……………………………….

1. Lexim drite në gjeth

Drurë që dalin nga ankthi i natës në ag,
Kandil i dridhshëm i hënës u shua
Mbi kryet e varrit të vjetër

Orët e uritura të dritës
Kërkojnë frutat e territ
Që natës rënkuan
Gjinjve të tu

Erdh ora e leximit të diellit
Në fijen e barit që dridhet …

2.TIRANIA E DRITËS
———————
“S’ka më gjumë! Makbethi vrau gjumin “!..
Po krimi i madh
Shekuj më parë ish kryer …

Bota fle në këmbë
Si kalë plak
Me luftëra e statuja në shpinë

Të gjitha vrasjet tjera
Anmistohen si të miturit

E panatë bota,atë mot e sot,
Duke pritur t’i shfaqet
Fantazma e një ëndërre,
Oh,vetëm një,veç një ëndërr,o Zot !

Mashtrimi i madh i shtatë ngjyrave
Vdes në një lulezjarri

Bota e panatë
Vuan tiraninë e dritës…

3.S’më thot gja dita e sodit…
——————-
S’më thotë gja dita e sodit,
Baladë,shkrue n’lot të zogut

Edhe hana më ndjek rrugës
Fener morgu,n’derë të kullës

Edhe kullat,shpat në shpat
Natojnë natën si kaçak !

4.NJERIU ËSHTË PYLL…
————————-
Njerëzit janë pyje,
Në pyll-gjithë kafshët

Cilën të vras
Të shpëtoj Njeriun ?!

5…
Pse kaq xhelozë zogjtë :
Në këngën e tyre
Asnjë fjalë poeti ?

E në jetë të jetëve
Veç një këngë këndojnë !..

6….
Mjer mjerimi
E lum lumnija
Po u panë në sytë e tu !

7…
Po shkrin borë e marsit
Gjurmë zogjsh edhe njerëzish
Shkojnë qiellit,si ré…

8…
U bëra më i vjetër
Se babai i vdekur
Cili është fëmijë ?

9…
Ti,një e hënë që e fillon javën,
Unë,një e martë që vij fill pas teje
Të djelën të pres …

10…
Natën mbi Valbonë zhburrërohen malet
Përmbys i dorëzohen
Lumit emërgrua !

11…
Gratë kanë për Atdhe
Tokën ku bëhen nëna
Në strehën time,çelën zogjtë e malit..

12…
Me njërin sy qan
E me tjetrin qesh,
Në cilin jam unë ?

13…
Ky lis që s’ghethon
Çfarë ka në trup:
Varkë,a arkëmort ?

14…
Një ditë gjithë statujat
Njëra -tjetrën do vrasin…
Bota pa poetë….

15…
Kthehem nga tejbota,
Veç një ditë jetova me ty
Një ditë atje,ketu njëqin vjet…

Vargje nga Mjeshtri i Madh
Poeti i mirënjohur
Hamit ALIAJ