Partia Demokratike do të protestojë sot para godinës së Kuvendit, në të njëjtën kohën kur në seancën plenare pritet të votohet kërkesa e SPAK për heqjen e imunitetit të deputetes Belinda Balluku.

Sipas njoftimit zyrtar, protesta do të nisë në orën 10:00, ndërsa Policia e Tiranës ka marrë masa për garantimin e rendit dhe sigurisë gjatë zhvillimit të tubimit.

Që dje, zona përreth Parlamentit është rrethuar me gardh metalik, ndërsa pritet një prani e shtuar e forcave të policisë për të shmangur çdo incident. Burime bëjnë me dije se situata mund të shoqërohet me tensione.

Ndërkohë, deputetët e Partisë Socialiste janë njoftuar të paraqiten në Kuvend më herët se zakonisht dhe të mos mungojë asnjë, për të marrë pjesë në votimin e kërkesës së SPAK.

Policia e Tiranës njofton se për shkak të protestës do të ketë kufizime në qarkullimin e automjeteve në zonën pranë Parlamentit.

“Përfaqësues të subjektit politik Partia Demokratike e Shqipërisë kanë njoftuar Policinë e Tiranës për zhvillimin e një tubimi, ditën e nesërme, në orën 10:00, para Parlamentit,” thuhet në njoftimin e policisë.

Sipas autoriteteve, nga ora 06:00 e mëngjesit deri në përfundim të tubimit do të kufizohet lëvizja në rrugën “George W. Bush”.

Në varësi të zhvillimit të protestës, mund të ketë kufizime edhe në akse të tjera rrugore përreth, ndërsa policia ka parashikuar devijimin e trafikut në rrugë alternative.

Policia u bën thirrje qytetarëve të tregojnë mirëkuptim për kufizimet në qarkullim dhe të distancohen në rast se përballen me veprime që cenojnë rendin dhe sigurinë publike. bw

TIRANË- Profesori amerikan, Edward Joseph deklaroi se Kosova nuk është në një situatë ku është e vështirë të formohet një qeveri për shkak të rezultateve të ngushta zgjedhore, por për shkak të kokëfortësisë së udhëheqjes. Sipas Joseph, vendi po përballet me një krizë të re politike, e cila do të përkeqësojë më tej marrëdhëniet me Uashingtonin dhe Bashkimin Europian.

Joseph tha se shpreosn se Gjykata Kushtetuese do të vendosë të mos e shpërndajë Kuvendin e Kosovës, por se situata në Kosovë nuk është e mirë dhe se zgjedhjet e reja nuk janë në interes të askujt.

“Kjo është një krizë e panevojshme dhe ajo që duhet të shpresojmë është që Gjykata Kushtetuese të vendosë se Kuvendi nuk është shpërbërë, se ekziston një mundësi tjetër që Kuvendi të veprojë përpara se Kosova të shkojë në zgjedhje të reja, gjë që nuk është në interesin e askujt. Kjo nuk është një krizë politike standarde në të cilën ke rezultate të ngushta dhe është shumë e vështirë të formosh një qeveri, kështu që duhet të shkosh në zgjedhje të reja. Ky është një rast në të cilin ke një mundësi të plotë për të formuar një qeveri, por ka një refuzim dhe kokëfortësi të udhëheqjes në Kosovë për të kuptuar se thjesht duhet të vazhdojë me zgjedhjen e presidentit”, tha Joseph.

Joseph beson se ngërçi i ri politik mund të tendosë më tej marrëdhëniet midis Prishtinës dhe Uashingtonit, si dhe Bashkimit Europian, sepse askush nuk dëshiron më kaos. Ai theksoi gjithashtu se pasiguria e re institucionale mund të dobësojë mbështetjen ndërkombëtare për Kosovën nga SHBA-ja, BE-ja dhe NATO-ja, duke vënë në dukje se Prishtina po dërgon një sinjal të keq duke provokuar kriza artificiale.

“Kur tregoni se jeni në një krizë kushtetuese krejtësisht të panevojshme, artificiale pas një pamundësie afatgjatë për të formuar një qeveri, çfarë mesazhi po dërgoni? A po dërgoni një mesazh se jeni të aftë të jeni partner i plotë? Jo, kjo thjesht po u jepni argumente kundërshtarëve të Kosovës, përfshirë, sigurisht, ata në Serbi. Ky është një sinjal krejtësisht i gabuar, i panevojshëm. Ekziston një zgjidhje shumë e thjeshtë. Nëse Gjykata Kushtetuese vendos që Kuvendi nuk është shpërbërë plotësisht dhe se zgjedhjet nuk duhet të mbahen ende, atëherë lidershipi duhet të bashkohet dhe të mbështesë Osmanin, nëse jo për ndonjë arsye tjetër, atëherë për interesat e Kosovës dhe për të shmangur një krizë”, tha Joseph./Dosja.al

Pas kritikave nga Dhoma Amerikane e Tregtisë, procedura e tenderit për ndërtimin e portit të ri tregtar në Porto Romano është anuluar, pasi kompania e vetme e mbetur në garë nuk paraqiti ofertën financiare brenda afatit të përcaktuar.

Mësohet se kompania Archirodon, e cila ishte e vetmja që vijonte në garë në fazën përfundimtare të tenderit, nuk dorëzoi ofertën e saj financiare më 9 mars.

Tenderi kishte një vlerë të përllogaritur prej rreth 400 milionë eurosh dhe synonte ndërtimin e portit të ri tregtar në zonën e Porto Romanos.

Po ashtu mësohet se Prokuroria e Posaçme Antikorrupsion (SPAK) po heton lidhur me proceduren e tenderit.

Kërkesa e Dhomës Amerikane të Tregtisë

Kreu i Dhomës Amerikane të Tregtisë në Tiranë, Grant Van Cleeve, pak ditë më parë adresoi një letër publike për Edi Ramën dhe titullarë të lartë qeveritarë, në lidhje me tenderin e Porto Romanos.

Van Cleeve e konsideron këtë projekt si një vendim që merret një herë në 100 vjet dhe kërkon shtyrjen e garës pasi sipas tij projekti ekzistues i heq Shqipërisë shansin të jetë konkurruese në rajon.

Sipas Dhomës Amerikane të Tregtisë, vendimi i planifikuar për 9 mars për tenderin e Porto Romanos përfaqëson një moment strategjik që mund të përcaktojë pozicionin ekonomik dhe gjeopolitik të Shqipërisë në Evropën Juglindore për dekada.

Van Cleeve argumenton se projekti aktual i portit është shumë i vogël, me rreth 400 metra mur moli dhe një sipërfaqe portuale prej 38 hektarësh, kapacitete që nuk mund të konkurrojnë me portet e mëdha rajonale.

Ai paralajmëron se në këto kushte Korridori 8 mund të dështojë të zhvillohet si bosht i rëndësishëm logjistik lindje-perëndim, ndërsa flukset e mallrave do të vazhdojnë të përqendrohen në portet e Pireu dhe Selanik.

Sipas tij, një zhvillim strategjik i Porto Romanos duhet të synojë një port me ujëra të thella deri në 18 metra, me kapacitet mbi 2 milion TEU për kontejnerë, zona të mëdha logjistike dhe zona të lira tregtare, si dhe terminale për transport RoRo dhe energji, përfshirë edhe LNG nga Shtetet e Bashkuara të Amerikës.

Në përfundim, ai kërkon që tenderi i planifikuar për 9 mars të shtyhet dhe projekti të rishikohet në përputhje me kërkesat strategjike të Korridorit 8 dhe NATO-s. Sipas tij, projekti mund të zhvillohet brenda këtij viti me financim të përbashkët nga partnerë nga SHBA dhe Italia, si dhe me përfshirjen e kompanive inxhinierike nga SHBA, Italia, Holanda dhe Turqia.

Zgjidhja e Propozuar
1.Kërkojmë me respekt që tenderi i Porto Romanos i planifikuar për 9 mars të shtyhet dhe të rishikohet në bazë të kërkesave më të fundit të NATO-s dhe Korridorit 8.
2.Mund të lehtësojmë zhvillimin EPC+F të një Porto Romano më të madh brenda këtij viti, të bashkëfinancuar nga partnerë nga Shtetet e Bashkuara dhe Italia, dhe të realizuar nga furnitorë strategjikë nga SHBA, Italia, Holanda dhe Turqia.
3.Mund të ofrojmë firmat më të mira inxhinierike amerikane për të asistuar në rishikimin e projektimit të Porto Romanos, hekurudhave, autostradave dhe të gjithë infrastrukturës dual-use të Korridorit 8, të ndërtuara sipas standardeve të NATO-s, në koordinim të plotë me NATO-n dhe për të siguruar financim shtesë nga NATO”, thuhet në reagimin e kreut të Dhomës Amerikane të Tregtisë, Grant Van Cleve.

REFUZIMI I RAMËS

Më 9 mars kryeministri Edi Rama para deputetëve të PS gjatë qëndrimit publik, ka theksuar se duhet të jepte një qëndrim për tenderin e Porto Romanos, për të cilin tha se plani i tij ka ngjallur xhelozi. Në qëndrimin e tij, i cili linte vend për interpretime, Rama ka thënë se: “ata që e luftojnë projektin, ata që s’po lënë gur pa luajtur për ta bllokuar projektin, ne i dimë kush janë dhe i kanë bërë llogaritë gabim, sepse projekti do bëhet”.

“Duhet të them këtu dy fjalë për Porto Romanon, është një nga proceset më të ndërlikuar, ndoshta më i ndërlikuar që ne kemi bërë. Është një plan strategjik që ka krijuar edhe xhelozi. Xhelozitë janë të zakonshme mes vendesh që janë në stade të caktuara zhvillimi. Një proces shumë i sofistikuar me projektin e studios më të madhe në botë dhe me reputacionin më absolut në botë për ndërtimin e infrastrukturës dhe sidomos të asaj portuale e Royal Haskoning nga Hollanda.

Një garë e jashtëzakonshme me pjesëmarrje nga të gjitha anët, por e monitoruar nga A-ja te Zh-ja nga konsulenti Royal Haskoning përsëri dhe armiqësi ndaj projektit. Nuk do flas më shumë, por një gjë dua ta them këtu: Ata që e luftojnë projektin, ata që s’po lënë gur pa luajtur për ta bllokuar projektin, ne i dimë kush janë dhe i kanë bërë llogaritë gabim, sepse projekti do bëhet.

Unë nuk kam plan B vetëm për Bashkimin Europian, për çdo gjë tjetër jam te C-ja” u shpreh kryeministri.

rama grupi i PS- imuniteti i Ballukut=belinda-refuzimi-arrestimi (4)

Opozita nga ana tjetër ka theksuar se pas fituesve të projektit të Porto Romanos qëndrojnë interesa të kundërshtarëve të NATO-s, me konkretisht Rusisë. Sipas Berishës, Rama do qe porti te ndërtohet nga ruset, por kjo gje eshte zbuluar nga aleatet e NATO-s.

“Edi Rama ka dorën e tij të zezë mbi shkatërrimin e Portit të Durrësit, një pasuri kombëtare prej 4 miliardë eurosh.

Ai u përpoq të tërheqë në aferat e tij korruptive NATO-n, por dështoi me turp dhe tani që janë oferta të qarta të partnerëve strategjikë, ai kërkon që portin e Durrësit për ta vjedhur ta ndërtojë me rusët apo me të tjerë që kanë interesa të ngushta strategjike me Shqipërinë dhe NATO-n”, ka tënë Berisha. gsh

GPS-ja e së Hënës tërhoqi thuajse gjithë vëmendjen e opinionit publik dhe kryesisht atë të mediave për të përcjellë fjalët përmbyllëse të  Raportit të Këshillit të Mandateve së pari nga deputeti Manja me:-“…ne si anëtarë të mazhorancës i rekomandojmë seancës plenare rrëzimin e kërkesës së SPAK për dhënien e autorizimit për ndryshimin e masës së sigurisë” dhe më tej kryetarit Rama duke përforcuar për të dytën herë se :-  “…kjo, për mua, ishte dhe do të jetë e papranueshme sa të jem unë këtu në këtë detyrë. Besoj se isha po aq i qartë sa është i qartë edhe raporti i Këshillit të Mandateve, i shkruar nga pala jonë, por besoj se edhe në raportin tjetër të palës tjetër i keni të gjitha argumentet pse kjo kërkesë rrëzohet”. Por po në 9 Mars, Ministri i Bujqësisë dhe Zhvillimit Rural, Andis Salla, ndodhej në një takim në Bruksel me drejtoreshën e përgjithshme të Drejtorisë së Bujqësisë në Komisionin Europian, Elisabet Werner, ku sipas ATSH thuhet se:-“Gjatë takimit u diskutua mbi progresin e Shqipërisë në përthithjen e fondeve europiane për bujqësinë dhe zhvillimin rural, si dhe mbi hapat e mëtejshëm për zbatimin efektiv të programit IPARD III.”

Shqipëria rezulton vendi me karburantin më të shtrenjtë në Europë kur çmimi i naftës krahasohet me të ardhurat e qytetarëve. Monitor ka përpunuar të dhënat e të ardhurave për frymë në dollarë për vitin 2026 sipas publikimit të Fondit Monetar Ndërkombëtar dhe çmimit aktual të naftës sipas Global Petrol Price. Të ardhurat mesatare për frymë në dollarë në Shqipëri për vitin 2026 janë 12 mijë dollarë, ose 33 dollarë në ditë, sipas pasqyrës Ekonomike Globale të FMN-së. Një litër naftë tregtohej dje në Shqipëri me rreth 200 lekë, ose 2.4 dollarë, me kursin aktual

Si rrjedhojë, një qytetari shqiptar do ti duheshin aktualisht 7.2% e të ardhurave ditore për të blerë një litër naftë.

Sipas të dhënave të përpunuara nga Monitor, bazuar në shifrat e FMN-së dhe Global Petrol Price, kjo është pesha më e lartë ndër vendet europiane të përfshira në analizë.

Në ekonomitë më të zhvilluara europiane, diferenca është edhe më e madhe për shkak të të ardhurave më të larta, me karburantin që në Shqipëri është tre deri në 6 herë më i shtrenjtë në terma relative, sipas fuqisë blerëse.

Në vende si Italia, Franca, Gjermania apo Belgjika, një litër karburant zakonisht përfaqëson më pak se 2% të të ardhurave mesatare ditore, ndërsa në disa vende të Europës Veriore pesha bie edhe më tej. Holanda ka naftën më të shtrenjtë në Europë në vlerë absolute, por një qytetari aty i duhen vetëm 1.1% e të ardhurave ditore për të blerë një litër, ose 7 herë më pak sesa Shqipëria.

Shqipëria ka ndërkohë një nga nivelet më të ulëta të të ardhurave për frymë në Europë, ndërsa çmimet e karburantit janë shpesh të ngjashme ose vetëm pak më të ulëta se ato të vendeve të Bashkimit Europian. Kjo bën që pesha reale e karburantit mbi buxhetin e familjeve dhe mbi kostot e transportit për bizneset të jetë shumë më e lartë.

Sipas të dhënave të Global Petrol Price, edhe në vlerë nominale, Shqipëria renditet e pesta në Europë për çmimet e naftës, pas Holandës, Danimarkës, Norvegjisë, e Zvicrës, me këto të fundit që e kanë karburantin vetëm 10 deri në 30 cent më shumë se në vendin tonë.

Karburanti është një nga komponentët kryesorë të kostove të transportit dhe logjistikës në ekonomi. Në vende ku pesha e tij mbi të ardhurat është e lartë, ndikimi përhapet më tej në çmimet e mallrave, në koston e transportit të mallrave dhe në shpenzimet e përditshme të familjeve.

Pesha e lartë e taksave mbetet një nga arsyet kryesore të çmimeve të shtrenjta në vend, ku rreth 60% të çmimit e përbëjnë taksat.( Akciza: rreth 37-38 lekë/litër; Taksa e qarkullimit: rreth 27 lekë/litër; Taksa e karbonit: rreth 3 lekë/litër; TVSH: 20% e çmimit final, etj).

Karburantet, rritja e çmimit reflektohet shumë shpejt, por ulja jo!
Reagimet shumë të shpejta në rritje të çmimeve kur shtrenjtohen në bursa dhe uljet e ngadalta kur bien në tregjet ndërkombëtare mbeten një tjetër arsye e rëndësishme.

Sipas raportimeve të Monitor në renditjen e kompanive më të mëdha sipas fitimeve, psh, në vitin 2019, norma e fitimit për sektorin u rrit me 0.5-1 pikë përqindje. Operatorët e tregut e shpjeguan këtë me tendencën ulëse të çmimeve të tregtimit të karburanteve në vend në atë vit.

Ulja e çmimeve në tregjet ndërkombëtare nuk reflektohet me të njëjtin ritëm dhe kohë në tregun vendas dhe kjo çon në rritjen e normave të fitimit. E kundërta ndodh kur rritet çmimi, kur reflektimi është më i shpejtë, siç treguan dhe ditët e fundit.

E njëjta tendencë u konstatua dhe në vitin 2024, ku një pjesë e kompanive panë një përmirësim të lehtë të normave të fitimit në 2024-n. Operatorët sërish pranuan se kur çmimi është i ulët, kompanitë kanë më shumë mundësi të manovrojnë me çmimet, pasi dhe reflektimi ndaj rënies së tyre në bursa është pak më i ngadaltë. Në vitin 2024, çmimet kishin tendencë ulëse, duke favorizuar shoqëritë importuese dhe tregtuese.

Ish-ministri i Financave dhe ish-deputeti i Partisë Socialiste, Arben Malaj, ka komentuar zhvillimet e fundit politike në vend në një kohë kur SPAK ka kërkuar arrestimin e ish-zv/kryeministres Belinda Balluku.

“Lidhur me Ballukun ka një rrugë dalje. Nga konsultimet që kam bërë, PS nuk do që të japë arrest me burg. Ka disa argumente për këtë, por pse të mos jepet arrest shtëpie? SPAK kërkon një arrestim dhe në këtë rast duhet të vlejë parimi i prezumimit të pafajësisë”, tha ai.

Ai kritikoi gjithashtu kryeministrin Edi Rama, duke thënë se vendi po përballet me një krizë politike dhe se dorëheqja, sipas tij, do të ishte një akt përgjegjësie.

“Kriza i ka hedhur rrënjët e veta. Shenjat e para të sëmundjes së një lideri të dështuar janë të shohësh armiq kudo. Sheh armiq ndërkombëtarë, brenda dhe jashtë partisë. Kjo psikozë do i kushtojë shtrenjtë nëse nuk jep dorëheqjen. Dorëheqja është shenjë atdhedashurie. Nëse do rrijë më gjatë do jetë më keq”, u shpreh Malaj.

Megjithatë ai theksoi se nuk beson se vendi do të shkojë drejt destabilizimit, duke shtuar se qytetarët janë të zhgënjyer dhe shpesh zgjedhin emigrimin për shkak të mungesës së besimit te politika.

Sipas Malajt, përpjekjet për të dobësuar drejtësinë e re nuk do të kenë sukses.

“Është e pamundur që Rama të arrijë të shpërbëjë SPAK, siç u tentua dikur në Rumani. Nuk ka kthim pas. Ose do të bashkëpunojë sinqerisht me drejtësinë, ose do të ketë një fund politik të hidhur”, tha ai.

Në fund, Malaj shtoi se një nga arsyet kryesore të zhgënjimit të qytetarëve është perceptimi se paratë kriminale janë ndërthurur me pushtetin politik në vend.

Ambasada e SHBA në Tiranë i është përgjigjur interesit të News24 në lidhje me raportin e paraqitur një ditë më parë nga socialistët, të cilët u shprehën kundër kërkesës së SPAK për heqjen e imunitetit të Belinda Ballukut, ish zëvendës kryeministres dhe ish-zëvendës ministres së Infrastrukturës dhe Energjisë, e cila akuzohet për abuzime me tenderat.

Në reagim, ambasada amerikane thekson se nuk komenton çështje ligjore që janë në proces, por shton se pavarësia e institucioneve të drejtësisë janë thelbësore për të vazhduar bashkëpunimin mes dy vendeve në luftën kundër krimit.

“Pavarësia e institucioneve të drejtësisë në Shqipëri mbetet thelbësore për vazhdimin e bashkëpunimit mes SHBA-së dhe Shqipërisë në luftën kundër krimit ndërkombëtar. Nuk kemi koment për çështje ligjore që janë në proces”, shprehet ambasada.

Drejtoria rajonale e Autoritetit Kombëtar të Ushqimit Qarku Shkodër njoftoi sot (10 mars) se ka kallëzuar penalisht në Prokurori një kompani tregtare që importon misër nga Serbia.

Subjekti i denoncuar është “Modi” shpk, në magazinat e të cilit në Shkodër janë bllokuar 26 tonë misër rifuxho, që rezulton me mbi normë të alfatoksinës B1. Subjekti në fjalë sipas kallëzimit të hartuar nga kjo drejtori akuzohet për veprën penale ‘mashtrim me produktet ushqimore’.

Fillimisht AKU bëri kontrolle dhe bllokoi ngarkesën e mallit të importur nga Serbia, deri në daljen e analizave.

Subjekti në fjalë akuzohet se ka shkelur sërish ligjin, duke ‘prekur’ produktet e bllokuara, nga Autoriteti Kombëtar i Ushqimit. gsh

Pas rastit të Francesco Becchettit, ku Shqipëria humbi dhe u detyrua të paguante 130 milionë euro, vendi është përballe vendimit për një tjetër konfiskim. Kompania “Omni Bridgeway”, një financier i proceseve gjyqësore, ka marrë të drejtën nga një gjykatë federale në Uashington që të konfiskojë asetet që i përkasin Shqipërisë jashtë vendit.

Arsyeja lidhet me një vendim arbitrazhi prej rreth 13 milionë dollarësh në favor të kompanisë GBC Oil, një firmë me pronarë shqiptarë dhe një amerikan. Ky vendim ka të bëjë me një konflikt që zgjat gati një dekadë, i nisur pas rritjes së taksave mbi koncesionet e naftës, kur kompania fillimisht Stream Oil kishte marrë leje për të shfrytëzuar disa fusha nafte dhe më pas ndryshoi pronësia disa herë deri tek GBC Oil.

Në vitin 2017, fushat e naftës u rikombinuan nga Albpetrol, pasi kompania pretendonte se GBC Oil nuk kishte përmbushur detyrimet dhe kishte borxhe të mëdha ndaj shtetit. GBC Oil iu drejtua Gjykatës Ndërkombëtare të Arbitrazhit në Zvicër, dhe në 2020 fitoi 12.7 milionë dollarë kompensim. Vendimi u konfirmua më pas edhe nga gjykata amerikane në Uashington, por Shqipëria nuk ka ndërmarrë asnjë hap për ta ekzekutuar atë.

Prandaj, Omni Bridgeway kërkoi nga gjykata lejen për të marrë masa kundër aseteve shqiptare jashtë vendit, duke shfrytëzuar të njëjtin parashikim që u përdor edhe në rastin e Albcontrol dhe Becchettit. Gjykata e aprovoi kërkesën dhe pas këtij vendimi, Shqipëria pritet të humbasë para ose asete jashtë vendit për të përmbushur vendimin e arbitrazhit, duke u vënë përsëri nën presion financiar dhe ligjor.

Ky rast tregon se vendimet ndërkombëtare, sidomos ato për taksat dhe koncesionet e naftës, mund të kenë pasoja direkte për asetet e shtetit, veçanërisht kur vendi nuk i përmbahet vendimeve gjyqësore. Shqipëria tani përballet me nevojën urgjente për të gjetur një zgjidhje ligjore për të shmangur konfiskimin e aseteve sovrane. bw

Rrjeti rrugor i vendit është pakësuar me rreth 181 kilometër ndërmjet vitit 2014 dhe 2024 si rrjedhojë e riklasifikimit të inventarit rrugor nga amortizimi i lartë i linjave në zonat rurale, sipas të dhënave zyrtare të INSTAT.

Qyteti me rritjen më të madhe të rrjetit rrugor është Shkodra, ku gjatësia e rrugëve u shtua me 54.1 km, ose rreth 13% më shumë se në vitin 2014. Kjo shtesë erdhi si rrjedhojë e ndërtimit të rrugës së re të Thethit dhe aksit Tamarë-Vermosh.

Në të njëjtën linjë pozitive renditet edhe Vlora, me rritje prej 50.4 km (+12%), si rrjedhojë e ndërtimit të Bypassit dhe rrugës së Lumit të Vlorës. Gjithashtu, në Elbasan rrjeti rrugor u zgjerua me 32.5 km ose +9% dhe në Korçë me 24.7 km (+7%).

Këto qytete gjithashtu rezultojnë të jenë përfituesit kryesorë të investimeve në infrastrukturë gjatë dekadës së fundit. Në anën tjetër, pjesa më e madhe e bashkive kanë shënuar tkurrje të rrjetit rrugor.

Tirana regjistron reduktimin më të madh në vlerë absolute, me 68.6 km më pak rrugë (-22%) ndërmjet viteve 2014-2024. Rënie të fortë kanë pësuar edhe Fieri me -68.2 km (-19%), Lezha me -59.9 km (-19%), Kukësi me -50.1 km (-13%), Durrësi me minus 36.5 km (rënie prej -20%) dhe Dibra me -39.7 km (-14%). Edhe Berati ka pësuar tkurrje me 17.9 km (-10%), ndërsa Gjirokastra ka një rënie më të lehtë prej 2.5 km (-1%).

Rënia e gjatësisë së rrjetit rrugor në disa bashki duket paradoksale, sidomos në një periudhë kur në infrastrukturë janë investuar miliarda euro nga Ministria e Infrastrukturës dhe Fondi Shqiptar i Zhvillimit. Kjo shpjegohet me faktin se në dekadën e fundit, një pjesë e madhe e investimeve nuk janë përdorur për të hapur kilometra të rinj, por për të rindërtuar, zgjeruar dhe modernizuar rrugët ekzistuese.

Një arsye tjetër lidhet edhe me rishikimin pas reformës territoriale dhe proceseve të inventarizimit të viteve të fundit. Në shumë raste, bashkitë kanë përditësuar regjistrat duke hequr segmente që nuk konsiderohen më rrugë funksionale, duke riklasifikuar rrugë rurale, të amortizuara ose me përdorim të kufizuar.

Ndryshimet në ndarjen e kompetencave mes pushtetit vendor dhe institucioneve qendrore kanë ndikuar gjithashtu në shifra. Reduktimi i raportuar në disa bashki është kryesisht rezultat i përditësimit të inventarit, riklasifikimit dhe ndryshimit të metodologjisë së matjes./ Monitor

Përmes një postimi në rrjetin social Facebook, Nagavci u shpreh se vendimi i GJK është thelbësor për respektimin e rendit kushtetues, funksionimin demokratik të institucioneve dhe garantimin e stabilitetit institucional në vend.

KOSOVA- Shefja e grupit parlamentar të LVV-së, Arbërie Nagavci ka reaguar pas vendimit të Gjykatës Kushtetuese e cila pezulloi dekretin e Vjosa Osmanit. Përmes një postimi në rrjetin social Facebook, Nagavci u shpreh se  vendimi i GJK është thelbësor për respektimin e rendit kushtetues, funksionimin demokratik të institucioneve dhe garantimin e stabilitetit institucional në vend.

Ajo shkruan se kërkesa e LVV-së është e drejtë dhe se argumentet e tyre janë të qarta e të bazuara në Kushtetutë. Në fund, Nagavci tha se  LVV- pret një trajtim profesional nga Gjykata dhe miratimin e kërkesës së tyre.

Reagimi i Arbërie Nagavci: 

Mirëpresim vendosjen e masës së përkohshme nga Gjykata Kushtetuese ndaj dekretit të Presidentes. Besojmë se kërkesa jonë është e drejtë dhe se argumentet tona janë të qarta e të bazuara në Kushtetutë. Presim një trajtim profesional nga Gjykata dhe miratimin e kërkesës sonë.

Ashtu siç e kemi cekur edhe në Kërkesë, presim që Gjykata të nxjerrë Aktgjykim me të cilin vendos: -të anulojë Dekretin nr. 24/2026, të datës 06.03.2026, të Presidentes për shpërndarjen e Legjislaturës së Dhjetë (X) të Kuvendit të Republikës së Kosovës; -si dhe të urdhërojë deputetët e Kuvendit që të vazhdojnë përpjekjet për zgjedhjen e Presidentit/Presidentes së re, brenda afatit kushtetues prej 60 ditësh nga nxjerrja e këtij aktgjykimi. Vendimi i Gjykatës Kushtetuese është thelbësor për respektimin e rendit kushtetues, funksionimin demokratik të institucioneve dhe garantimin e stabilitetit institucional në vend./Dosja.al