Ish-presidenti Trump tha të enjten se është i pafajshëm.

Atij do t’i paraqiten zyrtarisht akuzat të martën e ardhshme kur të paraqitet në gjykatë.

PROKURORI I POSAÇËM JACK SMITH: LIGJI ËSHTË I BARABARTË PËR TË GJITHË

Prokurori i posaçëm i Departamentit të Drejtësisë, Jack Smith, i cili ngriti akuzat ndaj ish presidentit Donald Trump tha në deklaratën e tij të parë publike pas aktakuzës se “ligjet e vendit janë të barabarta për të gjithë”.

Zoti Smith zhvilloi të premten, një konferencë të shkurtër me gazetarët në Uashington, por nuk pranoi që t’i bëheshin pyetje.

“Respektimi i shtetit të së drejtës, sundimi i ligjit, është parim themelor i Departamentit të së Drejtësisë dhe angazhimi i kombit tonë për sundimin e ligjit është një shembull për të gjithë botën”, tha ai.

Ai tha se çdo individ i vënë nën akuzë, konsiderohet i pafajshëm deri në momentin që i provohet fajësia dhe se prokurorët do të kërkojnë një proces gjyqësor të shpejtë dhe se “mezi prisnin” që të paraqisnin rastin e tyre.

Zoti Trump pritet të dalë për herë të parë para gjykatës, për këtë çështje, në një gjykatë të Majemit, në Florida, të martën e ardhshme, një ditë para se të festojë 77-vjetorin.

ISH-PRESIDENTI TRUMP MBAJTI DOKUMENTE TË KLASIFIKUARA NË TUALET DHE NË DUSHET E KLUBIT PRIVAT NË FLORIDA

Aktpadia ngre dyshimet se ish-presidenti Trump mbajti dokumentet e klasifikuara në tualet dhe në dushet e klubit privat në Florida, si edhe në ambjente të tjera si në sallën e vallëzimit, në një dhomë për mbajten e dokumentave, në zyrë dhe në dhomën e gjumit.

Prokurorët vunë në dukje se dhjetra mijëra persona vizituan klubin social në Mar-a-Lago, në periudhën mes fundit të Presidencës së zotit Trump në janar të 2021 deri në gusht të vitit 2022 kur FBI-ja kreu kontroll në rezidencën e tij.

Ata pretendojnë se pavarësisht këtij fakti, zoti Trump mbajti dokumentet e klafisikuara “në sallën e vallëzimit, në tualet, në dush, në dhomën e magazinimit, në zyrë dhe në dhomën e tij të gjumit”.

Pjesë e aktpadisë është edhe një fotografi ku duken kuti që janë vendosur njëra pas tjetrës në qendër të sallës së vallëzimit.

Aktakuza përmban gjithashtu fotografi të kutive të vendosura në dhomën e magazinimit, duke përfshirë një dokument të shënuar SECRET/REL TO USA, FVEY” që do të thotë informacion që mund t’u jepet vetëm anëtarëve të shërbimeve inteligjente të Australisë, Kanadasë, Zelandës së Re, Mbretërisë së Bashkuar dhe Shteteve të Bashkuara. Në foto dokumenti i klasifikuar është redaktuar.

AVOKATI THOTË SE ZOTI TRUMP SUGJEROI HEQJEN E DOKUMENTAVE QË MUND TË ISHIN TË DËMSHME

Sipas aktakuzës, avokati i zotit Trump, i cili nuk kishte dijeni për transferimin e dokumenteve, më 2 qershor 2022, identifikoi 38 dokumente të shënuara si “të klasifikuara” dhe i futi ato në një dosje, të cilën e mbështolli me një shirit ngjitës të pastër që ia kishte dhënë ndihmësi i ish-presidentit, Walt Nauta. Ky i fundit më pas mori avokatin që të takohej me ish presidentin.

“A gjete ndonjë gjë? Është gjë e mirë? Ështe e keqe?”, e pyeti zoti Trump avokatin e tij.

Avokati u tha autoriteteve federale se ai bisedoi me zotin Trump mbi dosjen me dokumente të klasifikuara dhe për mënyrën se si duhej vepruar me to. Avokati tha se ndërsa biseduan që avokati t’i merrte me vete dokumentet, zoti Trump bëri gjeste që sugjeronin se ai donte që avokati të identifikonte “çdo gjë që mund të ishte vërtet e keqe” dhe “e ke parasysh vetë, hiqe”. Avokati qartësoi se zoti Trump nuk artikuloi udhëzime të tjera përveçse veprimit që nënkputonte “heqje të faqeve të dokumenteve”.

Avokati u tha autoriteteve se ai nuk hoqi asnjë dokument nga dosja, por në vend të kësaj, ai u vu menjëherë në kontakt me FBI-ë dhe një avokat tjetër të zotit Trump. Në 3 qershor, sipas aktpadisë, edhe avokati i dytë i zotit Trump ia ktheu dokumentet FBI-së.

NDIHMËSI I ISH-PRESIDENTIT TRUMP ZHVENDOSI KUTI ME DOKUMENTA NËN UDHËZIMIN E TIJ

Sipas aktakuzës, zoti Nauta veproi “nën udhëzimin” e zotit Trump” duke zhvendosur “rreth 64 kuti” me dokumente nga një ambjent në një tjetër brenda rezidencës së tij në Mar-a-Lago.

Ai i bëri këto zhvendosje në periudhën 23 maj – 2 qershor 2022, sipas aktakuzës.

30 nga këto kuti dyshohet të jenë zhvendosur më 2 qershor, ditë kur ekipi ligjor i zotit Trump pritej të analizonte dokumentat.

Zoti Nauta i lëvizi kutitë disa orë pasi kishte folur shkurtimisht në telefon me zotin Trump, sipas prokurorëve. As zoti Trump dhe as ndihmësi i tij Nauta, sipas aktakuzës, nuk u treguan avokatëve të ish-presidentit se zoti Nauta kishte hequr dokumenta nga dhoma ku ato ruheshin më parë.

Sipas kronologjisë së ndërtuar nga prokurorët, zoti Trump u takua më vonë atë ditë me një nga avokatët e tij dhe zoti Nauta e shoqëroi avokatin në dhomën e ruajtjes së dokumenteve, nga ku ishin hequr ndërkohë 64 kuti me dokumenta.

SIPAS AKTAKUZËS ZOTI TRUMP U KISHTE TREGUAR DOKUMENTE PERSONAVE TË TJERË

Aktakuza e bërë publike të premten detajon dy raste kur zoti Trump dyshohet se ua tregoi dokumentet personave të tjerë. Në një nga rastet, në një takim me një shkrimtar në klubin e tij të Golfit në Bedminster, New Jersey, ai përshkroi një “plani sulmi” që zyrtarët federalë kishin përgatitur për të dhe që sipas njoftimeve të mëparshme të medias ishte një dokument i Pentagonit për një plan për të goditur Iranin.

Gjatë bisedës ai mendohet se e ka pranuar se e dinte që informacioni “ishte ende sekret”.

Në një takim të mëvonshëm, ai i tregoi përfaqësuesit të një komiteti në mbështetje të ambicjeve të tij politike, “një hartë të klasifikuar në lidhje me një operacion ushtarak”. Ai kishte pohuar se “nuk duhet t’ia tregonte atë personit dhe se personi nuk duhej të afrohej shumë,” thanë prokurorët.

Prokurorët vënë gjithashtu në dukje se si zoti Trump, në një konferencë për shtyp kur ishte president në vitin 2017, foli për rrjedhje mediatike dhe tha se nxjerrja e informacionit të klasifikuar është “një proces i paligjshëm” dhe se njerëzve të përfshirë “duhet t’u vijë turp nga vetja”.

Sipas raporteve të mediave amerikane, prokurorët e Departamentit të Drejtësisë kanë një regjistrim audio të ish-presidentit Donald Trump nga një takim i mbajtur pasi ai ishte larguar nga detyra, në të cilin ai thotë se kishte në zotërim një dokument të klasifikuar të Pentagonit në lidhje me një sulm të mundshëm ndaj Iranit.

Rrjeti CNN, i cili raportoi fillimisht për regjistrimin, njofton se në të, Trumpi sugjeron që ai donte të ndante informacionin me të tjerët, por nuk mund ta bënte dot, pasi nuk mund ta deklasifikonte dokumentin, meqë nuk ishte president.

Komentet mbi regjistrimin, të bëra në korrik të vitit 2021 në klubin e tij të golfit në Bedminster, në shtetin e Nju Xhersit, duket se bien ndesh me pretendimet e përsëritura të ish-presidentit se ai i kishte deklasifikuar dokumentet që kishte marrë me vete nga Shtëpia e Bardhë në Mar-a-Lago, në Florida, pas largimit nga detyra. Regjistrimi mund të jetë gjithashtu një provë kyçe për prokurorët, që kërkojnë të vërtetojnë se Trumpi e dinte se aftësia e tij për të mbajtur dokumente të klasifikuara ishte e kufizuar.

Një zëdhënës i Trumpit tha në një deklaratë se hetimi ishte “i pabazë” dhe përbënte “ndërhyrje të vazhdueshme në zgjedhjet presidenciale”.

Regjistrimi i është dhënë zyrës së prokurorit të posaçëm Jack Smith, që po heton prej disa muajsh rreth keqpërdorimit të mundshëm të dokumenteve të klasifikuara në Mar-a-Lago dhe nëse Trumpi, apo dikush tjetër, është përpjekur të pengojë në mënyrë kriminale hetimet.

Hetimi penal filloi vitin e kaluar pasi Administrata Kombëtare e Arkivave dhe Regjistrimeve njoftoi FBI-në për praninë e dokumenteve të klasifikuara në 15 kuti të gjetura në rezidencën e zotit Trump në Mar-a-Lago dhe të dorëzuara me vonesë tek Arkivat.

Hetuesit fillimisht kërkuan që ish presidenti të dorëzonte gjithë dokumentat e mbetura të klasifikuara, por pasi morën vetëm rreth 36 kuti gjatë një vizite në qershor të vitit 2022 në Mar-a-Lago, u kthyen me një urdhër kërkimi dy muaj më vonë dhe gjetën edhe rreth 100 dokumente të tjera të shënuara si të klasifikuara.

Prokurori special Smith, po heton gjithashtu edhe rreth përpjekjeve të zotit Trump dhe aleatëve të tij për të përmbysur rezultatet e zgjedhjeve presidenciale të vitit 2020. Një hetim paralele po për këtë çështje po kryhet edhe nga prokurorët në Atlanta, të shtetit Xhorxhia. Prokurorët e Nju Jorkut e kanë akuzuar zotin Trump në fillim të këtij viti ndërkohë për falsifikim të të dhënave të biznesit.

Sipas raportimit të CNN-it, regjistrimi është bërë gjatë një takimi në Bedminster mes ndihmësve të Trumpit dhe dy personave, që po punonin për autobiografinë e ish-shefit të kabinetit të Trumpit, Mark Meadows.

Sipas CNN-it, autobiografia e zotit Meadows përfshin një përshkrim të atij që duket të jetë i njëjti takim. Një avokat i zotit Meadows nuk pranoi të komentojë të mërkurën kur u kontaktua nga agjencia Associated Press.

CNN-i tha se dëshmitarët, përfshirë gjeneralin Mark Milley, Shefin e Shefave të Shtabit të Përbashkët, janë marrë në pyetje në lidhje me episodin. Një zëdhënës i gjeneralit Milley nuk pranoi të komentojë mbi njoftimet se ai ishte intervistuar.

Ish-presidenti amerikan, Donald Trump thotë se është paditur me akuza për keqpërdorim të dokumenteve të klasifikuara në pronën e tij në Florida, duke nxitur një ndjekje penale federale që është ndoshta më e rrezikshmja nga kërcënimet e shumta ligjore kundër tij ndërsa zoti Trump kërkon të rimarrë Shtëpinë e Bardhë.

Departamenti i Drejtësisë nuk kishte asnjë koment apo konfirmim të menjëhershëm.

Ish-presidenti amerikan, Donald Trump, shkroi në platformën Truth Social të enjten se administrata e presidentit Biden ka informuar avokatët e tij se ai është paditur.

Një person në dijeni për situatën, i cili nuk ishte i autorizuar për ta diskutuar atë publikisht, tha se avokatët e Trumpit u kontaktuan nga prokurorët pak para se ai të njoftonte në platformën e tij “Truth Social” se ai ishte paditur. Zoti Trump tha se do të dalë në gjykatë të martën pasdite në qytetin e Majamit.

Shtatë akuzat kundër ish-presidentit përfshijnë komplot për të penguar drejtësinë, mbajtje të qëllimshme të dokumenteve dhe deklarata të rreme, sipas dy burimeve në njohuri me aktakuzën.

Brenda 20 minutave nga njoftimi i tij, Donald Trumpi kishte filluar grumbullimin e fondeve për fushatën e tij presidenciale të vitit 2024.

Rasti shton thellimin e rrezikut ligjor për Trump-in, i cili tashmë është paditur në Nju Jork dhe përballet me hetime shtesë në Uashington dhe Atlanta që gjithashtu mund të çojnë në akuza penale.

Aktakuza lind nga një hetim njëmujor nga prokurori i posaçëm Jack Smith për të përcaktuar nëse Trumpi shkeli ligjin duke mbajtur qindra dokumente të klasifikuara në pronën e tij në Mar-a-Lago, dhe nëse Trumpi ndërmori hapa për të penguar përpjekjet e qeverisë për t’i rimarë ato.

Prokurorët kanë thënë se Trump mori afërsisht 300 dokumente të klasifikuara në Mar-a-Lago pasi u largua nga Shtëpia e Bardhë, duke përfshirë rreth 100 dokumenta që u sekuestruan nga FBI-ja gushtin e kaluar gjatë një kontrolli të shtëpisë që qartësoi peshën e hetimit të Departamentit të Drejtësisë.

Zoti Trump dhe ekipi i tij e kanë parë prej kohësh hetimin e këshilltarit special si shumë më të rrezikshëm se çështja e Nju Jorkut – si politikisht ashtu edhe ligjërisht. Ndihmësit e fushatës ishin përgatitur për pasojat që kur avokatët e Trump-it u njoftuan se ai ishte objektivi i hetimit, duke supozuar se nuk ishte çështja nëse do të ngriheshin akuzat, por kur do të bëhej një gjë e tillë.

Mbetet e paqartë se cilat do të jenë pasojat politike të menjëhershme dhe afatgjata për Trumpin. Aktakuza e tij e parë solli miliona dollarë në kontribute nga mbështetësit e zemëruar dhe nuk e dëmtoi Trumpin në sondazhe. Pa marrë parasysh se çfarë, aktakuza – dhe lufta ligjore që pason – do ta kthejnë Trumpin përsëri në qendër të vëmendjes, duke tërhequr vëmendjen nga kandidatët e tjerë që po përpiqen të ndërtojnë vrull në garën presidenciale të 2024-ës.

Një ish-agjent i FBI-së, i cili mori më shumë se 1.4 milionë dollarë dhe diamante për t’i shitur sekrete Rusisë dhe Bashkimit Sovjetik, një nga rastet më famëkeqe të spiunazhit në Shtetet e Bashkuara, vdiq të hënën në burg.

Robert Hanssen, 79 vjeç, vdiq në qelinë e tij në një burg federal në Florence të shtetit Kolorado, thanë zyrtarët e burgut.

Amerikani Hanssen besohet të ketë vdekur si rezultat i shkaqeve natyrore, tha për agjencinë e lajmeve Associated Press një individ që ka njohuri për çështjen. Individi foli në kushte anonime pasi nuk kishte autorizim për të diskutuar faktet në rrugë publike.

Robert Hanssen vuante dënim me burg të përjetshëm pasi u deklarua fajtor në vitin 2001 lidhur me 15 akuza për spiunazh dhe akuza të tjera.

Në vitin 1985 ai filloi t’i shiste të dhëna shumë sekrete Bashkimit Sovjetik dhe më pas Rusisë duke përfituar 1.4 milionë dollarë, diamante dhe fonde të tjera, sipas FBI-së.

Sipas Byrosë së Burgjeve, FBI-ja është njoftuar mbi vdekjen e famëkeqit Hanssen. Ai po vuante dënimin në një burg në Kolorado që nga korriku i vitit 2002.

Sekretari i Shtetit Anthony Blinken u bëri thirrje të martën të gjitha palëve në Kosovë, të punojnë për të ulur tensionet në veri të vendit. Shtetet e Bashkuara dënojnë dhunën e së hënës kundër trupave të KFOR-it, forcave të rendit dhe gazetarëve, që ai e quan “të papranueshme”.

Kjo është deklarata e dytë, që nga e premtja, që sekretari amerikan i shtetit fajëson qeverinë e Kosovës për acarimin e situatës. “Vendimi i qeverisë së Kosovës për të hyrë me forcë në ndërtesat e komunave, i acaroi thellë dhe pa nevojë tensionet”, shprehet zoti Blinken.

“Kryeministri Kurti dhe qeveria e tij”, thekson ai, “duhet të marrin masa që kryetarët e zgjedhur të komunave, t’i kryejnë detyrat e tyre të kësaj faze tranzicioni, në mjedise alternative, jo në ndërtesat e komunave dhe të tërheqin forcat policore përreth tyre.

Presidenti Vuçiç dhe qeveria e Serbisë duhet të ulin nivelin e gadishmërisë së forcave ushtarake serbe dhe t’i bëjnë thirrje banorëve serbë të Kosovës të mos kundërshtojnë KFOR-in dhe të mos kryejnë veprime të dhunshme”, thekson Sekretari Blinken.

Kryediplomati amerikan u bën thirrje Kosovës dhe Serbisë, siç shprehet ai “të ripohojnë menjëherë angazhimin për dialogun e ndërmjetësuar nga Bashkimi Evropian për normalizimin e marrëdhënieve”.

Sekretari i Shtetit Anthony Blinken u bëri thirrje të martën të gjitha palëve në Kosovë, të punojnë për të ulur tensionet në veri të vendit. Shtetet e Bashkuara dënojnë dhunën e së hënës kundër trupave të KFOR-it, forcave të rendit dhe gazetarëve, që ai e quan “të papranueshme”.

Kjo është deklarata e dytë, që nga e premtja, që sekretari amerikan i shtetit fajëson qeverinë e Kosovës për acarimin e situatës. “Vendimi i qeverisë së Kosovës për të hyrë me forcë në ndërtesat e komunave, i acaroi thellë dhe pa nevojë tensionet”, shprehet zoti Blinken.

“Kryeministri Kurti dhe qeveria e tij”, thekson ai, “duhet të marrin masa që kryetarët e zgjedhur të komunave, t’i kryejnë detyrat e tyre të kësaj faze tranzicioni, në mjedise alternative, jo në ndërtesat e komunave dhe të tërheqin forcat policore përreth tyre.

Presidenti Vuçiç dhe qeveria e Serbisë duhet të ulin nivelin e gadishmërisë së forcave ushtarake serbe dhe t’i bëjnë thirrje banorëve serbë të Kosovës të mos kundërshtojnë KFOR-in dhe të mos kryejnë veprime të dhunshme”, thekson Sekretari Blinken.

Kryediplomati amerikan u bën thirrje Kosovës dhe Serbisë, siç shprehet ai “të ripohojnë menjëherë angazhimin për dialogun e ndërmjetësuar nga Bashkimi Evropian për normalizimin e marrëdhënieve”.