zemra e saj ishte e dyzuar mes dy shtëpive: të sajën në SHBA dhe asaj pranë partnerit në Shqipëri.

Qysh në gusht të vitit 2022 ata nisën procesin për bashkim familjar. Të bashkuar i mbanin vetëm vizitat e herëpashershme të Artinës në vendlindje.

Kjo distancë iu bë edhe më e vështirë kur ajo mori vesh se ishte shtatzënë.

“Çdo gjë e kam përballuar vetë. Gjatë kësaj periudhe bëja udhëtime pafund drejt Shqipërisë, sepse duhet të ruaja edhe martesën, por edhe vajza të kalonte kohë me babanë… Me shpresën se do të bashkohemi shpejt…”, thotë ajo për Radion Evropa e Lirë.

E vetme në SHBA, pa familjarë e shoqëri përreth, Artina tregon se ka punuar deri në muajin e fundit të shtatzënisë, ndërsa edhe muajt e parë të mëmësisë u detyrua t’i kalonte e vetme.

Tani, ajo më shumë ankohet për “lodhjen mendore” sesa atë fizike.

“Qenka e shëmtuar ndjesia kur e fut jetën tënde në një valixhe, largohesh me ëndrra, punon, sakrifikon që ta bashkosh familjen atje ku po e ndërton jetën nga e para dhe dëgjon se, fiks kur ti arrin afër fundit të sfidës…”, lë në gjysmë fjalinë Artina.

E, pikërisht kur procesi i bashkimit të tyre familjar po i afrohej fundit, SHBA-ja vendosi ta pezullonte përkohësisht lëshimin e vizave të emigrimit nga 75 vende të botës, përfshirë Kosovën dhe Shqipërinë.

Ky vendim erdhi pasi presidenti i SHBA-së, Donald Trump, tha se të huajt që emigrojnë në SHBA, duhet ta mbajnë veten me punë dhe jo të bëhen barrë e shtetit.

Sipas një fotografie të publikuar nga ai, rreth 41 për qind e migrantëve nga Shqipëria marrin ndihma sociale në SHBA, ndërsa nga Kosova përqindja ishte edhe më e lartë: 46.

“Nga i thati digjet edhe i njomi”, thotë Artina, duke shtuar se ajo ka qenë një qytetare e përkushtuar e punëtore, që s’ka tentuar thjesht të përfitojë nga shteti amerikan.

Por, tani kur të gjitha proceset e vizave të emigrimit janë pezulluar, ajo do të duhet sërish ta bëjë pa partnerin e jetës rrugën drejt SHBA-së. Këtë herë, edhe me një vajzë 2 vjeçe në krahë.

Në gjendje të ngjashme janë mijëra banorë në Kosovë e Shqipëri. Disa nga ta, të kontaktuar nga Radio Evropa e Lirë, kanë hezituar t’i ndajnë historitë e tyre, nga frika se kjo mund t’i dëmtojë gjasat e tyre për emigrim në SHBA.

Vitin e kaluar, rreth 3.800 shtetas të Shqipërisë fituan viza të emigrimit drejt SHBA-së, si dhe rreth 650 të tjerë nga Kosova.

Artid Hila nga Shqipëria, i cili punon si konsulent për ndjekje të procedurave të emigracionit dhe vizave të tjera, ka vite që udhëheq edhe një grup në Facebook, ku ndihmon të interesuarit për emigracion në SHBA.

Ai thotë se është shqetësuar, por jo befasuar nga vendimi i 14 janarit i SHBA-së.

“Shqetësimi kryesor që dëgjoj çdo ditë, lidhet me pasigurinë totale që ka krijuar pezullimi i përpunimit të vizave të emigracionit. Aplikantët kanë frikë se po ecin përpara me të gjithë hapat e kërkuar nga Departamenti i Shtetit, ndërkohë që ekziston rreziku real që viti fiskal të përfundojë pa u lëshuar vizat”, thotë Hila për REL-in.

Ai tregon se procesi nuk është i thjeshtë: duhet plotësim i disa formularëve, ekzaminime mjekësore, përgatitje e dokumenteve dhe pagesë e tarifave.

“Shumë aplikantë kanë investuar vite pritjeje [në rastet e bashkimeve familjare], qindra apo mijëra dollarë në dokumente, përkthime, kontrolle mjekësore, udhëtime për intervista dhe plane konkrete jetese”, thotë Hila.

Tani, shton ai, ata po përballen me informacione gjysmake dhe shumë lajme të pasakta e të ekzagjeruara, pasi që nuk dihet se deri kur do të zgjasë pezullimi.

Situata të ngjashme, sipas Hilës, ka pasur edhe në të kaluarën, si gjatë pandemisë COVID-19. Por, të ngjashme s’do të thotë identike.

“Dallimi kryesor me situatën aktuale është se sot aplikantët lejohen t’i ndjekin të gjithë hapat proceduralë dhe t’i paguajnë tarifat, por në fund rrezikojnë të mbeten pa vizë, vetëm për shkak të mbylljes së vitit fiskal – një situatë që juridikisht është shumë problematike”, shpjegon Hila.

Ai shton se në shqetësimin e aplikantëve ndikon edhe një vendim tjetër. Në dhjetor të vitit të kaluar, SHBA-ja pauzoi për kohë të pacaktuar Programin e Vizave të Diversitetit, deri kur “ta dimë se kë saktësisht po e lëmë të hyjë në vendin tonë”, siç kishte thënë sekretari amerikan i Shtetit, Marco Rubio.

Edhe nga ky program kanë fituar shumë shtetas të Kosovës e Shqipërisë ndër vite. Sipas të dhënave të Departamentit amerikan të Shtetit, në mesin e listës së fundit të përfituesve të këtij programi ishin edhe 1.598 shtetas të Shqipërisë dhe 260 shtetas të Kosovës.

Si fituese e para disa viteve, Artina kishte ndërtuar shumë ëndrra. Por, tani ka shumë pasiguri.

“Po më duket sikur këta katër vjet po fshihen nga jeta sikur të mos ishin asgjë”, thotë ajo, e shqetësuar se ndoshta opsioni i saj i vetëm do të mbetet heqja dorë nga ëndrra amerikane.

Si një prej fijeve kryesore të korrupsionit dhe grupeve kriminale rreth AKSHI-t, emri i tij nuk mund të mungonte kurrsesi në aferën Durana, gjithnjë jo drejtëpërdrejtë, por i kamufluara përmes kompanive të dyshimta dhe ortakëve.

Bëhet fjalë për Armand Shara, anëtar i bandës së Ermal Beqirit, Geron Meçes, Gëzim Hoxhës etj., që kanë zhvatur përmes tenderave korruptivë/sekretë të AKSHI-t qindra milionë euro para publike, duke i ndarë sipas roleve, pastruar më pas në pasuri të paluajtshme dhe investuar në luks deri tek jahtet.

Përfitues i mbi 130 milionë euro para publike, 55-vjeçari Armand Shara, sot dora e Ermal Beqirit në AKSH, është pronar i kompanisë TAG Engineering shpk, me objekt konsulencë në menaxhim dhe administrim biznesi, shërbime dhe zhvillime të programeve të teknologjisë informative, ndërtim etj.

Krahas pastrimit të parave të grupeve kriminale në ndërtim dhe shit-blerje të pasurive të paluajtshme, Armand Shara, përmes kompanisë TAG Engineering, kontrollon një kartel kompanish me aktivitet nga tenderat korruptivë të AKSH-it tek investimi në pasuri të paluajtshme.

Me anë të kompanisë kryesore TAG Engineering, vetë si aksioner dhe prestanomes Bledar Dhima, Armand Shara kontrollon prej tre vitesh kompaninë INFOSOFT SYSTEMS shpk, simbol i tenderave sekretë dhe korruptivë të AKSH-it, me në krye Mirlinda Kaçanaj, e arrestuar me kërkesë të SPAK-ut.

INFOSOFT SYSTEMS është përfituesja kryesore e skemës së korrupsionit të AKSH-it me tenderat sekretë. Gjatë pesë viteve të fundit, INFOSOFT SYSTEMS ka përfituar mbi 100 milionë euro para publike, përmes tenderave seksretë të AKSHI-t, me fond limit të fryrë deri në shtatëfish, me pazar në tavolinë, me oferta fituese sa fondi limit, në disa raste me dokumente false, por gjithnjë duke mashtruar me zbatimin e kontratave në funksion të skemës së korrupsionit.

Pjesë e kartelit të kompanive të Armand Sharës janë edhe ikubINFO, ikubINFO International, InfoSoft Business Solutions dhe iNext e aferës Durana. Përmes kompanisë, Ikubinfo shpk, gjatë viteve të fundit Armand Shara ka përlarë mbi 30 milionë euro tendera sekretë dhe me pazar në tavolinë nga AKSHI. Paratë më pas kanë devijuar në kompani të tjera, duke u ndarë në të njëjtët xhepa.

Edhe përmes kompanisë InfoSoft Business Solutions, Armand Sharra ka nisur të marrë tendera sekretë dhe me pazar në tavolinë nga AKSHI, me fond limit të fryrë dhe çmime arbitrate. Duket e çuditshme se si SPAK-u i ka shpëtuar deri më tani Armand Shara dhe hajduti epik, Geron Meçe, të cilin e mori peng vetë banda pas prishjesh në pazare.

Në korrik të vitit 2025, Armand Shara ka themeluar kompaninë sistemeve software iNext shpk, përmes kompanisë TAG Engineering dhe ortakut Bledar Dhima. Kompani i ka zyrat në Tiranë në ambientet e kompanisë TAG Engineering, por është regjistruar fiktivisht në parkun imagjinar Durana të Elira Kokonën në Xhafzotaj të Durrësit.

Kompania iNext shpk e Armand Sharës është pjesë e shoqatës me natyrë kriminale të Ermal Beqirit, në kërkim nga SPAK për grup kriminal, korrupsion dhe pastrim parash. Anëtarët e drupit kriminal kanë transkasione me njëri-tjetrin si dhe janë kordinuar në manipulimin e procedurave tenderuese me anë të rrjetit të kompanive që kontrollojnë.

Gëzim Hoxha, i goditur nga SPAK, bashkë me hajdutin epik Geron Meçe, prestanome i Armand Frangut (baxhanak i Edi Ramës), ‘ustai’ Ermal Beqiri dhe Armand Shara, janë pjesë e të njëjtit grup kriminal të AKSHI-t, duke zhvatur qindra milionë euro para publike përmes tendera sekretë dhe korruptivë, me anë të një rrjeti kompanish, siç edhe tregohet pjesërisht nga dosja e SPAK-ut.

(Ermal Beqiri, Armand Frangu dhe Geron Meçe)

Anëtarët e këtij grupi kriminal, të goditur pjesërisht nga SPAK-u, kanë transaksione me njëri-tjetrin si dhe janë koordinuar në manipulimin e procedurave tenderuese përmes rrjetit të kompanive që kontrollojnë.

Ndërkaq, AKSHI është institucioni kryesor publik i gjenerimit të skemës korruptive më masive gjatë dekadave të fundit, por nuk është i vetmi. Skema e korrupsionit ushqehet edhe nga një institucion tjetër, i cili çuditërisht ende nuk është goditur nga SPAK-u dhe ka mbetur jashtë vëmendjes mediatike. Bëhet fjalë për Autoritetin Kombëtar për Sigurinë Kibernetike (AKSK), me në krye Igli Tafa, për bëmat e të cilit do të flasim në vijim pasi faktet tregojnë se nuk është më i pafajshëm se Mirlinda Kaçanaj./