Ambasada e SHBA në Kosovë ka mirëpritur marrëveshjen e arritur mes Kosovës dhe Bashkimit Evropian për zbatimin e Ligjit për të huajt, duke theksuar se çdo ndryshim që prek komunitetin serb duhet të bëhet në konsultim me pjesëtarët e tij.

“E përgëzojmë angazhimin e palëve në këtë çështje për të arritur zgjidhje të pranueshme për të dyja palët”, tha një zëdhënës i ambasadës për Radio Evropa e Lirë.

Më herët vendimi i qeverisë së Kosovës u përshëndet edhe nga Britania. Marrëveshja ka nisur zbatimin nga 15 marsi dhe ofron leje të përkohshme qëndrimi dhe njohje të letërnjoftimeve të serbëve që nuk janë pajisur me dokumente të Kosovës, siç e parasheh ligji për të huajt dhe automjetet.

Ligji në fjalë u kërkon të gjithë banorëve që nuk kanë dokumente të Kosovës të pajisen me leje qëndrimi, ndërsa automjetet me targa të huaja nuk do të mund të qarkullojnë në Kosovë më gjatë se tre muaj, ose vetëm në bazë të autorizimit.

Hyrja në fuqi e vendimit nuk do t’i prekë serbët e Kosovës për periudhë 12-mujore.