Agjencitë amerikane të inteligjencës kanë marrë informacione se Kina në javët e fundit mund të ketë dërguar një ngarkesë me raketa kundërajrore në Iran për konfliktin e tij me Shtetet e Bashkuara dhe Izraelin, raporton New York Times.

Zyrtarët thanë se të dhënat e inteligjencës nuk janë përfundimtare nëse raketat është dërguar dhe se nuk ka prova që raketat kineze janë përdorur ende kundër forcave amerikane ose izraelite gjatë konfliktit.

Agjencitë e inteligjencës kanë vlerësuar se Kina po mban fshehurazi një qëndrim aktiv në luftë, duke u lejuar disa kompanive të dërgojnë kimikate, karburant dhe komponentë që mund të përdoren në prodhimin ushtarak në Iran për luftën. Raketat me lëshim nga supi, të njohura si MANPADS, janë të afta të rrëzojnë avionë që fluturojnë ulët.

Kina ka kohë që ngurron të dërgojë pajisje ushtarake të përfunduara në Iran, por disa zyrtarë në qeveri duan që Pekini t’u lejojë kompanive të saj të furnizojnë drejtpërdrejt forcat iraniane të sigurisë gjatë konfliktit me Shtetet e Bashkuara.

Nëse qeveria kineze do të lejonte dërgesën e raketave, kjo do të ishte një përshkallëzim i ndjeshëm dhe një tregues se të paktën disa nga udhëheqësit e Kinës po punojnë në mënyrë aktive për të shkaktuar një disfatë ushtarake amerikane në një luftë që ka përfshirë Lindjen e Mesme.

Informacioni në lidhje me mbështetjen e mundshme kineze për Iranin vjen pasi agjencitë amerikane të inteligjencës kanë parë prova se Rusia i ka ofruar ushtrisë iraniane inteligjencë specifike satelitore për të ndihmuar Korpusin e Gardës Revolucionare Islamike të Iranit të synojë anijet amerikane, së bashku me instalimet ushtarake dhe diplomatike në të gjithë Lindjen e Mesme. gsh