Kryetari i Partisë Demokratike, Sali Berisha gjatë një interviste të dhënë për ‘Çim Peka LIVE’ në SYRI TV, ka folur në lidhje me zhvillimet politike në vend.

I pyetur nga gazetarin Çim Peka për takimin përbashkues të deputetëve të opozitës, zhvilluar në 5 shtator, Berisha është shprehur se, në PD ka pasur një çarje, por asnjëherë një çarje përfundimtare, sidomos me grupin e deputetëve që drejtohen nga Gazment Bardhi.

I pyetur nga gazetari Çim Peka, nëse do ta ndajë postin e kryetarit të partisë nga posti i kryeministrit, kryetari i PD-së, Sali Berisha është shprehur se kjo çështje do të kërkojë një votë të dytë.

Gjatë intervistës në ‘Çim Peka LIVE’, kryetari i PD-së, Sali Berisha deklaroi se opozita do ti fitojë zgjedhjet, pasi sipas tij, Edi Rama është një kalbërisë që rri në postin e kryeministrit, pasi opozita nuk ngrihet në një lëvizje të fuqishme dhe të qëndrueshme.

Pas mbledhjes përbashkuese të 5 shtatorit ku morën pjesë 43 deputetë të PD-së, kanë nisur edhe pyetjet se kush do të jetë kryetari i grupit parlamentar të opozitës.

I pyetur nga gazetari Çim Peka, kryetari i PD-së Sali Berisha tha gjatë intervistës së tij në ‘Çim Peka LIVE’, se drejtuesi i grupit parlamentar do të zgjidhet gjatë takimeve progresive që do të bëhen mes deputetëve të PD-së.

INTERVISTA E PLOTE E KRYETARIT TE PD-se, SALI BERISHA:

Çim Peka: Përshëndetje! Pas gati 2 vitesh, opozita më në fund ka arritur të bëjë një mbledhje për të unifikuar qëndrimet në Kuvendin e Shqipërisë, kundër qeverisë së Edi Ramës. Pas vendimit personal të Lulzim Bashës për të përjashtuar nga grupi parlamentar Sali Berishën, ish-themeluesi e kësaj partie, ish-kryeministër, ish-president, opozita kaloi në përplasje brenda grupit parlamentar edhe në bazë, deri në zgjedhjet e 6 marsit 2022 ku u pa se kush ishte shumica, po gjithsesi grupi parlamentar i opozitës ishte i ndarë deri të martën. Në një mbledhje të thirrur nga Gazment Bardhi, 43 deputetë së bashku me zotin Berisha ju përgjigjën dhe kanë vendosur që të unifikojnë qëndrimet kundër qeverisë së Edi Ramës. Për të folur mbi atë se çfarë do të ndodhë pas këtij takimi të parë dhe cili do të jetë fati i opoizitës parlamentare dhe jo vetëm, kam sonte të ftuar zotin Sali Berisha. Zoti Berisha, mirëmbrëma.

Sali Berisha: Mirëmbrëma!

Peka: Të falënderoj për kohën. Pas gati 2 vitesh një mbledhje e grupit parlamentar të PD-së jo për probleme të brendshme, po për tu përballur me Edi Ramën. 2 vite parlament dhe vetëm pas 2 vitesh, një mbledhje që ka si objekt betejën me regjimin e Edi Ramës.

Berisha: Mendoj se mbledhja ishte një zhvillim i rëndësishëm, ishte një hap i natyrshëm në drejtimin e duhur dhe i rëndësishëm në disa aspekte. Kjo mbledhje e thirrur nga Gazment Bardhi, kapërcej mbi problematikën, e cila ka ekzistuar, nuk mund të themi se nuk ka ekzistuar, por kapërcej mbi këtë problematikë për qëllime dhe objektiva shumë më të mëdha. Dua të shpreh këtu që të jemi korrekt, deputetët që drejtohen nga Gazment Bardhi kanë meritën e padiskutueshme të cilën unë e kam shprehur në mënyrë të përsëritur sepse ata pranuan primaret dhe kandidatët e primareve. Me këtë akt, ata dëshmuan mbështetjen tek liria, vota e lirë në gjirin e PD-së. E kam thënë që atëherë dhe e them përsëri, që ky akt programor në themele të PD-së, ishte një kontribut dhe investim i madh që ata bënë. Ka patur, padiskutim kundërshtira, probleme, por në tërësi ata deputetë që ju patë të mbledhur së bashku, plus disa të tjerë që nuk ishin dhe të tjerë që mund të bashkohen, janë deputetët e PD-së dhe ky ishte një zhvillim shumë pozitiv. Ju shtruat problemin se çfarë do të bëhet në të ardhmen? Takimet do të vazhdojnë në mënyrë që tu japin përgjigje të gjitha problemeve që presin të zgjidhjen, po me këtë vullnet të mirë, shkallë përgjegjësie dhe gatishmëri.

Peka: Pas përplasjeve që ka pasur brenda PD-së, ka dy procese për bashkimin. Njëri është procesi njerëzor dhe tjetri politik. Çështja e procesit njerëzor duket se u kapërcye. Tani është momenti i procesit politik. Në historinë tuaj politike 30 e ca vjeçare keni qenë i gatshëm të pranoni ribashkime me këdo që ka ikur prej jush në mënyrë që ai individ apo grup individësh kanë qenë të gatshëm të përballen me kundërshtarin politik. Po e nis nga 2001 me grupet politike ndoshta më të ashpra ndaj jush që nga 1997, që janë bashkuar me bandat ndaj jush. Në 2005, me hapjen e madhe. Jeni të gatshëm edhe pas 8 janarit të famshëm të pranoni këdo që është i gatshëm të përballet me regjimin e Edi Ramës. Kjo vjen për faktin se ju nuk e keni frikë konkurrencën e brendshme, apo se qëllimi i vetëm është që të bashkoni këdo kundër Edi Ramës.

Berisha: Kam një shpjegim të tillë. Së pari në politikë nuk ka sentimente personale, por ka interesa dhe parime politike. Unë këtë kam mbajtur gjatë gjithë karrierës time dhe e quaj qëndrim më të drejtë. Së dyti, asnjëherë nuk duhet të shkelmosh kontributin e tjetrit. Të gjithë ata që supozuat apo i thatë, ata kanë qenë njerëz me kontribute në PD, mes tyre njerëz me kontribute themelore dhe në një farë mënyre ata janë kthyer tek kontributet e tyre, me të drejtë. Së treti, tani vijmë tek rasti konkret. Nuk ka patur në rastin konkret një çarje të themi përfundimtare. Ka pasur një çarje, kjo nuk mohohet, por asnjëherë një çarje përfundimtare, sidomos me grupin që drejton Gazment Bardhi dhe që është një grup i rëndësishëm i deputetëve, si kryetar i grupit parlamentar, por edhe deputetët e tjerë, për Sali Berishën dhe PD-në ka dy persona të cilët e qartë si kristali janë vënë në dispozicion dhe shërbim të Edi Ramës dhe unë e them me bindjen më të plotë se është njëlloj sikur të ftosh Taulant Ballën në koalicion. Kjo nuk mund të ndodhë. Çimi, një opozitë e kontrolluar nga Edi Ramë është një gjëmë kombëtare.

Peka: Kanë qenë ministër në qeverinë e Nanos apo Metës në mos gabohem dhe e pranuat në 2001, Preç Zogajn… Po Lufter Xhuvelin…

Berisha: Preç Zogaj është një nga themeluesit e PD-së. Natyrisht me konceptet e tij të veçanta, por unë nuk mund të ja mohoja Zogajt kontributin që ai ka në themelet e kësaj partie.

Peka: Ju thatë një takim të Bashës me Ballën. Unë po ju them ka disa takime të Bashës me Ballën. Ka dhe diçka tjetër, Edi Rama shprehet kudo se tashmë janë në bashkëqeverisje se Balla është në qeveri si ministër i Lulzim Bashës. Kur thoni vetëm këta të dy jo, ju keni pranuar dhe Lufter Xhuvelin në qeveri kur keni pasur nevojë.

Berisha: Kam pranuar Lufter Xhuvelin sepse ai ishte kryetari një partie reale, Agrare qendër e majtë, e cila ka pranuar programin e PD-së, ka paraqitur vërejtjet e veta, dhe kemi qeverisur shumë mirë së bashku. Kjo është në kuadrin e një koalicioni disa partiak. Është një gjë normale. Ndërsa lidhur me këta dy persona, këta sot janë nën shërbim të Edi Ramës, ose po aq në shërbim sa Tom Doshi. Por Tom Doshi nuk bën protagonizëm, rri në punën e vet, merr ato tendera, jep ato 3-4 vota. Thashë, se në parimin se këtu është një relacion fatal që krimi shndërrohet dhe vota në krim. Ai fiton 3 mijë tendera, ato shndërrohen në vota dhe ai vazhdon e fiton 5 mijë tendera. Ky është një relacion i tmerrshëm në Shqipëri. Kurse Lulzim Basha është peng. Nuk mund të them se është peng Tom Doshi, se do ja thoja menjëherë Tom pengu, po jo nuk ështe peng. Tom Doshi ndjek agjendën e tij. Lulzim Basha është peng i faktuar me dosjen e larjes së parave. Ata që shkojnë mbas pengut bëjnë zgjedhjen e tyre. Por që Lulzim Bashës ja mbylli Edi Rama dosjen këtë nuk ka shqiptar që nuk e di. Dhe e ka lënë mundësinë për ta hapur, sepse njëri prokuror nuk e ka firmosur, pra jemi në këto kushte dhe ju e patë. Njoftimin për Lulzim Bashën në parlament e bëri kryetarja e parlamenti që nuk ndodh kurrë. Pra është një fakt.

Peka: Meqenëse përmendët rastin e Tom Doshit. Tashmë është evidende se mediat e kontrolluara nga Rama kanë filluar një sulm frontal ndaj Doshit me gjoja një dosje të zbuluar, por në fakt nuk kishte referenca. Ato që janë shkruar në mediat shqiptare. Jo vetëm burime, por është e dukshme që Rama në pamundësi për ta përdorur më partinë e Doshit, por tenton të fuqizojë dhe të zëvendësojë Doshin me Lulzim Bashën. Biznesmenë shumë afër Ramës, që shkojnë e ankohen pranë tij, për sulme të Bashës, përgjigja e Ramës është; Ndihmojeni se ka nevojë. Të njëjtën gjë bënte me banditët në 2014, kur ju vinin gjoba biznesmenëve. E njëjta sjelle është me të. Sa merakoseni se një konvertim i Bashës në një Tom Dosh, që me parët e Ramës grumbullon vota, mund ta dëmtojë opozitën në 2005.

Berisha: Asnjë ndryshim në rrafshin politik mes Tom Doshit dhe Lulzim Bashës nuk ka. I vetmi ndryshim është se Tom Doshi është i hapur në koalicion me Ramën kundër Sali Berishës. Por Tom Doshi u bë me parti sepse Edi Rama shiti akademinë Skënder Gjinushit dhe i dha partinë Doshit. Pra bëri një pazar të turpshëm, më të paskrupullt që mund të bënte kush, por ky është një realitet. Të njëjtin pazar bëri me Lulzim Pengun. Pasi e mori me dosje peng, mori logon e PD-së dhe kërkon të ja japë atij, ta bëjë kryetar me logo të vjedhur. Pra atje shiti akademinë, në këtë rast e mori peng dhe me sadushët e tij i jep logon. Ngjashmëria është identitike. E vetmja gjë është se Toma është i sinqertë, thotë jam aleat, jam kundër Sali Berishës. Nuk jam opozitë unë, jam me qeverinë. Po i bien një e nga një të gjitha petët e lakrorit të Lulzim Bashës. I vetmi moment është këtu. Çdo njeri që është i lirë, se nuk është vetëm Lulzim Basha peng, ka dhe të tjerë, sepse është një shoqëri që noton mbi krimi. Kjo është e vërteta dhe kështu pengjet nuk janë kaq të paktë, por çdo njeri i lirë që e ndjen veten të lirëi them, se më mirë të shkojë me çdo parti tjetër se me partinë, grupin e pengut, sepse pengu kurrë nuk mund të marrë vetë vendime.

Peka: Pse …

Berisha: Marrim disa aspekte. Merr Edi Ramën. Grabiti mandatin e tretë, u paraqit si i mandatuar për 3 herë rresht. Ku është sot, më i përçmuari i Ballkanit. I ra çdo maskë në raport me Kosovën. Duke patur si shpatë Demokleu çështjen McGonigal, u hodh në një sulm të paimagjinueshëm ndaj një vendi fqinj, nuk po them fare shqiptar, një vendi vëlla, apo një vendi motër, por ndaj një vendi fqinj, ai që ka minimumin e minimumit të seriozitetit, integritetit nuk mund të sillet kurrë si një rrugaç siç u soll ky me Kosovën. Ky për të mbuluar vjedhjen e mandatit, për të mbuluar McGonigalin, nuk jam shqiptar unë tha, jam EuroAtlantik, paçka se flamurin e NATO e ka zhdukur nga e gjithë Shqipëria. Shkoni te kryeministria, ne jemi anëtarë të NATO-s, jo BE-së. Unë e kam pasur gjithmonë edhe flamurin e BE-së, por flamur për anëtarësim kemi të NATO-s ne. Aty e hoqi flamurin e NATO, e zhduku ky EuroAtlantisi dhe iu vërsul si EuroAtlantik, jo si shqiptari që ka vjedhur mandatin, jo shqiptari që ka rekrutuar McGonigalin, ju vërsul Albin Kurtit dhe tha se tani më erdhi rasti që unë të bëhem de fakto kryeministri i Kosovës. Dmth të bëhem ndërmjetësi dhe zgjidhësi i problemit. I vuri sanksione Albin Kurtit, i drejtoi letër presidentit Macron dhe kancelarit Scholz, hartoi dhe statusin e shoqatës së Komunave me shumicë serbe në Kosovë, i dërgoi ato dhe ndërmori turin Ballkanit, më i dështuari në historinë e Ballkanit. Organizoi takimin, atje nuk e priti Albin Kurti, këtu nuk i erdhi Albin Kurti. Albin Kurti është aty ku është kryeministër, me pozitivitetin dhe negativitetin e tij, por një kryeministër i një vendi të lirë, të pavarur, një kryeministër i cili zbaton ligjet dhe kushtetutën e vendit të tij. Po të jap vetëm një shembull. Sami Lushtakun dhe Fredi Belerin. Sami Lushtaku nga burgu shkon dhe bën betimin si kryetar i Komunës ku e votuan zgjedhësit e tij. Kurse në Shqipëri Fredi Beleri nuk lejohet me urdhër politik të bëjë betimin, duke shkelur kushtetutën, duke shkelur ligjet e vendit, duke shkelmuar, poshtëruar drejtësinë e cila në asnjë rast nuk ka vendosur që Beleri të mos betohet. Për të marrë një vendim të tillë, gjykatat e Shqipërisë duhet ti heqin Fredi Belerit të drejtën e votës ose të drejtën për tu zgjedhur. Por këto nuk kanë rendësi. Këtu ka një njeri i cili është edhe ligj, edhe maliq, edhe Pëllumb Gjokë edhe Bajr, edhe ky dhe ai. Dhe ky njeri krijon një krizë, jashtëzakonisht problematik me Greqinë. Pse? Greqia nuk ka dyshim se është për rajonin zëri më i rëndësishëm në BE. Por për hirë të vërtetës, përveç Maqedonisë çështjes së emrit, që ishte lënë që në fillim, Greqia nuk ka penguar asnjëherë një vend të rajonit në procesin e integrimit në BE. Përkundrazi Greqia ka mbështetur këtë proces. Por nëse ti e shtyn Greqinë në një vendim skizoid, që ta ka lakmi edhe Kim Jong Un, që nuk mund ta marrësh kurrë, se kur ka qenë Fatos Nano në pushtet kur deputetë të PD-së janë betuar në burg dhe kanë marrë mandate, sepse parimi universal i prezumimit të pafajësisë është parim që respektohet në çdo vend të lirë. Dhe ky tani për interesat mafioze të tij, në trojet e Himarës, në pjesën e bregut, ky kërkon me çdo kusht që ta nxjerrë jashtë afatit të betimit Fredi Belerin. Do të them vetëm një gjë. Himarën e ka qeverisur Vasil Bollano, kujto pak bregun si ishte. As nuk kishte pushtime. Bollano nuk ka bërë asnjë ndërtim të vetin, respektoi banorët. Kurse sot aty ka lëshuar pushtues, trafikantë droge, qeveritarë që po zhbijnë edhe ullinjtë, rrafshojnë kodra, sepse kanë para të pafundme. Nuk e duron dot Edi Rama të humbasë këtë pasuri të madhe nga duart e veta. Ndaj dhe prish marrëdhëniet me Greqinë, po e po, edhe kjo shumë keq, sepse aty kemi 1 milionë shqiptarë. Ç’po të kërkon Greqia. Nuk të ka kërkuar që ta nxjerrësh nga burgu këtë, që unë të them që në burg është politik, të them se operacioni ishte absolutisht si i sigurimit të shtetit. Shkuan dhe e morën gruan, nënën e tre fëmijëve e kanë nxjerrë nga shtrati në 2 të natës dhe këto i bënte sigurimi, se nuk ka kushtetutë që i lejon. Dhe hajde se ke marrë paratë, kur ajo nuk kishte marrë asnjë qindarkë, por vetëm për terror, me një operacion të montuar kryekëput të tipit të sigurimit të shtetit dhe e fut në burg. E fut në burg vetëm e vetëm për të mos bërë betimi. Plus që McGonigal pranoi fajësinë në Nju Jork dhe thuhet se do të pranojë fajësinë edhe në Uashington dhe unë nuk besoj se mund ta shpëtojë njeri nga drejtësia amerikane, për aktin absolutisht armiqësor që ka bërë ndaj partnerit kryesor të Shqipërisë, korruptimin e kryezbuluesit të FBI-së së Nju Jorkut. Kanë shpërthyer gjirizet e aferat e vjedhjeve të shekullit, djegësat. Edi Rama, Erion Veliaj, Engjëll Agaçi, kanë dalë kupola kryesore e tyre. Urdhër arresti që lëshoi ndaj Arben Ahmetajt, kundërmoi dhe u kthye në një bumerang të tmerrshëm për Edi Ramën. E para një zv/kryeministër në arrati, e dyta Ahmetaj i çon selame. Ja kanë prerë rrogën, por nuk i kanë hequr mandatin. Kjo ështe e pashembullt. Ai me urdhër mandat arresti ndërkombëtar, por njëkohësisht deputet, por kush e arreston atë me imunitetin e deputetit, kërkush nuk e arreston. Gjëja më qesharake, sepse ai është me mandat. Po pse e le, e le se ja ka frikën. Njëlloj Saimir Tahiri. Tahiri e dorëzoi vetë mandatin, nuk ja hoqi ky. Por kjo verë gjithashtu dëshmoi dominimin total të skapit të partisë nga Edi Rama. Unë ftoj çdo shqiptar të rikujtojë fjalët e Edi Ramës dy vite më parë, kërcënimin e tij të egër ndaj skapit që e krijuan vetëm si parti dhe mos e dhëntë Zoti këtë e atë se do i bëjmë, këtë dhe atë. Lexoni fjalët e tij për skapin e partisë. Çfarë ishte ky ndryshim themelor. Ishte ky ndryshim sepse skapi i partisë dëshmoi se nuk bën asnjë hap, nuk guxon të bëjë pa miratimin e Ramës.

Peka: Konkretisht tek SPAK. Dyshimet e mia mbi pamundësinë e opozitës për të bërë opozitë. Një gjë është e dukshme. Sot SPAK ka në zyrë të gjithë aferën kriminale të zgjedhjes së 2021 dhe këtë e them me sigurinë më të plotë. Ka të gjitha përgjimet e bandave që kanë qenë shtabi elektoral i Ramës nga Dubai, Brukseli, Amsterdami, Parisi. Që të gjitha janë në SPAK. Ata nuk kanë gjë në dorë për ti hetuar, sepse hetimi është bërë, ata kanë në dorë ti shtyjnë në kohë siç bënë me rastin e shtabit elektoral të Benet Becit në Shkodër. E kishin gati që në 4 janar sipas njoftimit të SPAK dhe e ekzekutuan vetëm pas zgjedhjeve lokale në Shkodër. Diplomatë të huaj po kontaktojnë gazetarë këtu dhe po japin mesazhin që nëse SPAK fshin dosje, apo nuk vepron, do të pajisen mediat me këto dosje. Pra në një farë forme ato janë të pamundura për tu zhdukur. Por opozita në këto kushte kur shikohet se qeveria është Rama-Dumani, një koalicion sepse Dumani jep emrat se kush është nën hetim dhe kush duhet të largohet dhe ai i largon paraprakisht. Akoma asnjë ministër në detyrë nuk është ndaluar. Që të gjitha fletë arrestet për ministra të larguar. Kur keni të gjitha këto fakte, a kompleksohet opozita nga SPAK dhe a duhet drejtuar realisht i gjithë aksioni opozitar nga bashkëqeverisja Rama-Dumani.

Berisha: Pyetje e drejtë është kjo. Nuk ka më asnjë lloj dyshimi që skapi është degë e ekzekutivit. Këtë gjë e kam deklaruar fill pas miratimit të ligjeve pa konsensus me opozitën nga shumica dhe kjo gjë sot faktohet në mënyrën më të qartë, si drita e diellit. Të vësh në arrest në Ministrinë e Shëndetësisë, x apo y dhe të mos ngresh padi, të mos marrësh në ndjekje penale Ilir Beqjan, i cili duhet ta dinë shqiptarët, nga të gjithë ministrat që janë sot, që në fillimet e tij ka pasur një afrim, miqësi me Edi Ramën, i cili çdo hap e ka bërë me Ramën dhe të gjitha marrëveshjet i ka shkruar duke patur avokat publik kryesor, Edi Ramën. tek sterilizimi, Beqja ka 4 firmat përcaktuese dhe 7 firma të tjera që rrjedhin nga këto. Të çosh këtë dosje në gjykatë, pa ngritur akuzën ndaj Beqjes do të thotë të tallesh në mënyrën më cinike me hetimin, me detyrën që të kanë ngarkuar, me ligjin. Dhe kjo ndodhi me Erion Veliaj, me Manastirliun. Të garantoj se Kontrolli i Lartë i Shtetit ka dorëzuar dosje përvëluese në SPAK për Ogerta Manastirliun. Por Ogerta shkon nga një ministri, në tjetrën. Nuk ka diskutim se fjala e tij në asamblenë e fundit, ishte një apoteozë në një aspekt, e aleancës së qartë, apo shpalljes së SPAK degë e ekzekutivit. Çfarë pret opozita? Opozita nuk mund të presë kurrë që SPAK tu japë përgjigje problemeve të mëdha të krijuara në vend. Duhet vetë tu japë përgjigje. Nëse opozita nuk arrin, flet për krimin dhe nuk bën përgjegjës për çdo gjë Edi Ramën, opozita është e dështuar në qëllimet e veta. Po marr vetëm rastin Rama-Gjoka, Gjoka-Rama. Po kush ja bëri byrazer Edi Ramës, Pëllumb Gjokën. Pëllumb Gjoka është një qytetar shkodran, apo nga është, Velipoja, i përfolur, i denoncuar nga Sali Berisha dhe qytetari dixhital, për vrasje, për grabitjen e 390 mijë metrave katrorë tokë, për të gjitha që janë sot në dosje. Pra i denoncuar për të gjitha këto, megjithatë Pëllumb Gjoka fiton statusin e investitorit strategjik dhe miku i tij me kokë Luca është njeriu më i dashur për Edi Ramën. Dhe thuhet se kazinoja ku është këtu në një motel, kanë marrë licencën për hotel me 5 yje. E thonë të gjithë se kjo është e ndarë dhe e sigurtë që Olsi është brenda. Pra kush ja bëri byrazer Pëllumb Gjokën, Edi Ramës, cili nga ministrat, ministret. Edi Rama është vetë koka e krimit dhe me Pëllumb Gjokën kanë gjetur njëri-tjetrin. Kush i liroi Bajrët se nuk janë organizatë kriminale. Ky prokuror të cilin Edi Rama donte me çdo kusht ta emëronte kryetar të skapit. Flitet për Xhevahirin tani që mori 1 mln në Shkodër, por dosjen ja çuan nga Tirana, Xhevahirit dhe ja çuan për ta liruar. Ja çoi Pëllumb Gjoka me prokurorët e vet për ti liruar. Pra ai që hiqej se po ma nxini faqen është më faqeziu dhe më i implikuari se cilido tjetër në këtë vend. Kujt i thotë ai për korrupsionin, kur shkonte e merrte gërshërë dhe pinca me një krah dhe dilte e paditur se çfarë thoshte, ja me çfarë operohej.

Peka: Z. Berisha këto i denonconi çdo ditë… të kthehemi tek thelbi. Nëse pas 2013, Edi Rama ka qeverisur në aleancë me krimin, tani ai po qeveris në aleancë me SPAK. Godet kundërshtarët e tij brenda llojit edhe për të krijuar imazhin se drejtësia po bën punën dhe mban nën shantazh individë apo funksionarë të opozitës me hetime. A ju duket se rotacionin në këtë vend e ka në dorë SPAK, nga bandat që kanë qenë deri në 2021. Dhe tjetra, a i është nënshtruar kësaj ideje opozita, se është në fatin e SPAK se kush duhet të ikë dhe kush duhet të vijë në pushtet.

Berisha: Së pari, nëse pritet rotacion nga skapi që është thjeshtë një seksion i ekzekutivit, ai rotacion nuk ndodh as në vitin 2040. Ata që presin rotacion nga SPAK, ata kanë një problem logjik shumë të madh. Asnjë, çdo gjë që bëhet sot është marrëveshje mes tyre dhe në një mënyrë apo në tjetër, shfrytëzohet nga Edi Rama. A po merret SPAK me opozitën? Ditë e natë, të merret sa më shumë. Heqin fashikuj, fshehin fashikuj. Bëjnë gati, pastaj u kujtohej fashikujt që kanë fshehur. Që SPAK të hetojë …

Peka: Me individë të opozitës…

Berisha: Absolutisht, ta them unë ty. SPAK shkel çdo parim.

Peka: A është marrë edhe me ju?

Berisha: Me mua? Të paktën Engjëll Agaçi dhe Edi Rama kanë dërguar aty me qindra vendime dhe për ato unë i ftoj të marrin çdo vendim timin. Nuk kam asnjë problem. Të hetojnë gjëja më normale. Të falsifikojnë gjëja më e turpshme, më kriminale. Që të hetojmë edhe njëherë, është gjëja më normale. Por të zbatojnë urdhra politikë, ti mbahen orientimeve politike është gjëja më kriminale.

Peka: Keni informacion se kanë tentuar të falsifikojnë dokumente?

Berisha: Absolutisht.

Peka: Në Spak.

Berisha: Të sigurtë. Pa asnjë diskutim…

Peka: Kundër jush?

Berisha: Të sigurtë, pa asnjë diskutim. Por duan të nxjerrin këmbën dhe nuk e nxjerrin. I ftoj ta nxjerrin. Nëse ecin në këtë mënyrë, nëse e marrin dosjen. Shkon në Gjykatë të Lartë skapisti dhe merr dosjen e padisë, në gjykatë të lartë, ku i interesuari kërkon kërkon të çoj Taulant Ballën në Gjykatën Kushtetuese, siç përcakton ligji dhe kushtetuta dhe skapisti, apo skapistja, e mban dosjen sepse është vegël e Taulant Ballës, që ti mohojë tjetrit procesin e ndershëm gjyqësor që i takon me ligj, kushtetutë ajo shkelmon të drejtat themelore të njeriut, dhe ajo juriste që nuk është ajo, por është një bandite e mirëfilltë e cila nuk ka një dallim të madh me ata që rrinë në strofullat e tyre. Kjo në zyrën e shtetit, me urdhër të një ministri më banditi që ka Shqipëria sot. Taulant Balla është ministri më i lidhur, me dokumente tani, me bandat dhe ti shkon e i merr dosjen origjinale, dhe nuk ja jep avokatit që do ta çojë në Gjykatën Kushtetuese, i thotë jo, se më duhet. Ti mbaj kopjen se dosjen do e çosh për gjykim dhe ti në këtë mënyrë tregon se bëhesh një oficere e vjetër e sigurimit të shtetit se një motër biologjike e Taulant Ballës. Ky është vetëm një shembull, por ka shembuj të tjerë sa të duash mbi ta. Dosjet se këta kanë tani edhe atë, BKH-në, aty ka njerëz të ndershëm, sikundër në skap ka njerëz të ndershëm, por ka kriminelë ama. Ka njerëz që kanë marrë 200 mijë euro për të liruar vrasësin. Ka njerëz si këta. Sa thonë për Xhevahirin mori, thonë se mori 1 mln. Por nëse mori ky kaq, ky Kondili mund të ketë marrë 1 milionë bashkë me atë tjetrin nga Pëllumb Gjoka, për të dërguar dosjen në Shkodër. Mos harrojmë se një prokuror i arrestoi ata dhe ai prokuror tani ka dalë jashtë shërbimit sot. I arrestoi dhe ai u përjashtua nga vettingu. U përjashtua nga vetingu edhe prokurorja që arrestoi Bardhok Planën. Nëse ai do të kishte qenë në burg, nuk do e kishin vrarë këta, sepse ky i kishte pasur në listë. Ky Gjoka paska pasur listën se kë do vrasim, miku i Edi Ramës. Në të gjithë këtë konglomerat, pushtet krim-krim pushtet në të cilin noton shoqëria shqiptare, skapi ka një rol absolutisht nga më të rëndësishmit për Edi Ramën.

Peka: Doktor, në gjithë këtë pasqyrë që bëhet, cilat janë nismat që do të ndërmarrë opozita në shtator për tu përballur ekzaktësisht me këtë panoramë, as më shumë e as më pak, regji, ndërkohë që simbolet tuaja, të drejtat ligjore që i takojnë kësaj selie mbahen peng, siç thoni ju, nga zoti Rama e cila është edhe e provuar? Ju deshën dy vite të bëni një mbledhje të përbashkët grupi ndërkohë që pak më shumë se një vit duhet për të ardhur zgjedhjet e përgjithshme politike. Çfarë do të bëni, do të prisni dhe të shpresoni se Edi Rama do ju japë logon apo do vendosni të organizoheni dhe opozita të ketë një emër kur të garojë?

Berisha: Dje ne publikuam librin e zi të zgjedhjeve. Është publikimi më serioz i opozitës në këto dy vite dhe ne kemi faktuar aty se në këtë vend krimi shndërrohet në votë, vota shndërrohet në krim.

Peka: Zoti Berisha, a ju duket se po harxhoni energji për të faktuar diçka që zoti Rama e pranon publikisht?

Berisha: Kemi një problem. Ata të cilët mendojnë siç po mendoj unë janë të shumtë, por shumica mendon i vjedh por i fiton zgjedhjet. Por, ata që e thonë këtë është njësoj sikur të thonë se gjëja e vjedhur është e hajdutit, s’është e imja dhe kjo është tymerrësisht e rëndë. Ne po përpiqemi se çdo shqiptar të kuptojë se ky i ka vjedhur, nuk i ka fituar zgjedhjet. Kt, me të gjitha ato që bëri më 14 maj , me logo, pa logo, me rregjistrim, pa rregjistrim, me para krimi, me banda, me çdo gjë ky mori 100 mijë vota më shumë se opozita. Por po ti kthesh në vota ato që bëri ai, minimumi 200 mijë-250 mijë vota janë. Atëherë ne jemi në këtë fazë. Ne duhet të bindim shqiptarët se me Edi Ramën zgjedhje nuk ka dhe duhet të ngrihemi për largimin e tij nga qeveria në mënyrë që të zhvillojmë zgjedhje të lira. Ky është qëllimi i opozitës, më madhor se çdo qëllim tjetër.

Peka: Dhe mendoni se do të kemi mjaftueshëm mbështetje të shqiptarëve për të larguar Edi Ramën, para zgjedhje, nga qeveria?

Berisha: Unë besoj se do kemi. Do mobilizojmë shqiptarët në Shqipëri, në diasporë, në emigracion dhe kudo që janë: Sot është momenti i një beteje vendimtare për shpëtimin e Shqipërisë. Nuk është këtu asnjë interes i Sali Berishës. Sali Berisha i ka të plotësuara të gjitha interesat e veta.

Peka: Kthehemi tek thelbi i pyetjes. Rama e kontrollon drejtësinë. Në qoftëse shpresoni se kjo drejtësi do tua rikthejë logon edhe vulën, pastaj ose nuk jeni të sinqertë kur akuzoni drejtësinë…

Berisha: Nuk është drejtësia që e mban, është Rama që e mban

Peka: Atëherë…?

Berisha: Atëherë, të rrëzojmë Ramën.

Peka: Zoti Berisha, do ngeleni peng i vulës të marrë nga Rama…?

Berisha: Fare, peng. Njerëzit duhet të kenë një gjë të qartë, duhet të meditojnë se me Edi Ramën nuk ka vulë, nuk ka logo, nuk ka sigël, nuk ka bashkim, nuk ka asgjë që mund të garantojë zgjedhje të lira. Kjo është e vërteta dhe këtë të vërtetë e kemi faktuar në mënyrën më të plotë në librin e zi të farsës elektorale. Merr vetëm patronazhistët, janë mijëra terroristë të kuq të cilët të marrin të dhënat dhe ushtrojnë terror mbi qytetarët. Një administratë e shndërruar në polici politike elektorale e faktuar në qindra mijëra herë. Atëherë cilat janë këtu, logoja, kjo, ajo, tjetër, se ky është Pëllumb Gjoka, se ky është Behar Bajri, se ky është Suel Çela. Dhe me këtë nuk ka votim, nuk ka zgjedhje se ky bën vetëm pazare, ndaj dhe këtu i kemi problemet. Unë e kuptoj që nuk është se është problem ai , por nuk zgjidh problemin. Jo, nuk e zgjidh problemin. Problemin e zgjidh largimi i Edi Ramës. Problemi i tmerrshëm është Edi Rama

Urdhëro! Kush është Edi Rama?! Edi Rama shkon e prish marrëdhëniet me Greqinë vetëm për interesin e tij. Sepse, çfarë është modeli Beleri i Ramës?! Tregon që ai është i aftë të bëjë gjithçka për të marrë çdo mandat. Prandaj edhe hajde ti përvishemi Edi Ramës, të mos bëjmë strucin, të mos bëjmë ‘na pengon kjo, na pengon ajo’. Jo! Të gjitha na erdhën këto vetëm nga Edi Rama . Kush e krijoi Lulëzim Bashën? E krijoi Edi Rama, apo jam gabim?! Kush e krijoi Pëllumb Gjokën investitor strategjik? E krijoi Edi Rama. Pra, mos të genjejmë veten. Kush e mbajti Beqajn?! E mbajti Edi Rama. Kush e mbajti Erion Veliajn?! E mbajti Edi Rama. Ai na konsideron ne armiq. Ai na poshtëron, ai poshtëron Shqipërinë , poshtëron vendin. Çdo shqiptar që ndihet sadopak patriot, smund të pranojë kurrë qëllimet e tij antishqiptare ndaj Kosovës. Unë nuk jam kurrë të mbështetet çdo veprim i Albin Kurtit por nuk kemi punë ne, ai është vend i pavarur, një vend sovran. E ka larë me gjak, ka 2200 martirë, ka 11000 të rënë viktima. Si mundet ti të sillesh ndaj këtij vendi si gangster. Po çfarë e ke atë ti? Koloni e ke? Është vend i pavarur, dhe ne durojmë një kryeministër të tillë. Mjafton për këto qëndrime ky nuk mbahet asnjë ditë kryeministër. Urdhëro tani, ndezi sherrin edhe me fqinjin tjetër. Pra, unë këtë koncept kam. Ne duhet të lëmë gjithçka dhe ti përvishemi Edi Ramës. Sigurisht, asnjë iluzion sa të jetë ai në pushtet, do marrë çdo vendim drejtësia siç i thotë ai. Po a del kryetarja e parlamentit dhe behët zëdhënësja e Lulëzim Bashës, a mund të ndodhë kjo? Po kryetarja e parlamentit s’është zëdhënëse, është për definicionin, për institucion pluhuralist . Ajo bëhet zëdhënëse e Lulëzim Bashës. Ma sollën mua këtë njoftim thotë.

Peka: Ndërkohë që zoti Bardhi mbrëmë deklaroi që në të njëjtin moment që po lexonte deklaratën Lindita Nikolla, Lulëzim Basha i thoshte Jorida Tabakut se ‘unë nuk di gjë’ .

Berisha: Sepse ska nevojë ti dijë. I di Taulanti për të. Skenari është Taulanti. Të them unë ty… edhe Bledi Çuçi kishte thënë ‘ne kemi kryetar Lulëzim Bashën. Dje ose pardje u tha në mbledhje ‘Për ne kryetar do të jetë Lulëzim Basha, pikë’. Prandaj dhe është e rëndësishme që ne duhet të mblidhemi, duhet ta përmbysim, nuk ka rrugë tjetër, përndryshe, absolutisht deri në vitin 2040 minimumi.

Peka: Pyetja e fundit. A e ka menduar Sali Berisha seriozisht edhe për ta ç’tensionuar pak raportin e PD-së me atë ç’ka ndodhur me SHBA-në dhe Anglinë të ndajë funksionin e kryetarit të partisë nga funksioni i kryeministrit?

Berisha: Sali Berisha ka menduar këtë, meqenëse ai problem ekziston atëherë shqiptarët do të votojnë. Kur Sali Berisha të fitojë zgjedhjet do të ketë një votë të dytë për kryeministrin. Po pse e nisi Sali Berisha këtë rrugë? E nisi këtë rrugë kur i kërkuan ti diktojnë parlamentit të këtij vendi. Por parlamentin se diktojnë kush kurrë sa të jetë një vend i lirë. Duke patur parasysh se ekziston ky problem unë do të pyes qytetarët shqiptarë, kaq. Dhe është zgjidhja më demokratike që mund të ekzistojë.

Peka: A mund ti fitosh zgjedhjet me këtë problem?

Berisha: 100%. As mos e diskuto atë punë. Kalbësirë si Edi Rama, ai rri se nuk ngrihemi ne, por në qoftë se ngrihemi ne në një lëvizje të qëndrueshme absolutisht ai ia mbath si Arben Ahmetaj. Asgjë të fortë nuk ka mbi krimin. Ato që vendosen mbi krimin s’janë kurrë të forta. Ato duken të frikshme, të rrezikshme, dhe janë të rrezikshme, por s’janë të forta. Ato shemben dhe ne do ti shembim.

Peka: Dhe një pyetje të fundit. Kush është kryetari i grupit parlamentar të Partisë Demokratike?

Berisha: Kryetari i grupit parlamentar të Partisë Demokratike do të përcaktohet në takimet progresive që do të bëhen. Një gjë është si sigurt. Kryetarin e grupit parlamentar të Partisë Demokratike do ta zgjedhin deputetët e Partisë Demokratike. Do të vazhdojë takime siç u lanë. Takimet kanë një pozitivistet të padiskutueshëm, do të përcaktojnë axhendat. Ishte shumë e rëndësishme axhenda që u përcaktua. Axhenda të tjera do të vijnë por ecet drejt një procesi të cilën e mirëpresim të gjithë demokratët dhe opozitarët e vërtetë.

Peka: Zoti Berisha, faleminderit.

Berisha: Faleminderit.