Me moton, “Serbia kundër dhunës”, dhjetëra mijëra qytetarë serbë protestuan sërish dje në Beograd, duke kërkuar edhe dorëheqjen e presidentit, Aleksandar Vuçiç.

Florian Biber, drejtor i Qendrës për Studime të Evropës Juglindore në Universitetin e Gracit, tha se Vuçiç po tregohet i paaftë ndaj protestës dhe kjo ka bërë që ajo të jetë më masive.

Megjithatë, ai mendon se për të hequr vëmendjen nga protestat, lideri serb po e përdor çështjen e Kosovës.

“Për më tepër, ato shërbyen si një mënyrë për të larguar vëmendjen dhe vrullin nga protestat antiqeveritare. Ai po e përdor çështjen e Kosovës si një mënyrë perfekte për të larguar vëmendjen nga sfidat e brendshme. Mbetet vetëm një nga lepujt që mund ta nxjerrë nga kapelja kur ka nevojë”, pohoi ai.

Për Vuçiçin, tensionet në Kosovë shërbejnë për qëllime të shumëfishta, shkruan Foreign Policy.

Ato përshtaten mirë me retorikën nacionaliste të Vuçiçit dhe i mundësojnë atij të luajë rolin e një burrështetasi në nivel evropian dhe ndërkombëtar. syri.net

Nejse, narrativa po ndryshon. Ministrja e Jashtme e Kosovës, e ftuar nga Blinken dhe e ulur krah tij në Riad.

Bashkimi Europian refuzon “fake news”-et dashakëqija për sanksione ndaj Kosovës.

KFOR-i zyrtarisht pranoi se dhuna e trazirave serbe në veri ishte organizuar nga grupe kriminale.

Janë shtuar dhe po shtohen dita ditës zërat e rëndësishëm në Senat e Kongres të SHBA-ve, në Parlamentin Evropian apo në parlamentet e vendeve të rëndësishme si Gjermania e Britania, që mbështesin të drejtën dhe të vërtetën e institucioneve dhe qeverisë të Kosovës.

Vuçiçi ndërkohë, pardje i premtoi Eskobarit e Lajçakut se do ta përdorë ndikimin e tij për të bindur serbët të marrin pjesë në votime, sot paska deklaruar solemnisht se serbët nuk do marrin pjesë në votime pa marrë paraprakisht autonomi. Njësoj siç gënjeu në Bruksel e në Ohër, kur para garantuesve ndërkombëtarë u zotua për marrëveshje me Kosovën, e pak ditë më vonë nga Beogradi tha se Serbia nuk do ta zbatojë marrëveshjen.

Sigurisht, ai ka mbështetësit e vet në perëndim, Serbia trashëgon një rrjet të gjerë influence, por me të tilla mashtrime të hapura edhe mbështetësit e tij do të pakësohen. Dikush thotë se Vuçiçi e ka blerë mbështetjen me armët që dërgon në Ukrainë, duke dhënë shenja se po afrohet me Perëndimin, por deri tash askush s’e ka parë Rusinë të shfaqë shqetësim.

Falë angazhimit të stafeve politike e diplomatike të qeverisë së Kosovës, falë angazhimit të gazetarëve të terrenit që faktuan çka ndodhi në veri, falë policëve të Kosovës, falë angazhimit të shumë shqiptarëve në diasporë, falë këmbënguljes së idealistëve edhe në rrjete sociale, falë opozitës së gjerë dhe shumë qytetarëve e intelektualëve jo konformistë në Shqipëri, narrativa e përgjithshme po ndryshon.

Natyrisht, vështirësitë nuk do të marrin fund dhe qeveria e Kosovës duhet të tregojë elasticitet dhe kreativitet, njëkohësisht të ruajë parimet, ashtu siç nuk bën asnjë qeveri tjetër në Ballkan. Por kjo punë nuk bëhet me “rrugë të shkurtra” në prapaskena.

Në fund, siç po më duket, prapë do të triumfojë e drejta dhe e vërteta e Kosovës. Pak rëndësi ka se kujt do t’i mbetet turpi se punoi kundër kombit të vet, fundja faqja që s’ka cipë, nuk skuqet.

Në këtë emision kemi sjellë një mori denoncimesh, hetimesh, raportimesh, jetëshkrimesh, dorëshkrimesh, dorëzimesh, gëzimesh, lumturimesh, hidhërimesh, përjetimesh, mashtrimesh, bashkimesh, tjetërsimesh, keqpërdorimesh e sa e sa imesh…

Fenomene që e deformojnë shoqërinë, marrëveshje në të mirë të disa njerëzve por që shkatërrojnë Shqipërinë.

Për çfarë kemi raportuar jemi përpjekur të gjejmë edhe përgjegjësit. Kemi treguar me fakte, me figurë e zë se kush janë abuzuesit.

Por, për të gjithë këto gjëra që nuk shkojnë mirë, ka dhe një përgjegjës për të cilin nuk flasim shumë:

Shqiptari që fle gjumë. Ai që sytë i ka hapur por që nuk do të shohë. Ai që lajmet që dalin nga investigimet tona i dëgjon, por nuk do që ti kuptojë; ai që del në protestë për reality shoë, por nuk shqetësohet që për të gjitha taksat që i merren, nuk merr asnjë shërbim; ai që bëhet luftarak vetëm për termat Prind 1 e Prind 2, por është i shurdhër kur ne i tregojmë që thith ajër kancerogjen dhe që fëmijët e tij mund të rriten dhe pa prindër. Madje nuk kanë as guximin që të ndihen keq për atë që i bën keq se kanë frikë se mos ndihen më keq…

Ne nuk po bëjmë thjesht një emision, ne po përpiqemi të hedhim dritë aty ku nuk ka guxim askush. Ne kemi faktuar ujin e pisët që na shitet si ujë i pijshëm dhe na faturohet si shampanjë, kemi sjellë dëshmi për inceneratorët ose në shqip, hirëzuesit, kemi zbuluar trafikun e votuesve me ndryshim adresash, kemi zbardhur dhunimin e votuesve nga kryetarët e bashkive, kemi faktuar abuzimet me tenderat….e sa e sa të tjera.

Ne, PIRANJAT, duke e lënë modestinë jashtë dere, e themi me plot gojë e bindje që edhe këtë sezon kemi bërë punë të shkëlqyer.

Por, sfida jonë më e madhe nuk është me shurdhërinë e institucioneve e deri SKAP-it, më falni SPAK-ut, para denoncimeve tona, por mpirja e ndërgjegjes qytetare.

Qëllimi ynë nuk është thjesht denoncimi i së keqes, por zgjimi i shqiptarëve që flenë gjumë dhe që këto të këqija po e vrasin në gjumë…

Na kanë kërcënuar, na kanë paditur për të na trembur e për të na mbyllur. Janë përpjekur të na blejnë, bllokojnë, fshijnë, censurojnë..

Por ja ku jemi. Në opozitë me pushtetin, sepse ky është roli i çdo mediaje serioze.

Sezonin tjetër do të rikthehemi dhe më të fortë, dhe me më shumë guxim, sepse, Shqipëria ka shumë nevojë për atë që ne bëjmë: të bëjmë dritë, derisa të gjithë të zgjohen.

Shqipëria ku nuk do ketë më nevojë për Piranja, do të jetë Shqipëria prej nga askush nuk ikën e ku gjithkush do ketë dëshirë të jetojë dhe ku vlerat e vërteta të jenë prirëse të jetëve tona e demokracia dhe meritokracia të zënë rrënjë…Derisa ta bëjmë këtë Shqipëri.

Ju faleminderit që na keni ndjekur. Do rikthehemi. syri.net

Deputeti i Lëvizjes Vetëvendosje, Artan Abrashi ka thënë se ndërkombëtaret po e shfrytëzojnë kryeministrin e Shqipërisë, Edi Rama meqë është i kapur që t’i bëjë favore presidentit serb, Aleksandar Vuçicc.

Abrashi përmes një postimi në Facebook, të njëjtit do ta hedhin Ramën në rrugë ose në burg si një limon të shtrydhur, që si hynë në punë as piktorit për një tablo me natyrë të vdekur.

‘Me shumë gjasa, edhe dikush nga ndërkombëtarët po e shfrytëzon Edi Ramën meqë është i kapur që t’i bëjë favore Aleksandër Vuçiqit. Në fund, të njëjtit, do ta hedhin Ramën në rrugë ose në burg. Porsi një limon të shtrydhur, që s’i hyn në punë as piktorit për një tablo me natyrë të vdekur.’- ka shkruar ai në një postim në Facebook. syri.net

Ish-presidenti amerikan, Donald Trump, nisi menjëherë një fushatë për mbledhje fondesh pasi u bë e ditur se ndaj tij janë ngritur shtatë akuza për mënyrën se si i ka trajtuar informacionet e klasifikuara.

Gjatë një reagimi për mbështetësit e tij, Trump tha se kjo është ndërhyrje në procesin zgjedhor, ndërsa vazhdoi të sulmonte miliarderin majtist, George Soros.

“Kjo nuk është gjë tjetër veçse një akt i neveritshëm i ndërhyrjes në zgjedhje nga partia në pushtet për të eliminuar opozitën dhe për të grumbulluar kontroll total mbi vendin tonë”.

“Shteti i Thellë (Deep State) mendoi se e kishte shkatërruar fushatën tonë kur një prokuror i mbështetur nga Soros më paditi dhe madje më arrestoi në fillim të këtij viti.

Por më pas, ne i shokuam ata ndërsa fushata jonë u forcua edhe më shumë. Ne thyem rekorde në mbledhjen e fondeve. 3 sondazhe të pavarura treguan se ne e mundim Joe Biden me 7 pikë. Në fakt, sondazhet tregojnë se unë jam i vetmi republikan që mund ta mposht Joe-n e pandershëm”.

“Pra, pasi një prokuror i shtetit dështoi që të na thyente, ‘Deep State’ i ashpërsoi sulmet e tij dhe lëshoi një prokuror federal që të tentonte të na rrëzonte.

Por më lejoni të jem sa më i qartë që të jetë e mundur. Pa marrë parasysh sa egërsisht më sulmojnë, unë KURRË, KURRË nuk do t’ia dorëzoj vendin tonë të majtës radikale dhe nuk do të përfundoj KURRË këtë fushatë presidenciale që ju vë ju në plan të parë,” tha Trump. syri.net

Derisa përmendet opsioni i zgjedhjeve të reja lokale në veri të Kosovës, kryetarët shqiptarë të katër komunave me shumicë serbe atje thonë se janë duke kryer detyrat që ua kërkon mandati.

Këta kryetarë kanë dalë nga zgjedhjet e jashtëzakonshme të 23 prillit në Mitrovicë të Veriut, Zveçan, Zubin Potok dhe Leposaviq, por me më pak se 4% mbështetje nga votuesit. Popullata shumicë serbe, pas thirrjeve të përfaqësuesve të saj politikë, i ka bojkotuar ato zgjedhje.

Hyrja e kryetarëve shqiptarë në objektet komunale më 26 maj, përkundër rezistencës së banorëve lokalë, ka shkaktuar tensione në këtë zonë, që vazhdojnë edhe sot.

Situata ka qenë më e qetë vetëm në Mitrovicë të Veriut, ku objekti i komunës është i ndarë fizikisht sipas sistemit të Kosovës dhe atij të Serbisë. Në tri komunat e tjera, ato objekte janë shfrytëzuar nga kryetarët e mëparshëm serbë.

Për shtensionimin e situatës, komuniteti ndërkombëtar ka kërkuar tërheqjen e kryetarëve shqiptarë dhe mbajtjen e zgjedhjeve të reja lokale – për çka nuk ka marrë ende përgjigje në praktikë nga institucionet e Kosovës.

Zeqiri nga fshati Çabër: Jemi duke kompletuar kabinetin

I kontaktuar nga Radio Evropa e Lirë, kryetari i Zubin Potokut, Izmir Zeqiri, thotë se si pasojë e situatës së krijuar, aktualisht, është duke ushtruar detyrën e tij nga Zyra për Komunitete në fshatin Çabër të kësaj komune.

Ai tregon se është në përfundim e sipër të kompletimit të kabinetit, i cili, siç thotë, do t’i ketë 14 drejtori – nga arsimi deri te shëndetësia.

“Do të nisim me prioritetet që kanë qytetarët e kësaj komune. Do të fillojmë me punë të vogla, por që janë të rëndësishme”, thotë Zeqiri.

Ai thotë se, deri më tani, nuk ka marrë ndonjë kërkesë nga qytetarët për ndonjë shërbim komunal. Por, siç shprehet, janë disa kërkesa të mëparshme që kanë qenë në proces, e që janë duke u shqyrtuar – mes tyre, asfaltimi i disa rrugëve dhe ndriçimi në disa lagje të fshatrave.

Zeqiri thotë, po ashtu, se ka pasur takime me disa kryetarë të komunave të tjera, si Mitrovicë e Veriut, Vushtrri dhe Drenas, dhe se ata janë në proces të nënshkrimit të disa marrëveshjeve mirëkuptimi në fusha të ndryshme.

Peci nga fshati Lipë: Kemi kërkesa nga banorët

Për të njëjtat arsye, kryetari i Zveçanit, Ilir Peci, thotë se është duke punuar nga Zyra për Komunitete në fshatin Lipë të kësaj komune.

Edhe ai thotë se është në kompletim e sipër të kabinetit dhe se, në të njëjtë kohë, është duke pranuar kërkesa nga banorët shqiptarë të disa fshatrave.

“Kemi vizituar fshatin Zhazhë dhe aty kemi pasur kërkesa për ndërtimin e dy shtëpive për dy familje shqiptare. Kemi parë se ato kanë nevojë për këto shtëpi dhe po shohim se cilat janë procedurat që duhet ndjekur ne si komunë për ndërtimin e tyre”, thotë Peci për Radion Evropa e Lirë.

Një tjetër kërkesë e bërë nga qytetarët, shton ai, është edhe pastrimi i rrugëve të disa fshatrave.

Kryetari i Leposaviqit, Lulzim Hetemi, nuk iu përgjigj interesimit të Radios Evropa e Lirë për të biseduar për aktivitetet e tij.

Ngjashëm as kryetari i Mitrovicës së Veriut, Erden Atiq. Megjithatë, ai ka postuar në llogarinë e tij në Facebook disa nga aktivitetet e veta, që përfshijnë emërimin e “disa drejtorëve të drejtorive komunale”.

Në një tjetër postim të tijin thuhet se Komuna e Mitrovicës së Veriut ka funksionalizuar E-Kioskun – platformë që u mundëson qytetarëve të pajisen më lehtë dhe më shpejt me dokumente civile.

Sipas Atiqit, ky shërbim ka ekzistuar edhe në të kaluarën, por nuk ka qenë funksional.

Atiq ka thënë më herët se në fokus të punës së tij do të jenë: zhvillimi ekonomik lokal dhe ofrimi i shërbimeve efikase për qytetarët.

Çfarë thotë shoqëria civile?

Bekim Salihu, hulumtues i lartë në Institutin për Hulumtime të Avancuara GAP dhe njohës i pushtetit lokal, thotë se kryetarët e komunave në veri, në aspektin legjislativ, janë të plotfuqishëm, por, në aspektin praktik, kanë vështirësi për kryerjen e detyrave.

“Për rrjedhojë nuk mund të pritet që kryetarët e komunave ta kenë fuqinë e plotë në terren, sidomos sa u përket investimeve kapitale, pasi që atje ka banorë që i rezistojnë autoritetit të kryetarëve aktualë dhe kjo, padyshim, do të shkaktojë kufizime dhe mungesë të rezultateve në terren”, thotë Salihu për Radion Evropa e Lirë.

Sipas tij, ushtrimi i detyrave jashtë ndërtesave komunale nuk parqet ndonjë problem.

Ligji për vetëqeverisje, sqaron Salihu, e specifikon që kryetarët duhet të jenë banorë të atyre komunave, por nuk e thotë askund se duhet të jenë patjetër në objektet përkatëse publike.

“Madje, rekomandimet e qeverisjes së mirë thonë që kryetarët e komunës duhet të jenë më shumë në terren sesa në zyra dhe, për rrjedhojë, mandati i tyre dhe funksioni i tyre nuk lidhen për objektin përkatës për të ushtruar detyrën”, thotë Salihu.

Kryeministri Kurti këmbëngul që kryetarët e rinj shqiptarë të komunave në veri, duhet t’i ushtrojnë detyrat e tyre nga objektet komunale, duke argumentuar se ato janë prona të Republikës së Kosovës.

Në filllim të muajit maj, revista javore e gazetës Nju Jork Tajms, botoi një artikull të gjatë mbi presidentin e Serbisë Aleksandër Vuçiç që përmbante hollësi mbi dyshimet për lidhjet e tij me një grup kriminal, pjesëtarë të të cilit po ndiqen penalisht nën akuzat për kryerjen e një sërë krimesh, përfshirë trafik droge dhe vrasje.

Artikulli tërhoqi vëmendje ndërkombëtare dhe jo vetëm në Ballkan, ku rrjete të gazetarisë investigative kanë raportuar më parë mbi dyshime të ngjashme, të cilat zoti Vuçiç i ka mohuar.

Departamenti i Shtetit nuk pranoi të komentonte mbi besueshmërine e pretendimeve që ngriheshin në artikullin e Nju Jork Times-it, megjithatë të paktën një zyrtar i lartë i Departamentit të Shtetit e shpërndau lajmin në rrjetin e tij social.

Dyshimet e ngritura në artikull u shtruan edhe gjatë një seance dëgjimore në Kongresin e Shteve të Bashkuara mbi Ballkanin Perëndimor, muajin e kaluar.

Megjithatë, analistët e pavarur i shprehin hapur mendimet e tyre.

“Ishte një artikull tronditës dhe i tmerrshëm, që zyrtartët më të lartë të qeverisë janë kaq të lidhur me grupet kriminale. Mendoj se e kemi parë një gjë të tillë dhe në mjaft vënde të tjera, kjo ndërthurje mes qeverive autoritare dhe rrjeteve kriminale është një shqetësim në rritje”, tha për shërbimin serb të Zërit të Amerikës, Gary Kalman, drejtor ekzekutiv i organizatës Transparency International në Shtetet e Bashkuara.

“Është e tmerrshme. Është vërtet shumë keq”, thotë Susan Rose-Ackerman profesore e ligjit dhe shkencave politike në universitetin “Yale” dhe bashkëautore e librit “Korrupsion dhe Qeverisje”.

Ajo i tha Zërit të Amerikës se lidhjet mes njerëzve që janë në pushtet dhe krimit të organizuar, krijojnë një formë ekstreme të korrupsionit politik.

Sipas artikullit të Nju Jork Times-it, lidhjet e policisë me grupin kriminal që drejtohej nga huligani i futbollit, Veljko Belivuku, ishin të dokumentuara.

Ndër të tjera, në artikull shkruhet se, “nuk ka shumë dyshime se Belivuku dhe grupi i tij janë në burg pasi EUROPOL-i arriti të dëshifronte aplikacionin për mesazhe telefonike ‘Sky – ECC’, të cilin ata e përdornin për të komunikuar”.

Autori i artikullit, gazetari Robert F. Worth shkruante se Belivuku kishte dëshmuar në një seancë gjyqësore “se banda e tij ishte organizuar për nevojat dhe me urdhër të Aleksandër Vuçiçit”.

Mes të tjerash ai vinte në dukje se grupi kishte frikësuar kundërshtarët politikë të zotit Vuçiç dhe kishte parandaluar tifozët në ndeshjet e futbollit, që të lëshonin thirrje kundër zotit Vuçiç.

Gazetari thotë se ishte skeptik që Presidenti Vuçiç të mos kishte qenë në dijeni të atyre që kishte bërë ky grup duke qenë se zoti Vuçic “ushtron tani thuajse kontroll të plotë në çdo aspekt të jetës publike”, në Serbi.

Konteksti ndërkombëtar

Zoti Vuçiç është pjesë e politikës që nga vitet ‘90. Ai ka shërbyer si ministër i Informacionit në qeverinë e Slobodan Milosheviçit, ku ai drejtoi sulme të ashpra ndaj shtypit dhe mbështeti në mënyrë publike kriminelët serbë të luftës.

Forca e tij politike, Partia Përparimtare Serbe është në pushtet prej më shumë se 10 vjetësh, periudhë gjatë të cilës ai ka mbajtur gjithashtu edhe detyrën e kryeministrit.

Këshilltarët për media të zotit Vuçiç nuk pranuan kërkesën për komente të dërguar nga gazetari Worth, por gjatë një interviste për televizionin pro qeveritar Happy Tv në Serbi, zoti Vuçiç tha se “artikulli absurd i Nju Jork Times-it ishte i porositur” dhe se ai e kuptonte se ishte një mesazh pikërisht në kohën që mbahet dialogu për normalizimin e marrëdhënieve mes Sebisë dhe Kosovës.

Kosova shpalli pavarësinë nga Serbia në vitin 2008, por kjo e fundit nuk e ka njohur kurrë pavarësinë e saj.

“Unë e di si punojnë ata, CIA po bëhet gati, CIA të sheh dhe nëse nuk je i mirë dhe i dëgjueshëm, ky është vetëm fillimi”, tha zoti Vuçiç në intervistën për ‘Happy TV’.

Prej vitesh, është bërë praktikë e zakonshme që autoritetet serbe të paraqesin çdo kritikë si tradhëti, komplot kundër vendit, ose komplot për të përmbysur qeverinë.

Si gazetari Worth edhe redaksia e gazetës Nju Jork Times i hodhën poshtë këto akuza.

Analistët që biseduan me Zërin e Amerikës vunë në dukje se aspekti më domethënës i artikullit ishte fakti se ishte publikuar në gjuhën angleze, në një media me integritet dhe që ka një numër të lartë lexuesish.

“Artikulli dha një tabllo të Aleksandër Vuçiçit dhe qeverisë të tij, duke e vënë atë në një kontekst ndërkombëtare, përderisa publikohet në Nju Jork Times”, tha për Zërin e Amerikës Tanya Domi, profesore në Shkollën për Çështjet Publike dhe Ndërkombëtare në Universitetin e Kolumbias. “Të gjithë mund ta lexojnë artikullin”.

A është Serbia një partner i besueshëm për Shtetet e Bashkuara?

“A është ky artikull i besueshëm”, e pyeti senatori Bob Menendez Këshilltarin e Departamentit amerikan të Shtetit Derek Chollet, gjatë seancës dëgjimore të komisionit për Marrëdhëniet me Jashtë të Senatit mbi angazhimin amerikan ndaj Ballkanit Perëndimor, duke iu referuar Nju Jork Times-it.

“Besojmë se po. Nuk mund të flas mbi detaje të veçanta të artikullit, por absolutisht ka shumë korrupsion”, u përgjigj zoti Chollet, ndërsa në krah të tij qëndronte zëvendës ndihmës sekretari i Departamentit Amerikën të Shtetit, Gabriel Escobar.

“Atëherë cilat janë pritshmëritë reale, që Serbia, me një sfond të tillë, të jetë një partner i besueshëm?, pyeti zoti Menendez.

“Po e bëjmë këtë duke ditur të gjitha problemet dhe po mbajmë përgjigjës zotin Vuçiç dhe kolegët e tij për korrupsionin, për sjelljen dhe veprimtarinë e tyre”, tha zoti Chollet, duke vënë në dukje se korrupsioni është një problem serioz në të gjithë rajonin.

Por në një intervistë për shërbimin boshnjak të Zërit të Amerikës, Kurt Bassuener nga Këshilli i Politikave të Demokratizimit, vuri në dukje se Shtetet e Bashkuara nuk kanë vënë sanksione për korrupsion ndaj asnjë zyrtari të administratës së zotit Vuçiç, ashtu siç kanë bërë në vendet fqinje.

“Në thelb ata iu shmangën çështjes”, tha zoti Bassuener, duke iu referuar zyrtarëve të Departamentit të Shtetit. “Ata nuk u morën me thelbin e atyre që ngrihen në të. Dhe mendoj se ky është një tregues se në qendër të politikës së tyre është ulja e tensioneve në rajon”.

Zonja Domi beson se Shtetet e Bashkuara dhe Perëndimi po ndjekin idenë se Serbia është “një faktor qëndrueshmërie në rajon”. Por nëse synimi i kësaj politike ndaj Ballkanit Perëndimor është që të afrojë Serbinë me Perëndimin dhe ta largojë nga Rusia, ajo thotë se nuk ka prova se një strategji e tillë mund të funksionojë.

Serbia eshtë ndër të paktat vende në Evropë që nuk ka vendosur sanksione ndaj Rusisë dhe në vend ka ndenja të forta pro-ruse.

Zoti Kalman nga organizata Transparency International thotë se strategjia e Uashingtonit ndaj Serbisë mund të ndryshojë në të ardhmen.

“Mendoj se ekziston mundësia që SHBA, duke pasur parasysh rolin e Serbisë, mund të ushtrojë trysni për të përmirësuar gjërat atje,” thotë ai.

“Deri në cilën pikë janë të gatshëm të ushtrojnë presion dhe janë apo jo të shqetësuar nga aleancat, që qeveria serbe mund të krijojë me vende që paraqesin shqetësim për sigurinë kombëtare të Shteteve të Bashkuara, dhe për këtë arsye Uashingtoni të tërhiqet, këtë nuk di ta them”, u shpreh zoti Kalman./VOA

Deputetja e partisë “Guxo”, Jeta Statovci ka publikuar një fotografi bashkë me shefen e saj në Parlament, Mimoza Kusari-Lilën, ministren Artane Rizvanolli dhe Dejona Mihalin e Lëvizjes Vetëvendosje.

Statovci ka publikuar një foto, ku shkruan ‘Duke draftuar…’, një ironi therrëse drejtuar si mesazh kryeministrit të Shqipërisë, Edi Rama i cili dy ditë më parë propozoi tek kancelari gjerman Olaf Scholz dhe presidenti francez Emmanuel Macron, një draft statut për Asosacionin e komunave me shumicë serbe.

“Duke draftuar …”, ka shkruar Statovci.

Kujtojmë se më datë 8 Qershor kryeministri i Shqipërisë, Edi Rama zbuloi se ka bërë gati draftin për Asociacionin e Komunave serbe në Veri të Kosovës. Ky draft, që synon zgjidhjen e krizës në Kosovë është hartuar pa marrë dakordësinë e kryeministrit Albin Kurtit.

Kreu i Qeverisë shqiptare, pretendon se draftin që ka përpiluar vetë me ekspertë amerikane, ua ka dorëzuar Gjermanisë e Francës, si dhe në ditët në vijim do informojë edhe presidentin e KiE, Charls Michel. Ky dokument konfidencial, sipas Ramës nuk do të bëhet kurrë publik.

Nga ana tjetër, kryeministri i Kosovës, Albin Kurti tha se mund ta thellojë draft-vizionin e paraqitur nga ai për Asociacionin e komunave me shumicë serbe, por së pari, sipas tij, duhet të ketë pajtueshmëri mes palëve. Ai nuk e komentoi draftin e përgatitur nga Rama. syri.net

Politikani gjerman Reinhard Bütikofer, që është deputet i Parlamentit Evropian, ka reaguar pas deklaratës së ambasadorit të Shteteve të Bashkuara të Amerikës në Serbi, Christopher Hill, i cili tha se Presidentin e Serbisë, Aleksandër Vuçiç e konsiderojnë si “partner të mirë”, kurse për kryeministrin e Kosovës, Albin Kurtin tha se është i pasigurt nëse ende mund të konsiderohet partner i SHBA-së.

Përmes një postimi në Twitter, Bütikofer ka thënë se kjo është “thjesht çmenduri”, raporton Express.

“Ambasadori i ShBA’së në Serbi, Christopher Hill, duke komentuar konfliktin e vështirë Serbi-Kosovë, e quan presidentin Vuçiç “partner të mirë” ndërsa vë në pikëpyetje nëse Shtetet e Bashkuara ‘mund ta konsiderojnë ende” kryeministrin e Kosovës “partner”. Thjesht çmenduri”, shkruan Bütikofer.

Hill tha dje se Shtetet e Bashkuara të Amerikës kanë probleme thelbësore me kryeministrin e Kosovës, Albin Kurti, për shkak të papajtueshmëruve për situatën e tensionuar në veri.

Hill ka thënë se është i pasigurt nëse Kurti ende mund të konsiderohet partner i SHBA-së, por ka thënë se ky vendim i takon ambasadës amerikane në Prishtinë.