Ambasada e Shteteve të Bashkuara të Amerikës e ka vënë flamurin në gjysmë shtizë në nderim të policit Afrim Bunjaku i cili u vra dje në një sulm terrorist në veri të Kosovës.

“Presidentja Vjosa Osmani e deklaroi ditën e sotme, 25 shtatorin, Ditë Zie në Republikën e Kosovës”, shkruan ambasada amerikane në Twitter.

“U bashkohemi institucioneve të Kosovës në zinë për humbjen e policit Afrim Bunjaku”.

“Sot flamuri ynë në ambasadën amerikane është në gjysmë-shtizë për nder të tij”.

Kryeministri Albin Kurti ka deklaruar se situata në Kosovë është planifikuar nga një formacion terrorist. Sipas tij bëhet fjalë për një strukturë mercenare e cila është e organizuar dhe përkrahur politikisht, financiarisht dhe logjistikisht nga Beogradi.

“Policia e Kosovës është ajo që informon për të dhënat nga terreni por ajo që duhet tashmë që kemi dhe pjesëtarë të atij formacioni profesionit, ushtarak policor të huaj që kreu sulmin terrorist dhe vra mizorisht Afrimin i kemi edhe të plagosur dhe tre të vrarë prej tyre dhe gjithashtu të arrestuar besoj që procesi në vijim do të na japë më shumë të dhëna mbi atë se kush janë këta dhe kush saktësisht janë këta? Si hynë në Kosovë? Kur dhe kush janë urdhër dhënësit e dirigjuesit e kësaj përpjekje të dështuar për ta destabilizuar Republikën e Kosovës? Nga ajo çfarë kemi mësuar janë ato çfarë i kemi menduar edhe më herët që bëhet fjalë për një formacion terrorist e kriminal profesionist i cili i ka planifikuar gjatë këtë çfarë kanë kryer sot dhe që nuk paraqesin një bandë të kontrabandës, por një strukturë mercenare, e cila është e përkrahur politikisht, financiarisht dhe logjistikisht nga Beogradi zyrtar”, tha Kurti.

Kurti shtoi se polici i vdekur Afrim Bunjaku me trimërinë e tij ka ndriçuar rrugën e shtetit të Kosovës. Ai tha se do të ndjekim rrugën ligjore të gjithë së bashku deri në fund.

Një natë më parë janë ndezur qirinjtë për nder të policit të vrarë në krye të detyrës në Basnjë të Zveçanit. Të pranishëm në ndezjen e qirinjve ishte kryeministri Albin Kurti, përfaqësues të institucioneve të Kosovës, ambasadori amerikan dhe shumë policë e qytetarë të tjerë.

Ndërkohë sot Kosova ka shpallur ditë zie kombëtare në dnerim të policit të rënë në krye të detyrës.

Prishtinë – Dita e hënë (25 shtator) do të jetë ditë zie kombëtare në nderim të pjesëtarit të Policisë së Kosovës, Afrim Bunjaku, i cili u vra në pjesën veriore të Kosovës të banuar kryesisht me serbë etnikë pas një sulmi të organizuar nga një grup kriminal ende i paidentifikuar saktë për organet e rendit.

Ishte një sulm terrorist.

Gjithçka filloi në orët e para të mëngjesit të 24 shtatorit, kur një grup i armatosur rëndë në hyrje të fshatit Banjskë të Zveçanit – komunë e banuar me shumicë serbe – qëlluan me armë zjarri mbi trupat e Policisë së Kosovës, duke shuar jetën e një zyrtari policor.

Grupi që ngriti në nivele të larta shkallën e egërsisë në veri, sipas autoriteteve kosovare, nuk ka qenë në përbërje të civilëve të rëndomtë që ngrenë krye herë pas here në këtë zonë, por ka ngërthyer brenda vetes së paku 30 pjesëtarë të trajnuar, ushtarakë e paramilitarë serbë,

“Sulmi ka ardhur dhe po vazhdon akoma nga njësitet profesionale të përgatitura dhe me një përbërje prej mbi 30 personave, të uniformuar, të maskuar dhe të pajisur ushtarakisht, me mjete të blinduara dhe armë të rënda të llojeve të ndryshme”, tha paraditen e së dielës Ministri i Punëve të Brendshme të Kosovës, Xhelal Svecla, përmes një kumtese në rrjete sociale.

Pjesëtarët e këtij grupi, pas vrasjes së policit kosovar në krye të detyrës dhe plagosjes së tre policëve të tjerë, gjetën strehë në Manastirin e Banjskës, ku u barrikaduan për orë të tëra dhe shkëmbyen të shtëna me organet e rendit gjatë gjithë ditës së diel, duke tentuar të provokonin kryengritje më të gjërë.

Kryeministri i Kosovës, Albin Kurti, grupin e personave që kreu sulm të armatosur në Veri, ku mbeti tragjikisht i vrarë një oficer policie e cilësoi “formacion profesionist” të mbështetur e finacuar nga Serbia. Ai tha se shteti do të ngadhënjejë gjithmonë kundër bandave dhe dhunuesve të rendit e ligjit.

“Bëhet fjalë për një formacion terrorist e kriminal, profesionist, i cili e ka planifikuar dhe përgatitur gjatë këtë çfarë ka kryer sot. Nuk paraqet një bandë të kontrabandës, por një strukturë mercenare, e cila është e përkrahur politikisht, financiarisht e logjistikisht nga Beogradi”, tha kryeministri.

Kjo bandë që cenoi sigurinë dhe paqen në veriun e trazuar të vendit, u neutralizua nga Policia e Kosovës dhe operacioni policor gëzoi mbësheje të gjërë ndërkombëtare. Tre pjesëtarë të bandës terroriste u vranë, tre të tjerë u plagosën dhe gjashtë u arrestuan, ndërsa të tjerët u arratisën në Serbi.

Shtetet e Bashkuara të Amerikës (SHBA) folën me gjuhën ekzakte. Jeffrey Hovenier, ambasadori amerikan në Prishtinë, dënoi ashpër “sulmet e dhunshme dhe të orkestruara” ndaj Policisë së Kosovës, ndërsa kërkoi që dhunuesit të mbahen përgjegjës dhe të përballen me drejtësinë.

“Policia e Kosovës ka legjitimitet të plotë për të garantuar sundimin e ligjit, në përputhje me Kushtetutën dhe ligjet e Kosovës. Ne e pranojmë dhe respektojmë rolin e saj si përgjigja e parë ndaj emergjencave dhe situatave të krizës”, tha ambasadori Hovenier herët në mëngjes.

Reagimi i Bashkimit Evropian (BE) ndaj vrasjes së policit kosovar në krye të detyres nga një bandë e organizuar terroriste fillimisht ishte ngurrues. Përfaqësuesi i Lartë i BE-së për Politikë të Jashtme dhe të Sigurisë, Josep Borrell, kërkoi “vërtetimin e fakteve” për sulmin ndaj policisë.

Megjithatë, ndonëse e dënoi “në termat më të ashpër të mundshëm” sulmin ndaj organeve të rendit dhe kërkoi që “autorët përgjegjës të përballen me drejtësinë”, njëkohësisht bëri thirrje që “të gjitha palët” t’i ndalin “veprimet armiqësore” në veriun e vendit që tash e një kohë nuk gjen prehje.

“Më shumë jetë të pafajshme janë në rrezik nga vijimësia e akteve armiqësore rreth Manastirit të Banjskës. Këto sulme duhet të ndalen menjëherë”, tha kryediplomati evropian përmes një komunikate, derisa bëri thirrje që palët të punojnë në de-përshkallëzimin e situatës.

Në deklaratën e dytë, tonet ishin më të ashpra. U hoqën të gjitha dilemat. Dhuna ndaj Policisë së Kosovës u cilësua “sulm i tmershëm terrorist dhe frikacak”, derisa Emisari Special i BE-së për dialogun Kosovë-Serbi, Miroslav Lajçak, thjesht bëri thirrje që palët t’i kthehen negociatave për normalizimin e marrëdhënieve.

“Dënoj fuqishëm sulmin e tmerrshëm kundër Policisë së Kosovës. Dhuna e çfarëdo forme është absolutisht e papranueshme. Zemra ime shkon për viktimat, familjet dhe kolegët e tyre. Autorët duhet të dalin para drejtësisë. Të gjithë duhet t’i kthehen dialogut menjëherë”, tha diplomati sllovak.

Të gjithë ishin njëzëri në dënimin e sulmit ndaj Kosovës dhe shprehjen e solidaritetit, përfshirë shtetet e QUINT-it (Shtetet e Bashkuara, Gjermania, Franca, Italia dhe Britania e Madhe), derisa nuk munguan as reagimet nga shtetet fqinje, përfshirë Shqipërinë, Malin e Zi, Maqedoninë e Veriut, por edhe Kroacinë.

Për sulmin dhe vrasjen e rreshterit policor, përvec niveleve të larta shtetërore, kanë reaguar edhe ish-diplomatë, eurodeputetë, gazetarë, studiues të fushave të ndryshme e vëzhgues të zhvillimeve politike në Ballkanin Perëndimor, duke u pozicionuar krah Kosovës dhe kundër akteve destabilizuese të Serbisë.

Presidenti i Serbisë, Aleksandër Vuçiç, në një konferencë për media në Beograd, mohoi cdo lidhje me grupin terrorist që vrau një polic dhe shkaktoi pasiguri të madhe në veri. Ai akuzoi për gjithçka të ngjarë kryeministrin Kurti dhe bashkësinë ndërkombëtare, duke përdorur retorikë lufte dhe armiqësore.

“Fajtori për atë që po ndodhë në veri – me ndihmën e bashkësisë ndërkombëtare – është Kurti. Gjatë gjithë kohës ka provokuar dhe vazhdon të provokojë. Dhe më vjen keq që një grup i serbëve ka rënë në provokimet e tij. Kurti dëshiron konflikt dhe luftë”, tha ai në konferencën e tij të jashtëzakonshme.

Ai tha ndër të tjera se sulmi i së dielës në fshatin Banjskë, ndodhi për shkak se, ashtu papritmas “disa serbë të Kosovës” u rebeluan duke ngritur barrikada dhe duke nxitur më pas reagimin e Policisë së Kosovës. Ua faturoi të gjithën serbëve kosovarë. Megjithatë, vrasjen e “një polici shqiptar” e dënoi.

“Serbët dhe jo njerëzit nga Serbia qendrore, siç gënjyen në mediat e Prishtinës, por nga Kosova u rebeluan, duke mos dashur të vuajnë më nga terrori i Kurtit. Në asnjë mënyrë, nuk dua ta justifikoj vrasjen e një polici shqiptar dhe as nuk mund ta justifikoj. Është një akt i dënueshëm”.

Raundi i fundit i negociatave diplomatike nën kujdesin e BE-së përfundoi me pozicione të acaruara nga të dy palët dhe me “pasione të pashuara” dhe ndërsa diplomatët në Bruksel e Uashington po e humbin gradualisht kontrollin, skenën kanë filluar ta zotërojnë bandat krimnale të inkursuara nga Serbia.

Afrim Bunjaku është polici i Kosovës që humbi jetën në krye të detyrës, teksa po i bënte ballë serbëve në fshatin Banjska të Leposavçit.

Persona të armatosur i kanë bllokuar rrugën makinës së policisë me dy kamionë në aksin Mitrovicë-Leposaviç. Më pas ata kanë qëlluar në drejtim të makinës së policisë, ku për pasojë humbi jetën Bunjaku.

50-vjeçari nga Samadrexha e Vushtrrisë, me pozicion rreshter, prej vitesh ka shërbyer në uniformat blu të vendit të tij. Babai i dy djemve dhe një vajze ishte transferuar në Zveçan që pas dorëheqjes së bujshme të serbëve nga strukturat policore.

Vetëm para një jave Afrim Bunjaku mori mirënjohje për shërbimin e kryer në Policinë e Kosovës, lajm i cili u bë i ditur nga kolegët e tij, që sëbashku ndanë edhe një foto në grup.

“Dashtë Zoti që ti të jesh dëshmori i fundit që bie në altarin e lirisë”, kanë shkruar ata.

Ndërkohë reagimin më prekës për viktimën që deri në momentet e fundit ishte në dispozicion të Kosovës e ka bërë i afërmi i policit.

I afërmi teksa shpreh pikëllimin për ngjarjen e rëndë, veçon më së shumti punën e bërë në mbrojtje të integritetit territorial dhe sovranitetit të vendit, për të cilin thekson se e ka bërë nder e krenari deri në frymën e fundit.

“Të vdesësh për atdhe është sikur të rilindësh përsëri”, është shprehja në të cilën familjarët kanë vendosur ta veçojnë që në nisje të shkrimit, frazë që qëndron në një pankartë të vendosur sot në hyrje të qytetit të Prishtinës në Kosovë.

Një pjesëtar i policisë së Kosovës është vrarë dhe një tjetër është plagosur në një sulm në veriun e banuar me shumicë serbe, në një ngjarje që mund të rrisë tensionet me Serbinë, në një periudhë përpjekjesh të vështira për normalizimin e marrëdhënieve ndërmjet tyre.

Policia tha së në orët e hershme të mëngjesit njësite e saj për reagim të shpejtë e kanë vërejtur se në një urë në hyrje të fshatit Banjskë, janë vendosur dy kamionë pa targa duke e bllokuar lëvizjen. Tri njësi të policisë që shkuan në vendin e ngjarjes u qëlluan me arme zjarri përfshirë bombat e dorës dhe predha nga minahedhësi, me ç’rast u goditën dy zyrtarë policorë.

Autoritetet thanë se rreshteri i policisë Afrim Bunjaku nga fshati Samadrexhë i komunës së Vushtrrisë, vdiq nga pasojat e plagëve që pësoi gjatë sulmit.

Në orët e pasdites policia tha se janë vrarë tre nga sulmuesit dhe është arrestuar një prej tyre. Po ashtu thuhet në një njoftim të policisë, në njërin nga objektete prej nga është shtënë mbi policisë është gjetur dhe konfiskuar një sasi konsiderueshme e armëve dhe municioneve.

Policia e Kosovës tha se për shkaqe sigurie ka mbyllur për dy vendkalimet kufitare me Serbinë në veri, Jarinjë dhe Bërnjak.

Kryeministri Kurti i cili mblodhi Këshillin e Sigurisë paraditen e së dielës, tha në mesditë se sulmet në zonën ku është vrarë zyrtari policor, janë duke vazhduar akoma.

“Janë së paku 30 persona të armatosur rëndë, profesionistë, ushtarakë a policë, të cilët ndodhen nën rrethimin e forcave tona policore dhe të cilët i ftoj që të dorëzohen te organet tona të sigurisë”, tha kryeministri Kurti në një konferencë me gazetarë në Prishtinë së bashku me zëvendësdrejtorin e policisë së Kosovës Fehmi Hoti, në të cilën u publikuan fotografi ku shihen persona të armatosur dhe makina të blinduara afër Manastirit ortodoks në fshatin Banjskë.

“Kjo autoblindë nuk është e policisë së Kosovës”, tha kryeministri Kurti duke treguar pamjet e makinave pa targa. “Janë automjete që nuk i posedojnë serbët lokal dhe askush që është civil në Republikën tonë”, tha ai.

“Ne e dënojmë këtë sulm kriminal e terrorist. Krimi i organizuar me mbështetje politike, financiare dhe logjistike nga Beogradi zyrtar po e sulmon shtetin tonë. Në këtë betejë ne mbrojmë dhe zbatojmë ligjin, mbrojmë dhe ruajmë qytetarët pa dallim dhe Kosovën e pavarur. Kriminelët ekzekutorë dhe urdhërdhënësit e tyre do të dështojnë, do të kapen, gjykohen e dënohen”, tha Kryeministri Kurti përmes një shkrimi në rrjetet sociale.

Ai tha se qeveria e Kosovës dhe institucionet e shtetit janë të gatshme dhe të bashkërenduara për t’iu përgjigjur “krimit dhe kriminelëve, terrorit dhe terroristëve. “Vrasja e një polici dhe plagosja e një polici tjetër në veriun e Kosovës, e planifikuar, orkestruar dhe ekzekutuar nga bandat kriminale serbe, është sulm ndaj rendit dhe ligjit në veriun e vendit, është sulm ndaj Kosovës”, shkroi ai.

Kisha Ortodokse Serbe në Kosovë e dënoi ashpër sulmin, duke vlerësuar se “ky është një incident i rëndë me implikime potencialisht të gjera. Prandaj, është e domosdoshme të ndërmerren të gjitha veprimet e nevojshme për të ruajtur qetësinë dhe rendin”.

Dioqeza Rashkë Prizren, duke i shprehur ngushëllime familjes së oficerit të vrarë, shprehet thellësisht e shqetësuar pasi, sipas raporteve të fundit, një grup i armatosur dhe i maskuar depërtoi portat e manastirit në Banjskë duke përdorur një automjet të blinduar. Individë të armatosur dhe të maskuar raportohet se po lëvizin nëpër mjediset e manastirit.

Ministri i Brendshëm Xhelal Svecla, tha se personat e armatosur janë rrethuar brenda Manastirit dhe “është koha e fundit që të dorëzohen”.

Forcat paqeruajtëse të udhëhequra nga NATO-ja e dënuan vrasjen ndërsa theksuan se po ndjekin nga afër situatën në Banjskë dhe janë të gatshme të reagojnë, nëse kërkohet.

“Komandanti i KFOR-it është në kontakt me të gjithë mekanizmat ndërkombëtarë, përfshirë Bashkimin Evropian, shefin e Shtabit të Përgjithshëm të ushtrisë së Serbisë dhe institucionet e Kosovës, dhe është duke punuar për të gjetur një zgjidhje”, thuhet në një deklaratë të forcave të KFOR-it.

Vrasja e pjesëtarit të policisë së Kosovës në veri, nxiti reagime në shkalë të gjerë. Presidentja e Kosovës Vjosa Osmani, e cila ndodhet në Nju Jork, tha se i ka ndërprerë të gjitha takimet dhe do të niset për në Kosovë. “Këto sulme dëshmojnë edhe njëherë fuqinë destabilizuese të bandave kriminale, të organizuara nga Serbia, të cilat prej shumë kohësh, siç është dëshmuar edhe me sulmet ndaj pjesëtarëve të KFOR-it, gazetarëve e qytetarëve, po e destabilizojnë Kosovën dhe rajonin”.

Ajo tha se sulmet e organizuara kundër forcave të rendit janë sulme kundër sovranitetit të Kosovës.

“Përveç dënimit të ashpër të këtij agresioni të hapur të Serbisë ndaj Kosovës, pres që aleatët tanë ta mbështesin Kosovën në përpjekjen e saj për vendosjen e rendit dhe ligjit si dhe ruajtjen e sovranitetit në çdo pjesë të Republikës së Kosovës”, thuhet në reagimin e Presidentes Osmani.

Ambasadori amerikan në Prishtinë, Jeff Hovenier në reagimin e tij përmes një komunikate tha se Shtetet e Bashkuara i dënojnë ashpër sulmet e orkestruara, të dhunshme ndaj policisë së Kosovës.

“Ne po e vëzhgojmë situatën nga afër dhe i dënojmë këto akte të dhunshme ndaj autoriteteve legjitime të Republikës së Kosovës. Autorët duhet dhe do të mbajnë përgjegjësi dhe do të dalin para drejtësisë. Ata duhet të ndërpresin menjëherë sulmet e tyre”, thuhet në deklaratën e ambasadorit Hovenier.

Ambasadori amerikan tha se policia e Kosovës ka përgjegjësi të plotë dhe legjitime për zbatimin e sundimit të ligjit sipas kushtetutës dhe ligjeve të Kosovës. “Ne e njohim dhe respektojmë rolin e saj si reaguesi i parë në situata emergjente dhe krize. Ne vlerësojmë bashkërendimin e vazhdueshëm ndërmjet Policisë së Kosovës, Misionit të BE-së për Sundimin e Ligjit në Kosovë dhe KFOR-it”, shkroi ai.

Shefi i politikës së Jashtme të Bashkimit Evropian Josep Borrell dënoi siç tha: “me fjalët më të ashpra të mundshme sulmin e shëmtuar nga një bandë e armatosur kundër policëve të Kosovës në Banjskë në veri të Kosovës”.

Në një komunikatë ai tha se, “të gjitha faktet rreth sulmit duhet të vërtetohen. Autorët përgjegjës duhet të përballen me drejtësinë. Më shumë jetë të pafajshme janë në rrezik nga armiqësitë e vazhdueshme në rrethinat e Manastirit të Banjskës. Këto sulme duhet të ndalen menjëherë”.

Zoti Borrell tha se EULEX-i, si reagues i dytë i sigurisë, është në terren dhe në kontakt të ngushtë me autoritetet dhe KFOR-in. “BE-ja dhe shtetet e saj anëtare vazhdimisht u bëjnë thirrje të gjithë aktorëve që të punojnë për të shtensionuar situatën në veri të Kosovës”, thuhet në komunikatë.

Kryetari i parlamentit të Kosovës Glauk Konjufca e dënoi ashpër, siç u shpreh ai, sulmin terrorist të strukturave kriminale të drejtuara nga Serbia.

“Ky është një sulm i drejtpërdrejt ndaj rendit kushtetues, ndaj veprimeve tona për rend dhe ligj dhe cenim i sovranitetit dhe sigurisë së vendit tone”, tha zoti Konjufca duke i kërkuar Bashkimit Evropian dhe Shteteve të Bashkuara që ta dënojnë Serbinë për këtë agresion të hapur kunër Kosovës.

Kryetari i Partisë Demokratike të Kosovës, Memli Krasniqi u shpreh i tronditur nga lajmi për vrasjen e policit duke e cilësuar atë, sulm të drejtpërdrejtë ndaj shtetit të Kosovës.

“Sot, në këtë moment të dhimbjes, qëndrojmë të bashkuar në përkrahje të policëve tanë, të cilët, përkundër sfidave ditore e sulmeve të bandave kriminale të kontrolluara nga Beogradi, po mbrojnë sovranitetin shtetëror në pjesën veriore të shtetit tonë”, shkroi ai duke bërë thirrje që partnerët ndërkombëtarë të Kosovës të dënojnë qartë sulmin dhe t’i kërkojnë Serbisë urgjentisht ndalimin e ndërhyrjeve në territorin e Kosovës dhe provokimit të mëtejmë të situatës.

Kryetari i Lidhjes Demokratike të Kosovës, Lumir Abdixhiku, tha se sulmi terrorist ndaj policisë së Kosovës dhe vrasja e një polici në detyrë, janë sulme ndaj Republikës së Kosovës dhe vet rendit Kushtetues.

“Sulmet e bandave kriminale e terroriste me adresë nga Beogradi s’mund ta zmbrapsin Kosovën nga e drejta për vendosje të rendit, ligjshmërisë e vet sovranitetit. Institucionet e rendit e drejtësisë të sjellin autorët e këtij krimi sa më parë para drejtësisë”, shkroi ai duke nënvizuar se në këto momente të vështira, Kosovës i duhen miq e aleatë.

Kryetari i Aleancës për Ardhmërinë e Kosovës, Ramush Haradinaj, tha se ky sulm terrorist është goditje e rëndë mbi paqen dhe qëndrueshmërinë jo vetëm në Kosovë por edhe në rajon.

“Beogradi duhet që urgjentisht të heqë dorë nga veprimet e veta destabilizuese e luftënxitëse me pasoja të paparashikueshme, jo vetëm për Kosovën por edhe për Serbinë. Është investuar shumë për paqen dhe askush nuk do të lejohet ta rrezikojë atë”, shkroi ai.

Shqipëria dënon vrasjen

Presidenti i Shqipërisë Bajram Begaj, dënoi me forcë vrasjen duke theksuar se, “ky akt i organizuar kriminal është cënim i rëndë i rendit dhe sigurisë së Republikës së Kosovës”. Në një postim në rrjetet sociale Presidenti Begaj i bëri thirrje komunitetit ndërkombëtar, “të reagojë me vendosmëri ndaj urdhëruesve dhe zbatuesve të këtij akti tejet të rëndë për stabilitetin e Kosovës dhe paqen në rajonin e Ballkanit Perëndimor”.

Duke i shprehur ngushëllime familjes së policit të vrarë, presidenti Begaj tha se “në këto momente nevojitet më shumë se kurrë qetësi, maturi dhe bashkëpunim i ngushtë me KFOR dhe aleatët. Shqipëria është gjithmonë në mbështetje të Kosovës”, shkroi ai.

Kryeministri shqiptar Edi Rama, tha se “tragjedia e humbjes së jetës së efektivit të Policisë së Kosovës është këmbana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur. Kriminelët që i morën jetën një njeriu të pafajshëm, i cili shërbente nën uniformën shtetëtore të forcave të rendit të Republikës së Kosovës, duhet të dalin përpara drejtësisë”.

Në një postim në rrjetet sociale kryeministri Rama shkroi se “komuniteti euroatlantik duhet të mbledhë të gjithë forcën e tij imponuese dhe të ulë pa kthim, Kosovën dhe Serbinë në tryezën e Dialogut të Normalizimit. Thirrja e një konference të jashtëzakonshme paqeje, nën mbikëqyrjen e garancinë e Bashkimit Europian dhe Shteteve të Bashkuara, e njëkohësisht marrja e të gjitha masave të jashtëzakonshme me KFOR-in, për moslejimin e eskalimit të mëtejshëm të situatës, janë një domosdoshmëri strategjike jo vetëm për rendin e sigurinë në Kosovë sot, po edhe për paqen e të ardhmen e rajonit nesër, përpara sesa kriza e zgjatur në Veriun e Kosovës të dalë jashtë kontrollit e të kthehet në një zjarr destabilizues për krejt rajonin”.

Duke e dënuar sulmin me armë ndaj policisë dhe shtetit të Kosovës, ministri i Jashtëm shqiptar Igli Hasani tha se “akti i sotëm kriminal është kërcënim për sigurinë e stabilitetin e rajonit tonë dhe autorët duhet të përballen sa më parë me drejtësinë. Shqipëria është në krah të Kosovës në këto momente të vështira që kërkojnë gjakftohtësi, në bashkëpunim të ngushtë me aleatët e partnerët”.

Vrasja e pjesëtarit të policisë ndodhi në një periudhë tensionesh mes Kosovës dhe Serbisë të cilat dështuan javën e kaluar të shënojnë ndonjë përparim në procesin e bisedimeve të ndërmjetësuara nga Bashkimi Evropian për normalizimin e marrëdhënieve ndërmjet tyre.