Presidentja e Kosovës, Vjosa Osmani mori pjesë në ceremoninë e hapjes së ambasadës së re të Kosovës në Kuala Lumpur në Malajzi.

Osmani u prit me nderime nga kryeministri malajzian, Anwar Ibrahim.në Kompleksin qeveritar “Perdana Putra” në Putrajaya të Malajzisë.

Gjatë kësaj vizite, Presidentja Osmani ka përuruar hapjen e Ambasadës së Republikës së Kosovës në Kuala Lumpur, Malajzi.

“Një dritare e re për vendin tonë, me plot mundësi për bashkëpunim edhe më të thellë me Malajzinë. Një prani edhe më e fuqishme diplomatike në një nga rajonet më strategjike në Azi.

Një shtëpi më shumë e Kosovës, ku do të avancohen interesat e qytetarëve tanë, do të fuqizohen aleancat tona dhe do të mbrohet me vendosmëri shenjtëria e sakrificës së popullit të Kosovës për liri e shtet”, ka theksuar presidentja e Kosovës Vjosa Osmani.

Pas takimit, Presidentja Osmani dhe kryeministri Ibrahim kanë mbajtur një konferencë të përbashkët për media në Kuala Lumpur.

Kryeministri Ibrahim tha se do të ketë konsultim dypalësh në nivel zyrtar sa më shpejt të jetë e mundur, për të siguruar që të ndikojnë sa më shpejt në marrëdhëniet tregtare dhe ekonomike ndërmjet Malajzisë dhe Kosovës.

Ndërsa Osmani ka falënderuar kryeministrin Anwar Ibrahim, për mbështetjen e vazhdueshme të Malajzisë për Kosovën. Ajo tha se në takim riafirmuan angazhimin për lidhje më të forta diplomatike, dhe partneritete më të ngushta  ekonomike në fushat me interes të përbashkët.

Ajo ka mirëpritur edhe vendimin e Malajzisë për heqjen e vizave për qytetarët e Kosovës, si një akt besimi dhe miqësie midis dy vendeve tona.

Gjithashtu, Osmani ka falënderuar kryeministrin Ibrahim për mbështetjen e vazhdueshme të Malajzisë për anëtarësimin e Kosovës në organizatat ndërkombëtare duke thënë se Kosova është e gatshme të kontribuojë edhe në platformat e mëtejshme rajonale si ASEAN. bw