MOSKË – Bombardues strategjikë me rreze të gjatë të ushtrisë ruse dhe kineze bënë patrullime të përbashkëta mbi Detin e Japonisë, Detin e Kinës Lindore dhe në perëndim të Oqeanit Paqësor, por herë pas here u shoqëruan nga avionë luftarakë nga shtete të paidentifikuara, tha Rusia të mërkurën.
Ministria ruse e mbrojtjes tha se një grup ajror i bombarduesve strategjikë të tipit Tupolev Tu-95 dhe kinezë Xian H-6K kryen një patrullim prej 8-orësh, të shoqëruar nga një grup avionësh luftarakë Sukhoi Su-30M, Su-35S dhe Shenyang J-11.
“Në faza të caktuara të patrullimit, mjetet strategjike u shoqëruan nga avionë luftarakë të shteteve të huaja”, tha ministria e mbrojtjes, duke shtuar se nuk u cënua hapësira ajrore e vendeve të tjera.
Ministria nuk i identifikoi “shtetet e huaja”.
“Gjatë patrullimit të përbashkët ajror, avionët rusë u ulën dhe u ngritën nga një fushë ajrore në Republikën Popullore të Kinës”, thuhet në njoftim.
Shtëpia e Bardhë tha të hënën se ballafaqimet e fundit të rrezikshme midis forcave amerikane dhe kineze në ngushticën e Tajvanit dhe Detin e Kinës Jugore pasqyrojnë një agresivitet në rritje nga ushtria e Pekinit që shton rrezikun e një gabimi prej të cilit “dikush mund të lëndohet”.
Kina tha se “masat e marra nga ushtria kineze janë plotësisht të arsyeshme, legjitime, profesionale dhe të sigurta”.
Thellimi i partneritetit “pa kufi” midis superfuqisë në rritje, Kinës, dhe titanit të burimeve natyrore, Rusisë, po shikohet nga Perëndimi me njëfarë ankthi, megjithëse është e paqartë se sa i thellë është ky partneritet.
Pasi Perëndimi vendosi sanksionet më të ashpra në historinë moderne ndaj Moskës për shkak të luftës në Ukrainë, presidenti Vladimir Putin tha se Rusia po kthehet drejt Azisë – dhe Kinës në veçanti – pasi e pa Perëndimin prej shekujsh si të rëndësishëm për rritjen ekonomike dhe teknologjike.
