MARSH I POPUJVE- Poezi nga VEHBI SKËNDERI, shkruar më 6.4.59

June 19, 2025

O njerëz, lidhi besa besë,

-Kudo që jini nëpër botë,

-Kush do një këngë e ka një shpresë,

Kush s’do të mbytet dheu me lotë,

Kush do një zog edhe një flutur,

Që nget mes grurit të jeshiltë,

Kush s’do të nxihet maj’i bukur

Agim’i kuq i trandafiltë!

.

Mos ndizen flakët atomike!

Në këmb’ për luftën më kreshnike:

Të mbrojmë fshatin dhe qytetin,

Të mbrojmë pyllin edhe detin,

Hardhitë dhe kallinjtë nd’arë,

Lavdinë, tempujt mijvjeçarë!

.

Ne duam njerzit, shpezët, bimët,

Ne duam dritë e gaz përhera,

Mos dridhen rrugëve jetimët,

Mos bëhen nënëzat të mjera!

Të flakim grindjet dhe mëritë

I shenjtë para nesh qëllimi

-Nuk vlejn’ intrigat dhe kufitë..

Sa vlen e ardhmja dhe njerzimi.

.

Mos ndizen flakët atomike!

Në këmb’ për luftën më kreshnike:

Të mbrojmë fshatin dhe qytetin,

Të mbrojmë pyllin edhe detin,

Hardhitë dhe kallinjtë nd’arë,

Lavdinë, tempujt mijvjeçarë!

.

O njerëz, duart të shtërngojmë,

S’na ndajnë mure, male e dete.

Për paqën ne gjithkund luftojmë

-Për nipat, mbesat dhe për vete.

Do i bëjmë kopshte shkretëtirat,

Ne rrojm’në shekullin e Djellit,

E nisëm sulmin për hapsirat

-Ja çels’i portave të qjellit,

.

Mos ndizen flakët atomike!

Në këmb’ për luftën më kreshnike:

Të mbrojmë fshatin dhe qytetin,

Të mbrojmë pyllin edhe detin,

Hardhitë dhe kallinjtë nd’arë,

Lavdinë, tempujt mijvjeçarë!

6.4.59

• twitter

  Follow
• facebook
• linkedin

Fjalë kyçe: Vehbi Skënderi